1. Σαρ προσπαθίνενα μπουτ πφραλά τι κερέν πιο μπουτ πράγματα για τι υπηρετίνεν ι Ιεχωβάς;

 ΤΘΕΡΑΣΑ μπουτ έργος τι κεράς καζόμ ανταβά ντουνιάς ατζεχάνικ κα καταστραφίντιβελ. (Ματθ. 24:​14· Λουκ. 10:2· 1 Πέτρ. 5:2) Σαρέ μανγκάσα τι υπηρετίνας ι Ιεχωβάς καζόμ αβέλα-πες πιο λατσσές. Μπουτ πφραλά ντα πφενιά κερένα πιο μπουτ πράγματα κο έργος. Μερικοί μανγκένα τι κερέν ο σκαπανικός. Γιαβερά μανγκένα τι τζαν κο Μπέθελ ή τι βοηθίνεν τι κερντιόν κτίρια για τι ντας λατρεία ι Ιεχωβάς. Ντα μπουτ πφραλά κερένα ο πιο λατσσό για τι αβέν διακονικοί υπηρέτες ή πρεσβύτεροι. (1 Τιμ. 3:1, 8) Καζόμ μπουτ πρέπει τι αβέλα ι Ιεχωβάσκο γκι κάνα ντικχέλα ότι λέσκο λαός μανγκέλα αντράλ πι γκίσταρ τι υπηρετίνελ-λες!​—Ψαλμ. 110:3· Ησ. 6:8.

2. Σαρ μπορεί τι νιωθίνασα άμα να κερντάμ ατζέκ οντουλά σο μανγκάσα για τι υπηρετίνας ι Ιεχωβάς;

² Όμως, κα μπορίνελας τι πφανγκιόλ αμαρό γκι άμα νακχλό μπουτ βακίτι ντα να κερντάμ ατζέκ οντουλά σο μανγκάσα για τι υπηρετίνας ι Ιεχωβάς. Ή κα μπορίναας τι χασαράς αμαρί ζορ άμα ναστί κεράσα μερικά πράγματα κι Ιεχωβάσκι οργάνωση επειδή ισινάμ μπαρέ ή επειδή τθεράσα γιαβερά λόγοι. (Παρ. 13:​12) Η Μελίσα * νακχέλα κάτι ασακό. Κα μανγκέλας μπουτ τι τζαλ κο Μπέθελ ή τι νακχέλ ι Σχολή για Ευαγγελιστές της Βασιλείας, αλλά βακερέλα: «Ισινόμ μπουτ μπαρί για τι τθεράβ ανταλά προνόμια. Μπάζιμα χασαράβα μι ζορ».

3. Σο μπορεί χρειαζίντιβελα τι κερέν μερικά πφραλά για τι ντιντιόν-λεν μερικά προνόμια κι υπηρεσία κι Ιεχωβάσκι;

³ Μερικά πφραλά σο ισί τερνέ ντα ζουρανέ μπορεί τι χρειαζίντιβελα πρώτα τι μπαριαρέν μερικές ιδιότητες για τι  ντιντιόλ-λεν γιαβερά προνόμια. Για παράδειγμας, μερικοί μπορεί τι ισί έξυπνοι, τι λένα σουγκό αποφάσεις ντα τι αβέν μπουτιαρνέ. Αλλά μπορεί τι χρειαζίντιβελα τι σικλιόν τι σικαβέν πιο μπουτ υπομονή, τι κερέν πιο λατσσές πουμαρί μπουτί ντα τι σεβάνεν πιο μπουτ ι γιαβερέν. Άμα κερένα σο νακχέλα τουμαρέ βαστένταρ για τι τθερέν ο ιδιότητες σο χρειαζίντιβενα, ο πφραλά μπορεί τι ντεν-τουμέν εκ προνόμιος αζομάν σο να μπεκλεντίνενα. Ντικχέν σο αβιλό-πες κο Νικ. Κάνα ισινέ 20 μπρεσένγκο, τσσουβέλας μπουτ πι γκίστε επειδή να αβέλας διακονικός υπηρέτης. Βοβ βακερέλα: «Νιωθίναβας ότι κάτι να τζάλας λατσσές μάντζαρ». Αλλά ο Νικ να τσσιναντάς τι προσπαθίνελ τι τθερέλ ο ιδιότητες σο χρειαζίντιβελας. Κερέλας ο πιο λατσσό κι κχανγκιρί ντα κο έργος. Αντιβές, ισί σε εκ Επιτροπή Τμήματος.

