1. Niinzi nzibalikuchita bamwi kuti bachite zyiingi mumulimu waJehova?

 MBUKUNGA nyika eeyi yaba aafwiifwi kumana, tuli aazyiingi zyakuchita. (Mt. 24:14; Lk. 10:2; 1 Pet. 5:2) Toonse tuyanda kweezya amanguzu eesu woonse kuti tubelekele Jehova. Biingi balikuchita zyiingi mumulimu wakukambawuka. Bamwi bayanda kuba mapayona. Bamwi bayanda kubelekela kuBbeteli naakuti kugwasilizya kuyaka mayake aambunga. Alubo bakwesu biingi balikubeleka changuzu kuti beelele kuba babelesi babelekela naakuti baalu. (1 Tim. 3:1, 8) Zilaantanganana kuti Jehova ulikubotelwa kubona bakombi bakwe kabali kulipeda kumubelekela.—Int. 110:3; Is. 6:8.

2. Niinzi chikonzya kuchitika kuti teetwajana chilongezyo nchitwali kulangilila?

² Tulakonzya kumana manguzu kuti teetwajana chilongezyo nchitwakali kulangilila. Alubo tulakonzya kukataazikana kuti twakachilwa kujana chimwi chilongezyo akaambo kaminyaka njitulaayo naakuti akaambo kazimwi zyiimo. (Tus. 13:12) Eezi nzizyo zyakachitika kumuchizi uutegwa Melissa. * Melissa wakali kuyanda kuyoobelekela kuBbeteli naakuti kunjila Chikolo chaBakambawusi baBwaami, pesi wakati: “Tandichikonzyi pe kwiinka kuBbeteli naakuti kunjila Chikolo chaBakambawusi baBwaami akaambo kakuti ndachembaala. Chimwi chiindi nga ndamana manguzu.”

3. Niinzi nzibeelede kuchita bamwi kuti beelele kujana zimwi zilongezyo?

³ Bamwi bachili baniini alubo balisimide pesi beelede kubelekela kuti babe aabuntu buyandikana butape kuti beelele kujana zimwi zilongezyo. Kulakonzeka kuti bamwi bali aaluzibo, bachita zintu chakufwambaana alubo balalipeda kuchita milimu iisiyene-siyene pesi beelede kwiiya kuba aamoyo mulamfu, kuchita milimu yabo amoyo woonse akulemeka bamwi. Kuti wabeleka  changuzu kuti ube aabuntu buyoopa kuti weelele, ulakonzya kujana zilongezyo kutayeeyeli. Atubone chikozyano chamukwesu uutegwa Nick. Chiindi naakali aaminyaka iili 20 wakamana manguzu akaambo kakuti taakajana chilongezyo chakuba mubelesi uubelekela. Nick wakaamba kuti: “Ndakayeeya kuti amwi kuli chimwi chintu nchindakatali kuchita kabotu.” Pesi Nick taakaleka pe kubelekela kuti abe aabuntu buyandikana. Wakabeleka changuzu mumulimu wakukambawuka akumilimu njaakali kupegwa mumbungano. Lino ulikubeleka kali waKkomiti yaMutabi.

4. Tulalanga-langaanzi muchiiyo eechi?

⁴ Ulikukataazikana na akaambo kakuti teewakajana chimwi chilongezyo nchwaakali kulangilila? Kuti kakuli boobo, buzya Jehova mbulimvwa. (Int. 37:5-7) Alubo kumbila bakwesu basimide mubukombi kuti bakugwasye mbukonzya kuchita zyiingi mumulimu waLeza mpawo uchite zintu nzibatakubuzye. Kuti wachita oobo, mukuya kwachiindi ulakonzya kujana chilongezyo eecho. Pesi bamwi mbuli Melissa, tabachikonzyi pe kujana zimwi zilongezyo akaambo kakuti bachembaala. Kuti kuli muchiimo chili boobu, nga ulachita biyeni kuti ukkale kubotelwa? Kuti tusandule mubuzyo ooyu, muchiiyo eechi tuyoolanga-langa (1) chintu chikonzya kupa kuti ubotelwe, (2) zintu zikonzya kukugwasya kuti uzumanane kubotelwa alubo (3) nzweelede kuchita zikonzya kupa kuti uzumanane kubotelwa.

5. Niinzi nzitweelede kubikkila maanu kuchitila kuti tubotelwe? (Mukambausi 6:9)

⁵ Lugwalo lwa Mukambausi 6:9 lwaamba chintu chikonzya kupa kuti tubotelwe. (Bala.) Muntu uubotelwa “acintu ncaabwene meso,” ulakkutisikana azintu nzyalaazyo kweendelana achiimo chakwe. Pesi muntu uuzemba kuyanduula zintu nzyalombozya ulazumanana kuyanduula zimwi nkaambo takkutisikani pe azintu nzyalaazyo. Twiiyaanzi? Kuti tubotelwe tweelede kubikkila maanu kuzilongezyo nzitulaazyo anzituli aachoonzyo chakuti tulakonzya kuzijana.

