1. Ka akaa a nyi nahan mbagenev kpishi ve kegh iyol u eren sha ci u Yehova?

 SE MBA a tom u eren kpishi hen shighe u mkur u tar ne a zurum ne. (Mat. 24:14; Luka 10:2; 1 Pet. 5:2) Hanma wase yô, sar nan u eren kwagh u nan fetyô la cii sha ci u Yehova. Mbagenev kpishi mba seer shighe ve u eren tom u pasen kwagh la. Mbagen mba a awashima u eren pania. Mbagen di mba a awashima u za eren tom shin Betel gayô eren tom u maan ayou a nongo u Yehova. Shi anmgbianev kpishi mba nôngon ér vea lu mbashiren tiônnongo shin mbatamen. (1 Tim. 3:1, 8) Doo Yehova kpishi u nengen er ior nav ve kegh iyol u eren akaa kpishi sha ci na yô!—Ps. 110:3; Yes. 6:8.

2. Aluer se mba fantyô u eren akaa agen a se we ishima u eren sha ci u Yehova la ga yô, alaghga a lu se nena?

² Nahan kpa, aluer shighe kar kpishi kpa se mba a ar sha ian i eren akaa a se we ishima u eren sha ci u Yehova la ga yô, alaghga iyol ia kpe se. Shin aluer iyolbeen shin mbamzeyol mbagenev na se mba fantyô u eren akaa agen ken nongo u Yehova ga yô, iyol ia kpe se. (Anz. 13:12) Ka kwagh u a lu zayol u anmgbian u kwase ugen je la, iti na ér Melissa. * Ka i sar un u za eren tom shin Betel gayô zan Makeranta u Mbapasen Ivangeli i Tartor la, kpa a kaa ér: “M tsa hemba anyom a i ver la. M nenge mer a tsa kpa me ar sha ian la ga. Nahan ashighe agen iyol ka i kpem.”

3. Ka akaa agen a nyi nahan a gba u mbagenev vea er ve, vea kuma u eren ityom igen ken nongo u Yehova?

³ Mbagenev mba ve lu agumaior shi ve lu a gbong gbong iyol yô, a gba u vea via ken jijingi shi vea tese aeren a i gbe u vea lu a mi la cii ve, vea kuma u eren ityom i ve lu keren la ye. Ikyav i tesen yô, alaghga ve fa takada shi ka taver ve u tsuan kwagh u vea er ga, man ka ve kegh iyol u eren tom kpaa. Kpa a gba u vea seer henen u wan  ishima shi veren shima eren tom ve tsembelee, shi vea seer henen u nan mbagenev icivir. Aluer u hemba veren ishima sha aeren a i gbe u u lu a mi la yô, a na u tom u u lu keren la hen shighe u u hen wer a na u ga yô. Nenge ase kwagh u yange er anmgbian ugen yô, iti na ér Nick. Shighe u lu anyom 20 la, lu veren ishima ér a na un tom u orshiren tiônnongo. Mba ne un ga yô, iyol kpe un kpishi. A kaa ér: “Yange lum er kwagh shi sha ieren yam keng nahan.” Kpa Nick yina ishima ga, za hemen u nôngon ér una lu a aeren a i gbe u una lu a mi la. Yange er kwagh u fatyô la cii ken tiônnongo man ken tom u pasen kwagh la. Nyian ne, Nick ngu ken Kômatii u Nengen sha Branci.

