1. Ginani nya vangi va girago gasi gu gira nya singi thumoni wa Jehovha?

 KHU kotani nya olu litigo leli nyo vivbe li gomogo vbafuvbi ni gu fuviswa, hi na ni thumo nya wungi nyo gire. (Mat. 24:14; Luka 10:2; 1 Ped. 5:2) Hatshavbo hi ngu dzina gu thumeya Jehovha khavba hi si kodzago khavbo. Nya vangi va ngu gira silo nya singi thumoni nyo tshumayele, vambe va ngu dzina gu thuma kha nga vapiyonero, vambe va ngu dogoreya gu thuma Bheteli mwendro umo nya dziprojeto nyo guvbahe nigu vandriyathu nya vangi va ngu dzi garadza gasi va ninganedwa khu gu thuma kha nga vaphasedzeyi nya libandla mwendro madhota. (1 Thim. 3:1, 8) Jehovha a ngu tsaka ngudzu khu gu wona sithumi saye na si gu gira ni gevbini gasi gu mu thumeya. — Ndzi. 110:3; Isa. 6:8.

2. Hi nga dzipwa kharini ha gu mba si kodza gu vboheya makungo yathu thumoni wa Jehovha?

² Dzimbe dzitepo kha hi si kodzi gu vboheya makungo yathu khu tepo hi nga ba hi yi vbweta. Khu kharato, adzina hi nga goroga khu isoso nigu hi nga vbeya gambe tshivba khu gu mba kodza gu gira silo nyo khaguri hengeledzanoni ya Jehovha khu kotani nya gu dandre khu tanga mwendro simbe sighelo. (Mav. 13:12) Isoso khiso si dugeledego Melissa. * Uye a di gu vbweta ngudzu gu thumeya Bheteli mwendro gu kursari Xikola nya Vavhangheli nya Mufumo. Uye wari khuye: “Khu kotani nya tanga yangu, kha nyi ninganedwi gambe khu gu prenxeri dzipetisawu. Dzimbe dzitepo isoso si ngu nyi vbedza tshivba.”

3. Ginani esi vathu nyo khaguri adzina va yedego gu gira gasi va ninganedwa khu gu hakha mambe malungelo thumoni wa Jehovha?

³ Vambe vaphya va gu na ni womi nya wadi, adzina si nga lomba gu va haguleya makhalelo nyo khaguri na va si di ninganedwe khu gu hakha mambe malungelo libandlani. Khu giyeyedzo, vambe  adzina va nguti ngudzu, si ngu va vbevbugeya gu hunga silo khu gu vbiredza nigu va dzi emisede gu thuma. Avo adzina si nga lombega gu engedzeya gu laphisa monyo, gu gira gwadi thumo wawe ni gu engedzeya gu yeyedza githawo khu vambe. Nga wona giyeyedzo gya Nick. Tepo a nga ba a ri ni 20 myaga, uye swihade ngudzu kholu a nga mba emiswa kha nga muphasedzeyi nya libandla. Uye a di khuye: “Nyi di gu pimisa gu kheni gyomo nyi nga hosisa.” Ganiolu, Nick kha tsukuwa gu haguleya makhalelo nya yadi. Uye a di simama gu dzi garadza avba nya thumo a nga ba a nawo libandlani ni thumoni nya gu tshumayele. Muhuno, uye a gu thuma kha nga givbango nya Kometi nya Litamo.

