1. მუს ორთჷ ბრელ თიშო, ნამდა მეტ აკეთას იეჰოვაშ მსახურებას?

 მუთ უმოს ხოლოს რე თე სისტემაშ ბოლო, თით უმოს მეტ საქმე მაფნა ოკეთებელ (მათ. 24:14; ლუკ. 10:2; 1 პეტ. 5:2). ჩქი არძას მოკონა, ნამ შემლებნან, ირფელ გუვაკეთათ იეჰოვაშ მსახურებას. ბრელქ დოთირუ მუშ გეგმეფ დო მსახურებას ასე უმოსის ორთჷ. შხვეფს მიზანო უღნა იმსახურან პიონერო, ბეთელს ვარდა მონაწილება მიღან სამშენებლო პროექტეფს. ბრელ ჯიმაშ მიზან რე, ქიმიაჸუნას თი მოთხოვნეფს, ნამუთ მომსახურეობაშო ვარდა უხუცესობაშო რე საჭირო (1 ტიმ. 3:1, 8). იეჰოვას მანგარო უხარენს გურს, მუჟამსით მუშ ხალხ შქას თეცალ მონდომას ორწყე (ფსალმ. 110:3; ეს. 6:8).

2. მუჭო შილებე დუდ იბგინათ, მუჟამსით ნამთინე სულიერ მიზანშა ვემმაჭირინენა?

² ბრელ ხანიშ მიკულაშ უკულ ჩქინ მიზანშა იშენით ვემმაჭირნეს-და, თექ შილებე გურ გომტახან. გურიშ გოტახუაშ მიზეზ შილებე თინა ხოლო რდას, ნამდა ასაკიშ ვარდა შხვა მდგომარეობაშ გურშენ ნამთინე პასუხიშმგებლობა ვემმაღებენა (იგავ. 13:12). თაშ მოხვად მელისაშ * შემთხვევას. თის მანგარო ოკო ბეთელს მსახურება ვარდა სამეფოშ მახარობელეფიშ სკოლაშ მიკულა, მარა თინა იჩიებ: „თე დანიშნულებეფშო საჭირო ასაკის გინოჩილათირ ვორექ. თაშ ნამდა, თეშე ხვალე ოცნება შემლებ. ათეშენ მინშა გურგოტახილ ვორექ“.

3. მუშ კეთება შილებე ნამთინეს ოსაჭირდას უმოს პასუხიშმგებლობაშ მიოღებელო?

 ³ ნამთინეს, მით ახალგაზრდა რე დო ჯამრთელობა ხოლო ხეს უნწყუნს მეტ პასუხიშმგებლობაშ მიოღებელო, შილებე ოსაჭირდას უმოს მოწიფულობა დო კონკრეტულ თვისებეფიშ გავითარება. მაგალთო, თინეფ შილებე ჭკვერეფ დო მონდომებულეფ რდან დო შეულებდან გადაწყვეტილებაშ ხეთეშე მეღება, მარა ოსაჭირდან მოთვინებაშ გავითარება, საქმეშ უმოს დაკვირებულო კეთება ვარდა შხვეფიშ მიმართ მეტ პატიცემაშ გიმორჩქინა. მუჟამსით თე საჭირო თვისებეფს ყურადღებას ქიმიაქციენთ, შილებე შურო ველუთინ თეშ მიღათ პასუხიშმგებლობეფ. გუვარჩუათ ნიკიშ შემთხვევა. მუჟამსით თინა 20 წანერ რდჷ, მანგარო აფუდ გურ გოტახილ, მუშენდა მომსახურეთ ვედენიშნჷ. თინა იჩიებ: „ფიფქრენდჷ, ნამდა მუდგარენს არასწორო ვორთუდ“. მარა ნიკის ვემუტებ საჭირო თვისებეფიშ გავითარება. თინა მუთ შეულებუდუნ, ირფელს ორთუდ კრებაშო დო სამქადაგებლო საქმეშო. ამდღა ნიკი ფილიალიშ კომიტეტიშ წევრო მსახურენს.

