1. ¿Kʼusi yakal tspasik epal ermanoetik sventa masuk to xtunik ta stojolal Jeovae?

 JUTUK xa skʼan xlaj skʼoplal li choplejal ta balumile, jaʼ yuʼun ep kʼusitik skʼan jpastik (Mat. 24:14; Luk. 10:2; 1 Ped. 5:2). Jkotoltik ta jkʼan chijtun ta stojolal Jeova ti bu kʼalal xuʼ kuʼuntike. Ep buchʼutik yakal chepajesik li kʼusi tspasik ta mantale. Junantike oy ta yoʼontonik ch-ochik ta prekursor. Yantike tskʼan chtunik ta Betel o tskʼan tskolta sbaik ta svaʼanel naetik ti bu chichʼ ichʼel ta mukʼ Jeovae. Ep ermanoetik xtoke yakal chakʼik persa sventa xkʼotik ta siervo ministerial o ta mol ta tsobobbail (1 Tim. 3:1, 8). Ta melel, li Jeovae xmuyubaj tajek kʼalal chil ti ep kʼusitik tskʼan tspasik ta stojolal li yajtuneltake (Sal. 110:3; Is. 6:8).

2. ¿Kʼu van yelan chkaʼi jbatik mi mu jtatik li kʼusi oy ta koʼontontik spasele?

² Mi muʼyuk jtaojtik-o li kʼusi oy ta koʼontontik spasele, xuʼ van ta xkat koʼontontik. O xuʼ van ta jvul koʼontontik xtok mi oy kʼusi mu spas kuʼuntik ta steklumal Jeova ta skoj jabilaltik o ti kʼu yelan jkuxlejaltike (Prov. 13:12). Jaʼ jech chaʼi sba li Melissa * ti oy tajek ta yoʼonton chtun ta Betel o ti xbat li ta Chanob vun sventa j-al lekil aʼyejetik yuʼun Ajvalilal yuʼun Diose. Xi chale: «Akʼo mi oy tajek ta koʼonton, mu onoʼox jta ta skoj ti oy xa jabilale. Jaʼ yuʼun, chichibaj bakʼintik».

3. ¿Kʼusi van skʼan spas junantik ermanoetik sventa oyuk kʼusi sbainik spasele?

³ Oy ono’ox buchʼutik ti mas kerem tsebik toe xchiʼuk  ti muʼyuk ipike, pe skʼan me lek yijik ta mantal xchiʼuk ti lekuk stalelalik sventa oyuk kʼusi xlik sbainik spasele. Xuʼ van lek pʼijik, jpʼel ta yoʼonton li kʼusi tspasike xchiʼuk baxbolik, pe skʼan van mas oyuk smalael yuʼunik, ti lek spas yabtelike o ti x-ichʼvanikuk ta mukʼe. Mi chakʼik persa sventa xlekub li stalelalike, xuʼ van oy kʼusitik ch-akʼbat sbainik ti muʼyuk jech snopojike. Jkʼeltik kʼusi kʼot ta stojolal li Nicke. Kʼalal 20 sjabilale, la svul yoʼonton ti muʼyuk laj yichʼ biiltasel ta siervo ministeriale. Xi chale: «La jnop toʼox ti oy kʼusi chopol yakal ta jpase». Pe muʼyuk xchibaj-o, yuʼun jaʼ laj yakʼ ta yoʼonton li kʼusi xuʼ yuʼun spasel ta tsobobbail xchiʼuk ta cholmantale. Avie, chtun xa ta Komite sventa Betel.

4. ¿Kʼusi ta jkʼeltik li ta xchanobil liʼe?