4. Ginani hi na bhulago khigyo avba nya ndrima yeyi?

⁴ Ina u swihade olu u nga mba si kodza gu vboheya misuwo nyo khaguri ya liphuvboni? Abari gu ina, gombeya ga Jehovha u mu embeya edzi u dzipwago khidzo. (Ndzi. 37:5-7) Gu diga isoso, lomba mawonelo ga vandriyathu va vidzidwego khu liphuvboni nya edzi u nga girago khidzo nya singi thumoni wa Jehovha. Nigu dzi garadzeye gu thumisa mawonelo yoyo. Wa gu gira isoso, u na si kodza gu vboheya misuwo yago. Ganiolu, gu fana ni Melissa a khumbugidwego gupheyani, adzina malungelo u ma vbwetago ma mwalo tshivbani gwago. Ga giemo gegi, u na simama kharini na wu tsakide? Gasi gu hlamula giwudziso gegi, avba nya gihevbulo gegi hi na wona 1) egi gi na hi reseyago gutsaka, 2) egi hi nga girago gasi hi mana gutsaka ni 3) misuwo hi nga manegago nayo gasi hi engedzeya gutsaka.

5. Gasi hi mana gutsaka hi yede gu vega gupima ga ginani? (Muhevbudzi. 6:9)

⁵ Muhevbudzi 6:9, a gu hi tshamuseya egi gi nga hi phasago gu mana gutsaka. (Leri.) Muthu a vegago gupima avbo nya silo a si wonago “khu maho,” a ngu eneledwa khesi a gu naso nigu a ngu tsaka khu giemo a gomogo ga igyo. Ganiolu, muthu a simamago gu vireya silo a gu mwalo naso, gima kha na nga tsaka. Khu kharato, ginani hi gi hevbulago? Gasi hi mana gutsaka, hi yede gu vega gupima ga silo hi gu naso ni ga misuwo hi kodzago gu hi vboheya.

6. Khu gevbini gipimaniso gya Jesu hi na bhulago khigyo nigu ginani hi na gi hevbulago?

⁶ Ina si ngu kodzega gutsaka khu esi basi hi gu naso? Vathu nya vangi vo pimisa gu khavo kha si kodzegi, kholu ethu hi ngu gola gu hevbuleya gu gira silo nya siphya. Ganiolu, khu lisine si ngu kodzega. Khu lisine hi nga tsaka khu silo hi gu naso olu. Khu ginani hi ganeyago kharato? Gasi gu mana hlamulo, hongoleni hi bhula khu gipimaniso gya Jesu gi ganeyago khu dzitalenta hi gi manago umo ga Matewu 25:14-30. Gipimaniso gegi gi na hi hevbudza edzi hi nga engedzeyago khidzo gutsaka ndrani nya giemo gyathu.

7. Tshamuseya vbadugwana gipimaniso gya Jesu maningano ni dzitalenta?

⁷ Avba nya gipimaniso nya dzitalenta, Jesu ganede khu mwama moyo a nga ba a vbweta gu endra. Na si gu hongoli, uwe ranide sithumi saye a ta si ninga dzitalenta nyo khaguri gasi si tshala si velegisa. * Uye a di gu dziti gu khuye sithumi saye si na ni makodzelo nyo hambane, khu kharato gimwegyo a di gi ninga 5 dzitalenta, gimbe a gi ninga dzimbili nigu gimbe a di gi ninga mweyo. Sithumi sivili si velegiside dzitsapawu si nga ningwago. Ganiolu, igyo nya wuraru kha gya gira gilo khu dzitsapawu dzile, khu ndziya yoyo igyo gi di tutumiswa khu mune wagyo.

8. Khu ginani githumi nyo pheye gya avba nya gipimaniso gi nga hadzi gu dzipwa na gi tsakide?

⁸ Adzina githumi nyo pheye gi tsakide ngudzu olu gi nga ningwa 5 dzitalenta gasi gi tshala gi velegisa. Idzodzo dzi diri ditsapawu nya dzingi gundzu ni gu isoso, si di gu yeyedza gu khiso  mune wagyo a di gu gi tumba ngudzu. Ganiolu, ahanti githumi nya wuvili? Adzina igyo, na gi gorogide kholu gi nga mba hakha dzitalenta nya dzingi gu fana ni githumi nyo pheye. Ganiolu ginani gi giridego?

