1. Unfa sömëni baaa ku sisa fuu ta mbei möiti u de du möön soni da Jehovah?

  SÖMËNI soni dë u du a dee kaba pisiten u di goonliba aki (Mat. 24:14; Luk. 10:2; 1 Pet. 5:2). Hii u tuu kë du hii soni di u sa du a di dini di u ta dini Jehovah. Sömëni fuu ta mbei möiti u du di peleikiwooko möön gaanfa. So fuu dë kabakaba u du di kowoonu pioniliwooko. So fuu kë wooko a Bëtëli, nasö kandë u kë heepi mbei Könuköndë zali, nasö woto kamian ka u ta dini Gadu. Nöö sömëni u dee baaa fuu ta mbei möiti u de ko toon dinai nasö gaanwomi (1 Tim. 3:1, 8). Wë Jehovah musu u ta wai te a ta si fa dee sëmbë fëën dë kabakaba u du wooko dëën!​—Ps. 110:3; Jes. 6:8.

2. Unfa u sa ta fii te wa sa dou so u dee maaka dee u kë dou a di dini di u ta dini Jehovah?

² So juu u sa lasi hati te u si taa ten ta pasa, ma wa ta dou dee maaka dee u kë dou a di dini di u ta dini Jehovah. Nasö kandë u ta fii bookosaka, u di u ko gaandi kaa, nasö u di woto soni ta mbei taa wa sa feni so faantiwöutu a di ölganisaasi u Jehovah (Nöng. 13:12). Di soni aki hën bi miti wan sisa de kai Melissa. b Di sisa aki bi o kë go a Bëtëli, nasö a bi o kë go a di Siköö da Könuköndë Peleikima. Ma a bi taki taa: „Mi pasa di jaa di sëmbë musu abi u de sa feni dee gaandi aki. Pakisei nöö mi sa ta dë ta pakisei soni u de. So juu, mi ta fii bookosaka.”

3. Andi so sëmbë musu du u de sa ko abi woto faantiwöutu a di ölganisaasi u Jehovah?

 ³ So njönkuwan abi wan bunu gösöntu, ma tökuseei de musu mbei möiti u de ko abi so fasi ufö de sa feni so faantiwöutu a di ölganisaasi u Jehovah. Kandë so njönkuwan köni, de sa’ u du soni hesi, söseei de dë kabakaba u wooko. Ma a di wan seei ten, kandë de musu mbei möiti u de ko abi pasensi, de musu ko möön sa’ u du di wooko u de finifini, nasö kandë de musu ta möön lesipeki wotowan. Ee i ta mbei möiti fii ko abi dee fasi dee sa mbei i sa tja wan faantiwöutu, nöö dee baaa sa da i di faantiwöutu dë. Boo buta pakisei a di woto u wan baaa de kai Nick. Di di baaa aki bi abi 20 jaa, a bi lasi hati seei, u di de an bi butëën faa dë dinai a di kemeente. A bi taki taa: „Mi bi ta fii seei kuma ma bunu tjika.” Ma baaa Nick bi mbei möiti go dou faa ko abi dee fasi dee dë fanöudu faa sa toon dinai a di kemeente. A bi ta mbei möiti faa sa ta tja dee faantiwöutu dee a bi abi kaa a wan bunu fasi. Nöunöu Baaa Nick dë wan baaa u wan bëikantoo komite.

4. Andi woo taki a di woto aki?

⁴ I ta fii bookosaka u di ja feni wan faantiwöutu di i kë a di ölganisaasi u Jehovah u? Wë ee sö i ta fii, nöö i sa konda di bookohedi fii da Jehovah (Ps. 37:5-7). Boiti di dë, i sa hakisi baaa di abi öndöfeni u de piki i unfa i sa ko ta du di diniwooko fii möön bunu, nöö mbei möiti fii wooko ku dee soni di de o piki i. Te i du sö, nöö i sa ko feni di faantiwöutu di i bi ta wakiti fii feni. Ma kumafa Sisa Melissa bi taki, nöö kandë nöunöu ja o sa du di soni di i bi o kë du da Jehovah. Ma nöö andi i sa du fii sa ta dë waiwai go dou? Wë fuu sa piki di hakisi aki, nöö woo taki u dii soni. Di fosu soni, hën da andi i sa du fii sa ta dë waiwai? Di u tu soni, hën da unfa i sa ko ta möön dë waiwai? Nöö di u dii soni, hën da andi da wantu maaka di i sa buta da iseei di o mbei joo ta dë waiwai?

