NKHANI YAKUSAMBIRA YA NAMBALA 33
Mukondwengi Chifukwa cha vo Muchita Pakuteŵete Yehova
“Nkhanthu kukondwa ndi vinthu vo masu ngawona kuluska kujaliya ŵaka kukhumbira vinthu.”—WAKU. 6:9.
SUMU 111 Pe Vinthu Vinandi vo Vichitisa Kuti Tikondwengi
VO TISAMBIRENGI MU NKHANI IYI *
1. Kumbi ŵanthu anandi achita wuli kuti achitengi vinandi pakuteŵete Yehova?
TE NDI ntchitu yinandi yakuti tigwiri po charu chiheni ichi chepafupi kumala. (Mate. 24:14; Luka 10:2; 1 Petu. 5:2) Tosi tikhumba kuteŵete Yehova mwakukwana. Anandi asazgiyaku uteŵeti wawu. Anyaki akhumba kuteŵete nge apayiniya. Penipo anyaki akhumba kuchiteŵete pa Beteli pamwenga kugwiraku ntchitu zakuzenga zo zitovya pa ntchitu za Ufumu. Ndipu abali anandi atesesa kuti aje ateŵeti akovya pamwenga ŵara. (1 Timo. 3:1, 8) Yehova wakondwa ukongwa kuwona kuti ŵanthu ŵaki akhumbisiska kumuteŵete!—Salimo 110:3; Yesa. 6:8.
2. Kumbi titenere kuchita wuli asani vilatu vidu vinyaki vauzimu vifiskika cha?
2 Kweni vingatiŵaŵa asani tiwona kuti nyengu yiluta ŵaka ndipu vilatu vidu vinyaki vauzimu vifiskika cha. Pamwenga tingaguŵa asani titondeka kuchita mauteŵeti nganyaki chifukwa cha kukota pamwenga masuzgu nganyaki. (Nthanthi 13:12) Umu ndimu viliri ndi Melissa. * Iyu watingi wakondwengi kuteŵete pa Beteli pamwenga kuchisere Sukulu ya Apharazgi a Ufumu. Kweni wangukamba kuti: “Ndakota ndipu ndingachita cha mauteŵeti ngenanga. Nyengu zinyaki ndiguŵa.”
3. Kumbi ndi vinthu wuli vo ŵanthu anyaki akhumbika kuchita kuti aje akwenere kuchita mauteŵeti nganyaki?
3 Akhristu anyaki achinyamata kweniso wo atamatama cha, angakhumbika kuti akhwimi kweniso kulongo mijalidu yinyaki ŵechendayambi kuchita mauteŵeti nganyaki. Mwakuyeruzgiyapu, anyaki angaja kuti ŵe ndi zeru, achita vinthu mwaliŵi kweniso akhumbisisa kuteŵete. Kweni yiwu angakhumbika kusambira kuja akuzikira, kugwira ntchitu mwakuphwere kweniso kuchita vinthu mwaulemu ndi ŵanthu. Asani mungayesesa kuja ndi mijalidu yeniyi, mungapaskika uteŵeti pa nyengu yo mwalindizanga cha. Tiyeni tikambiskani vo vinguchitikiya Nick. Pa nyengu yo wenga ndi vyaka 20, wanguguŵa ukongwa chifukwa wanguŵikika cha kuja mteŵeti wakovya. Iyu wangukamba kuti: “Ndinguŵanaŵana kuti vilipu vo ndinangisa.” Kweni Nick wanguwere vuli cha. Iyu wachitanga umampha vinthu mu mpingu kweniso pa ntchitu yakupharazga. Sonu Nick wateŵete mu Komiti ya Nthambi.