9. Ginani egi Jesu a nga mba ganeya khu githumi nya wuvili? (Matewu 25:22, 23)

⁹ Leri Matewu 25:22, 23. Jesu kha ganeya gu khuye githumi nya wuvili gi gorogide kholu gi nga hakha basi dzitalenta dzimbili. Nigu Jesu kha ganeya gu khuye githumi gile gi nguranguride khigyo: ‘Khu ginani mune wangu a nyi ningidego dzitalenta nya dzidugwana? Aneni, nyi ngu thuma ngudzu gu fana ni githumi gile gi hakhidego 5 dzitalenta. Abari gu, mune wangu kha nyi woni nga githumi nya gyadi, tshukwana nyi ya kembeya dzitalenta dzedzi dza dzimbili nyi dzi gireyana mithumo yangu.’

10. Ginani egi githumi nya wuvili gi giridego khu dzitalenta gi hakhidego?

¹⁰ Gu fana ni githumi nyo pheye, githumi nya wuvili gi pwisiside gu khigyo, thumo gi ningedwego khu mune wagyo wu diri ni lisima, nigu igyo gi thumede mune wagyo khu sighingi. Khu ndziya yoyo, igyo gi kodzide gu velegisa dzitalenta dzile dza dzimbili dzi khala 4 ni gu igyo gi tshatshazedwe khu gu dzi garadza gwagyo. Mune wagyo kha tsaka basi khu thumo gi wu giridego, ganiolu a di engedzeya gu gi ninga mithumo.

11. Hi nga engedzeya kharini gutsaka gwathu?

¹¹ Ha gu thuma khu sighingi ga yatshavbo mithumo hi ningwago hengeledzanoni ya Jehovha, hi na mana gutsaka nya gu khongolo. Gira thumo nyo tshumayele khu “tshivba” yago yatshavbo u bwe u patega ga mithumo yatshavbo libandlani.  (Mith. 18:5; Hebh. 10:24, 25) Gimbiya mitshanganoni na wu dongide gwadi, gasi uya ningeya mihlamulo yi tiyisago. Wona sipandre u ningwago avba nya mitshangano ya vbakari nya semana kha nga gilo nya lisima. Madhota ma gu gu lomba gu u gira thumo nyo khaguri libandlani, u nga hweyi gu wu gira nigu khala muthu nya gu tumbege. U nga pimisi gu khuwe thumo u ningidwego, wu mwalo lisima ni gu u mwalo gighelo nyo vbedze tepo yago khu gu wu gira. Londrola yatshavbo mathomo gasi gu tshukwadzisa makodzelo yago. (Mav. 22:29) Wa gu dzi garadzeya gu thumeya Jehovha, u na khala pari yaye nya yikhongolo nigu u na tsaka ngudzu. (Gal. 6:4) Si na gu vbevbugeya gu tsaka ni ava va nga hakha malungelo u nga ba u ma vbweta.— Rom. 12:15; Gal. 5:26.

12. Ginani egi Nick ni Melissa va giredego gasi gu engedzeya gutsaka gwawe?

¹² U ngu mu dundruga Melissa, a khumbugidwego avba nya ndrimana 2 a nga ba a vbweta gu hongola Bheteli nigu kursari Xikola nya Vavhangheli nya Mufumo? Misuwo yaye kha ya tadzisega, ganiolu uye a di khuye: “Nyo gira satshavbo nyi si kodzago thumoni wangu nya wupiyonero nigu nyo zama gu thumisa dzindziya nyo hambane thumoni nyo tshumayele. Esi si ngu nyi tsakisa ngudzu.” Nigu ginani egi Nick a giridego tepo a nga mba emiswa kha nga muphasedzeyi nya libandla? Uye wari khuye: “Eni nyi di vega gupima avba nya mithumo nyi nga ba nyi ri nayo, nya nga gu tshumayela ni gu ningeya mihlamulo nyo tiyise libandlani. Nigu nyi di prenxeri petisawu gasi nya thumeya Bheteli, khu kharato ga mwaga wu nga landreya nyi di hakha konviti.”

