NGANI JAKULIJIGANYA 33
Asangalaleje ni Yakukombola Kutenda Pakumtumichila Yehofa
“Kuli kwambone gambaga kuyilola yinduyi ni meso kulekangana ni kuyisakaga mu mtima.”—JWAK. 6:9.
NYIMBO NA. 111 Magongo Gakuŵela Ŵakusangalala
YACHITULIJIGANYE *
1. Ana abale ni alongo ŵajinji akusatenda chichi pakumtumichila Yehofa?
TUKWETE masengo gejinji gatukusosekwa kutenda chilambochi pachisigele panandi kumala. (Mat. 24:14; Luk. 10:2; 1 Pet. 5:2) Wosopewe tukusasaka kutenda yejinji pakumtumichila Yehofa. Abale ni alongo ŵajinji ajonjechesye yakutenda pa utumiki wawo. Ŵane akutenda upayiniya, kutumichila pa Beteli soni kukamuchisya pa masengo gayakutaŵataŵa. Abale ŵajinji akulingalinga kuti aŵe ŵakutumichila ŵakamuchisya kapena achakulungwa ŵamumpingo. (1 Tim. 3:1, 8) Yehofa akusasangalala mnope pakwawona ŵandu ŵakwe ali mkulosya mtima wakusaka kumtumichila jwalakwe.—Sal. 110:3; Yes. 6:8.
2. Ana mpaka tupikane uli mumtima naga yakulinga yetu yakumtumichila Yehofa ngayikukwanilichikwa?
2 Ndaŵi sine mpaka tutenguche ligongo lyakuti yakulinga yetu yakumtumichila Yehofa ngayikukwanilichikwa. Mwine mpaka tutenguchesoni pakuyiwona kuti tukulepela kutenda yindu yine m’gulu ja Yehofaji ligongo lya uchekulu kapena mwayiŵelele yindu paumi ŵetu. (Mis. 13:12) Mwelemu ni muyaŵelele ni mundu jwine jwatugambile kumkolanga kuti Melissa. Jwalakwe jwasakaga kutumichila pa Beteli kapena kwinjila nawo mu Sukulu ja Ŵakulalichila ya Uchimwene. Nambo jwasasile kuti, “Apano ngusile mnope, soni nganimba mbatile upile wakutenda mautumiki gelega. Ndaŵi sine yeleyi yikusandengusya.”
3. Ana ŵandu ŵane atesile yamtuli kuti aŵajilwe mautumiki gane?
3 Ŵachinyamata ŵane ŵakwete chilu chambone mpaka asosekwe kola kaje ndamo sine syambone mkanaŵe kola upile wakutenda mautumiki gane. Mwachisyasyo, jemanjaji mpaka aŵe ŵalunda, ŵakuganisya mwachitema, soni ŵakamula masengo mwakulimbichila. Nambope mpaka asosekwe kulijiganya kuŵa ŵakuwusimana mtima, kukamula masengo mwakusamala soni kwachimbichisya ŵane. Naga akulosya ndamo syelesi, nikuti chachipochela utumiki wakuti atendeje. Soni pakupochela udindo kapena utumikiwo, yichiŵa mpela yakulugono. Aganichisye yayamtendechele M’bale Nick. Ali ni yaka 20, jwatengwiche mnope ligongo lyakuti nganamsagula kuŵa mtumiki jwakamuchisya. Jwalakwe jwatite, “Nalipikanaga kuti mwine pana chindu chinechakwe changulemwa.” Nambope Nick nganawujila panyuma. Jwalipelekaga mnope mumpingo soni pa masengo gakulalichila. Apano m’baleju akutumichila mu Komiti ja Nyambi.