4. Ka nyi se lu timen sha mi ken ngerene?

⁴ Iyol kpe u sha ci u ica i gba je kpa mba a na u tom u u we shima u eren ken nongo u Yehova la ga yumu? Aluer kwagh ngu nahan yô, er msen hen Yehova, pase un ishima you. (Ps. 37:5-7) Shi pine anmgbianev mba ve via ken jijingi yô, ve tese u kwagh u we kpa u er ve u kuma u eren ityom i u we ishima u eren ken nongo u Yehova la yô, maa nôngo sha afatyô wou cii, dondo kwaghwan ve la. Aluer u er nahan yô, a fatyô u nan we tom u u lu keren la, shin u fatyô u aren sha ian i eren tom shon. Kpa er kwagh u Melissa u se vande teren kwagh na la a tese nahan, alaghga tom u i sar u u eren sha ci u Yehova hegen la, a taver u nan we u, sha ci u anyom a ou kar. Nahan u er nena? U er nan ve a za hemen u saan we iyolo? Ngeren ne time sha akaa atar a a wase se u zuan aa mlumun sha mpin ne yô. (1) Kwagh una na a saan we yô, (2) kwagh u er ve a seer saan we iyol yô man (3) akaa a u tsua u eren ve a hemba saan we iyol yô.

5. Ka nyi i gbe u se hemba veren ishima sha mi ve a saan se iyolo? (Orpasenkwagh 6:9)

⁵ Orpasenkwagh 6:9 tese se kwagh u se er ve a saan se iyol yô. (Ôr.) Or u nan hembe veren ishima ‘sha kwagh u ashe a nan a nengen a mi’ yô, ka i saan nan iyol a kwagh u nan lu a mi la, er mlu u nan nahan. Kpa or u nan lu a isharen sha akaa wuee yô, ka nan zer tômon akaa mayange nana zua a mi ga yô. Ka nyi se hen ken kwagh ne? Kwagh u se er ve a saan se iyol yô, a gba u se hemba veren ishima sha kwagh u se lu a mi la, kua sha kwagh u se lu a ishimaverenkeghen ser se fatyô u eren la.

6. Ka injakwagh i nyi se lu timen sha mi hegene, man ka nyi se hemba veren ishima sha mini?

⁶ Mimi je a fatyô u saan se iyol a kwagh u se hila lu a mi yôô? Ior kpishi hen ér kwagh afatyô u lun nahan ga, sha ci u ka se soo ser man se za hemen u henen u eren akaa a he. Kpa jighilii yô, a fatyô u saan se iyol. A fatyô u saan se iyol sha mimi a kwagh u se hila lu a mi yô, a lu sha kwagh u se lu ‘nengen a mi sha ashe’ la tseegh tsô ga. A er nan ve kwagh a fatyô u lun nahana? De se time sha injakwagh i utalenti i Yesu yange ôr ken Mateu 25:14-30 la man se zua a mlumun ye. Se hemba veren ishima sha kwagh u injakwagh la i tese, u una wase se u fan er se er ve a saan se iyol shi a seer saan se iyol je kpaa, sha akaa a dedoo a se hila lu a mi hegen la yô.

7. Sav injakwagh i Yesu ôr sha kwagh u utalenti la?

⁷ Yesu yange ôr ken injakwagh la ér, orgen lu wan iyol i zan zende. Nahan a na ikpan na utalenti ér i er kpenga a mi, cii mase yemen zende ye. * Yange nenge kwagh u hanma kpan nana fatyô u eren la, maa na kpan u hiihii la utalenti utaan, u sha uhar la, utalenti uhar, u sha utar la, talenti môm. Kpan u hiihii la man u sha uhar la yem za er kasua a inyaregh kira sha gbashima, nahan hanma ve zua a liba sha ci u orvesen ve. Kpa kpan u sha utar la yô, er kwaghmôm a inyaregh ki i na un la ga, nahan orvesen na zenda un ér a de kera eren un tom ga.

8. Yange saan kpan u hiihii u i ôr kwagh na ken injakwagh la iyol sha ci u nyi?

 ⁸ Yange a saan kpan u hiihii la iyol kpishi er orvesen na wa utalenti utaan sha ikyev na yô. Inyaregh kira lu zege inyar, nahan tese je ér orvesen na la yange na un jighjigh kpishi! Kpan u sha uhar la di er nena? Yange iyol ma kpe un sha ci u i na un utalenti kpishi er kpan u hiihii la nahan ga. Kpa gema er nena?

