1. I yini leswi vanyingi va swi yentxaka akuva va yengesela ntizro wavu ka Yehovha?

LOKO wugamu bya misava leyi byi ya byi tlhasa, hi ya hi va ni ntizro wunyingi wa ku wu yentxa. (Mt 24:14; Lk 10:2; 1Pe 5:2) Hinkwezru hi djula ku yentxa leswi hi nga swi kotaka a ntizrweni wa Yehovha. Vanyingi va yentxa swinyingi a ntizrweni wa Yehovha. Vambeni va djula ku tizra swanga maphayona, kasi vambeni va navela ku tizra a Betele kumbe ka ntizro wa ku yaka, nakone vamakwezru vambeni va xinuna va tikazratela ku va malandzra ya wutizreli kumbe vakulu. (1Tm 3:1, 8) Yehovha a nyonxa ngopfu swinene hi ku vona leswaku malandzra yake ma tiyimisele ku tizra hi lani ma nga kotaka ha kone!​—Ps 110:3; Eza 6:8.

2. Xana hi nga ha titwisa kuyini loko hi nga swi koti ku tlhaselela kungu dzra kukazri ledzri hi dzri navelaka?

² Minkama yimbeni a hi swi koti ku tlhaselela makungu yezru hi lani a hi navelaka ha kone. Xileswo, hi nga ha titwa hi nga ha khunguvanyeka. Kumbe xana hi nga ha hetiwa ntamu hi ku va ntanga yezru yi nga hi pfumeleli ku tlhaselela kungu dzra kukazri ledzri a hi dzri navela kumbe swi nga yentxeka xiyimu xin’wana xi hi sivela ku va hi dzri tlhaselela. (Pr 13:12) Leswo hi leswi swi yentxekeliki Melissa. * A a swi djula ngopfu ku tizra a Betele kumbe ku ya a Xikole xa Vazrezri va Mfumu. A hlaya leswi: “Swoswi a ntanga yanga a ya ha ni pfumeleli kuva ni tsrala petisawu. Ka mine swiyavelo leswo o va nozro ntsena. Minkama yimbeni, leswo swa ni khunguvanyisa.”

3. He kwini lomu swi nga ha djulaka hi yampswisa kone na hi nge si na kuma xiyavelo xa kukazri?

³ Kambe vampshwa va nga ha langutana ni xikazratu ximbeni.  Vambeni va ni wutivi, va swi kota ku teka swiboho leswinene nakone va ni ntamu wa ku tizra; kambe swi nga yentxeka va ha djula ku dondzra ku lehisa mbilu, ku va ni wuxiyaxiya ni ku kombisa xitxhavu ka vambeni. Loko u tikazratela ku txutxela matsrhamela lawa ma vilelekaka u ta nyikiwa swiyavelo na u nga swi laviselanga. Vona xikombiso xa Nick. Loko a ni 20 wa malembe, a vaviseke ngopfu hi leswi a a nga yaveliwi ku tizra swanga nandzra wa wutizreli. A hlaya leswi: “A ni yanakanya leswaku a ku ni leswi a ni nga swi yentxi ha hombe.” Kambe Nick a nga godolanga. A yentxe leswi a nga swi kotaka ka swiyavelo leswi a a li na swone. Swoswi a tizra swanga xizro xa Xihubyana xa Zrwavi.

4. I yini leswi hi taka swi vona ka xidondzro lexi?

⁴ Xana u khunguvanyekile hi leswi u kalaka u nga si tlhaselela kungu dzra kukazri dzra moya? Byela Yehovha ndlela leyi u titwaka ha yone. (Ps 37:5-7) Handle ka leswo, kombela mavonela ka vamakwezru lava wupfiki ka ndlela leyi u nga yengeselaka ha yone ntizro waku ka Yehovha. Tlhela u tikazratela ku tizrisa mavonela lawa va ku nyikiki wone. Hi ku yentxa leswo, swi nga ha yentxeka u kota ku yamukela xiyavelo kumbe ku tlhaselela kungu dzra kukazri. Kambe hi lani swi yentxekiki ha kone ka Melissa, swi nga ha yentxeka u navela xiyavelo lexi u taka kala u nga swi koti ku xi tlhaselela. Loko swi li tanu, xana hi nga tama hi nyonxa hi ndlela yini? Akuva hi hlamula xivutiso lexi hi ta vona 1) leswi nga hi yentxaka hi nyonxa, 2) ndlela ya ku yengesela ku nyonxa kwezru, ni 3) makungu lawa ma nga hi yentxaka hi nyonxa.