4. Ana chitukambilane chichi munganiji?
4 Ana wawojo ngakusangalala ligongo lyakuti nganaŵape kupochela utumiki wine wakwe wakusawusakaga? Naga yili myoyo, akusosekwa kumsalila Yehofa mwakupikanila mumtima. (Sal. 37:5-7) Nambosoni, mpaka amŵende m’bale jwamkomangale mwausimu kuti ŵakamuchisye kumanyilila yampaka atende kuti aŵajilwe mautumiki gane. Soni akusosekwa kulingalinga kukuya yiŵasalileyo. Naga akutenda yeleyi, nikuti chachikwanilisya chakulinga chawo. Mpela muyaŵelele ni Melissa, mwine apano nganiyiŵa yikomboleche kutenda utumiki wine wakwe wakusawusakaga. Naga yili myoyo, ana mpaka atende uli kuti aŵeje ŵakusangalala? Kuti tupate kwanga kwa chiwusyochi, chitukambilane yindu yakuyichisyayi: (1) yampaka yakamuchisye kuti aŵeje ŵakusangalala, (2) yampaka atende kuti asangalaleje mnope, soni (3) yakulinga yampaka yakamuchisye kuti aŵeje ŵakusangalala.
YAMPAKA YAKAMUCHISYE KUTI AŴEJE ŴAKUSANGALALA
5. Ana tukusosekwa tuganichisyeje mnope yindu yapi kuti tuŵeje ŵakusangalala? (Jwakulalichila 6:9)
5 Pa Jwakulalichila 6:9, pakusala yindu yampaka yitukamuchisye kuti tuŵeje ŵakusangalala. (Aŵalanje.) Mundu jwakusagambaga ‘kulola yindu ni mesope’ akusaŵaga jwakwikutila ni yindu yakwete kapena mwayiŵelele yindu paumi wakwe. Nambo mundu jwakusatamila kuganichisya yakuti apate yindu yineyakwe yanganaŵa ayipatile, ngakusaŵa jwakwikutila. Ana yeleyi yikutujiganya chichi? Kuti tuŵe ŵakusangalala tukusosekwa tuganichisyeje mnope yindu yatukwete, kapena yatukuyiwona kuti yili yakomboleka kuyipata.
6. Ana tukambilane chisyasyo chapi? Nambi chitulijiganye chichi mu chisyasyochi?
6 Ana yili yakomboleka kuŵa ŵakwikutila ni yindu yakwete? Elo. Mwachipago ŵanduwe tukusasaka yindu yasambano. Nambope yili yakomboleka kuŵa ŵakusangalala yisyesyene ni yindu yatukwete. Ana yeleyi mpaka yikomboleche chamtuli? Kuti tupate kwanga kwakwe, kwende tulole yaŵaŵechete Yesu mu chisyasyo cha mbiya sya matalenti chachikusasimanikwa pa Mateyu 5:14-30. Mu chisyasyochi chitulijiganye yampaka yitukamuchisye kuti tuŵeje ŵakusangalala mnope ni yindu yatukwete.
YAMPAKA ATENDE KUTI ASANGALALEJE MNOPE
7. Alondesye mwakata ya chisyasyo chiŵapeleche Yesu chakwamba mbiya sya matalenti.
7 Mu chisyasyo cha Yesu, mundu jwine jwakoseche kuwutanda ulendo. Jwalakwe mkananyakuche jwaŵilasile achikapolo ŵakwe ni kumpa jwalijose matalenti kuti akatendele bisinesi. * Munduju jwalolagasoni yindu yakusakombola kutenda kapolo jwalijose pajika, mwamti jwampele kapolo jwandanda matalenti msano, jwine matalenti gaŵili soni jwatatu talente jimpepe. Achikapolo ŵaŵili ŵandanda ŵasikamulichisye masengo mbiya siŵapochelesi mwalunda. Nambo kapolo jwatatu nganatenda chilichose ni mbiya jiŵapochele jila mwamti masengo gammalile.
