1. ¿Ambeksï úxaki uánikua erachicha paraksï sánderu marhuakuni Tata Diosï Jeobani?

 I PARHAKPINI no ióndani kʼamajkunhaati ka kánikuachi ánchikuarhita jatsiska para úni (Mat. 24:14; Luk. 10:2; 1 Ped. 5:2). Iáminduechachi uékasïnga marhuakuni Tata Diosï Jeobani xáni eskachi xáni uaaka. Uánikuechaksï sánderu marhuakuxatia. Máruksï uékasïndi prekursoriini, máteruechaksï Beteli uékasïndi marhuani o konstruksionirhu jarhuajpeni para kʼumanchikuechani uaani engaksï jindeeka para Tata Diosïni Jeobani kómarhini ka uánikua erachichaksï jánguarhintaxati para jindeeni orhejtsïkutiri jarhuajpiricha o orhejtsïkuticha (1 Tim. 3:1, 8). Seguruchi jarhaska eska Tata Diosï Jeoba tsípisïnga exeni engaksï imeeri marhuaricha uéjka jarhuajpeni (Sal. 110:3; Is. 6:8).

2. ¿Nénachi uaa pʼikuarherani engachi no úska ambe engachi uékajka?

² Joperu jamberichi kómu pʼikuarherajka, jimboka tiempu nitamaskia ka nótkichi úni jarhani imani ambe engachi uéjka. O jamberichi no sési pʼikuarherajka jimbokachi jatiriskia, o máteru ambe jimbo, engachi jimbo nóteru újkia úni máru ambe Tata Diosï Jeobaeri kúnguarhikuarhu (Prov. 13:12). I ambesï úkuarhinchati Melissa, * enga tsitipiringa Beteli marhuani o nirani Jorhentperakuarhu para Eianhpiricha Reinuerirhu. Ima uandasïndi: “Jimbokani jatiriskia, nóteruni uaakia indeni ambe úni. Ménisïni chkétakukuarhisïnga”.

3. ¿Ambeksï jatsiski para úni máru paraksï úni sánderu marhuakuni Tata Diosïni?

³ Máruksï sapichku jarhasti ka nóksï xáni pʼamenchasïndi, joperu paraksï sánderu ánchikuarhita intsïnhani kúnguarhikuarhu, orhetaksï jatsisti para eratsekua jukani ka jánguarhintanksï ambakiti kualidadichani  jatsiani. Jamberiksï kánikua jorhenati, balori jukarini ka tsípikua jingonksï jámani, joperuksï jatsisti para sánderu tekaantstini, sésiksï úni imeecheri ánchikuarhitani o janhanharpinksï. Joperu engaksï jánguarhintaska imani kualidadichani jatsiani engaksï xáni uétarhinchajka, jamberiksï intsïnhaati ánchikuarhita ma jiáni engaksï no jamberi erokuarhini jauaka. Ju je exeni ambe enga nitamakuarhipka Nick. Enga 20 jatiripka, no sési pʼikuarheraspti jimboka no únhaspka orhejtsïkutiri jarhuajpiri. Ima miántasïndi: “Eratsespka eskani no sési úxapka ambe ma”. Joperu ima no kuatantaspti. Jánguarhintaspti úni ambe enga úpiringa úni kúnguarhikuarhu ka ístu aianhpikuarhu. Iásï, Nick Grupurhu jarhastia enga Betelini ma orhejtsïkujka.

4. ¿Ambechi exea ini jorhenguarhikua jimbo?