⁴ ¿Mi chibajemutik ta skoj ti muʼyuk jtaojtik li kʼusi oy ta koʼontontik spasele? Mi jaʼ jeche, kalbetik Jeova ti kʼu yelan chkaʼi jbatike (Sal. 37:5-7). Jchiʼintik ta loʼil ermanoetik ti jal xa tunemik ta stojolal Jeova sventa xalbutik bu skʼan xlekub jtalelaltik xchiʼuk kakʼtik persa sventa xkakʼ ta jkuxlejaltik li kʼusi chalbutike. Mi jech ta jpastike, xuʼ me jtatik li kʼusi oy ta koʼontontik spasele. Pe mi mu xuʼ kuʼuntik stael li kʼusi oy ta koʼontontik jech kʼuchaʼal kʼot ta stojolal li Melissae, ¿kʼusi xuʼ jpastik sventa jechuk-o xijmuyubaj? Jaʼ ta jkʼeltik li ta xchanobil liʼe. Baʼyel, ta jkʼeltik kʼusi xuʼ xijmuyubaj-o. Xchibal, kʼusi xuʼ jpastik sventa masuk to xijmuyubaj. Yoxibal, kʼusitik xuʼ xkakʼ ta koʼontontik stael sventa masuk to xijmuyubaj.

5. ¿Kʼusi skʼan xkakʼ ta koʼontontik spasel mi ta jkʼan xijmuyubaje? (Eklesiastes 6:9).

⁵ Mi ta jkʼan xijmuyubajutike, skʼan jpastik li kʼusi chal Eklesiastes 6:9 (kʼelo). Li buchʼu tskʼupin li kʼusi chil sate xmuyubaj noʼox-o li kʼusi oy yuʼune, jech kʼuchaʼal ti kʼu yelan xkuxlejal avie. Pe ja’ mu jechuk cha’i sba li buchʼu jaʼ noʼox tskʼan li kʼusitik mu stae. ¿Kʼusi chakʼ jchantik taje? Jaʼ mi ta jkʼan xijmuyubajutike, skʼan jaʼ xkakʼ ta koʼontontik li kʼusitik oy kuʼuntike, maʼuk li kʼusitik muʼyuk kuʼuntike.

6. ¿Kʼusi lokʼolkʼopal chkalbetik batel skʼoplal, xchiʼuk kʼusi ta jkʼeltik?

⁶ Stalel onoʼox ti jkotoltik ta jkʼupintik kʼalal oy kʼusi achʼ chlik jpastike. Jaʼ yuʼun chaʼa, ¿mi xuʼ xijmuyubaj-o li kʼusitik oy xa kuʼuntike? Ta melel, xuʼ onoʼox jkʼupintik li kʼusitik oy xa kuʼuntike. ¿Kʼuxi xuʼ jpastik? Sventa jnaʼtike, jchanbetik skʼoplal li lokʼolkʼop laj yal Jesus ta sventa li talentoetik ti te chal ta Mateo 25:14 kʼalal ta 30. Ta jkʼeltik kʼuxi xuʼ xijmuyubaj xchiʼuk kʼuxi xuʼ mas xijmuyubaj mu ventauk ti kʼu yelan li jkuxlejaltike.

7. Albo jutuk skʼoplal li lokʼolkʼop laj yal Jesus ta sventa li talentoetike.

⁷ Li ta lokʼolkʼop laj yal Jesuse, te laj yalbe skʼoplal jun vinik ti nom bu chbate. Kʼalal skʼan toʼox xbate, la stak ta ikʼel smosotak sventa xakʼbe talentoetik ta jujuntal yoʼ xabtelanik. * Li baʼyele laj yakʼbe voʼob talento, li xchaʼvoʼale chib xchiʼuk li yoxvoʼale jun laj yakʼbe. Jaʼ ti kʼu yelan xtojob ta jujuntal laj yile. Li baʼyel chaʼvoʼe baxbolik tajek, yuʼun la spʼolesbeik li stakʼin yajvalike. Pe li yoxvoʼale muʼyuk laj yabtelan li talento akʼbate, jaʼ yuʼun lokʼesat ta yabtel yuʼun li yajvale.

8. ¿Kʼu yuʼun xmuyubaj li baʼyel mosoil ta lokʼolkʼope?

 ⁸ Li baʼyel mosoile xuʼ van tsakbil ta venta laj yaʼi sba ta skoj ti voʼob talento akʼbat yuʼun li yajvale. Epal takʼin maʼ taje xchiʼuk jamal chakʼ ta ilel ti spatoj yoʼonton ta stojolal smoso li yajval abtele. Pe ¿kʼu van yelan laj yaʼi sba li xchaʼvoʼal mosoile? Xuʼ van laj yat yoʼonton kʼalal laj yil ti jaʼ mas ep talento laj yichʼ akʼbel li baʼyele. Pe ¿kʼusi la spas?