8. Ana ligongo chichi kapolo jwandanda jwa mu chisyasyochi jwaliji jwakusangalala?
8 Komboleka kuti kapolo juŵapochele mbiya kandanda jula jwaliji jwakusangalala kuti ampele matelenti gakwana msano. Mbiya jeleji jaliji jejinji soni yalosisye kuti abwana ŵakwe akusamkulupilila mnope jwalakwe. Nambi uli pakwamba ya kapolo jwaŵili jula? Komboleka jukatengwiche ligongo nganapochela mbiya syejinji mpela siŵapochele kapolo jwandanda jula. Nambo ana jwalakwe jwatesile chichi?
Ana mpaka tulijiganye chichi pa yaŵatesile kapolo jwaŵili muchisyasyo cha matalenti? (1) Jwapochele matalenti gaŵili kutyochela kwa abwana ŵakwe. (2) Jwakamwile masengo mwakulimbichila kuti apate mbiya syejinji syakwapa abwana ŵakwe. (3) Jwapochele mbiya siŵili kwa abwana ŵakwe, nambo ŵayiche ni mbiya syakwana mcheche (Alole ndime 9-11)
9. Ana Yesu nganasala chichi pakwamba ya kapolo jwaŵili jula? (Mateyu 25:22, 23)
9 Aŵalanje Mateyu 25:22, 23. Yesu nganasala kuti kapolo jwaŵiliju jwadandawile ni kuŵechetaga kuti, ‘Ligongo chichi agambile kumba mbiya syamnono myiyi? Unesoni ngusakamula masengo mwakulimbichila mpela mwakusatendela jwampele mbiya msano jula. Nambi ligongo chichi atesile yeleyi? Naga abwana ŵangu ngakusayamichila yangusatenda ni kuti mbiya siŵilisi ngambe kusisilila pasi kaneko ndendeje yangusaka.’
10. Ana kapolo jwaŵili jwatesile chichi ni mbiya syaŵapochele?
10 Mpela muyaŵelele ni kapolo jwandanda, kapolo jwaŵiliju jwagaweni masengo gaŵampele abwana ŵakwe kuŵa gakusosekwa, mwamti jwakamwile mwakulimbichila mnope. Yeleyi yatendekasisye kuti pa mbiya siŵili siŵapochele sila awuje ni mbiya mcheche gagaliji mawini ga abwana ŵakwe. Bwanaju ŵamlipile jwamasengoju ligongo lya kulimbichila kwakwe, mwamti jwasangalele ni yajwatesile kapoloju soni ŵampele udindo wine.
11. Ana chichi champaka chitukamuchisye kuti tuŵeje ŵakusangalala mnope?
11 Nombe m’we mpaka tuŵe ŵakusangalala mnope naga tukamula mwakulipeleka utumiki uliwose watupochele m’gulu ja Yehofaji. ‘Apelecheje ndaŵi jawo josope’ pakukamula masengo gakulalichila soni kukamuchisya ni mtima wawo wosope pa yakutendekwa ya pampingo. (Mase. 18:5; Aheb. 10:24, 25) Akosecheleje chenene misongano soni kuja kupeleka ndemanga syakulimbikasya. Naga apochele mbali sya ŵakulijiganya pa misongano ja mkati mwa wiki, akatendaga mpela akwakanganichisya. Soni naga ŵaŵendile kuti akamuchisye nawo pa masengo gane gakwe mumpingo, ayicheje pandaŵi jakwe soni akamuleje masengogo mwakulipeleka. Papochele masengo ganegakwe kuti atende akagambaga kuyiwona mpela kuti yigamba kwamalila ndaŵi jawo. Atendeje yakomboleka kuti agamanyilile chenene masengogo. (Mis. 22:29) Pakukamula mwakulimbichila utumiki uliwose wapochele yikusakamuchisya kuti aŵe paunasi wambone ni Yehofa soni kuŵa ŵakusangalala. (Agal. 6:4) Yeleyi yichakamuchisyasoni kuŵa ŵakusangalala pandaŵi jele ŵane apochele udindo waŵawusakaga wawojo.—Alo. 12:15; Agal. 5:26.
