1. Akapeea tetai pae i te akamaata atu anga i ta ratou tavinianga?

 E MAATA ta tatou angaanga e te vaitata maira te openga. (Mata. 24:14; Luka 10:2; 1 Pete. 5:2) Inangaro tatou pouroa i te tavini maata atu ia Iehova. Manganui tei akamaata i ta ratou angaanga tutu aere. Inangaro tetai pae i te tavini ei pania. Tetai pae, te inangaro ra i te tavini i Betela me kore i te angaanga pātu are. E e maata te au taeake tei inangaro kia riro mai ei tavini tauturu me kore ei tangata pakari. (1 Timo. 3:1, 8) Mei teaa rai to Iehova rekareka me kite i tona iti tangata e tavini maata atu ra iaia!​—Sala. 110:3; Isa. 6:8.

2. Eaa ta tatou ka rave me kare e rauka ia tatou tetai akakoroanga pae vaerua?

² Penei ka taitaia tatou me kare i rauka ake ia tatou i te itae i tetai au akakoroanga pae vaerua. Me kore, ka taitaia tatou me kare e rauka mai tetai au apainga, no to tatou mataiti me kore tetai arairaianga. (Mase. 13:12) Teia tei tupu kia Melissa. * Inangaro aia i te tavini i Betela me kore kia aere ki te Apii na te Aronga Tutu Evangeria, inara karanga aia: “Kua ruaine au i teianei, e kare au e tau kia rave i teia au apainga. I tetai au taime, ka taitaia toku ngakau.”

3. Eaa ta tetai pae ka rave kia rauka tetai au apainga?

³ Ka anoanoia te au taeake mapu e te maroiroi kia akaari i te tu pakari e te au tu meitaki kia rauka ia ratou tetai au apainga. Ei akaraanga, penei e tu kite to tetai pae, rave i te au ikianga meitaki, e te maroiroi; inara ka anoanoia ratou kia akaari i te tu akakoromaki, te angaanga  meitaki e te tu akangateitei. Me tauta koe i te akameitaki mai i teia au tu, penei ka orongaia tetai apainga kia koe i te tuatau tau. Akamanako ana i tei tupu kia Nick. E 20 ona mataiti, kua taitaia aia no tei kore i ikiia ei tavini tauturu. Karanga aia: “Manako mai au e penei e au ngai tarevake tetai.” Inara kare a Nick i tuku ana i te ‘au. Kua rave maroiroi aia i te angaanga tei orongaia kiaia. I teia rā, te tavini nei aia ei taeake i runga i te Kumiti Betela.

4. Eaa ta tatou ka uriuri i roto i teia atikara?

⁴ Te taitaia ra ainei koe no te mea kare i rauka ake ia koe tetai akakoroanga pae vaerua? Me koia ïa, e pure kia Iehova. (Sala. 37:5-7) E pati katoa ki te au taeake tukatau kia tauturu ia koe kia akameitaki atu i taau tavinianga, e oti e taangaanga i ta ratou i apii mai. Me rave koe i te reira, penei ka taeria taau au akakoroanga. Inara, mei ia Melissa tei taikuia i mua ana, penei kare e rauka ia koe i te itae i taau au akakoroanga i teianei. Eaa i reira taau ka rave? Akapeea koe me vai rekareka ua? Kia pau i teia au uianga, ka uriuri teia atikara (1) ka kitea te rekareka kiea, (2) akapeea me akamaata i toou rekareka, e te (3) eaa te au akakoroanga te ka akamaata atu i toou rekareka.

5. Kia rauka te rekareka, eaa ta tatou ka rave? (Koheleta 6:9)

⁵ Apii maira a Koheleta 6:9, akapeea e rauka ai ia tatou te rekareka. (E tatau.) Tetai tangata tei rekareka i “tei rauka ua mai” iaia, te mareka ra aia i tona turanga i teianei. Inara, ko tetai tangata te apeape ra i tei kore i rauka iaia, kare aia e mareka. Eaa te apiianga no tatou? Kia rauka te rekareka, ka akamou tatou ki runga i te au mea tei rauka ia tatou, e ki runga i te au akakoroanga te ka rauka ia tatou i te itae.

6. Eaa te parapore ta tatou ka uriuri, e eaa ta tatou ka apii mai?

⁶ Ka rauka ainei ia koe kia mareka ua i taau i rauka? Ae. Inara, me pou tetai tuatau, e mea natura ua no te tangata kia kimi i te rave i tetai angaanga ou. Ka rekareka tatou me kare tatou e aru i te au mea ta to tatou mata ka kite atu. Akapeea tatou me rave i te reira? Ka akara tatou i ta Iesu parapore no te tareni i roto ia Mataio 25:14-30. Ka apii tatou akapeea e rauka ai te rekareka e akapeea me akamaata atu i te reira i roto i to tatou turanga i teianei.