4. Σο κα ντικχάς ανταλέ μαθημάστε;

⁴ Μήπως νιωθίνενα ότι χασαρντέν τουμαρί ζορ επειδή να κερντέν ατζέκ οντουβά σο μανγκένα; Άμα αβέλα-πες ανταβά, πουτρέν τουμαρό γκι κο Ιεχωβά. (Ψαλμ. 37:​5-7) Επίσης, μανγκέν γκοντιαβέρ πφραλένταρ τι βακερέν τουμένγκε σαρ τι υπηρετίνεν πιο λατσσές ι Ντεβλές ντα σοράν κερέν οντουλά σο βακερντέ τουμένγκε καζόμ πιο λατσσές αβέλα-πες. Άμα κα κερέν-λες ανταβά, μπορεί τι λεν οντουβά προνόμιος ή τι πετυχίνεν ο στόχος σο τθερένα. Αλλά σαρ η Μελίσα, μπορεί τουμέν-ντα τι μανγκένα εκ προνόμιος σο να αβέλα-πες τι τθερέν-λες ακανά. Σαρ κα ατσσικιαρέν όμως τουμαρί χαρά; Για τι λας ι απάντηση, ανταλέ μαθημάστε κα ντικχάς (1) κατέ κα αρακχέν χαρά, (2) σαρ τι τθερέν πιο μπουτ χαρά ντα (3) καλά στόχοι κα ντεν-τουμέν πιο μπουτ χαρά.

5. Καλέ πραγματέντε πρέπει τι τθεράς αμαρέ γιακχά για τι αβάς χαρούμενοι; (Εκκλησιαστής 6:9)

⁵ Ο εδάφιος Εκκλησιαστής 6:9, ντέλα-αμέν τι αγαβάς σο μπορεί τι βοηθίνελ-αμέν τι τθεράς χαρά. (Διαβάνεν) Ο τζενό σο αρακχέλα χαρά «οντουλέσταρ σο ντικχέλα πι γιακχίντζαρ» εκτιμίνελα οντουλά σο τθερέλα, σαρ για παράδειγμας ο πράγματα σο μπορίνελα τι κερέλ ακανά. Οκιά μπάνταρ, ο τζενό σο “τζάλα εκ ακάρινγκ εκ οκόρινγκ οντουλένταρ σο μανγκέλα” μπεκλεντίνελα πραγματένγκε σο ναστί τθερέλα. Σο σικλιάσα αμέν ανταλέσταρ; Για τι αρακχάς χαρά, πρέπει τι τθεράς αμαρέ γιακχά οντουλέντε σο τθεράσα ντα όχι οντουλέντε σο ναστί τθεράσα.

6. Καγιά ιστορία κα ντικχάς ακανά;

⁶ Μπορίνενα τι αβέν μπαγιά χαρούμενοι σάντε οντουλέντζαρ σο τθερένα; Μπουτ τζενέ πακιάνα ότι να αβέλα-πες ανταβά, σόσκε σαρέ μπεϊντίνασα τι σικλιάς σαρ τι κεράς νεβέ πράγματα. Αλλά η αλήθεια ισί ότι αβέλα-πες. Μπορίνασα τι αρακχάς χαρά οντουλέντζαρ σο τθεράσα ακανά. Σαρ κα κεράς-λες ανταβά; Για τι λας ι απάντηση, κα ντικχάς ι ιστορία σο βακερντάς ο Ιησούς για το τάλαντα, σο ισί γραμμέ κο εδάφια Ματθαίος 25:​14-30. Κα σικλιάς σαρ τι αρακχάς χαρά κο ευλογίες σο τθεράσα ακανά ή ατζέ-ντα τι μπαριαράς πιο μπουτ ανταγιά χαρά.

7. Βακερέν χάνικ λαφίντζαρ ι ιστορία σο βακερντάς ο Ιησούς για το τάλαντα.

