1. Kerea lawọ ělang i Yehuwa nẹ̌tawakal᷊i měkoạ limembong mal᷊awọ gunang pelayanan si Yehuwa?

 PIẠ lawọ hal᷊ẹ̌ harusẹ̌ koateng i kitẹ maraning pěngěngsuengu dunia ini. (Mat. 24:14; Luk. 10:2; 1 Ptr. 5:2) I kitẹ kěbị mapulu měkoạ kapulung i Yehuwa sěngapang botonge. Lawọ bọu i kitẹ někoạ limembong mal᷊awọ su pelayanan. Piạ u mapulu makoạ perintis. Sěnggạ mapulu měhal᷊ẹ̌ su Betel arau tumol᷊e proyek pembangunan teokratis. Kụ lawọ saudara mẹ̌tawakal᷊i tadeạu memenuhi syarat gunang makoạ hamba pelayanan arau penatua. (1 Tim. 3:1, 8) Yehuwa sěbạe mal᷊uasẹ̌ nakasilo manga ělang’E mapulu měkoạ kěbị haghi gunang melayani si Sie.​—Mz. 110:3; Yes. 6:8.

2. Kerea pěndang i kitẹ mạeng tawe nakakoạ piram baụ cita-cita rohani?

² Katewe, i kitẹ ěndịu makadodọ naung ual᷊ingu marěngụ tawe nakakoạ piram baụ cita-cita rohaning i kitẹ. Arau i kitẹ ěndịu makadodọ naung mạeng tawe makakoạ piram baụ hal᷊ẹ̌ su organisasing i Yehuwa ual᷊ingu umurẹ̌ arau alasang wal᷊inẹ. (Amsal 13:12) Contone, i Melissa. * I sie mapulu měhal᷊ẹ̌ su Betel arau tumol᷊e Sekolah bagi Penginjil Kerajaan, katewe i sie nẹ̌bera, ”Iạ tumanịu maghurang gunang memenuhi syarat. Pẹ̌sěngsul᷊ẹ, iạ nẹ̌pěndang nakadodọ naung.”

3. Apa harusẹ̌ koatengu pirang katau tadeạu memenuhi syarat su piram baụ tugasẹ̌?

³ Pirang katau apang bědang mangudạ dingangu masehatẹ̌ ěndịu harusẹ̌ mẹ̌tawakal᷊i piạ piram baụ sipatẹ̌ tadeạu memenuhi  syarat gunang makaěbạ tugasẹ̌ wal᷊inẹ. Contone, pirang katau ěndịu pande, masahawụ měkoạ putusang, dingangu puluang měhal᷊ẹ̌. Katewe, i sire ěndịu perlu měngěndung limembong masabarẹ̌, maingatẹ̌ su tempong měhal᷊ẹ̌, dingangu maadatẹ̌ su taumata wal᷊inẹ. Mạeng i kau mẹ̌tawakal᷊i piạ manga sipatẹ̌ ene, manga saudara ěndịu sarung měgělị tugasẹ̌ makahěkosẹ̌ si kau. Pěmanda pengalaman i Nick. Su tempong umure 20 su taunge, i sie sěbạe nakadodọ naung ual᷊ingu tawe nipile nakoạ hamba pelayanan. I sie nẹ̌bera, ”Iạ nẹ̌pěndang su watangengku piạ barang nẹ̌sal᷊a.” Katewe i Nick tawe něngědo. I sie někoạ kapaelange su sidang dingangu su tempong měnginjilẹ̌. Orasẹ̌ ini, i sie seng nakoạ anggota Panita Cabang.