5. Akuva hi nyonxa, xana hi fanela ku beka miyanakanyu yezru ka yini? (Eklesiasta 6:9)

⁵ A buku dzra Eklesiasta 6:9, dzri hi tlhamuxela leswi nga hi yentxaka hi nyonxa. (Dondzra.) A mhunu lwa yanelisekaka hi leswi a ‘swi vonaka hi mahlu’ A swi nyika lisima leswi a nga na swone, leswi liki awa nyonxa hi xiyimu lexi a nga ka xone swoswi. Hi tlhelo dzrimbeni, lweyi a landzrelelaka ku navela kwake a tsrhamela ku djuletela leswi a nga liki na wuswikoti bya ku swi kuma. Hi dondzra yini? Akuva hi nyonxa hi fanela ku beka miyanakanyu yezru ka leswi hi nga na swone ni leswi hi nga kotaka ku swi tlhaselela.

6. He xini xifananiso xa Yesu lexi hi taka xi kambisisa, nakone hi ta dondzra yini?

⁶ Xana swa koteka kuva hi nyonxa hi leswi hi nga na swone? Vanyingi va pimisa leswaku a hi nge swi koti hikusa hi zrandzra ku dzringisa mintxhumu leyimpshwa. Kambe leswo swa koteka. Hi nga swi kota ku va ni ku nyonxa ka ntiyiso hi xiyimu xezru xa swoswi. Hi nga swi yentxisa kuyini leswo? Akuva hi gungula nhlamulo a hi kambisiseni xifananiso xa Yesu mayelanu ni matalenta, lexi kumekaka ka Matewu 25:14-30. Hi ta vona ndlela leyi hi nga kumaka ku nyonxa ha yone, ni ndlela leyi hi nga ku yengeselaka ha yone ka xiyimu lexi hi nga ka xone.

7. I yini leswi yentxekiki ka xifananiso xa Yesu mayelana ni matalenta?

⁷ Ka xifananiso xa matalenta, Yesu a hlaye leswaku wanuna wa kukazri a a djula ku yendzra. Na a nga si famba a vitane vatizri vake a va a nyika mun’wana ni mun’wana a matalenta ya kukazri akuva a ma bindzrula. * Kambe yene a a swi tiva leswaku a vatizri vake a va na wuswikoti lebyi fanaka, xileswo, a nyike mutizri wa ku sungula ntlhanu wa matalenta, lwe wa wubidzri a mu nyika mabidzri, kasi lwe wa wuzrazru a mu nyike dzrin’we. Lava va ku sungula va vabidzri va tihite ngopfu akuva va tizrela n’winyi wavu. Kambe lweyi wa wuzrazru a nga yentxanga ntxhumu hi mali leyi a  yi yamukeliki nakone leswo swi yentxi n’winyi wake a mu hlongola.

8. Ha yini mutizri wa ku sungula wa le ka xikombiso xa matalenta a ta va a nyonxe ngopfu swinene?

⁸ Swi nga yentxeka mutizri lwe wa ku sungula a nyonxe ngopfu hi leswi a yamukeliki ntlhanu wa matalenta akuva a ma bindzrula. Mali leyo a yi li yinyingi swinene, nakone leswo a swi kombisa leswaku n’winyi wake a a mu dumba swinene, kambe a mutizri lwe wa wubidzri ke? Swi nga yentxeka a ta va a hele ntamu hi leswi a kalaka a nga yamukelanga mali ya ku dzringana ni ya lwe wa ku sungula. Kambe i yini leswi a swi yentxiki?

