1. Mavọ yen ihwo buebun vwo ruẹ buẹnphiyọ vwẹ ẹga ri Jihova?

 AVWANRE vwo iruo buebun re che ru, rẹ eyeren nana vwo toba re na. (Mat. 24:14; Luk 10:2; 1 Pita 5:2) Avwanre eje guọnọ ga Jihova vọnvọn vwo te asan rẹ ẹgba rẹ avwanre teri. Ihwo buebun hẹrẹ iruo rẹ aghwoghwo rayen phiyọ. Evo guọnọ ga kerẹ ekobaro. Efa guọnọ ga vwẹ Bẹtẹl yẹrẹ vwobọ vwẹ iruo rẹ ebanbọn rẹ ukoko na. Iniọvo eshare buebun davwẹngba rẹ ayen se vwo muwan kerẹ idibo rowian yẹrẹ ekpako. (1 Tim. 3:1, 8) Oma cha nabọ vwerhen Jihova rọ vwọ mrẹ ihwo rọyen re vwomakpahotọ ọphọphẹ!—Une 110:3; Aiz. 6:8.

2. Mavọ yen oma se ru avwanre ọ da dianẹ uphẹn rẹ ẹga rẹ avwanre rhẹro rọyen che se te avwanre obọ-ọ?

² Ofu se dje avwanre ọ da dianẹ ikpe buebun wanvrẹ re, jẹ uphẹn rẹ ẹga rẹ avwanre rhẹro rọyen na ji rhi te avwanre obọ-ọ. Ofu ji se dje avwanre ọ da dianẹ fikirẹ ikpe rẹ avwanre yẹrẹ ẹdia rẹ avwanre hepha, uphẹn rẹ ẹga evo che se te avwanre obọ-ọ. (Isẹ 13:12) Ọnana yen obo re phia kẹ Melissa. * Ọ guọnọ ga vwẹ Bẹtẹl yẹrẹ kpo Isikuru rẹ Ihwo ri Ghwoghwo Uvie Na, ẹkẹvuọvo ọ da ta: “Me vrẹ ikpe na re. Uphẹn tiọyena che se te vwe obọ-ọ. Ọkievo, ofu ko dje vwe.”

3. Die yen ihwo evo che ru tavwen ayen ki se muwan vwọ kẹ uphẹn rẹ ẹga efa?

³ Ighene evo ri vwo omakpokpọ cha ghwanre tedje ji dje iruemu iyoyovwin evo phia tavwen ayen ki se muwan vwọ kẹ uphẹn rẹ ẹga efa. Kerẹ udje, evo re riẹn ẹbe mamọ, re fobọ brorhiẹn, ri ji vwo oruru, ji che yono obo re vwo odirin, obo ra nabọ jomaotọ ruiruo, kugbe obo re muọghọ kẹ ihwo. Wọ da davwẹngba vwo yono enana eje, uphẹn rẹ ẹga evo se rhi te we obọ vwẹ ọke wo rhẹro rọye-en. Roro kpahen  obo re phia kẹ Nick. Ọke rọ vwọ hẹ ẹgbukpe 20, ofu djere mamọ kidie nẹ a reyerọ vwo mu odibo rowia-an. Ọ da ta: “Ki mi roro nẹ emuọvo shechọ vwẹ oma mẹ.” Ẹkẹvuọvo, Nick kuobọ phiyotọ-ọ. Ọ nabọ muomaphiyọ iruo rẹ aghwoghwo na vẹ iruo efa vwevunrẹ ukoko na te asan rẹ ẹgba rọyen teri. Enẹna, ọ ga vwẹ Umẹ Rọvwẹrote Oghọn Ukoko ọvo.

4. Die yen a cha fuẹrẹn vwẹ uyono nana?

⁴ Ofu dje we kidie nẹ uphẹn rẹ ẹga evo ji rhi te we obọ-ọ? Ọ da dia ọtiọyen, gba nẹrhovwo rhe Jihova. (Une 37:5-7) Vwọba, gba nọ iniọvo eshare ri tedje vwọ kẹ iroroẹjẹ rẹ oborẹ wo se vwo ru yovwinphiyọ vwẹ ẹga ri Jihova, wọ me je davwẹngba vwo nene uchebro rayen. Wo de ru ọnana, ọ sa nẹrhẹ uphẹn rẹ ẹga na te we obọ. Ẹkẹvuọvo, kerẹ Melissa ra ta ota kpahen siẹvure, ọkiọvo uphẹn rẹ ẹga ru wọ guọnọ na che se te we obọ enẹna-a. Kẹ, die yen wo che ru? Mavọ yen wọ sa vwọ sẹro rẹ aghọghọ wẹn? Ra vwọ mrẹ ẹkpahọnphiyọ na, uyono nana cha ta ota kpahen (1) asan ra da sa mrẹ aghọghọ, (2) obo ri se toroba aghọghọ wẹn, kugbe (3) oborẹ wọ sa vwọtua ro che toroba aghọghọ wẹn.

