1. I yini leswi vo tala va tikarhatelaka ku swi endla entirhweni wa Yehovha?

 LESWI makumu ya misava leyi ma nga kwala nyongeni, hi ni ntirho wo tala wo wu endla. (Mat. 24:14; Luka 10:2; 1 Pet. 5:2) Hi lava ku tirhela Yehovha hilaha hi nga kotaka hakona. Vo tala va engetela ntirho wa vona wa nsimu. Van’wana va navela ku va maphayona. Van’wana va navela ku tirha eBethele kumbe ku pfuneta eku akeni ka miako ya nhlangano. Nakambe vamakwerhu vo tala va tikarhatela ku va malandza ya vutirheli kumbe vakulu. (1 Tim. 3:1, 8) Yehovha wa tsaka swinene loko a vona leswaku vamakwerhu lava, va swi lava hi timbilu ta vona hinkwato ku n’wi tirhela.​—Ps. 110:3; Esa. 6:8.

2. Hi nga titwa njhani loko hi nga swi koti ku fikelela leswi hi navelaka ku swi endla entirhweni wa Yehovha?

² Mikarhi yin’wana hi nga ha hela matimba loko ku hundza malembe yo tala hi nga si fikelela swin’wana leswi a hi navela ku swi endla entirhweni wa Yehovha. Kumbexana hi nga hela matimba loko malembe kumbe swiyimo swo karhi swi nga hi pfumeleli ku va ni vutihlamuleri byo karhi. (Swiv. 13:12) A swi ri tano ni le ka Melissa. * A a navela ku ya tirha eBethele kumbe ku ya exikolweni xa vachumayeri kambe u ri: “Malembe ya mina ma hundzile. Ku navela ka mina se ko va norho. Mikarhi yin’wana ndzi titwa ndzi hele matimba.”

3. I yini leswi van’wana va faneleke va swi endla leswaku va kuma vutihlamuleri entirhweni wa Yehovha?

³ Vantshwa ni lava nga ni rihanyo lerinene swi nga lava va kombisa  leswaku va wupfile va nga si kuma vutihlamuleri lebyi engetelekeke. Hi xikombiso, van’wana va nga ha va va tlharihile, va endla swiboho hi ku hatlisa va tlhela va rhandza ku tirha kambe va fanele va dyondza ku lehisa mbilu, ku endla ntirho hi vukheta ni ku xixima van’wana. Loko va ri ni vumunhu lebyi lavekaka va nga ha kuma vutihlamuleri lebyi engetelekeke va nga swi rindzelanga. Xiya leswi endlekeke eka Nick. Loko a ri ni malembe ya 20 u twe ku vava hileswi a nga hlawuriwangiki ku va nandza wa vutirheli. U ri: “A ndzi vona onge ku ni leswi nga fambeki kahle hi mina.” Hambiswiritano, u ye emahlweni a tirha hi matimba evandlheni ni le ntirhweni wo chumayela. Namuntlha, u tirha eka Komiti ya Rhavi.

4. Hi ta bula hi yini eka nhlokomhaka leyi?

⁴ Xana u hele matimba hileswi u nga si fikelelaka leswi u navelaka ku swi endla entirhweni wa Yehovha? Loko swi ri tano byela Yehovha ndlela leyi u titwaka hayona. (Ps. 37:5-7) Nakambe, kombela vamakwerhu lava wupfeke va ku byela laha u nga antswisaka kona kutani u tikarhatela ku tirhisa xitsundzuxo xa vona. Loko u endla tano, u nga kuma vutihlamuleri evandlheni kumbe u fikelela ku navela ka wena. Kambe ku fana na Melissa loyi hi buleke ha yena eku sunguleni, swi nga ha endleka swi nga koteki ku kuma vutihlamuleri lebyi u byi navelaka sweswi. Xana u nga endla yini leswaku u tshama u tsakile? Ku hlamula xivutiso xexo, eka nhlokomhaka leyi hi ta bula hi leswaku (1) i yini leswi nga ku nyikaka ntsako, (2) i yini lexi nga ku pfunaka u engetela ntsako wa wena naswona u (3) nga pulana ku fikelela yini leswi nga engetelaka ntsako wa wena.

5. Leswaku hi tshama hi tsakile, hi fanele hi ehleketa hi yini? (Eklesiasta 6:9)

⁵ Eklesiasta 6:9 yi hi nyika switsundzuxo leswi nga hi pfunaka leswaku hi kuma ntsako. (Yi Hlaye.) Munhu loyi a tsakaka hileswi “matihlo ma swi vonaka,” hi xitalo u swi khensa swinene leswi a nga na swona. Kambe munhu wo navela leswi a nga riki na swona, u tshama a ri karhi a ehleketa hi swilo leswi a nga ta tsandzeka ku swi kuma. Hi dyondza yini? Leswaku hi tshama hi tsakile, hi fanele hi ehleketa hi leswi hi nga na swona ni ku tlhela hi tsaka hi leswi hi kotaka ku swi endla.

