1. Planti i mekim wanem bilong mekim bikpela wok moa bilong Jehova?

 YUMI gat planti wok moa long mekim taim pinis bilong dispela haptaim i wok long kam klostu. (Mat. 24:14; Luk 10:2; 1 Pita 5:2) Yumi olgeta i laik givim bes long mekim wok bilong Jehova. Planti i mekim bikpela wok moa bilong autim tok. Sampela i tingting long mekim wok painia. Ol narapela i laik mekim wok long Betel o insait long konstraksen wok bilong sanapim ol Haus Kingdom samting. Planti brata moa i putim mak long mekim wok kongrigesen sevan o elda. (1 Tim. 3:1, 8) Jehova i amamas tru long lukim ol manmeri bilong em i mekim wok bilong em.​—Sng. 110:3; Ais. 6:8.

2. Yumi inap pilim olsem wanem sapos yumi no winim sampela mak yumi putim?

² Yumi inap bel hevi sapos sampela haptaim i lus na yumi no winim ol mak yumi putim bilong mekim ol wok lotu. O yumi inap bel hevi bikos nau krismas bilong yumi i go antap o sampela samting i mekim na yumi no inap mekim ol wok bilong God em yumi gat laik long mekim. (Prov. 13:12) Em samting i painim Melissa. * Em i laik mekim wok long Betel o go long Skul Bilong Ol Kingdom Evanselis, tasol em i tok: “Mi winim pinis krismas. Nau ol dispela wok em olsem driman tasol. Sampela taim mi save pilim bel hevi.”

3. Sampela i mas winim wanem ol mak bilong mekim wok bilong Jehova?

³ Sampela em ol i yangpela na ol i gat gutpela helt, ol i mas kamap strong long bilip na kisim sampela gutpela pasin bilong mekim ol wok bilong God. Ating ol i gat save na ol i wokim gut ol disisen, na ol i gat laik long mekim wok. Maski i olsem, ating ol  i gat wok yet long kisim pasin bilong no ken les kwik, mekim gut ol wok, na rispektim ol narapela. Sapos yu wok strong long kisim ol gutpela pasin em yu mas i gat, ol bai givim wok long yu taim yu no ting long en. Tingim ekspiriens bilong Nick. Taim em i gat 20 krismas, em i bel hevi tru bikos ol i no makim em long mekim wok kongrigesen sevan. Em i tok: “Mi pilim olsem ating sampela samting i rong long mi.” Tasol Nick i no givap. Em i givim bel long mekim ol wok em i holim pinis. Long nau, em i mekim wok olsem wanpela memba bilong Brens Komiti.

4. Bai yumi skelim wanem samting long dispela atikol?

⁴ Olsem wanem? Yu bel hevi bikos yu no winim wanpela mak em yu putim bilong mekim wok bilong God? Sapos olsem, tokim Jehova long dispela samting. (Sng. 37:5-7) Na tu, askim ol brata i strong long bilip long helpim yu long mekim gut moa wok bilong God, na traim long bihainim edvais bilong ol. Sapos yu mekim olsem, yu bai kisim dispela wok em yu laikim na winim mak em yu putim. Tasol olsem Melissa, em yumi stori pinis long em, ating long nau yet yu no inap mekim dispela wok em yu gat laik long mekim. So yu ken mekim wanem bilong holimpas yet amamas bilong yu? Bilong bekim dispela askim, dispela atikol bai stori long (1) samting i ken givim yu amamas, (2) hau yu ken mekim amamas bilong yu i go bikpela moa, na (3) yu ken putim wanem ol mak bilong givim amamas long yu.

5. Bilong i stap amamas yumi mas putim tingting long wanem samting? (Eklisiastis 6:9)

⁵ Ritim Eklisiastis 6:9. Dispela skripsa i stori long samting i ken helpim yumi long stap amamas. Man husat i putim tingting olgeta long “ol samting ai” bilong em i lukim, em i save amamas long sindaun bilong em. Dispela i narapela kain long man husat i gat pasin bilong laikim ol samting na oltaim em i wis long kisim ol samting em i no gat rot long kisim. So yumi kisim wanem skul long dispela? Bilong kisim amamas, yumi mas putim tingting long ol samting yumi gat pinis na ol samting yumi gat rot long kisim.