5. E se vwo vwo aghọghọ, die yen ofori nẹ a tẹnrovi? (Aghwoghwo 6:9)

⁵ Aghwoghwo 6:9 vuẹ avwanre obo re sa chọn avwanre uko vwo vwo aghọghọ. (Se.) Ohwo rọ ghọghọ fikirẹ “orẹmrẹ rẹ ẹro”  yẹrẹ oborẹ ẹro rọyen mrẹre vwo ọdavwaro kpahen obo ro vwori, kerẹ ẹdia rọ hepha ugege yena. Ẹkẹvuọvo, ohwo rẹ iroro rọyen tighiri kidie nẹ ọ guọnọ obo ro che se vwo-o, che se dje ọdavwaro phia-a. Die yen ọnana yono avwanre? E se vwo vwo aghọghọ, ofori nẹ a tẹnrovi oborẹ avwanre vwori kugbe oborẹ obọ rẹ avwanre se te.

6. Itẹ vọ yen a cha fuẹrẹn enẹna, kẹ die yen e che yono no rhe?

⁶ Obo re vwori sa ghene da avwanre ẹro? Ihwo buebun rorori nẹ ọyena cha sa phia-a, kidie kọke kọke yen ihworakpọ vwọ guọnọ ru erọnvwọn kpokpọ. Ẹkẹvuọvo, obo re vwori sa ghene da avwanre ẹro. Avwanre sa riavwerhen rẹ ekuakua rẹ avwanre vwori enẹna. Mavọ yen e se vwo ruo? E jẹ a fuẹrẹn itẹ rẹ Jesu kperi kpahen igho re se ikpahọ vwẹ Matiu 25:14-30. A cha tẹnrovi oborẹ itẹ na se yono avwanre kpahen obo re se vwo vwo aghọghọ. A je cha mrẹ obo rọ sa vwọ chọn avwanre uko vwo ru omavwerhovwẹn rẹ avwanre ganphiyọ kpahen ebruphiyọ rẹ avwanre vwori enẹna.

7. Ru ọdjẹkoko rẹ itẹ rẹ Jesu kperi kpahen ikpahọ na.

⁷ Vwẹ itẹ na, ọshare ọvo guọnọ kpo asan oshesheri. Tavwen ọ ke yanran, o de se idibo rọyen, ọ da vwẹ ikpahọ kẹ ayen ọvuọvo nẹ ayen vwọ chueki. * Ọshare na riẹnre nẹ ẹgba rẹ idibo rọyen eje dia ọvo-o, ọtiọyena, kọ vwẹ ikpahọ iyorin kẹ ọvo, ọ da vwẹ ivẹ kẹ ọfa, ọ da rha vwẹ ọvo kẹ ọrerha. Ivẹ rẹsosuọ na nabọ chueki je mrẹ erere vwọ kẹ onini rayen. Ẹkẹvuọvo, ọrerha na vwẹ igho rọyen ru emuvuọvo-o, ọnini na da djẹ nẹ ohri rayen.

8. Die yen sa nẹrhẹ oma vwerhen odibo rẹsosuọ na?

⁸ Oma cha nabọ vwerhen odibo rẹsosuọ na, ra vwẹ ikpahọ iyorin kẹ. Igho  obuebun yena djerephia nẹ onini na nabọ vwẹrosuọ! Kẹ odibo rivẹ na vwo? Ofu rhe dje jovwo, kidie ọrọyen bun te ọ rẹ odibo rẹsosuọ na-a. Ẹkẹvuọvo, die yen o ruru?

