1. ¿Baʼax ku beetik yaʼab sukuʼunoʼob utiaʼal u maas meyajtikoʼob Jéeoba?

TEʼ TU tsʼook kʼiinoʼobaʼ yaʼab meyaj yaan utiaʼal beetbil (Mat. 24:14; Luc. 10:2; 1 Ped. 5:2). Le oʼolaleʼ tuláakloʼon k-kʼáat k-maas meyajt Jéeoba le bukaʼaj ku páajtal toʼoneʼ. Yaʼab sukuʼunoʼobeʼ tsʼoʼok u chʼaʼtuklik u beetik u precursoriloʼob, u binoʼob meyaj Betel wa u meyajoʼob tiʼ construcción. Uláakʼ sukuʼunoʼob xaneʼ táan u tsʼáaik u yóoloʼob utiaʼal u beetik u siervo ministerialiloʼob wa u ancianoiloʼob (1 Tim. 3:1, 8). Jéeobaeʼ jach ku kiʼimaktal u yóol kéen u yil chúukaʼan u yóol le máaxoʼob meyajtikoʼ (Sal. 110:3; Isa. 6:8).

2. ¿Bix jeʼel k-uʼuyikba wa maʼ tu páajtal k-beetik le baʼax tsʼoʼok k-chʼaʼtuklikoʼ?

² Chéen baʼaleʼ maʼ xaaneʼ jeʼel u lúubul k-óol wa k-ilik tsʼoʼok u máan tiempo maʼ béeyak k-beetik le baʼax k-tukultmoʼ. Wa maʼ xaaneʼ ku yaatal k-óol tumen tu yoʼolal k-jaʼabil wa uláakʼ baʼaloʼobeʼ maʼ tu páajtal k-beetik jujunpʼéel meyajoʼob ichil u kaajal Jéeoba (Pro. 13:12). Melissa, * juntúul kiik taak u bin kaʼach Betel wa teʼ Escuela utiaʼal Máaxoʼob Kʼaʼaytik le Reinooʼ, ku yaʼalik: «Yaan kʼiineʼ ku lúubul in wóol tumen tu yoʼolal in jaʼabileʼ tsʼoʼok u pʼáatal maʼ tu páajtal in beetik le kaʼapʼéel baʼaloʼobaʼ».

3. Maʼ xaaneʼ, ¿baʼax kʼaʼabéet u beetik jujuntúul sukuʼunoʼob utiaʼal ka tsʼaʼabak u beetoʼob jujunpʼéel meyajoʼob?

³ Yaan sukuʼunoʼobeʼ táankelmoʼob yéetel maʼ kʼojaʼanoʼobiʼ, chéen baʼaleʼ utiaʼal u tsʼaʼabal u beetoʼob jujunpʼéel meyajoʼob  ichil u kaajal Dioseʼ táanileʼ kʼaʼabéet u kʼantal u tuukuloʼob yéetel u kanik u yeʼesoʼob jatsʼuts modosoʼob. Maʼ xaaneʼ yaan u naʼatoʼob yéetel u kʼáat u maas meyajtoʼob Jéeoba, chéen baʼaleʼ kʼaʼabéet u kanik u yeʼesoʼob paciencia, u beetoʼob maʼalob le meyaj ku kʼubéentaʼaltiʼoboʼ yéetel u respetarkoʼob u maasil. Wa ku tsʼáaik u yóoloʼob utiaʼal u yantaltiʼob le jatsʼuts modosoʼobaʼ kéen máanak tiempoeʼ jeʼel u tsʼaʼabal u beetoʼob jujunpʼéel meyajoʼob ichil u kaajal Dioseʼ. Koʼox ilik baʼax úuch tiʼ Nick. Le yaan 20 años tiʼoʼ lúub u yóol tumen maʼ tsʼaʼab u beet u siervo ministerialiliʼ. Letiʼeʼ ku yaʼalik: «Tin tuklaj yaan baʼax kʼaas kin beetik kaʼacheʼ». Chéen baʼaleʼ u maʼalobileʼ letiʼeʼ tu tsʼáaj u yóol u beet tuláakal le ku páajtal teʼ kʼaʼaytaj yéetel teʼ múuchʼuliloʼ. Bejlaʼeʼ tiʼ ku meyaj tiʼ junpʼéel u Comitéil Sucursaleʼ.