⁷ Κι ιστορία, εκ τζενό τθερέλα τι κερέλ εκ μπαρό ταξίδι. Πριν τι νασέλ, ντινάς βίκος πι δουλόν ντα ντινάς κο κάθε εκ λένταρ μερικά τάλαντα για τι κερέν μπουτί. * Όμως, τζανέλας ότι λέσκε δούλοι τθερένας διαφορετικές ικανότητες. Οτθάρ, ντινάς παντς τάλαντα εκχέ δουλόστε, ντούι τάλαντα κο γιαβέρ ντα εκ τάλαντος εκχέ γιαβερέστε. Ο πρώτοι ντούι δούλοι κερντέ μπουτ μπουτί για τι νικαβέν πιο μπουτ λοβέ πουμαρέ κυριόσκε. Ο τρίτος δούλος όμως να κερντάς τίποτα ι λοβέντζαρ σο ντινάς-λες ντα  οντουλέσκε λέσκο κύριος παλντιντάς-λες κατά μπουτί.

8. Σόσκε μπορίνελας τι χαιρίνελ ο πρώτος δούλος κι ιστορία;

⁸ Ο πρώτος δούλος ισινέ μπουτ χαρούμενος σο ο κύριος λέσκο ντινάς-λες παντς τάλαντα. Ο λοβέ ισινέ μπουτ, ντα ανταλέσαρ σο κερντάς λέσκο κύριος σικαντάς καζόμ μπέσα ντέλας λέσκε! Αλλά σο κα βακεράς ι δεύτερε δουλόσκε; Κα μπορίνελας τι χασαρέλ πι ζορ επειδή να λιντάς καζόμ λοβέ λιντάς ο πρώτος δούλος. Αλλά σο κερντάς;

9. Σο να βακερντάς ο Ιησούς ι δεύτερε δουλόσκε; (Ματθαίος 25:​22, 23)

⁹ Διαβάνεν Ματθαίος 25:​22, 23. Ο Ιησούς να βακερντάς ότι ο δεύτερος δούλος χασαρντάς πι ζορ ντα χολιασάλο επειδή λιντάς σάντε ντούι τάλαντα. Να βακερντάς ότι ο δούλος κερντάς παράπονα: “Σάντε ανταλά κα λαβ; Μαρντόμ-μαν με-ντα σαρ οντουβά δούλος σο λιντάς παντς τάλαντα! Άμα μο κύριος να εκτιμίνελα-μαν, πιο λατσσές τι πραχούναβ ανταλά ντούι τάλαντα ντα τι κεράβ μπουτί μάνγκε”.

10. Σο κερντάς ο δεύτερος δούλος ο τάλαντα σο λιντάς;

¹⁰ Σαρ ο πρώτος δούλος, αντικάς ο δεύτερος-ντα δούλος λιντάς σοβαρά ι ευθύνη σο ντιντιλί-λες ντα μαρντάς-πες για τι υπηρετίνελ πι κυριός. Οτθάρ, ο ντούι τάλαντα κερντάς-λεν σταρ. Ο κύριος ευλογιντάς ανταλέ δουλός σο μαρντάς-πες. Λέσκο κύριος ισινέ μπουτ χαρούμενος ντα ντινάς-λες πιο μπουτ ευθύνες!

11. Σαρ μπορίνασα τι τθεράς πιο μπουτ χαρά;