5. Na un soni u musu ta buta pakisei ee u kë ta dë waiwai? (Peleikima 6:9)

⁵ Peleikima 6:9 ta konda da u andi sa heepi u fuu ta dë waiwai. (Lesi ën.) Wan sëmbë di ta ’piizii ku dee soni di wojo fëën ta si’, da wan sëmbë di dë tifeedi ku dee soni dee a abi. Ma wan sëmbë di ta ’biinga a soni di hën hati kë’, an o dë tifeedi möönsö ku dee soni dee a abi. Andi u ta lei a di soni aki? Wë ee u kë ta dë waiwai, nöö u musu ta buta pakisei a dee soni dee u abi kaa, ka fuu ta buta pakisei a dee soni dee wa sa feni.

6. Un woto woo luku nöunöu, nöö andi woo lei a di woto dë?

⁶ Woo sa ta dë waiwai ku dee soni dee u abi kaa u? Sömëni sëmbë ta feni taa wa o sa ta dë waiwai ku dee soni dee u abi kaa, u di hii juu u ta kë njunjun soni. Ma tökuseei u sa ta dë waiwai ku dee soni dee u abi kaa. Unfa u sa du di soni aki? Wë boo buta pakisei a di woto di Jesosi bi konda u dee talënti, di sikifi a Mateosi 25:14-30. Woo buta pakisei a di fasi fa u sa ko ta dë waiwai, söseei woo buta pakisei a di fasi fa u sa ko ta möön piizii ku dee gaan bunu dee u abi nöunöu kaa.

7. Konda kölö sö andi da di woto di Jesosi bi konda u dee talënti.

⁷ A di woto di Jesosi bi konda, a bi taki soni u wan womi di bi ta seeka faa go a wan kamian. Ufö di womi go, hën a kai dee saafu fëën ko, hën a da de wanlö talënti u de mbei möni ku de. c U di a bi sabi taa na hii dee saafu aki bi abi di wan seei köni, mbei a bi da wan u dee saafu feifi talënti, wan u de a da tu talënti, nöö di wotowan a da wan talënti. Di fosu saafu ku di u tu saafu bi wooko taanga u de sa  mbei möön möni da di Masa u de. Ma di u dii saafu, an bi du na wan soni ku di talënti di de bi dëën, nöö hën di masa puu ën a wooko.

8. Faandi mbei u sa taki taa di fosu saafu a di woto di Jesosi bi konda bi musu u dë waiwai?

⁸ Di fosu saafu bi musu u wai taa di masa fëën bi dëën feifi talënti. Di möni dë bi dë gaan hia möni seei, nöö di soni dë ta lei unfa di masa bi ta futoou di saafu fëën dë tjika! Ma unfa a dë ku di u tu saafu? Wë a bi sa lasi hati u di an bi feni talënti hia kuma di fosu saafu. Ma andi a bi du?

9. Andi Jesosi an bi taki u di u tu saafu? (Mateosi 25:22, 23)

⁹ Lesi Mateosi 25:22, 23. Jesosi an bi taki taa di u tu saafu hati bi boonu, nasö taa a bi hoi wotowan a bëë u di tu talënti nöö a bi feni. Jesosi an bi taki tu taa di saafu bi taki taa: ’Di soni aki hën mi feni nö? Faandi mbei ma feni soni hia kuma di saafu dë? Biga mi ku di saafu di feni feifi talënti tuu ta wooko taanga! Wë ee mi masa an ta kai mi gaan soni, nöö kandë mi musu bei di möni fëën a goon basu, nöö mi go du u miseei wooko.’

10. Andi di u tu saafu bi du ku dee talënti fëën?

¹⁰ Di u tu saafu bi fusutan di faantiwöutu di a bi abi, leti kumafa di fosu saafu bi fusutan di soni dë, nöö a bi wooko taanga da di masa fëën. Fëën mbei a bi sa wooko mbei möni tu toon möön hia möön fa di masa bi dëën. Wë di masa bi paka di saafu aki u di bunu fasi fa a bi wooko dëën. A bi gafa di saafu, söseei a bi dëën möön faantiwöutu!

11. Andi u sa du fuu sa ta möön dë waiwai?

¹¹ Useei sa ta möön dë waiwai, te u ta du hii  soni di u sa du a di dini di u ta dini Jehovah. Du di peleikiwooko fajafaja, nöö mbei hii möiti fii sa ta du soni makandi ku di kemeente ka i dë (Tjab. 18:5; Heb. 10:24, 25). Go a dee komakandi seekaseeka fii sa da piki di o da wotowan degihati. I musu ta si hiniwan soni di i kisi u du a di mindiwiki komakandi kuma wan gaan fanöudu soni di i musu du. Te dee baaa hakisi i fii du wan wooko a di kemeente, nöö du ën a di ten di i musu du ën, söseei lei taa i dë u futoou. Na si kuma an dë fii tei ten du wan wooko di de da i, nöö na si kuma di wooko di de da i fii du an dë fanöudu sö. Mbei möiti fii ko sa’ u du di wooko fii möön bunu (Nöng. 22:29). Möön i ta du di diniwooko fii fajafaja, möön joo go a fesi, söseei joo ko ta möön dë waiwai (Gal. 6:4). Boiti di dë, an o ta taanga da i tu fii wai ku wotowan te de feni wan gaandi di iseei bi o kë.​—Lom. 12:15; Gal. 5:26.