4. ¿Baʼax ken k-il teʼ xookaʼ?

⁴ ¿Lubaʼan wa k-óol tumen maʼ béeychajak junpʼéel baʼal k-tsʼíiboltik k-beetik kaʼachiʼ? Wa beyoʼ maʼalob ka k-aʼal tiʼ Jéeoba bix k-uʼuyikba (Sal. 37:5-7). Jeʼel u páajtal xan k-aʼalik tiʼ juntúul sukuʼun chúukaʼan u yóol tiʼ Jéeobaeʼ utiaʼal ka u yaʼaltoʼon baʼax jeʼel u páajtal k-maas maʼalobkíintik ichil k-kuxtaleʼ, tsʼoʼoleʼ kʼaʼabéet k-tsʼáaik k-óol k-beet le baʼax ku yaʼaliktoʼonoʼ. Wa k-beetik beyoʼ maʼ xaaneʼ yaan k-ilik bix u béeytal le baʼax taak k-beetkoʼ. Chéen baʼaleʼ, ¿kux túun wa deporsi maʼ tu páajtal k-beetik jeʼex úuchik tiʼ Melissaoʼ? ¿Baʼax jeʼel k-beetik utiaʼal maʼ u xuʼulul u kiʼimaktal k-óoleʼ? Teʼ xookaʼ yaan k-xakʼaltik óoxpʼéel baʼaloʼob. Yáaxeʼ ¿baʼax jeʼel u yáantkoʼon utiaʼal u kiʼimaktal k-óoleʼ? U kaʼapʼéeleʼ, ¿baʼax jeʼel k-beetik utiaʼal ka maas yanaktoʼon kiʼimak óolaleʼ? Yéetel u yóoxpʼéeleʼ, ¿baʼax metasil jeʼel u páajtal k-tsʼáaik ichil k-kuxtal utiaʼal ka maas kiʼimakchajak k-óoleʼ?

5. Wa k-kʼáat ka kiʼimakchajak k-óoleʼ, ¿tiʼ baʼax kʼaʼabéet k-chʼikik k-tuukul? (Eclesiastés 6:9).

⁵ Wa k-kʼáat ka kiʼimakchajak k-óoleʼ kʼaʼabéet k-beetik le baʼax ku yaʼalik Eclesiastés 6:9 (xoke). Le máax ku disfrutartik «le baʼaxoʼob táan u yilkoʼ» kiʼimak u yóol yéetel le baʼaxoʼob yaantiʼoʼ, chéen baʼaleʼ le máax ku bin «tu paach le baʼaxoʼob ku tsʼíiboltikoʼ» mix baʼal kiʼimakkúuntik u yóol. ¿Baʼax ku kaʼansiktoʼon lelaʼ? Wa k-kʼáat ka kiʼimakchajak k-óoleʼ kʼaʼabéet u chʼíikil k-tuukul tiʼ le baʼaxoʼob yaantoʼonoʼ maʼ tiʼ le baʼaxoʼob minaʼantoʼonoʼ.

6. ¿Baʼax tsikbalil ken k-xakʼalte, yéetel baʼax ken k-kane?

⁶ ¿Jeʼel wa u páajtal u kiʼimaktal k-óol yéetel le baʼaxoʼob yaantoʼonoʼ? Jeʼeleʼ, tsʼoʼoleʼ jeʼel u páajtal xan u disfrutartik máakeʼ. ¿Bix jeʼel k-beetik lelaʼ? Utiaʼal k-ojéeltikeʼ koʼox xakʼaltik le baʼax tu tsikbaltaj Jesús teʼ Mateo 25:14-30. Teʼeloʼ yaan k-kanik baʼax jeʼel u páajtal k-beetik utiaʼal u maas kiʼimaktal k-óol yéetel le baʼaxoʼob yaantoʼonoʼ.

7. ¿Baʼax tu tsikbaltaj Jesús?