4. Apa sarung ěndungang i kitẹ su pěngangěndungang ini?

⁴ Apa i kau nakadodọ naung ual᷊ingu tawe nakakoạ cita-cita rohani? Mạeng iya, pẹ̌běke dal᷊ungu naungu si Yehuwa. (Mz. 37:5-7) I kau lai botonge mẹ̌dorong těgu bọu manga saudara matělang su rohani soal u kerea makoạ limembong mapaelẹ̌ su pelayanan su Mawu, kụ bọu ene pẹ̌tawakal᷊i tumol᷊e sasasane. Mạeng měkoạ ene, i kau ěndịu makakoạ cita-citanu. Katewe kere i Melissa, seng nisěbạ kanini, tugasẹ̌ ikẹ̌kapuluangu ěndịu tawe ikakoạu orasẹ̌ ini. Mạeng kerene, kerea i kau měndiagạ karal᷊uasu? Gunang sumimbahẹ̌ kakiwal᷊o ene, i kitẹ sarung měngěndung (1) su apa makaěbạ karal᷊uasẹ̌, (2) carane limembong mal᷊uasẹ̌, dingangu (3) cita-cita makatamba karal᷊uasu.

5. Tadeạu piạ karal᷊uasẹ̌, i kitẹ harusẹ̌ fokus su hal᷊ẹ̌ apa? (Pengkhotbah 6:9)

⁵ Pengkhotbah 6:9 nělahẹ apa makatul᷊ung si kitẹ tadeạu piạ karal᷊uasẹ̌. (Basa.) Mạeng sěngkatau fokus su ”apa su těngong mata”, i sie sarung puas su apa seng piạ si sie tuhụ situasine su tempo ene. Katewe, mạeng sěngkatau mapulu měkoạ hal᷊ẹ̌ tawe ikakoạe, i sie tawe makapěndang puas. Hakị u ene, apa těntirone si kitẹ? Tadeạu piạ karal᷊uasẹ̌, i kitẹ perlu fokus su apa piạ si kitẹ bal᷊inẹ su apa tawe kaěbakeng i kitẹ.

6. Sasihing apa sarung ěndungang i kitẹ, kụ apa kaěndungang bọu sasihing ene?

⁶ Apa i kitẹ botonge puas su apa piạ si kitẹ? Lawọ taumata mẹ̌pikirẹ̌ tala, ual᷊ingu i kitẹ puluang měngěndung měkoạ manga hal᷊ẹ̌ buhu. Katewe ene sěběnarẹ̌e botonge koateng. I kitẹ botonge puas su apa piạ si kitẹ orasẹ̌ ini. Kerea i kitẹ měkoạ ene? Gunang makaěbạ sasimbahe, pěmanda sasihing i Yesus soal u talenta su Matius 25:14-30. I kitẹ sarung měngěndung kerea tadeạu mal᷊uasẹ̌ dingangu makaěbạ limembong lawọ karal᷊uasẹ̌ su situasing i kitẹ orasẹ̌ ini.

7. Běkeko kadodọ sasihing i Yesus soal u talenta.

⁷ Su sasihing ene, sěngkatau esẹ makoạ sarang tampạ marau. Těntal᷊ang tawe natamai, i sie nẹ̌kui manga ělange kụ něgělị talenta gunang pěbisnisẹ̌. * I sie masingkạ kemampuan manga ělange nẹ̌tatěntang, hakị u ene i sie něgělị su ělange humotong lima talenta, ělange karuane darua, kụ ělange katělune sěmbaụ. Ělang humotong dingangu karuane něngurusẹ̌ pakapia talenta seng nighělị si sire. Katewe, ělang katělune tawe někoạ apa-apa talenta seng nighělị si sie, kụ i sie nipěcatẹ̌.

8. Kawe nụe ělang humotong botonge mal᷊uasẹ̌?

⁸ Ělang humotong tantu sěbạe mal᷊uasẹ̌ ual᷊ingu bosẹ̌e něgělị si sie lima talenta. Ene doitẹ̌ sěbạe mal᷊awọ, kụ ene něnodẹ bosẹ̌e sěbạe mangimang si sie. Katewe, kerea dingangu ělang karuane? I sie tantu botonge  makadodọ naung ual᷊ingu tawe nakatarimạ lawọ talenta kere ělang humotong. Katewe, apa nikoạe?

9. Apa tawe nikoạu ělang karuane? (Matius 25:22, 23)

⁹ Basa Matius 25:22, 23. Yesus tawe naul᷊ị ělang karuane nẹ̌pědu ual᷊ingu kětạeng nakatarimạ darua talenta. Kụ i Yesus tawe naul᷊ị ělang ene němorotesẹ̌ kụ nẹ̌bera, ’Kětạeng ini si siạ? Iạ lai něhal᷊ẹ̌ masěghadẹ̌ to kere ělangu nakatarimạ lima talenta! Mạeng bosẹ̌ tawe měngẹ̌ngarěga si siạ, ěndokangbe darua talenta ini takụ ambungang su ěntana kụ iạ měkoạ hal᷊ẹ̌ku.’