12. Andi bi heepi Sisa Melissa ku Baaa Nick u de ko ta möön dë waiwai?

¹² I ta mëni Sisa Melissa jeti ö, di bi kë go a Bëtëli nasö a di Siköö da Könuköndë Peleikima? Wë hii fa an bi sa du dee soni dë, a bi taki taa: „Mi bi mbei möiti u mi ta du di pioniliwooko u mi fajafaja, söseei mi bi mbei möiti u peleiki a hii dee peipei fasi fa u sa ta du di peleikiwooko. Di soni dë bi mbei mi ta dë waiwai seei.” Nöö unfa Baaa Nick bi du di de an bi butëën ko dinai a di kemeente? Wë a bi taki taa: „Mi bi ta buta pakisei a dee soni dee mi bi sa du. Mi bi ta buta möön pakisei a di peleikiwooko, ku di da di mi bi sa ta da piki a dee komakandi. Mi bi buta mi në u mi sa go wooko a Bëtëli, nöö a bi ko pasa taa a di jaa nëën baka, mi bi sa go wooko a Bëtëli.”

13. Andi o pasa ee i ta buta hii i pakisei a dee faantiwöutu dee i abi nöunöu? (Peleikima 2:24)

¹³ Ee i ta buta hii i pakisei a dee faantiwöutu dee i abi nöunöu, joo feni wotowan bakaten u? Wë i sa feni woto faantiwöutu, leti kumafa Baaa Nick bi feni woto faantiwöutu. Ma ee an ko pasa sö, nöö leti kumafa soni bi waka da Sisa Melissa, sö nöö soni o waka da i tu. Joo ko ta möön dë waiwai, söseei joo ta dë tifeedi ku dee soni dee i ta du da Jehovah. (Lesi Peleikima 2:24.) An dë u taki tu taa joo ta möön dë waiwai, te i sabi taa dee soni dee i ta mbei möiti fii du, ta mbei di Masa fuu, Jesosi Keesitu, ta wai ku i.

14. Andi u musu ta hoi a pakisei hii juu te a nama ku maaka di u kë dou a di dini di u ta dini Jehovah?

¹⁴ Kandë u ta buta pakisei fuu a dee faantiwöutu dee u abi nöunöu. Ma di soni dë kë taki taa wa musu mbei möiti möön fuu du möön soni da Jehovah u? Wë nönö! U sa buta maaka di u kë dou di sa heepi u fuu ko dë wan möön bunu peleikima, söseei fuu ko dë wan möön bunu leima. U sa mbei möiti fuu ta möön heepi dee baaa ku dee sisa fuu tu. Woo sa dou dee maaka aki te u ta buta pakisei a di heepi di u musu heepi wotowan, ka fuu ta buta pakisei a useei nöö.​—Nöng. 11:2; Tjab. 20:35.

15. Andi da wantu maaka di i sa buta da iseei sö taa i sa ko ta möön dë waiwai?

¹⁵ Un maaka i sa buta da iseei? Hakisi Jehovah faa heepi i fii ko sabi un maaka i bi o sa dou (Nöng. 16:3; Jak. 1:5). I sa mbei möiti fii dou wan u dee maaka dee u bi taki soni u de a di  fosu palaklafu u di woto aki. I sa du di heepi pioniliwooko, i sa du di kowoonu pioniliwooko, i sa wooko a Bëtëli, söseei i sa heepi mbei kamian ka u ta dini Gadu. Kandë i sa lei wan woto töngö tu, sö taa i sa go peleiki a wan woto kamian, nasö a wan woto köndë. I sa ko sabi andi i musu du te i luku kapitë 10 u di buku Wi orga fu du a wani fu Yehovah, söseei  i sa hakisi dee gaanwomi u di kemeente ka i dë u de piki i andi i sa du. d Te joo ta mbei möiti fii dou dee maaka aki, nöö wotowan o si taa i nango a fesi, söseei joo ko ta möön dë waiwai.