¹¹ Αντικάς αμέν-ντα, μπορίνασα τι αβάς πιο χαρούμενοι άμα τθεράσα σαρό αμαρό γκι εκχέ διορισμόστε σο ντιντιόλα-αμέν κι  υπηρεσία κι Ιεχωβάσκι. Τι “αβάς συνέχεια απασχολημέ” κο έργος ντα τι κεράς ο πιο λατσσό κι κχανγκιρί. (Πράξ. 18:5· Εβρ. 10:​24, 25) Τι τζαν κο συναθροίσεις προετοιμασμέ για τι ντεν απαντήσεις σο κα ντεν ζορ. Τι λεν σοβαρά κάθε διορισμός σο λένα κι συνάθροιση Ζωή ντα Έργος. Άμα κα μανγκέν τουμένταρ τι κερέν εκ μπουτί κι κχανγκιρί, τι κερέν-λα αζομάν σο πρέπει ντα τι ατσσικιαρέν τουμαρό λάφι. Μα πακιάν ότι εκ διορισμός νανέ σημαντικός ντα ότι να αξίνελα τι ντεν τουμαρέ σαατίσταρ. Τι προσπαθίνεν τι αβέν πιο λατσσέ. (Παρ. 22:​29) Καζόμ πιο μπουτ τθερένα τουμαρό γκι κο πνευματικά πράγματα, αζόμ πιο λατσσέ αμαλά κα αβέν ι Ιεχωβάσαρ ντα αζόμ πιο μπαρί χαρά κα τθερέν. (Γαλ. 6:4) Επίσης, κα αβέλ τουμένγκε πιο εύκολος τι χαιρίνεν κάνα ο γιαβερά λένα εκ προνόμιος σο κα μανγκένας τι τθερέν τουμέν.​—Ρωμ. 12:​15· Γαλ. 5:26.

12. Σο κερντέ ντούι Μάρτυρες για τι τθερέν πιο μπουτ χαρά;

¹² Ντένα-τουμέν γκοντί ι Μελισά, ι πφενιά σο βακερντάς ότι μανγκέλας τι τζαλ κο Μπέθελ ή τι νακχέλ ι Σχολή για Ευαγγελιστές της Βασιλείας; Παρόλο σο ναστί κερέλα οντουλά σο μανγκέλα, βακερέλα: «Κεράβα ο πιο λατσσό κο σκαπανικός ντα προσπαθίναβα τι κεράβ έργος μπουτέ τροπόντζαρ. Ανταβά αντάς μάνγκε μπαρί χαρά». Σαρ βοηθίντιλο ο Νικ κάνα χασαρντάς πι ζορ επειδή να αβέλας διακονικός υπηρέτης; «Τθεράβας μο γιακχά οντουλέντε σο μπορίναβας τι κεράβ, σαρ ισί ο έργος ντα τι νταβ απαντήσεις σο ντένα ζορ ι γιαβερέν κο συναθροίσεις. Επίσης, κερντόμ αίτηση για τι τζαβ κο Μπέθελ ντα λιντέ-μαν ο γιαβέρ μπρες».

13. Καβά κα αβέλ ο αποτέλεσμας άμα τθερένα σαρό τουμαρό γκι κο διορισμός σο τθερένα ακανά; (Εκκλησιαστής 2:24)

¹³ Άμα κα τθερέν σαρό τουμαρό γκι κο διορισμός σο τθερένα ακανά, κα ντιντιόν-τουμέν πιο μπαρέ ευθύνες κο μέλλον; Ανταβά μπορεί τι αβέλ-πες, σαρ αβιλό-πες κο Νικ. Αλλά άμα να κα αβέλ-πες ανταβά, σαρ αβιλό-πες κι Μελίσα, τουμαρί χαρά πάλι κα αβέλ πιο μπαρί ντα κα νιωθίνεν πφερντέ. (Διαβάνεν Εκκλησιαστής 2:​24) Επίσης, κα αρακχέν σίγουρα μπαρί χαρά κάνα κα αγαβέν ότι τουμαρέ προσπάθειες κερένα ο γκι αμαρέ Κυριόσκο, ι Ιησού Χριστόσκο.

14. Σο πρέπει τι τθεράς πάντα αμαρέ γκοντιάτε κάνα σκεφτίνασα ο στόχους σο τθεράσα κι υπηρεσία κι Ιεχωβάσκι;

¹⁴ Άμα κεράσα ο πιο λατσσό κι Ιεχωβάσκι υπηρεσία ακανά, ανταβά μανγκέλα τι βακερέλ ότι πρέπει τι τσσιναβάς τι προσπαθίνας τι κεράς πιο μπουτ λέσκε; Νάα! Πρέπει τι τσσουβάς στόχους σο κα βοηθίνεν-αμέν τι αβάς πιο λατσσέ κο έργος ντα μα τι τσσιναβάς τι βοηθίνας αμαρέ πφραλέν ντα πφενίν. Κα κεράς ανταλά στόχους κάνα τθεράσα αμαρέ γκοντιάτε σαρ τι βοηθίνας ι γιαβερέν ντα να ντικχάσα σάντε αμαρό νεαυτός.​—Παρ. 11:2· Πράξ. 20:35.