6. Hi xihi xifaniso lexi hi nga ta xi kambisisa sweswi naswona hi ta bula hi yini?

⁶ Xana swa koteka leswaku hi tsaka hi leswi hi nga na swona hambileswi hi tshamelaka ku langutana ni mitlhontlho leyi nga tolovelekangiki? Ina, swa koteka. Hi nga swi kota ku tsaka hi leswi “matihlo ma swi vonaka.” Hi nga swi endla njhani sweswo? Leswaku hi kuma nhlamulo, a hi kambisiseni xifaniso xa Yesu xa titalenta lexi kumekaka eka Matewu 25:14-30. Hi ta bula hi leswi xi hi dyondzisaka swona emhakeni yo kuma ntsako ni ku tiphina hi mikateko leyi hi nga na yona sweswi.

7. Katsakanya xifaniso xa Yesu xa titalenta.

⁷ Eka xifaniso lexi, wanuna a a fanele a teka riendzo ro ya ekule. A nga se famba, u nyike malandza yakwe titalenta leti a ma fanele ma endla bindzu hatona. * Leswi wanuna loyi a a tiva vuswikoti bya malandza yakwe, u nyike nandza wo sungula titalenta ta ntlhanu, a nyika nandza wa vumbirhi titalenta timbirhi ivi lowa vunharhu a n’wi nyika yin’we. Nandza wo sungula ni lowa vumbirhi va tirhe hi matimba leswaku va bindzula. Kambe nandza lowa vunharhu a nga endlaka nchumu hi talenta leyi a nyikiweke yona naswona n’wini wakwe u n’wi hlongorile entirhweni.

8. Hikwalahokayini nandza wo sungula eka xifaniso a a tsakile?

 ⁸ Swi nga endleka nandza lowo sungula a a tsake ngopfu loko a nyikiwa titalenta ta ntlhanu hi n’wini wakwe. Yoleyo a ku ri mali yo tala ngopfu naswona a swi kombisa leswaku n’wini wakwe wa n’wi tshemba! Hi nga ku yini hi nandza wa vumbirhi? A a ta va a hele matimba hileswi a nga kumangiki titalenta to fana ni ta nandza lowo sungula. Kambe u endle yini?

9. I yini leswi Yesu a nga swi vulangiki hi nandza wa vumbirhi? (Matewu 25:22, 23)

⁹ Hlaya Matewu 25:22, 23. Yesu a nga vulanga leswaku nandza wa vumbirhi u kwatile a tlhela a va ni xikhomela hileswi a kumeke titalenta timbirhi ntsena. Nakambe Yesu a nga vulanga leswaku nandza yoloye u gungule a ku: ‘Xana ndzi kuma leti ntsena? Hikwalahokayini swi ri tano, loyi a nga kuma titalenta ta ntlhanu u ndzi tlula hi yini? Loko n’wini wa mina a nga ku voni ku tikarhata ka mina, swa antswa ndzi celela titalenta leti ivi ndzi tiendlela bindzu ra mina.’

10. Nandza lowa vumbirhi u endle yini hi titalenta takwe?

¹⁰ Ku fana ni nandza lowo sungula, nandza lowa vumbirhi u tirhe hi matimba ku endla ntirho lowu n’wini wakwe a n’wi nyikeke wona. Hikwalaho, u endle ntswalo wa titalenta timbirhi. N’wini wakwe u n’wi hakerile hikwalaho ka ku tikarhata ni vuswikoti byakwe. N’wini wakwe a nga lo tsakisa hi sweswo ntsena kambe u tlhele a vona a faneleka ku kuma vutihlamuleri lebyi engetelekeke!

11. U nga wu engetela njhani ntsako wa wena?

¹¹ Hilaha ku fanaka, na hina hi nga endla tano hi ku tirha hi matimba leswaku hi endla ntirho  lowu Yehovha a hi nyikeke wona. Tiyimisele ku “khomeka ngopfu” entirhweni wo chumayela ni ku tirha hi matimba eka mitirho leyi endliwaka evandlheni. (Mit. 18:5; Hev. 10:24, 25) Lunghiselela leswaku u ta nyikela tinhlamulo leti akaka loko u ya etinhlengeletanweni ta vandlha. Yi teke yi ri ya nkoka mitirho leyi u nyikiweke yona etinhlengeletanweni ta vandlha ta le xikarhi ka vhiki. Loko u komberiwe ku pfuna hi mitirho yo karhi evandlheni, fika ka ha ri ni nkarhi u tlhela u yi endla kahle mitirho ya wena. U nga yi tekeli ehansi mitirho leyi u nyikiweke yona. Tikarhatele ku antswisa vuswikoti bya wena. (Swiv. 22:29) Loko u tinyiketela ku tirhela Yehovha, u ta va ni vuxaka lebyinene na yena naswona u ta va ni ntsako. (Gal. 6:4) Nakambe swi ta ku olovela ku tsaka ni van’wana loko va kuma vutihlamuleri lebyi na wena a wu navela ku byi kuma.I yini swin’wana leswi u nga tsakelaka ku swi fikelela​—Rhom. 12:15; Gal. 5:26.

