1. A vamakabye vo tala va ti karatisa kuyini kasi va maha zvotala ntirweni wa Jehovha?

  LAHA a tiko legi gi yako magumo, hi ni ntiro wo tala nguvhu. (Mat. 24:14; Luka 10:2; 1 Ped. 5:2) Hi lava ku mu mahela zvotala Jehovha hi laha hi zvi kotako hi kona. A kutala ka vamakabye va andzisa ntiro wabye. A vokari va xuva ku tira kota maphayona, a van’wani va xuva ku tira Bheteli kutani ku aka tiyindlu ta hlengeletano. A vamakabye vo tala kambe va maha zvontlhe kasi va ringanelwa hi ku tira kota madhota kutani malandza yo vhunetela. (1 Tim. 3:1, 8) Jehovha wa tsaka nguvhu hi ku wona vanhu vakwe na va lava ku mu mahela zvotala hi ku zvi randza!— Lis. 110:3; Isa. 6:8.

2. Hi nga ti zwisa kuyini loku zvi nga koteki a ku hi tatisa mixuvo yo kari ntirweni wa Jehovha?

² Hambu lezvi hi xuvako ku mu mahela zvo tala Jehovha, loku ku hundza cikhati co leha na hi nga se zvi kota ku tatisa mixuvo yo kari hi nga nayo, hi nga mbhela ntamu. Loku zvi nga koteki a ku hi maha ntiro wo kari lomu hlengeletanweni hi kota ya tanga kutani zviyimo zvo kari kuzvilava hi nga mbhela ntamu kambe. (Mav. 13:12) Hi zvezvo zvi nga humelela Melita. * I zvi lava nguvhu a ku tira Bheteli kutani kuya Cikoleni ca Vavhangeli va Mufumo, hambulezvo a zvi koteki. I wula lezvi: “A tanga ya mina a ya ha vhumeli. Ka mina a malungelo lawo a zva ha koteki a ku ndzi ma kuma. Niku ka zvikhati zvin’wani, zva tshuka zvi ndzi mbheta ntamu.”

3. Zvini lezvi a vokari zvi nga lavako ku va maha kasi va ringanelwa ku kuma malungelo yo kari?

³ A vokari va ha hiko vaswa na va nga hi na zvibabyababyani  kambe kuzvilava zvi nga lava ku va ranga hi ku buvha hi tlhelo ga moya va tlhela va kombisa matshamela yo kari kasi va ringanelwa hi ku nyikiwa malungelo man’wani. Lisine ku zva koteka ku va hi ni wutlhari, na va ci tiva khwatsi leci va ci lavako, na va zvi lava nguvhu ku tira kambe. Hambulezvo, zva koteka ku na zva ha lava ku va gondza kuva ni lihlazva-mbilu ni cichavo. Loku u lwela kuva ni matshamela lawa ma lavekako kasi u kuma malungelo yo kari, ma nga tshuka ma chikela na u nga zvi rindzelangi. Wona lezvi zvi nga humelela Nikolawu. A cikhati a nga hi ni 20 wa malembe, i karatekile nguvhu hi lezvi a nga kala a nga yimisiwi kota nandza go vhunetela. I wula lezvi: “Ndzi wa ti zwisa ku khwatsi ci kona ndzi nga goha.” Kanilezvi Nikolawu a nga tsukulangi. I no tira hi ntamu wontlhe laha bandleni ni ntirweni wa kuchumayela. Zvezvi ciro ca Kometi ya Ravi.