4. Kumbi tikambiskanengenji mu nkhani iyi?
4 Kumbi muguŵa chifukwa chakuti pasonu panu mwechendafiski chilatu chinu chinyaki pakuteŵete Yehova? Asani ndimu viliri, mukambiyeni Yehova mo muvwiya. (Salimo 37:5-7) Kusazgiyapu yapa, mungafumba abali wo aziŵa vinandi kuti akuwovyeni kuziŵa vo mukhumbika kusintha pakuteŵete Chiuta ndipu pavuli paki, gwiriskiyani ntchitu ulongozgi wo akupaskani. Asani mungachita viyo, mungapaskika uteŵeti pamwenga kufiska chilatu chinu. Kweni nge mo viliri ndi Melissa yo tamuzumbuwa kukwamba panyaki uteŵeti wo mukhumba, mungawuchita cha pasonu panu. Sonu kumbi mungachita wuli? Kuti tisaniyi kwamuka kwa fumbu lenili, nkhani iyi yikonkhoskengi (1) vo vingakuwovyani kuti mukondwengi, (2) vo vingakuwovyani kuti musaziyeku likondwa, ndipuso (3) vilatu vo mungaja navu vo vingasazgiyaku likondwa linu.
VO VINGAKUWOVYANI KUTI MUKONDWENGI
5. Kumbi tikhumbika kuŵika mtima pa vinthu wuli kuti tikondwengi? (Wakutawula 6:9)
5 Lemba la Wakutawula 6:9, likonkhoska vo vingatiwovya kuti tikondwengi. (Ŵerengani.) Munthu yo wakondwa “ndi vo masu ngawona” wakhorwa ndi vo wenavu nge mo vinthu viliri pa umoyu waki pa nyengu yeniyo. Penipo munthu yo ‘wajaliya ŵaka kukhumbira’ vinthu vo wangavisaniya cha wakhorwa cha. Sonu kumbi isi tisambiranjipu? Kuti tikondwengi, tikhumbika kuŵika mtima widu pa vinthu vo tenavu kweniso pa vinthu vo tingafiska kuvisaniya.
6. Kumbi sonu tikambiskanengi ntharika niyi, ndipu tisambirengenji pa ntharika yeniyi?
6 Kumbi vingachitika nadi kuti mukhorwengi ndi vinthu vo mwenavu? Ŵanthu anandi aŵanaŵana kuti vingachitika cha chifukwa titanja kulutirizga kusambira mo tingachitiya vinthu vasonu. Kweni tingakhorwa mbwenu. Tingakondwa nadi ndi vinthu vo tenavu pasonu panu. Kumbi tingachita wuli venivi? Kuti tiziŵi, tiyeni tikambiskani ntharika ya matalenti yo Yesu wangukamba pa Mateyu 25:14-30. Tisambirengi mo tingajaliya ndi likondwa kweniso mo tingasazgiyaku likondwa pasonu panu chifukwa cha vitumbiku vo tenavu.
VO VINGAKUWOVYANI KUTI MUSAZGIYEKU LIKONDWA
7. Konkhoskani mwakudumuwa ntharika ya matalenti yo Yesu wangukamba.
7 Mu ntharika ya matalenti, munthu munyaki wenga pafupi kuluta ku ulendu. Wechendasoki, wangudana akapolu ŵaki ndipu kapolu weyosi wangumupaska matalenti kuti wayambi bizinesi. * Mweneku wa matalenti yo wanguŵanaŵaniya vo kapolu weyosi wangafiska. Wangupereka matalenti ngankhondi ku kapolu wakwamba, ngaŵi ku kapolu wachiŵi ndipu limoza ku kapolu wachitatu. Akapolu ŵaŵi akwamba angulimbikiya kuchita bizinesi. Kweni kapolu wachitatu wanguchitapu bizinesi yeyosi cha ndipu mbuyaki wangumudikisa.