6. (a) Nau bai yumi stori long wanem tok piksa? (b) Yumi bai kisim wanem skul long dispela tok piksa?

⁶ Yu ting yumi inap amamas long ol samting yumi gat pinis? Planti taim yumi save laikim ol nupela samting. Tasol tru tru, yumi inap amamas long ol samting yumi gat pinis. Yumi ken enjoim ol dispela samting na yumi no ken tingim tasol ol samting “ai” bilong yumi i lukim. Hau yumi ken mekim olsem? Bilong painimaut, yumi ken skelim tok piksa bilong Jisas long talen i stap long Matyu 25:14-30. Yumi bai kisim skul long hau yumi ken amamas long ol samting yumi gat pinis na mekim dispela amamas i go bikpela.

7. Stori liklik long tok piksa bilong Jisas long talen.

⁷ Long dispela tok piksa, wanpela man i laik go long wanpela longwe ples. Paslain long em i go, em i singautim ol wokboi bilong em i kam na em i givim ol talen long ol bilong mekim wok bisnis. * Em i tingim save na strong bilong olgeta wan wan. Olsem na em i givim 5-pela talen long wanpela wokboi, 2-pela long narapela, na wanpela long namba 3 wokboi. Namba 1 na namba 2 wokboi i mekim gutpela wok long talen ol i kisim. Tasol namba 3 wokboi i no mekim wanpela samting long mani em i kisim, na bosman i pinisim em long wok.

8. I gat wanem as na namba 1 wokboi i ken amamas?

⁸ Ating namba 1 wokboi i amamas tru taim bosman i givim em 5-pela talen. Em bikpela mani tru, na dispela i soim olsem bosman  i trastim em tru! Tasol olsem wanem long namba 2 wokboi? Em inap bel hevi bikos em i no kisim planti talen olsem namba 1 wokboi. Tasol em i mekim wanem?

9. Jisas i no stori olsem wanem long namba 2 wokboi? (Matyu 25:22, 23)

⁹ Ritim Matyu 25:22, 23. Jisas i no stori olsem namba 2 wokboi i bel hevi na kros bikos em i kisim tupela talen tasol, nogat. Na Jisas i no tok dispela wokboi i komplein olsem: ‘Em tasol bai mi kisim? Wai? Mi gat wankain strong na save olsem dispela wokboi i kisim 5-pela talen! Sapos bosman i no amamas long mi, ating bai mi planim dispela tupela talen na mekim laik bilong mi yet.’

10. Namba 2 wokboi i mekim wanem long ol talen bilong em?

¹⁰ Olsem namba 1 wokboi, namba 2 wokboi i givim bel tru long mekim wok bilong em na em i stap gut long bosman bilong em. Olsem na em i kisim tupela moa ekstra talen bilong bosman bilong em. Dispela wokboi i kisim gutpela pe long hatwok bilong em. Bosman i amamas long em na em i makim em long mekim sampela wok moa!

11. Hau yumi ken mekim amamas bilong yumi i go bikpela moa?

¹¹ Wankain olsem, yumi ken mekim amamas bilong yumi i go bikpela moa taim yumi givim bel long mekim wok Jehova i givim yumi long mekim. Yumi mas “lusim bikpela haptaim” tru long autim tok, na givim bel long mekim ol wok insait long kongrigesen. (Apo. 18:5; Hib. 10:24, 25) Redim gut ol hap bilong miting na bai yu ken givim ol bekim we i strongim ol narapela. Redim gut ol asainmen yu kisim bilong mekim  ol skul tok long ol miting namel long wik. Sapos ol i askim yu long mekim wanpela wok insait long kongrigesen, orait kamap long taim stret na bai ol narapela i ken bilip long yu. No ken ting olsem wanpela asainmen yu kisim long kongrigesen em i no bikpela samting, na yu no givim taim long mekim. Wok strong long givim bes bilong yu long mekim gut ol wok. (Prov. 22:29) Taim yu givim bel long mekim ol wok lotu bilong yu na ol asainmen yu kisim, yu bai kamap strong na yu bai amamas tru. (Gal. 6:4) Na tu, em bai isi long yu amamas wantaim ol narapela taim ol i kisim wanpela asainmen em yu gat laik long kisim.​—Rom 12:15; Gal. 5:26.

