1. Buidi zikhomba ziwombo badi mu kukivanina mu kisalu ki Yave?

 BEFU tuidi kisalu kiwombo ki kuvanga ava tsukulu nza yiza. (Matai 24:14; Luka 10:2; 1 Pete. 5:2) Befu boso tuntomba kubuela kukivana mu kisalu ki Yave. Diawu bawombo badi mu kubuela kukivana mu kisalu ki kusamuna, mu kuba mintuami ntuala. Bankaka badi mu kukivana muingi kuesadila ku Beteli voti mu kisalu ki kutunga. Ayi zikhomba ziwombo badi mu kuvanga mangolo muingi kuba minsadisi mi bakulutu voti bakulutu ba kimvuka. (1 Timo. 3:1, 8) Bukiedika Yave wunkuangalalanga beni kumona phila dikabu diandi badi mu kukivanina mu kisalu kiandi!—Minku. 110:3; Yesa. 6:8.

2. Buidi tulenda bela boti tuisi nnunga ko kudukisa makani tuidi ma kiphevi?

² Befu tulenda tona kuba mu kiunda, bo vamvioka thangu yiwombo ayi tuisinnunga ko kudukisa makani tuidi ma kiphevi. Voti tulenda ba bavonga mu kuzaba ti phung’itu ayi mambu mankaka ma luzingu malendi ku tubika ko kudukisa makani tuidi. (Zinga. 13:12) Mawu mambu Melissa kamonikina. * Nandi waba tombanga beni kusadila ku Beteli voti kukota kikola ki Minsamuni mi Kintinu, ayi nandi wutuba: “Phung’ami yi yiviokila buabu mu thangu ayiyi makani moso amomo madi buka ndosi to mu minu. Ayi khumbu ziwombo, minu yimbanga beni mu kiunda.”

3. Mambu mbi mantombulu kuvanga muingi kubaka biyeku binkaka mu kimvuka?

³ Matoko mawombo bakhidi mangolo ayi buvinya, balenda tomba lusalusu lu khomba wunyonzuka mu kiphevi muingi kansudikisa buidi kalenda kunina zikhadulu zilenda kunsadisa kubaka biyeku mu kimvuka. Matoko mawombo tuzebi ti badi diela, kibakala, nzunzu ayi mvandi ku fika kolamanga kuvanga mambu mamona. Vayi khumbu zinkaka bawu bantombuluanga kulonguka kukuna mvibudulu ayi mvandi lukinzu. Ngie kusikika mayindu mu kukuna zikhadulu zimboti, ngie wala tambula kiyeku mu kimvuka mu thangu yo ngie wukhambu yindula. Tala kifuani ki  khomba Nick. Mu thangu kaba 20 di mimvu, nandi wuba beni mu kiunda mu thangu bamanga kuntetika mioko muingi kaba nsadisi wu bakulutu. Nandi wuntuba: “Mu thangu beni, yitona kuyindula ti ḿba diambu yaba khambu kuvanganga buboti.” Vayi Nick kasa vonga ko, nandi wuyangalala mu biyeku binkaka kaba. Bubu nandi widi wumueka mu dingumba di Filiali.

4. Mambu mbi tunkuiza tubila mu dilongi adidi?

⁴ Ngie widi mu kiunda kibila wunungiziabu ko kudukisa makani ma kiphevi ngie widi? Boti buawu, zibudila Yave ntim’aku mu nsambu. (Minku. 37:5-7) Mvandi dinda lusalusu kuidi khomba wunyonzuka mu kiphevi muingi ka kusadisa ayi ka kuvana malongi, mu phila wulenda buela kukivanina mu kisalu ki Nzambi ayi sadila malongi ka kuvana. Ngie kulandakana malongi beni, ngie wala nunga kudukisa kiyeku kio ngie wuntombanga. Vayi dedi bo tuma muena mu kifuani ki khomb’itu ya Melissa, vadi biyeku binkaka befu tulendi nunga ko kudukisa mu thangu ayiyi. Buabu mbi bilenda ku tusadisa kutatamana kuba mayangi? Muingi kutambudila kiuvu akioki, dilongi adidi dinkuiza tubila theti, kuidi tulenda bakila (1) mayangi, (2) buidi wulenda buedila mayangi maku ayi (3) makani mbi wulenda sikika muingi kubuela mayangi maku. 

