1. ¿Bin yakik ta spasel te hermanoetik yuʼun ya x-abatinikxan ta stojol Jehová?

 NOPOLIX te slajibal kʼajkʼal, jaʼ yuʼun bayal aʼtelil ya skʼan pasel (Mat. 24:14; Luc. 10:2; 1 Ped. 5:2). Jpisiltik ya jkʼantik te ya x-abatinotikxan ta stojol te Jehová, jaʼ yuʼun bayal machʼatik yakik ta smukʼubteselxan te yaʼtelik ta stojole. Ay machʼatik ya skʼan ya x-ochik ta precursor, ya x-abatinik ta Betel o ya x-aʼtejik ta construcción. Ay yantik yakik ta spasel tulan yuʼun ya x-ochik ta siervo ministerial o ta anciano (1 Tim. 3:1, 8). Te Jehová tseʼel yoʼtan kʼalal ya yil te ya spasik tulan yuʼun ya x-abatinik ta stojol (Sal. 110:3; Is. 6:8).

2. ¿Binwan yaʼiyel ya awaʼiy aba teme ma kʼot ta pasel awuʼun te bin anopoj?

² Pero teme kʼaxix te tiempo sok mato kʼoem ta pasel te bin anopoje, yaniwan xchebaj awoʼtan o yaniwan amel awoʼtan yuʼun te bin ma juʼem awuʼun spasel ta organización yuʼun te Jehová, ta skaj te ayix awaʼbilal o yanxan te bin yak ta kʼaxel ta akuxlejal (Prov. 13:12). Jich kʼax ta stojol te Melissa, * te snopoj te ya xbajt ta aʼtel ta Betel o ya xbajt ta Escuela yuʼun Evangelizador, jich ya yal: «Ayix kaʼbilal, jaʼ yuʼun ma xjuʼ ya jkʼotesix ta pasel te bin jnopoj, ay ya xchebaj koʼtan yuʼun».

3. ¿Bin ya spasik te machʼatik ya skʼan x-abatinikxan ta congregación?

 ³ Ay machʼatik te jchʼielikto sok te maʼyuk schamelik, pero nail ya skʼan ya xchʼixan te schʼuunel yoʼtanik sok te yakuk xlekubxan te taleliletik, yuʼun jich ya x-aʼtejikxan ta stojol te Jehová. Ayniwan spʼijilik, ya smulanik aʼtel sok ay sbujtsʼ yoʼtanik, pero yato skʼan yakʼikxan ta ilel slamalil yoʼtanik, te ya snaʼik stsajtayel sok te ya x-ichʼawanik ta mukʼ. Teme ya spasik tulan ta schʼiteselxan te lekil taleliletik, yaniwan yichʼ yaʼtelik ta congregación. Kiltik te bin kʼax ta stojol te Nick, te kʼalal 20 yaʼbilal chebaj yoʼtan te ma och ta siervo ministerial, jich ya yal: «La jkuy te ay bin ma lek yakon ta spasel». Pero jaʼ bajt ta yoʼtan spasel te bin ya xjuʼ yuʼun ta congregación sok ta scholel skʼop Dios. Ta ora ini yakix ta aʼtel ta Comité yuʼun Betel.

4. ¿Bin ya kilbeytik skʼoplal ta artículo ini?

⁴ ¿Chebajembal koʼtantik yuʼun te ma kʼoem ta pasel te bin jnopojtik? Teme jiche, jcholbeytik yaʼiy te Jehová te bin yaʼiyel ya kaʼiy jbatik (Sal. 37:5-7). Jcholbeytik yaʼiy te hermanoetik te ayix experiencia yuʼunik, te yakuk yalbotik te banti ya jlekubtestik te kaʼteltik sok jkʼotestik ta pasel. Teme jich ya jpastik, yaniwan jkʼotestik ta pasel te bin jnopojtik. Pero teme ma xjuʼix kuʼuntik jich bitʼil te Melissa, ¿bin-utʼil ya jtatik stseʼelil koʼtantik? Yuʼun ya kakʼbeytik sujtib te jojkʼoyel, ta artículo ini ya kiltik oxchajp. Sbabial, ¿bin ya yakʼbotik stseʼelil koʼtantik?. Schebal, ¿bin ya jpastik yuʼun ya jtatikxan stseʼelil koʼtantik? Yoxebal, ¿bin ya kakʼ ta koʼtantik spasel yuʼun ayxan stseʼelil koʼtantik?

5. ¿Bin ya skʼan ya jpastik yuʼun ay stseʼelil koʼtantik? (Eclesiastés 6:9).