6. Nchiichili chikozyano nchituyanda kulanga alubo chilatugwasya biyeni?

⁶ Zilachita na kuti ukkutisikane azintu nzulaazyo? Bantu biingi babonaanga tazichiti pe nkaambo tubantu tuyanda kukkala katwiiya zintu zimbi zipya. Pesi kwaamba choonzyo, zilachita kuti muntu akkutisikane azintu nzyalaazyo. Tulakonzya kujana kubotelwa kwachoonzyo kuti twabikkila maanu ‘kucintu ncaabwene meso eesu.’ Nga tulazichita biyeni? Kuti tubone mbutukonzya kuzichita, atulange-lange chikozyano chakaambwa aaJesu chili atala amatalenta chijanika muli Matayo 25:14-30. Tuyoobona kuti chitugwasya biyeni kuti tubotelwe akuti tuzumanane kubotelwa azilongezyo nzitulaazyo lino.

7. Mubufwiifwi amba chikozyano chakaambwa aaJesu chili atala amatalenta.

⁷ Muchikozyano chakaambwa aaJesu, simalelo wakali aalweendo lwakuya kuli bumwi busena. Katanayenda, wakayita bazike bakwe akubapa matalenta kuchitila kuti bazoosyaale kabachita bbizinesi angawo. * Mbukunga simalelo ooyu wakalizi umwi awumwi nzyakonzya kuchita nkinkaako, wakapa muzike wakusaanguna matalenta aali 5, wachibili wakamupa matalenta aabili alubo wachitatu wakamupa limwi. Bazike babili bakusaanguna bakabeleka changuzu kuti bajane mali nyingi yasimalelaabo. Pesi muzike wachitatu taakwe nzyaakachita pe atalenta ndyaakapegwa mpawo simalelo wakwe wakamwaanda.

8. Nkamboonzi muzike wakusaanguna naakali kukonzya kubotelwa?

 ⁸ Kweelede kuti muzike wakusaanguna wakabotelwa loko akaambo kakuti simalelaakwe wakamupa matalenta aali 5. Wakapegwa mali nyingi loko alubo mali njaakapegwa yakali kutondeezya kuti simalelaakwe wakali kumusyoma. Ani muzike wachibili wakamvwa biyeni? Wakali kukonzya kumana manguzu akaambo kakuti simalelaakwe taakamupa matalenta miingi aali mbuli ngaakapa muzike wakusaanguna. Pesi mbaakalimvwa na?

9. Niinzi nzyaatakaamba Jesu atala amuzike wachibili? (Matayo 25:22, 23)

⁹ Bala Matayo 25:22, 23. Muzike wachibili uuli muchikozyano chaJesu taakanyema pe naakuti kukataazikana akaambo kakuti simalelaakwe wakamupa matalenta aabili. Jesu taakwe naakatondeezya kuti muzike ooyo wakang’ung’una kaamba kuti: ‘Nkamboonzi nandipa matalenta mache aali boobu? Andime ndibeleka mbuli mbabeleka ooyu wapegwa aali 5. Kuti simalelaangu kabonaanga ndili mukandu andime ndilaasyidila aansi matalenta aaya ndilichitile zyangu.’

10. Niinzi nzyaakachita muzike wachibili amatalenta ngaakapegwa?

¹⁰ Mbuli muzike wakusaanguna, muzike wachibili wakawubona kuuyandikana mulimu ngwaakapegwa aasimalelaakwe mpawo wakabeleka changuzu kuti awuchite. Wakajana amwi matalenta aabili aajulu aamatalenta ngaakapegwa aasimalelaakwe. Muzike ooyu wakapegwa bulumbu asimalelaakwe akaambo kakuti wakabeleka changuzu. Simalelaakwe wakabotelwa alubo wakamupa umwi mulimu mwiingi.

