1. ¿Tuku tlawamakgo lhuwa natalan xlakata tlakg naskujnanikgo Jehová?

 XLISPUTNI uma kakilhtamaku talakatsuwima chu lhuwa tuku kilitlawatkan (Mat. 24:14; Luc. 10:2; 1 Ped. 5:2). Kimputumkan skujnaniputunaw Jehová chuna la matlaniyaw. Lhuwa tiku maliwakamakgolh chuna la skujnanikgo Dios, makgapitsi liskujputunkgo la precursores, amakgapitsin skujputunkgo kBetel o makgtayanamputunkgo niku katlawakan edificios nema maklakaskinkan xlakata nakakninanikan Jehová, chu lhuwa natalan liskujmakgo xlakata siervos ministeriales o lakgkgolotsin nalitaxtukgo (1 Tim. 3:1, 8). Xlikana pi Jehová lu makgapaxuwa akxni akxilha pi kskujnin lu skujniputunkgo (Sal. 110:3; Is. 6:8).

2. ¿Tuku max namakgkatsiyaw komo ni nalakgchanaw tuku xlakkaxwilinitaw?

² Chu komo max titaxtunita kilhtamaku chu nina lakgchanaw tuku xlakkaxwilinitaw, max nalitaxlajwaniyaw. O max nitlan limakgkatsiyaw xlakata linawa kata o atanu tuku xlakata nila lhuwa makgtayananaw kxkachikin Jehová (Prov. 13:12). Wa uma tuku akgspula Melissa, * tiku amputun skujnani Dios kBetel o kʼEscuela xla Tiku lichuwinankgo xTamapakgsin Dios. Xla wan: «Xlakata titaxtulha kinkata nialhla kmakgantaxti uma tuku xaklakpuwanit. Min kilhtamaku nitlan klimakgkatsi».

3. ¿Tuku xlakaskinka pulana xlitlawatkan makgapitsi xlakata wi tuku tlan nakalakgayawakan?

³ Anankgo tiku nina linkgo kata chu lakgtliwakgan, pero xlakata tlan namakgantaxtikgo tuku nakalakgayawakan lu xlakaskinka pulana namatliwakglhkgo xtakanajlakan chu nakgalhikgo  makgapitsi tayat. Max lakgskgalalan, ni pekuankgo chu lu paxuwakgo, pero max talakaskin nakatsinikgo kgalhkgalhinankgo, kuenta natlawakgo xtaskujutkan o namastakgo kakni. Komo naliskujkgo xlakata nakgalhikgo laktlan tayat, max nakalakgayawakan taskujut akxni xlakan ni kgalhkgalhimakgo. Kaʼakxilhwi tuku titaxtulh Nick. Akxni xkgalhi 20 kata taxlajwanilh xlakata ni lakgayawaka taskujut xla siervo ministerial. Xla lakapastaka: «Klakpuwa pi wi tuku nitlan xaktlawama». Pero ni taxlajwanilh. Wata liskujli tuku tlan xtlawa kcongregación chu la xlichuwinan Dios. La uku makgtapakgsi kComité de Sucursal.

4. ¿Tuku naʼakxilhaw kʼuma artículo?

⁴ ¿Taxlajwaninitaw xlakata ni makgantaxtiw tuku xlakkaxwilinitaw? Komo chuna, kalitachuwinaw Jehová la makgkatsiyaw (Sal. 37:5-7). Kakatakgalhchuwinaw natalan tiku lhuwata tuku titaxtukgonit xlakata tlan nakinkawanikgoyan tuku tlan naliskujaw chu katlawaw tuku nakinkawanikgoyan. Komo chuna natlawayaw, max tlan namakgantaxtiyaw tuku lakkaxwilinitaw. Chu komo tuku lakgchamputunaw nila makgantaxtiyaw la uku chuna la Melissa, ¿tuku natlawayaw xlakata chuntiya nakgalhiyaw tapaxuwan? Xlakata nakgalhtiyaw uma takgalhskinin, uma artículo nalichuwinan pulaktutu. Pulaktum, tuku nakinkamaxkiyan tapaxuwan. Pulaktiy, tuku tlan natlawayaw xlakata tlakg nakgalhiyaw tapaxuwan. Chu, xlipulaktutu, tuku nalakkaxwiliyaw nalakgchanaw xlakata tlakg napaxuwayaw.

