1. So ćerena o phralja hem o phenja te šaj te služinen e Jehovase pana pobuter?

 SAR o krajo ando akava sveto avela sa popaše, isi amen pana pobari buti ki amari služba (Mat. 24:14; Luka 10:2; 1. Petr. 5:2). Sare amen mangaja te da amaro najšukar e Jehovase. But objaviteljija mangena pana pobuter te služinen e Jehovase. Disave isi len želja te oven pionirija. Avera mangena te služinen ko Betel ja ki gradnja. But phralja isi len cilj te služinen sar sluge pomoćnikija ja starešine (1. Tim. 3:1, 8). Kobor tano bahtalo o Jehova ked dikhela so oleso narodo mangela te služini lese! (Ps. 110:3; Is. 6:8).

2. Sar šaj te osetina amen ako našti te ispunina amare ciljija?

² Amen šaj te obeshrabrina amen ako već disavo vreme nakhlja, a amen pana na ispuninđam amare ciljija. Isto ađahar, šaj te ova obeshrabrime ako mangaja te ćera disave buća ki e Jehovasi organizacija, ama sebepi amare berša ja sebepi disave avera razlogija, našti te ćera odova (Posl. 13:12). Amari phen, i Melisa * manglja te služini ko Betel ja te đal ki Škola aso objaviteljija ando Kraljevstvo, ama oj phenela: „Sebepi so phuriljum, akala buća tane maje samo jekh suno. Odolese, podijekh puti hijum obeshrabrimi.“

3. So disave valjani te ćeren te šaj te dobinen disave zaduženja ki skupština?

 ³ Disave kola tane terne hem saste, šaj valjani te oven pana pozrela hem te ćeren ko pe osobine te šaj te dobinen disave zaduženja ki skupština. Disave terne phralja tane gođale, bućarne hem đanena so mangena. Ama, šaj valjani te sikljon te oven strpljiva, te poštujinen averen ja te na siđaren ked anena odluke. Ako deja sa tutar te ćere ko te osobine, disave zaduženja ki skupština šaj te dobine ked najmanje očekujineja. Amaro phral o Nik, ked hine le 20 berš, hine but obeshrabrimo sebepi so na ulo sluga pomoćnik. Ov phenela: „Mislinđum so na hijum šukar phral.“ Ama, ov nastavinđa te ćerel ko pe osobine. Ov dinđa po najšukar ki skupština hem ki služba. Avdije, služini ko Odbor andi podružnica.

4. Sostar ka vaćera ko akava članko?

⁴ Da li hijan obeshrabrimo sebepi so pana na ispuninđan te ciljija? Ako ja, vaćer odova e Jehovase (Ps. 37:5-7). Uzo odova, puć disave zrelo phralen sar šaj pana pošukar te ćere ti služba hem palo odova de sa tutar te primenine odova. Ako ćereja ađahar, jekh dive šaj ka ispunine te ciljija. Ama, so ako, sar i Melisa, našti te de e Jehovase odova so mangeja? So šaj te ćere tegani? Sar šaj te aćhove bahtalo? Te dobina odgovor ko akava pućibe, ko akava članko ka vaćera ando trin buća. Sar prvo, sar šaj te ove bahtalo? Sar dujto, so šaj te ćere te ove pana pobuter bahtalo? Sar trito, kola ciljija ka pomožinen tuće te ove pana pobahtalo ki ti služba?

5. So valjani te ćera ako mangaja te ova bahtale? (Propovednik 6:9)

⁵ Ko Propovednik 6:9 pisini so šaj te pomožini amen te ova bahtale. (Čitin.) O manuš kova uživini „ko odova so šaj te dikhel pe jaćhencar“ tano zadovoljno odoleja so već isi le akana. Ki aver strana, o manuš kova mangela o buća kola našti te ovel le, niked na ka ovel bahtalo. So sikljovaja? Ako mangaja te ova bahtale, valjani te ćhiva amenđe ciljija kola šaj te ispunina.

6. Ando kova poređenje ka vaćera akana hem so šaj te sikljova ando odova?

⁶ Da li ćaće šaj te ova zadovoljna odoleja so već akana isi amen? But manuša mislinena so našti, sose amen uvek mangaja te ćera neve buća. Ama, šaj te ova zadovoljna odoleja so već avdije isi amen. Sar šaj odova te ćera? O odgovor ka dobina ando e Isuseso poređenje kotar talantija, kova pisini ko Matej 25:14-30. Ando akava poređenje ka sikljova sar šaj te ova bahtale sebepi odova so isi amen.