15. Καλά ισί μερικοί στόχοι σο κα βοηθίνεν-τουμέν τι τθερέν πιο μπουτ χαρά;

¹⁵ Σο στόχους κα μπορίνενας τι τσσουβέν; Μανγκέν κατά Ιεχωβά τι βοηθίνελ-τουμέν τι αγαβέν σο μπορίνενα τι κερέν ντα τι πακιάν ότι κα κερέν-λεν. (Παρ. 16:3· Ιακ. 1:5) Μήπως κα μπορίνενας τι τσσουβέν εκ κατά στόχους σο βακερέλα ανταβά μάθημας κι  πρώτη παράγραφος​—τι κερέν βοηθητικός ή τακτικός σκαπανικός, τι τζαν κο Μπέθελ ή τι βοηθίνεν τι κερντιόν κτίρια για τι ντιντιόλ λατρεία κο Ιεχωβά; Ή μπέκιμ κα μπορίνενας τι σικλιόν εκ γιαβέρ τσσιπ για τι βακερέν ο λατσσέ αμπέρια ή ατζέ-ντα τι τζαν τι υπηρετίνεν εκχέ γιαβερέ τθεμέστε. Μπορίνενα τι σικλιόν πιο μπουτ ανταλένγκε κο κεφάλαιος 10 κι βιβλιόσκο Οργανωμένοι για να Κάνουμε το Θέλημα του Ιεχωβά ντα τι κερέν  λάφι ι πρεσβυτερόντζαρ τουμαρέ κχανγκιριάτε. * Καζόμ μαρένα-τουμέν τι κερέν ασακέ στόχους, ο γιαβερά κα ντικχέν ότι αβιλέν πιο λατσσέ ντα κα τθερέν πιο μπουτ χαρά.

16. Σο μπορίνενα τι κερέν άμα ναστί κερένα εκ συγκεκριμέ στόχος;

¹⁶ Αλλά σο κα κερέν άμα ναστί κερένα εκ κατά στόχους σο ισί ανταλέ μαθημάστε; Προσπαθίνεν τι τσσουβέν εκ γιαβέρ στόχος σο μπορίνενα τι κερέν-λες. Ντικχέν ο στόχοι σο ισί πιο τελέ.

17. Σαρ μπορίνελα εκ πφραλ τι αβέλ πιο λατσσό δάσκαλος σαρ βακερένα ο εδάφια 1 Τιμόθεο 4:​13, 15;

¹⁷ Διαβάνεν 1 Τιμόθεο 4:​13, 15. Άμα ισινέν μπολντό πφραλ, κα μπορίνενας τι προσπαθίνεν τι αβέν πιο λατσσό κο λάφι ντα κο σικλιαριπέ. Σόσκε; Επειδή άμα “τθερένα τουμαρό γκι” κο διάβασμας ντα κο σικλιαριπέ, ανταβά κα αβέλ ευλογία οντουλένγκε σο ασουνένα-τουμέν. Τσσουβέν στόχος τι διαβάνεν ντα τι κερέν κάθε σημείος ι ομιλιάκο σο ισί κο βιβλιάριος Τι Συνεχίνεν τι Διαβάνεν ντα τι Σικλιαρέν πιο Λατσσές. Τι διαβάνεν εκ σημείος κάθε φαρ, τι προετοιμάντιβεν λατσσές κο κχερ ντα τι προσπαθίνεν τι κερέν ανταβά σημείος τουμαρέ ομιλιέντε. Μανγκέν συμβουλές κατά βοηθός σύμβουλος ή εκχέ γιαβερέ πρεσβυτερόσταρ “σο μαρέλα-πες κο λάφι ντα κο σικλιαριπέ”. * (1 Τιμ. 5:​17) Μα ντικχέν σάντε σαρ τι κερέν οντουλά σο σικλιόνα κατά βιβλιάριος. Τι τθερέν τουμαρέ γκοντιάτε τι βοηθίνεν ι γιαβερέ-ντα τι κερέν πιο ζουρανί πουμαρί πίστη ντα τι κερέν οντουλά σο σικλιόνα. Αντικάς, κα τθερέν πιο μπουτ χαρά εμ τουμέν εμ βον.

