1. Kɛkɔnge kɛ anto efula onanghawɔ djɛ ndeka ndapɛyɛ l’olemo wɔ Yehova?

 TOLEKƆ l’olemo efula wɔ nangha winá wɔ ekomo kɛ nkfumbo dj’akambo djɛnɛ yotaleke nsukana. (Mat. 24:14; Luka 10:2; 1 Pɛ. 5:2) Iso nkombolaka nangha kenkfumɔ k’okokaso nangha djɛ nkambela Yehova efula. Efula k’anto mfudjɛka olemo wɔwɔ w’ipoposanyɛ. Amɔtshi nkombolaka nkamba etengo tat’ekalo. Ankina nkombolaka nkamba lá Betɛlɛ kana l’opikelo w’amvulu y’olonghanyelo. Edjinge efula kɛ wan’anyɔ nanghaka la wolo djɛ nkotshɛ kɛnɛ kɛlɔmbama djɛ ndjala enkambi wekotshɛ kana tokokolo. (1 Ti. 3:1, 8) Ape l’ehamo, Yehova alekɔ nsɔsɔlɔ l’osasa djɛ nyɛna ikanyi yɛ ndapekala yelekɔ l’enkambi wɛnde!​—Yee. 110:3; Iza. 6:8.

2. Wopo wɔkɔnge w’okokaso ndawoka ntsha totákotshɛ ekoma wɛso welá nyuma?

² Koko, tokoka ndɛmba ntsha amboheta ilá efula ko topakotshɛ ekoma wɛso ɛmɔtshi welá nyuma. Kana tokoka ndɛmba ntsha topookoka mbɛmba edjito ɛmɔtshi l’olonghanyelo wɔ Yehova m’ɔtɛ w’ɛnɔnyi welekɔ laso kana m’akambo ankina. (Woo. 13:12) Kɛsɔ ndeke lokomelisa Melissa. * Nde akombolaki nkamba lá Betɛlɛ kana ndjingela lá Nkalasa k’esambisha w’Onkfumi, koko nde afunaka ante: “Lambolekanyɛ ɛnɔnyi wɛlɔmbawɔ. Mpokokaka mba edjito wɛsɔ lonkina. Lá winá ɛmɔtshi, lemi ndɛmbaka.”

3. Kɛkɔnge k’anto amɔtshi okokawɔ nangha ntondo k’iwɔ ndɔwɛmba edjito ɛmɔtshi?

 ³ Nkoka ndjala djonyi djɛ ansakodji yɛ dangala la yelekɔ l’alemba wa wolo ntshunda lá nyuma la ndjala la wekeka amɔtshi, ntondo k’iwɔ ndoyala entshupa djɛ mbɛmba edjito enkina. Ndjɔmbɔmba, amɔtshi nkoka ndjala la balo, ndjewaka ndɔsa akano, edjinge nkɔpaka nkamba; koko iwɔ ladjɛ ndjeka djɛ ndjala la balentshitshi, nanghaka elemo wɛwɔ la nkɔmɛ nkfumɔ, la nɛmɛyɛka anto ankina. Ntsha wɛ nangha la wolo djɛ ndjala la wekeka walɔmbámá, okoka mba edjito kaanga lá winá wɔ ngopakanela. Tokokanela lá kɛnɛ kekomelisa wɔnanyɔ Nick. Winá wɔ ndayalaka l’ɛnɔnyi 20, nde akiyanaka efula mande watɔsɔna djɛ ndjala onkambi wokotshɛ. Nde ntepelaka ante: “Mfɛnyɛka ente nanghaka nkambo mɔtshi djɛ nyɛtshi ndeke yotansɔna.” Koko wɔnanyɔ Nick atapekɔ. Nde ananghaka kɛnɛ kɛ ndakoke nangha l’otshumano edjinge ayapɛyɛka tshɛ l’olemo w’ipoposanyɛ. Lɔɔko kɛnɛ, nde akamba etengo ose Kɔmite kɛ Filialɛ.