7. Vaćer kratko sostar ćerela pe ko poređenje ando talantija.

⁷ Ko akava poređenje, jekh manuš pođinđa ko drumo. Ama, angleder te đal, ov svakone robose dinđa talantija. * Ov đanđa so svako oleso robo šaj te ćerel. Odolese, e prvonese dinđa panđ talantija, e dujtonese duj, a e tritonese jekh. Prva duj robija hine bućarne hem ćerđe e gospodareso barvalipe te ovel pana pobaro. Ama,  o trito robo ništa na ćerđa odoleja so dobinđa. Odolese, oleso gospodari uspudinđa le.

8. Sose šaj hine o prvo robo te ovel bahtalo?

⁸ O prvo robo šaj hine te ovel but bahtalo odolese so o gospodari dinđa lese panđ talantija. Odova hine baro barvalipe hem o gospodari mothovđa so isi le baro poverenje upro leste. Ama, sar osetinđa pe o dujto robo? Ov šaj hine te ovel obeshrabrimo, sose hem ov na dobinđa panđ talantija. Ama, so ov ćerđa?

9. So o Isus na vaćerđa ando dujto robo? (Matej 25:22, 23)

⁹ Čitin Matej 25:22, 23. O Isus na phenđa so o dujto robo hine holjamo sose dobinđa samo duj talantija. Ov na vaćerđa so o robo žalinđa pe hem so phenđa: „Sose mo gospodari dinđa lese pobuter, a maje pohari? Me hijum bućarno sar ov. Ako mo gospodari mislini so na hijum šukar radniko, ka hanav jekh rupa, ka garavav akala talantija hem ka ćerav maje buti.“

10. So o dujto robo ćerđa odoleja so dobinđa?

¹⁰ Sar o prvo robo, ađahar hem o dujto robo haljilo so oleso gospodari dinđa lese but važno buti. Ov but trudinđa pe hem ando duj talantija, ćerđa te oven štar. Odolese so hine but bućarno, o gospodari nagradinđa le. Na samo so o gospodari hine zadovoljno oleja, već dinđa le pana pobari buti te ćerel.

11. Sar šaj te ove pana pobahtalo?

 ¹¹ Pana pobahtale ka ova, ako daja sa amendar te ćera amare zadatkija. De sa tutar ki služba hem ko odova so ćereja ki skupština (Dela 18:5; Jevr. 10:24, 25). Pripremin tut šukar aso sastankija hem de komentarija. Ćer celone vileja o učenička zadatkija kola dobineja. Ako o starešine pućena tut te ćere dijekh buti ki skupština, ov tačno hem odgovorno. Ma mislin so i buti koja ćereja ki skupština nane važno hem so našaleja to vreme. De sa tutar te ćere pana pošukar odija buti (Posl. 22:29). Ako deja sa tutar đi ćereja te zadatkija, tegani ka ove pana popaše e Jehovaja hem ka ove pana pobahtalo (Gal. 6:4). Isto ađahar, na ka ovel tuće pharo ked avera dobinena o odgovornostija kola tu mangljan (Rimlj. 12:15; Gal. 5:26).

12. So ćerđe i Melisa hem o Nik te šaj te oven pana pobuter bahtale?

¹² I Melisa, kolatar vaćerđam hari angleder, manglja te služini ko Betel ja te đal ki Škola aso objaviteljija. Ama, naštinđa te ispunini po cilj. Oj phenela: „Trudinđum man te ovav šukar pioniri hem te propovedinav ko različita načinija. Sebepi odova, hijum le but bahtali.“ O Nik hine obeshrabrimo sose na ulo sluga pomoćnik. Sar ov borinđa pe odoleja? Ov phenela: „Ćerđum odova so šaj. Đeljum ki služba, pripreminđum man šukar aso sastankija hem dinđum komentarija. Uzo odova, pherđum i molba aso Betel hem palo jekh berš hijum le vićimo te služinav uduri.“

13. Sar ka osetine tut ako te odgovornostija ćereja najšukar so šaj? (Propovednik 2:24)

¹³ Ako o odgovornostija kola akana isi tut ćereja najšukar so šaj, tajsato dive, sar o Nik, šaj hem tu ka ovel tut pobare odgovornostija. Ako odova na ovela, tegani sar i Melisa, hem tu šaj te aćhove bahtalo sose ćereja e Jehovase odova so šaj. (Čitin Propovednik 2:24.) Uzo odova, tu ka ove bahtalo odolese so đaneja so to Gospodari, o Isus, tano zadovoljno odoleja so ćereja.

14. Sose hem ponodri valjani te ćhiva amenđe ciljija?

¹⁴ Šaj već avdije daja amaro najšukar e Jehovase. Ama, da li odova značini so našti pana pobuter te ćera e Jehovase? Na. Amen valjani te ćhiva amenđe ciljija, sar soj tane te ova pana pošukar ki služba hem te pomožina amare phralenđe. Ked averen ćhivaja ko prvo than, ka ispunina amare ciljija (Posl. 11:2; Dela 20:35).