⁵ Yuʼun ay stseʼelil koʼtantik, ya skʼan ya jpastik te bin ya yal te Eclesiastés 6:9 (kʼopona). Te machʼa jaʼ ya smulan «te bin ya yil te sit» lek ya yaʼiy sba yuʼun te bin ay yuʼun, jich bitʼil te bin yak ta kʼaxel ta skuxlejal. Pero te machʼa jaʼ ya snuts «te bin ya scʼan yoʼtan», spisil-ora jaʼ ya skʼan te bin ma xjuʼ yuʼun stael. ¿Bin ya yakʼ jnoptik? Teme ya jkʼantik te ay stseʼelil koʼtantik, jaʼ ya skʼan ya xbajt ta koʼtantik te bin ay kuʼuntik.

6. ¿Bin lokʼombakʼop ya kilbeytik skʼoplal sok bin ya yakʼ jnoptik?

⁶ Ta jpisiltik ya jmulantik te ay bin yachʼil ya jpastik. Jaʼ yuʼun, ¿yabal yakʼ stseʼelil koʼtantik te bin ayix kuʼuntike? Yak, ya jmulantik. ¿Bin yuʼun? Kilbeytik skʼoplal te lokʼombakʼop la yal te Jesús ta Mateo 25:14-30. Ya jnoptik bin ya jpastik yuʼun ayukxan stseʼelil koʼtantik.

7. Chola kaʼiytik te lokʼombakʼop la yal te Jesús.

⁷ Ta lokʼombakʼop te Jesús la yalbey skʼoplal jtul winik te ya xbajt ta viaje. Te kʼalal mato baem-ae, la yikʼtiklan te j-abatetik yuʼun sok la yakʼtiklanbey talentoetik ta jujuntul. * Te jtul j-abat akʼbot joʼeb talento, te yane cheb sok te yane jun-nax akʼbot. Te chaʼtul j-abat, lek aʼtejik sok la yakʼ jolonuk stakʼin te yajwalik. Pero te yoxebal j-abat maʼyuk bin la spas, jaʼ yuʼun nutsot lokʼel yuʼun te yajwale.

8. ¿Bin yuʼun tseʼel yoʼtan la yaʼiy sba te sbabial j-abate?

 ⁸ Tseʼelniwan yoʼtan te j-abat te akʼbot joʼeb talento yuʼun te yajwale, melel bayal takʼin sok chikan ta ilel te ay smukʼul yoʼtan te yajwal ta stojole. ¿Bin ya xjuʼ ya kaltik ta stojol te j-abat te chebnax talento akʼbote? Juʼniwan te chebaj yoʼtan te kʼalal la yil te jaʼ bayal akʼbot te yane, pero ¿bin la spas?

9. ¿Bin ma la yalbey skʼoplal te Jesús ta swenta te schebal j-abat? (Mateo 25:22, 23).

⁹ (Kʼopona Mateo 25:22, 23). Te Jesús ma la yal te ilin te j-abat te jaʼnax akʼbot cheb talento sok ma la yakʼ ta naʼel te jich la yal te j-abat: «¿Jaʼnaxbal ya yakʼbonik ini? Pero j-aʼtel winikon-euk jich bitʼil te machʼa la yichʼ joʼeb talento, teme ma xyichʼ ta wenta te bin ya jpas te kajwale, ya jmuk te cheb talento ini sok jaʼ ya jpas te bin ya skʼan koʼtane».

10. ¿Bin la spas te schebal j-abat?

¹⁰ Jich bitʼil la spas te sbabial j-abat, jaʼnix jich la spas te schebal, melel tulan aʼtej ta stojol te yajwal, jich la staxan cheb talento. Te bitʼil jich la spas, tseʼelnax yoʼtan yuʼun te yajwal sok akʼbotxan aʼteliletik.

11. ¿Bin ya jpastik yuʼun ayukxan stseʼelil koʼtantik?

¹¹ Jaʼnix jich ya xjuʼ ya yakʼbotikxan stseʼelil koʼtantik te kʼalal ya jpastik tulan ta spasel te aʼtelil ta stojol te Jehová. Jaʼuk baem ta koʼtantik scholel skʼop Dios sok koltaywanukotik ta spasel te aʼtelil ta congregación (Hech. 18:5; Heb. 10:24, 25). Jchajpantik ta lek te jcomentariotik yuʼun ya kakʼbeytik smukʼul  yoʼtan te yantik. Jpastik ta lek te j-asignaciontik te ya kichʼtik akʼbeyel ta tsoblej. Teme ya kichʼtik kʼanbeyel koltayel ta congregación, yakuk jpastik ta lek sok ta yorailuk. Ma skʼan ya jnoptik te ay aʼteliletik te ma tulanuk skʼoplal sok te ma snujpʼuk te bayal tiempo ya jchajpantik. Jpastik tulan ta slekubteselxan te kaʼteltik (Prov. 22:29). Teme jaʼ baem ta koʼtantik spasbeyel yaʼtel te Jehová, ya xchʼixan te schʼuunel koʼtantik sok ya yakʼbotikxan stseʼelil koʼtantik (Gál. 6:4). Jich yuʼun tseʼel koʼtantik teme ay machʼa ya yichʼ yaʼtel te joʼotik ya jkʼantik-ae (Rom. 12:15; Gál. 5:26).