9. Ka nyi Yesu yange ôr sha kwagh u kpan u sha uhar la ga? (Mateu 25:22, 23)

⁹ Ôr Mateu 25:22, 23. Yesu ôr kwagh u tesen ér yange ishima vihi kpan u sha uhar la shi wa kwagh ishima a or sha ci u i na un utalenti uhar tseegh yumu? Ei. A kaa ér: ‘Kpan u sha uhar ne yange vaa iyol ér orvesen na na un utalenti uhar tseegh, man un er un tom kpoghuloo er kpan u hiihii la nahana?’ Ei. Shin a ôr ér ‘kpan la yange kaa ér aluer orvesen na ngu henen ér un eren un tom sha inja ga yô, guda una za time ihyungwa una wa inyaregh kira shimi, una hide una eren akaa a na, una de u eren tom sha ci u orvesen naa?’ Ei, Yesu ôr kwagh nahan ga.

10. Kpan u sha uhar la yange er nyi a utalenti mba i na un laa?

¹⁰ Kpan u sha uhar ne yange fa er tom u orvesen na a ne un la i lu tom u vesen yô, nahan a er u sha gbashima, er kpan u hiihii la nahan. Kwagh ne na yô, a zua a utalenti uhar, a seer sha mba orvesen na vande nan un la. Nahan orvesen na na un injar sha tom u yange er kpoghuloo man sha kwaghfan la. Yange orvesen na la ember tseegh tsô ga, kpa nenge ér a kuma u nan un ityom igen kpaa.

11. Ka nyi se er ve a hemba saan se iyolo?

¹¹ Se kpa aluer se wa ityough u eren nyityô tom i i ne se ken nongo u Yehova yô, a seer saan se  iyol. Sha nahan yô, “wa ityough” ken tom u pasen kwagh la shi eren ityom i ken tiônnongo kpoghuloo. (Aer. 18:5; Heb. 10:24, 25) Hanma mkombo yô, wa iyol sha mi tsembelee cii u za ye, sha er u za na mbamlumun sha kwagh u i lu henen la mba vea taver anmgbianev ishima yô. Aluer u ngu a asaimenti u za eren ken mkombo u ken atô u kasua la yô, asaimenti la a lu u kwagh u vesen. Aluer i kaa ér we u wase ma tom ken tiônnongo yô, za faa, shi er u sha gbenda u a na u jighjigh yô. Aluer i na u ma tom ken tiônnongo yô, de nengen u wer ka kwagh u vihin we a vihi shighe ga. Nôngo kpoghuloo fa u eren u tsembelee. (Anz. 22:29) Aluer u seer wan ityough u eren akaa a ken jijingi kua ityom i ken tiônnongo yô, u hemba vesen ken jijingi fele fele, nahan a hemba saan we iyol. (Gal. 6:4) Shi shighe u i ne mbagenev ityom ken tiônnongo i we kpa i sar u u eren la yô, a hemba lun we ican ga u ember a ve imôngo.—Rom. 12:15; Gal. 5:26.

12. Melissa man Nick yange ve er nan ve seer saan ve iyolo?

¹² U umbur kwagh u Melissa, anmgbian u kwase u se ter kwagh na ken ikyuhiange i sha uhar, u yange sar un u zan Betel shin zan Makeranta u Mbapasen Ivangeli i Tartor la kpa? Shin er a fetyô u eren akaa a a sar un la ga nahan kpa, a kaa ér: “Ka m eren tom u pania la er m fetyô la cii, shi ka m nôngon mer me pase kwagh sha igbenda kposo kposo. Kwagh ne na yô, saan mo iyol kpishi.” Nick di ye? Yange i tsua un u lun orshiren tiônnongo hen shighe u ver ishima la ga nahan, ka nyi yange i wase un u wan ishima? Nick kaa ér: “Yange m hemba veren ishima sha akaa me fatyô u eren la, u duen kwaghpasen shi nan mbamlumun mba taver anmgbianev ishima ken mbamkombo. Shi yange m wa uwegh shin foom u zan Betel. Mba kôron ken inyom igen yô, i yilam ér m za er tom shin Betel.”