⁷ Jesúseʼ tu tsikbalteʼ juntúul máakeʼ antes u bin viajeeʼ tu tʼanaj u esclavoʼobeʼ ka tu tsʼáajtiʼob u bolsasil taakʼin utiaʼal u meyajtikoʼob. * Tiʼ juntúul esclavoeʼ tu tsʼáaj cinco u bolsasil taakʼin, tiʼ le uláakʼ juntúuloʼ kaʼapʼéel bolsa yéetel tiʼ u tsʼookoʼ junpʼéel bolsa, según le tu yilaj ku páajtal u meyajtikoʼoboʼ. Le yáax kaʼatúul esclavoʼoboʼ tu tsʼáaj u yóoloʼob meyajeʼ ka tu ganartoʼob u maasil taakʼin. Chéen baʼaleʼ le u tsʼook esclavooʼ maʼ tu náajaltaj mix baʼal yéetel le taakʼin tsʼaʼabtiʼoʼ, le oʼolaleʼ jóoʼsaʼab tumen le tsʼuuloʼ.

8. ¿Baʼaxten jach kiʼimakchaj wal u yóol le yáax esclavooʼ?

 ⁸ Maʼ xaaneʼ le yáax esclavooʼ jach kiʼimakchaj u yóol ka tu yilaj u tsʼaʼabaltiʼ cinco u bolsasil taakʼin, tumen leloʼ ku yeʼesikeʼ jach ku confiar u tsʼuulil tiʼ letiʼ. ¿Kux túun le u kaʼatúul esclavooʼ? ¿Lúub wa u yóol le ka tu yilaj maʼ tsʼaʼab tiʼ letiʼ le bukaʼaj taakʼin tsʼaʼab tiʼ le yáaxoʼ? Koʼox ilik baʼax tu beetaj.

9. ¿Baʼax maʼ tu yaʼalaj Jesús yoʼolal le u kaʼatúul esclavooʼ? (Mateo 25:22, 23).

⁹ (Xok Mateo 25:22, 23). Jesúseʼ maʼ tu yaʼalaj wa le u kaʼatúul esclavooʼ tsʼíikilnaj tumen chéen kaʼapʼéel bolsa taakʼin tsʼaʼabtiʼ. Maʼ xan tu yaʼalaj wa le esclavooʼ tu tuklaj: «¿Chéen wa letiʼe bukaʼaj kun tsʼaabiltenaʼ? Si teneʼ láayliʼ xan jach j-meeyjileneʼ. Wa in tsʼuulil maʼ tu apreciarkeneʼ maas maʼalob ka in muk le kaʼapʼéel bolsa taakʼinaʼ ka in beet yaanal baʼal».

10. ¿Baʼax tu beetaj le u kaʼatúul esclavo yéetel le taakʼin tsʼaʼabtiʼoʼ?

¹⁰ Jeʼex tu beetil le yáax esclavooʼ le u kaʼatúuloʼ jach tu tsʼáaj xan u yóol meyaj, le oʼolaleʼ tu náajaltaj uláakʼ kaʼapʼéel bolsa taakʼin. Le tsʼuuloʼ jach kiʼimakchaj u yóol yoʼolal le baʼax tu beetoʼ ka tu tsʼáajtiʼ u maasil meyaj.

11. ¿Baʼax jeʼel u yáantkoʼon utiaʼal ka maas kiʼimakchajak k-óoleʼ?