7. Akakite poto mai i ta Iesu parapore no te tareni.

⁷ I roto i te parapore, te akapapa ra tetai tangata no tona tere. I mua ake ka aere ei aia, kua oronga aia i tetai au tareni ki tona au tavini kia taangaanga. * Kua kite aia i ta ratou ka rauka i te rave, no reira kua oronga aia e rima tareni ki tetai, e rua ki tetai, e tai ki te toru o te tavini. Kua angaanga pakari e rua nga tavini kia maata mai te moni a te pu. Inara, kare te toru o te tavini i taangaanga i te moni tei orongaia kiaia, no reira kua akaateaia aia ki vao.

8. Eaa te tumu i rekareka ai te tavini mua?

⁸ Penei kua mataora te tavini mua e kua oronga te pu e rima tareni kiaia. E ākā moni teia, e te akaari maira te reira e kua irinaki tikai te pu iaia! Akapeea te rua o te  tavini? Penei kua taitaia aia no te mea kare i aite tana tareni ki ta te tavini mua. Inara eaa tana i rave?

9. Eaa ta Iesu kare i taiku mai no runga i te rua o te tavini? (Mataio 25:22, 23)

⁹ E tatau ia Mataio 25:22, 23. Kare a Iesu i tuatua ana e kua riri te rua o te tavini. Kare katoa a Iesu i tuatua ana e kua tarotaro teia tavini: ‘Ko teia ua ainei taku? Kua aite toku tu karape ki te tavini mua tei orongaia e rima tareni! Me ka manako toku pu e kare e meitaki ana taku angaanga, e ngari ake au i te uuna i teia nga tareni e te aere i te rave i toku uaorai anoano.’

10. Eaa ta te rua o te tavini i rave ki tana tareni?

¹⁰ Mei te tavini mua rai, kua akaperepere maata te rua o te tavini i te apainga tei orongaia kiaia e kua angaanga maroiroi aia. Tei tupu, kua rauka mai e rua akaou tareni na tona pu. Kua akameitakiia teia tavini no tana angaanga i rave. Kua mataora te pu e kua oronga atu ki teia tavini i te au apainga maata!

11. Akapeea tatou me akamaata atu i to tatou rekareka?

¹¹ Mei te reira rai, ka rauka ia tatou i te akamaata i to tatou rekareka na te rave maroiroi i te angaanga tei orongaia mai no te tavini ia Iehova. Kia maroiroi tatou i te rave i te angaanga tutu aere, e te au angaanga a te putuputuanga. (Anga. 18:5; Ebe. 10:24, 25) Akapapa meitaki no te au uipaanga kia rauka ia koe i te oronga i te au pauanga akamaroiroi. Rave meitaki i te au tuanga apii  ka orongaia kia koe i ko i te au uipaanga. Me patiia koe kia rave i tetai angaanga na te putuputuanga, kia tae vave koe e kia irinakiia. Auraka e manako e kare tetai angaanga e puapinga ana, e kare koe e akapou i toou taime no te reira. E tauta i te akameitaki atu i toou tu karape. (Mase. 22:29) Me rave maroiroi koe i taau au angaanga pae vaerua, ka meitaki atu taau tavini anga e ka maata atu toou rekareka. (Gala. 6:4) E ka rekareka katoa koe i tetai ke me orongaia kia ratou tetai apainga taau i inangaro ana.​—Roma 12:15; Gala. 5:26.

12. Eaa ta tetai nga Kite i rave kia akamaata atu i to raua rekareka?

¹² Te maara ra ia koe ia Melissa, te tuaine tei inangaro i te tavini i Betela me kore kia aere ki te Apii na te Aronga Tutu Evangeria? Noatu kare i rauka iaia i te rave i te reira, karanga aia: “Ka tauta au i te akamaata i taku angaanga painia e te rave i te au tuanga tukeke o te reira. Kua akatupu teia i te rekareka maata kiaku.” Akapeea a Nick i te akakoromakianga i te tuatau kare aia i ikiia ei tavini tauturu? “Kua akamou au ki runga i te angaanga tei orongaia mai kiaku​—te angaanga tutu aere e te oronga i te au pauanga akamaroiroi i ko i te au uipaanga. Kua akaki au i te patianga kia aere ki Betela e kua ārikiia au i te mataiti i muri mai.”

13. Eaa te ka tupu me rave maroiroi koe i taau tuanga angaanga? (Koheleta 2:24)

¹³ Me rave maroiroi koe i taau tuanga angaanga, ka orongaia ainei tetai au apainga maata kia koe a te tuatau ki mua? Penei paa. Kua tupu ana te reira kia Nick. Me kare ra, mei ia Melissa, ka rauka rai ia koe te rekareka maata e te mataora no taau i rauka i te rave no Iehova. (E tatau ia Koheleta 2:24.) Tei maata atu, ka rekareka maata koe i te kite e te mareka maira to tatou Pu, ko Iesu, i taau tauta anga.

14. Eaa ta tatou ka akamaara no runga i ta tatou au akakoroanga pae vaerua?

¹⁴ Me akamou ua tatou ki runga i te tuanga angaanga tei orongaia mai, ko te aiteanga ainei e kare tatou e akamaata atu i ta tatou tavini anga ia Iehova? Kare! Ka rauka ia tatou i te akanoo i te au akakoroanga pae vaerua te ka akamaata atu i ta tatou angaanga tutu aere e te tauturu i te au taeake e te au tuaine. Ka taeria teia au akakoroanga me akamou tatou ki te tauturu anga i tetai ke, e kare ia tatou uaorai.​—Mase. 11:2; Anga. 20:35.