12. Tupela Witnes i mekim wanem bilong mekim amamas bilong ol i go bikpela moa?

¹² Yu tingim Melissa, em sista husat i tok em i gat laik long mekim wok long Betel o go long Skul Bilong Ol Kingdom Evanselis? Maski em i no inap long inapim ol dispela laik bilong em, em i tok: “Mi givim bel long wok painia bilong mi na traim ol narapela narapela wei bilong autim tok. Dispela i givim bikpela amamas long mi.” Na Nick i mekim wanem taim em i bel hevi olsem ol i no makim em olsem wanpela kongrigesen sevan? Em i tok: “Mi givim bel long mekim ol wok em mi inap mekim olsem autim tok na givim ol gutpela bekim long ol miting. Na tu, mi bin aplai long wok long Betel na ol i singautim mi long yia bihain.”

13. Wanem samting bai kamap sapos yu givim bel long mekim asainmen em yu holim long nau? (Eklisiastis 2:24)

¹³ Sapos yu givim bel tru long mekim asainmen em yu holim long nau, yu ting yu bai kisim sampela wok moa long bihain? Dispela samting inap kamap, wankain olsem i bin kamap long Nick. Tasol sapos nogat, olsem Melissa, amamas bilong yu bai go bikpela, na yu bai belgut olsem yu inapim ol wok yu mekim. (Ritim Eklisiastis 2:24.) Na bikpela samting moa, yu ken amamas long save olsem Bikman bilong yumi, Jisas Krais i amamas long ol wok yu mekim.

14. Taim yumi putim ol mak bilong mekim wok lotu, yumi mas tingim wanem samting?

¹⁴ Sapos yumi givim bes long mekim wok bilong Jehova long nau, yu ting dispela i makim olsem yumi no ken traim long mekim ol narapela wok bilong em? Nogat tru! Yumi ken putim ol mak bilong helpim yumi long mekim sampela moa wok bilong autim tok na long helpim ol bratasista bilong yumi. Yumi bai winim ol dispela mak taim yumi tingting long helpim ol narapela na yumi no tingim yumi yet tasol.—Prov. 11:2; Apo. 20:35.

15. Wanem sampela mak yu ken putim bilong mekim amamas bilong yu i go bikpela moa?

¹⁵ Yu ken putim wanem ol mak? Askim Jehova long helpim yu long luksave long wanem ol mak yu inap winim. (Prov. 16:3; Jems 1:5) Yu ting yu inap winim wanpela bilong ol mak em  fes paragraf bilong dispela atikol i stori long en? Olsem wok painia haptaim o painia oltaim, wok long Betel, o insait long ol konstraksen projek? O ating yu ken lainim nupela tokples bilong autim gutnius o go autim tok long wanpela ples i mekim narapela tokples. Yu ken lain long ol samting yu ken mekim long sapta 10 bilong buk Oganaisesen Bilong Mekim Laik Bilong Jehova, na tu, long toktok wantaim ol elda long kongrigesen bilong yu. * Taim yu wok strong long winim ol dispela mak, ol narapela bai lukim olsem yu wok long kamap strong na amamas bilong yu bai go bikpela moa.

16. Yu ken mekim wanem sapos yu no inap winim wanpela mak yu putim?

¹⁶ Yu ken mekim wanem sapos yu no inap  winim wanpela bilong ol mak yumi stori long en? Wanpela samting yu ken mekim, em long putim narapela mak em yu inap winim. Skelim ol dispela samting yu ken mekim.