4. Zvini hi to wulawula hi zvona ka ndzima leyi?

⁴ A wu na litsako hi lezvi zvi kalako zvi nga se koteka a ku u tatisa mixuvo yo kari kutani ku kuma lungelo go kari ntirweni wa Jehovha? Loku zvi hi tano, mu chululele a kukarateka ka wena Jehovha. (Lis. 37:5-7) Ahandle ka lezvo, bhula ni vamakabye vo buvha u va kombela ku va ku vhuna ku chukwatisa lomu ku lavekako ntirweni wa wena, u guma u zama hi laha u zvi kotako hi kona a ku tirisa wusungukati legi va to ku nyika. Loku u maha lezvo, zva koteka ku u gi kuma lungelo lego kutani ku tatisa mixuvo leyo. Hambulezvo, kuzvilava a lungelo legi u gi navelako a zvi koteki a ku u gi kuma ka cikhati leci, a kufana na Melita, loyi hi mu kumbukileko. Makunu, u nga maha yini kasi ku simama uva ni litsako? Ka ndzima leyi hi ta hlamula ciwutiso leco hi ku bhula hi zvilo lezvi zva zvinharu: Co sangula, cini ci nga ku nyikako litsako? Ca wumbiri, u nga engetelisa kuyini a litsako la wena? Ca wunharu, mixuvo muni u nga ti vekelako leyi yi nga ku nyikako litsako?

5. Kasi hi tsaka, zvini hi fanele ko ku veka kupima ka zvona? (Mutshawuteli 6:9)

⁵ Mutshawuteli 6:9 (NM) i komba leci ci nga hi vhunako ku kuma litsako. I wula lezvi: “I chukwana ku tsaka hi lezvi a mahlo ma zvi wonako a ku hundza kuwa u vhuka na u lava lezvi u zvi navelako.” Loyi a tsakako “hi lezvi a mahlo ma zvi wonako” i xalala hi lezvi a nga nazvo, zvo fana ni ciyimo leci a nga cona. Kanilezvi loyi a ‘wako a vhuka na a lava lezvi a zvi navelako’ i tshama aswa hi ku navela nchumu wa ku a zvi koteki a ku a wu kuma. Makunu, hi gondza yini? Kasi hi kuma litsako, hi fanele ku veka kupima ka lezvi hi nga nazvo ni ka mixuvo leyi zvi kotekako ku yi tatisa.

6. Mufananiso muni hi to bhula hi wona zvezvi, niku hi ta veka kupima ka yini?

⁶ Lezvi ku nga ku laha a cikhati ci hundzako hi tolovela ku ti vekela mixuvo yin’wani, xana zva koteka futsi a ku tsaka hi lezvi u nga nazvo? Ina, zva koteka. Hi nga tsaka futsi hi lezvi hi nga nazvo. Hi nga zvi mahisa kuyini? Kasi hi zvi tiva, a hi bhuleni hi mufananiso wa titalenta lowu Jesu a nga hlawutela, wu kumekako ka Matewu 25:14-30. Hi ta veka kupima ka lezvi wu hi gondzisako xungetano hi ku kuma litsako, hambu ku engetela litsako la hina futsi.

7. Tlhamusela hi magezu matsongwani a mufananiso wa titalenta lowu Jesu a nga hlawutela.

⁷ Ka mufananiso lowu wa titalenta, a wanuna wo kari i wa lava ku endza. Na a nga se famba, i no vitana malandza yakwe, gin’we ni gin’we a ta gi nyika titalenta ta ku gi maha hi tona mabhindzu. A gin’we i no gi nyika ntlhanu wa titalenta, legi gin’wani a gi nyika timbiri, legi gin’wani a gi nyika yin’we — gin’we ni gin’we a gi nyika hi kuya hi ntamu wa gona. Hambulezvo, legi ga wunharu a gi yi mahangi nchumu a mali  leyi gi nga nyikiwa. Gi no guma gi hlongoliwa ntirweni. *

8. A nandza legi go sangula gi wa hi ni cigelo muni ca ku tsaka?

⁸ A nandza legi go sangula gi tsakile nguvhu hi lezvi a hosi ya gona yi nga gi nyika ntlhanu wa titalenta. Leyo yi wa hi mali ya talela ga cima, niku yi wa komba lezvi a hosi yi nga gi tsumbisa zvona. Ahati a nandza legi ga wumbiri ke? Zvi wa koteka ku gi mbhela ntamu hi lezvi gi nga kala ku nyikiwa titalenta to tala a ku fana ni legi go sangula. Makunu, ku ngava lezvaku gi mbhelile ntamu futsi?

