1. Tongana nyen la aita mingi ayeke gi ti sara aye mingi na yâ ti kua ti Jéhovah?

 E YEKE na kua mingi ti sara na yâ ti aye ti ngoi so aga nduru ti hunzi so (Mat. 24:14; Luc 10:2; 1 Pi. 5:2). E kue e ye ti sara ye kue so e peut ti sara ti sara kua ti Jéhovah mingi. Aita mingi afa tënë mingi ahon ti kozo. Ambeni aleke ti ga apionnier. Ambeni aleke ti sara kua na Béthel wala na construction. Nga aita-koli ayeke gi ti ga awakua ti mungo maboko wala a-ancien (1 Tim. 3:1, 8). Jéhovah ayeke na ngia mingi tongana lo bâ azo ti lo aye ti sara aye mingi na yâ ti kua ti lo.—Ps. 110:3; És. 6:8.

2. Tongana e wara lege pëpe ti sara ambeni ye so e leke ti sara na yâ ti kua ti Jéhovah, a peut ti sara e tongana nyen?

² Bê ti e apeut ti komanse ti son tongana ngoi ahon mingi na ade e sara ape ambeni ye so e ye ti sara na yâ ti kua ti Jéhovah. Wala e lingbi ti découragé ndali ti so ngu ti e wala dutingo ti e amû lege na e pëpe ti sara ambeni kua ti Jéhovah (aProv. 13:12). A yeke ye so asi na Melissa. * Lo ye mingi ti sara kua na Béthel wala ti gue na Ekole ti awafango nzoni tënë ti Royaume, me lo tene: “Ngu ti mbi ahon ti so a hunda awe. Fadeso na mbi, aye so ayeke gï bango li. Na ambeni ngoi, mbi découragé.”

3. Nyen la a lingbi ambeni ita asara tongaso si ala lingbi ti sara ambeni kua?

³ A lingbi ambeni ita so ade maseka nga so ayeke na nzoni seni agi ti duti na ambeni nzoni sarango ye kozo si ala lingbi ti  sara ambeni kua. Na tapande, peut-être ambeni ahinga ndo, ala yeke mû adesizion hio nga ala yeke nduru ti sara kua. Me ala bezoin peut-être ti manda ti kanga bê, ti sara kua ti ala nzoni nga ti ne azo mingi. Tongana mo sara ngangu ti duti na asarango ye so mo bezoin ni, peut-être aita ayeke mû na mo mbeni kua na ngoi so mo ku terê ti mo na ni ape. Bâ ye so asi na Nick. Na ngoi so lo yeke na ngu 20, vundu asara lo mingi ndali ti so a mû lo wakua ti mungo maboko ape. Lo tene: “Mbi bâ so mbi doit ti sara mbeni ye na lege ni ape la.” Me Nick adécouragé lani ape. Lo sara ye kue so lo peut ti sara na yâ ti congrégation nga na yâ ti kua ti fango tënë. Laso, lo yeke mbeni membre ti mbeni Komite ti filiale.

4. Nyen la e yeke bâ na yâ ti article so?

⁴ Eskê mo découragé ndali ti so mo ye ti sara mbeni ye na yâ ti kua ti Jéhovah, me ade mo sara ni ape? Tongana a yeke tongaso, fa agingo bê ti mo na Jéhovah (Ps. 37:5-7). Nga, hunda ambeni ita so ayeke biazo ti fa na mo tongana nyen la mo peut ti maï na yâ ti kua ti Nzapa, na pekoni gi ti sara ye alingbi na wango ti ala. Tongana mo sara ni, mo peut ti wara lege ti sara ye so mo leke ti sara. Me tongana ti Melissa, so e sara tënë ti lo fade, ye so mo leke ti sara, peut-être mo peut ti sara ni fadeso ape. Tongana a yeke tongaso, tongana nyen la mo peut ti ngbâ ti duti na ngia? Ti kiri tënë na hunda so, article so ayeke sara tënë na ndö ti (1) ye so apeut ti sara si mo duti na ngia, (2) lege ti duti na ngia mingi nga (3) aye so mo peut ti leke na bê ti mo ti sara so apeut ti sara si mo duti na ngia mingi.