8. Ntchifukwa wuli kapolu wakwamba wa mu ntharika yaku Yesu watenere kuti wangukondwa?
8 Kapolu wakwamba, watenere kuti wanguwona kuti ndi mwaŵi kuti mbuyaki wangumupaska matalenti ngankhondi. Izi zenga ndalama zinandi ndipu venivi vingulongo kuti mbuyaki wamuthembanga ukongwa! Nanga wuli kapolu wachiŵi? Iyu watingi waguŵengi chifukwa wangupaskika matalenti ngankhondi cha nge mo ve nge ndi kapolu wakwamba. Kweni kumbi iyu wanguchita wuli?
Kumbi tingasambiranji ku kapolu wachiŵi yo wanguzumbulika mu ntharika yaku Yesu? (1) Wangulonde matalenti ngaŵi kutuliya kwa mbuyaki. (2) Wangulimbikiya kuti waŵasaniriyi ndalama zinandi ambuyaki. (3) Wangusaniriyapu matalenti ngakuyanana ndi ngo ambuyaki angumupaska. (Wonani ndimi 9-11)
9. Kumbi ndi vinthu wuli vo Yesu wangukamba cha vakukwaskana ndi kapolu wachiŵi? (Mateyu 25:22, 23)
9 Ŵerengani Mateyu 25:22, 23. Yesu wangukambapu cha kuti kapolu wachiŵi wanguguŵa ndi kusunga vifukwa chifukwa chakuti wangupaskika matalenti ngaŵi pe. Ndipuso Yesu wangukambapu cha kuti kapolu uyu wangudandawula kuti: ‘Ini anditheniyanji viyo? Ini ndi kapolu yo walonde matalenti ngankhondi tiyanana ŵaka! Asani ambuya aŵanaŵana kuti ndilimbikiya cha ntchitu ndikuti ndiwundiyengi ŵaka matalenti ngaŵi yanga ndikuchita vo ndamweni ndikhumba.’
10. Kumbi kapolu wachiŵi wanguchitanji nangu matalenti ngo wangupaskika?
10 Mwakuyanana ndi kapolu wakwamba, kapolu wachiŵi wawuwonanga mwakupepuka cha udindu wo wangupaskika ndipu wangugwira mwaphamphu ntchitu yo mbuyaki wangumupaska. Mwaviyo, pa matalenti ngaŵi wangusazgiyapu so matalenti ngaŵi. Mbuyaki wangumutumbika kapolu mwenuyu chifukwa cha phamphu laki kweniso lusu. Mbuyaki wangukondwa ndipuso wanguwona kuti ngwakwenere kumupasa so vakuchita vinyaki!
11. Kumbi tingachita wuli kuti tisazgiyeku likondwa lidu?
11 Mwakuyanana ŵaka, nasi tingasazgiyaku likondwa lidu asani titangwanika kugwira ntchitu yeyosi yo tingapaskika pakuteŵete Yehova. ‘Titangwanikengi’ ndi ntchitu yakupharazga kweniso ndi vakuchita vinyaki mu mpingu. (Machi. 18:5; Ahe. 10:24, 25) Munozgekiyengi umampha maunganu kuti mukaperekengi ndemanga zakuchiska. Nkhani yeyosi yo mwapaskika pa unganu wa mukati mwa sabata, muyinozgekiyengi mwakukwana. Asani mwapempheka kuti muwovyi ntchitu yinyaki pa mpingu, mugomezgekengi kweniso musungengi nyengu. Mungaŵanaŵananga cha kuti uteŵeti wo mwapaskika ngwambula kuzirwa ndipu mukhumbika cha kumaliyapu nyengu yinu. Muyesesengi kusazgiyaku malusu nginu. (Nthanthi 22:29) Asani mutangwanika ndi vinthu vauzimu ndipuso mauteŵeti ngo mwapaskika, mulutengi panthazi liŵi mwauzimu ndipu mukondwengi ukongwa. (Aga. 6:4) Mukondwengi so asani ŵanthu anyaki apaskika uteŵeti wo yimwi mwakhumbanga.—Aro. 12:15; Aga. 5:26.