9. Zvini lezvi Jesu a nga wulangiko ku a nandza legi ga wumbiri gi mahile? (Matewu 25:22, 23)

⁹ Lera Matewu 25:22, 23. Jesu a nga wulangi ku a nandza legi ga wumbiri gi swirekile kutani ku veka civiti hi lezvi gi nga nyikiwa titalenta timbiri basi; ne a nga wulangi ku gi khalile giku: ‘Hi zvezvi basi u ndzi nyikako? Phela minawu ndzi tira ku fana na inaloyi u nga mu nyika ntlhanu wa titalenta! Loku ndzi nga hi wa lisima ka wena hosi, ndzi ta kelela titalenta leti ndzi famba ndzi ya ti tirela zva mina.’

10. Zvini gi nga maha a nandza legi ga wumbiri hi titalenta ta gona?

¹⁰ A kufana ni nandza legi go sangula, legi ga wumbiri gonawu a gi hlakanangi hi ntiro lowu gi nga nyikilwe. Gi no tira yi nga chayi, gi tirela hosi ya gona. Lezvo zvi mahile ku gi engetela titalenta timbiri, ti maha mune. A nandza legi gi no chachazelwa hi kutikarata ka gona ni wutlhari legi gi nga kombisa. A hosi yi no tsaka  hi gona, yi gi dzundza yi tlhela yi gi engetela ntiro!

11. Hi nga engetelisa kuyini a litsako la hina?

¹¹ Hinawu hi nga engetela litsako la hina hi ku ti tsitsirita ni ka cihi hi nyikiwako ku maha ntirweni wa Jehovha. Ti ‘tsitsirite nguvhu’ ntirweni wa kuchumayela u tlhela u tira yi nga chayi zvin’we ni bandla. (Miti. 18:5; Mah. 10:24, 25) Longisela khwatsi mitlhangano kasi u hlamula zvilo zvi tiyisako van’wani. Zvi nyike lisima a zviavelo zvontlhe u nyikiwako ku maha ka mutlhangano wa cikari ka vhiki. Loku u kombeliwa ku maha ntiro wo kari laha bandleni, tekela ku wu maha u tlhela u wu maha khwatsi. Ni cihi ciavelo u nyikiwako u nga ci chepeti. Ti nyike cikhati u ci khatalela. Zama ku engetela wutlhari ntirweni wa wena. (Mav. 22:29) Laha u ti tsitsiritako ntirweni wa Jehovha ni ka ciavelo cihi u nyikiwako, u ta hatlisa ku kula u tlhela u engetela litsako la wena. (Gal. 6:4) Zvi ta ku olovela kambe a ku u tsaka loku a van’wani va nyikiwa malungelo lawa u ma navelako. — Rom. 12:15; Gal. 5:26.

12. Zvini a nga maha Melita na Nikolawu kasi ku engetela litsako labye?

¹² Wa mu alakanya Melita, hi mu kumbukileko ka paragrafo 2, loyi a nga zvi lava nguvhu a ku tira Bheteli kutani kuya Cikoleni ca Vavhangeli va Mufumo? Hambu lezvi lezvo zvi nga kala ku koteka, i te: “Ndzi maha zvontlhe ndzi zvi kotako ntirweni wa mina wa wuphayona, ndzi tlhela ndzi zama ku chumayela hi tindlela to hambanahambana. Lezvo zvi ndzi nyika litsako la hombe nguvhu.” Ahati Nikolawu ke, i zvi kotisile kuyini a ku lwisana ni cikarato ca ku kala a nga yimisiwi kota nandza go vhunetela? I wula lezvi: “Ndzi wa veka kupima ka thomo ndzi nga hi nago — ga ku chumayela ni ku nyika mihlamulo yo tiyisa mitlhanganweni. Ndzi no rumela petisawu ga ku tira Bheteli kambe, ndzi vitaniwa ka lembe gi nga landzela.”