11. Niinzi nzitweelede kuchita kuti tubotelwe?

¹¹ Andiswe tulakonzya kubotelwa kuti twabeleka changuzu kumilimu yoonse njitupegwa  mumbunga yaJehova. ‘Belesya cindi cako coonse’ mumulimu wakukambawuka alubo beleka changuzu kumilimu yoonse njupegwa mumbungano. (Mil. 18:5; Heb. 10:24, 25) Libambile kabotu miswaangano kuchitila kuti ukape nsandulo zisungwaazya. Kuti wapegwa chipanzi chakuchita kumiswaangano yaakati kamviki weelede kuchibona kachiyandikana. Kuti wapegwa umwi mulimu mumbungano, uchite chakufwambaana alubo usyomeke. Alubo toyelede kubonaanga mulimu ngwaapegwa tuyandikani loko zyakuti toyelede kulibambila. Beleka changuzu kuti uyungizye luzibo lwako atala amulimu nguyanda kuchita. (Tus. 22:29) Kuti wabeleka changuzu kumilimu yoonse njupegwa mumbungano, bweenzinyokwe aJehova buyoosima alubo uyoobotelwa. (Gal. 6:4) Alubo kuti wachita oobo, kuyookuubila kuti ubotelwe chiindi umwi muntu naapegwa chilongezyo nchwaali kulangilila.—Rom. 12:15; Gal. 5:26.

12. Niinzi nzibakachita Bakamboni babili kuti bazumanane kubotelwa?

¹² Uchimuyeeyede na Melissa waambwa mufuka 2 wakali kuyanda kuya kuBbeteli naakuti kunjila kuChikolo chaBakambawusi baBwaami? Nikuba kuti taakazwidilila pe kuya kuBbeteli naakuti kunjila Chikolo chaBakambawusi baBwaami, Melissa wakati: “Mbukunga lino ndilapayona ndili kubeleka changuzu mumulimu wakukambawuka alubo ndileezya kubelesya nzila zyoonse zisiyene-siyene zyakukambawuka. Eezi zilikupa kuti ndibotelwe loko.” Ani Nick wakachitaanzi chiindi naakatasalwa kuba mubelesi uubelekela? Wakaamba kuti: “Ndakabeleka changuzu kumilimu njindakali kukonzya kuchita mumbungano iiswaanizya kwiinka mumulimu wakukambawuka akupa nsandulo zisungwaazya kumiswaangano. Alubo ndaka-apulayila kuBbeteli mpawo bakandiita mumunyaka wakatobela.”

13. Niinzi zikonzya kuchitika kuti wabeleka changuzu kumilimu njulaayo lino mumbungano? (Mukambausi 2:24)

¹³ Niinzi zikonzya kuchitika kuti wabeleka changuzu kumilimu njulaayo lino mumbungano? Ulakonzya kujana zilongezyo zyiingi kunembo mbuli zyakachitika kuli Nick. Pesi kuti teewazijana mbuli Melissa, uyoozumanana kubotelwa alubo uyookkutisikana amulimu ngulikuchita mumbunga yaJehova. (Bala Mukambausi 2:24.) Alubo uyoobotelwa loko kuziba kuti nzuchita zilamubotezya Simalelo wesu Jesu Kristu.

14. Kubeleka changuzu kumilimu njuchita lino mumbungano zyaamba kuti toyelede kuchita zyiingi na mumulimu waJehova? Pandulula.

¹⁴ Kubeleka changuzu kumilimu njuchita lino mumbungano zyaamba kuti toyelede kuchita zyiingi na mumulimu waJehova? Teembubo pe. Tulakonzya kuchita milimu iitape kuti tuyungizye luzibo lwesu mumulimu wakukambawuka awakuyiisya bantu ayitape kuti tugwasye bakombima. Tulakonzya kuzwidilila kuchita zintu eezi kuti twatondeezya kuti tuli aabusongo akuti tulalibombya kwiinda mukubikka ziyandwa aabamwi mubusena bwakusaanguna kwiinda nzituyanda.—Tus. 11:2; Mil. 20:35.

15. Njiili imwi milimu iikonzya kupa kuti uzumanane kubotelwa?

¹⁵ Njiili milimu njukonzya kusala kuzoochita? Kumbila Jehova kuti akugwasye kuziba milimu njukonzya kuchita. (Tus. 16:3; Jak. 1:5) Ulakonzya kusala kuzoochita milimu yaambwa  mufuka lyakusaanguna muchiiyo eechi iiswaanizya kuba payona uugwasilizya, payona wachiindi choonse, kubelekela kuBbeteli naakuti kugwasilizya mumulimu wakuyaka mayake aambunga. Alubo ulakonzya kwiiya umwi mulaka kuchitila kuti ukakambawukile bantu baambuula mulaka ooyo. Kuti uzibe  zyiingi atala amilimu eeyi ulakonzya kulanga chaandaano 10 chabbuku liti Bajisini Mukuchita Kuyanda kwaJehova naakuti kubuzya baalu bamumbungano yako. * Chiindi nubeleka changuzu kuti uchite zintu nzuwakasala bamwi bayoobona kuti ulikusima mubukombi alubo uyoozumanana kubotelwa.

