EKICWEKA KY’OKWEGA 33
Tunga Okusemererwa omu Bintu eby’Osobora Kukorra Yahwe
“Okurora namaiso nikukira okugendagenda nomwoyo ogurukwegomba.”—MUG. 6:9.
EKIZINA 111 Ebituletera Okusemererwa
EBITURAYEGA *
1. Baingi nibakora ki kwekamba omu kuheereza Yahwe?
EMPERO y’ensi enu nk’oku eriyo nirra haihi, twine emirimo nyingi ey’okukora. (Mat. 24:14; Luk. 10:2; 1 Pet. 5:2) Itwena nitugonza kuheereza Yahwe nk’okuturukusobora. Baingi nibeyongera kwekamba omu mulimo ogw’okutebeza. Abamu nibanihira kuheereza nka bapayoniya. Abandi nibanihira kuheereza ha Beseeri rundi kwejumbira omu kwombeka ebyombeko by’Obukama. Kandi ab’oruganda baingi nibekamba kufooka abaheereza rundi abagurusi omu kitebe. (1 Tim. 3:1, 8) Yahwe aine kuba asemereriirwe muno habw’okurora okwehayo okw’abantu be!—Zab. 110:3; Is. 6:8.
2. Nitusobora kwehurra tuta kakuba tulemwa kuhika ha bigendererwa byaitu ebimu eby’omwoyo?
2 Nitusobora kuhwamu amaani kakuba obwire bwingi burabaho tutakahikire ha bigendererwa byaitu ebimu eby’omwoyo. Rundi nitusobora kuhwamu amaani kakuba habw’emyaka, rundi habw’ensonga ezindi kibakitarukusoboka kuheereza Yahwe omu buheereza obumu. (Nfu. 13:12) Enu niyo nyikara ya Melissa. * Yakugondeze kuheereza ha Beseeri rundi kugenda omu Isomero ery’Abatebezi b’Obukama, baitu nagamba ati: “Mpingwize emyaka ey’erukwetaagwa. Hali nyowe, emigisa egi birooto kwonka. Obwire obumu, nyehurra mpwairwemu amaani.”
3. Bintu ki abamu ebibasobora kwetaaga kukora kutunga obujunanizibwa obundi?
3 Abamu abakyali bato kandi abaine obwomeezi oburungi nikisobora kubetaagisa kubanza kukurakuraniza emiringo emu batakahairwe obujunanizibwa obundi. Ekyokurorraho, abamu nibasobora kuba baine amagezi, bakora bwangu encwamu, kandi baine ekihika eky’okuheereza. Baitu nikisobora kubetaagisa kweyongera kuba abagumiisiriza, kukora emirimo n’obwegendereza, hamu n’okwongera kuteekamu abandi ekitiinisa. Kakuba oyekamba kukurakuraniza emiringo ey’orukwetaaga, nosobora kutunga obujunanizibwa omu kasumi ak’obaire otarukubunihira. Tekerezaaho ekyokurorraho kya Nick. Obwakaba aine emyaka 20, akasaalirwa muno habw’okutakomwa kufooka omuheereza omu kitebe. Nagamba ati, “nkatekereza ngu mpaka nyine ekinsobereho.” Baitu Nick atahwemu amaani. Akekamba nk’oku arukusobora omu kitebe hamu n’omu kutebeza. Kasumi kanu, n’aheereza h’Akatebe k’Itaagi.
4. Kiki ekiturukegenda kubazaaho omu kicweka kinu?
4 Ohoirwemu amaani habwokuba tokahikire ha kimu ha bigendererwa byawe eby’omwoyo? Obukiraaba nukwo kiri, saba hali Yahwe omugambire nk’oku orukwehurra. (Zab. 37:5-7) Ekindi, saba ab’oruganda abakuzire omu by’omwoyo obuhabuzi obusobora kukukonyera kusemezaamu obuheereza bwawe hali Yahwe, kandi hanyuma lengaho nk’oku orukusobora kubukorraho. Kakuba obikora, nosobora kutunga obujunanizibwa rundi kuhika ha kigendererwa kyawe. Baitu nka Melissa outubalizeehoga, kasumi kanu nikisobora kuba ngu tikirukusoboka kutunga obuheereza obworukugonza. Kiki ekisobora kukukonyera kwikara oine okusemererwa? Kutunga eky’okugarukamu, ekicweka kinu nikiija kubazaaho (1) ekisobora kukuleetera okusemererwa, (2) nk’oku osobora kutunga okusemererwa okurukukiraho, kandi (3) n’ebigendererwa eby’osobora kweteraho ebirakukonyera kwongera ha kusemererwa kwawe.
