1. Itthu xeeni anna ni arokora anceene anipaka aya wira avare muteko wa Yehova?

 OKHALA WIRA olumwenku ola onnitepa waattamela wanikisa, nookhalana muteko munceene woovara. (Math. 24:14; Luka 10:2; 1 Ped. 5:2) Tthiri otheene ahu nimphavela ovara muteko wa Yehova mpakha vaniwerya ahu. Nto anna ni arokora anceene annicererya muteko aya woolaleerya. Akina anniphavela okhala mapioneero. Nave aakhala akina aniphavela vanceene orowa orumeela oBetheli wala oteka ipa sinirumeeliwa ni mutthenkeso ahu. Ohiya-vo, anna anceene anniimananiha wira akhale arumeyi ookhaliherya wala axitokweene. (1 Tim. 3:1, 8) Yehova onnihakalala vanceene vaavo onaaweha awe arumeyi awe anceene aphavelaka omurumeela!—Esal. 110:3; Yes. 6:8.

2. Nooneleke sai vaavo nihinwerya ahu ophwanya soolukama sahu sa omunepani?

² Ikwaha sikina onnivira okathi munceene nihiphwannye iparakha naaphavela ahu. Nto eyo pooti onikhulumula. Nave hiyo pooti okhulumuwa mwaha woowi iyaakha nirina ahu khasinneemererya okhalana eparakha eyo wala mwaha wa itthu sikina. (Mir. 13:12) Eyo ti etthu yaamwiiranenle murokora oniihaniwa Melissa. * Owo aaniphavela vanceene orumeela oBetheli wala orowela Exikola ya Anamalaleerya a Omwene. Owo onihimya so: “Vano iyaakha kirina aka khasinikeemererya olepa eformulaario wira kirowele exikola eyo. Tthiri nkinrowa okhalana eparakha eyo. Nto okathi mukina kinniriipiwa murima”.

3. Itthu xeeni atthu akina anireerela aya opaka wira aphwanye iparakha mmutthenkesoni mwa Yehova?

³ Amiravo akina aakhalana mixankiho sikina. Mwa ntakiheryo, amiravo akina annisuwela itthu sinceene, waakuva opaka soothanla, aakhalana ikuru ni anniphavela vanceene ovara muteko wa Yehova. Masi hata vari siiso, awo ahaana wiixutta opixa murima,  ovara muteko oratteene ni waattittimiha atthu akina. Akhala wira munookhalana mikhalelo sooloka, nyuwo munoovahiwa iparakha, woonasa wene okathi muhaalipelela anyu. Nwehe etthu yaamwiiranenle Nick. Okathi aarina awe iyaakha 20, owo aahiriipiwa murima vanceene mwaha woowi khaathanliwa wira okhale murumeyi ookhaliherya. Owo onihimya so: “Miyo kuupuwela wira yookhala etthu yoohiloka kaapaka aka”. Masi Nick khaakhulumunwe. Owo aaniimananiha vanceene ovara miteko sikina mmulokoni ni olaleerya. Olelo-va, Nick onirumeela ntoko membro a Ekomisau ya Efiliyaali.

4. Mwaha ola, ninrowa othokorerya exeeni?

⁴ Niireke nyuwo munniriipiwa murima mwaha woowi khanwenrye ophwanya yoolukama anyu ya omunepani? Akhala wira ti siiso, mmuleele Yehova moonelo anyu. (Esal. 37:5-7) Nave mwaavekeleke anna arina sookumanana sinceene malakiheryo anrowa wookhaliheryani wuncererya muteko muninvarela anyu Yehova. Nuumala-vo, mwiimananiheke ovarihela muteko malakiheryo anrowa aya woovahani. Akhala wira munoopaka eyo, woonasa wene munoovahiwa iparakha aahiiso munoophwanya soolukama sanyu sikina sa omunepani. Masi ntoko Melissa, yoowo nimulavunle ahu wanipacerya, woonasa wene eparakha wala yoolukama mwaaphavela anyu pooti ohiphwanya. Akhala wira ti siiso, munrowa ohihiya sai ohakalala? Wira naakhule nikoho nno, mwaha ola ninrowa oweha (1) etthu enniphwanyiha ohakalala, (2) moota woowuncererya ohakalala wanyu ni (3) soolukama munreerela anyu okhalana wira muncererye ohakalala wanyu.

5. Wira nihakalaleke, etthu xeeni ninreerela ahu owehexexa? (Musuweli 6:9)

⁵ Musuweli 6:9, onnitthokiherya etthu enniphwanyiha ohakalala. (Mmusome) Mutthu onitteeliwa murima mwaha wa itthu oniweha awe, owo onivaha efaita paahi ele orina awe, niire so, onihakalala paahi mwaha wa makhalelo orina awe niinaano-va. Masi mutthu onaavya soophavela sawe, owo oniimananiha waavya ele ohinwerya awe ophwanya. Nniixutta exeeni? Wira nihakalaleke nihaana owehexexa ele erina ahu ni itthu ninwerya ahu ophwanya.