9. ¿Kʼu yelan laj yaʼi sba li xchaʼvoʼal mosoile? (Mateo 25:22, 23).

⁹ (Kʼelo Mateo 25:22, 23). Li Jesuse muʼyuk laj yal ti ilin o ti la snakʼ skʼakʼal yoʼonton li xchaʼvoʼal mosoil ta skoj ti chib noʼox talento laj yichʼ akʼbele. Muʼyuk laj yal xtok mi xi van laj yal li mosoile: «¿Mi jaʼ noʼox jech yepal chakʼbeikun liʼe? ¡Pe koʼol xitojob xchiʼuk li buchʼu laj yichʼ voʼob talentoe! Mi muʼyuk jbalil chilun li kajvale, mas lek ta jmuk ta lum li chib talentoe xchiʼuk jaʼ ta jpas li kabtel jtuke».

10. Li xchaʼvoʼal mosoile, ¿kʼusi la spas xchiʼuk li chib talento akʼbate?

¹⁰ Li xchaʼvoʼal mosoile jaʼ jech la spas kʼuchaʼal li baʼyel mosoile, yuʼun la spas li kʼusi akʼbat sbaine xchiʼuk tsots abtej. Ta skoj taje, jolin yuʼun chib talento mas. Muyubaj tajek li yajvale, jaʼ yuʼun laj yakʼbe smoton xchiʼuk oy to kʼusi yan laj yakʼbe sbain.

11. ¿Kʼusi xuʼ jpastik sventa masuk to xijmuyubaje?

¹¹ Jaʼ jech li voʼotik eke, mas me chijmuyubaj mi ta jpastik ti bu kʼalal xuʼ kuʼuntik  li kʼusi chij-akʼbat jbaintik li ta steklumal Jeovae. Kakʼ ta koʼontontik li cholmantale xchiʼuk koltavankutik li ta tsobobbaile (Ech. 18:5; Ebr. 10:24, 25). Jchapan lek li jloʼiltik chkakʼtik ta jujun tsobajele sventa jpatbetik yoʼonton li yantike. Tsotsuk tajek skʼoplal xkiltik li jpartetik ta jelubtastik li ta tsobajel ta xokol kʼakʼale. Mi chkich’tik k’anbel ti ak’o jpastik jtosuk abtelal li ta tsobobbaile, ta yorailuk me jpastik xchiʼuk kakʼtik ta ilel ti xuʼ spat yoʼontonik ta jtojolaltike. Mu jnoptik ti oy abtelaletik ti muʼyuk tsotsik skʼoplale xchiʼuk ti mu sta-o ti xkakʼ ta koʼontontik spasele. Kakʼtik persa sventa masuk to xlekub li kʼusitik xijtojob spasele (Prov. 22:29). Kʼalal mas ep kʼusitik ta jpastik ta stojolal Jeovae, mas chkamigointik xchiʼuk mas xijmuyubajutik (Gal. 6:4). Vaʼun, chijmuyubaj kʼalal oy buchʼu yan chlik sbain li kʼusitik oy toʼox ta koʼontontik spasele (Rom. 12:15; Gal. 5:26).

12. ¿Kʼusi la spas li Melissa xchiʼuk Nick sventa masuk xmuyubajike?

¹² ¿Mi xvul ta joltik li ermana Melissa laj kalbetik skʼoplal ta parafo 2 ti tskʼan ox chbat ta Betel xchiʼuk li ta Chanob vun sventa j-al lekil aʼyejetik yuʼun Ajvalilal yuʼun Diose? Akʼo mi mu xa onoʼox sta li kʼusi oy ta yoʼontone, xi chale: «Ta xkakʼ persa ti bu kʼalal xuʼ kuʼun li ta prekursorale xchiʼuk jeltos ti kʼu yelan ta jchol mantale. Taje ximuyubaj tajek yuʼun». ¿Kʼusi la spas li Nick laj kalbetik skʼoplal ta parafo 3 ti chopol laj yaʼi sba ti muʼyuk laj yichʼ biiltasel ta siervo ministeriale? Xi chale: «Jaʼ laj kakʼ ta koʼonton li cholmantale xchiʼuk ti spatuk oʼontonal li jloʼil chkakʼ ta tsobajele. Jech xtok, la jnojes jun solisitud sventa xibat ta Betel. Kʼalal echʼ jun jabile, la stakikun ta ikʼel».