EKISOBORA KUKULEETERA OKUSEMERERWA
5. Kusobora kutunga okusemererwa, kiki ekitusemeriire kutaho omutima? (Omugambizi 6:9)
5 Omugambizi 6:9, n’etusoborra kiki ekisobora kutukonyera kutunga okusemererwa. (Soma.) Omuntu ow’ayegondeza omu bintu ‘eby’arora n’amaiso’ ge amarwa ebyo eby’aine omu nyikara eyarukuba arumu. Baitu omuntu ow’agendagenda n’omwoyo ogw’okwegomba aikara n’ayegomba ebintu eby’atasobora kutunga. Kinu nikitwegesa ki? Kusobora kutunga okusemererwa twine kuteeka omutima ha bintu ebitwine n’ebiturukusobora kutunga.
6. Kyokurorraho ki ekiturukugenda kubazaaho, kandi kiki ekiturataho omutima?
6 Mali nikisoboka kumarwa ebintu eby’oine? Abantu baingi batekereza ngu tikirukusoboka, habwokuba tugonza kwikara nitwega kukora ebintu ebihyaka. Baitu nikisoboka. Mali nikisoboka kwegondeza omu bintu ebitwine kasumi kanu. Eki nitusobora kukikora tuta? Kumanya nk’oku tusobora kukikora, leka tubazeeho ekyokurorraho kya Yesu eky’etaranta, ekiri omu Matayo 25:14-30. Nitwija kuteeka omutima h’amasomo turukwegamu ag’asobora kutukonyera kutunga okusemererwa kandi n’okwongera ha kusemererwa kwaitu habw’emigisa eitwine kasumi kanu.
NK’OKU OSOBORA KUTUNGA OKUSEMERERWA OKURUKUKIRAHO
7. Omu bugufu, soborra ekyokurorraho kya Yesu eky’etaranta.
7 Omu kyokurorraho kya Yesu, omusaija akaba ali haihi kugenda ha rugendo. Obwakaba atakagenzere, akeeta abairu be kandi buli omu yamuha etaranta ez’okukozesa bizineesi. * Omusaija onu akaba amanyire ngu abairu be baine obusobozi oburukwahukana, nahabweki ow’okubanza akamuha etaranta itaano, owakabiri ibiri, kandi owakasatu emu. Omwiru ow’okubanza n’owakabiri bakekamba kukorra mukama wabo amagoba. Omwiru owakasatu, sente ezibamuhaire atazikolemu kintu kyona, kandi mukama we akamubinga.
8. Habwaki omwiru ow’okubanza asobora kuba y’asemeriirwe?
8 Omwiru ow’okubanza aine kuba yasemeriirwe muno habwa mukama we kumuha etaranta itaano. Ezi zikaba sente nyingi muno, kandi kikooleka ngu mukama we akaba n’amwesiga muno! Baitu kandi omwiru ow’akabiri akehurra ata? Akaba n’asobora kuhwamu amaani habwokuba atatunge etaranta nyingi nk’omwiru ow’okubanza. Baitu aketwaza ata?
Masomo ki agatusobora kwegera ha mwiru ow’akabiri omu kyokurorraho kya Yesu? (1) Akasemererwa kutunga etaranta ibiri kuruga hali mukama we. (2) Akakora n’amaani kukanyisa sente za mukama we. (3) Akakanyisa etaranta za mukama we zafooka ina (Rora akacweka 9-11)
9. Kiki Yesu ekyataragambire ha mwiru owakabiri? (Matayo 25:22, 23)
9 Soma Matayo 25:22, 23. Yesu atagambe ngu omwiru owakabiri akabiihirwa kandi ngu akahura enzigu habwokuba bamuhaire etaranta ibiri zonka. Kandi Yesu atagambe ngu omwiru ogu akatontorooma nagamba ati: ‘Zinu zonka nizo bampaire? Nanyowe nkora muno nk’omwiru oubahaire itaano! Mukama wange obwaraaba n’ateekereza tindi mukozi murungi, nikikira kuziika sente ze kandi nk’agenda nkekorra ebyange.’