4. Kɛkɔnge k’ɔkɔpaso nyɛna lá djamba djɛnɛ?

⁴ Wɛ ɔmbɔlɛmba mánde otákotshɛ ekoma ɛmɔtshi welá nyuma? Ntsha nghɔsɔ, shimela Yehova wopo w’oyawokɛ. (Yee. 37:5-7) Lonkina, opola wananyɔ wambotshunda lá nyuma alako dj’iwɔ nkɛnyɛ wopo w’okokɛ ndalɔngɔsɔla l’olemo wɔ Ndjambe. Masɔ, nangha la wolo djɛ wɛ nkamba l’alako wawɔ. Ntsha wɛ nangha nghɔsɔ, okoka ndjala l’akoka wa mbɛmba odjito wokombolɛ kana nkotshɛ okoma wɔkɔ. Koko etengo iyayale lá nkambo djɛ Melissa, kanga sotepelaki má djiko, nkoka ndjala ko opookokaka mba odjito w’okombolɛ win’ɔsɔ. Ntsha nghɔsɔ, okokɛ nangha mo? Wopo wɔkɔnge w’okokɛ nama osasa wɔkɔ? Djɛ nkadjimola lá woopó wɔsɔ, djamba djɛnɛ ngotepela 1) kɛnɛ kekoka nkɔpɛyɛ osasa, 2) wopo w’okokɛ mfudjɛ osasa wɔko, la 3) wepo w’ekoma w’okokɛ ndawilela djɛ mfudjɛ osasa wɔko.

5. Djɛ ndjala l’osasa, lámpe oyɛso ladjɛ mpika wiso waso? (Losanghanyɛ 6:9)

⁵ Etengo yombofunama lá Losanghanyɛ 6:9, iso nkoka mba osasa ntsha iso doohona l’edjena kɛ wɔlɔ. (Wala.) Onto wosasanga la ‘kɛnɛ kɛna wiso wande’ nsasangaka la nkɛnɛ k’okotshɛnde, ndjɔmbɔmba kɛnɛ k’okotshɛnde win’ɔsɔ. Lá lɛdji lonkina, onto woheeta djɛ mpona kɛnɛ kokombolande, angokindjɛ nkombola kaanga nkete djɛ ndopakokɛ mba. Lasɔ, olakanyelo wɔkɔnge w’owaso? Djɛ ndjala l’osasa, iso ladjɛ mpika wiso waso lá kɛnɛ k’okotshɛso edjinge lá kɛnɛ k’okokaso ndjala l’akoka wa mba.

6. Ndjɔmbɔmba kɛkɔnge k’ɔkɔpaso nyɛna win’ɔsɔ, ko lá nkambo djɛkɔnge songila yimba?

⁶ Onto nkoka nsɔsɔlɔ nsasanga la kɛnɛ kɛ ndomboshiyɛka mba? Anto efula nkanelaka ambɔ lako, mande iso nkɔpaka nkindjɛ ndjeka wopo wɔ nangha akambo wa bango. Koko lá nsɔsɔlɔ, nkambo djɛsɔ nkokaka nanghema. Iso nkoka nsasanga la nkete ‘dj’okotshɛso win’ɔsɔ.’ Wopo wɔkɔnge w’okokaso nangha nkambo djɛsɔ? Djɛ ndjewa, nyontshɔ tokolenda ndjɔmbɔmba kɛ Yeso kɛ talata, kotanaso lá Mateo 25:14-30. Tongila yimba l’olakanyelo w’okokaso mba má ndjɔmbɔmba kɛsɔ lá kɛnɛ kelendana la wopo w’okokaso mba osasa edjinge mfudjɛ osasa wɔkɔ m’ɛtshɔkɔ w’okotshɛso winá wɔsɔ.