13. Khu wevbini handro u na wu manago wa gu thuma khu sighingi avbo nya thumo u ningidwego olu? (Muhevbudzi 2:24)

¹³ Wa gu thuma khu sighingi avbo nya thumo u ningidwego olu, ina u na mana mambe malungelo mindru wa tshigu? Adzina saye ina, nya nga esi si dugeledego Nick. Ganiolu, ambari giemo gyago gya gu fana ni egi gya Melissa, uwe u na simama gutsaka khu gu thumeya Jehovha. (Leri Muhevbudzi 2:24.) Nigu u na tsaka ngudzu kholu, u ngu dziti gu khuwe wa gu tsakisa Pfhumu yathu Jesu Kristo.

14. Ina si vivbide gu dzi garadzeya gu dzi vegeya misuwo ya liphuvboni? Tshamuseya.

¹⁴ Abari gu ho gira satshavbo hi si kodzago thumoni wa Jehovha, ina so thula gu khiso kha hi yeli gu engedzeya gu gira nya singi thumoni gwaye? Ne vbadugwana! Hi yede gu dzi vegeya misuwo ya liphuvboni yi na hi phasago gu khala vatshumayeli nya vadi ni vahevbudzi nya vadi hi bwe hi khala giphaso ga vandriyathu. Gasi gu vboheya misuwo yoyo hi yede gu khala vathu nya guti ni gu dinganiseya. Vbavbandze nyo vege gupima avbo gwathu basi, hi yede gu dzi garadzeya gu phasa vambe. — Mav. 11:2; Mith. 20:35.

15. Khu yevbini misuwo yi nga gu phasago gu engedzeya gu tsaka gwago?

¹⁵ Khu yevbini misuwo u nga dzi vegeyago? Lomba Jehovha gasi a gu phasa guti misuwo u na yi  kodzago gu yi vboheya. (Mav. 16:3; Jak. 1:5) Ina u nga si kodza gu thuma kha nga piyonero nyo phasedzeye mwendro nya tepo yatshavbo, gu thuma Bheteli mwendro avbo nya projeto nya guvbahe? Ina u nga engedzeya thumo wago nyo tshumayele khu hevbula lidimi nya liphya mwendro gu fuluga u hongola ga limbe litigo? Gasi uti esi si pategago avbo nya mahungu yaya, hevbula gipimo 10 nya libhuku Organizados para fazer a vontade de Jeová mwendro gu bhula ni madhota ya libandlani gwago. * Tepo u dzi garadzeyago gu vboheya misuwo  yago, vatshavbo va na wona gu dzi garadza gwago nigu u na tsaka ngudzu.

16. Ginani u nga girago olu wa gu ba u ri mwalo makodzelo nya gu vboheye misuwo nyo khaguri?

¹⁶ Ganiolu, ahanti wo mba kodza gu vboheya misuwo yi khumbugidwego avba nya ndrima yeyi ke? Zama gu dzi vegeya misuwo u na yi kodzago gu yi vboheya. Wona silo nyo khaguri si nga gu phasago.