9. Die yen Jesu jẹ ẹta kpahen odibo rivẹ na? (Matiu 25:22, 23)

⁹ Se Matiu 25:22, 23. Jesu tare nẹ ophu mu odibo rivẹ na yẹrẹ ko phi eta phiyọ evun kidie nẹ a kẹ rẹ ikpahọ ivẹ-ẹ. Jesu je tanẹ odibo na brenu je ta eta tiọna-a: ‘Imigho nana ro te umuku na-a, kọyen onini mẹ vwọ kẹ vwẹ? Mẹvwẹ jẹ ọgbowian kerẹ odibo ra vwẹ ikpahọ iyorin kẹ na! Onini mẹ rhe se vwo ọdavwaro kpahen obo mi ruẹ na-a, me cha tọn igho rọyen phiyọ otọ, rere mi re ruiruo romobọ mẹ.’

10. Die yen odibo rivẹ na reyọ ikpahọ rọyen vwo ru?

¹⁰ Kerẹ odibo rẹsosuọ na, odibo rivẹ na nabọ vwẹ ẹro ọghanghanre vwo ni obo ra vwọ kẹ, ọ da wian gangan vwọ ga onini rọyen. Ukuotọ rọyen, ọ da wian ikpahọ ivẹ efa ba e ra kẹ rẹ. Ọtiọyena, onini na da hwosa kẹ gbidiki. Ọ da nabọ jiro, je vwẹ ewian efa kẹ.

11. Die yen e che ru ro se toroba aghọghọ rẹ avwanre?

¹¹ Vwẹ idjerhe vuọvo na, e se toroba aghọghọ rẹ avwanre siẹrẹ e de muomaphiyọ kiruo kiruo ro te avwanre obọ vwẹ ẹga ri Jihova. Nabọ “gboma phihọ” iruo rẹ aghwoghwo na vẹ ewian rẹ ukoko na. (Iruo 18:5; Hib. 10:24, 25) Muegbe wo ki kpo uyono, rere ẹkpahọnphiyọ wẹn sa vwọ bọn ihwo gan. Vwẹ ẹro ọghanghanre vwo ni ota ra ghare kẹ wẹ vwẹ uyono rẹ uvwre rẹ udughwrẹn. A da kẹ wẹ iruo vwevunrẹ ukoko na, wọ me rha fobọ  te uyono, rere wọ sa vwọ dia ohwo ra sa vwẹrosua. Wọ vwẹ ẹro okueku vwo nẹ iruo ra vwọ kẹ wẹ-ẹ, nabọ muomaphiyọ. Davwẹngba vwo ru ona wẹn yovwinphiyọ. (Isẹ 22:29) Wo che sikẹrẹ Jihova phiyọ siẹrẹ wọ da vwẹ ọkieje vwo muomaphiyọ iruo ra vwọ kẹ wẹ vwevunrẹ ukoko na, omavwerhovwẹn wẹn je cha ganphiyọ. (Gal. 6:4) Ọ je cha nẹrhẹ ọ lọhọ kẹ wẹ wo vwo nene ihwo efa ghọghọ siẹrẹ uphẹn rẹ ẹga ru wọ guọnọre de te ayen obọ.—Rom 12:15; Gal. 5:26.

12. Die yen Melissa vẹ Nick ruru ro toroba aghọghọ rayen?

¹² Wọ karophiyọ oniọvo aye yena re se Melissa rọ guọnọ kpo Bẹtẹl yẹrẹ Isikuru rẹ Ihwo ri Ghwoghwo Uvie Na? Dede nẹ obo rọ guọnọ na te re obọ-ọ, ọ da ta: “Me davwẹngba vwọ nabọ muomaphiyọ iruo rẹ ọkobaro mẹ, je davwen ona rẹ aghwoghwo na eje ra vwọphia. Ọnana toroba aghọghọ mẹ.” Mavọ yen Nick se vwo yerin ghene ẹdia na ọke rẹ ofu vwo dje, kidie nẹ a reyerọ vwo mu odibo rowia-an? Ọ da ta: “Me tẹnrovi oborẹ mi se ru. Mi se kpo aghwoghwo, je nabọ kpahanphiyọ enọ vwẹ uyono. Mi ji ghwobọ phiyọ ifọmu ri Bẹtẹl, e de se vwe vwẹ ukpe rọ vwọ kpahọn.”