5. Muingi tubaka mayangi, mu mambu mbi tufueti sikika mayindu? (Mpovi 6:9)

⁵ Dedi bummonisana lutangu lu Mpovi 6:9, befu tulenda baka mayangi mu kutombila mawu va kibuangu kidi kifuana. (Tanga.) Mutu wunkuangalala “mu biuma nandi kammona” nandi wumvananga beni luvalu mu biuma bidi yandi mu thangu beni ayi mu mambu kadi mu kuviokila. Vayi mutu wuzinina biuma ka khambu mona wuntatamananga kuyindula ayi kutomba biuma bio nandi kalendi baka ko. Buabu mbi tulenda longuka? Muingi tubaka mayangi, tufueti sikika mayindu mitu mu biuma bidi yitu ayi mu biuma bio befu tulenda nunga kubaka.

6. Nongu mbi tunkuiza fiongunina ayi mu mambu mbi tunkuiza sikika mayindu mitu?

⁶ Bukiedika kuandi ti tulenda ba mayangi mu biuma bidi yitu? Tuzebi ti bumviokila thangu befu tulenda tomba kubaka biuma bimona voti biyeku bimona. Buisi ko bubi kubaka biawu. Befu tulenda kuangalala mu biuma “mesu mitu mammona.” Buidi tulenda vangila mawu? Muingi tuzaba, ndoku tutubilanu nongu Yesu kata yi zitalentu yidi mu Matai 25:14-30. Tunkuiza sikika mayindu mitu mu mambu tulenda longuka mu nongu beni mu matedi kubaka ayi kubuela mayangi mu biyeku tuidi mu thangu ayiyi.

7. Sudikisa mu bukhufi nongu Yesu kata yi zitalentu.

⁷ Mu kifuani ki Yesu dibakala nandi katubila di busina, waba kuenda mu viage. Vayi ava nandi kananguka, wutela mimvika voti bisadi biandi bitatu ayi wuba vana kadika mutu zitalentu muingi bavangila lungoso. * Vayi bo kaba vana zimbongu beni, nandi wutadila kadika mutu luaku ayi mangolo kaba muingi kubutisa zimbongo beni. Diawu nandi kavanina mvika wutheti zitalentu zitanu, mvika wummuadi wutambula zitalentu wadi ayi wuntatu talentu yimueka. Mimvika mi miodi mitheti bavanga nzaki ayi babutisa zimbongo baba vana. Vayi mvika wuntatu kasa vanga ko ni diambu dimvela muingi kubutisa zimbongo bamvana, diawu mfumu’andi kankukisila mu kisalu.

8. Kibila mbi mvika wutheti mu kinongu ki Yesu kabela mayangi?

⁸ Mvika wu theti wuba beni mu mayangi mu luaku lu kutambula zitalentu zitanu kuidi mfumu’andi. Ziawu ziba zimbongu ziwombo katambula ayi mawu maba monisa lufiatu mfumu’andi kaba mu nandi! Buabu mbi tulenda tuba mu  mvika wummuadi? Ḿba nandi khanu wuba mu kiunda mu kukhambu tambula zitalentu zitanu dedi zio mvika wutheti katambula. Vayi bukiedika ti mawu nandi kavanga?