¹¹ Utiaʼal u kiʼimaktal k-óol xaneʼ jach kʼaʼabéet k-tsʼáaik k-óol k-beet jeʼel baʼaxak meyajil ichil u kaajal Dioseʼ. Maʼalob ka k-beet tuláakal le ku páajtal utiaʼal k-táakpajal teʼ kʼaʼaytaj yéetel tiʼ uláakʼ meyajoʼob kʼaʼabéet teʼ múuchʼuliloʼ (Hech. 18:5; Heb. 10:24, 25). Unaj k-preparartikba xan maʼalob utiaʼal k-comentar teʼ  muchʼtáambaloʼoboʼ beyoʼ yaan k-líiʼsik u yóol u maasil. Maʼalob xan ka k-líiʼsba tubeel yéetel tuláakal le asignaciónoʼob ku tsʼaʼabaltoʼon teʼ múuchʼuliloʼ. Wa ku kʼáataʼal xan toʼon ka k-beet wa baʼax meyajileʼ maʼalob ka k-jóoʼs tiempo utiaʼal k-beetik, beyoʼ u maasileʼ yaan u confiaroʼob tiʼ toʼon. Maʼ unaj k-tuklikeʼ wa le baʼax ku kʼáataʼaltoʼonoʼ maʼ kʼaʼanaʼaniʼ, le oʼolal maʼ kʼaʼabéet k-tsʼáaik k-óol k-beetiʼ. Baʼaxeʼ unaj k-tsʼáaik k-óol k-beet maʼalob jeʼel baʼaxak meyajil ka tsʼaʼabaktoʼoneʼ (Pro. 22:29). Wa k-beetik beyoʼ yaan u tsʼaʼabaltoʼon k-beet u maasil meyajoʼob yéetel jach yaan u kiʼimaktal k-óol (Gál. 6:4). Tsʼoʼoleʼ yaan u kiʼimaktal k-óol le kéen k-il u tsʼaʼabal tiʼ yaanal sukuʼun le meyaj jatsʼuts k-ilik kaʼachoʼ (Rom. 12:15; Gál. 5:26).

12. ¿Baʼax tu beetaj Melissa yéetel Nick utiaʼal u maas kiʼimaktal u yóoloʼob?

¹² Melissa, le kiik t-chʼaʼchiʼitaj teʼ párrafo 2 taak u bin kaʼach Betel wa teʼ Escuela utiaʼal Máaxoʼob Kʼaʼaytik le Reinooʼ, maʼ béeychaj u beetik mix junpʼéel tiʼ le meyajoʼobaʼ. ¿Baʼax túun tu beetaj? Letiʼeʼ ku yaʼalik: «Tin tsʼáaj in wóol in beet in precursorail yéetel in táakpajal tiʼ le jejeláas bix u yúuchul kʼaʼaytajoʼ, leloʼ jach tu beetaj u kiʼimaktal in wóol». Nick, le sukuʼun t-chʼaʼchiʼitaj teʼ párrafo 3 maʼ tsʼaʼab u beet u siervo ministerialiloʼ, ku yaʼalik: «Teneʼ maas chʼíiken in beet le baʼaxoʼob jeʼel u páajtal in beetkoʼ, jeʼex in táakpajal teʼ kʼaʼaytajoʼ yéetel in comentar teʼ muchʼtáambaloʼoboʼ. Tsʼoʼoleʼ tin chupaj in solicitud utiaʼal in bin Betel, maʼ úuch tiʼ leloʼ tʼaʼanen utiaʼal ka xiʼikeniʼ».

13. ¿Baʼax jeʼel u yúuchul wa k-tsʼáaik k-óol k-beet le meyaj tsʼaʼantoʼonoʼ? (Eclesiastés 2:24).

¹³ ¿U kʼáat wa túun u yaʼaleʼ wa k-tsʼáaik k-óol k-beet le meyaj tsʼaʼantoʼonoʼ yaan u tsʼaʼabaltoʼon u maasil meyaj k-beete? Maʼ xaaneʼ jeʼeleʼ, jeʼex úuchik tiʼ Nickeʼ. Chéen baʼaleʼ wa maʼ tu tsʼaʼabaltoʼon, jeʼex úuchik tiʼ Melissaeʼ, unaj u kiʼimaktal k-óol tumen k-ojel táan k-beetik le ku páajtal utiaʼal k-tsʼoʼokbesik le meyaj u kʼubéentmajtoʼon Jesucristooʼ (xok Eclesiastés 2:24).