10. Omwiru owakabiri akakozesa ata etaranta ze?
10 Nk’omwiru ow’okubanza, owakabiri na uwe akakyetegereza ngu obujunanizibwa obubakaba bamuhaire bukuru kandi akekamba kuheereza mukama we. Kandi ekyarugiremu, akakanyisa etaranta za mukama we zafooka ina. Omwiru onu akatunga empeera habw’obwekambi hamu n’obukugu bwe. Mukama we akasemererwa muno kandi y’amuha obujunanizibwa oburukukiraho!
11. Nitusobora tuta kwongera ha kusemererwa kwaitu?
11 Omu mulingo nugwo gumu, nitusobora kwongera ha kusemererwa kwaitu kuraba omu kwemarra omu mulimo gwona ogututunga omu kuheereza Yahwe. Wemarre omu mulimo ogw’okutebeza kandi oyekambe muno omu kitebe. (Eng 18:5; Baheb. 10:24, 25) Genda omu nsorrokano otekaniize kurungi nukwo osobole kuhayo eby’okugarukamu ebirukugarramu amaani. Ekicweka kyona eky’abeegi eky’oratunga omu rusorrokano orwa hagati omu wiiki kitwale nk’ekikuru. Obw’oraheebwa omulimo gwona omu kitebe, linda obwire kandi obe muntu arukwesigwa. Otatekereza ngu obujunanizibwa obw’ohairwe tibuli bw’amaani kandi ngu torukwetaaga kubumarraho obwire. Lengaho muno kweyongera kuba mukugu omu mulimo ogw’ohairwe. (Nfu. 22:29) Obw’orayeyongera kwemarra omu bujunanizibwa hamu n’omu bintu eby’omwoyo, noija kukurakurana bwangu kandi n’okusemererwa kwawe nikwija kweyongera muno. (Bag. 6:4) Kandi nikiija n’okukwanguhira kusemerererwa hamu n’abandi obubatunga obujunanizibwa obw’obaire nogonza.—Bar. 12:15; Bag. 5:26.
12. Kiki ekyakonyire Melissa na Nick kutunga okusemererwa kwingi?
12 Noijuka Melissa, ow’akaba n’agonza kuheereza ha Beseeri rundi kugenda omu Isomero ery’Abatebezi b’Obukama? N’obukiraaba ngu tarukusobora kukora ebintu ebi, nagamba ati: “Ndengaho kwekamba nk’okundukusobora omu buheereza bwange nka payoniya kandi nyejumbira omu miringo yoona ey’okutebeza. Kinu kindetiire okusemererwa kwingi.” Kandi kiki eky’akonyire Nick obw’akaba ahwoirwemu amaani habw’okutakomwa kuba muheereza? Nagamba ati: “Nkateeka omutima hali ebi ebinsobora kukora, nk’okutebeza hamu n’okugarramu abandi amaani. Nkaijuza na foomu ey’okuheereza ha Beseeri kandi bakandaaliza omwaka ogwahondiireho.”
13. Kiki ekirarugamu obw’orayemarra omu buheereza obw’oine kasumi kanu? (Omugambizi 2:24)
13 Kakuba oyemarra omu buheereza obw’oine kasumi kanu, oratunga obujunanizibwa oburukukiraho omu kasumi ak’omu maiso? Eki nikisobora kubaho nk’oku kyahikire hali Nick. Baitu kakuba kitabaho, nka Melissa noija kweyongera kutunga okusemererwa, kandi noija okumarwa habw’ebi ebyorukusobora kukorra Yahwe. (Soma Omugambizi 2:24.) Ekindi, noija n’okutunga okusemererwa kwingi habwokuba okimayire ngu n’osemeza Yesu.
EBIGENDERERWA EBYONGERA HA KUSEMERERWA KWAITU
14. Kiki ekitusemeriire kwikara nitwijuka obututekerezaaho ebigendererwa byaitu eby’omwoyo?
14 Kuteeka omutima ha buheereza obutwine kasumi kanu, nikimanyisa ngu tuleke kulengaho kwongera ha buheereza bwaitu? Nangwa! Nitusobora kubwongeraho kandi tusemeriire n’okweteraho ebigendererwa ebiratukonyera kwikara nitwekamba omu buheereza n’omu kukonyera Abakristaayo bagenzi baitu. Nitwija kuhika ha bigendererwa binu, kakuba omu mulingo gw’amagezi hamu n’obuculeezi tuteeka omutima ha kuheereza abandi omu kiikaro ky’okwefaaho itwenka.—Nfu. 11:2; Eng. 20:35.