13. Erere vọ yen che no rhe siẹrẹ wo de muomaphiyọ oborẹ wo ruẹ enẹna? (Aghwoghwo 2:24)

¹³ Wo che vwo iruo efa vwẹ ọke rọ cha vwẹ obaro na, siẹrẹ wọ da nabọ muomaphiyọ iruo ru vwo ruẹ enẹna? Obo re phia kẹ Nick na je sa phia kẹ wẹ. Yẹrẹ kerẹ Melissa, oma sa nabọ vwerhen owẹ kpahen oborẹ wo ruẹ kẹ Jihova enẹna. (Se Aghwoghwo 2:24.) Vwọ vrẹ ọyena, oma cha vwerhen owẹ mamọ, kidie wọ riẹnre nẹ wo ru oborẹ Jesu Kristi rọ dia Onini rẹ avwanre guọnọre.

14. Vwọ kpahen oborẹ avwanre tẹnrovi vwẹ ẹga ri Jihova, die yen ofori nẹ a karophiyọ?

¹⁴ Kidie nẹ avwanre ruẹ asan rẹ ẹgba rẹ avwanre teri vwẹ ẹga ri Jihova enẹna, ko mudiaphiyọ nẹ a rha sa guọnọ idjerhe efa re vwo ru bunphiyọ vwẹ ẹga ri Jihova-a? Ẹjo kakaka! E jẹ avwanre vwo oboratẹnrovi re cha chọn avwanre uko vwọ dia ighwoghwota re tẹn ona rẹ aghwoghwo vẹ eyono, ri ji vwẹ ukẹcha kẹ iniọvo efa. Avwanre cha yan mu obo ra tẹnrovi ọ da dianẹ e mu ẹwẹn kpahen ra vwọ chọn ihwo efa uko, ukperẹ re vwo roro kpahen omobọ avwanre ọvo.—Isẹ 11:2; Iruo 20:35.

15. Obo ra vwọ tua vọ yen sa nẹrhẹ aghọghọ wẹn bunphiyọ?

¹⁵ Obo ra vwọ tua vọ yen wo se bru kẹ oma wẹn? Nẹrhovwo rhe Jihova nẹ ọ chọn wẹn uko vwọ riẹn ẹkẹn wo se bru kẹ oma je yan muo. (Isẹ 16:3; Jems 1:5) Wọ sa vwọ tua ọvo usun rẹ obo ra tẹnrovi ra ta ota kpahen vwẹ  ẹkorota rẹsosuọ rẹ uyono nana, kerẹ, iruo rẹ ọkobaro ubrọke yẹrẹ ọ rẹ ọkieje, ra vwọ ga vwẹ Bẹtẹl yẹrẹ re vwo vwobọ vwẹ iruo rẹ ebanbọn rẹ ukoko na? Wo ji se yono ejajẹ ọfa rere wo se vwo ghwoghwo vwọ kẹ ihwo rehẹ ekogho efa. Wọ sa riẹn emu efa kpahen obo ra vwọ tua vwẹ uyovwinrota 10 rẹ ọbe na Ukoko ro Ruẹ Ọhọre ri Jihova, wọ je sa ta ota kẹ ekpako rẹ ukoko wẹn. * Wọ vwọ davwẹngba vwọ yan muẹ obo wọ tẹnrovi na, ihwo efa cha mrẹ nẹ wọ yan obaro, aghọghọ wẹn ko ji che bunphiyọ.

16. Die yen wo se ru ọ da dianẹ wọ sa yan mu obo wọ vwọ tua enẹna-a?

 ¹⁶ Ẹkẹvuọvo, ọ da rha dianẹ wọ rha sa yan mu ọvo usun rẹ obo ra vwọ tua ra ta ota kpahen vwẹ uyono nana-a vwo? Gbe bru ẹkẹn ọfa ru wọ sa yan mu kẹ oma wẹn. Roro kpahen obo wo se ru.