12. Kumbi ndi vinthu wuli vo vinguwovya Melissa kweniso Nick kuti akondwengi ukongwa?
12 Kumbi mwamukumbuka Melissa yo tamukonkhoska mu ndimi yachiŵi, yo wakhumbanga kuchiteŵete pa Beteli pamwenga kuchisere Sukulu ya Apharazgi a Ufumu? Chinanga kuti wakutondeka kuchita venivi, iyu wangukamba kuti: “Nditesesa kuchita vosi vo ndingafiska pa uteŵeti wangu wa upayiniya kweniso kugwiriskiya ntchitu nthowa zakupambanapambana zakupharazgiya. Venivi vandiwovya kuti ndikondwengi ukongwa.” Nanga kumbi Nick wanguchita wuli kuti wakunthiyepu wati waguŵa chifukwa chakuti wanguŵikika cha kuja mteŵeti wakovya? Iyu wangukamba kuti: “Ndaŵikanga ukongwa mtima pa vinthu vo ndingafiska nge kupharazga ndipuso kupereka ndemanga zakuchiska pa maunganu. Ndingupempha so uteŵeti wa pa Beteli ndipu angundidana chaka chakulondopu.”
13. Kumbi ntchinthu wuli cho chingachitika asani mutangwanika ndi uteŵeti wo muchita pasonu panu? (Wakutawula 2:24)
13 Asani mutangwanika ndi uteŵeti wo muchita pasonu panu, kumbi mungazipaskika so mauteŵeti nganyaki kunthazi? Vingazichitika nge mo vinguchitikiya ndi Nick. Kweni asani vingachitika cha, mwakuyanana ndi Melissa, mungakondwa mbwenu ukongwa ndipu mukhorwengi ndi vo mufiska pakuteŵete Yehova. (Ŵerengani Wakutawula 2:24.) Kusazgiyapu yapa, mukondwengi ukongwa chifukwa chakuziŵa kuti vo muchita, vikondwesa Ambuyafwi, Yesu Khristu.
VILATU VO VINGASAZGIYAKU LIKONDWA LIDU
14. Pa nkhani yakuja ndi vilatu vauzimu, kumbi titenere kukumbukanji?
14 Kumbi asani tiŵika ukongwa mtima pa uteŵeti wo tichita pasonu panu, ving’anamuwa kuti tingasazgiyangaku cha uteŵeti widu? Awa! Tikhumbika kuja ndi vilatu vo vingatiwovya kuti tije apharazgi pamwenga asambizi amampha kweniso kuti tiŵawovyengi ukongwa abali ndi azichi ŵidu. Tingafiska vilatu venivi, asani mwakujiyuyuwa kweniso mwazeru, tiŵika ukongwa mtima pakovya anyidu mumalu mwaku taŵeni.—Nthanthi 11:2; Machi. 20:35.
15. Kumbi ndi vilatu nivi vo vingakuwovyani kuti musazgiyeku likondwa linu?
15 Kumbi ndi vilatu wuli vo mungaja navu? Mupemphengi Yehova kuti wakuwovyeni kuziŵa vilatu vo mungafiska. (Nthanthi 16:3; Yako. 1:5) Kumbi mungafiska chilatu chimoza pa vilatu vo vazumbulika mu ndimi yakwamba, nge kuchita upayiniya wakovya pamwenga wa nyengu zosi, kuteŵete pa Beteli pamwenga kugwiraku ntchitu zakuzenga? Pamwenga mukhumba kusambira chineneru chinyaki kuti mupharazgengi uthenga wamampha pamwenga kusamiya kuchigaŵa chinyaki kuchipharazgiya ŵanthu a kweniko. Mungaziŵa vinandi vakukwaskana ndi vilatu ivi mwakuŵerenga mutu 10 mu buku lakuti, Gulu lo Lichita Khumbu Laku Yehova, kweniso kukambiskana ndi ŵara mu mpingu winu. * Asani mufwiyapu kuti mufiski vilatu vinu, ŵanthu awonengi kuti muluta panthazi kweniso likondwa linu lisazgikiyengeku.