⁴ ¿Chkétakukuarhitixakichi jimbokachi no úxaka úni ambe engachi uéjka? Enga ísïika, ju je aiangukuarhini Tata Diosïni Jeobani na engachi pʼikuarherajka (Sal. 37:5-7). Ju je uandontskuarheni erachi ma jingoni enga ióni páni jakaia sési marhuakuni Tata Diosïni ka eskajtsïni arhiaka ambe engachi uaaka sánderu sési úni ka jánguarhintani imani ambe úni engajtsïni arhiaka. Engachi ísï úska, jamberichi niáraaka imani ambe úni engachi eratsekata jatsika. Joperu engachi no uaakia úni ambe engachi uéjka iásï, ísï eska na úkuarhinchaka Melissa, ¿ambechi uaa úni parachi seguirini tsípikua jingoni irekani? Para mókuntani íni kurhamarhikuani, ini jorhenguarhikua jimbo, exeakachi tanimu ambe. Primeru, ambe enga újka eskachi tsípikua jingoni jámaaka. Segundu, ambechi uaa úni parachi tsípikua jingoni jámani. Ka terseru, náki metechanchi uaa jatsikukuarhiani parachi sánderu tsípikua jingoni irekani.

5. ¿Ambechi jatsiski para eratseni engachi uéjka tsípikua jingoni irekani? (Eclesiastés 6:9).

⁵ Engachi uéjka tsípikua jingoni irekani, jatsiskachi para úni ambe enga arhijka Eclesiastés 6:9 (arhinta je). Kʼuiripu enga tsípijka ‘imani ambe jingoni enga újka exeni’ méntkisï sési pʼikuarherasïndi imani ambe jingoni enga jatsika, komu na enga nitamakuarhini jaka iáiasï. Joperu ima kʼuiripu enga “jini ka jini jámani jarhajka imani ambe uékani” enga tsitijka méntkisï imani ambe uékani jarhasïndi enga no uaaka jatsini. ¿Ambechi jorhenguarhisïni? Eska engachi uéjka tsípikua jingoni irekani, jatsiskachi para eratseni imani ambe engachi jatsika, ka no imani ambe engachi no uaaka jatsini.

6. ¿Náki ejempluchi exea, ka ambechi jorhenguarhia?

⁶ ¿Uaachi meru tsípikua jingoni irekani imani ambe jingoni engachi jatsikia? Uánikua kʼuiripuechaksï uandasïndi eska nómbe, jimbokachi tsitisïnga jimbanhi ambe jorhenguarhini jarhani. Joperuchi uaaka ísï úni. Uaakachi sési pʼikuarherani imani ambe jingoni engachi jatsikia. ¿Néna? Para míteni, ju je exeni ejempluni enga Jesúsi uandapka talentuecheri enga Mateu 25:14-30 jimbo jaka. Jorhenguarhiakachi ambechi uaa úni parachi sánderu tsípikua jingoni jámani ka astachi sánderu tsípini imani ambe jimbo engachi nitamakuarhini jaka.

7. Uandanta je ejempluni enga Jesúsi uandapka talentuecheri.

⁷ Ejemplurhu enga Jesúsi uandantapka, acheetiri ma uandaspti, enga biaji ma úpka. Antesi de nirani, uandajpaaspti imeeri jántspirichani ka íntsaaspti talentuechani parakaksï ánchitaapiringa, mándani arhini xáni íntskuaspti seguni na engaksï xáni úpiringa úni. * Máechakuani sinko talentu íntsaaspti, máteruni tsimani ka máteruni máechakua. Orheta tsimani jántspirichaksï kánikua ánchikuarhispti paraksï sánderu sentabu andani para imeecheri patroni jémba. Joperu últimu, no ma ambe úspti  imani talentu jingoni enga intsïnhapka, ísï jimbo, imeeri patroni chútantaspti.

8. ¿Jamberi andisï tsípipi primeru jántspiri enga ejemplurhu uandanhajka?

⁸ Jamberi ima jántspiri enga orheta intsïnhapka talentuechani, kánikua sési pʼikuarherapti enga imeeri patroni sinko talentuechani íntsaapka. Inde kánikua sentabuespti ka xarhataspti eska imeeri patroni kánikua mintsinharhisïreenga. ¿Ka ambechi uaa uandani máteru jántspiriri? Jamberi no sési pʼikuarherapti enga exepka eska ima no xáni talentuechani intsinhaaspka eska primeru. Joperu ¿ambe úspi?

9. ¿Ambe no uandaspi Jesúsi ima jántspiriri enga tsimani talentuechani intsïnhaapka? (Mateu 25:22, 23).