5. ¿Tuku kilitlawatkan komo kgalhiputunaw tapaxuwan? (Eclesiastés 6:9).

⁵ Komo kgalhiputunaw tapaxuwan, kilitlawatkan tuku wan Eclesiastés 6:9 (kalikgalhtawakga). Lataman tiku lipaxuwa «tuku akxilha lakgastapu» tlan limakgkatsi tuku kgalhi, akgtum liʼakxilhtit, tuku tlan tlawa la uku. Pero lataman tiku anu anu an xlakata wi tuku lakaskin ankgalhin kgalhiputun tuku nila kgalhi. ¿Tuku kinkamasiyaniyan uma? Komo paxuwaputunaw wa kililakpuwanatkan tuku kgalhiyaw chu ni wa tuku nila makgantaxtiyaw.

6. ¿Tuku párabola nalichuwinanaw, chu tuku nakatsiniyaw?

⁶ Kimputumkan lakgatiyaw akxni kinkamatlawikanan tuku tsinu tuwa makgkatsiyaw. Wa xlakata, ¿tlan nalipaxuwayaw tuku kgalhiyawa? Chuna. ¿La tlan chuna natlawayaw? Xlakata nakatsiyaw, kaʼakxilhwi parábola xla talentos nema lichuwinalh Jesús chu tatekgsa kMateo 25:14-30. Nakatsiniyaw tuku tlan natlawayaw xlakata nakgalhiyaw tapaxuwan chu tlan namaliwakayaw kintapaxuwankan maski tanu tanu la tatekgsaw.

7. Kalichuwinanti tsinu parábola xla talentos nema lichuwinalh Jesús.

⁷ Anta kparábola, Jesús lichuwinalh chatum chixku tiku xʼama paxialhnan. Akxni nina xʼan, katasanilh xlakskujnin chu kamaxkilh talentos chatunu chatunu xlakata tlan xliskujkgolh. * Chatum kskujni maxkilh akgkitsis talentos, atanu maxkilh akgtiy chu xaʼawatiya maxkilh akgtum, kamaxkilh chuna la tlan xliskujkgolh. Xapulana chatiy xlakskujnin lu liskujkgolh chu malhuwikgolh xtumin xmalanakan. Pero xlikgalhtutu skujni ni maskujulh talento nema xmaxkikanit, wa xlakata malana nialh maskujulh.

8. ¿Tuku tlan xlipaxuwalh xapulana skujni nema talichuwinan kparábola?

⁸ Max xapulana skujni tiku maxkika akgkitsis talento lu tlan limakgkatsilh tuku maxkilh xmalana. Uma lhuwa tumin xwanit chu  liwana xlimasiya pi malana lu xlipawan kskujni. ¿Chu tuku tlan nawanaw xlakata xlichatiy skujni? Uma max nitlan xlimakgkatsilh akxni akxilhli pi nichuna maxkika talentos chuna la xapulana skujni. Pero ¿tuku tlawalh?

9. ¿Tuku ni wa Jesús xlakata xlichatiy skujni? (Mateo 25:22, 23).

⁹ (Kalikgalhtawakga Mateo 25:22, 23). Jesús ni lichuwinalh pi xlichatiy skujni lakgsitsilh chu nitlan limakgkatsilh xlakata xmalana kaj akgtiy talentos maxkilh. Chu ni wa pi skujni xlakpuwa: «¿Kajwatiya uma tuku nakimaxkikan? ¡Pero akit na tlan nakmaskuju akgkitsis talentos! Komo kimalana ni lanka xtapalh kiliʼakxilha, nakmaknu uma akgtiy talentos chu naktlawa tuku ktlawaputun».