4. მუს გუვარჩიენთ თე სტატიას?

⁴ თიშენ ხომ ვა გაფნა გურ გოტახილ, ნამდა ვემგაჭირნეს ნამთინე სულიერ მიზანშა? თაშ ქორენ-და, ქეჩით თქვან გრძნობეფიშ გურშენ იეჰოვას (ფსალმ. 37:5—7). თეს გეძინელ, ქოთხით მოწიფულ ჯიმალეფს, ქელაიჩან, მუჭო შეილებნა მსახურებაშ გაუჯგუშება დო ირფელ გაკეთით, ნამდა გეგმირინუათ თინეფიშ რჩევეფ. თაშ ქიმიქციებუთ-და, უჯგუშო შეგალებენა თქვან მიზანშა მეჭირნაფა. მარა, მუჭოთ ჟიშე მოშინაფილ მელისაშ შემთხვევაშე იძირე, თქვან მდგომარეობა შილებე ვა გარზენდან საშვალებას, ქიმიოჭირინუათ თი პასუხიშმგებლობას, ნამდგაშე ფიქრენთ. მუ ოკო აკეთათ თეცალ დროს? მუჭო შეგალებენა ვადინუათ ხიოლ? თე კითხვეფშე პასუხეფიშ მიოღებელო თე სტატიას გარჩიებულ იჸუაფ 1) მუს შეულებ მოიღან ხიოლ, 2) მუჭო შეილებნა გიღდან მეტ ხიოლ დო 3) მუ მიზნეფშე შეილებნა იფიქრათ უმოს ხიოლიშ მიოღებელო.

5. მუშა ოკო გინიბღათ ყურადღება ხიოლიშ მიოღებელო? (ეკლ. 6:9)

⁵ მუჭოთ ეკლესიასტეშ 6:9-შე იძირე, ჩქი შემლებნა მიბღათ ხიოლ, მუჟამსით თის სწორ ადგილს ბგორუნთ (წეკითხით). პიროვნება, ნამუთ ხიოლს თიშე ღებულენს, მუდგას ორწყე, აფასენს თის, მუთ უღჷ, მაგალთო, თის, მუდგაშ კეთება ასე შეულებ. თეშ გინაწონს, პიროვნებას, ნამდგას თინა ოკო, მუთ ვემიაღებე, დღას ვაღვენუ ხიოლ. მუს ბგურაფლენთ თავრეშე? ხიოლიშ მიოღებელო საჭირო რე, თიშა გეგნიბღათ ყურადღება, მუთ მიღნა დო მუდგაშ მეჭირნაფა სინამდვილეს შემლებნა.

6. ნამ იგავს გუვარჩიენთ დო მუშა გეგნიბღანთ ყურადღებას?

⁶ ქეშემლებნანო სინამდვილეს, ვორდათ კმაყოფილ თით, მუთ უკვე მიღნა? ბრელ ფიქრენს, ნამდა თენა ვა რე შეიოლებერ, მუშენდა ჩქი მიჸორა ახალ-ახალ საქმეეფიშ გურაფა. მარა თინეფ ჩირთუნა. ჩქი შემლებნა ნამდვილ ხიოლ მიბღათ თი საქმეეფშე, მუდგაშ კეთებაშ საშვალება ასე მიღნა. მუჭო რე თენა შეიოლებერ? თეშ გაგებელო, მორთ გუვარჩუათ ტალანტეფიშ გურშენ იესოშ მოჸუნაფილ იგავ, ნამუთ მათეშ 25:14—30-ის რე ინოჭარილ. ჩქი ყურადღებას თიშა გეგნიბღანთ, მუშ გურაფა შემლებნა თე იგავშე, ნამდა მიღდან ხიოლ დო ხოლო უმოსო მიბღათ თინა ამდღანერ კურთხევეფით.