18. Σο κα βοηθίνελ-αμέν τι κεράς ο στόχους σο τσσουντάμ ι εργόσκε;

 ¹⁸ Σαρέ τθεράσα ο διορισμός τι βακεράς ο λατσσέ αμπέρια ντα τι κεράς μαθητέν. (Ματθ. 28:​19, 20· Ρωμ. 10:​14) Κα μανγκένας τι αβέν πιο λατσσέ ανταλέ σημαντικέ εργόστε; Διαβάνεν ο βιβλιάριος Σικλιαρέν ντα σοράν τσσουβέν στόχους σο κα βοηθίνεν-τουμέν τι κερέν οντουλά σο σικλιόνα. Κα βοηθίντιβεν κατά Πρόγραμμας για τη Συνάθροιση ι Χριστιανόνγκι Ζωή ντα ο Έργος ντα κατά βίντεα σαρ τι κεράς συζητήσεις σο ντικχάσα κι συνάθροιση σο αβέλα-πες αντρέ κι εβδομάδα. Κερέν οντουλά σο πακιάνα ότι ισί πιο λατσσέ τουμαρέ εργόσκε. Άμα κερένα ανταλά συμβουλές, κα αβέν πιο λατσσέ δάσκαλοι ντα ανταβά κα ντελ-τουμέν πιο μπουτ χαρά.​—2 Τιμ. 4:5.

19. Σαρ μπορίνενα τι μπαριαρέν ιδιότητες σο κερένα ο γκι ι Ντεβλέσκο;

¹⁹ Δεν πρέπει τι μπιστρέν ότι εκ κατά πιο σημαντικούς στόχους σο μπορίνενα τι τσσουβέν ισί τι μπαριαρέν ιδιότητες σο κερένα ο γκι ι Ντεβλέσκο. (Γαλ. 5:​22, 23· Κολ. 3:​12· 2 Πέτρ. 1:​5-8) Σο κα μπορίνενας τι κερέν; Για παράδειγμας, μπορεί τι μανγκένα τι κερέν πιο ζουρανί τουμαρί πίστη. Κα μπορίνενας τι διαβάνεν θέματα κο έντυπα σο βακερένα μπουτ λατσσέ συμβουλές για τι μπαριαρέν τουμαρί πίστη. Σίγουρα κα βοηθίντιβεν άμα κα ντικχέν ο χουρντέ βίντεα κατά JW Broadcasting^® σο σικαβένα σαρ μερικά πφραλά ντα πφενιά ατσσικιαρντέ ζουρανί πουμαρί πίστη παρόλο σο τθερένας μπαρέ προβλήματα. Σοράν, σκεφτίνεν σαρ μπορίνενα τουμέν-ντα τι σικαβέν πίστη τουμαρέ ζωγιάτε.

20. Σαρ μπορίνασα τι αβάς πιο χαρούμενοι ντα μα τι τσσουβάς αζόμ μπουτ αμαρέ γκίστε;

²⁰ Σίγουρα, σαρέ κα μανγκάας τι κεράς πιο μπουτ πράγματα ι Ιεχωβάσκε οντουλένταρ σο κεράσα ακανά. Κο νεβό ντουνιάς κι Ντεβλέσκο, κα μπορίνας τι υπηρετίνας-λες τέλεια. Μέχρι αζομάν, άμα να χασαράσα ο ευκαιρίες σο ντιντιόνα-αμέν ακανά, κα αβάς πιο χαρούμενοι ντα να κα τσσουβάς αζόμ μπουτ αμαρέ γκίστε. Ντα ο πιο σημαντικός, κα δοξάνας ι Ιεχωβάς αμαρέ “ευτυχισμέ Ντεβλές”. (1 Τιμ. 1:​11) Οντουλέσκε, τι αρακχάς χαρά κο προνόμια σο τθεράσα.