15. Kola ciljija šaj te pomožinen tuće te ove pana pobahtalo?

¹⁵ Kola ciljija šaj te ovel tut? Molin tut e Jehovase te šaj te haljove kola ciljija ćaće šaj te ispunine (Posl. 16:3; Jak. 1:5). Da li šaj te ispunine jekh ando ciljija kolendar vaćerđam ko  prvo odlomko – te ove pomoćno ja stalno pioniri, te služine ko Betel, ki gradnja, te sikljove dijekh nevi ćhib ja te služine ko than kuri valjani pobuter objaviteljija? Ako mangeja te đane pobuter ando akala ciljija, šaj te čitine o 10. poglavlje andi knjiga Organizovano izvršavajmo Jehovinu volju. Uzo odova, šaj te vaćere te starešinencar. * Ked trudineja tut te ispunine akala ciljija, avera ka dikhen  to napredak hem tu ka ove pana pobahtalo.

16. So šaj te ćere ako našti te ispunine o ciljija kolendar vaćerđam?

¹⁶ So ako našti te ispunine nijekh ando ciljija kolendar vaćerđam ko akava članko? Tegani, ćhiv tuće cilj kova tu šaj te ispunine. Akana ka dikha disave olendar.

17. Premali 1. Timoteju 4:13, 15, so šaj jekh phral te ćerel te šaj pošukar te sikavi averen?

¹⁷ Čitin 1. Timoteju 4:13, 15. Ako hijan krstimo phral, tu šaj te ćere ko odova te ove pošukar govorniko ja te sikave averen pošukar. Sose tano važno odova te ćere? Sose averenđe ka pomožine ako deja sa tutar te čitine pošukar, te ove pošukar govorniko ja te sikave pošukar. Ćhiv tuće cilj te proučine svako lekcija hem te primenine o savetija andi brošura Sikljov pošukar te čitine hem te sikave. Proučin jekh po jekh lekcija, vežbin ćhere hem de sa tutar te primenine odola savetija ked ićereja te zadatkija. Puć aso savet e phrale kova služini sar pomoćno savetniko * ja avere starešinen „kola but trudinena te vaćeren hem te sikaven e Devleso Lafi“ (1. Tim. 5:17). To cilj na valjani te ovel samo te primenine o savetija andi lekcija, već te zorjaćere averen ja te podstaknine len te ćeren odova so šunena. Đi ćereja odova hem tu hem on ka oven pana pobahtale.

18. So šaj te pomožini amenđe te ova pana pošukar ki služba?

¹⁸ Sare amen isi amen zadatak te propovedina hem te ćera učenikonen (Mat. 28:19, 20; Rimlj. 10:14). Da li mangeja  pana pošukar te ćere odova zadatko? Đi proučineja i brošura Te čitine hem te sikave, ćhiv tuće ciljija kola ka pomožinen tut te ove pana pošukar ki služba. De sa tutar te primenine odova so sikljoveja. Isto ađahar, šaj te koristine o predlogija aso razgovor hem o video-materijali andi Radno sveska. Ked hijan ki služba, probin te koristine različita predlogija te šaj te dikhe kova tano najšukar aso to područje. Ked ka primenine odola predlogija, tegani tu ka sikave e manušen pana pošukar hem tu ka ove pana pobuter bahtalo (2. Tim. 4:5).

19. Sar šaj te ćere ko te osobine?

¹⁹ Ma bistri so toklo najvažno cilj valjani te ovel te ćere ko te osobine (Gal. 5:22, 23; Kol. 3:12; 2. Petr. 1:5-8). Sar šaj te ćere odova? Na primer, šaj haljiljan so valjani te ovel tut pana pobari vera. Tegani, šaj te čitine o člankija ko amare publikacije kola šaj te pomožinen tut te ovel tut pana pobari vera. Isto ađahar, ko amare masekose emisije šaj te dikhe o iskustvija ando amare phralja hem phenja kola ko pharipa aćhilje verna e Devlese. Palo odova, razmislin sar šaj te oponašine olengi vera.

20. So šaj te ćera te aćhova bahtale hem te na ova obeshrabrime?

²⁰ Sare amen mangaja te služina e Jehovase pana pobuter. Avdije, podijekh puti našti te ćera e Jehovase odobor kobor mangaja. Ama, ko nevo sveto, ništa na ka ćhinavi amen te ćera e Jehovase odova so mangaja. Đi na avela odova vreme, mangaja te da e Jehovase amaro najšukar, sose ađahar ka aćhova bahtale hem na ka ova obeshrabrime. Soj tano najvažno, ka ana čast e Jehovase, amare Devlese, kova tano bahtalo Devel (1. Tim. 1:11). Odolese, ov bahtalo sebepi o buća kola šaj te ćere e Jehovase.