7. მოკლეთ გენწყით ტალანტეფიშ გურშენ იესოშ მოჸუნაფილ იგავ.

⁷ იესოშ მოჸუნაფილ იგავს ბატონ შორ შარაშა მიშჷ. ულაშახ თიქ მუშ მსახურეფს  დუძახ დო თითოულს ქიმეჩ ტალანტეფ, * ნამდა უმოს ფარა გუკეთებდესკო. თე ბატონს არჩქილედ თინეფიშ შესაძლებლობეფ, ათეშენ ართ მსახურს ხუთ ტალანტ ქიმეჩ, მაჟიას — ჟირ დო მასმას — ართ. პირველ ჟირ მსახურქ ირფელ გაკეთ, ნამდა ბატონშა მოგება ქუძირაფუდკო, მარა მასმა მსახურს მუთუნ ვა უკეთებ თი ფარაშა, ნამუთ მეჩეს, ათეშენ ბატონქ თინა გათავისფალ.

8. მუშენ იჸუაფუდ ბედნერ პირველ მსახურ?

⁸ პირველ მსახურ დუდის პატიგედვალირო ქიგინანდჷ, მუშენდა ბატონქ ხუთ ტალანტ მიანდჷ. თენა დიდ ფარა რდჷ დო ბატონიშ თე საქციელ ოძირანდჷ, ნამდა თის მანგარო ონდუდ. მარა, მუშ რაგად შემლებნა მაჟია მსახურშენ? თის შილებე გურ გოტახუდკო, მუშენდა მუს პირველ მსახურზმა ვემეჩეს. მარა მუჭო მიქცუ თიქ?

9. მუ ვა უთქუალ იგავს მოშინაფილ მაჟია მსახურიშ გურშენ იესოს? (მათ. 25:22, 23)

⁹ წეკითხით მათეშ 25:22, 23. იესოს ვა უთქუალ, ნამდა მაჟია მსახურს გურქ მურთჷ, მუშენდა ხვალე ჟირ ტალანტ მეჩეს, თის ვართ უკმაყოფილება გიმურჩქინუ დო ვა უთქუალ: „ხვალე თენა მუჩესო? მუშენ? მა ხოლო პირველ მსახურცალო ვა მუფშენქო, მიდგას ხუთ ტალანტ მეჩეს?! ჩქიმ ბატონ ვა მაფასენს-და, მა ხოლო დომთხორუნქ თე ფარას დო ჩქიმ დუდშო იმუფშენქ“.

10. მუ ღოლუ მაჟია მსახურქ მუშა მეჩამილ ტალანტეფს?

¹⁰ პირველ მსახურცალო, მაჟიაქ ხოლო სერიოზულო მიღჷ მუშ პასუხიშმგებლობა დო მანგარო ხანდენდჷ ბატონშო. შედეგო, ჟირ ტალანტის მაჟია თისხი ქიმუძინ დო  ოთხო გინაშქვჷ. ბატონქ დაჯილდოვ თე მსახურ მუშ ხანდაშენ დო ხვალე გახარებულ ვა რდუნ, მეტ პასუხიშმგებლობა ხოლო ქიმეჩ თის!

11. მუჭო შემლებნა მიბღათ უმოს ხიოლ?