9. Mambu mbi Yesu kakhambu tuba mu matedi mvika wummuadi? (Matai 25:22, 23)

⁹ Tanga Matai 25:22, 23. Yesu kasa tuba ko ti, mvika wummuadi wudasuka voti wutona kutunda kibila kasa tambula ko thalu yi zitalentu dedi zio mvika wutheti katambula. Ayi Yesu kasa tuba ko ti mvika beni wutona kunyunguta mu kutuba ti zitalentu wadi to yibe tambula: ‘Boti minu yidi mvama mangolo dedi mvika wutheti kibila mbi kabe khambu kuphanina zitalentu zitanu? Boti mfumu’ami kaphuanga ko nkinza, buna yinkuiza zika zitalentu ziandi zi wadi ayi minu mvami yinkuiza landakana luzingu luama.’

10. Mbi mvika wummuadi kavanga mu zitalentu katambula?

¹⁰ Dedi mvika wutheti, mvika wummuadi wukivana mu kiyeku katambula ayi wusala beni mu kubutisa zimbongo katambula kuidi mfumu’andi. Kutsuka nandi wubue butisa zitalentu wadi kubika kuandi zio katambula. Ayi nandi wutambula lusakumunu luwombo. Mfumu’andi kasa kuangalala ko to mu kisalu kimboti nandi kavanga, vayi mvandi wukamba mvik’andi ti wuba wufuana muingi kubue tambula biyeku binkaka!

11. Buidi tulenda buedila mayangi mitu?

¹¹ Bo buawu mvandi befu tulenda buela mayangi mitu mu kukivana mu kioso kua kiyeku baku tuvana muingi kuvanga mu kisalu ki Yave. Wu “kivana mu kisalu ki kusamuna” ayi mvandi mu bisalu binkaka bi kimvuka. (Mava. 18:5; Ebe. 10:24, 25) Bo wunkuenda mu zikhutukunu, kubamanga  bumboti mu mambu wunkuiza longuka ayi vana mimvutu minkuiza kindisa bankaka. Kubamanga mvandi bumboti mu kioso kua kiyeku wunkuiza vanga mu lukutukunu lumvangamanga va khati sabala. Boti lusalusu babe kudinda mu kioso kua kiyeku mu kimvuka, vitila mu thangu ayi vangila kiawu mu phila yimboti. Bika kulenza kioso kua kiyeku ba kuvana mu kuyindula ti, thangu kuandi yibobo wunkuiza bungisa ayi tatamana kuvanga mamgolo muingi wubuela pisika mu biyeku binkaka. (Zinga. 22:29) Bo wu kivana mu bisalu bi kiphevi ayi biyeku wuntambula, buawu ngie wunkuiza fika yonzukila mu kiphevi ayi mayangi maku mvandi mankuiza buelama. (Ngala. 6:4) Mvandi mala kusadisa ku kuangalala mu thangu bankaka bantambula biyeku bio nige wuntomba kutambula.—Loma 12:15; Ngala. 5:26.

12. Mambu mbi khomba Melissa ayi Nick bavanga muingi babuela mayangi mawu?

¹² Ngie wuntebuka monyo khomba Melissa tube tubila va thonono waba tomba kusadila ku Beteli ayi kukota kikola ki Minsamuni mi Kintinu? Kheti nandi kasa nunga ko kudukisa makani amomo, vayi nandi wuntuba: “Minu yivanga mangolo mu kukivana mu kisalu ki ntuami ntuala ayi mu bisalu binkaka bi kimvuka. Kuvanga mawu mathuadisa beni mayangi.” Ayi mvandi wuntebuka monyo khomba Nick wuba mu mua thangu mu kiunda bo bamanga fika kunsola muingi kaba nsadisi wu bakulutu ba kimvuka? “Nandi wusikika thalu mu biyeku biba yandi mu thangu yinani,—wu kivana mu kisalu ki kusamuna ayi waba kubamanga buboti mu zikhutukunu muingi kuvana mimvutu mi khindusulu. Bosi wuwesa nkanda muingi kusadila ku Beteli ayi bo vavioka mvu mueka to bantumisa muingi kue sadila ku Beteli.”