10. Apa nikoạu ělang karuane dingangu talenta si sie?

¹⁰ Kere ělang humotong, ělang karuane němanda serius tugasẹ̌ nighělị si sie, kụ i sie něhal᷊ẹ̌ masěghadẹ̌ gunang bosẹ̌e. Hasile, bọu darua talenta ene natamba nakoạ ěpạ. Bosẹ̌e něngal᷊amatẹ̌ si sie ual᷊ingu hal᷊ẹ̌ masěghadẹ̌ seng nikoạe. Bosẹ̌e nẹ̌dalo si sie kụ něgělị limembong lawọ tugasẹ̌.

11. Kerea tadeạu i kitẹ makoạ limembong mal᷊uasẹ̌?

¹¹ Kerene lai, i kitẹ botonge limembong mal᷊uasẹ̌ mạeng měhal᷊ẹ̌ masěghadẹ̌ su haghing tugasi kitẹ su pelayanan si Yehuwa. Turusẹ̌ ”sibukẹ̌” su pelayanan kụ měhal᷊ẹ̌ masěghadẹ̌ dingangu sidang. (Kis. 18:5; Ibr. 10:24, 25) Koạ persiapan bahan pěngangěndungang pakapia tadeạu i kau botonge makaghělị komentarẹ̌ makawahangsang. Su tempong makaěbạ tugas siswa su pěngangibadang, koạ ene dingangu serius. Mạeng i kau nakaěbạ tugasẹ̌ su sidang, harusẹ̌ kapěngumbalaěng dingangu pakal᷊ighạ duměnta. Abe mẹ̌pikirẹ̌ tugasẹ̌ nighělị si kau ene tawe penting kụ kětạeng měngěngsue temponu.  Pẹ̌tawakal᷊i makoạ limembong mapaelẹ̌ su tugasu. (Amsal 22:29) Mạeng i kau měhal᷊ẹ̌ masěghadẹ̌ gunang i Yehuwa, i kau sarung makoạ hapị’E mapia dingangu sěbạe mal᷊uasẹ̌. (Gal. 6:4) Kụ sarung limembong gampang si kau gunang mal᷊uasẹ̌ su tempong taumata wal᷊inẹ nakaěbạ tugasẹ̌ kẹ̌kapuluangu.​—Rm. 12:15; Gal. 5:26.

12. Apa nakatul᷊ung si Melissa dingangi Nick tadeạu limembong mal᷊uasẹ̌?

¹² Apa i kau nakatahěndung si Melissa, nisěbạ su paragraf 2 mapulu měhal᷊ẹ̌ su Betel arau tumol᷊e Sekolah bagi Penginjil Kerajaan? Maning i sie tawe nakakoạ cita-citane, i sie nẹ̌bera, ”Iạ někoạ kapaelange su dinas perintis dingangu nẹ̌tawakal᷊i někoạ haghing cara gunang měnginjilẹ̌. Ini nakakoạ si siạ sěbạe mal᷊uasẹ̌.” Kụ kerea i Nick timatěngo susah naunge su tempong tawe nipile nakoạ hamba pelayanan? I sie nẹ̌bera, ”Iạ fokus su apa botonge takụ koateng kere měnginjilẹ̌ dingangu měgělị komentarẹ̌ makawahangsang su pěngangibadang. Iạ lai něloho formulir gunang měhal᷊ẹ̌ su Betel kụ su taung tuhụe iạ nitarimạ.”