17. Vwo nene obo rehẹ 1 Timoti 4:13, 15, mavọ yen oniọvo ọshare sa vwọ dia omamọ rẹ oyono?

¹⁷ Se 1 Timoti 4:13, 15. Wọ da dia oniọvo ọshare ro bromaphiyame re, davwẹngba vwo ru yovwinphiyọ vwẹ eta ra vwọ kẹ wẹ vwẹ ukoko na. Diesorọ? Kidie isese, ota ẹta, vẹ uyono da “reria owẹ oma,” ku wọ sa chọn ihwo re kerhọ wẹn uko. Davwẹngba vwo bru ẹkẹn kẹ oma wo vwo yono ji ru nene iwan ọvuọvo rehẹ ibroshọ na Muomaphiyọ Isese vẹ Eyono. Yono kpahen iwan ọvuọvo, nabọ muegbe vwẹ uwevwin, wọ me je reyọ iwan nana vwo ruiruo vwẹ eta ra vwọ kẹ wẹ. Nokpẹn rẹ iroroẹjẹ vwo mie obruche rẹ ukoko wẹn yẹrẹ ekpako efa “re wian owian rẹ eghwoghwo kugbe uyono.” * (1 Tim. 5:17) Ọ dia wo vwo ru nene uyono rọhẹ ibroshọ na ọvo yen wọ cha tẹnrovi-i, ẹkẹvuọvo, wọ je cha tẹnrovi obo wọ sa vwọ vwẹ ukẹcha vwọ kẹ ihwo re kerhọ wẹn vwọ bọn esegbuyota rayen gan vẹ oborẹ ayen se vwo ru nene oborẹ ayen yonori. Wo de ru ọtiọyen, aghọghọ wẹn vẹ ọ rayen ko bunphiyọ.

18. Die yen sa chọn avwanre uko vwọ yan mu ẹkẹn re bru kẹ oma vwẹ iruo aghwoghwo na?

¹⁸ Avwanre eje vwo iruo re vwo ghwoghwo ji gbe odibo. (Mat. 28:19, 20; Rom 10:14) Wọ guọnọ nabọ tẹn ona rẹ iruo nana rọ pha ghanghanre na? Gbe yono  ibroshọ rẹ Eyono na, wo mi ji bru ẹkẹn evo kiriguo kẹ oma re se chọn wẹn uko vwo ru nene obo wo yonori. Wọ sa mrẹ iroroẹjẹ efa re sa chọn wẹ uko vwẹ Ọbe Uyono rẹ Akpeyeren vẹ Iruo Ruvie Na kugbe ividio rẹ obo wọ sa ta ra reyọ vwọphia vwẹ uyono rẹ uvwre rẹ udughwrẹn na. Davwẹn iroroẹjẹ sansan ni, rere wọ mrẹ e re ma wian kẹ wẹ. Wo de nene iroroẹjẹ nana, ku wọ cha dia omamọ rẹ oyono, ji toroba aghọghọ wẹn.—2 Tim. 4:5.

19. Mavọ yen wo se vwo vwo iwan ra guọnọ mie Onenikristi?

¹⁹ Wọ de roro kpahen ẹkẹn ru wo che bru kẹ oma wẹn, karophiyọ nẹ ọvo usun rẹ ẹkẹn rọ ma ghanre kparobọ wo se bru kẹ oma wẹn yen, wo vwo ru obo re cha nẹrhẹ oma vwerhen Ọghẹnẹ. (Gal. 5:22, 23; Kọl. 3:12; 2 Pita 1:5-8) Mavọ yen wọ sa vwọ yan mu ẹkẹn ru wo bru kẹ oma? Reyọ kerẹ udje nẹ wọ guọnọ ru esegbuyota wẹn ganphiyọ. Wo se se iyovwinreta sansan vwẹ ẹbe avwanre re reyọ iroroẹjẹ evo vwọphia kpahen obo wọ sa vwọ bọn esegbuyota wẹn gan. Wọ je sa mrẹ erere vwo nẹ ẹbẹre sansan rẹ JW Broadcasting^® ri dje oborẹ iniọvo avwanre vwo dje esegbuyota phia ọke rẹ ayen vwo hirharoku ebẹnbẹn sansan. Wo mi ji roro kpahen idjerhe wọ sa vwọ vwẹrokere esegbuyota rayen vwẹ akpeyeren wẹn.

20. Mavọ yen avwanre se vwo toroba aghọghọ avwanre je kẹnoma kẹ ofudjevwe?

²⁰ Aphro herọ-ọ, avwanre eje guọnọ ru bunphiyọ vwẹ ẹga ri Jihova vwọ vrẹ oborẹ avwanre ruẹ enẹna. Vwẹ akpọ kpokpọ na, avwanre cha nabọ ga vọnvọn. Tavwen ọke yena ki te, e jẹ avwanre ru oborẹ avwanre se ru eje, ọnana che toroba aghọghọ rẹ avwanre je nẹrhẹ a kẹnoma kẹ ofudjevwe. Marho kparobọ, avwanre cha ghwa urinrin vẹ ọghọ vwo rhe Jihova rọ dia “Ọghẹnẹ rẹ oma vwerhan na.” (1 Tim. 1:11) Ọtiọyena, e jẹ a mrẹ aghọghọ vwo nẹ kuphẹn kuphẹn rẹ ẹga avwanre vwori!