¹¹ თეშნერო, თქვა ხოლო შეილებნა მიღათ უმოს ხიოლ თით, ნამდა იეჰოვაშ მსახურებას მუდგა პასუხიშმგებლობა ვაიღდანინ, ირფელ გაკეთათ თიშ შეიოსრულებერო. სრულაშო მიღით მონაწილება სამქადაგებლო საქმეს დო ბრელ იხანდით კრებაწკუმა ართო (საქ. 18:5; ებრ. 10:24, 25). მემზადით კრებაშ შეხვალამეფშო, ნამდა თექ გარჩიებულ საკითხეფშე გურიშემაკინალ კომენტარეფ ქოთქუათ. სერიოზულო უჯინით ნებისმიერ დავალებას, ნამუთ შქამარაშ შეხვალამაშო მუგაჩამნა. კრებაშ საქმეეფს მოხვარა ქორთხის-და, რდათ სანდო დო პუნქტუალურეფ. ნამთინ საქმე ვემირჩქინათ უმნიშვნელოთ დო ვეფიქრათ, ნამდა დროშ დათმებაშა ვა ღირჷ. ირნერო ეცადით, გაუჯგუშათ თქვან უნარეფ (იგავ. 22:29). მუთ უმოსო იხანდენთ სულიერ საქმეეფშო დო თქვან დავალებეფშო, თით უმოს მალას მიდურთ წიმი დო მიღენთ უმოს ხიოლს (გალ. 6:4). თეს გეძინელ, უმოს ადვილ გაჸინა, გეხარათ თი დროს, მუჟამსით შხვეფ ღებულენა თი პასუხიშმგებლობას, ნამუთ თქვა გოკოდეს, მიღითკო (რომ. 12:15; გალ. 5:26).

12. მუ აკეთ ჟირ მოწმექ, ნამდა უმოს ხიოლ უღდესკო?

¹² ქიგიფშინათ მელისაშ მაგალით, ნამდგას ბეთელს მსახურება დო სამეფოშ მახარობელეფიშ სკოლაშ მიკულა ოკოდ. თიშ უმკუჯინუო, ნამდა ვეშიალებუ თე მიზნეფშა მეჭირინაფაქ, თინა იჩიებ: „ვოცადუქ, სრულას ვორდე ჩართულ პიონერულ მსახურებას დო შხვადოშხვა მეთოდ გიმიბრინუე. თეს ჩქიმდა მანგარ დიდ ხიოლ მოუღ“. მუჭო გიორჯგინ ნიკიქ გურიშგოტახუას, მუჟამსით თიქ ვედენიშნჷ მომსახურეთ? თინა იჩიებ: „ყურადღება თიშა გინომღუდ, მუდგაშ კეთება შემლებუდ, მაგალთო, მსახურებას მონაწილება დო შეხვალამეფიშ დროს აზრიან კომენტარეფიშ რაგად. თეს გეძინელ შევავსჷ ბეთელიშ ბლანკ დო უკულიან წანას ქუდომძახეს“.

13. თქვან ასეიან დანიშნულებაშო ირფელს ქართუთ-და, მუ შედეგის მიღენთ? (ეკლ. 2:24)

¹³ თქვან ასეიან დანიშნულებაშო ირფელს ქართუთ-და, ქიმიღენთო უმოს მეტ პასუხიშმგებლობას მომავალს? თენა შეიოლებერ რე, მუჭოთ ნიკიშ შემთხვევას მოხვად. მარა თაშ ვეჸუ-და, მუჭოთ მელისაშ შემთხვევას რდჷ, იშენით მეტ ხიოლს მიღენთ დო კმაყოფილ იჸუაფუთ თით, მუდგას იეჰოვაშო ორთუთ (წეკითხით ეკლესიასტეშ 2:24). თეს გეძინელ, მუშო ოკო რაგად, დიდ ხიოლს მოიღანა თიშ რჩქინა, ნამდა გურს უხარენთ ჩქინ ბატონს, იესო ქრისტეს.

14. მუ ოკო ფშუდან სულიერ მიზნეფწკუმა დაკავშირებით?