13. ¿Kʼusi sbalil ta jtatik mi laj kakʼtik tajek persa spasel li kʼusi jbainojtik avie? (Eklesiastes 2:24).

¹³ ¿Mi jaʼ skʼan xal ti oy kʼusi mas chlik jbaintik mi laj kakʼtik tajek persa spasel li kʼusitik jbainojtik avie? Yikʼaluk van tana, jech kʼuchaʼal kʼot ta stojolal li Nicke. Pe mi jech chkʼot ta jtojolaltik kʼuchaʼal li Melissae, xuʼ onoʼox me xijmuyubaj (kʼelo Eklesiastes 2:24). Xijmuyubaj tajek xtok, yuʼun jnaʼojtik ti ep tajek sbalil chil Jesukristo li kʼusi chkakʼtik persa spasele.

14. ¿Kʼusi skʼan teuk ta joltik kʼalal oy kʼusi chkakʼ ta koʼontontik stael ta mantale?

¹⁴ Mi yakal chijtun ta stojolal Jeova ti bu kʼalal xuʼ kuʼuntike, ¿mi jaʼ skʼan xal ti mu xa stakʼ kʼusi mas jpastike? Moʼoj, yuʼun xuʼ oy kʼusi xkakʼ ta koʼontontik spasel ti skoltautik sventa masuk xijtojob ta cholmantal, ta chanubtasvanej xchiʼuk ti jkoltatik li ermanoetike. Tspas kuʼuntik mi bikʼit chkakʼ jbatike xchiʼuk mi jaʼ chkakʼ ta koʼontontik skoltael li yantike (Prov. 11:2; Ech. 20:35).

15. ¿Kʼusitik xuʼ xkakʼ ta koʼontontik stael ti mas xijmuyubaj-o yuʼune?

¹⁵ ¿Kʼusitik xuʼ xkakʼ ta koʼontontik spasel ta mantal? Jkʼanbetik koltael Jeova yoʼ jnaʼtik li kʼusitik spas kuʼuntike (Prov. 16:3; Sant. 1:5). Jech kʼuchaʼal laj yichʼ alel li ta  baʼyel parafoe, ¿mi xuʼ van xijtun ta prekursor auksiliar, ta regular, ta Betel o ta svaʼanel naetik ti bu chichʼ ichʼel ta mukʼ Jeovae? ¿Mi xuʼ jchantik yan kʼop sventa jcholbetik mantal mas krixchanoetik o ti xijbat ta naklej ti bu chtun mas jcholmantaletike? Mi ta jkʼanbetik mas yaʼyejale, xuʼ jchantik li livro Lek chapalutik ta spasbel yabtel  Jeova ta kapitulo 10 xchiʼuk xuʼ xkalbetik li moletik ta jtsobobbailtike. * Kʼalal mas chkakʼ ta koʼontontik spasel li kʼusitik oy ta koʼontontik ta mantale, mas xijmuyubajutik xchiʼuk chakʼik venta yantik ti yakal chijchʼi batel ta mantale.

16. ¿Kʼusi xuʼ jpastik mi mu xuʼ kuʼuntik spasel li kʼusi oy ta koʼontontik staele?

¹⁶ Pe ¿kʼusi xuʼ jpastik mi mu to xuʼ kuʼuntik spasel yaʼeluk li kʼusi laj xa kalbetik skʼoplale? Jaʼ kakʼ ta koʼontontik stael li kʼusi jnaʼojtik ti spas kuʼuntike. Jkʼelbetik batel skʼoplal junchibuk.

17. Jech kʼuchaʼal chal 1 Timoteo 4:13 xchiʼuk 15, ¿kʼusitik xuʼ spas jun ermano sventa masuk to xtojob ta chanubtasvaneje?