14. Kex k-tsʼaamaj k-óol k-meyajt Jéeobaeʼ, ¿baʼax uláakʼ metas jeʼel u páajtal k-tsʼáaik ichil k-kuxtaleʼ?

¹⁴ Wa k-tsʼaamaj k-óol k-meyajt Jéeobaeʼ, ¿u kʼáat wa u yaʼaleʼ maʼ tu páajtal k-beetik u maasil? Maʼatech. Jeʼel u páajtal k-tsʼáaik uláakʼ metas ichil k-kuxtaleʼ, jeʼex k-maas maʼalobkíintik bix k-kʼaʼaytaj, bix k-kaʼansaj yéetel k-maas tsʼáaik k-óol k-áant le sukuʼunoʼoboʼ. Lelaʼ jeʼel u páajtal k-beetik wa k-eʼesik naʼatil, wa kabal k-óol bey xan wa k-tsʼáaik táanil u yutsil u maasil (Pro. 11:2; Hech. 20:35).

15. ¿Baʼax metasil jeʼel u beetik u maas kiʼimaktal k-óoleʼ?

¹⁵ Utiaʼal k-ilik baʼax metasil jeʼel u páajtal k-tsʼáaik ichil k-kuxtaleʼ maʼalob ka k-kʼáat u yáantaj Jéeoba (Pro. 16:3; Sant. 1:5). Maʼ xaaneʼ jeʼel u páajtal k-chʼaʼtuklik k-beetik k-precursor auxiliaril, regularil, k-bin meyaj Betel wa tiʼ construcción. Maʼ xaan xaneʼ jeʼel k-chʼaʼtuklik k-kanik uláakʼ idiomaeʼ wa k-bin tiʼ junpʼéel lugar tuʼux maas kʼaʼabéet áantaj. Yoʼolal le metasaʼ jeʼel u páajtal k-tʼaan yéetel le ancianoʼoboʼ wa k-xokik le capítulo 10 tiʼ le libro Organizados para hacer la voluntad de Jehová. * Wa k-tsʼáaik k-óol k-beet le baʼax tsʼoʼok k-chʼaʼtuklikoʼ yaan u maas kiʼimaktal k-óol, yéetel u maasileʼ yaan u tsʼáaikoʼob cuenta.

16. ¿Baʼax jeʼel u páajtal k-beetik wa yaan junpʼéel meta maʼ tu páajtal k-tsʼoʼokbesikeʼ?

¹⁶ ¿Kux túun wa maʼ tu páajtal k-beetik mix junpʼéel tiʼ le baʼaxoʼob tsʼoʼok k-aʼalikoʼ? Jeʼel u  páajtal k-beetik uláakʼ baʼaloʼobeʼ. Koʼoneʼex ilik jujunpʼéeliʼ.

17. Jeʼex u yaʼalik 1 Timoteo 4:13, 15, ¿baʼaxoʼob jeʼel u páajtal u beetik juntúul sukuʼun utiaʼal u maas maʼalobkíintik u kaʼansajeʼ?

¹⁷ (Xok 1 Timoteo 4:13, 15). Le sukuʼunoʼob okjaʼanajaʼanoʼoboʼ jeʼel u páajtal u tsʼáaik u yóoloʼob u maas maʼalobkíint bix u discursaroʼobeʼ yéetel bix u kaʼansajoʼobeʼ. Wa ku maas tsʼáaik u yóol u maʼalobkíintoʼob bix u xookoʼob, bix u kaʼansajoʼob yéetel bix u máanskoʼob discursoʼobeʼ yaan u béeytal u yáantkoʼob u maasil. Le oʼolaleʼ chʼaʼtukult a maas xakʼalxook, yéetel cada ken tocarnaktech a máansik junpʼéel discursoeʼ ilawil a beetik le baʼax ku yaʼalik le folleto Tsʼáa a wóol xook yéetel kaʼansajoʼ. Xakʼalxokt cada junpʼéel tiʼ le xookoʼob ku taaskoʼ, ensayarnen yaʼab u téenel, yéetel cada ken a máans junpʼéel discursoeʼ ilawil a beetik le baʼax tsʼoʼok a kanikoʼ. Jeʼel u páajtal xan a waʼalik tiʼ le máax tsolnuʼuktik le sukuʼunoʼob * ka u yáantechoʼ wa a kʼáatik áantaj tiʼ uláakʼ ancianoʼob jach u tsʼaamaj «u yóoloʼob u tsikbaltoʼob yéetel u kaʼansoʼob u tʼaan Diosoʼ» (1 Tim. 5:17). Chéen baʼaleʼ maʼ chéen unaj a wilik a beetik le baʼax ku yaʼalik le folletooʼ, baʼaxeʼ ilawil a muʼukʼaʼankúuntik u fe le máaxoʼob uʼuyikechoʼ yéetel ka u tsʼáa ichil u kuxtaloʼob le baʼax ku kankoʼoboʼ. Beyoʼ techeʼ yaan u maas kiʼimaktal a wóol, yéetel le máaxoʼob uʼuyikechoʼ yaan xan u kiʼimaktal u yóoloʼob.