10. ¿Tuku tlawalh skujni tiku maxkika akgtiy talentos?

¹⁰ Chuna la xapulana skujni, xlichatiy skujni xlakaskinka liʼakxilhli tuku lakgayawaka chu palha skujnilh xmalana. Xlakata chuna tlawalh, tlajalh akgtiy talentos. Malana lu tlan limakgkatsilh tuku tlawalh chu tlakg maxkipa taskujut.

11. ¿Tuku tlan natlawayaw xlakata tlakg napaxuwayaw?

¹¹ Nachuna akinin, tlan napaxuwayaw komo lu naliskujaw namakgantaxtiyaw kaxatukawa taskujut nema nakinkalakgayawakanan chuna la skujnaniyaw Jehová. Lu kaliskujwi xlakata nalichuwinanaw Dios chu kamakgtayanaw ktaskujut nema tlawakan kcongregación (Hech. 18:5; Heb. 10:24, 25). Liwana kalakkaxwiliw tuku kgalhtinanaw ktamakxtumit xlakata tlan nakamaʼakgpuwantiniyaw amakgapitsin. Liwana kamakgantaxtiw tuku kinkalakgchanan ktamakxtumit xaʼitat semana. Komo nakinkaskinikanan kalimakgtayanaw akgtum taskujut  kcongregación, sokg kachaw chu kamakgantaxtiw tuku kinkalakgayawakan. Ni kalakpuwaw pi makgapitsi taskujut ni lu xlakaskinka chu pi ni talakaskin lhuwa kilhtamaku nakalimaxtuniyaw. Kaliskujwi xlakata tlakg tlan natlawayaw tuku katsiniyaw tlawayaw (Prov. 22:29). Akxni tlakg lhuwa taskujut kgalhiyaw chu tlakg tlan makgantaxtiputunaw tuku kinkalakgayawakanan xlakata kintakanajlakan, tlakg lakapala nastaka kintakanajlakan chu tlakg lhuwa napaxuwayaw (Gál. 6:4). Chu tlakg ni tuwa katimakgkatsiw napaxuwayaw akxni amakgapitsin namakglhtinankgo tuku akinin lakgchamputunaw (Rom. 12:15; Gál. 5:26).

12. ¿Tuku tlawakgolh Melissa chu Nick xlakata tlakg xpaxuwakgolh?

¹² ¿Lakapastakaw Melissa, tala tiku lichuwinaw kpárrafo 2 tiku xʼamputun kBetel o kʼEscuela xla Tiku lichuwinankgo xTamapakgsin Dios? Maski nila makgantaxtilh putum umakgolh, xla wan: «Ktlawa putum tuku kmatlani chuna la kskujma la precursora chu kmakgtayanan chuna la tanu tanu lichuwinankan Dios. Uma lu kimakgapaxuwanit». ¿Chu tuku tlawalh Nick, tiku lichuwinaw kpárrafo 3, xlakata ni lu xlitaxlajwanilh akxni ni siervo ministerial limaxtuka? Xla lakapastaka: «Kliskujli xlakata nakmakgantaxti tuku tlan xaktlawa: chuna la klichuwinan Dios chu xlakata xmaʼakgpuwantininalh kintakgalhtin nema kmasta ktamakxtumit. Na kmalakgatsamalh solicitud xlakata tlan xakkalh kBetel, chu akgtum kata alistalh kintasanika».

13. ¿Tuku nakitaxtu komo lu naliskujaw tuku kinkalakgayawakanitan la uku? (Eclesiastés 2:24).