13. Ndandu mbi wala baka ngie tatamana kukivana mu kiyeku widi bubu? (Mpovi 2:24)

¹³ Boti ngie wu kukivananga mu kiyeku widi mu thangu ayiyi, mansundula ti ngie wunkuiza buela tambula biyeku binkaka mu bilumbu binkuiza kuntuala? Mawu malenda monika dedi bo mamonikina kuidi Nick. Vayi kheti wisi ntambula ko biyeku binkaka dedi bo bu monikina kuidi khomb’itu Melissa, mayangi maku mala tatamana kubuelama ayi luzingu luaku luala buela kuba tsundu kibila ngie widi mu kununga kubuela mioko kisalu ki Yave. (Tanga Mpovi 2:24.) Vayi bulutidi ngie wala ba beni mu mayangi mu kuzaba ti, mangolo maku widi mu kuvanga madi mu kukuangidika mfumu’itu Yesu Klisto.

14. Mu matedi makani mitu ma kiphevi mbi tufueti tatamana kusikika mayindu?

¹⁴ Bukiedika ti kusikika mayindu mitu mu biyeku tuidi bubu mansundula ti tulendi bue tomba ko ziphila zinkaka muingi buela kukivana mu kisalu ki Yave? Ndamba! Befu tulenda ayi tufueti sikika makani mankaka ma kiphevi malenda kutusadisa kutatamana kusikika thalu’itu kuntuala ayi mvandi kuvanga mangolo muingi kubuela kifuza kitu mu kisalu ki kusamuna ayi kukivana mu ziphila zinkaka muingi kusadisa zikhomba zitu zi babakala ayi zi bakieto. Bo tumbaka makani manduenga ayi madi mu kitesu kitu mu matedi kusadisa bankaka kubika kuandi kukitadila to mu befu veka, befu tuala luta baka mayangi.—Zinga. 11:2; Mava. 20:35

15. Makani mbi wulenda sikika muingi wu buela mayangi maku?

¹⁵ Makani mbi ngie wulenda sikika? Dinda kuidi Yave mu nsambu muingi ka kusadisa kuyindula makani mo ngie welenda nunga kudukisa. (Zinga. 16:3; Yako. 1:5) Wulenda yindula mu makani tube  tubila mu lutangu lutheti mu dilongi adidi, —ḿba kusala buka nsadisi wu mintuami ntuala, kuba ntuami ntuala, kuesadila ku Beteli voti mu kisalu ki kutunga. Mvandi wulenda longuka mbembu yinkaka muingi wubuela kusamuna zitsangu zimboti kuidi bankaka voti kue samuna ku kizunga ove ku tsi yinkaka.  Ngie wulenda longuka ziphila zinkaka wulenda kukivanina mu kutanga kapu 10 yi buku Organizados Para Fazer a Vontade de Jeová voti kudinda lusalusu kuidi bakulutu ba kimvuka. * Bo wumvanga mangolo muingi kudukisa makani amomo, ndionsukulu’aku yala monikina kuidi batu boso ayi mayangi maku mala buelama.

16. Mbi wulenda vanga boti wisinnunga ko kudukisa makani wusikika?

¹⁶ Buabu boti ngie wulendi nunga ko kudukisa makani tube tubila kumbusa? Mbi wulenda vanga, ngie wulenda tomba kudukisa makani mankaka madi mu kitesu kiaku. Tala mua makani wulenda nunga, tuantubila mu matangu manlanda.