13. Apa hasile mạeng i kau něhal᷊ẹ̌ limembong masěghadẹ̌ su tugasu orasẹ̌ ini? (Pengkhotbah 2:24)

¹³ Mạeng orasẹ̌ ini i kau něhal᷊ẹ̌ masěghadẹ̌ gunang tugasu, apa su tempo mahi i kau sarung makaěbạ limembong lawọ tugasẹ̌? Aramanung ene botonge mariadi, kere i Nick. Katewe mạeng tala, kere i Melissa, i kau botonge limembong mal᷊uasẹ̌ dingangu sarung sěbạe mal᷊uasẹ̌ ual᷊ingu apa seng kẹ̌koatengu gunang i Yehuwa. (Basa Pengkhotbah 2:24.) I kau lai sarung limembong mal᷊uasẹ̌ ual᷊ingu nakasingkạ seng nakal᷊uasẹ̌ si Tuang i kitẹ, i Yesus Kristus.

14. Apa harusẹ̌ tahěndungang i kitẹ soal u cita-cita rohani?

¹⁴ Mạeng i kitẹ fokus su tugasẹ̌ orasẹ̌ ini, apa ene mangal᷊ene i kitẹ tawe harusẹ̌ mẹ̌tawakal᷊i měkoạ limembong mal᷊awọ gunang i Yehuwa? Tala. I kitẹ perlu měkoạ cita-cita makatul᷊ung si kitẹ makoạ měnganginjilẹ̌ dingangu měnaněntiro limembong mapaelẹ̌, kụ limembong makatul᷊ung anạu sěmbaụ. I kitẹ sarung makakoạ cita-cita ene mạeng matahuěna dingangu bersahaja kụ fokus mẹ̌tul᷊ung taumata wal᷊inẹ bal᷊inẹ watangeng.​—Amsal 11:2; Kis. 20:35.

15. Cita-cita kerea makatul᷊ung si kau limembong mal᷊uasẹ̌?

¹⁵ Cita-cita apa botonge koateng gunang watangengu? Pẹ̌dorong si Yehuwa tadeạu mẹ̌tul᷊ung si kau makasingkạ cita-cita apa botonge ikakoạu. (Amsal 16:3; Yak. 1:5) Apa i kau botonge měkoạ sěmbaụ cita-cita kere nisěbạ su  paragraf humotong su pěngangěndungang ini, kere merintis ekstra, merintis biasa, měhal᷊ẹ̌ su Betel, arau tumol᷊e proyek pembangunan teokratis? I kau botonge měngendung bawera wal᷊inẹ arau měnginjilẹ̌ su tampạ wal᷊inẹ. I kau botonge měngěndung mal᷊awọ soal u cita-cita kerene mạeng mẹ̌basa pasalẹ̌ 10 bọu bukẹ̌ Diorganisasi untuk Melakukan Kehendak Yehuwa, kụ mẹ̌bisara dingangu manga penatua su sidang. * Mạeng i kau mẹ̌tawakal᷊i měkoạ cita-citanu, kemajuan nikoạu sarung kasilong kụ i kau sarung limembong mal᷊uasẹ̌.

16. Apa wotonge koatengu mạeng orasẹ̌ ini i kau tawe makakoạ cita-cita ikẹ̌kapuluangu?

¹⁶ Katewe, kerea mạeng orasẹ̌ ini i kau tawe makakoạ manga cita-cita seng nisěbạ kal᷊imona? Pẹ̌tawakal᷊i měkoạ cita-cita botonge ikakoạu. Pěmanda piram baụ contone.

