1. ¿Xi cayuni stale hermanu para gúnicaʼ jma lu xhiiñaʼ Jehová?

 MAYACA guinitilú guidxilayú riʼ ne nuu stale dxiiñaʼ ni gúninu (Mat. 24:14; Luc. 10:2; 1 Ped. 5:2). Guiranu racaláʼdxinu gúninu ni ná Jehová biaʼ gándatiʼ. Stale tu laa maʼ cayuni ni. Nuu tu laa napa meta gaca precursor, guni servir Betel o gacané ra cabí ca yoo ni riquiiñeʼ para gaca adorar Jehová. Ne stale hermanu cayuni stipa gaca siervu ministerial o ancianu (1 Tim. 3:1, 8). Nánnanu guizáʼ riecheʼ Jehová ora ruuyaʼ cayuni ca xpinni xhiiñaʼ (Sal. 110:3; Is. 6:8).

2. ¿Ximodo zándaca guni sentirnu pa qué ugaandanu xiixa meta?

² Zándaca guireʼnu gana pa maʼ gudiʼdiʼ stale tiempu ne caʼruʼ ugaandanu ca meta stinu o zándaca chuʼnu triste purtiʼ qué ganda gúninu jma ndaaniʼ xquidxi Jehová purtiʼ maʼ huaniisinu o pur sti cosa (Prov. 13:12). Nga peʼ nga ni bizaaca Melissa, * hermana riʼ ñuulaʼdxiʼ ñuni servir Betel o ñé Escuela para Evangelizadores del Reino. Sicaríʼ guniʼbe: «Nannaʼ maʼ qué zanda ugaandaʼ ca meta riʼ purtiʼ maʼ huaniiseʼ, ne nuu biaje rireeʼ gana».

3. ¿Xi zándaca naquiiñeʼ guni caadxi hermanu para ugandacaʼ xiixa privilegiu?

³ Nuu caadxi joven nazaaca, peru para ganda gápacaʼ xiixa privilegiu, primé naquiiñeʼ gusihuínnicabe caadxi cualidad. Zándaca nuu xpiaanicabe, dáʼcabe gana,  peru naquiiñeʼ guiziidicabe gápacabe paciencia ne gúnicabe xhiiñacabe jneza. Pa gúnicabe stipa gusihuínnicabe ca cualidad riʼ, zándaca guicaacabe xiixa responsabilidad ora cadi cabézacabe ni. Guidúʼyanu ni bizaaca Nick. Dxi nápabe 20 iza guyuube triste purtiʼ qué ñuni nombrárcabe laabe siervu ministerial. Laabe guniʼbe: «Guníʼ iqueʼ nuu xiixa cadi cayuneʼ jneza». Peru qué nireebe gana, jma gucuá íquebe gacanebe ndaaniʼ congregación ne guni predicarbe. Tiempu riʼ maʼ nuube lu Comité stiʼ ti Sucursal.

4. ¿Xi zadúʼyanu lu artículo riʼ?

⁴ ¿Ñee careʼnu gana purtiʼ caʼruʼ ugaandanu xiixa meta la? Pa zacá ni, gábinu Jehová ximodo cayuni sentirnu (Sal. 37:5-7). Guinínenu ca hermanu ni napa experiencia para gábicaʼ laanu xiruʼ zanda gúninu ne gúninu stipa chinándanu ca conseju stícabe. Pa gúninu ni, zándaca ugaandanu meta ni gudixhe íquenu. Peru pa cazaacanu ni bizaaca Melissa, ne maʼ qué zanda gúninu ni ñuuláʼdxinu ñúninu lu xhiiñaʼ Jehová, ¿xi zacané laanu para cadi gusaana de chuʼnu nayecheʼ yaʼ? Para guicábinu pregunta riʼ, lu artículo riʼ zadúʼyanu chonna cosa ni zacané laanu. Primé, ¿xi zacané laanu chuʼnu nayecheʼ? Guiropa, ¿xi naquiiñeʼ gúninu para chuʼnu jma nayecheʼ? Ne guionna, ¿xi meta naquiiñeʼ gápanu para chuʼnu jma nayecheʼ?

5. ¿Xi naquiiñeʼ guicá íquenu para chuʼnu nayecheʼ? (Eclesiastés 6:9).

⁵ Pa racaláʼdxinu chuʼnu nayecheʼ, naquiiñeʼ gúninu ni ná Eclesiastés 6:9 (biindaʼ ni). Ti binni ni riuu nayecheʼ pur ni randa ruuyaʼ rusisaca ca cosa ni napa ne modo nabani. Peru binni ni canazá cheríʼ chericaʼ canazánanda ni riuulaʼdxiʼ siempre culuíʼlaʼdxi gapa cosa ni qué zanda gapa. ¿Xi rusiidiʼ ndiʼ laanu? Pa racaláʼdxinu chuʼnu nayecheʼ naquiiñeʼ guicá íquenu ca cosa ni nápanu ne cadi ca cosa ni qué zanda ugaandanu.

