1. Sar but džene trudinena pe te keren poviše ki služba bašo Jehova?

 SO POPAŠE avela o krajo akale svetoskoro, doborom poviše buti isi amen (Mat. 24:14; Luka 10:2; 1. Pet. 5:2). Sarine amen mangaja te služina e Jehovaske so šaj poviše. But džene bajrarena pli služba. Nesave mangena te služinen sar pionerija. Javera mangena te služinen ko Betel ili ki izgradba ko teokratska objektija. Hem but phralja trudinena pe te ispolninen o uslovija te šaj te služinen sar sluga-pomošnikija ili starešine (1. Tim. 3:1, 8). O Jehova tano but bahtalo keda dikhela kaj leskoro narodo tano spremno te služinel leske! (Ps. 110:3; Isa. 6:8).

2. Sar šaj te osetina amen ako na ispolningjem nesave taro amare duhovna celija?

² Ama, šaj te razočarina amen ako palo nesavo vreme panda na ispolningjem nesave taro amare duhovna celija. Ili šaj te obeshrabrina amen so našti te kera nesave bukja ki organizacija adaleske so phurilem, ili taro javera pričine (Izr. 13:12). Agjaar osetinela pe i Melisa. * Oj but bi mangela te služinel ko Betel ili te džal ki Škola bašo polnovremena objavitelija, ama vakerela: „Adaleske so sium pophuri adala bukja akana mange tane samo jekh suno. Adaleske, ponekogaš sium razočarimi“.

3. So valjani te kera te šaj te dobina nesave odgovornostija?

³ Nesave kola soj terne hem saste šaj ka valjani te oven pozrela hem te razvinen nesave osobine angleder te dobinen javera da odgovornostija. Na primer, nesave šaj tane  intelegentna, odlučna hem spremna te keren buti, ama šaj ka valjani te oven postrpliva, pošukar te keren pumari zadača hem poviše te poštujnen e javeren. Ako trudinea tut te razvine o potrebna osobine, o phralja šaj ka den tut odgovornostija keda najhari očekujnea len. Razmislin bašo Nik. Keda sine le 20 berš, but razočaringja pe so na ulo sluga-pomošniko. Ov vakerela: „Mislinava sine kaj nešto falinela mange“. Ama o Nik na otkažingja pe, nego ov ponadari da trudinela pe sine te razvinel o potrebna osobine. Trudinela pe sine te kerel sa so šaj ko sobranie hem ki služba. Hem avdive, ov služinela sar členi ko Odbor e podružnicakoro.

4. So ka dikha ki akaja statija?

⁴ Dali sian obeshrabrimo adaleske so panda na ispolningjan nesavi tli duhovno cel? Ako oja, molin tut e Jehovaske hem vaker leske so mučinela tut (Ps. 37:5-7). Isto agjaar, šaj te puče nesave zrela phralen te den tut predlogija bašo adava sar te ove pošukar ko tle zadače hem palo adava, trudin tut te primenine lengoro sovet. Ako kerea agjaar, tegani ka šaj te ispolnine tli cel. Ama slično sar i Melisa, kola so spomningjem la angleder, momentalno šaj našti te dobine i zadača koja so mangea te ovel tut. Sepak, sar šaj ponadari da te ove bahtalo? Te šaj te arakha o odgovor, ki akaja statija ka kera lafi bašo adava 1) kote šaj te arakhe bahtalipe, 2) sar te bajrare tlo bahtalipe, hem 3) save celija šaj te čhive tuke so ka keren tut te ove pobahtalo.

5. Te šaj te ova bahtale, ko so valjani te koncentririna amen? (Propovednik 6:9)

⁵ Sprema Propovednik 6:9, šaj te arakha o bahtalipe ako rodaja le ko ispravno than. (Čitin.) Okova so uživinela ko bukja so šaj jakhencar te dikhel len zadovolno tano adalea so isi le, hem ple momentalno okolnostencar. A okova so sekogaš mangela bukja so našti te oven le, nikogaš nane te ovel zadovolno. Znači, so sikljovaja amen taro akava? Te šaj te ova bahtale, valjani te koncentririna amen ko bukja so isi amen hem ko celija so šaj te ispolnina len.

6. Baši koja sporedba ka kera lafi, hem so šaj te sikljova latar?

⁶ Dali čače šaj te ove zadovolno adalea so više isi tut? But manuša mislinena kaj našti, soske amen obično mangaja te kera hem te sikljova neve bukja. Ama, ustvari šaj te ova zadovolna hem but poviše taro adava — amen šaj te uživina ko bukja so više isi amen. Sar šaj te kera adava? Te šaj te otkrina, te dikha e Isuseskiri sporedba bašo talantija koja so arakhljovela ko Matej 25:14-30. Tari akaja sporedba ka dikha sar šaj te ova bahtale hem sar šaj čak te bajrara amaro bahtalipe bašo odgovornostija so više isi amen.