7. Kɔkɔndɔla lá yopasɛ ndjɔmbɔmba kɛ Yeso kelendana la talata.

⁷ Lá ndjɔmbɔmba kɛkɔ, mpame kɛmɔtshi atatshɔki tá lɔkɛndɔ. Lá ntondo kɛnde ntshɔ, nde etaka as’olemo wande ko apɛyɛka onto l’onto talata dj’iwɔ nangha opoto. * Mpame kɛkɔ ndjewaka ante as’olemo wande walekɔ  l’akoka watshikitanyi, djɛkondeke ndapɛyɛ os’olemo ɔmɔtshi talata itano, os’olemo onkina talata ipe, la kanga esato talata kɛmɔ. As’olemo ape wa ntondo wakambaka la wolo djɛ mbayela owandji wɔwɔ mfalanga efula. Koko os’olemo w’asato, atanangha kaanga nkambo, djɛkondeke owandji ndoowimɛ m’olemo.

8. Lamo os’olemo wɔ ntondo wɔ lá ndjɔmbɔmba kɛ Yeso ndakoke ndjala l’osasa efula?

⁸ Os’olemo wɔ ntondo ayalaka l’osasa efula mande owandji ɔpɛyɛka talata itano. Ɔsɔ ayalaka nfalanga efula, edjinge djoyi djɛsɔ dj’ɛnyɛka djɛ owandji wɔnde w’olemo ayawɛkɛki tende efula! Ko, okokaso ntepela nge lá nkambo dj’os’olemo wape? Nde akokaka ndɛmba mande atalongola talata efula etengo winande os’olemo wɔ ntondo. Ya ndananghe nge?

9. Kɛkɔnge kɛ Yeso ndopatepela lá nkambo dj’os’olemo wape? (Mateo 25:22, 23)

⁹ Wala Mateo 25:22, 23. Yeso lako ntepela ante os’olemo wape akiyanaka m’ɔtɛ wɔ ndalongola ngo talata ipe toko. Edjinge Yeso atɛnyɛ ante os’olemo wɔsɔ anghunghunaka má ntepela ante: ‘Yɔmbɔmpɛyɛ ngo ndambo kɛnɛ toko? Ko lamo, ape edjinge lemi ndekɔ l’akoka etengo os’olemo wɔ yombɔpɛyɛ talata itano? Ntsha owandji apankɔpɛ, mbɔ lokfundjɛ talata yɛnde ipe ko lonangha opoto wɔmi mɔmɛlɛ.’

10. Kɛkɔnge k’os’olemo w’ape ndananghe la talata yɛnde?

¹⁰ Etengo os’olemo wɔ ntondo, os’olemo w’ape ɔsaka odjito w’iyɔpɛyɛ la ntshina efula edjinge akambaka la wolo lá wapɔ w’owandji wɔnde. Eposelo weyalisa la nkambo djɛsɔ nde,  nde akfeyɛka owandji wɔnde talata ipe lá djiko. Os’olemo wɔsɔ afutamaka m’olemo wɔnde wɔ wolo. Owandji wɔnde atayala ngo l’osasa toko, koko ɔpɛyɛka edjinge edjito enkina efula!