6. ¿Xi parábola chiguidúʼyanu ne xi zazíʼdinu?

⁶ ¿Ñee zanda chuʼnu nayecheʼ né biaʼ nápanu la? Stale binni riníʼ coʼ, purtiʼ riuuláʼdxiruʼ guiziidiʼ ne guni xcaadxi cosa, peru zanda chuʼnu nayecheʼ ne ni nápanu. ¿Ximodo yaʼ? Para gánnanu ni, guidúʼyanu parábola stiʼ ca talentu ni bizeeteʼ Jesús ni zeeda lu Mateo 25:14-30. Zazíʼdinu xi naquiiñeʼ gúninu para chuʼnu nayecheʼ ne chuʼnu jma nayecheʼ modo tiica si nabáninu.

7. Bizeeteʼ parábola ni guníʼ Jesús stiʼ ca talentu.

⁷ Lu parábola ni guníʼ Jesús, bizeeteʼ de ti hombre ni cheʼ sti guidxi. Ante chebe, biseendacaabe ca esclavu stibe ne bidiibe cada tobi de laacaʼ talentu para gúnicaʼ negocio. * Bidiibe tobi de laacaʼ gaayuʼ talentu, ne stobi bidiibe chupa, ne stobi bidiibe tobi, bidiibe cada tobi biaʼ laa. Ni gucuaa gaayuʼ ne ni gucuaa chupa talentu que, bíʼnicaʼ dxiiñaʼ ne biʼniʼ ganarcaʼ jma bueltu para xpixuaanacaʼ. Peru guionna esclavu ni gucuaa ti talentu que, qué ñuni gastiʼ, ngue runi guladxi xpixuaanaʼ laa.

8. ¿Xiñee guyuu primé esclavu ni riete lu parábola que nayecheʼ?

⁸ Zándaca biecheʼ primé esclavu ni gucuaa gaayuʼ talentu que. Cumu stale  bueltu ngue la? bisihuinni ni pabiáʼ confianza napa xpixuaanabe laabe. ¿Xi zanda guininu de guiropa esclavu que yaʼ? Ñándaca ñuube triste purtiʼ jma huaxiéʼ talentu gucuaabe que primé que, peru ¿xi bíʼnibe yaʼ?

9. ¿Xi qué ñuni guiropa esclavu que? (Mateo 25:22, 23).

⁹ (Biindaʼ Mateo 25:22, 23). Qué niníʼ diʼ Jesús bidxiichi guiropa esclavu que purtiʼ chupa si talentu bidii xpixuaanaʼ laa. Ne qué nuzeeteʼ diʼ Jesús, guníʼ esclavu que sicaríʼ: «¡Xiñee ndiʼ si bidiibe naa pue! ¿Cadi laaca runeʼ dxiiñaʼ cásica runi ni gucuaa gaayuʼ talentu ca la? pa qué rusisaca xpixuaanaʼ naa, chigucaacheʼ guiropaʼ talentu riʼ ne chiguneʼ dxiiñaʼ stinneʼ».

10. ¿Xi biʼniʼ guiropa esclavu que né ca talentu ni gucuaa?

¹⁰ Cásica primé esclavu que, guiropa que laaca bisisaca dxiiñaʼ ni gucuaa ne guizáʼ biʼniʼ dxiiñaʼ para xpixuaanaʼ ne pur dxiiñaʼ bíʼnibe, biʼniʼ ganarbe xhupa talentu. Bisisaca xpixuaanabe dxiiñaʼ ni bíʼnibe ne bidii laabe jma dxiiñaʼ.

11. ¿Xi zanda gúninu para chuʼnu jma nayecheʼ?

¹¹ Zaqueca nga laanu, zanda chuʼnu jma nayecheʼ pa gúninu stale stipa guni cumplirnu dxiiñaʼ ni gudiicabe laanu lu xhiiñaʼ Jehová. Guni predicarnu jma ne gacanenu ndaaniʼ congregación stinu dede biaʼ gándatiʼ (Hech. 18:5; Heb. 10:24, 25). Gaca preparar chaahuinu para cuʼnu gana ca hermanu ra guni comentarnu. Guni cumplirnu né ca asignación  ni gudiicabe laanu lu reunión ni raca ndaaniʼ semana. Pa gábicabe laanu gacanenu gaca xiixa dxiiñaʼ ndaaniʼ congregación, gúninu stipa gácanu puntual ne guni cumplirnu. Cadi guiníʼ íquenu huaxiéʼ risaca xiixa dxiiñaʼ ne gusaananu ni para despué. Gúninu stipa pur gúninu xhiiñanu jma jneza (Prov. 22:29). Ra jma gúninu xhiiñaʼ Jehová, jma ziuʼnu gaxha de laa ne jma nayecheʼ ziuʼnu (Gál. 6:4). Ne qué zaca nagana para laanu guiéchenu ora guicaa xcaadxi xiixa privilegiu ni ñuuláʼdxinu nicaanu (Rom. 12:15; Gál. 5:26).