16. Kumbi mungachita wuli asani pasonu panu mufiska cha chilatu chinyaki?
16 Nanga wuli asani pasonu panu, mufiska cha chimoza mwa vilatu vo vazumbulika mu nkhani iyi? Mungajiŵikiya chilatu chinyaki cho muwona kuti mungafiska. Tiyeni tiwoni vilatu vinyaki vo mungaja navu.
Kumbi ntchilatu chimoza nichi cho mungafiska kuchita? (Wonani ndimi 17) *
17. Mwakukoliyana ndi 1 Timote 4:13, 15, kumbi mubali wangachita wuli kuti waje msambizi wamampha?
17 Ŵerengani 1 Timote 4:13, 15. Asani ndimwi mubali wakubatizika, mungasazgiyaku lusu linu kuti musambizengi kweniso mukambengi umampha nkhani. Chifukwa wuli? Chifukwa asani ‘mutijitangwaniska’ pa nkhani ya kuŵerenga, kulongoro kweniso kusambiza, ŵanthu wo atikuvwisiyani angayanduwa. Jiŵikiyeni chilatu chakuti musambirengi kweniso kugwiriskiya ntchitu sambiru lelosi la mu kabuku kakuti, Jiperekeni pa Kuŵerenga ndi Kusambiza. Ŵerengani sambiru limoza pa nyengu yimoza, yeseriyani mwe kunyumba ndipu yesesani kugwiriskiya ntchitu sambiru lo pa kukamba nkhani yinu. Pemphani masachizgu ku wakovya kupereka ulongozgi pamwenga ku ŵara anyaki “ŵeniwo achita phamphu kulongoro ndi kusambiza.” * (1 Timo. 5:17) Mungaŵikanga mtima pa sambiru la mu kabuku pe cha kweni muwovyengi so ŵanthu wo atikuvwisiyani kuti aje ndi chivwanu chakukho pamwenga kuŵachiska kuti asambirepu kanthu. Asani mwachita viyo, yimwi ndi wo atikuvwisiyani mukondwengi ukongwa.
Kumbi ntchilatu chimoza nichi cho mungafiska kuchita? (Wonani ndimi 18) *
18. Kumbi ndi vinthu wuli vo vingatiwovya kuti tifiski vilatu vidu mu upharazgi?
18 Tosi te ndi ntchitu yakupharazga kweniso kovya ŵanthu kuti aje akusambira. (Mate. 28:19, 20; Aro. 10:14) Kumbi mukhumba kusazgiyaku malusu nginu pa ntchitu yakukhumbika yeniyi? Asani musambira kabuku ka Kusambiza, mujiŵikiyengi vilatu ndi kuvifiska. Mungasaniya masachizgu ngakovya mu Kabuku ka Unganu wa Umoyu Widu Wachikhristu Ndipuso Uteŵeti ndipuso mu mavidiyo nga mo mungakambiskiyana ndi ŵanthu ngo ngalongoleka mu unganu wa mukati mwa sabata. Kuti musaniyi sachizgu lo lingawovya ukongwa muchigaŵa chinu, mugwiriskiyengi ntchitu masachizgu ngakupambanapambana. Asani mwagwiriskiya ntchitu masachizgu ngenanga, mujengi msambizi wamampha ukongwa ndipuso mukondwengi ukongwa.—2 Timo. 4:5.