¹⁴ ყურადღება ჩქინ ასეიან დანიშნულებეფშა მაფდან გინოღალირინ თინა თის ნიშნენსო, ნამდა ვევეცადათ იეჰოვაშ მსახურებას უმოსიშ კეთებას? მუშო ოკო რაგად, ვარ! ჩქი ოკო მიღდან სულიერ მიზნეფ, ნამდა ვორდათ უჯგუშ მაქადაგებელეფ დო მივეხვარათ და დო ჯიმალეფს. მუჟამსით მაღვენუნა რეალურ მიზნეფ, შხვეფიშ მახვარებელო დო ვართ ხოლო ჩქინ დუდშო, შემალებენა თე მიზნეფშა მეჭირნაფა (იგავ. 11:2; საქ. 20:35).

15. ნამ რე თი ნამთინე მიზან, ნამუთ მიგეხვარებნა, უმოს მეტ ხიოლ გიღდან?

¹⁵ მუ მიზნეფ შეილებნა გიღდან? ქოთხით იეჰოვას, ქიმგეხვარან თიშ გაგებას, ნამ მიზნეფიშ მეჭირნაფა შეგალებენა (იგავ. 16:3; იაკ. 1:5). შეილებნანო  პირველ აბზაცის მოშინაფილ ნამთინე მიზანიშ მეჭირნაფა, მაგალთო დამხმარე ვარდა სრულ დროთ პიონერო მსახურება, ბეთელს მსახურება ვარდა თეოკრატიულ მშენებლობეფს მონაწილებაშ მეღება?  შილებე ოქადაგებელო ახალ ნინაშ გურაფა ვარდა შხვა ტერიტორიაშა გინულა შეილებდან. თე მიზნეფიშ გურშენ მეტიშ გაგებელო შეილებნა წეკითხათ წიგნიშ „ორგანიზებულო ვასრულენთ იეჰოვაშ ნებას“ მა-10 დუდ დო ქუდურაგადუათ თქვან კრებაშ უხუცესეფს. * მუჟამსით ეცადებუთ თე მიზნეფშა მეჭირნაფას, თქვან წიმი ულას შხვეფ ხოლო ქოძირნა დო უმოს მეტ ხიოლ გაღვენუნა.

16. მუ ოკო აკეთათ, მუჟამსით კონკრეტულ მიზანიშ მეჭირნაფა ვეშეილებნა?

¹⁶ მარა მუ ოკო აკეთათ, მუჟამსით ჟიშე მოშინაფილ ნამთინ მიზანიშ მეჭირნაფა ვეშეილებნა? თეცალ დროს ჯგირ იჸუაფ, შხვა თიცალ მიზნეფშე იფიქრათ, ნამუთ თქვანო რეალურ რე. გუვარჩუათ თინეფშე ნამთინე.

17. მუჭოთ 1 ტიმოთეშ 4:13, 15-ის ჭარჷ, მუჭო შეულებ ჯიმას, უჯგუშ მასწავლებერო გინირთას?

¹⁷ წეკითხით 1 ტიმოთეშ 4:13, 15. ნათილ ჯიმა ქორეთ-და, შილებე ოცადუდათ თქვან ჩიებაშ დო გურაფაშ უნარეფიშ გაუჯგუშებას, მუშენდა, მუჟამსით ოცადუთ, უჯგუშო იკითხათ, იჩუათ დო ოგურუათ, თეს ჯგირობუა მოუღ თქვან მარჩქილეეფშა. მიზანო გიღდან, გეგმირკვიათ დო გეგმირინუათ ბროშურას „გაუჯგუშ კითხირიშ დო გურაფაშ უნარი“ მოჩამილ რჩევეფ. თითოულ რჩევაშე ცალ-ცალკე ქიმუშეთ, ჸუდეს ქივარჯიშით დო ქეცადით, თინა თქვან მოხსენებაშ დროს გეგმირინუათ. ქოთხით რჩევეფ დამხმარე მრჩეველს * ვარდა შხვა უხუცესეფს, „მით სიტყვაშ დო გურაფაშ საქმეს ბრელს ხანდენა“ (1 ტიმ. 5:17). ყურადღება ხვალე ბროშურას მოჩამილ რჩევეფშა ვარინ, თიშა ხოლო გეგნიღით, ნამდა  მარჩქილეეფს გაუმანგარათ რწმენა დო აღძრათ მოქმედებაშა. თეშნერო, ქოთ თქვა დო ქოთ თქვან მარჩქილეეფ მიღენთ უმოს ხიოლს.