9. I yini leswi Yesu a kalaka a nga swi hlayanga hi mutizri lwe wa wubidzri? (Matewu 25:22, 23)

⁹ Dondzra Matewu 25:22, 23. Yesu a nga zanga a hlaya leswaku mutizri lwe wa wubidzri a kwatile hikuva a nyikiwe matalenta mabidzri ntsena. Nakone Yesu a nga hlayanga leswaku mutizri lweyo a a tsrhama hi ku ngurangura, a ku: ‘Ha yini mine a ni nyike mabidzri nakuve na mine ni tizra ku fana ni lwiyani a mu nyikiki ntlhanu wa wone! Swi li mine a nga ni nyiki lisima, swa yampswa ni ya yimbela matalenta lawa ni famba ni ya ti tizrela swanga.’

10. I yini leswi mutizri wa wubidzri a swi yentxiki hi talenta ledzri a dzri yamukeliki?

¹⁰ Mutizri lwe wa wubidzri a tikazrate ngopfu akuva a hetisisa xiyavelo lexi a nyikiwiki xone hi n’winyi wake, ku fana ni mutizri lwe wa ku sungula. Lexi nyonxisaka hi leswaku a kote ku bindzrula ha kabidzri a mali leyi a nyikiwiki yone hi n’winyi wake. Nakone a hakeliwile hi leswi a kotiki ku tizrisa wuswikoti byake a tlhela a tinyiketela. A n’winyi wake a nge nyonxa ntsena kambe a tlhele a mu nyika ni mintizro yimbeni!

11. Xana u nga ku yengesela hi ndlela yini ku nyonxa kwaku?

 ¹¹ Hi ndlela leyi fanaka, loko hi tizra hi ku tinyiketa ka xiyavelo xin’wana ni xin’wana lexi hi xi yamukelaka a nhlengeletanwini ya Yehovha hi ta nyonxa ngopfu. Tinyikete hi ku helela a ntizrweni wa ku zrezra nakone tikazratele ku hetisisa mintizro ya bandla. (Min 18:5; Hb 10:24, 25) Tilulamiseli na u nga siya a mintlhanganwini akuva u nyikela tinhlamulo letinene. Swi nyike lisima a swiyavelo leswi u swi kumaka ka mintlhanganu ya makazri ka vhiki. Loko vakulu va ku nyika ntizro wa kukazri akuva u wu yentxa a bandleni wu yentxi hi nkama lowu u nyikiwiki wone u tlhela u dumbeka. Loko va ku nyika xiyavelo xa kukazri u nga pimisi leswaku i ku heta nkama. Tikazratele ku yampswisa wuswikoti byaku. (Pr 22:29) Loko u ya u tihita, u ta va ni mihandzru leyinene nakone leswo swi ta ku yentxa u nyonxa. (Ga 6:4) Nakone swi ta nabyala akuva u nyonxa loko vambeni va yamukela xiyavelo lexi a wu navela ku va na xone.​—Ro 12:15; Ga 5:26.

12. I yini leswi Melissa na Nick va swi yentxiki akuva va yengesela ku nyonxa kwavu?

¹² Xana wa ha mu dzrimuka Melissa, lweyi a a djula ku ya tizra a Betele kumbe ku ya a Xikole xa Vazrezri va Mfumu? A nga swi kotanga ku hetisisa ku navela kwake. Twana leswi a swi hlayaka: “Minkama hinkwayu ni yentxa leswi ni nga swi kotaka a ntizrweni wanga swanga phayona, ni tlhela ni tikazratela ku zrezra hi tindlela ta ku hambanahambana. Leswo swi ni yentxa ni nyonxa.” Xana Nick a titwise kuyini loko a nga yaveliwanga ku tizra swanga nandzra wa wutizreli? “Ni beki miyanakanyu yanga ka swiyavelo leswi a ni li na swone, swa ku fana ni ku patsreka a ntizrweni wa ku zrezra ni ku nyikela tiyangulu letinene a mintlhanganwini. Ni game ni tsrala a petisawu akuva ni ya tizra a Betele. Nakone ka lembe ledzri dzri landzreliki ni vitaniwile.”