⁹ (Arhinta je Mateu 25:22, 23). Jesúsi no uandaspti eska máteru jántspiri ikiaspka enga imeeri patroni tsimantku talentuechani íntsaapka. Nijtu uandapi eska ima niárapiringa uandani: “¿Ini ambejkusïni intsïnhaa? ¡Peru jíjtuni májkueni úsïnga úni ambe ma eska ima enga sinko talentuechani intsïnhaka! Engareni juchiiti patroni no jukaparharajka, túskuauaka ini tsimani talentuechani ka juchiiti ambe niuaka úni”.

10. ¿Ambe úspi ima jántspiri enga tsimani talentuechani intsïnhaapka?

¹⁰ Májkueni eska primeru jántspiri, ístu máteru kánikua jánguarhintaspti úni imani ánchikuarhitani enga intsïnhapka ka kánikua ánchikuarhispti para imeeri patroni. Ísï úparini, máteru tsimani talentuechani andaaspti. Patroni kánikua jaiapanhentaspti, enga ísï xáni jánguarhintapka ka sánderu ánchikuarhita íntskuspti.

11. ¿Ambechi uaa úni parachi sánderu tsípikua jingoni irekani?

¹¹ Sáno májkueni, juchajtuchi uaaka sési pʼikuarherani engachi kánikua jánguarhintaska náki uéjki ánchikuarhitarhu engachi intsïnhaaka para Tata Diosï Jeobani marhuakuni. Ju je jánguarhintani  aianhpini xáni eskachi na xáni uaaka ka jarhuajpeni kúnguarhikuarhu (Uku. 18:5; Ebr. 10:24, 25). Ju je sési prepararikuarhini parachi uinhaperantaani máteruechani juchaari komentariuecha jingoni. Ju je sési úni náki uéjki parti engachi jatsiaka tánguarhikuarhu entre semana anapuni. Engachi arhinhaska parachi jarhuajpeni ánchikuarhita ma úni kúnguarhikuarhu, ju je xárhintku niárani ka mintsinharhikueni. Nóchi jámaaka eratseni eska máru ambe engachi újka no xáni jukaparhakueska ka eska no uétarhisïnga eskachi tiempu úraaka para indeni ambe úni. Ju je jánguarhintani sánderu sési úni ambe ma (Prov. 22:29). Engachi sánderu marhuakuska Tata Diosï Jeobani, sánderuchi andarhieraaka ka sánderuchi tsípikua jingoni irekaaka (Gal. 6:4). Ka sánderuchi tsípiaka engaksï máteruecha imani ánchikuarhitechani intsïnhaaka engachi jucha tsitipiringa jatsini (Rom. 12:15; Gal. 5:26).

12. ¿Ambe úspi Melissa ka Nick paraksï sánderu tsípikua jingoni irekani?

¹² Ju je miántani Melissani, pirenchini engachi párrafu 2 jimbo exeka enga Beteli uékeenga marhuani o nirani Eskuelarhu para Eianhpiricha Reinuerirhu. Nájkiruka ima no úka i ambe úni, uandasïndi: “Kánikua jánguarhintasïnga para úni juchiiti ánchikuarhita kómu prekursora ka ístuni jánguarhintasïnga mámaru aianhpini. I ambe úsïndi eskani kánikua tsípiaka”. ¿Ka ambe úspi Nick, engachi párrafu 3 jimbo exeka para nóteru no sési pʼikuarherania enga no únhapka orhejtsïkutiri jarhuajpiri? Ima miásïndi: “Jánguarhintaspka imani ambe eratseni engani úpiringa úni: kómu uérani aianhpini ka komentariuechani íntspiani, enga uinhaperantaapiringa máteruechani. Ístuni uininharhitantaspka solisitudi para Beteli marhuani, ka ísï ma uéxurhini jimbo, pʼímarhisptijtsïni”.

13. ¿Ambe úkuarhia engachi jánguarhintaaka xáni eskachi xáni uaaka imani responsabilidadicha jimbo engachi iásï jatsika? (Eclesiastés 2:24).