12. ¿Bin la spas te Melissa sok te Nick yuʼun ya staxan stseʼelil yoʼtanik?

¹² ¿Yatobal xjul ta koʼtantik te Melissa te la kalbeytik skʼoplal ta párrafo 2 te yoʼtanuk ya xbajt ta Betel o ta Escuela yuʼun Evangelizador? Manchukme ma xjuʼix yuʼun ya spas te bin snopoj, jich ya yal: «Ya jpas tulan ta scholelxan skʼop Dios jich bitʼil te precursoraon, jaʼ ya yakʼbon bayal stseʼelil koʼtan». ¿Bin la spas te Nick te kʼalal ma och ta siervo ministerial te la kalbeytik skʼoplal ta párrafo 3? Jich ya yal: «Jaʼ bajt ta koʼtan spasel te bin ya xjuʼ kuʼun spasele, la jcholxan te skʼop Dios sok la kakʼxan comentarioetik te ya stij oʼtanil. Jaʼnix jich la jnojes jun solicitud yuʼun ya xboon ta Betel, jun jaʼbil ta patil la yikʼonik».

13. ¿Bin ya xkʼot ta pasel teme ya jpastik ta lek te kaʼteltik? (Eclesiastés 2:24).

¹³ ¿Yabal skʼan ya yal-abi te ya kichʼtikxan bayal kaʼteltik ta pajel chaʼbej teme ya jpastik ta lek te kaʼteltik ta ora ini? Yakniwan, jich bitʼil kʼax ta stojol te Nick. Pero teme maʼuke, ya jtatik stseʼelil koʼtantik sok lek ya kaʼiy jbatik jich bitʼil kʼax ta stojol te Melissa (kʼopona Eclesiastés 2:24). Jaʼnix jich ya yakʼbotik stseʼelil koʼtantik teme ya jpastik tulane, melel jnaʼojtik te lek ya yil te kajwaltik Jesucristo.

14. ¿Bin ya skʼan ya jultes ta koʼtantik?

¹⁴ Teme la jpastikix tulan ta spasbeyel te yaʼtel te Jehová, ¿yabal skʼan ya yal-abi te ma jpastikix tulane? Maʼuk. Ya skʼan te ay bin ya kakʼ ta koʼtantik spasel yuʼun ya jcholtikxan ta lek te skʼop Dios sok ya xnojpteswanotik ta lek, yuʼun jich ya jkoltaytikxan-a te kermanotaktik. Ya xjuʼ kuʼuntik spasel teme ay jpʼijiltik, ay spekʼelil koʼtantik sok jaʼ ya xbajt ta koʼtantik skoltayel te yantik (Prov. 11:2; Hech. 20:35).

15. ¿Bintik ya yakʼbotik stseʼelil koʼtantik?

¹⁵ ¿Bin ya skʼan ya kakʼ ta koʼtantik spasel? Kalbeytik te Jehová te yakuk skoltayotik ta yilel te bin ya xjuʼ ya jpastik (Prov. 16:3; Sant. 1:5). ¿Yabal xjuʼ x-ochotik ta precursor auxiliar, regular, ya xbootik ta aʼtel ta Betel o ta construcción jich bitʼil la yichʼ alel ta  párrafo 1? ¿Yabal xjuʼ ya jnoptik yan kʼopil yuʼun ya jcholtikxan skʼop Dios o ya xbootik ta yan lugar te banti ya skʼanik koltayel? Teme ya jkʼantikxan información ta swenta-abi, ya xjuʼ ya jkʼopontik te capítulo 10 yuʼun te libro Organizados para hacer la voluntad de Jehová sok ya xjuʼ ya xkʼopojotik sok te ancianoetik yuʼun te congregación. * Teme ya jpastik tulan  ta skʼotesel ta pasel te bin jnopojtik, ya yakʼbotik stseʼelil koʼtantik sok ya yilik te yantik.

16. ¿Bin ya jpastik teme ma xjuʼ kuʼuntik spasel te bin jnopojtik?

¹⁶ ¿Jaxan teme ma xjuʼ kuʼuntik te bin jnopoj ya jpastik? Jaʼuk ya jpastik te bin xjuʼ kuʼuntik, jich bitʼil ya kilbeytik skʼoplal ta ora ini.