13. He wani mabindzru lawa ma taka va kone loko u tinyiketa ka xiyavelo xaku swoswi? (Eklesiasta 2:24)

¹³ Xana loko u tinyiketa hi mbilu hinkwayu ka swiyavelo leswi u nga na swone swoswi, u ta yamukela swiyavelo leswi yengetelekiki a nkameni lowu taka? Swi nga yentxeka, ku fana ni leswi swi yentxekeliki Nick. Kambe nambi loko xiyimu xaku xi fana ni xa Melissa u nga ha titwa na u nyonxile, u yanelisekile u tlhela u humelela. (Dondzra Eklesiasta 2:24.) Nakone, u ta nyonxa ngopfu hi ku tiva leswaku Hosi yaku, Yesu Kriste awa nyonxa hi ku vona ndlela leyi u tikazrataka ha yone.

14. Xana hi fanela ku dzrimuka yini loko hi tibekela makungu ya moya?

¹⁴ Loko ku li leswaku hi yentxa leswi hi nga swi kotaka a ntizrweni wa Yehovha, xana swi djula ku hlaya leswaku a ha ha fanelanga ku yentxa swin’wana? Nikutsrongo! Hi nga ha tibekela makungu mambeni ya moya akuva hi yampswisa mazrezrela ni madondzrisela yezru, ni ku va hi tiyimisela ku tizrela vamakwezru. Kambe akuva hi tlhaselela makungu lawo, swi djula wutivi ni ku dzringanisela, a matsrhan’wini ya kuva hi tipimisela hine, hi fanela ku pimisa hi ndlela leyi hi nga pfunaka vambeni ha yone.​—Pr 11:2; Min 20:35.

15. He wani makungu lawa ma nga yengeselaka ku nyonxa kwaku?

¹⁵ He wani makungu ya moya lawa u nga tibekelaka wone? Kombela Yehovha a ku pfuna ku tiva kungu ledzri u nga kotaka ku dzri tlhaselela. (Pr 16:3; Yk 1:5) Xana u nga tizra swanga phayona dzra ku pfunisa kumbe dzra nkama hinkwawu, ku tizra Betele, kumbe ku pfunisa a ku yakeni ka tiyindlu ta wugandzreli? Kumbe u nga kumeka hi xitalu a ntizrweni wa ku zrezra, ku dondzrela lidzrimi ledzrimpshwa kumbe ku ya zrezra ka tiko dzrimbeni. Akuva u tiva leswi swi patsrekaka ka ntizro lowo dondzra ndzrima  10 ya buku ledzri liki Hi Hleleliwe Ku Yentxa Ku Zrandzra Ka Yehovha kumbe u bula ni vakulu va bandla dzraku. * Loko u tikazrata akuva u tlhaselela makungu yaku hinkwavu va ta wu vona nhluvuku waku nakone u ta nyonxa swinene.

16. I yini leswi u nga swi yentxaka swoswi loko u nga swi koti ku tlhaselela kungu dzra kukazri?

¹⁶ Kambe loko u nga si na swi kota ku tlhaselela makungu lawa ma kombisiwiki ka xidondzro lexi ke? A mhaka nkulu i kuva u tibekela makungu lawa u taka kota ku ma tlhaselela, vona man’wana ya wone.

17. Hi ku ya hi 1 Timoteo 4:13, 15, i yini leswi makwezru wa xinuna a fanelaka ku swi yentxa akuva a va mudondzrisi lwenene?