11. Wopo wɔkɔnge w’okokaso mfudjɛ osasa wɔso?

¹¹ Wopo wɔk’ɔmɔ ndeke, iso nkoka mfudjɛ osasa wɔso má ndapɛyɛ tshɛ lá kɛnɛ k’iyombɔtɔpɛyɛ djɛ nangha l’olemo wɔ Yehova. ‘Yapɛyɛ tshɛ’ l’olemo w’ipoposanyɛ, la l’elemo wɛ l’otshumano. (Ele. 18:5; Heb. 10:24, 25) Lɔngɔsɔlaka nsanghanyɛ wɔlɔ djɛ wɛ ntɔpɛyɛ kɔmantɛrɛ yekembɛ. Ɔsa djamba nkfumɔ dj’ombeki dj’ɔkɔpɛyɛwɔ lá nkalasa k’ondjambe la ntshina. Ntsha wambɔkɔlɔmba djɛ nkotshɛ lá odjito ɔmɔtshi wɔl’otshumano, koma la wina edjinge yala onto wokokawɔ djɛkɛ oloko. Tɔsake odjito onkfumɔ w’ɔkɔpɛyɛwɔ etengo w’opalekɔ la ntshina kana wɔpɛlama djɛ wɛ mpetshɛ winá wɛko djɛ ndɔlɔngɔsɔla. Nangha la wolo djɛ mbɔngɛ akoka wako. (Woo. 22:29) Ntsha wɛ ndapɛyɛ efula l’elemo la l’edjito wɛko welá nyuma, ongofula la nkeke edjinge ongoleka ndjala l’osasa. (Nga. 6:4) Lonkina, opangoyala l’okakasano wɔ nsasanga l’anto ankina winá w’owawɔ edjito wɛ ngakombolaka mba.—Ɔrɔ. 12:15; Nga. 5:26.

12. Wina wakɔnge watapolisa Akristo ape dj’ipa ntshutshɛ osasa wɔwɔ?

¹² Ovungɔ Melissa kanga sotepelaki má djiko, lɔkɔpisa tokamba lá Betɛlɛ kana ndjingela Nkalasa k’esambisha w’Onkfumi? Kaanga ndotayala lonkina l’akoka wa nkotshɛ mposɛ kɛnde kɛsɔ, nde atepelaka ante: “Lemi nanghaka la wolo djɛ ndapɛyɛ tshɛ l’olemo wɔmi wɔ yat’ekalo edjinge lemi nkambaka la topo tonkfumɔ t’olemo w’ipoposanyɛ. Nkambo djɛsɔ mpɛyɛka lemi osasa efula.” Ko wopo wɔkɔnge Nick ndalongela okiyano w’oyalaki lande lá wopo w’ohetisa ɛnɔnyi efula ipa nde nsɔnama etengo onkambi w’okotshɛ? “Nde ntepelaka ante, ndjilaka yimba lá edjito w’okotshɛmi, ndjɔmbɔmba ndapɛyɛ tshɛ l’olemo w’ipoposanyɛ la mpɛyɛ akɔmantɛrɛ yɛ wɔlɔ l’otshumano. Ndodjɛka dɛmandɛ djɛ ntokamba lá Betɛlɛ ko wandjawolaka ɔnɔyi wɔwɔlamisa.”

13. Eposelo wɛkɔnge wengoyala ntsha omboyapɛyɛ l’edjito welekɔ lawɛ win’ɔsɔ? (Losanghanyɛ 2:24)

¹³ Ntsha omboyapɛyɛ tshɛ l’edjito welekɔ lawɛ win’ɔsɔ, ongowa edjito enkina efula l’etsho weyaye? Kɛsɔ nkoka nanghema, etengo iyananghema le Nick. Koko, ntsha kepananghemisa etengo iyayale le Melissa, wɛ ongofudjɛ osasa wɔko, la ongoyala l’osasa efula lá kɛnɛ k’onanghɛ l’olemo wɔ Yehova. (Wala Losanghanyɛ 2:24.) Lonkina, ongoyala l’osasa efula mande wɛ ewa ente welo wilɛ wesasangɛ Owandji wɔso, Yeso Kristo.

14. Lá kɛnɛ kelendana l’ekoma wɛso welá nyuma, kɛkɔnge k’okokaso nama lá wɔɔngɔ?

¹⁴ Mpika wiso l’edjito w’okotshɛso winá wɔsɔ, nkɔpaka nsakisola ante topakoke ndawilela ekoma enkina l’olemo wɔ Yehova? Lako! Iso la djɛ ndawilela ekoma wɛ nyuma wekoka ntokotshɛ djɛ ndjala ansakodji edjinge wetsha wɛ wɔlɔ la ndjala okotshɔ te wananyɔ l’ankaana yɛso. Tongolonga ntsha la balo nkfumɔ edjinge má ndjewa elelo wɛso iso ndjila yimba lá nkambela anto ankina koko ape lá mpona ngo wapɔ wɛso sɔmɛlɛ.​—Woo. 11:2; Ele. 20:35.