5. Ti duti na ngia, a lingbi e zia li ti e na ndö ti nyen? (Zo-ti-fa-tene 6:9).

⁵ Zo-ti-fa-tene 6:9 afa na e ye so apeut ti aidé e ti duti na ngia. (Diko ni.) Zo so azia li ti lo na ndö ti ‘aye so lê abâ’ ayeke na ngia na ye so lo yeke na ni, na tapande dutingo ti lo ti fadeso. Me zo so angbâ ti ye ye so lo peut ti wara ape ayeke duti na ngia lâ oko ape. Tongaso, nyen la e peut ti manda dä? Ti duti na ngia, a yeke nzoni e zia li ti e na ndö ti ye so e yeke na ni nga na ndö ti ye so e peut biani ti wara.

6. Toli wa e yeke bâ fadeso? Nyen la e yeke manda dä?

⁶ Eskê mo peut biani ti duti na ngia na ye so mo yeke sara wala na ye so mo yeke na ni awe? Azo mingi apensé so a peut ti duti tongaso ape, ndali ti so e ye lakue ti sara afini ye. Me ti vrai ni, zo apeut ti duti na ngia na ye so lo yeke sara wala na ye so lo yeke na ni awe. E peut ti duti na ngia na “aye so lê abâ” nga ti bâ nzoni dä. E peut ti sara ni tongana nyen? Ti sara ni, zia e bâ toli ti Jésus na ndö ti atalent so ayeke na Matthieu 25:14-30. E yeke manda ande tongana nyen ti duti na ngia nga même ti duti na ngia mingi na aye so e yeke na ni fadeso.

7. Fa na nduru tënë toli ti Jésus na ndö ti atalent.

⁷ Na yâ ti toli ni, mbeni koli aye ti gue na voyage. Kozo ti tene lo hon, lo iri angbâa ti lo na lo mû na zo oko oko atalent ti dë buze na ni. * Koli ni ahinga so ngangu ti angbâa ti lo ayeke nde nde, tongaso lo mû talent oku na mbeni, use na mbeni na oko na ota ngbâa ni. Akozo ngbâa use ni asara kua ngangu ti wara nginza mingi ndali ti wa ti ala. Me ota ngbâa ni asara ye oko ape na nginza so a mû na lo, tongaso wa ti lo azi lo na kua.

8. Ngbanga ti nyen la kozo ngbâa ti yâ ti toli so apeut ti duti na ngia?

⁸ Kozo ngbâa ni ayeke lani na ngia mingi so wa ti lo amû na lo talent oku. A yeke lani  mbeni kota nginza, na a fa so wa ti lo ayeke na confiance na lo mingi. Me ka ti use ngbâa ni? Lo peut lani ti découragé ndali ti so a mû na lo talent mingi tongana ti kozo ngbâa ni ape. Me lo sara ye lani tongana nyen?

9. Tënë ti nyen la Jésus atene ape na ndö ti use ngbâa ni? (Matthieu 25:22, 23).

⁹ Diko Matthieu 25:22, 23. Jésus atene ape so vundu asara use ngbâa ni nga bê ti lo ason ndali ti so a mû na lo gï talent use. Jésus atene nga ape so lo dema terê ti lo, lo tene: ‘Ye kue so a mû na mbi la? Mbi kue mbi sara kua ngangu tongana ngbâa so awara talent oku so. Tongana wa ti mbi ni abâ na nene ni ape kua ti mbi, peut-être a yeke nzoni mbi lu talent ti lo use so nga mbi dë buze ti mbi wani.’

10. Nyen la use ngbâa ni asara na atalent ti lo?

¹⁰ Legeoko tongana kozo ngbâa ni, use ngbâa ni abâ na nene ni mingi kua so a mû na lo, nga lo sara kua ngangu ndali ti wa ti lo. A sara si lo wara talent use na ndö ti atalent ti wa ti lo. Wa ti ngbâa ni afuta lo ndali ti ngangu kua ti lo. Wa ti lo agonda lo nga lo mû na lo encore kua mingi.

11. Nyen la e lingbi ti sara ti duti na ngia mingi?

¹¹ Legeoko nga, e peut ti wara ngia mingi tongana e bi terê ti e kue na yâ ti kua kue so a mû na e ti sara na yâ ti kua ti Jéhovah. “Mû ngoi ti [mo] kue” ti fa tënë, nga sara akua ti congrégation mingi (Kus. 18:5; aHéb. 10:24, 25). Leke terê ti mo nzoni ndali ti abungbi, tongaso si mo peut ti mû acommentaire so akpengba zo. Bâ na nene ni mingi adevoir kue so a mû na mo ti sara na ngoi ti bungbi ti milieu ti yenga. Tongana a hunda na mo ti aidé na mbeni  kua na yâ ti congrégation, si na l’heure nga duti zo ti confiance. Bâ pëpe mbeni kua so a mû na mo ti sara tongana mbeni ye so amû ngoi ti mo senge senge. Sara kue ti sara kua ti mo nzoni mingi (aProv. 22:29). Tongana mo bi terê ti mo kue na yâ ti akua ti Jéhovah, mo yeke gue na li ni hio nga mo yeke duti na ngia mingi (aGal. 6:4). A yeke duti nga ngangu na mo ape ti duti na ngia tongana ambeni zo awara mbeni kua so mo ye fade ti wara.—aRom. 12:15; aGal. 5:26.