13. Zvini zvi to maheka loku u ti tsitsirita ka ciavelo leci u nga naco zvezvi? (Mutshawuteli 2:24)

¹³ Loku u ti tsitsirita ka ciavelo leci u nga naco zvezvi, a ku u nga kuma malungelo man’wani cikhatini ci tako ke? Zvi nga maheka, a ku fana ni lezvi zvi nga humelela Nikolawu. Kanilezvi loku zvi nga maheki, a ku fana na Melita, a litsako la wena li nga engetela kambe, u tsaka nguvhu hi lezvi u mahako ntirweni wa Jehovha. (Lera Mutshawuteli 2:24.) Handle ko kanakana, loku u maha lezvo u ta tsaka nguvhu hi ku tiva lezvaku Jesu Kristu, a Hosi ya hina, wa tsaka hi kutikarata ka wena.

14. Xungetano hi mixuvo ya hina, zvini hi faneleko ku tshama hi ku zvi alakanya?

¹⁴ Xana a ku veka kupima ka ntiro lowu hi nga nawo zvezvi zvi wula ku a hi faneli ku hlota tindlela ta ku engetela ntiro lowu hi mu mahelako Jehovha? Ne ni kutsongwani! Hi fanele ku ti vekela mixuvo yi to hi vhuna ku chukwatisa ntiro wa hina wa kuchumayela ni ku vhuna vamakabye. A mixuvo leyo hi ta yi tatisa loku hi veka kupima laha ko vhuna van’wani — na ku nga hi ka hina. — Mav. 11:2; Miti. 20:35.

15. Mixuvo muni u nga ti vekelako leyi yi nga ku vhunako ku engetela litsako?

¹⁵ Mixuvo muni u nga ti vekelako? Kombela Jehovha a ku vhuna ku tiva mixuvo leyi zvi kotekako ku u yi tatisa. (Mav. 16:3; Jak. 1:5) Zama ku ti vekela a yin’we ya mixuvo leyi yi kumbukilweko ka  paragrafo go sangula ga ndzima leyi— yo kota ku tira wuphayona go vhunetela kutani ga cikhati contlhe, ku tira Bheteli kutani ku aka tiyindlu ta hlengeletano. Kuzvilava u nga gondza lirimi lin’wani kambe kasi ku chumayela vanhu va lirimi lelo kutani kuya chumayela ka tiko gin’wani. U nga tiva zvo engeteleka ka mixuvo leyi hi ku gondza cipimo 10 ca bhuku Hi xaxametilwe kasi hi maha kuranza ka Jehova ni ku  bhula ni madhota ya bandla. * Laha u ti karatelako ku tatisa mixuvo leyo, zvi ta woneka a ku wa kula, a litsako la wena kambe li ta engetela.

16. Zvini u nga mahako loku a nchumu wo kari u wu navelako zvi nga koteki a ku u wu tatisa ka cikhati leci?

¹⁶ Ahati loku a nchumu wo kari u wu navelako zvi nga koteki a ku u wu tatisa ka cikhati leci? Zama ku tatisa wun’wani lowu zvi kotekako. Wona zvokari u nga mahako.