12. Ana ni chichi chachamkamuchisye Mlongo Melissa soni M’bale Nick kuti aŵeje ŵakusangalala mnope?
12 Ana akumkumbuchila Mlongo Melissa juŵasakaga kutumichila pa Beteli jula, soni kwinjila nawo Sukulu ja Ŵakulalichila ya Uchimwene? Atamose kuti yajwasakaga mlongoju yalepeleche nambope jwalakwe jwatite, “Nalimbichilaga kutenda utumiki wangu wa upayiniya soni kulingalinga kukamulichisya masengo matala galigose gakulalichila. Yeleyi yingamuchisye kuti mbeje jwakusangalala.” Ana M’bale Nick jwatumkolasile kundanda kula jwamalene chamtuli ni kutumbila panyuma pakuti nganasagulidwa kuŵa mtumiki jwakamuchisya? Jwalakwe jwatite, “Natanganidwaga mnope ni mautumiki ganakwete, mautumiki gakwe galiji kulalichila soni kupeleka ndemanga syakamula mtima pandili pamisongano. Kaneko nalembile fomu jakuwuchisya utumiki wa pa Beteli, mwamti chaka chakuyichisya ŵanjitichisye.”
13. Ana mpaka papagwe yakuchisya yamtuli naga akutenda utumiki wawo mwakulipeleka? (Jwakulalichila 2:24)
13 Ana mpaka apochelesoni mautumiki gane gakonjechesya naga akulipeleka mnope pa mautumiki gakutenda? Elo, yeleyi mpaka yitendekwe mpela muyaŵelele ni Nick. Nambo naga nganiyitendekwa yeleyi mpela muyaŵelele ni Mlongo Melissa mpaka asosekwe kuŵa ŵakusangalala mnope soni kwikutila ni yindu yakutenda pakumtumichila Yehofa. (Aŵalanje Jwakulalichila 2:24.) Sonitu mpaka aŵe ŵakusangalala mnope pakumanyilila kuti Yesu Klistu ali jwakusangalala pakutuwona tuli mkutenda utumiki wetu mwakulimbichila.
YAKULINGA YAMPAKA YAKAMUCHISYEJE KUTI AŴEJE ŴAKUSANGALALA
14. Ana tukusosekwa kukumbuchila chichi patukuliŵichila yakulinga yausimu?
14 Ana kulipeleka mnope pa utumiki watukutenda kukusagopolela kuti tukasosaga matala gane gakonjechesya utumiki wetu? Ngani nganijiŵa jelejo. Tukusosekwa kuliŵichila yakulinga yampaka yitukamuchisye kuti tuŵe ŵakulalichila ŵambone soni kuti tukomboleje kwakamuchisya abale ni alongo. Yeleyi mpaka yikomboleche naga mwalunda soni mwakulinandiya tukusaganichisyaga ya kwatumichila ŵane mmalo mwakuliganichisya jika.—Mis. 11:2; Mase. 20:35.
15. Ana ni yakulinga yine yapi yampaka yakamuchisye kuti aŵeje ŵakusangalala mnope?
15 Ana mpaka akole yakulinga yapi? Akusosekwa kumŵenda Yehofa kuti ŵakamuchisye kumanyilila yakulinga yampaka akombole kuyikwanilisya. (Mis. 16:3; Yak. 1:5) Ana mpaka atende yakuti akombole kukwanilisya yakulinga mpela yatuyisasile mundime jandanda jila? Paja tusasile yindu yine mpela kutenda upayiniya wakamuchisya kapena wakutamilichika, kutumichila pa Beteli kapena kutenda nawo utumiki wa yakutaŵataŵa. Mwinesoni mpaka alijiganye chiŵecheto chine ni kuja kulalichilaga kudela jine, pambali jeleji mpaka aŵalanje malangiso gakwe mu mtwe 10 wa buku ja Gulu Jakutenda Yakusasaka Yehofa. Nambosoni mpaka aŵechetane ni achakulungwa ŵamumpingo mwawo. * Pakutenda yakomboleka kuti akwanilisye yeleyi ŵandu ŵane chachiyiwona kuti akwawula pasogolo.