15. Bigendererwa ki ebimu ebisobora kukukonyera kwongera ha kusemererwa kwawe?
15 Bigendererwa ki eby’osobora kweteraho? Saba Yahwe akukonyere kumanya ebigendererwa eby’osobora kuhikaho. (Nfu. 16:3; Yak. 1:5) Nosobora kweteraho ebigendererwa ebibaziibweho omu kacweka k’okubanza nk’okufooka payoniya omusagiki rundi ow’akasumi koona, kuheereza ha Beseeri, rundi kwejumbira omu mulimo ogw’okwombeka. Nosobora kwega orulimi orundi rundi okagenda kutebeza omu kiikaro ekindi. Nosobora kwega ebirukukiraho ha bigendererwa binu kakuba osoma akatabu Organized to Do Jehovah’s Will esuura eya 10 kandi okabaza n’abagurusi ab’omu kitebe kyawe. * Obworaaba nolengaho kuhika ha bigendererwa binu, abandi nibaija kukirora nk’oku n’okurakurana kandi n’okusemererwa kwawe nikwija kweyongera.
16. Kiki eky’osobora kukora kakuba kasumi kanu oba otarukusobora kuhika ha kimu ha bigendererwa byawe?
16 Kiki eky’osobora kukora kakuba kasumi kanu oba otarukusobora kuhika ha kimu ha bigendererwa ebitubalizeeho? Lengaho kweteraho ekigendererwa ekindi eky’orukusobora. Tekerezaaho ebimu hali binu.
Bigendererwa ki ebimu ebyorukusobora kuhikaho? (Rora akacweka 17) *
17. Kusigikirra ha 1 Timoseo 4:13, 15, kiki ow’oruganda eky’asobora kukora kweyongera kufooka omwegesa omurungi?
17 Soma 1 Timoseo 4:13, 15. Obworaaba oli w’oruganda ow’abatiziibwe, nosobora kwekamba kusemeza omulingo oha embazo rundi oyegesa. Habwaki? Habwokuba obw’orayekamba kufooka murungi omu kusoma, kuha embazo, kandi n’okwegesa, noija kukonyera abo abarukukuhuliiriza. Lengaho kweteraho ekigendererwa eky’okwesomesa kandi n’okuteeka omu nkora buli isomo eriri omu burocuwa Wekambire Okusoma n’Okwegesa. Wesomese isomo limu limu, wekambe kwerengesaamu oli omu ka, kandi teeka omu nkora eby’oyegere obworaaba noha embazo. Saba omuhabuzi omu kitebe rundi abagurusi abandi “[abekamba] omu kigambo nokwegesa” kukuha amagezi. * (1 Tim. 5:17) Omutima otaguteeka ha kuteeka omu nkora isomo kuruga omu burocuwa kyonka, baitu guteeke naha kukonyera abarukukuhuliiriza kugumya okwikiriza kwabo rundi kuteeka omu nkora ebibegere. Obw’orakora eki, noija kwongera ha kusemererwa kwawe n’okwabo.
Bigendererwa ki ebimu ebyorukusobora kuhikaho? (Rora akacweka 18) *
18. Kiki ekiratukonyera kuhika ha bigendererwa byaitu omu buheereza?
18 Itwena twine obujunanizibwa obw’okutebeza n’okufoora abantu abegeswa. (Mat. 28:19, 20; Bar. 10:14) Wakugondeze kweyongera kuba mukugu omu mulimo gunu omukuru? Wesomese burocuwa Wekambire Okusoma n’Okwegesa kandi hanyuma oyetereho ebigendererwa ebirakukonyera kuteeka omu nkora eby’orukwega. Nosobora kutunga amagezi agandi kuruga omu Akatabu k’Ensorrokano hamu n’omu vidiyo ez’enyanjura eziturora omu nsorrokano. Lengaho emiringo erukwahukana nukwo omanye ey’erakukorra kurungi. Obworateeka omu nkora obuhabuzi obworukwega noija kufooka omwegesa omurungi kandi kinu nikiija kukuleetera okusemererwa.—2 Tim. 4:5.