18. ¿Baʼax jeʼel u yáantkoʼon k-beet maas maʼalob le meyaj kʼubéentaʼantoʼonoʼ?

¹⁸ Tuláakal le máaxoʼob meyajtik Diosoʼ unaj u kʼaʼaytajoʼob yéetel u beetkoʼob discípuloʼob (Mat. 28:19, 20; Rom. 10:14). Wa k-kʼáat k-maas kan bix jeʼel k-beetik le meyaj kʼubéentaʼantoʼonaʼ  jeʼel u páajtal k-xakʼaltik le folleto Kaʼansajoʼ yéetel k-ilik k-beetik le baʼax ku yaʼalikoʼ. Jeʼel u páajtal xan k-ilik le baʼax ku kaʼansiktoʼon U juʼunil xook utiaʼal u muchʼtáambalil Kuxtal yéetel Meyaj jeʼex Cristoeʼ bey xan le videoʼob ku yeʼeskoʼob bix jeʼel k-káajsik k-tsikbal yéetel le máakoʼoboʼ. Tsʼoʼoleʼ maʼalob ka k-il máakalmáak jeʼel u meyajtoʼon teʼ tuʼux k-kʼaʼaytajoʼ. Wa k-beetik lelaʼ yaan u kiʼimaktal k-óol tumen yaan u maas maʼalobtal bix k-kaʼansaj (2 Tim. 4:5).

19. ¿Baʼax jeʼel u yáantkoʼon k-eʼes jatsʼuts modoseʼ? Tsʼáa junpʼéel ejemplo.

¹⁹ Junpʼéel tiʼ le baʼaxoʼob maas unaj k-ilik k-beetkoʼ letiʼe u yantaltoʼon jatsʼuts modosoʼ (Gál. 5:22, 23; Col. 3:12; 2 Ped. 1:5-8). ¿Baʼax jeʼel u yáantkoʼoneʼ? Koʼox aʼalikeʼ k-kʼáat ka muʼukʼaʼanchajak k-fe, utiaʼal lelaʼ maʼalob ka k-xakʼalt xookoʼob ku tʼaanoʼob tiʼ le fejoʼ. Maʼalob xan ka k-chaʼant teʼ JW Broadcasting^® u experiencia le sukuʼunoʼob tu yeʼesoʼob muʼukʼaʼan u fejoʼob ka yanchaj u aktáantkoʼob wa baʼax ichil u kuxtaloʼoboʼ, tsʼoʼoleʼ maʼalob ka k-il k-beetik jeʼex letiʼobeʼ.

20. ¿Baʼax unaj k-beetik utiaʼal u kiʼimaktal k-óol yéetel maʼ k-sen chiʼichnaktal?

²⁰ U jaajileʼ tuláakloʼon k-kʼáat k-maas meyajt Jéeoba teʼ kʼiinoʼobaʼ, chéen baʼaleʼ chéen teʼ túumben luʼum kun béeytal k-meyajtik jeʼex taak k-beetkoʼ. Mientras u kʼuchul le kʼiinaʼ unaj k-aprovechartik tuláakal súutukil utiaʼal k-meyajtik. Beyoʼ yaan u maas kiʼimaktal k-óol, maʼ ten k-chiʼichnaktal yéetel yaan k-alabartik Jéeoba, «le Dios kiʼimak u yóoloʼ» (1 Tim. 1:11). Jeʼex tsʼoʼok k-ilkoʼ unaj u kiʼimaktal k-óol tumen táan k-beetik tuláakal le ku páajtal utiaʼal k-meyajtik Jéeobaoʼ.