17. Jich bitʼil ya yal te 1 Timoteo 4:13, 15, ¿bin ya skʼan ya spas jtul hermano yuʼun ya xkʼot ta lekil pʼijubteswanej?

¹⁷ (Kʼopona 1 Timoteo 4:13, 15). Teme winikat sok te awichʼojix jaʼ, yaniwan xjuʼ ya apas tulan yuʼun ya alekubtes te bin-utʼil ya awakʼ te discurso sok te bin-utʼil ya xnojpteswanat. ¿Binwan yuʼun? Melel teme ya apas tulan yuʼun ya alekubtesxan te bin-utʼil ya akʼopon te jun, te kʼalal ya awakʼ discurso sok te ya xnojpteswanat, jich ya xjuʼ ya akoltayxan te yantike. Pasa tulan ta snopel sok ta spasel te bin ya yal te folleto, Jnoptik ta lek skʼoponel jun sok pʼijubteswanej. Nopa te leccionetik, nopilana ta ana sok pasa tulan yuʼun jichuk ya apas ta adiscurso te bin la anopixe. Kʼanbeya koltayel te consejero auxiliar * o yantik ancianoetik te «ya yaʼtelinic yalel scʼop Dios soc pʼijubteswanej» (1 Tim. 5:17). Ma jaʼuknax ya xbajt ta awoʼtan spasel te bin la anop ta folleto, jaʼnix jich koltaya te yantik yuʼun yakuk xtulanub te schʼuunel yoʼtanik sok te yakuk spas ta skuxlejalik te bin ya snopike. Jich ya yakʼbatxan stseʼelil awoʼtan soknix te machʼatik ya yaʼiybat te adiscursoe.

18. ¿Bin ya skoltayotik yuʼun ya jlekubtestik te bin-utʼil ya jcholtik skʼop Dios?

 ¹⁸ Spisil te j-abatotik yuʼun Dios kichʼoj kaʼteltik ta scholel skʼop Dios sok ta yotsesel jnopojeletik (Mat. 28:19, 20; Rom. 10:14). ¿Yabal jmulantik te ya jlekubtestikxan te kaʼteltik? Teme yake, ya xjuʼ ya jkʼopontik te bin ya yal te folleto Pʼijubteswanej sok te yakuk kakʼ ta koʼtantik spasel te bin ya jnoptik. Jaʼnix jich ya ata koltayel ta Sjunal kaʼteltik ta swenta tsoblej: Jkuxlejaltik sok Kaʼteltik ta swenta Dios sok te videoetik te ay ta «Te bin-utʼil ya xjuʼ xkʼopojotik sok te ants winiketik», te ya yichʼ akʼel ta ilel ta tsoblej yuʼun olil semana. Jpastik prueba ta jujun, yuʼun ya kiltik te ban ya xtuun kuʼuntik ta jterritoriotik. Teme jich ya jpastike, ya yakʼ stseʼelil koʼtantik te lekil jnojpteswanej ya xkʼootik (2 Tim. 4:5).

19. ¿Bin ya skoltayotik ta schʼitesel lekil taleliletik?

¹⁹ Mame schʼay ta koʼtantik te bin mukʼ skʼoplal ya skʼan ya jpastik, jaʼ te ya jchʼitestik lekil taleliletik (Gál. 5:22, 23; Col. 3:12; 2 Ped. 1:5-8). ¿Bin-utʼil ya xjuʼ ya jpastik? Jnop kaʼiytik, teme jkʼantik te tulanuk te schʼuunel koʼtantik. Ya xjuʼ ya jkʼopontik articuloetik ta jpublicaciontik te ya yalbey skʼoplal te tema-abi, jaʼnix jich ya xjuʼ ya kiltik te JW Broadcasting^® te ya yalbey skʼoplal te hermanoetik te la yakʼ ta ilel schʼuunel yoʼtanik kʼalal kʼax tulan swokolik. Patil jnoptik te bin-utʼil ya xjuʼ ya jkʼayinbeytik te schʼuunel yoʼtanike.

20. ¿Bin ya jpastik yuʼun ayuk stseʼelil koʼtantik sok ma xchebaj koʼtantik?

²⁰ Jpisiltik ya jkʼantik te ay bin ya jpastikxan ta stojol te Jehová. Ta achʼ balumilal te sjapojbotik te Dios, ya xjuʼ ya jpastik ta tsʼakal te skʼanojel yoʼtane. Te bitʼil mato kʼoem ta pasele, jpastik te bin ya xjuʼ kuʼuntik sok jich ya jtatik stseʼelil koʼtantik sok ma xchebaj koʼtantik. Te bin mukʼxan skʼoplale, jaʼ te ya kichʼtik ta mukʼ sok ya kalbeytik yutsil skʼoplal te Jehová, te Dios te tseʼel yoʼtane (1 Tim. 1:11). Jich yuʼun ya yakʼ stseʼelil koʼtantik te bin ya xjuʼ ya jpastik ta stojol te Jehová.