16. Andi i sa du ee ja sa dou wan maaka di i bi o kë dou?

¹⁶ Ma unfa a dë ee nöunöu dë ja sa dou dee maaka dee u taki u de a di woto aki? Wë i sa buta wan woto maaka da iseei. A musu dë wan maaka di joo sa dou. Boo luku wanlö woto soni di i sa du.

17. Andi wan baaa sa du faa ko dë wan möön bunu leima, te u luku di soni di sikifi a 1 Timoteo 4:13, 15?

¹⁷ Lesi 1 Timoteo 4:13, 15. Ee i da wan dopudopu baaa, nöö i sa mbei möiti fii ko sa’ u fan möön bunu, söseei fii ko sa’ u lei sëmbë soni möön bunu. Faandi mbei di soni aki dë wan fanöudu soni? Wë u di te i mbei hii möiti fii ko sa’ u lesi bunu, fii ko sa’ u fan bunu, söseei fii ko sa’ u lei sëmbë soni a wan bunu fasi, nöö joo sa möön heepi dee sëmbë dee ta haika i. I sa mbei möiti fii lei unfa i sa wooko ku hiniwan u dee pisi u di brochure Ko toon wan möön bunu lesima ku wan möön bunu leima. Lei soni u hiniwan u dee pisi aki apaiti. Pooba u du dee soni te i dë a wosu, nöö wooko ku de te joo hoi wan taki. Hakisi di baaa di dë laima u di mindiwiki komakandi faa heepi i, nasö i sa hakisi wan woto gaanwomi ’di ta konda di buka da sëmbë bunu ku di ta lei sëmbë a wan bunu fasi’​ e (1 Tim. 5:17). Na suku fii ko fusutan dee soni dee sikifi a di brochure wanwan nöö a kaba, ma buta pakisei a di fa i sa heepi di sëmbë di ta haika i faa ko abi biibi, söseei  faa sa du dee soni dee a ta lei. Te i ta du sö, nöö i ku de tuu o ko ta möön dë waiwai.

18. Andi sa heepi u fuu dou wanlö maaka dee u kë dou a di peleikiwooko?

¹⁸ Hii u tuu abi di gaandi u peleiki, nasö u heepi sëmbë u de ko dë bakama u Keesitu (Mat. 28:19, 20; Lom. 10:14). I kë ko möön sa’ u du di wooko aki ö? Wë buta wanlö maaka di i kë dou te i ta lei soni a di Da lei-brochure fuu. I sa feni soni di sa heepi i tu a Di libi ku di diniwooko fuu kuma Keesitu sëmbë komakandi-buku, söseei i sa luku dee fëlön dee u ta bia a dee mindiwiki komakandi fuu, dee ta lei u unfa u musu du di peleikiwooko. I sa pooba dee peipei fasi aki, fii sa ko sabi undi möön bunu da di pisiwata ka i ta peleiki. Ee i ta wooko ku dee soni dee u taki aki, nöö joo ko dë wan möön bunu peleikima, söseei joo ko ta möön dë waiwai.​—2 Tim. 4:5.

19. Unfa i sa ko abi dee fasi dee Keesitu sëmbë musu abi?

¹⁹ Te joo buta maaka di i kë dou, nöö a dë fanöudu fii mbei möiti fii ko abi dee fasi dee Keesitu sëmbë musu ko abi tu (Gal. 5:22, 23; Kol. 3:12; 2 Pet. 1:5-8). Andi i sa du fii ko abi dee fasi aki? Wë ee hën a dë taa i kë ko abi wan taanga biibi, nöö kandë i sa lesi woto a dee buku fuu dee ta lei andi i musu du fii sa ko abi wan taanga biibi. Kandë i sa luku wantu u dee fëlön u JW Broadcasting^®, di ta lei unfa baaa ku sisa bi lei taa de abi wan taanga biibi, hii fa peipei fuka bi ta miti de. Baka di dë, nöö i sa luku na un fasi i sa djeesi de a di biibi di de abi.

20. Andi u sa du fuu sa ta möön dë waiwai, söseei fu wa ta fii bookosaka poi?

²⁰ Wë hii u tuu bi o kë du möön soni da Jehovah. A di njunjun goonliba, woo sa du hii dee soni dee u kë du da Jehovah. Ma u sa mbei möiti nöunöu kaa fuu ta du hii soni di u sa du da Jehovah. Di soni aki o mbei u ta dë waiwai, söseei a o heepi u fu wa ta fii bookosaka poi. Ma di möön fanöudu soni, hën da woo ta tja gafa ko da Jehovah, „di piizii Gadu” (1 Tim. 1:11). Fëën mbei boo ta piizii ku dee gaandi dee u abi!