17. Guya khu 1 Thimoti 4:13, 15, ginani egi ndriyathu nya mwama a yedego gu gira gasi a khala muhevbudzi nya wadi?

¹⁷ Leri 1 Thimoti 4:13, 15. Wo ba u ri ndriyathu nya mwama u bhabhatisidwego, dzi garadzeye gu khala muvegi nya wadi nya dziganelo ni muhevbudzi nya wadi. Khu ginani? Kholu wa gu dzi garadzeya gu khala muleri nya wadi, muvegi nya wadi nya dziganelo ni muhevbudzi nya wadi u na si kodza gu phasa ava va gu ingiseyago. Dzi vegeye misuwo nya gu hevbule ni gu thumisa mawonelo ma gomogo umo nya broxura Tshukwadzisa malerelo ni mahevbudzelo yago. Hevbula gihevbulo gimwegyo khu gimwegyo, u bwe u trenari na wu ri gaya, gu diga isoso avbo nya sipandre sago dzi garadzeye gu thumisa esi u si hevbudego. Lomba mawonelo ga singalagadzi nya guphasedzeye mwendro ga mambe madhota “ngudzungudzu a va va tshumayelago ni gu hevbudza.” * (1 Thim. 5:17) Tepo u dongago, u nga vegi basi gupima avbo nya gu pwisise mawonelo u ma manago umo nya broxura, ganiolu vega gambe gupima avbo nya gu phase vaengiseyi gu tiyisa gukhodwa gwawe ni gu va kutsa gu gira esi u va hevbudzago. Wa gu gira isoso, u na engedzeya gu tsaka gwago ni ogu gwawe.

18. Ginani gi nga hi phasago gu tshukwadzisa makodzelo yathu thumoni nyo tshumayele?

¹⁸ Hatshavbo hi na ni thumo nyo tshumayele ni gu gira vapizane. (Mat. 28:19, 20; Rom. 10:14)  Ina u ngu vbweta gu tshukwadzisa makodzelo yago avba nya thumo wowu nya lisima? Khu kharato, hevbula broxura malerelo ni mahevbudzelo u bwe u thumisa esi u si hevbulago. Tepo u girago isoso, dzi vegeye misuwo nyo kongome. U nga mana mawonelo ma phasago avba nya Gibhukwana nya mitshangano nya Thumo ni mavbanyelo nya wukristo ni ga dzivhidhiyu nya mabhulo nya Bhibhiliya dzi yeyedzwago avbo nya mitshangano ya vbakari nya semana. Thumisa mawonelo yoyo, gasi gu wona ayo ma gu vbevbugeyago gu ma thumisa. Wa gu thumisa mawonelo yaya, u na khala muhevbudzi nya wadi nigu u na mana gutsaka nya gukhongolo. — 2 Thim. 4:5.

19. U nga haguleya kharini makhalelo ma tsakisago Jehovha?

¹⁹ Tepo u dzi vegeyago misuwo, u nga divali gu khuwe gilo nya lisima ga satshavbo — gu haguleya makhalelo ma tsakisago Jehovha. (Gal. 5:22, 23; Kol. 3:12; 2 Ped. 1:5-8) Ginani u nga girago gasi gu vboheya misuwo yoyo? Khu giyeyedzo, adzina u ngu dzina gu manega ni gukhodwa nyo tiye. Khu kharato, gwadi gu leri dzindrima dzi gomogo umo nya mabhuku yathu, dzi gu na ni wusingaladzi nya wadi nya edzi u nga tiyisago khidzo gukhodwa gwago. Dzivhidhiyu dzi gomogo umo nya JW Broadcasting^® dzi gu na ni matimo ya vandriyathu va yeyedzidego gukhodwa nyo tiye, tepo va nga ba va tshangana ni sigaradzo. Gu sistiri dzivhidhiyu dzedzi, ni gu dzi garadzeya gu pimedzeya giyeyedzo gya vandriyathu vava si na gu phasa ngudzu.

20. Ginani hi nga girago gasi hi engedzeya gutsaka hi bwe hi si vbeyi tshivba?

²⁰ Khu lisine hatshavbo hi ngu dogoreya gu gireya nya singi Jehovha. Umo nya litigo nya liphya, hi na si kodza gu mu thumeya khu gu vbeleya. Na hi ngo vireya tepo yoyo, hi yede gu londrola ni yavbini mathomo hi gu nawo, ha gu gira isoso hi na mana gutsaka nya gukhongolo, kha hi na nga vbeya tshivba nigu nya lisima ga satshavbo hi na dhumisa ni gu rungudza Jehovha, Nungungulu wathu nya gutsake. (1 Thim. 1:11) Khu kharato, hongole hi tsaka khu malungelo hi gu nawo olu!