12. I yini leswi Timbhoni timbirhi ti swi endleke leswaku ti engetela ntsako wa tona?

¹² Xana wa n’wi tsundzuka Melissa loyi hi buleke ha yena eku sunguleni, loyi a vuleke leswaku a a ta swi navela ku tirha eBethele kumbe ku ya eXikolweni xa Vachumayeri va Mfumo? Hambileswi a nga swi kotangiki ku endla tano, u ri: “Ndzi tirha hi matimba entirhweni wa mina wo phayona ni ku tlhela ndzi chumayela hi tindlela to hambanahambana. Sweswo swi endla leswaku ndzi tsaka.” Xana Nick u swi kotise ku yini ku langutana ni ku hela matimba hileswi a nga hlawuriwangiki ku va nandza wa vutirheli? U ri: “A ndzi khomekile hi ku endla mitirho leyi a ndzi kota ku yi endla, ku nga ku ya ensin’wini ni ku hlamula etinhlengeletanweni ta vandlha. Ndzi tlhele ndzi endla xikombelo xo ya tirha eBethele kutani va ndzi teka hi lembe leri landzeleke.”

13. Ku ta endleka yini loko u tirha hi matimba eka ntirho lowu u wu endlelaka Yehovha sweswi? (Eklesiasta 2:24)

¹³ Loko u tirha hi matimba eka ntirho lowu u wu endlelaka Yehovha sweswi, xana u ta nyikiwa vutihlamuleri lebyi engetelekeke enkarhini lowu taka? Swi nga va tano, hilaha swi endlekeke hakona eka Nick. Kambe loko swi nga vi tano, hi nga swi kota ku ya emahlweni hi tsaka hi leswi hi swi endlelaka Yehovha ku fana na Melissa. (Hlaya Eklesiasta 2:24.) Nakambe u ta kuma ntsako loko u tiva leswaku u endla hinkwaswo leswi u nga swi kotaka leswaku u tsakisa N’wini wa wena, Yesu Kreste.

14. I yini leswi hi faneleke hi swi endla entirhweni wa Yehovha?

¹⁴ Leswi sweswi hi nga ni mitirho leyi hi yi endlaka entirhweni wa Yehovha, xana swi vula leswaku hi fanele hi tshama hi mavoko? Nikatsongo! Hi fanele hi va ni leswi hi navelaka ku swi fikelela entirhweni wa Yehovha leswaku hi kota ku ya emahlweni hi tirha hi matimba entirhweni wo chumayela ni ku pfuna vamakwerhu. Sweswo hi ta swi kota loko hi tiyimisela ku tirhela van’wana ematshan’weni ya hina vini.​—Swiv. 11:2; Mit. 20:35.

15. I yini leswi u nga swi fikelelaka entirhweni wa Yehovha leswi nga endlaka leswaku u tsaka?

¹⁵ Xana ku ni leswi u navelaka ku swi fikelela entirhweni wa Yehovha? Kombela Yehovha a ku pfuna u vona leswi u nga kotaka ku swi fikelela entirhweni wakwe. (Swiv. 16:3; Yak. 1:5) Xana u nga swi kota ku  fikelela swin’wana leswi boxiweke eku sunguleni ka nhlokomhaka leyi, swo tanihi ku va phayona ra nkarhinyana, ra nkarhi hinkwawo, ku ya eBethele kumbe ku katseka eka ntirho wo aka tiholo ta tinhlengeletano? Kumbexana u nga dyondza ririmi rin’wana leswaku u ya chumayela mahungu lamanene endhawini yin’wana. Leswaku u tiva leswi u nga swi endlaka, hlaya ndzima 10 ya buku leyi nge Nhlangano Lowu Endlaka Ku Rhandza Ka Yehovha kumbe u vulavula ni vakulu va le vandlheni ra  ka n’wina. * Loko u tikarhatela ku endla sweswo, van’wana va ta swi xiya leswaku u le ku endleni ka nhluvuko naswona sweswo swi ta endla u tsaka swinene.

16. U nga endla yini loko u nga swi koti ku fikelela swin’wana swa leswi a wu tsakela ku swi fikelela?

¹⁶ A hi nge a wu swi koti ku fikelela swin’wana swa leswi hi buleke ha swona eka nhlokomhaka leyi, u nga endla yini? Lava swin’wana leswi u nga kotaka ku swi endla ivi u tiyimisela ku swi fikelela. Xiya swin’wana swa leswi u nga swi endlaka.