17. Hi kuya hi 1 Timote 4:13, 15, a wanuna a bhabhatisilweko a nga maha yini kasi a zvi kota ku gondzisa khwatsi?

¹⁷ Lera 1 Timote 4:13, 15. Loku u hi wanuna a bhabhatisilweko, u nga maha zvontlhe u zvi kotako kasi u gondzisa khwatsi ni kuva mukaneli wa mu nene. Hikuyini? Hakuva loku u ti “tsitsirita” kasi u lera khwatsi, u kanela khwatsi u tlhela u gondzisa khwatsi u ta va vhuna nguvhu lava va ku zwako. Zama ku ti vekela mixuvo ya ku gondza ni ku tirisa a zvigondzo zvontlhe zva broxura Ti karatele ku lera khwatsi ni ku gondzisa khwatsi. Gondza cigondzo cin’we hi khati, u ti karata u vhuxeta laha kaya, u guma u zama ku zvi tirisa ka tikanelo ta wena. Kombela sungukati ga kuvhunetela gi ku vhuna kutani dhota gin’wani gi “ti tsitsiritako kuwulawuleni ni kugondziseni.” * (1 Tim. 5:17) U nga ti karateli ku tirisa lezvi zvi nga wuliwa lomu ka broxura basi, tlhela u zama ku vhuna lava va ku zwako lezvaku va tiyisa kukholwa kabye kutani ku va kuca ku va maha cokari. Loku u maha lezvo, u ta engetela litsako labye ni la wena.

18. Cini ci to hi vhuna ku tatisa mixuvo ya hina ntirweni wa kuchumayela?

¹⁸ Hontlheni hi nyikilwe ntiro wa ku gondzisa  ni ku maha vapizani. (Mat. 28:19, 20; Rom. 10:14) Wa zvi lava ku engetela wutlhari ga wena ntirweni lowu? Ti vekele mixuvo yo kongoma laha u gondzako u tlhela u zama ku tirisa lezvi u lerako lomu ka broxura Gondzisa khwatsi. Lomu ka Cibhukwana ca Mutlhangano wa Ntiro wa hina ni mahanyela ya wuKristu ni ka tivhidhio ta cikombiso ca mabhulo ti kombisiwako ka mutlhangano wa cikari ka vhiki u nga kuma mawonela ya ma nene nguvhu. Zama ku tirisa mawonela yo hambanahambana kasi u tiva lawa ma vhunako nguvhu. Laha u tirisako mawonela lawo, handle ko kanakana u ta zvi kota ku gondzisa khwatsi; lezvo zvi ta ku nyika litsako la hombe nguvhu. — 2 Tim. 4:5.

19. Hi yihi ndlela ya kuva ni matshamela ya wuKristu?

¹⁹ Laha u ti vekelako mixuvo, u nga rivali a nchumu wa lisima nguvhu — ku nga kuva ni mixuvo ya kuva ni matshamela ya wuKristu. (Gal. 5:22, 23; Kol. 3:12; 2 Ped. 1:5-8) U nga zvi mahisa kuyini? A hi zvi veke laha ka ku u lava kuva ni kukholwa ko tiya. U nga lera tindzima lomu ka mabhuku ya hina ti kombako ndlela ya ku tiyisa kukholwa. Mhakeni leyi, ha tiyiseka ku u nga vhuneka nguvhu hi ku wona tivhidhio to kari ta lomu ka JW Broadcasting^® ti kombako lezvi a vamakabye va nga kombisisa zvona kukholwa ko tiya laha va nga lwisana ni zvikarato zvo hambanahambana. Loku u ti wonile, ehleketa hi lezvi wena u nga ku pimanyisisako zvona a kukholwa kabye wutomini ga wena.

20. Hi yihi ndlela ya ku kuma litsako hambu ku li engetela ntirweni wa Jehovha?

²⁰ A mhaka yo tiya hi ku hontlheni hi xuva ku maha zvo hundza lezvi hi mahako zvezvi ntirweni wa Jehovha. Misaveni yiswa ya Nungungulu zvi ta koteka a ku hi maha zvotala nguvhu ntirweni wakwe. Na ha ha rindzela cikhati leco, hi nga kuma litsako hambu ku li engetela futsi hi ku tira hi ntamu wontlhe ka ni cihi hi mahako ntirweni wa Jehovha. A ca lisima ka zvontlhe, loku hi maha lezvo hi ta dzundza hi tlhela hi dhumisa Jehovha, a “Nungungulu [wa hina] wo tsaka.” (1 Tim. 1:11) Hikwalaho, a hi tsakeni hi lezvi hi zvi kotako ku mahela Jehovha!