6. Nlikanyiho xeeni ninrowa ahu othokorerye ni ninrowa wiixutta exeeni?

⁶ Niireke tthiri vanniweryaneya ohakalala ni itthu nrina ahu? Atthu anceene anoona wira nnaari, mwaha woowi atthu anceene waasivela opaka itthu sikina wala sa niinaano. Masi musuweleke wira vanniweryaneya ohakalala ni itthu nrina ahu. Ntoko niwenhe ahu, nihimakeleke waavya itthu maitho ahu aniweha aya, masi nihakalaleke ni ele nrina ahu. Ninrowa owerya sai opaka eyo? Wira niwehe waakhuliwa wa nikoho nno, nrowe nithokorerye nlikanyiho Yesu aapanke awe na italento niri Matheyo 25:14-30. Nlikanyiho nno nnooniixuttiha moota wowuncererya ohakalala wahu moovarihana ni makhalelo ahu niinaano-va.

7. Muhimye nlikanyiho Yesu aapanke awe na italento.

⁷ Nlikanyiho na italento, Yesu aahimmye wira mulopwana ole aaphavela weetta mukwaha. Ohinatthi okhuma, owo aahiwiitthana arumeyi awe ni khula mmosa aahinvaha italento wira omweetteke nakoso. * Owo aahisuwela wira khula murumeyi awe aahikhalana mikhalelo sawe ni itthu aasuwela awe. Murumeyi oopacerya aahinvaha italento 5, a nenli aahinvaha italento 2 ni a neeraru aahinvara etalento emosa. Arumeyi anli oopacerya yaahiimananiha ovara muteko wa pwiya aya. Masi murumeyi a neeraru khaapanke etthu, aroopweha paahi musurukhu aavahiwe awe, nto pwiya ole aahimoomola.

8. Etthu xeeni woonasa wene yaarowa omuhakalaliha murumeyi oopacerya a nlikanyiho na Yesu?

 ⁸ Woonasa wene, murumeyi oopacerya aahihakalala vanceene nuumala ovahiwa italento 5 wira omweetteke nakoso. Maana owo aari musurukhu munceene ni waanooniherya wira aaniroromeliwa vanceene ni pwiya awe. Masi, ankhi murumeyi a nenli? Woonasa wene owo aamukhulumuwa, mwaha woowi khavahiwe italento ntoko murumeyi oopacerya. Masi etthu xeeni aapanke awe?

9. Etthu xeeni Yesu aahaahimmye awe voohimya sa murumeyi a nenli? (Matheyo 25:22, 23)

⁹ Mmusome Matheyo 25:22, 23. Yesu khaahimmye wira murumeyi ole aahinyoonyiheya mwaha woovahiwa italento piili paahi. Nave Yesu khaahimmye wira murumeyi ole aaniixinliha ohimyaka wira: ‘Nkinikupali, akivanhe seiya paahi? Miyo kinniimaniha ovara muteko ntoko murumeyi ole anvanhe aya italento 5. Okhala wira pwiya aka khonikivaha efaita kinoothipela italento iya piili akivanhe aya, kavareke miteko saka’.

10. Murumeyi a nenli aapanke exeeni ni italento aavahiwe awe?

¹⁰ Ntoko murumeyi oopacerya, murumeyi a nenli aaniimaniha ovara muteko aavahiwe awe ni omurumeela pwiya awe. Mwaha woopaka eyo, aahiphwanya-tho italento piili. Tthiri owo aahireelihiwa mwaha wa wiimananiha wawe ovara muteko. Ohiya paahi omuhakalaliha pwiya awe, owo aahivahiwa miteko sikina!

11. Munrowa wuncererya sai ohakalala wanyu?

¹¹ Akhala wira nnimwiimananiha ovara oratteene khula muteko ninvahiwa ahu mmutthenkesoni mwa Yehova, nnoohakalalaka vanceene. ‘Mukhaleleke nthiti’ muteko woolaleerya ni mwiimananiheke ovara miteko sikina sa mmulokoni. (Mit. 18:5; aHeeb. 10:24, 25) Muroweke  omuthukumanoni mulokihenrye ene oratteene wira nvaheke ikomentaario soolipiha. Nave mpakeke oratteene mipantta munithanleliwa anyu mithukumano sa eriyari ya esumana. Akhala wira axitokweene annoovekelani ovara muteko mmulokoni, mpeheryeke ni muroromeleyeke. Muhuupuweleke wira khivanireerela oviriha okathi nvaraka muteko nvekeliwe anyu. Okathi wotheene mwiimananiheke olokiherya itthu munisuwela anyu. (Mir. 22:29) Vaavo munrowa anyu wiimananihaka ovara muteko, munookhalana waataana wooloka ni Yehova ni munoohakalalaka vanceene. (aGal. 6:4) Nave eyo enimookhaliheryani ohakalala vaavo atthu akina anivahiwa aya eparakha yeeyo nyuwo mwaaphavela anyu vanceene.—aRom. 12:15; aGal. 5:26.