17. Olsem 1 Timoti 4:13, 15 i kamapim, wanpela brata i ken mekim wanem long kamap gutpela moa long wok tisa?

¹⁷ Ritim 1 Timoti 4:13, 15. Sapos yu wanpela brata i baptais pinis, traim long mekim pasin bilong yu long toktok na skulim man i kamap gutpela moa. Wai na yu mas mekim olsem? Bikos sapos yu “givim yu yet olgeta” long ritim gut ol tok, mekim gut tok, na skulim ol narapela, orait yu bai helpim gut odiens bilong yu. So traim putim mak long stadi na bihainim olgeta pasin bilong toktok i stap long buklet Kamap Gutpela Moa Long Pasin Bilong Rit na Skulim Man. Stadi long wanpela pasin bilong toktok, bihain prektis long haus, na bihainim taim yu mekim tok bilong yu. Askim tingting bilong nambatu brata bilong givim tok kaunsel o ol narapela elda em ol i “wok hat long tokaut long tok bilong God na skulim ol man long en.” * (1 Tim. 5:17) Traim kliagut long ol dispela pasin bilong toktok, na tu, wok strong long helpim odiens bilong yu long kamap strong long bilip o kirapim ol long bihainim ol tok ol i lainim. Taim yu mekim olsem, ol bai amamas na yu tu bai amamas.

18. Wanem samting i ken helpim yumi long winim ol mak yumi putim long wok autim tok?

¹⁸ Yumi olgeta i gat wok long autim tok na kamapim disaipel. (Mat. 28:19, 20; Rom 10:14) Yu laik kamap gutpela moa long dispela bikpela wok? Putim stret ol mak yu laik winim taim yu stadi na bihainim ol tok i stap long buklet Skulim Man. Yu ken kisim sampela tok moa  bilong helpim yu long Kristen Laip na Wok Autim Tok Miting Wok Buk na ol vidio i soim eksampel bilong toktok em yumi save lukim long ol miting namel long wik. Traim narapela narapela rot bilong save wanem samting i wok gut. Taim yu bihainim ol dispela rot, yu bai kamap gutpela tisa na dispela bai mekim yu stap amamas tru.—2 Tim. 4:5.

19. Yu ken mekim wanem bilong kisim ol pasin Kristen?

¹⁹ Taim yu laik putim ol mak yu laik winim, wanpela bikpela samting yu mas tingim em long kisim ol gutpela pasin Kristen. (Gal. 5:22, 23; Kol. 3:12; 2 Pita 1:5-8) Yu ken mekim wanem bilong winim dispela mak? Eksampel, tingim sapos yu laik kisim strongpela bilip. Ating yu bai ritim ol atikol long ol pablikesen bilong yumi we i kamapim sampela rot we yu inap bihainim bilong strongim bilip bilong yu. Yu bai kisim helpim taim yu watsim ol vidio long JW Broadcasting^® we i soim ol bratasista em ol i stap gutpela eksampel long bilip taim ol i karim kain kain hevi. Na tingim ol rot we yu inap bihainim bilip bilong ol long laip bilong yu.

20. Yumi ken mekim wanem bilong mekim amamas bilong yumi i go bikpela moa na daunim bel hevi?

²⁰ Tru tumas, yumi olgeta i laik mekim planti wok moa bilong Jehova winim ol wok yumi mekim long nau. Long nupela taim God bai kamapim, yumi bai mekim planti gutpela wok bilong em. Tasol long nau yet, taim yumi givim bes bilong yumi long mekim wanem wanem ol wok yumi mekim, dispela bai mekim amamas bilong yumi i go bikpela na yumi daunim ol bel hevi bilong yumi. Na bikpela samting moa, yumi bai givim ona na preis long Jehova, em “God bilong amamas.” (1 Tim. 1:11) So yumi ken kisim amamas long ol wok yumi mekim long nau!