13. Aluer u wa ityough ken akaa a u u lu hilan eren hegen ne yô, ka nyi ia due kere? (Orpasenkwagh 2:24)

¹³ Aluer u wa ityough ken akaa a u lu hilan eren hegen ne nahan, a va na u ityom i hemban i ngira ken hemene? Een a fatyô u nan we, er yange i na Nick nahan. Kpa aluer i na u ga er Melissa nahan kpa, a za hemen u saan we iyol her shi a saan we iyol kpishi sha kwagh u u lu eren sha ci u Yehova la. (Ôr Orpasenkwagh 2:24.) Heelaa tseegh ga, shi u fa er iniôngon you la i gbe Orhemen wase Yesu Kristu kwagh yô, nahan a saan we iyol kpishi je ka u henen a hen ga.

14. Shighe u se lu henen sha akaa a se tsua u eren sha ci u Yehova la yô, ka nyi i doo u se umburu?

¹⁴ Aluer se wa ityough ken akaa a se lu eren hegen ne yô, a gba u se kera za hemen u keren ser se er ityom igen sha ci u Yehova gaa? Ka nahan ga cii! Se fatyô, shi a gba u se tsua akaa a ken jijingi a se eren ve, a wase se se za hemen u nôngon kpoghuloo eren tom u pasen kwagh la tsembelee, shi wasen anmgbianev asev mbanomso man mbakasev yô. Se fatyô u eren akaa ne, aluer se er kwagh sha kwaghfan shi se hide a ayol ase jime, se hemba veren ishima u eren tom sha ci u mbagenev a u eren sha ci wase iyol yase yô.—Anz. 11:2; Aer. 20:35.

15. Ka akaa a nyi nahan aluer u tsua shi u ngu nôngon wer u er yô, a saan we iyol kpishi?

¹⁵ Ka nyi akaa nahan, we iyol you u fatyô tsuan wer u er sha ci u Yehova? Er msen sôn Yehova wer a wase u sha er u fa akaa a u fatyô u eren la yô. (Anz. 16:3; Yak. 1:5) U fatyô u nôngon wer u kuma u eren akaa a i ter ken  ikyumhiange i hiihii la, er ishuen pania shin pania u keke shin tom u shin Betel gayô tom u maan kwagh ken nongo u Yehova nahan kpa? Gayô alaghga u ngu sha ian i u fatyô u henen zwa ugen sha er u fatyô u yemen hen haregh u i lamen zwa shon la za samber a loho u dedoo her yô. Aluer u ôr takeda u Organized to Do Jehovah’s Will ityough ki sha 10 la, shi u lam a mbatamen mba hen tiônnongo wou yô,  u seer zuan a mfe sha akaa ne. * Aluer u ngu nôngon wer u kuma u eren ityom ne yô, mbagenev vea nenge a mzehemen wou sha akaa a ken jijingi, nahan a saan we iyol kpishi.

16. Aluer ka u u fatyô u aren sha ian i u kuma u eren ma tom sha ci u Yehova hegen ga yô, u er nena?

¹⁶ Kpa aluer ka u u fatyô u aren sha ian i u kuma u eren ma tom ken ityom i i ter ken ngeren ne la hegen ga ye? Kwagh u vesen yô, nôngo tsua kwagh u u fatyô u eren hegen sha ci u Yehova yô. Nenge igbenda i u fatyô u eren kwagh ne yô.

17. 1 Timoteu 4:13, 15 kaa ér, ka nyi nahan anmgbian u nomso nana er ve nana hemba fan u tesen ioro?