12. Etthu xeeni Melissa ni Nick yaapanke aya wira yincererye ohakalala waya?

¹² Munnuupuwela wira Melissa aaniphavela vanceene orumeela oBetheli wala orowela Exikola ya Anamalaleerya a Omwene? Owo khowenrye ophwanya soolukama iyo aaphavela awe, masi nwehe ele ohimmye awe oriki: “Kinniimananiha vanceene ovara muteko aka wa opioneera ni kinnikhaliherya inamuna sikina sa olaleerya. Opaka eyo ennikihakalaliha vanceene”. Nick aapanke exeeni vaavo ahaaathanliwa awe okhala murumeyi ookhaliherya? Owo onihimya so: “Miyo kaaniwehexexa eparakha kaarina aka ya wiirela mpantta muteko woolaleerya ni ovaha ikomentaario sooloka okathi wa mithukumano. Nave kaahilepa eformulaario ya orowa orumeela oBetheli, nto mwaakha waattharelana kaahiitthaniwa”.

13. Etthu xeeni enrowa okhumelela akhala wira munniimananiha ovara oratteene muteko murina anyu niinaano-va? (Musuweli 2:24)

¹³ Akhala wira munimwiimananiha ovara oratteene miteko munivahiwa anyu niinaano-va, niireke munoovahiwa miritti sikina muhoolo? Woonasa wene munoovahiwa iparakha sikina ntoko yowiiraneya ya Nick. Masi akhala wira khamuniphwanya ntoko Melissa, muhakalaleke ni mwiimananiheke ovara muteko wa Yehova. (Mmusome Musuweli 2:24.) Etthu ekhanle oowoohakalalihani vanceene, ori osuwela wira Pwiya anyu Yesu Kristu, onnihakalala vanceene vaavo onoowehaaweni mwiimananihaka.

14. Niireke ti voohiloka wiimananiha okhalana soolukama sa omunepani? Mutthokiherye.

¹⁴ Akhala wira niinaano-va ninniimananiha ovara muteko wa Yehova, niireke eyo enitaphulela wira khivanireerela-tho wiimananiha opaka itthu sikina? Nnaari! Nihaana okhalana soolukama sikina somunepani sinrowa onikhaliherya olokiherya muteko ahu woolaleerya ni wiixuttiha ni waakhaliherya anna ni arokora. Masi wira niphwanye soolukama sahu, nihaana okhala atthu aankhili ni oowiisuumaaliha. Ohiya wuupuwela itthu sinniphwanyiha mireerelo hiyo paahi, nihaana wiimananiha waarumeela atthu akina.—Mir. 11:2; Mit. 20:35.

15. Soolukama xeeni munireerela anyu okhalana sinrowa wuncererya ohakalala wanyu?

¹⁵ Soolukama xeeni munireerela anyu okhalana? Munvekele Yehova wira ookhaliheryeni osuwela soolukama muniwerya anyu okhalana ni ophwanya. (Mir. 16:3; Yak. 1:5) Niireke nyuwo pooti  okhala pioneero ookhaliherya, ookilaatheya, orumeela oBetheli wala okhaliherya oteka ipa sinirumeeliwa ni mutthenkeso ahu? Niireke munoowerya wuncererya muteko anyu woolaleerya, wiixutta nttaava nikina wala othaamela elapo ekina wira mwalaleeryeke? Wira nwehe itthu munireerela anyu opaka, nwehe muru 10 wa eliivuru Mutthenkeso Onipaka Otthuna wa Yehova wala nvaanele ni axitokweene a muloko anyu. * Vaavo munrowa anyu wiimananihaka  wira mphwanye soolukama sanyu, atthu akina animoonaka wira munnikela vahoolo momunepani, nto eyo enimuncererya ohakalala wanyu.

16. Etthu xeeni mukhanle anyu oopaka akhala wira niinaano-va khamuniwerya ophwanya yoolukama anyu?

¹⁶ Ankhi akhala wira khamuniwerya ophwanya soolukama iyo sihimmwale? Etthu mukhanle anyu oopaka ori okhalana soolukama sikina muniwerya anyu ophwanya. Nwehe matakiheryo vakhaani anittharelana.