7. Kratko raskažin e Isuseskiri sporedba bašo talantija.

⁷ Ki sporedba, jekh manuš spreminela pe sine te džal ko drumo. Ama angleder te džal, ov vikingja ple robon hem sekole jekheske dengja talantija kolencar so valjani sine te keren buti. * Adaleske so o manuš džanela sine sekole roboskere sposobnostija, ov dengja e prvo roboske pandž talantija, e dujto roboske duj hem jekh talanti e trito roboske. O prva duj robija kergje but buti te šaj te zarabotinen poviše pare  ple gospodareske. Ama o trito robo na kergja ništo e parencar so dobingja len hem adaleske o gospodari brkingja le tari buti.

8. Soske šaj sine o prvo robo tari sporedba te ovel bahtalo?

⁸ O prvo robo sigurno sine but bahtalo adaleske so o gospodari dengja le pandž talantija. Adaja sine bari suma pare, hem adalea o gospodari sikavgja kaj isi le but doverba ki leste. A sar sine e dujto roboja? Ov šaj sine te obeshrabrinel pe adaleske so na dobingja doborom talantija kobor o prvo robo so dobingja. Ama sar reagiringja ov?

9. So na vakergja o Isus bašo dujto robo? (Matej 25:22, 23)

⁹ Čitin Matej 25:22, 23. O Isus na vakergja kaj o dujto robo razočaringja pe hem holjangja adaleske so dobingja samo duj talantija. Hem isto agjaar o Isus na vakergja kaj ov žalingja pe hem vakergja: „Samo doborom dobingjum? Me da sium isto agjaar sposobno sar o robo so dobingja pandž talantija! Ako mlo gospodari na ceninela man, tegani šaj te parunav akala duj talantija hem te dikhav mli buti“.

10. So kergja o dujto robo ple talantencar?

¹⁰ Isto sar o prvo robo, o dujto da robo halilo kaj i zadača so dengja le leskoro gospodari sine but važno hem adaleske kergja but buti ple gospodareske. Sar rezultati, zarabotingja duplo poviše. O gospodari nagradingja akale robo bašo leskoro baro trudo. Na samo so o gospodari sine bahtalo, nego isto agjaar dengja le poviše odgovornostija.

11. Sar šaj te ova pobahtale?

 ¹¹ Slično, amen šaj te bajrara amaro bahtalipe ako celo dušaja keraja bilo koja zadača so ka dobinala ki služba bašo Jehova. Ov „celosno zafatimo“ ki služba, hem ko sobraniska aktivnostija (Dela 18:5; Evr. 10:24, 25). Spremin tut šukar bašo sostanokija te šaj te de ohrabruvačka komentarija. Dikh seriozno ki bilo koja zadača so dobinea la ko sostanok Amaro životo hem služba. Ako zamolingje tut te pomožine ki nesavi sobranisko zadača, iker tut ko vreme hem ov odgovorno. Ma mislin kaj i zadača so dengje tut nane važno hem kaj na valjani te trošine tlo vreme ki late. De tutar sa te šaj te ove povešto ki tli zadača (Izr. 22:29). So pozafatimo ka ove ko tle duhovna aktivnostija hem zadače, doborom posigate ka napredujne hem ka ove pobahtalo (Gal. 6:4). Isto agjaar, ka ovel tuke polokho te ove bahtalo keda o javera ka dobinen i zadača koja so tu bi mangea te dobine la (Rim. 12:15; Gal. 5:26).

12. So pomožingja duje objavitelenge te oven pobahtale?

¹² Dali setinea tut ki Melisa, i phen koja so mangela te služinel ko Betel ili te džal ki Škola bašo polnovremena objavitelija? Iako našti te ispolninel akala celija, oj vakerela: „Dava mandar sa ki pionersko služba hem trudinava man te učestvujnav ko različna metode propovedibaske. Akava angja mange baro bahtalipe“. Hem so kergja o Nik adaleske so sine razočarimo keda na sine imenujmo sar sluga-pomošniko? Ov vakerela: „Koncentriringjum man ko adava so šaj sine te kerav — te džav ki služba hem te dav ohrabruvačka komentarija ko sostanokija. Isto agjaar, dengjum molba bašo Betel hem o javer berš vikingje man adari“.

13. So ka ovel ako sian celosno zafatimo e zadačencar so isi tut akana? (Propovednik 2:24)

¹³ Dali ka dobine poviše odgovornostija ki idnina, ako sian celosno zafatimo ko tle zadače so isi tut akana? Isto sar o Nik, tu da šaj te dobine. Ama ako na, tegani isto sar i Melisa, šaj te bajrare tlo bahtalipe hem ka ove zadovolno bašo adava so šaj te kere e Jehovaske. (Čitin Propovednik 2:24.) Isto agjaar, ka ove bahtalo adaleske so džanea kaj amaro Gospodari, o Isus Hristos tano zadovolno tuja.