16. Ana akusosekwa kutenda chichi naga ŵakwete yakulinga yine yakwe nambo yikukanika kuyikwanilisya?
16 Nambi uli naga yakulinga yatuyisasile munganiji yikukanikape kuti ayikwanilisye? Akusosekwa kulingalingape kukola chakulinga chilichose chakuchiwona kuti wawojo mpaka achikwanilisye. Alinje kuganichisya yindu yine yakuyichisyayi.
Ana ni yakulinga yine yapi yampaka ayikwanilisye? (Alole ndime 17) *
17. Mwakamulana ni 1 Timoteo 4:13, 15, ana m’bale mpaka atende chichi kuti aŵe jwakwiganya jwambone?
17 Aŵalanje 1 Timoteyo 4:13, 15. Naga ali m’bale jwam’batisidwe mpaka atende yakomboleka kuti aŵe jwakwiganya jwambone soni jwakupakombola kuŵecheta. Naga akutenda yeleyi chachakamuchisya ŵakupikanila ŵawo. Alijiganyeje soni kukuya yayili m’kabuku ka Ajongolele pa Kaŵalanje soni Kajiganye. Mpaka atande ni chindu chimo kaneko ni kulinjililaga pali kunyumba soni kutenda yakomboleka kuti yeleyo yikawonechele pakuŵecheta ngani jawo kapena mbali jilijose japochele kumpingo. Akusosekwa kuwusya malangiso kwa jwakwamuka jwakamuchisya kapena kwa achakulungwa ŵamumpingo ŵakusalipeleka mnope pa “kwiganya maloŵe ga Mlungu.” * (1 Tim. 5:17) Pakuŵecheta ngani jawo, nganisyo syawo sikagamba kuŵa pa kukamulichisisya masengo yaŵalasile mkabuku kala. Nambo aganichisyeje mnope yakwakamuchisya ŵakupikanila kuti alimbisyeje mnope chikulupi chawo. Yeleyi yichakamuchisya mnope wawojo ni ŵakupikanila ŵawo kuti aŵeje ŵakusangalala mnope.
Ana ni yakulinga yine yapi yampaka ayikwanilisye? (Alole ndime 18) *
18. Ana ni yakulinga yapi yampaka yakamuchisye kuti alalichileje soni kwiganya chenene pali mu utumiki?
18 Wosopewe tukwete masengo gakulalichila soni kwajiganya ŵane kuti aŵe ŵakulijiganya ŵa Yesu. (Mat. 28:19, 20; Alo. 10:14) Ana akusaka konjechesya lunda lwawo pa masengo gakusosekwa mnopega? Pakulijiganya soni kukamulichisya masengo yayili m’buku ja Ajongolele, akusosekwa akoleje chakulinga. Mpaka apatesoni yindu yine yakamuchisya mkabuku ka Utumiki ni Umi Wetu wa Chiklistu, nambosoni ma fidiyo ga yisyasyo ya kalalichile gatukusalolela pa misongano ja mkati mwa wiki. Alinjeje kukamulichisya masengo matala gakulekanganalekangana kuti apate limo lyampaka lyakamuchisye. Kukuya yatukambileneyi mpaka yakamuchisye kuti aŵe jwakwiganya jwambone nambosoni kuŵa ŵakusangalala.—2 Tim. 4:5.