17. Moovarihana ni 1 Timootheyo 4:13, 15, munna ohaana opaka exeeni wira okhale mwiixuttihi ooloka?

¹⁷ Mmusome 1 Timootheyo 4:13, 15. Akhala wira mwa munna oopatisiwa, niireke munniimananiha olokiherya enamuna munilavula anyu mwaha ni wiixuttiha? Mwaha wa xeeni? Mwaha woowi, akhala wira munniimananiha osoma oratteene, olavula myaha oratteene ni wiixuttiha oratteene munimwakhaliherya ale anoowiriyanani. Nto mwiimananiheke osoma ni ovarihela muteko malakiheryo ari ebroxura Mwiilipiheryeke Osoma ni Wiixuttiha. Musomeke oratteene khula yoosoma ni mwinsayariki owaani. Ohiya-vo, vaavo munivahiwa anyu mpantta mwiimananiheke ovarihela muteko ele mwiixuntte anyu. Munvekeleke malakiheryo namavaha miruku ookhaliherya * wala mutokweene mukina, yaawo aniimananiha ‘olavulaka nuulumo na Muluku ni wiixuttihaka’. (1 Tim. 5:17) Yoolakela anyu ehikhaleke paahi osuwela malakiheryo ari ebroxura eyo, masi ekhaleke waakhaliherya ale anoowiriyanani wuncererya waamini waya ni waakhaliherya weettela ele muniwiixuttiha anyu. Akhala wira munoopaka eyo, munimuncererya ohakalala waya.

18. Etthu xeeni enrowa onikhaliherya olokiherya inamuna sahu soolaleerya?

¹⁸ Othene ahu nookhalana muritti woolaleerya ni waapaka awiixutti. (Math. 28:19, 20;  aRom. 10:14) Niireke munniphavela olokiherya inamuna sanyu soovara muteko owo wa efaita yinceene? Akhala wira ti siiso, musomeke ni nvariheleke muteko malakiheryo a ebroxura Osoma ni Wiixuttiha. Nuumala-vo, mukhalaneke yoolukama enrowa wookhaliheryani ovarihela muteko ele mwiixuntte anyu. Okumi ni Orummwa Ahu wa Ekristau Ekadernu—Enirumeeliwa Omuthukumanoni ni iviidiyu sa ovaanela voohimya sa Biibiliya seiyo sinooniheriwa okathi wa mithukumano sa eriyari ya esumana, aakhala malakiheryo anrowa wookhaliheryani olokiherya inamuna sanyu soolaleerya. Nto mmananiheke otthara malakiheryo vakhaani ni nweheke ale anrowa wookhaliheryani vanceene. Akhala wira munootthara malakiheryo awo, eyo enimookhaliheryani okhala mwiixuttihi ooloka ni munoohakalalaka vanceene.—2 Tim. 4:5.

19. Munrowa okhalana sai mikhalelo sa eKristau?

¹⁹ Muhiliyale wira yoolukama ya faita yinceene munreerela anyu okhalana ori okhalana mikhalelo sinimuhakalaliha Yehova. (aGal. 5:22, 23; aKol. 3:12; 2 Ped. 1:5-8) Munrowa owerya sai opaka eyo? Mwa ntakiheryo nuupuwele wira nyuwo muniphavela olipiha waamini wanyu. Akhala wira ti siiso, musomeke iliivuru sahu seiyo sinivaha malakiheryo anrowa wookhaliheryani olipiha waamini wanyu. Nave nweheke iviidiyu sahu siri JW Broadcasting^® seiyo sinooniherya sowiiraneya sa anna ni arokora yaawo yoonihenrye waamini wuulupale okathi wa mixankiho. Nuumala-vo, nweheke moota mukhanle anyu ootakiha waamini waya, mwiira siiso, eyo enimookhaliheryani vanceene mookumini mwanyu.

20. Ninrowa wuncererya sai ohakalala wahu ni ovukula onyoonyiheya?

²⁰ Moohaanyiherya, otheene ahu ninniphavela ovara muteko wa Yehova mpakha vaniwerya ahu. Nto elapo esya hiyo ninrowa omurumeelaka Yehova moomalela. Nlipelelaka ophiya okathi owo, niimananiheke ovara oratteene yoothanleliwa ahu. Niira siiso, nnoohakalalaka ni khaninrowa onyoonyiheyaka. Etthu yootepa otthuneya onvuwiha ni omuhakalaliha Yehova, yoowo ori “Muluku oohakalala”. (1 Tim. 1:11) Nto otheene ahu nihakalaleke ni eparakha nirina ahu!