15. Ekoma wɛkɔnge ɛmɔtshi wekoka nkokotshɛ djɛ mfudjɛ osasa wɔko?

¹⁵ Ekoma wɛkɔnge w’okokɛ ndawilela? Lɔmba Yehova djɛ nde nkokotshɛ djɛ wɛ nsipisoyɛ ekoma wokokɛ nkotshɛ. (Woo. 16:3; Yos. 1:5) Opakoke ndawilela okoma ɔmɔtshi l’anteyi k’ekoma w’iyowalaki  l’etenyi kɛ ntondo kɛ djamba djɛnɛ, ndjɔmbɔmba ndjala yatekalo y’itenyi kana yɛ lotshinda, nkamba lá Betɛlɛ, kana l’olemo w’opikelo wɔ mvulu y’olonghanyelo? Kana okoka ndjeka otepela ɔmɔtshi  wɔ bango l’ikanyi yɛ wɛ mpoposanyɛ losango lɔ wɔlɔ kana ntopoposanyɛ l’etatshi kɛ looko kotepelawɔ otepela w’angangɛnda. Wɛ nkoka ndjewa akambo walendana l’ekoma wɛsɔ má mbala shapitrɛ 10 k’onkanda Tamboyakongɛ dia sala lolango la Jehowa la má nsawola la tokokolo tɔ l’otshumano wɔnyo. * Ntsha wɛ nangha la wolo djɛ nkotshɛ ekoma wɛsɔ, efulelo wɛko wɛngɛnama lá bandja la osasa wɔko w’ongofula.

16. Kɛkɔnge k’okokɛ nangha ntsha winá wɔsɔ opalekɔ lá akoka wa nkotshɛ okoma ɔmɔtshi shika?

¹⁶ Ko okokaso ntepela nge ntsha win’ɔsɔ opalekɔ l’akoka wa nkotshɛ okoma ɔmɔtshi l’anteyi k’ekoma w’isotepelaki má djiko? Kɛnɛ k’okokɛ nanghande, ndawilela okoma onkina w’okokɛ nkotshɛ. Kolenda ekoma w’ɛwɔlama wɛnɛ.

17. Lá nkilika 1 Timɔte 4:13, 15, wopo wɔkɔnge wananyɔ okokawɔ nangha la wolo djɛ nkoma wetsha wɛ wɔlɔ?

¹⁷ Wala 1 Timɔte 4:13, 15. Ntsha oyɛnde wɔnanyɔ w’ombolongola batisimo, wɛ nkoka nangha la wolo djɛ nkoma ontepedji kana wetsha wɔ wɔlɔ. Lamo? Mande ntsha wɛ nangha ‘la wolo’ djɛ nkoma ontangi, ondaki, la wetsha wɔ wɔlɔ, ongoleka ndjala l’akoka wa nkotshɛ anto wakekameyɛ. Yawilela okoma wɔ ndjeka la wɔ nkamba la nkoka nkfumɔ dj’otepedji djelá inkankanda Yasha lo Wadielo ndo lo wetshelo. Eka nkoka mɔtshi l’ilá kɛ winá ɔmɔtshi, sɛsa djɛ nkamba la nkoka djɛkɔ lá mbandja, edjinge kamba la kɛnɛ kɛ ngekaki winá wɔpɛyɛ djamba djɛko. Hona dako me ondaki wokotshɛ kana me tokokolo tonkina ‘tokamba olemo wɔ wolo lá ntepela edjinge lá ndakanyɛ.’ *  (1 Ti. 5:17) Tilake yimba yɛko ngo lá nsipisoyɛ elakanyelo w’imonkanda toko, koko edjinge lá nkotshɛ anto wakekameyɛ djɛ nkembɛ djawo djɛwɔ la ndaakembɛ dj’iwɔ nkamba la kɛnɛ k’ekawɔ. Má nangha nghɔsɔ, ongofudjɛ osasa wɔko la osasa wɔwɔ.