Ana ni yakulinga yine yapi yampaka ayikwanilisye? (Alole ndime 19) *
19. Ana mpaka atende chichi kuti akole ndamo syasikusamsangalasya Mlungu?
19 Pakuliŵichila yakulinga, akaliŵalilaga kuti chakusosekwa mnope chili kukola ndamo syakumsangalasya Mlungu. (Agal. 5:22, 23; Akolo. 3:12; 2 Pet. 1:5-8) Ana mpaka atende uli kuti akwanilisye chakulinga chawo? Mwachisyasyo tugambe kuwanichisya kuti akusaka kukwanilisya chakulinga chawo. Mpaka asosekwe kuŵalanga ngani sya m’mabuku getu syakusala yindu yampaka yakamuchisye kulimbisya chikulupi chawo. Mpaka apindulesoni mnope naga ali alolele tumbali twine twa mu Broadcasting® twatukusalosya yaŵatesile abale ni alongo ŵane pakulosya kulupichika paŵasimene ni yakusawusya. Kaneko akusosekwa kulola yampaka atende paumi wawo kuti asyasye chikulupi cha jemanjaji.
20. Ana mpaka tutende uli kuti tuŵeje ŵakusangalala?
20 Mwangakayichila wosopewe tukusasaka kutenda yejinji pakumtumichila Yehofa. M’chilambo chasambano ni patuchikombola kumtumichila Yehofa mwakwanila. Nambo naga apano tukutenda yampaka tukombole kuti tumtumichile Yehofa, tuchiŵa ŵakusangalala mnope. Sonitu yeleyi yichichimbichisya Yehofa Mlungu jwetu “jwakusangalala.” (1 Tim. 1:11 NWT.) Myoyo kwende wosopewe tusangalaleje ni utumiki wuliwose watukutenda.
NYIMBO NA. 82 “Lilanguka Lyawo Liŵalile Wosope”
^ ndime 5 Tukusamnonyela mnope Yehofa, soni tukusasaka kutenda yiliyose yampaka tukombole patukumtumichila jwalakwe. Ni ligongo lyakwe tukusasaka konjechesya utumiki wetu kapena kola yakutenda yine mumpingo. Nambi uli naga yakulinga yetu ngayikukwanilichikwa atamose kuti tukulingalinga kuti yikomboleche? Ana chichi champaka chitukamuchisye kuŵa ŵakusangalala pakumtumichila Yehofa? Chitupate kwanga kwa yiwusyoyi kutyochela pa chisyasyo cha Yesu cha matalenti.
^ ndime 7 NGOPOLELO JA MALOŴEGA: Machili ga mbiya ja talenti galandanaga ni malipilo gaŵapochelaga mundu jwakamwile masengo chiŵandika kwa yaka 20.
^ ndime 15 Abale ŵabatisidwe akusalimbikasidwa kutenda yakomboleka kuti aŵajilwe kuŵa atumiki ŵakamuchisya soni achakulungwa ŵamumpingo. Kuti amanyilile yejinji yampaka yakamuchisye kuti aŵajilwe maudindoga, alole mtwe 5 soni 6, m’buku ja Gulu Jakutenda Yakusasaka Yehofa.
^ ndime 17 NGOPOLELO JA MALOŴEGA: Jwakwamuka jwakamuchisya ali jwamkulungwa jwa mumpingo jwakusasagulidwa kuti apelecheje malangiso kwa achakulungwa ŵamumpingo soni atumiki ŵakamuchisya panyuma pakuti aŵechete ngani jawo.
^ ndime 63 KULONDESYA CHIWULILI: M’bale akuwungunya m’mabuku getu yindu yampaka yimkamuchisye kuti akwanilisye chakulinga chakuŵa jwakwiganya jwambone.
^ ndime 65 KULONDESYA CHIWULILI: Mlongo jwakwete chakulinga chakuti alalichileje mwaupile, akumpa kadi jakusala ya webusayiti jetu jwamkongwe jwakupelechela yakulya mu lesitilanti.
^ ndime 67 KULONDESYA CHIWULILI: Mlongo jwine jwakwete chakulinga chakuti alosyeje ndamo sya Chiklistu, akumpa mtuka jwakulupilila mjakwe.