Bigendererwa ki ebimu ebyorukusobora kuhikaho? (Rora akacweka 19) *
19. Nosobora ota kukurakuraniza emiringo ey’Ekikristaayo?
19 Obworaaba noyeteraho ebigendererwa, oteebwa kweteraho ekigendererwa ekikuru muno eky’okukurakuraniza emiringo enungi ey’erukusemeza Ruhanga. (Bag. 5:22, 23; Bak. 3:12; 2 Pet. 1:5-8) Kiki eky’osobora kukora kukihikaho? Ekyokurorraho, obundi nogonza kugumya okwikiriza kwawe. Nosobora kusoma ebicweka ebiri omu bitabu byaitu ebirukuha amagezi ha mulingo osobora kugumya okwikiriza kwawe. Noija n’okugasirwa obw’orarora vidiyo eziri ha JW Broadcasting® ezirukwoleka omulingo ab’oruganda baayolekere okwikiriza okw’embaganiza obubakaba nibaraba omu birengo. Hanyuma tekerezaaho omulingo osobora kwegera ha kwikiriza kwabo.
20. Kiki ekitusobora kukora kwongera ha kusemererwa kwaitu kandi n’okukehya ha kwehurra tuhoirwemu amaani?
20 Busaho kugurukyagurukya, itwena twakugondeze kwongera ha buheereza bwaitu hali Yahwe kukira nk’oku turukukora hati. Omu nsi empyaka, nitwija kusobora kumuheereza omu bwijwire. Akasumi ako katakahikire, obuturayemarra ha buheereza bwona obutwine hati, nitusobora kwongera ha kusemererwa kwaitu kandi tukehye ha kwehurra tuhoirwemu amaani. Kandi ekirukukira obukuru, nitwija kuhaisa ekitiinisa kandi tukugize Yahwe “Ruhanga ow’asemeriirwe.” (1 Tim. 1:11, NW) Nahabweki, leka itwena tutunge okusemererwa omu bintu ebiturukusobora kukorra Yahwe!
EKIZINA 82 Leka Ekyererezi Kyanyu Kyake
^ kac. 5 Yahwe nitumugonza muno, kandi nitugonza kukora kyona ekiturukusobora kumuheereza. Egi niyo ensonga habwaki baingi omuliitwe tugonza kukora ebirukukiraho omu kutebeza rundi twekamba kutunga obujunanizibwa obundi omu kitebe. Baitu nitusobora kulemwa kuhika ha bigendererwa byaitu n’obutuba twekambire nk’oku turukusobora. Kiki ekisobora kutukonyera kwikara tuli bekambi omu kuheereza Yahwe kandi n’okwikara twine okusemererwa? Ekigarukwamu nitukisanga omu kyokurorraho kya Yesu eky’etaranta.
^ kac. 2 Amabara agamu gahindwirwe.
^ kac. 7 KUSOBORRA AMAKURU G’EKIGAMBO: Etaranta ekaba ningana na sente omukozi wa buli kiro yakoraga omu myaka 20.
^ kac. 15 Ab’oruganda ababatiziibwe nibekambisibwa kuteekamu amaani kufooka abaheereza kandi abagurusi omu kitebe. Kumanya ebibasemeriire kuhikiriza, rora esuura 5 n’eya 6 ey’akatabu Organized to Do Jehovah’s Will.
^ kac. 17 KUSOBORRA AMAKURU G’EKIGAMBO: Omuhabuzi omu kitebe nuwe omugurusi ow’ahairwe obujunanizibwa obw’okuhabura ha rubaju abagurusi abandi hamu n’abaheereza ha bicweka ebibaba bahaire omu kitebe.
^ kac. 64 KUSOBORRA EKISISANI: Kusobora kufooka omwegesa omurungi, ow’oruganda n’akora okuseruliiriza.
^ kac. 66 KUSOBORRA EKISISANI: Hanyuma y’okweteraho ekigendererwa ky’okwejumbira omu kutebeza okwaho naaho, munyaanya itwe n’agabira omukazi ow’amuheriize omu hoteeri, kaadi erukuragirra ha mukura.
^ kac. 68 KUSOBORRA EKISISANI: Munyanya itwe ow’aine ekigendererwa eky’okweyongera kuba mugabi, aha munyaanya itwe ondi ekisembo eky’abaire atarukunihira.