¹³ Jiájkani, engachi jánguarhintajka sési úni juchaari ánchikuarhitani engachi iásï jatsika Tata Diosïri kúnguarhikuarhu ¿arhikuekasïni i ambe eskachi sánderu orhepatini sánderuchi intsïnhaaka? Jamberi jo, májkueni eska na úkuarhinchapka Nick. Joperu enga no ísï úkuarhiaka, ísï eska na úkuarhinchapka Melissa, seguirinchi jauaka tsípikua jingoni irekani ka sési pʼikuarherani (arhinta je Eclesiastés 2:24). Ístuchi kánikua sési pʼikuarheraaka jimbokachi míteska eska juchaari patroni tata Jesukristu, kánikua jaiapanhentasïnga na engachi xáni jánguarhintajka.

14. ¿Ambechi jatsiski para miáni engachi exeni jauaka náki metechanchi uaa jatsikukuarhiani para sánderu marhuakuni Tata Diosïni?

¹⁴ Engachi jánguarhintani jakaia xáni eskachi xáni uaaka para Tata Diosïni Jeobani marhuakuni, ¿arhikuekasïni i ambe eskachi nóteru uaakia sánderu ambe úni? Nómbe. Uaakachi ka jatsiskachi para jatsikukuarhiani metechani engajtsïni jarhuataka sánderu sési aianhpini, jorhentpini ka engaksï uaaka úni eskachi jarhuatauaka juchaari erachichani. Uaakachi ísï úni engachi jánhaskatiiska ka kaxumbitini ka engachi jánguarhintaska máteruechani jarhuataani enbesi de juchajku pendienti pákuarhini (Prov. 11:2; Uku. 20:35).

15. ¿Nákiskiksï máru metecha engaksï uaaka eskachi sánderu sési pʼikuareraaka?

¹⁵ ¿Náki metechanchi uaa jatsikukuarhiani? Ju je kurhakuni Tata Diosï Jeobani eskajtsïni jarhuataaka exeni ambechi uaa úni (Prov. 16:3; Sant. 1:5). ¿Úpirinchi imani metechani jatsikukuarhiani engachi  párrafu 1 jimbo exeka, kómu prekursori auksiliarini o regularini, Beteli o konstruksionirhu marhuani? ¿Uaachi jorhenguarhini máteru idioma parachi úni sánderu kʼuiripuechani aianguani o parachi imani lugaricha jimbo mótsini nani enga sánderu aianhpiricha uétarhini jaka? Engachi uékaaka sánderu  ambe míteni i metecheri, uaakachi arhintani kapitulu 10 librueri Organizados para hacer la voluntad de Jehová ka uandontskuarheni juchaari kúnguarhikuarhu anapu orhejtsïkuticha jingoni. * Engachi sánhani arhini jauaka úni indeni ambe sánderuchi sési p’ikuarheraaka ka máteruechaksï exeati eskachi úxaka indeni ambe úni.

16. ¿Ambechi uaa úni engachi iáiasï no uaaka úni imani ambe engachi uékapiringa úni?

¹⁶ ¿Ka engachi iáiasï no uaakia jatsikukuarhiani metechani engachi exeaakia? Uaakachi jatsikukuarhini meta ma engachi jucha uaaka úni. Ju je exeani máru.

17. Eska na arhijka 1 Timoteo 4:13, 15, ¿ambe ka ambe uaa úni erachi ma para sánderu sési jorhentpini?

¹⁷ (Arhinta je 1 Timoteo 4:13, 15). Enga chá erachi máeka enga itsï atakuarhikia, uaakajtsï jánguarhintani sánderu sési arhijtsïkpini ka jorhentpini. ¿Andi? Jimboka, engajtsï chá sánderu sési arhintaaka, arhijtsïkpini ka jorhentpini, sánderujtsï jarhuatauaka imeechani engaksïni kurhajchaaka. Uaakajtsï jorhenguarhini ka úni ambe enga uandajka mándani jorhenguarhikua foietueri Ju je sánderu sési arhintani ka jorhentpini. Jorhenguarhi je mándani jorhenguarhikuani, ka kánikua praktikari je ka ístu diskursuecharhu jánguarhinta je úni ambe engajtsï jorhenguarhikia. Kurhaku je konseju imani erachini enga jarhuajpejka konseju íntspini * o máteru orhejtsïkutichani “engaksï kánikua ánchikuarhijka arhijtsïkpini ka jorhentpini” (1 Tim. 5:17). Asï solu ú je ambe engajtsï jorhenguarhijka foieturhu, sino ístu jarhuata je imeechani engaksïni kurhajchajka parakaksï sánderu mintsikaaka  Tata Diosïni ka únksï ambe engaksï jorhenguarhini jaka. Ka ísïjtsï, chá sánderu sési pʼikuarheraaka, ka ístu imeecha engaksïni kurhajchajka.