17. Dedi bummonisina 1 Timoteo 4:13, 15, mbi bilenda sadisa khomba kubuela pisuka mu kulonga?

¹⁷ Tanga 1 Timoteo 4:13, 15. Boti ngie widi khomba yi dibakala mabotama, ngie welenda vanga mangolo muingi kubuela pisuka mu kulonga. Mu kibila mbi? Kibila bo wu kivana muingi kubuela pisuka kutanga, kukoluka na batu ayi kulonga, luawu luala ba lusakumunu lunneni kuidi batu ba kukuwa. Diawu meka kusikika makani ma kulonguka dilongi dimueka dimueka mu mua buku Buela Pusuka mu Kutanga ayi Kulonga. Bo wunlonguka kadika dilongi, vanga mangolo muingi kusadila mambu bantuba mu biyeku biaku. Mvandi yuwa malongi ba kuvana kuidi nkulutu wumvananga malongi bo bammana kuvanga biyeku voti kuidi bakulutu bankaka mu kimvuka bake “bapisuka mu kusamuna ayi kulonga.”  * (1 Timo. 5:17) Bika to kusikika makani maku mu kuvisa dilongi vayi mvandi tomba  buidi wulenda sadila malongi beni, muingi kusadisa batu ba kukuwa ayi kukindisa kiminu kiawu muingi kuba sadisa babaka makani mamboti mu luzingu. Bo wumvanga mawu, mayangi maku mala buelama ayi batu ba kukuwa bala kuangalala.

18. Mbi bilenda kutusadisa kudukisa makani mitu mu matedi kisalu ki kusamuna?

¹⁸ Befu boso tutambula kiyeku ki kusamuna ayi kuvanga minlonguki. (Matai 28:19, 20; Loma 10:14) Ngie tidi buela pisuka mu kisalu akioki ki nkinza beni? Sikika makani mu kulonguka ayi kusadila mambu tunlongukanga mu mua buku Buela pisuka mu kulonga. Ngie wulenda baka mvandi zithuadusulu zinkaka, mu Thuadusulu’itu yi Lukutukunu tumbanga va khati sabala ayi mu masolo ma zi video tunlandakananga mu lukutukunu va khati sabala. Meka ziphila zioso aziozi ayi tomba kubakula phila mbi widi tsuakulu yi fika sadila. Bukiedika ngie kulandakana zithuadusulu beni, ngie wala buela mayangi maku ayi wala ba nsamuni wupisuka.—2 Timo. 4:5.

19. Sudikisa buidi wulenda kunina zikhadulu zi mbutu wu phevi yinlongo.

¹⁹ Mu thangu wunsikika makani mo fueti dukisa, bika kuzimbakana mvandi nkinza wu kukuna zikhadulu zi mbutu wu phevi yinlongo. (Ngala. 5:22, 23; Kolo. 3:12; 2 Pete. 1:5-8) Buidi wulenda vangila mawu? Yindulabu ti ngie tidi kubuela kindisa kiminu kiaku. Muingi kununga kuvanga mawu, ngie wulenda tanga bilongulu bitu bimvana zithuadusulu mu phila wulenda kindisila kiminu kiaku. Ayi mvandi wala baka ndandu mu kulandakana zi video zi JW Broadcasting^® zinsudikisa buidi zikhomba zitu bamonisina kiminu kiawu kheti mu thangu baviokila mu mambu ma phasi. Bosi ngie wulenda yindula buidi wulenda landikinina kifuani kiawu ki kiminu mu luzingu luaku.

20. Buidi tulenda buedila mayangi mitu ayi kudekula mayindu ma kiunda?

²⁰ Bukiedika, befu boso tuntomba mu thangu ayiyi kubuela kukivana mu kisalu ki Yave. Mu nza yimona yi Nzambi, befu tuala baka luaku lu kunsadila mu phila tuntombila. Vayi mu thangu ayiyi, tusadila buboti loso kua luaku tuidi muingi kuvanga kioso kua kiyeku kidi yitu. Befu kuvanga mawu, tuala buela mayangi mitu ayi mvandi kudekula mayindu ma kiunda tulenda ba. Ayi buluti tuala zitisa ayi tuala “kembisa Yave Nzamb’itu yi mayangi.” (1 Timo. 1:11) Diawu zikhomba, tuyangalalanu mu biyeku tuidi!