¹⁷ (Kʼelo 1 Timoteo 4:13, 15). Mi jaʼot jun ermano ti avichʼoj xa voʼe, xuʼ xavakʼ persa sventa xlekub ti kʼu yelan chavetʼes mantale xchiʼuk ti kʼu yelan chachanubtasvane. ¿Kʼu yuʼun? Yuʼun mi jech la apase, tstabeik tajek sbalil li buchʼutik chchikintabote. Chano xchiʼuk paso ti kʼu yelan chal li foyeto Tojobkutik lek ta xchanel vun xchiʼuk ta chanubtasvanej. Chano li jujun xchanobile, xuʼ xachanilan ta ana kʼu yelan ta pasel xchiʼuk akʼo persa ti jechuk xapas li kʼusi la achan kʼalal chavetʼes junuk mantale. Kʼanbo koltael li moletik ti «tsots ch-abtejik ta skʼopojelik xchiʼuk ti chchanubtasvanike» o kʼanbo koltael li yan jtojobtasvaneje * (1 Tim. 5:17). Mu jaʼuk noʼox xavakʼ ta avoʼonton spasel li kʼusi la achan ta foyetoe, kʼelo kʼuxi xuʼ  xakolta xtok li buchʼutik chaʼiik mantal yoʼ stsatsub xchʼunel yoʼontonik xchiʼuk ti xakʼ ta xkuxlejalik li kʼusi chchanike. Vaʼun, mas me xamuyubaj xchiʼuk chmuyubajik ek li buchʼutik chchikintabote.

18. ¿Kʼusi tskoltautik sventa masuk to xijtojob ta chanubtasvaneje?

¹⁸ Jkotoltik oy ta jbatik xcholel mantal xchiʼuk ti jpastik ta yajtsʼaklom Kristo li krixchanoetike (Mat. 28:19, 20; Rom. 10:14). Mi ta jkʼantik ti masuk to lek spas kuʼuntike, xuʼ jchantik li foyeto Xchanel vun xchiʼuk chanubtasvanej xchiʼuk jpastik li kʼusi ta jchantik batele. Jech xtok, xuʼ jkʼeltik li kʼusitik talem li ta Jkuxlejaltik xchiʼuk Kabteltik sventa Dios, programa xchiʼuk bu chijtsʼibaj xchiʼuk li videoetik ta jkʼeltik li ta tsobajeletik ta xokol kʼakʼal ti chakʼ kiltik kʼuxi xuʼ jlikes jloʼiltike. Mi jelajtik li kʼusitik ta jpastik batele, te chkakʼtik venta li kʼusi mas jtunel ta jterritoriotike. Vaʼun, chijmuyubaj tajek ti mas chlekub ti kʼu yelan chijchanubtasvane (2 Tim. 4:5).

19. ¿Kʼusi xuʼ skoltautik sventa xlekub jtalelaltik?

¹⁹ Tsots skʼoplal xtok ti xkakʼ ta koʼontontik ti xlekub jtalelaltike (Gal. 5:22, 23; Kol. 3:12; 2 Ped. 1:5-8). ¿Kʼuxi xuʼ spas kuʼuntik? Kalbetik junuk skʼelobil. Mi ta jkʼantik ti masuk tsots li xchʼunel koʼontontike, xuʼ jchantik li mantaletik lokʼem ta jvuntik ti jaʼ chalbe skʼoplale. Jech xtok, xuʼ jkʼeltik li videoetik ta JW Broadcasting^® ti chalbe skʼoplal ermanoetik ti tsots laj yakʼ ta ilel xchʼunel yoʼontonik kʼalal oy kʼusi vokol la snuptanike. Laje, jnoptik kʼuxi xuʼ jchanbetik stalelalik.

20. ¿Kʼusi xuʼ jpastik sventa masuk to xijmuyubaj?

²⁰ Ta melel, jkotoltik oy ta koʼontontik ti masuk to xijtun ta stojolal Jeovae. Ta me spas kuʼuntik li ta achʼ balumil yaloj chakʼbutik Diose. Yoʼ to ta jmalatike, jpastik li kʼusi xuʼ kuʼuntik stael avie, va’un mas me xijmuyubaj. Pe li kʼusi mas tsots skʼoplale jaʼ ti jech chkichʼtik-o ta mukʼ Jeova ti jaʼ «li Dios ti xmuyubaje» (1 Tim. 1:11). Jech oxal, muyubajkutik ta sventa li kʼusi spas kuʼuntik ta stojolal Jeovae.