¹⁷ Ôr 1 Timoteu 4:13, 15. Aluer u ngu anmgbian u nomso u i er u batisema yô, nôngo fa kwaghôron shi fa u tesen tsembelee. Sha ci u nyi? Sha ci u, aluer u “na ishima you cii sha” u seer fan takeda u ôron man u lamen a ior man u tesen yô, u hemba wasen mba ve keghen ato a we la tsembelee. Nôngo tsua u henen antakeda u Seer Fan Takerada u Ôron man Ityesen la, shi dondon hanma kwaghwan u sha hanma kwaghhenen u ken antakeda shon cii. Time sha kwaghhenen môm bee cii ve u gba sha ugen ye. Karen iyol ken ya sha gbashima. Shighe u u lu eren asaimenti yô, nôngo tsung kwaghôron wou a tese ér u dondo kwaghwan u i gbe u u dondo ken antakeda shon la. Lam a ortamen u wan ior kwagh kua mbatamen mbagenev “mba ve eren tom kpoghuloo sha u lamen shi tesen la,” nahan ve due u a mbamhen mba vea wase u yô. * (1 Tim. 5:17) De hembe veren ishima u dondon akaawan a ken antakeda ne tseegh ga, ver shima sha u wasen mba u lu lamen a ve la kpaa. Wasen ve u seer lun a jighjigh u nan,  shin taver ve ishima sha er vea er kwagh u ve lu henen la yô. Aluer u ngu eren nahan yô, a saan we iyol kpishi kua ve kpaa.

18. Ka nyi ia wase se u eren akaa a se tsua u eren ken tom wase u pasen kwagh laa?

¹⁸ Se cii se mba a tom u pasen kwagh shi geman ior hingir mbahenen. (Mat. 28:19, 20; Rom. 10:14) U soo wer u seer fan u eren tom u hemban cii nee? A lu isharen you la yô, tsua akaa jighilii, a u er sha ci u Yehova yô, shi dondon akaawan a ken antakerada u Ityesen la cii. U zua a mbamhen mbagenev mba wasen we ken antakerada u mkombo u Uma Wase u Mbakristu man Tom Wase la, kua ken uvidio mba tesen ikyav er se lam a or, mba ka se nenge ken mkombo u ken atô u kasua la. Kar mba mhen kposo kposo, nenge u a hemba wasen we la. Aluer u dondo mba mhen mban yô, u fa ityesen tsembelee, shi a hemba saan we iyol.—2 Tim. 4:5.

19. U er nan ve u lu a aeren aa doo Aôndo ishima laa?

¹⁹ Shighe u u lu tsuan akaa a u er sha ci u Yehova yô, umbur wer, kwagh u hemban cii yô, ka u tsuan wer u lu a aeren a a doo Aôndo ishima la. (Gal. 5:22, 23; Kol. 3:12; 2 Pet. 1:5-8) U er nan ve u lu a aeren nee? U tesen ikyav yô, alaghga u soo wer u lu a jighjigh u nan taveraa. Nahan u fatyô u ôron ngeren mba ken ityakeda yase mba ve tese kwagh u u er ve jighjigh wou u nan una seer taver yô. Shi aluer u ngu nengen uvidio mba sha Ityôgh ki Televishen ki Mbashiada mba Yehova mba ve tese er anmgbianev asev mbanomso man mbakasev ve tagher a atsan atô kposo kposo, kpa ve ver ikyev i dedoo sha kwagh u jighjigh u nan la yô, kwagh ne una wase u kpee je. Hen er u fatyô u dondon ikyav i jighjigh ve u nan la yô.

20. Ka nyi se er ve a hemba saan iyol, shi iyol a kera kpe se kpishi ga?

²⁰ Hanma wase cii sar nan u ma nan er kwagh sha ci u Yehova, ma i hembe er nan lu eren hegen ne je ka u henen a hen ga. Ken tar u he u Aôndo una va a mi la, se fatyô u civir un sha u eren hanma kwagh cii sha ci na. Kpa cii man shighe la yô, aluer se mba eren akaa a se fetyô u eren sha ci u Yehova hegen la sha afatyô wase cii yô, kwagh la una na a saan se iyol kpishi, nahan iyol ia kera kpe se je se de u eren akaa shon ga. U hemban cii yô, kwagh la una na Yehova ‘Aôndo wase u sar sar’ la una zua a icivir, shi ior vea wuese un. (1 Tim. 1:11) Yô i saan se iyol sha akaa a se lu eren hegen sha ci u Yehova la!