14. So na valjani te bistra keda razmislinaja bašo amare duhovna celija?

¹⁴ Dali adava so siem zadovolna e zadačencar so isi amen akana značinela kaj na valjani te trudina amen te bajrara amari služba bašo Jehova? Ni hari! Amen valjani te čhiva amenge duhovna celija kola so ka pomožinen amenge te ova pošukar ki služba hem te pomožina amare phralenge hem phenjenge. Ka uspejna te ispolnina adala celija ako na koncentririnaja amen ki amende, nego mudro hem skromno trudinaja amen te služina e javerenge (Izr. 11:2; Dela 20:35).

15. Kola tane nesave celija so šaj te pomožinen tuke te ove pobahtalo?

¹⁵ Save celija šaj te čhive tuke? Molin e Jehova te pomožinel tuke te haljove kola celija šaj te ispolnine (Izr. 16:3; Jak. 1:5). Šaj li te trudine tut te ispolnine jekh taro celija soj spomnime ko  prvo pasus — te ove pomošno ili opšto pioneri, te služine ko Betel ili te služine ki izgradba bašo teokratska objektija? Ili šaj te sikljove nevi čhib te šaj te propovedine e manušenge ko javer podračje. Šaj te doznajne nešto poviše bašo nesave taro akala celija ako čitinea o 10 poglavje  taro lil Organizirani za da ja vršime Jehovinata volja hem ako kerea lafi e starešinencar taro tlo sobranie. * Keda trudinea tut te ispolnine akala celija, o javera šaj te dikhen kaj duhovno napredujnea hem ka ove pobahtalo.

16. So šaj te kere ako akana našti te ispolnine nesavi cel?

¹⁶ Ama so ako našti te ispolnine jekh taro akala celija so spomningjem len angleder? Tegani, trudin tut te čhive tuke nesavi cel koja so šaj te ispolnine la. Dikh save javera celija šaj te čhive tuke.

17. Sprema 1. Timotej 4:13, 15, so šaj jekh phral te kerel te šaj te ovel pošukar učiteli?

¹⁷ Čitin 1. Timotej 4:13, 15. Ako sian krstimo phral, šaj te trudine tut te ove pošukar govorniko hem učiteli. Soske? Ako trudinea tut pošukar te čitine, te ove pošukar govorniko hem učiteli, tegani ka šaj poviše te pomožine okolenge so šunena tut. Šaj te čhive tuke cel te proučine hem te primenine sekoja lekcija tari brošura Ov sa pošukar ko čitibe hem sikajbe. Proučin sekoja lekcija posebno, vežbin la khere šukar hem trudin tut te primenine la keda isi tut govorija. Rode predlogija taro pomošno sovetniko hem taro javera starešine kola so but trudinena pe te oven šukar govornikija hem učitelija * (1. Tim. 5:17). Ma koncentririn tut samo ko adava sar ka primenine i lekcija, nego isto agjaar dikh sar šaj te pomožine okolenge  so šunena tut te bajraren pumari vera hem te pottiknine len te primeninen adava so šunena. Ako kerea agjaar, ka bajrare tlo bahtalipe hem okolengoro so šunena tut.

18. So šaj te pomožinel amenge te ispolnina amare celija ki služba?

¹⁸ Sarinen amen isi amen zadača te propovedina hem te kera učenikija (Mat. 28:19, 20; Rim. 10:14). Mangea li te ove povešto ki akaja najvažno zadača? Čhiv tuke konkretna celija džikote proučinea hem primeninea adava so sikljovea tari brošura Čitibe hem sikajbe. Poviše predlogija šaj te arakhe ko Amaro životo hem služba — listija spremibaske hem o videoklipija kolende so isi predlogija bašo razgovor. Probin poviše predlogija te šaj te dikhe kova najšukar odgovorinela. Ako primeninea akala bukja, ka ove povešto ki služba hem akava ka kerel tut pobahtalo (2. Tim. 4:5).

19. Sar šaj te razvine o hristijanska osobine?

¹⁹ Na valjani te bistre kaj i najvažno cel koja so šaj te čhive la tuke tani te razvine o hristijanska osobine (Gal. 5:22, 23; Kol. 3:12; 2. Pet. 1:5-8). So valjani te kere te šaj te ispolnine akaja cel? Na primer, šaj mangea te ovel tut pozorali vera. Šaj te čitine statie taro amare publikacie kote so isi sovetija bašo adava sar te kere pozorali tli vera. Isto agjaar sigurno but ka koristinel tuke ako dikhea delija taro JW Broadcasting^® kote soj sikavdo sar amare phralja hem phenja sikavgje bari vera džikote soočingje pe različna nevoljencar. Palo adava, razmislin ko save načinija šaj te sikave sar lengiri vera ko tlo životo.

20. Sar šaj te ova pobahtale hem pohari razočarime?

²⁰ Sigurno sarine amen mangaja te kera poviše bašo Jehova nego so keraja akana. Ko nevo sveto, ka šaj te služina leske celosno. Ama dži tegani, ako koristinaja sekoja prilika so isi amen panda akana, šaj te ova pobahtale hem te na ova doborom razočarime. Ama soj najvažno, ka ana čest hem slava e Jehovaske, amare bahtale Devleske (1. Tim. 1:11). Adaleske, te ova bahtale bašo bukja so akana šaj te kera len e Jehovaske!