18. ¿Ambejtsïni jarhuataa parachi úni juchaari metechani engachi jatsikukuarhiaka para sánderu sési aianhpini?

¹⁸ Iámindu kristianuechachi jatsiska para aianhpini ka Jesúsiri chúxapatichani uaani (Mat. 28:19, 20; Rom. 10:14). ¿Uékapirinchi sánderu sési úni ini xáni k’éri ánchikuarhitani? Para úni ísï úni, uaakachi jorhenguarhini foietuni Jorhentpini ka metechani jatsikukuarhiani engajtsïni jarhuataaka úni ambe engachi jorhenguarhikia. Ístuchi uaaka exentani konsejuechani engaksï jaka Programa para ánchikuarhini tánguarhikuarhu Kristianuecheri Irekua ka Aianhpikua ka ístu bideuecharhu engachi tánguarhikua entre semana jimbo exeajka engajtsïni arhistachijka nénachi uaa aianhpini. Uaakachi úrani ini ambe ka exenchi náki engajtsïni sánderu marhuacheaka jima engachi aianhpijka. Engachi ísï úska, kánikuachi tsípiaka engachi sánderu sési jorhentpiaka (2 Tim. 4:5).

19. ¿Ambejtsïni jarhuataa para indeni kualidadichani xarhataani enga Tata Diosï jaiapanhentaajka?

¹⁹ Ju je miáni eska meta ma engachi uaaka jatsikukuarhini ka enga kánikua jukaparhakueka, jindeesti xarhataani kualidadichani enga Tata Diosï jaiapanhentajka (Gal. 5:22, 23; Kol. 3:12; 2 Ped. 1:5-8). ¿Nénachi uaa ini ambe úni? Pori ejemplu, eratsenta je ini ambe, engachi uéjka sánderu mintsikani Tata Diosïni. Uaakachi arhiantani juchaari publikasionichani engaksï uandajka nénachi uaa sánderu mintsikani Tata Diosïni. Ístujtsï uaaka exeani imani bideuechani engaksï JW Broadcasting^® jimbo jaka, enga uandajka ima erachicheri engaksï kánikua mintsikaka Tata Diosïni jiáni engaksï no sési nitamakuarhini japka. Ka tátsekua, eratsentani nénachi uaa májkueni mintsikani Tata Diosïni ísï eska inde erachicha.

20. ¿Ambechi uaa úni parachi sánderu tsípikua jingoni irekani ka nóchi xáni no sési pʼikuarherani?

²⁰ Ísïisti, iáminduchi uékasïnga sánderu marhuakuni Tata Diosï Jeobani ka eskachi na xáni úni jaka iásï. Jimbanhi parhakpinirhu engajtsïni Tata Diosï aiachini jaka, uaakachi sánderu marhuakuni. Enga jamberi niáraaka ima jurhiatikua, engachi jánguarhintaska úni na engachi xáni uaaka parachi sánderu marhuakuni Tata Diosïni, sánderuchi tsípikua jingoni irekaaka ka nóteruchi xáni no sési pʼikuarheraakia. Ka sánderu jukaparhakua ambe, k’éri ambechi arhini jauaka Tata Diosï Jeobani, juchaari “Tata Diosïni enga felisika” (1 Tim. 1:11, TNM). Jiájkani, ju je sési pʼikuarherani imani ambe jimbo engachi újka Tata Diosï Jeobani jimbo.