16. Niinzi zimwi nzukonzya kuchita kuti kutakonzyi kuchita milimu yaambwa muchiiyo eechi?

¹⁶ Ani kuti kutakonzyi kuchita milimu yaambwa muchiiyo eechi, niinzi zimwi nzukonzya kuchita? Sala kuchita zintu zyeendelana achiimo chako. Atubone zimwi nzukonzya kuchita.

17. Kweendelana alugwalo lwa 1 Timoteyo 4:13, 15, niinzi nzyayelede kuchita mukwesu kuti abe muyiisi uulikabotu?

¹⁷ Bala 1 Timoteyo 4:13, 15. Muchikozyano, kuti kuli mukwesu uubbabbatizidwe ulakonzya kubelekela kuti uyungizye luzibo lwako lwakuyiisya akuti waambuule munzila iinywisya maanzi chiindi nuli aachipanzi kumiswaangano. Nkamboonzi? Nkaambo kuti ‘walitakata’ mukubala, mukwaambuula amukuyiisya, bantu mbuyiisya bayoogwasigwa loko. Yezya kubala akujana zyiiyo mukabbuku kategwa Sungwaala Kukubala Akukuyiisya. Sala chiiyo chimwi mpawo ulipe chiindi chiingi chakupulakitizya alubo weezye kubelesya zintu nzwaajana muchiiyo eecho nulikupa nkani yako. Ulakonzya kukumbila lugwasyo kuli sikupa lulayo uugwasilizya naakuti baalu “aabo ibabeleka canguzu mukukanana akuyiisya.” * (1 Tim. 5:17) Utabikkili maanu kukubelesya zyiiyo nzwaajana mukabbuku aaka luzutu pesi bikkila maanu kukugwasya baswiilizi kuti basimye lusyomo  lwabo akuti babweze ntaamu. Kuti wachita oobo, uyoopa kuti babotelwe alubo eezi ziyookugwasya kuti anduwe ubotelwe.

18. Niinzi zikonzya kutugwasya kuti tuyungizye luzibo lwesu mumulimu wakukambawuka?

¹⁸ Toonse tuli aamulimu wakukambawuka awakugwasya bantu kuti babe basikwiiya. (Mt. 28:19, 20; Rom. 10:14) Ulakonzya kuyungizya luzibo lwako mumulimu ooyu uuyandikana loko kwiinda mukubala zyiiyo zijanika mukabbuku kategwa Kuyiisya. Mpawo weezye amanguzu aako woonse kubelesya zyiiyo eezyo mumulimu wakukambawuka. Alubo ulakonzya kujana zimwi zitakugwasye muKabbuku kaBuumi Bwesu BwachiKristu Amulimu Wesu amutuvidiyo twazikozyano zyakwaambuuzyania tutondeezegwa kumiswaangano yaakati kamviki. Yezya kubelesya nzila zisiyene-siyene mpawo ubone zikonzya kukubelekela kabotu. Kuti wabelesya nzila eezi uyooba muyiisi uulikabotu alubo uyoobotelwa.—2 Tim. 4:5.

19. Niinzi nzweelede kuchita kuti ube aabuntu bwachiKristu bubotezya Leza?

¹⁹ Chimwi chintu chiyandikana nchukonzya kusala kuchita nkubelekela kuba aabuntu bwachiKristu bubotezya Jehova. (Gal. 5:22, 23; Kol. 3:12; 2 Pet. 1:5-8) Niinzi zikonzya kukugwasya? Muchikozyano, atuteedi uyanda kubelekela kuba aalusyomo lusimide. Ulakonzya kubala zyiiyo zili mumabbuku eesu zikonzya kukugwasya kuti usimye lusyomo lwako. Alubo ulakonzya kweebela zikozyano zyabamwi bakwesu abachizi bakazwa muBroadcasting^® bakazumanana kuba aalusyomo nikuba kuti bakali kuswaanana aabuyumu-yumu alubo uyeeyesesye kuti nga ulachita biyeni kuti ube aalusyomo lusimide mbuli mbabo.

20. Niinzi chikonzya kupa kuti tuzumanane kubotelwa akuti tutamani manguzu?

²⁰ Zilaantanganana kuti toonse tuyanda kuchita zyiingi mumulimu waJehova kwiinda nzituchita lino. Munyika mpya tuyookonzya kubeleka milimu yoonse njituyoopegwa nkaambo taakwe chintu chiyootukachizya kuchita oobo. Kwalino, atuzumanane kubeleka changuzu kumilimu yoonse njitukonzya. Kuti twachita oobo tuyoobotelwa alubo tatukamani manguzu. Kwiinda zyoonse tuyoopa kuti Jehova “Leza uukkomene” alemekwe akuti atembawulwe. (1 Tim. 1:11) Nkinkaako, atuzumanane kubotelwa azilongezyo nzitulaazyo.