¹³ ¿Wamputun uma pi komo tlakg naliskujaw tuku kinkalakgayawakanitan la uku tlakg lhuwa tuku nakinkalakgayawakanan kkilhtamaku nema aku mima? Max chuna, chuna la akgspulalh Nick. Pero komo natitaxtuyaw chuna la Melissa, tlan chuntiya napaxuwayaw chu tlan namakgkatsiyaw (kalikgalhtawakga Eclesiastés 2:24). Nachuna, xlikana pi namakgkatsiyaw lhuwa tapaxuwan xlakata katsiyaw pi kintaskujutkan makgapaxuwa kimalanakan, Jesucristo.

14. ¿Tuku kililakapastakatkan xlakata tuku lakgchamputunaw chuna la skujnaniyaw Dios?

¹⁴ Chu komo lu liskujmawa chuna la skujnaniyaw Jehová, ¿wamputun uma pi nialh talakaskin namaliwakayaw? Uma nichuna. Tlan chu talakaskin nalakkaxwiliyaw tuku nalakgchamputunaw nema nakinkamakgtayayan tlakg tlan nalichuwinanaw Dios chu tlakg tlan namakgalhtawakgenanaw, chu nema nakinkamaxkiyan talakaskin nakamakgtayayaw kinatalankan. Namakgantaxtiyaw komo nalimasiyayaw liskgalala chu komo ni nalakpuwanaw pi putum tlan tlawayaw, chu wa nalilakpuwanaw la nakamakgtayayaw amakgapitsin chu ni kajwatiya nalilakpuwanaw kimpalakatakan (Prov. 11:2; Hech. 20:35).

15. ¿Tuku makgapitsi nema lakgchamputunaw tlakg nakinkamakgapaxuwayan?

¹⁵ ¿Tuku tlan nalakkaxwiliyaw nema tlan nalakgchanaw? Kaskiniw Jehová xlakata naʼakxilhaw tuku tlan matlaniyaw (Prov. 16:3; Sant. 1:5). ¿Tlan xliskujwi xlakata xlakgchaw tuku talichuwinalh kxapulana  párrafo xla uma artículo, chuna la precursor auxiliar o regular nalitaxtuyaw, naʼanaw kBetel o namakgtlawayaw Pukgalhtawakga? ¿Tlan nakatsiniyaw atanu tachuwin xlakata tlakg nakalitachuwinanaw Dios latamanin? ¿O tlan naʼanaw makgtayananaw niku tlakg talakaskin tiku nalichuwinankgo Dios? Komo tlakg katsiputunaw xlakata umakgolh, tlan nalikgalhtawakgayaw capítulo 10 xla libro Organizados para hacer la voluntad de Jehová, chu nakatakgalhchuwinanaw  lakgkgolotsin xalak kincongregacionkan. * Chuna la naliskujaw xlakata namakgantaxtiyaw putum umakgolh, tlakg napaxuwayaw chu amakgapitsin naʼakxilhkgo la stakma kintakanajlakan.

16. ¿Tuku tlan natlawayaw komo la uku nila wi tuku lakgchanaw?

¹⁶ ¿Chu komo la uku nila lakgchanaw makgapitsi tuku lichuwinanitaw la uku? Kalakkaxwiliw tuku tlan nalakgchanaw. Kalilakpuwaw tuku tlan natlawayaw.

17. Chuna la wan 1 Timoteo 4:13, 15, ¿tuku xlitlawat chatum tala xlakata tlakg tlan makgalhtawakgena nawan?

¹⁷ (Kalikgalhtawakga 1 Timoteo 4:13, 15). Komo wix chatum tala chixku, tlan naliskuja xlakata tlakg tlan namasiyaya chu tlakg tlan naʼakgchuwinana. ¿Tuku xlakata? Xlakata, komo naliskuja tlakg tlan nakgalhtawakgaya, tlakg tlan naʼakgchuwinana chu tlakg tlan namasiyaya, uma lu nakamakgtaya tiku nakgaxmatnikgoyan. Kaliskujti xlakata nalikgalhtawakgaya chu nalilatapaya pulakatunu tuku lichuwinan folleto Tlakg tlan kakgalhtawakga chu kamasiya. Kalikgalhtawakga akgatunu takgalhtawakga, lu kalimakgatawakga kminchik chu kaliskujti xlakata natlawaya uma akxni namastaya akgtum taʼakgchuwin. Kaskini tastakyaw tala tiku litaxtu consejero auxiliar * o amakgapitsi lakgkgolotsin «tiku lhuwa skujkgo akxni lichuwinankgo chu masiyakgo xtachuwin Dios» (1 Tim. 5:17). Ni kajwatiya talakaskin natlawaya tuku wan folleto, wata na talakaskin nakamakgtayaya natalan namatliwakglhkgo xtakanajlakan chu nalilatapaya  tuku katsinipat. Uma natlawa pi tlakg napaxuwaya chu nachuna natalan tiku nakgaxmatnikgoyan.