12. Nyen la amû maboko lani na Melissa na Nick ti wara ngia mingi?

¹² Mo rappelé na Melissa, so e sara tënë ti lo fade, so ayeke lani na nzara ti sara kua na Béthel wala ti gue na Ekole ti awafango nzoni tënë ti Royaume? Atâa so lo peut ti sara pëpe ye so lo ye ti sara, lo tene: “Mbi gi ti sara kua ti mbi ti pionnier nzoni mingi nga ti fa tënë na akode nde nde kue. A sara si mbi yeke na ngia mingi.” Tongana nyen la Nick ahon ndö ti vundu so asara lo ndali ti so a mû lo wakua ti mungo maboko ape? Lo tene: “Mbi zia lani li ti mbi na ndö ti akua so mbi peut ti sara, na tapande, fango tënë nga mungo acommentaire so akpengba zo na ngoi ti abungbi. Mbi sû nga demande ti sarango kua na Béthel, na a yeda na ni ngu oko na pekoni.”

13. Tongana mo bi terê ti mo kue na yâ ti kua so mo yeke sara laso, nzoni ti nyen la mo yeke wara dä? (Zo-ti-fa-tene 2:24).

¹³ Tongana mo bi terê ti mo kue na yâ ti kua so mo yeke sara laso, eskê a yeke mû na mo ambeni kua na yâ ti angoi so ayeke ga? A peut ti si, tongana ti so a si na Nick. Me tongana a si ape, legeoko tongana Melissa, mo peut ti duti na ngia mingi, nga mo yeke duti na ngia mingi ndali ti akua so mo sara na Jéhovah. (Diko Zo-ti-fa-tene 2:24.) Mo yeke duti nga na ngia mingi ndali ti so mo hinga so mo zia ngia mingi na bê ti Wa ti e, Jésus Christ.

14. Nyen la a yeke nzoni e girisa ape na ngoi so e yeke pensé na aye so e ye ti sara na yâ ti kua ti Jéhovah?

¹⁴ Tongana laso e yeke sara ye kue so e peut ti sara na yâ ti kua ti Jéhovah, a ye ti tene so e doit encore ape ti gi ti sara mbeni kua ndali ti lo? Ên-ën. A yeke nzoni e zia na gbele e ti sara aye so ayeke sara si e fa tënë nga e fa ye nzoni mingi ahon ti kozo nga e mû maboko mingi na aita. E peut ti sara ni tongana e sara ye na ndara nga e bâ terê ti e kete, e zia li ti e na ndö ti mungo maboko na amba ti e ahon ti zia li ti e na ndö ti e wani.—aProv. 11:2; Kus. 20:35.

15. Ambeni ye wa la mo peut ti gi ti sara so apeut ti aidé mo ti duti na ngia mingi?

¹⁵ Ambeni ye wa la mo peut ti gi ti sara? Hunda Jéhovah ti aidé mo ti zia na gbele mo aye so mo peut ti sara (aProv. 16:3; Jacq. 1:5). Eskê mo peut ti gi ti sara mbeni ye so a sara tënë ni na yâ ti  kozo paragraphe ti article so, na tapande ti sara kua ti pionnier auxiliaire wala pionnier permanent, ti sara kua na Béthel wala ti sara kua na construction? Mo peut ti manda yanga ti mbeni kodro wala ti gue ti fa tënë na mbeni ndo nde. Mo peut ti manda ye na ndö ti aye so tongana mo diko chapitre 10 ti buku Bungbi so a leke ni ti sara ye so Jéhovah aye nga tongana mo sara lisoro na a-ancien ti congrégation ti mo. * Tongana mo yeke gi ti sara aye so, azo ayeke bâ so mo yeke gue na li ni nga mo yeke duti na ngia mingi.

16. Nyen la mo peut ti sara tongana ti ndembe so mo lingbi pëpe ti sara mbeni mbilimbili ye so mo ye ti sara?

¹⁶ Me ka tongana ti ndembe so mo lingbi pëpe ti sara mbeni ye so a sara tënë ni na yâ ti  article so? Gi ti zia na gbele mo mbeni ye so mo peut ti sara. Bâ ambeni ye ni la.