Kumbi ntchilatu chimoza nichi cho mungafiska kuchita? (Wonani ndimi 19) *
19. Kumbi mungachita wuli kuti muŵi ndi mijalidu ya Chikhristu?
19 Asani mutijiŵikiya vilatu, mungaluwanga cha chinthu chakukhumbika ukongwa, kuja ndi mijalidu ya Chikhristu. (Aga. 5:22, 23; Ako. 3:12; 2 Petu. 1:5-8) Kumbi mungafiska wuli chilatu chenichi? Tiyeruzgiyi kuti mukhumba kuja ndi chivwanu chakukho. Mungaŵerenga nkhani za mu mabuku ngidu zo zikonkhoska vo munthu wangachita kuti waje ndi chivwanu chakukho. Mungayanduwa ukongwa asani mungawonere mavidiyo nga mu JW Broadcasting® ngo ngakonkhoska mo abali ndi azichi angulongore chivwanu pa nyengu yo akumananga ndi mayeseru ngakupambanapambana. Pavuli paki, wonani vo mungachita kuti muyezgi chivwanu chawu pa umoyu winu.
20. Kumbi tingachita wuli kuti tisazgiyeku likondwa lidu kweniso kuti tilekengi kuguŵa ukongwa?
20 Tikayika cha kuti tosi tikhumbisiska kuchita vinandi pakuteŵete Yehova kuphara mo tichitiya sonu. Mu charu chifya chaku Chiuta, tazakumuteŵete mwakukwana. Pasonu panu, asani titesesa kuchita vo tingafiska, tisazgiyengeku likondwa ndipuso tiguŵengi ukongwa cha. Chinthu chakukhumbika ukongwa ntchakuti, titumbikengi kweniso kuthamika Yehova ‘Chiuta widu walikondwa.’ (1 Timo. 1:11) Mwaviyo, tiyeni tikondwengi chifukwa cha vo tichita pakuteŵete Yehova!
SUMU 82 “Longoni Ukweru Winu”
^ ndimi 5 Titimuyanja ukongwa Yehova ndipu tikhumba kuchita vosi vo tingafiska pakumuteŵete. Ndichu chifukwa chaki tikhumbisiska kusazgiyaku uteŵeti widu, pamwenga kufiska vinthu vinyaki vo vikhumbika kuti tichiti mauteŵeti nganyaki mu mpingu. Kweni kumbi tingachita wuli asani titondeka kufiska vilatu vidu vinyaki chinanga kuti tachita vosi vo tingafiska? Kumbi ntchinthu wuli cho chingatiwovya kuti tichitengi vinandi pakuteŵete Yehova kweniso kulutirizga kukondwa? Tingasaniya kwamuka mu ntharika ya matalenti yo Yesu wangukamba.
^ ndimi 2 Mazina nganyaki ngasinthika.
^ ndimi 7 VO MAZU NGANYAKI NGANG’ANAMUWA: Kali kuti munthu wasaniyi talenti yimoza, wakhumbikanga kugwira ntchitu kwa vyaka pafufupi 20.
^ ndimi 15 Abali wo akubatizika achiskika kuti ayesesengi kuti aŵi akwenere kuja ateŵeti akovya kweniso ŵara. Kuti muziŵi vo mukhumbika kufiska, wonani mutu 5 ndi 6 mu buku la Gulu lo Lichita Khumbu Laku Yehova.
^ ndimi 17 VO MAZU NGANYAKI NGANG’ANAMUWA: Wakovya kupereka ulongozgi ndi mura yo wasankhika kuti waperekengi ulongozgi kumphepeti asani mphakwenere, ku ŵara anyaki kweniso ku ateŵeti akovya asani akamba nkhani yeyosi mu mpingu.
^ ndimi 64 CHITHUZI: Kuti wafiski chilatu chaki chakuja msambizi walusu, mubali wafufuza mu mabuku ngidu.
^ ndimi 66 CHITHUZI: Pavuli pa kujiŵikiya chilatu chakupharazga mwamwaŵi, mzichi wapereka kadi lakuziŵisa ŵanthu va jw.org, ku munthu yo wamupaskanga chakurya.
^ ndimi 68 CHITHUZI: Chifukwa cha kukhumbisiska kulongo mijalidu ya Chikhristu, mzichi wapereka mphasu ku mzichi munyaki.