18. მუ მიმეხვარებნა, ნამდა ქადაგებაწკუმა დაკავშირებულ ჩქინ მიზნეფს მივოჭირინუათ?

¹⁸ ჩქი არძას მაფნა დავალებურ, იფქადაგათ დო მუვამზადათ მოწაფეეფ (მათ. 28:19, 20; რომ. 10:14). ქუგოკონანო, ნამდა გაუჯგუშათ თქვან უნარეფ თე მნიშვნელოვან საქმეშო? ბროშურაშ „გაუჯგუშ კითხირიშ დო გურაფაშ უნარი“ გიმორკვიებაშ დროს იფიქრით კონკრეტულ მიზნეფშე, მუთ მიგეხვარებნა ნაგურეფუშ გიმორნაფას. შხვა პრაქტიკულ რჩევეფიშ მეღება შეილებნა „ჩქინ ქრისტიანულ ცხოვრება დო მსახურებაშ ომეცადინებელ ფურცელშე“ დო შქა მარაშ შეხვალამეფს ძირაფილ ჩიებაშ ნიმუშიშ ვიდეოეფშე. ქეცადით გეგმირინუათ შხვადოშხვა ნიმუშ, ნამდა ქოძირათ, ნამ იჸუაფ არძაშ უმოს ეფექტურ თქვან ტერიტორიას. თე რჩევეფიშ მეჸუნათ გეგმოცადუნთ დიდ ხიოლს, მუთ უჯგუშ მასწავლებერო გინორთას მოჸუნს (2 ტიმ. 4:5).

19. მუჭო შეილებნა გავითარათ ქრისტიანულ თვისებეფ?

¹⁹ მუჟამსით მიზნეფშე ფიქრენთ, ვაგგოჭყორდან მთავარქ — ქრისტიანულ თვისებეფიშ გავითარებაქ (გალ. 5:22, 23; კოლ. 3:12; 2 პეტ. 1:5—8). მუჭო შეილებნა თეშ კეთება? მაგალთო, შილებე ძალიერ რწმენაშ გავითარება გოკოდან. თეშ მიოჭირნაფალო შეილებნა წეკითხათ ჩქინ პუბლიკაციეფს მოჩამილ პრაქტიკულ რჩევეფ. მუშო ოკო რაგად, JW მაუწყებლობაშე თი მონაკვეთეფიშ ჯინა ხოლო ქიმგეხვარებნა, სოვრეშეთ იძირე, მუჭო გიმირჩქინეს და დო ჯიმალეფქ რწმენა შხვადოშხვა სირთულეეფიშ დროს. უკულ დეფიქრით, მუჭო შეილებნა თინეფიშ მაგალითიშ მეჸუნა.

20. მუჭო შემლებნა უმოს ხიოლ დო ნაკლებ გურიშგოტახუა მიღდან?

²⁰ მუშო ოკო რაგად, ჩქი არძას მოკონა, იეჰოვაშო უმოს მეტიშ კეთება შემლებდან. ახალ ქვეყნიერებას შემალებენა, ნამდა თის სრულას ვემსახურათ. თეიშახ, ასე ნამ შემლებნან თის გუვაკეთენთ-და, უმოს ხიოლ დო ნაკლებ გურიშგოტახუა მაღვენუნა. მუთ მთავარინ, თეშნერო განვადიდენთ იეჰოვას, ჩქინ ბედნერ ღორონთის (1 ტიმ. 1:11). თაშ ნამდა, ქობძირათ ხიოლ თი საქმეეფს, ნამდგაშ კეთებაშ პატი ასე მიღნა!