15. Eaa tetai au akakoroanga te ka akamaata atu i toou rekareka?

¹⁵ Eaa te au akakoroanga taau ka rauka i te akanoo? E pati i ta Iehova tauturu kia kite koe i te au akakoroanga ka rauka ia koe i te itae. (Mase. 16:3; Iako. 1:5) Ka rauka ainei ia koe i te itae i te au akakoroanga tei taikuia i te  parakarapa mua o teia atikara​—kia tavini ei painia tauturu, ei painia tamou, ki te opati Betela, me kore kia piri ki te au angaanga pātu are akamorianga? Penei ka apii koe i tetai reo ou no te tutu aere ki tetai au ngai ke. Kia kite eaa te ō maira, e tatau i te pene 10 o te puka Akaaereia no te Rave i to Iehova Anoano, e kia tuatua atu ki te aronga pakari i roto i taau putuputuanga. * Me tauta koe i te itae i teia au  akakoroanga, ka kiteaia toou tupu anga pae vaerua e ka maata atu toou rekareka.

16. Eaa taau ka rave me kare e rauka ia koe i te itae i tetai akakoroanga?

¹⁶ Akapeea i reira me kare e rauka ia koe i te itae i tetai o teia au akakoroanga? E akanoo i tetai akakoroanga ou, tetai te ka rauka ia koe i te itae. E tamata i teia au ravenga.

17. Ia 1 Timoteo 4:13, 15, akapeea tetai taeake e riro mai e ei puapii meitaki?

¹⁷ E tatau ia 1 Timoteo 4:13, 15. Me e taeake koe kua papetitoia, penei ka rauka ia koe i te akameitaki atu i taau akoanga e te apiianga. No teaa ra? Me tauta koe kia akameitaki atu i taau tatau, ako, e te apii, ka akamaroiroiia te aronga ka akarongo mai kia koe. E tauta i te apii e te taangaanga i te au manako i roto i te poroutia Akamaata Atu i to Tatou Karape i te Tatau e te Apii. E apiipii i te reira i te kainga, e kia akaari i roto i taau akoanga. Pati i te tauturu a te tangata tauturu ako me kore tetai tangata pakari “tei angaanga i te ako e te apii.” * (1 Timo. 5:17) Tauta kia mārama i te apiianga i roto i te poroutia, tauturu i te putuputuanga kia akamatutu i to ratou akarongo, e te akakeu ia ratou kia taangaanga i ta ratou i apii mai. Me rave koe i te reira, ka akamaata atu koe i toou rekareka e to ratou katoa.

18. Eaa te ka tauturu ia tatou kia itae i te au akakoroanga no te angaanga tutu aere?

¹⁸ E apainga ta tatou pouroa kia tutu aere e kia akariro i te tangata ei pipi. (Mata. 28:19, 20; Roma 10:14) Ka inangaro ainei koe i te akameitaki atu i toou  tu karape i roto i teia angaanga puapinga? E akanoo i tetai akakoroanga me apii e me taangaanga koe i te au apiianga mei te poroutia Tatau e te Apii. Ka rauka katoa tetai tauturu mei te puka Oraanga Kerititiano e te Angaanga Orometua e te au vitio akatutuanga i ko i te au uipaanga. Tamata i te au ravenga tukeke kia kite e ko teea te mea meitaki rava atu. Me rave koe i te reira, ka rauka ia koe te rekarekaanga maata ei puapii orometua Kerititiano.​—2 Timo. 4:5.

19. Akapeea koe me akatupu i te au tu Kerititiano?

¹⁹ Me iki koe i taau au akakoroanga, auraka e ngaropoina i teia mea puapinga​—e akatupu i te au tu Kerititiano. (Gala. 5:22, 23; Kolo. 3:12; 2 Pete. 1:5-8) Akapeea koe me rave i te reira? Ei akaraanga, penei ka inangaro koe i te akamatutu i toou akarongo. Ka tatau koe i te au atikara te ka oronga mai i te tauturu no te akamatutu i te reira. Ka puapinga katoaia koe me akara i te JW Broadcasting^® te ka akaari mai i te tu akarongo mou o te au taeake e te au tuaine tei na roto ana i te au tu manamanata. E oti, e akamanako i te au ravenga ka rauka ia koe i te aru i to ratou akarongo.

20. Akapeea tatou me akamaata atu i to tatou rekareka e te akaiti i te tu taitaia?

²⁰ Mea papu, te inangaro ra tatou pouroa i te tavini maata atu ia Iehova. I roto i te ao ou o te Atua, ka rauka ia tatou i te rave i te reira. Inara i teianei, me rave maroiroi tatou i te au tuanga angaanga tei orongaia mai, ka maata atu to tatou rekareka e ka akaitiia te tu taitaia. Tei maata rava atu, ka akangateitei e ka akapaapaa tatou ia Iehova, to tatou “Atua kakā.” (1 Timo. 1:11) No reira, kia rekareka i taau uaorai apainga!