12. ¿Xi biʼniʼ Melissa ne Nick para chuʼcaʼ jma nayecheʼ?

¹² Guininu de Melissa, hermana ni bizéʼtenu lu párrafo chupa que, ni ñuulaʼdxiʼ ñé Betel o ñé Escuela para Evangelizadores del Reino. Neca qué zanda ugaandabe ca meta riʼ, laabe guniʼbe: «Runeʼ dxiiñaʼ de precursora de guidubi naca ladxiduáʼ ne runeʼ participar lu xcaadxi modo raca predicar, ndiʼ nabé rusiecheʼ naa». ¿Ne xi biʼniʼ Nick, hermanu ni bizéʼtenu lu párrafo chonna que, ni qué ñuni nombrárcabe laa siervu ministerial yaʼ? Laabe guniʼbe: «Jma gucuá iqueʼ guneʼ predicar ne gudieeʼ comentariu ni uguu gana ca hermanu lu ca reunión ca. Laaca bichayaʼ solicitud para chaaʼ Betel, sti iza que biʼniʼ invitárcabe naa».

13. ¿Xi zazaaca pa gúninu stipa pur gúninu jma lu xhiiñaʼ Jehová yanna? (Eclesiastés 2:24).

¹³ Yanna, pa gúninu jma lu xhiiñaʼ Jehová, ¿ñee riníʼ nga zacaanu jma privilegiu despué la? Zándaca ya, casi bizaaca Nick. Peru, pa coʼ la? casi bizaaca Melissa, zanda chuʼnu nayecheʼ neca qué guicaanu jma privilegiu (biindaʼ Eclesiastés 2:24). Ne nánnanu ziuʼnu nayecheʼ, purtiʼ cayúninu stipa pur gúninu ni riuulaʼdxiʼ, Jesucristu xpixuaananu.

14. ¿Xi cadi naquiiñeʼ guiaandaʼ laanu de ca meta ni nápanu?

¹⁴ Pa maʼ cayúninu biaʼ gándatiʼ lu xhiiñaʼ Jehová, ¿ñee riníʼ nga maʼ qué zanda gúninu jma la? Coʼ, zanda gúninu ni, ne naquiiñeʼ quíxhenu meta ni gacané laanu guni predicarnu ne gusíʼdinu jma jneza, ne gacanenu ca hermanu stinu. Zugaandanu ca meta riʼ pa gácanu binni nuu xpiaaniʼ ne gánnanu nuu cosa ni qué zanda gúninu, ne pa jma guicá íquenu gacanenu xcaadxi lugar de guicá íquenu ni caquiiñenu (Prov. 11:2; Hech. 20:35).

15. ¿Gunáʼ nga caadxi de ca meta ni zacané laanu chuʼnu nayecheʼ?

¹⁵ ¿Xi meta zanda quixhe íquenu ugaandanu? Guinábanu Jehová gacané laanu guidúʼyanu pabiáʼ zanda gúninu (Prov. 16:3; Sant. 1:5). ¿Ñee zanda quixhe íquenu ugaandanu ca meta ni biete lu  primé párrafo stiʼ artículo riʼ la? Casi gácanu precursor auxiliar o regular, guni servirnu Betel o gacanenu la construcción. ¿Ñee zanda guizíʼdinu sti idioma para guni predicarnu jma binni o zanda chindézanu sti lugar ra caquiiñeʼ jma publicador la? Pa racaláʼdxinu gánnanu jma de ca meta riʼ? Zanda guidúʼndanu capítulo 10 stiʼ libru Organizados para hacer la voluntad de Jehová ne zanda guinínenu ca ancianu de congregación stinu. * Ra jma gúninu stipa pur ugaandanu ca meta riʼ,  jma ziuʼnu nayecheʼ ne zuuyaʼ xcaadxi cayuni progresarnu.

16. ¿Xi zanda gúninu pa qué ganda ugaandanu xiixa meta yaʼ?

¹⁶ ¿Yanna pa qué ganda ugaandanu tobi de ca meta ni bizéʼtenu ca yaʼ? Quíxhenu ti meta ni zanda ugaandanu. Guzéʼtenu caadxi de laacani.