18. Kɛkɔnge kekoka ntokotshɛ djɛ nkotshɛ ekoma wɛso welendana l’olemo w’ipoposanyɛ?

¹⁸ Isankfumɔ tolekɔ l’odjito wɔ mpoposanyɛ la wɔ nkfumba anto ambeki. (Mat. 28:19, 20; Ɔrɔ. 10:14) Wɛ nkɔpaka mbɔngɛ akoka wako l’olemo wɔ djonyi wɔsɔ? Yawilela ekoma ɛmɔtshi wɛ shikaa winá w’ekɛ la w’okambɛ la kɛnɛ kekɛ má inkankanda Wetshelo. Okoka mba alako ankina wa djonyi má Dikatshi dia losanganya la Lɔsɛnɔ ndo olimu aso w’Okristo, la má wavideo wa totenyi wɛnyɛwɔ lá nsanghanyɛ yel’anteyi kɛ lobengo. Sɛsa tokanyi totshikitanyi djɛ wɛ ndjewa tokanyi tongoleka ndjala l’eposelo wɛ wɔlɔ. Ntsha wɛ nkilika alako wasɔ, ongoyala l’osasa w’ipawɔs’ɔdjɔmba wɔ ndjala Okristo wolekɔ l’akoka l’olemo w’ipoposanyɛ.​—2 Ti. 4:5.

19. Wopo wɔkɔnge w’okokɛ ndjala la wekeka w’Okristo?

¹⁹ Winá w’okanelɛ ekoma w’okokɛ ndawilela, tovungɛke ente okoma woleka djonyi w’okokɛ ndawilela nde, ndjala la wekeka w’Okristo. (Nga. 5:22, 23; Kɔl. 3:12; 2 Pɛ. 1:5-8) Okokɛ nangha mo djɛ nkotshɛ okoma wɔsɔ? Ndjɔmbɔmba, nkokanela djɛ ɔkɔpa ndjala la djawo djɛ wolo. Wɛ nkoka mbala wamba walekɔ l’enkanda wɛso wapɛyɛ alako wa wɔlɔ wɛnyɛ wopo wɔ nkembɛ djawo djɛko. Ongowa nsɔsɔlɔ wapɔ má ndenda ntenyi djɛ wavideo yelá emisiɔ wɛ JW Televisiɔ^® t’ɛnyɛ wopo wɔ wananyɔ l’ankaana iyɛnyɛ djawo djɛ wolo winá w’iyapomana l’ekakasano. Másɔ, kanela wopo w’okokɛ ndjokola djawo djɛwɔ lá lowiko lɔko.

20. Wopo wɔkɔnge w’okokaso mfudjɛ osasa wɔso la nkitshakitshɛ ekiyano wɛso?

²⁰ Ape l’ehamo, isankfumɔ nkombolaka nangha akambo efula l’olemo wɔ Yehova ndeka kɛnɛ k’onanghaso win’ɔsɔ. L’andja wa bango wa Ndjambe, tongoyala l’akoka wa ndokambela efula. Winá w’okongelaso mbamba kɛsɔ, ntsha iso ndapɛyɛ lá kenkfumɔ k’okokaso nangha lá win’ɔsɔ, tongofudjɛ osasa wɔso la tongokitshakitshɛ ekiyano wɛso. Nkambo deka djonyi nde, tɔngɔpɛyɛ Yehova ‘Ndjambe kɛso k’osasa,’ womu la lomo. (1 Ti. 1:11) Djɛkondeke nyontshɔ tosasangake edjito w’okotshɛso!