17. Ti gue oko na 1 Timothée 4:13, 15, nyen la mbeni ita-koli apeut ti sara ti ga mbeni nzoni wafango ye?

¹⁷ Diko 1 Timothée 4:13, 15. Tongana mo yeke mbeni ita-koli so awara batême awe, mo peut ti gi ti maï kode ti sarango tënë nga na ti fango ye ti mo. Ngbanga ti nyen? Ngbanga ti so tongana mo “bi terê ti mo kue na yâ” ti dikongo mbeti, sarango tënë nga na fango ye, azo so ayeke mä mo ayeke wara nzoni dä. Zia na gbele mo ti manda nga ti sara ye alingbi na akode ti sarango tënë oko oko kue so ayeke na yâ ti brochure Mû bê ti mo kue na dikongo mbeti nga na fango ye. Manda akode ni oko na oko, tara ni nzoni na yanga-da nga gi ti sara ye alingbi na ni na ngoi so mo yeke na devoir wala diskur. Hunda wango na mbage ti use wamungo wango wala ambeni ancien “so ayeke sara kua ngangu na lege ti tënë ti yanga ti ala nga na lege ti fango ye ti ala.” * (1 Tim. 5:17). Gi ti mä yâ ti kode ni nzoni nga gi ti mû maboko na azo so ayeke mä mo ti kpengba mabe ti ala wala pusu ala ti sara ye alingbi na ye so ala manda. Tongana mo sara tongaso, mo na ala kue ayeke duti na ngia mingi.

18. Nyen la apeut ti aidé e ti si na aye so e ye ti sara na fango tënë?

¹⁸ A mû na e kue kua ti fango tënë nga ti sarango adisciple (Mat. 28:19, 20; aRom. 10:14). Eskê mo ye ti sara kota kua so nzoni mingi? Manda brochure Fango ye, na pekoni zia na gbele mo ambeni mbilimbili ye ti sara ti aidé mo ti sara ye alingbi na aye so mo manda. Mo peut nga ti wara anzoni wango na yâ ti Mbeti ti Bungbi: Kusala ti e nga na gigi ti e ti Chrétien nga  na avidéo ti kode ti sarango na alisoro so a yeke fa ka na ngoi ti abungbi ti milieu ti yenga. Tara akode nde nde ti bâ ti so wa la aga na aye ti nzoni mingi. Tongana mo sara ye alingbi na awango so, mo yeke fa ye nzoni mingi nga mo yeke duti na ngia mingi.—2 Tim. 4:5.

19. Tongana nyen la mo peut ti gi ti duti na asarango ye ti aChrétien?

¹⁹ Na ngoi so mo yeke bâ aye so mo ye ti zia na gbele mo ti si dä, girisa ape mbeni so ayeke kota mingi, so ayeke ti gi ti duti na asarango ye ti aChrétien (aGal. 5:22, 23; aCol. 3:12; 2 Pi. 1:5-8). Mo peut ti sara ni tongana nyen? Na tapande, bâ so mo ye ti gi ti duti na kpengba mabe. Mo peut ti diko a-article na yâ ti ambeti ti e so amû anzoni wango na ndö ti dutingo na kpengba mabe. Tongana mo bâ ambage ti Télé JW so afa tongana nyen la aita afa so ala yeke na kpengba mabe na ngoi so ala gbu ngangu na yâ ti atara nde nde, mo yeke wara biani nzoni dä. Na pekoni, bâ tongana nyen la mo peut ti sara ye na mabe tongana ala na yâ ti gigi ti mo.

20. Nyen la e peut ti sara ti duti na ngia mingi nga ti duti na vundu mingi ape?

²⁰ Kite ayeke dä ape so e kue e ye ti sara na Jéhovah mingi ahon ti so e peut ti sara na ndembe so. Na yâ ti fini dunia ti Nzapa, e yeke wara lege ti sara na lo nzoni mingi. Juska ti si kâ, tongana e sara ye kue so e peut ti sara, e yeke duti na ngia mingi na e yeke duti na vundu mingi ape. Kota ye ni ayeke so e yeke mû nengo nga na gonda na Jéhovah, “Nzapa [ti e] so ayeke na ngia”. (1 Tim. 1:11). Tongaso, zia e duti na ngia ndali ti aye so e peut ti sara ndali ti Jéhovah.