17. Casi ná 1 Timoteo 4:13, 15, ¿xi naquiiñeʼ guni ti hermanu para gusiidiʼ jma jneza?

¹⁷ (Biindaʼ 1 Timoteo 4:13, 15). Pa nácaluʼ ti hermanu ni maʼ guyuunisa, ¿ñanda ñúniluʼ stipa pur gusiidiluʼ jma jneza ora gudiiluʼ discursu la? ¿Xiñee naquiiñeʼ gúniluʼ ni yaʼ? Purtiʼ zacá zanda gacaneluʼ ca ni gucaadiaga lii ora ruundaluʼ ne ora rusiidiluʼ ra rudiiluʼ discursu, biʼniʼ stipa gúʼndaluʼ ne gúniluʼ guiráʼ ni rusiidiʼ folletu Gusíʼdinu ne guidúʼndanu jma jneza. Biindaʼ cada tobi de ca lección stini, biʼniʼ practicar stale biaje ra lídxiluʼ ne biʼniʼ stipa pur gúniluʼ ca ni caziidiluʼ lu ca discursu stiluʼ. Gunabaʼ consejero auxiliar * gacané lii o xcaadxi ancianu «ni cayuni dxiiñaʼ nadipaʼ para guiniʼcaʼ ne gusiidicaʼ de stiidxaʼ Dios» (1 Tim. 5:17). Cadi guicá ique siouʼ gúniluʼ ni ná lu lección stiʼ folletu ca, laaca naquiiñeʼ gacaneluʼ ca ni cucaadiaga lii iguidxi fe sticaʼ ne gúnicaʼ ni caziidicaʼ. Pa gúniluʼ ni, ziuuluʼ jma nayecheʼ ne zaqueca ziuu ca ni gucaadiaga lii.

18. ¿Xi zacané laanu ugaandanu ca meta ni gudixhe íquenu?

¹⁸ Laanu, ca xpinni Cristu, naquiiñeʼ gacanenu binni gaca discípulo (Mat. 28:19, 20; Rom. 10:14). ¿Ñuuláʼdxinu ñúnirunu dxiiñaʼ riʼ jma jneza la? Para ganda  gúninu ni, zanda guidúʼndanu folletu Gusíʼdinu ne guidúʼndanu jma jneza ne quíxhenu meta ni gacané laanu gúninu ni cazíʼdinu. Laaca zanda guidxélanu sugerencia lu Ni chigaca lu reunión Xhiiñaʼ Dios ne modo nabáninu, ne lu ca videu de modo guinínenu binni ni ridiʼdiʼ lu reunión ni raca ndaaniʼ semana. Guidúʼyanu gunáʼ de laacani jma zacané laanu lu territorio stinu. Pa gúninu ca ni bizéʼtenu riʼ, ziuʼnu nayecheʼ ra gusíʼdinu jma jneza (2 Tim. 4:5).

19. ¿Xi zacané laanu gápanu xcaadxi cualidad ni napa ca xpinni Cristu?

¹⁹ Cadi guiaandaʼ laanu tobi de ca meta risaca ni zanda quixhe íquenu ugaandanu nga gápanu xcaadxi cualidad ni napa ca xpinni Cristu (Gál. 5:22, 23; Col. 3:12; 2 Ped. 1:5-8). ¿Xi zanda gúninu para ugaandanu meta riʼ yaʼ? Guzéʼtenu ti ejemplu, pa racaláʼdxinu gápanu jma fe, zanda guidúʼndanu de tema riʼ lu ca publicación ni nápanu. Laaca zanda guidúʼyanu ca videu ni riree lu JW Broadcasting^® ni caníʼ de ca hermanu ni rusihuinni ti fe naguidxi ora ridxaagalucaʼ guendanagana. De racá, zanda guiníʼ íquenu ximodo zanda gápanu ti fe naguidxi casi nápacabe.

20. ¿Xi zanda gúninu para chuʼnu jma nayecheʼ ne cadi chúʼpenu triste pa qué ugaandanu xiixa meta ni gudixhe íquenu?

²⁰ Nanna dxíchinu guiranu riuuláʼdxinu gúninu jma lu xhiiñaʼ Jehová, jma que biaʼ rúninu ni yanna. Ndaaniʼ guidxilayú cubi stiʼ Dios, gastiʼ qué zucueeza laanu de gúninu jma lu xhiiñaʼ Jehová ne zacá ziuʼnu jma nayecheʼ ne qué ziúʼpenu triste pa qué ugaandanu xiixa meta ni gudixhe íquenu ne ni jma risaca nga zusisácanu Jehová Dios stinu ni jma nayecheʼ (1 Tim. 1:11). Nga runi, chuʼnu nayecheʼ pur ni cayúninu lu xhiiñaʼ Jehová.