17. Hi ku ya hi 1 Timotiya 4:13, 15, makwerhu waxinuna u fanele a endla yini leswaku a va mudyondzisi lonene?

¹⁷ Hlaya 1 Timotiya 4:13, 15. Loko u ri makwerhu waxinuna loyi a khuvuriweke, u fanele u antswisa vuswikoti bya wena byo vulavula ni byo dyondzisa. Hikwalahokayini? Hikuva loko u “dzika” eku hlayeni, eku vulavuleni ni le ku dyondziseni ka wena swi ta endla leswaku vayingiseri va wena va vuyeriwa. Tinyike nkarhi wo dyondza ni ku tirhisa hinkwaswo leswi boxiweke eka broxara leyi nge Tinyiketele Eku Hlayeni Ni Le Ku Dyondziseni. Hlaya nhlokomhaka ha yin’we, lunghiselela swinene loko u ri ekaya ni ku tikarhatela ku swi tirhisa loko u nyikela mbulavulo. Kombela switsundzuxo eka mutsundzuxi wa vakulu ni malandza kumbe nkulu loyi a “tirhaka hi matimba eku vulavuleni ni le ku dyondziseni.” * (1 Tim. 5:17) U nga tirhisi ntsena leswi u swi dyondzeke eka broxara kambe tlhela u tikarhatela ku pfuna vayingiseri va wena va tiyisa ripfumelo ra vona kumbe u va khutaza va tirhisa leswi va swi dyondzaka. Loko u endla tano u ta tsaka naswona na vona va ta tsaka.

18. I yini leswi nga hi pfunaka hi fikelela vuswikoti byo dyondzisa entirhweni wo chumayela?

 ¹⁸ Hinkwerhu hi ni vutihlamuleri byo chumayela ni ku endla vadyondzisiwa. (Mat. 28:19, 20; Rhom. 10:14) Xana wa swi lava ku antswisa vuswikoti bya wena eka ntirho lowu wa nkoka? Tivekele leswi u lavaka ku swi fikelela loko u ri karhi u dyondza broxara leyi nge Tinyiketele Eku Hlayeni Ni Le Ku Dyondziseni. Nakambe u nga tlhela u kuma switsundzuxo eka Mahanyelo Ni Ntirho Wa Hina Wo Chumayela ni le ka tivhidiyo to dyondzisa leti hi tivonaka etinhlengeletanweni ta le xikarhi ka vhiki. Ringeta ku tirhisa tindlela to hambanahambana kutani u vona leswaku hi yihi leyi tirhaka kahle. Loko u tirhisa swiringanyeto leswi, u ta tsaka swinene hileswi u nga ni vuswikoti entirhweni wo chumayela.—2 Tim. 4:5.

19. U nga byi hlakulela njhani vumunhu bya Vukreste?

¹⁹ U nga rivali leswaku nchumu wa nkoka swinene lowu u faneleke u wu hlakulela i ku va ni vumunhu bya Vukreste lebyi tsakisaka Xikwembu. (Gal. 5:22, 23; Kol. 3:12; 2 Pet. 1:5-8) U nga swi kota njhani ku endla tano? A hi nge hi xikombiso, u lwela ku va ni ripfumelo leti tiyeke. U nga ha hlaya tibuku ta hina leti nga ni swiringanyeto leswi nga ku pfunaka ku tiyisa ripfumelo ra wena. Nakambe u ta vuyeriwa swinene loko u hlalela swiyenge swa vuhaxi bya JW, leswi nga ni swikombiso swa vamakwerhu lava koteke ku ya emahlweni va tiyisa ripfumelo ra vona hambiloko va langutana ni miringo. Endzhaku ka sweswo, xiya tindlela leti u nga tekelelaka ripfumelo ra vona hatona.

20. Hi nga endla yini leswaku hi tshama hi tsakile ni ku nga titwi hi hele matimba?

²⁰ Hinkwerhu ha swi lava ku endlela Yehovha ntirho wo tala ku tlula lowu hi n’wi endlelaka wona sweswi. Emisaveni leyintshwa ya Xikwembu, hi ta swi kota ku xi tirhela hilaha hi lavaka hakona. Kambe loko sweswi hi tikarhatela ku tirha hi matimba eka mitirho leyi hi yi endlelaka Yehovha, hi ta engetela ntsako wa hina naswona a hi nge heli matimba. Xa nkoka swinene, hi ta yisa ku dzuneka hinkwako eka Yehovha “Xikwembu lexi tsakeke.” (1 Tim. 1:11) Hikwalaho, a hi yeni emahlweni hi tsaka eka mitirho hinkwayo leyi hi kotaka ku yi endla sweswi!