18. ¿Tuku nakinkamakgtayayan xlakata namakgantaxtiyaw tuku lakkaxwilinitaw chuna la lichuwinanaw Dios?

¹⁸ Putum kstalaninanin Cristo kgalhiyaw talakgatay xlakata nalichuwinanaw Dios chu nakamasiyaniyaw latamanin (Mat. 28:19, 20; Rom. 10:14). ¿Tlakg tlan xtlawaputuw uma lu xlakaskinka taskujut? Komo chuna, tlan nalikgalhtawakgayaw folleto Tlakg tlan kakgalhtawakga chu tlan nalakkaxwilitilhayaw la namakgantaxtiyaw tuku katsinitilhamaw. Na tlan natekgsaw laktlan tastakyaw anta Tuku natalikgalhtawakga, Xlatamat chu xtaskujut kstalanina Cristo chu kvideos nema masiya la tlan namatsukiyaw akgtum takgalhchuwin nema kawilikan ktamakxtumit xaʼitat semana. Kalitsakgsaw umakgolh tamakgtay xlakata naʼakxilhaw tuku tlakg tlan nakinkamakgtayayan anta niku lichuwinanaw Dios. Komo nastalaniyaw umakgolh tastakyaw, napaxuwayaw xlakata tlakg tlan makgalhtawakgenanin nawanaw (2 Tim. 4:5).

19. ¿Tuku nakinkamakgatayayan nakgalhiyaw laktlan tayat?

¹⁹ Ni kapatsankgaw pi tuku tlakg xlakaskinka nalakkaxwiliyaw nema tlan nalakgchanaw wa pi nakgalhiyaw laktlan tayat (Gál. 5:22, 23; Col. 3:12; 2 Ped. 1:5-8). ¿La tlan namakgantaxtiyaw? Akgtum liʼakxilhtit, komo kgalhiputunaw akgtum tlakg tliwakga takanajla, tlan nakalikgalhtawakgayaw artículos nema lichuwinan xlakata takanajla. Na tlan nakinkamakgtayayan komo naʼakxilhaw tuku lichuwinan JW Broadcasting^® niku kalichuwinankan natalan tiku limasiyakgolh akgtum tliwakga takanajla akxni xtitaxtumakgolh tuku lu tuwa. Alistalh kalilakpuwaw la tlan nakastalaniyaw xliʼakxilhtitkan chuna la limasiyakgolh xtakanajlakan.

20. ¿Tuku tlan natlawayaw xlakata tlakg napaxuwayaw chu ni nataxlajwaniyaw?

²⁰ Xlikana pi kimputumkan tlakg skujnaniputunaw Jehová nixawa la tlawayaw la uku. Kxasasti kakilhtamaku nema Dios malaknuma tlan naskujnaniyaw chuna la lakaskinaw. Xlakata nina chin uma kilhtamaku, komo chuntiya naliskujaw tuku tlawamaw, tlakg napaxuwayaw chu ni katitaxlajwaniw. Chu tuku tlakg xlakaskinka, namalankiyaw chu namaxkiyaw kakni Jehová, «xapaxuwana Dios» (1 Tim. 1:11). Wa xlakata, kalipaxuwaw tuku tlan tlawayaw xpalakata Jehová.