17. Tumuhụ 1 Timotius 4:13, 15, apa wotonge koatengu sěngkatau saudara tadeạu makoạ měnaněntiro limembong mapaelẹ̌?

¹⁷ Basa 1 Timotius 4:13, 15. Mạeng  i kau sěngkatau saudara seng bọu nibaptisẹ̌, i kau botonge mẹ̌tawakal᷊i makoạ měnanasẹ̌ dingangu měnaněntiro limembong mapaelẹ̌. Kawe nụe? Ual᷊ingu mạeng i kau mẹ̌tawakal᷊i makoạ mẹ̌bawasa, měnanasẹ̌, dingangu měnaněntiro limembong mapaelẹ̌, i kau sarung limembong makatul᷊ung si sire apang dimaringihẹ̌. Koạ cita-cita gunang měngěndung lai koạ apa seng niěndungang su brosur Latih Watangengu gunang Mẹ̌basa dingangu Měněntiro. Ěndunge pẹ̌sěmbaụ, koạ latihan pakapia su wal᷊e, kụ su tempong měnasẹ̌ koạ apa seng niěndungangu. Pẹ̌dorong těgu su penasihat ekstra arau penatua wal᷊inẹ seng ”něhal᷊ẹ̌ masěghadẹ̌ gunang měhabarẹ̌ lai měněntiro”. * (1 Tim. 5:17) Fokus bal᷊inẹ kětạeng su cara i kitẹ měkoạ ene, katewe lai mẹ̌tul᷊ung si sire apang dimaringihẹ̌ gunang měnoghasẹ̌ pangangimang i sire arau měmahangsang si sire tadeạu měkoạ apa seng niěndungang. Mạeng měkoạ ene, i kau sarung limembong mal᷊uasẹ̌, kụ i sire lai sarung mal᷊uasẹ̌.

18. Apa makatul᷊ung si kitẹ měkoạ cita-cita su pelayanan?

¹⁸ I kitẹ kěbị piạ tugasẹ̌ gunang měnginjilẹ̌ dingangu měkoạ muritẹ̌. (Mat. 28:19, 20; Rm. 10:14) Apa i kau mapulu makoạ limembong mapaelẹ̌ su tugasẹ̌ penting ini? Pěngěndung brosur Měněntiro kụ bọu ene koạ cita-cita gunang mẹ̌tul᷊ung si kau měkoạ apa seng niěndungangu. I kau botonge makaěbạ těgu bọu Pelayanan dingangu Pěbawiahẹ̌ Kristen—Bageang Pěngangěndungang lai bọu video contoh carane mẹ̌bawěke su pěngangibadang. Pěnal᷊ukạ haghing těgu gunang měmile sude nẹ̌tatahino. Su tempong tumol᷊e manga těgu ene, i kau sarung makoạ měnganginjilẹ̌ limembong  mapaelẹ̌, kụ sarung limembong mal᷊uasẹ̌.​—2 Tim. 4:5.

19. Kerea tadeạu i kau piạ manga sipatẹ̌ Kristen?

¹⁹ Abe kiwul᷊ei sěmbaụ cita-cita sěbạe penting botonge koatengu ene kai piạ manga sipatẹ̌ makal᷊uasẹ̌ Mawu. (Gal. 5:22, 23; Kol. 3:12; 2 Ptr. 1:5-8) Kerea i kau měkoạ ene? Contone, i kau ěndịu mapulu piạ pangangimang limembong matoghasẹ̌. I kau botonge mẹ̌basa artikel su manga publikasing i kitẹ kụ něgělị těgu gunang měnoghasẹ̌ pangangimang. I kau tantu sarung makaěbạ gunane su tempong mẹ̌biala manga bageang bọu JW Broadcasting^® něnodẹ kerea anạu sěmbaụ piạ pangangimang gěguwạ su tempong timatěngo haghing sasal᷊ukạ. Bọu ene pẹ̌tiněna kerea i kau mẹ̌těno pangangimang i sire su pěbawiahu.

20. Apa koateng i kitẹ tadeạu limembong mal᷊uasẹ̌ dingangu tawe tumanịu mẹ̌pěndang nakadodọ naung?

²⁰ Tantu i kitẹ mělẹ̌harapẹ̌ měkoạ limembong mal᷊awọ gunang i Yehuwa bọu apa botonge ikakoạ i kitẹ orasẹ̌ ini. Su dunia wuhu, i kitẹ sarung mẹ̌tahamawu si Sie dingangu kěbị apa piạ si kitẹ. Sarang tempo ene marěnta, mạeng i kitẹ měkoạ kapaelange bọu apa botonge ikakoạ i kitẹ orasẹ̌ ini, i kitẹ sarung limembong mal᷊uasẹ̌ dingangu makakurang pěndang nakadodọ naung. Kụ limembong penting, i kitẹ sarung mapakawantugẹ̌ dingangu mẹ̌dalo si Yehuwa, ”Mawu mal᷊uasẹ̌”. (1 Tim. 1:11) Hakị u ene, pakaral᷊uasẹ̌ ual᷊ingu manga hal᷊ẹ̌ botonge koatengu gunang i Yehuwa.