¹⁷ Dondzra 1 Timoteo 4:13, 15. Loko u li makwezru lweyi a babatisiwiki, u nga ha yampswisa ndlela leyi u bekaka ha yone wukaneli ni madondzrisela yaku. Ha yini? Hikusa loko u beka miyanakanyu yaku ka ndlela leyi u nga yampswisaka madondzrela yaku ha yone, wukaneli byaku ni ndlela leyi u dondzraka ha yone, u ta kota ku pfuna lava va ku yingisetaka. Tibekeli kungu dzra ku dondzra ni ku tizrisa swidzringanyeto leswi kumekaka ka xibukwana lexi liki Tihite Ku Dondzreni Ni Le Ku Dondzriseni. Dondzra xidzringanyeto ha xin’we kutani na u li kaya, u titoloveta; handle ka leswo, dzringisa ku tizrisa leswi u swi dondzriki loko u nyikiwa swiyavelo. Kombela swidzringanyeto ka mulayi wa xikole xa ku pfunisa kumbe ka vakulu vambeni ‘lava tizraka hi ntamu a zritwini ni le ku dondzriseni’. * (1Tm 5:17) A nkongometo waku a ku fanelanga ku va ku twisisa leswi xibukwana xi hlayaka swone  ntsena, kambe ku pfuna vayingiseti leswaku va yengesela ni ku tiyisa lipfumelo dzravu kun’we ni ku va pfuna ku tizrisa leswi u va dondzrisaka swone. Ku yentxa leswo swi ta yengesela ku nyonxa kwaku ni kwavu.

18. I yini lexi nga hi pfunaka ku yampswisa wuswikoti byezru a ntizrweni wa ku zrezra?

¹⁸ Hinkwezru hi ni wutiyanguleli bya ku zrezra ni ku yentxa vadondzrisiwa. (Mt 28:19, 20; Ro 10:14) Xana wa swi nyonxela ku yampswisa wuswikoti byaku ka ntizro lowu wa lisima? Kutani dondzra u tlhela u tizrisa leswi u swi dondzraka ka broxura ledzri liki Ku Dondzriseni. Loko u yentxa leswo tibekele makungu lawa u taka kota ku ma tlhaselela. Xibukwana Xa Ntlhanganu Wa Wutomi Ni Wutizreli Byezru Bya Wukriste ni mavhidiyu ya mabulu mayelanu ni Bibele leswi kombisiwaka ka ntlhanganu wa xikazri ka vhiki, swi ni swidzringanyeto swa lisima leswi na swone swi nga hi pfunaka ku yampswisa a ku zrezreni. Dzringisa swidzringanyeto leswo u va u vona leswaku he swini leswi yampswaka ku wene. Hi ku landzra swidzringanyeto leswo, u ta va mudondzrisi lwenene nakone u ta va ni ku nyonxa lokukulu.​—2Tm 4:5.

19. Xana u nga byi txutxelisa kuyini a wumhunu bya wukriste?

¹⁹ Loko u tibekela makungu, a kungu dzra lisima ngopfu ledzri u nga tibekelaka dzrone i ku txutxela matsrhamela ya wukriste. (Ga 5:22, 23; Kl 3:12; 2Pe 1:5-8) Xana u nga swi yentxisa kuyini leswo? Hi xikombiso, a hi nge u djula ku va ni lipfumelo ledzri tiyiki ngopfu. A mhakeni leyo i swa lisima ku dondzra tinhlokomhaka ta mabuku yezru leti nga ni swilayu leswi nga pfunaka ku tiyisa lipfumelo dzraku. Mavhidiyu manyingi ka Wuhaxi bya JW ma kombisa mfambu wa vamakwezru lava kombisaka lipfumelo ledzri xiyekaka loko va langusana ni swikazratu. Ku hlalela mavhidiyu ni ku yetisela xikombiso xa vamakwezru lavo, swi nga ku pfuna ngopfu swinene.

20. I yini lexi nga hi yengeselaka ku tsrhava kwezru ni ku pumba ku hela ntamu?

²⁰ Handle ka ku ganaganeka hi navela ku yentxela Yehovha leswi yengetelekiki. A misaveni leyimpshwa hi ta mu tizrela hi lani ku heleliki. Ka nkamanyana lowu, hi djula ku londzrovota mikhandlu leyi hi nga na yone akuva hi yengesela ku nyonxa kwezru hi tlhela hi pumba ku titwa na hi hele ntamu. Nakone xa lisima ngopfu hi ta yisa lidzrumu ka Yehovha, Xikwembu Nkulukumba wezru lweyi a tsrhaviki. (1Tm 1:11) Kutani hi ta tsrhava hi swiyavelo leswi hi nga na swone!