1-2. Odaphạn Psalm 34:8, yira koḍighi ika kụ olegheri mọ aZihova anighẹ ni?

OḄẸM mọ ongọ nyinhạ iyaạr dị nạ ko/lhe ghan. Nạ atue ni alegheri ilọ iyaạr phọ enụm mem dị nạ aphura, apuru bunhọn awe, obobọ amhiịn raraạr phọ osaạm bọ. Kuolọ, okạr eten dị nạ kakạr atue akuphom owol ipẹ iyaạr phọ ekạr bọ erọl pọ amem dị nạ aanemạ.

² Yira kotue ni olegheri odọ ipẹ aZihova anhighẹ bọ asi esi aạl ghan aBaibul phọ r’arinyạ ookpomhoghan phọ ayira, r’onhaghạn idị abunhọn moghaạph idị aZihova masẹph bidị. Kuolọ amem dị yira kotue okạr olegheri r’aloor, pọ amem dị yira ‘oonemạ’ enhighẹ phọ odị. (Bạl Psalm 34:8.) Esi omaạm, oḅẹm mọ nạ rawạ oḍigh arukumuan oomo amem mọ, kụ orue oteẹny aḍiigbu phọ aḍiẹn phọ, kemoghi ni odughe adọl aghuḍum mọ anạ. Eeni nạ m’aạl li ibadị amem ipẹ aZizọs aguanhaan bọ mọ yira osighẹ Omhạr phọ kụ oḍighi eḅẹl, mọ aZihova kamiteom ni ungọ iyira raraạr phọ ipẹ ekạr bọ ewạ, kuolọ oguan phọ opọ phọ nyinhạ ko/mhunhughanhaan ghan. (Mat. 6:33) Toroboiperolbọ, yira omheeraam oguan phọ aZizọs, oghomhe maliom ayira, odughe rukumuan owạ kụ olhe phọ ayira, kụ ogbon rukumuan epẹ erugh phọ, yira komiịn ni r’aloor ayira mọ aZihova ramiteom ghan ni kangọ raraạr phọ ipẹ ewạ bọ. Iduọn kụ ‘oonemạ’ enhighẹ phọ aZihova.

3. Odaphạn Psalm 16:1, 2, abuọ anhiạn kụ komooghọm suọ ezọ oḍighi ghan igey phọ aZihova?

³ Igey araraạr phọ aZihova “eteẹny ni torobọ oye,” ghalhamọ r’abuphẹ u/legheri bọ nyodị. (Ps. 145:9; Mat. 5:45) Odị rasẹph ghan ni eten dị egbatanhaạn buphẹ ophomhoghiạn bọ  oḅilhẹ rokumu nyodị. (Bạl Psalm 16:1, 2.) Oghị omhiịn reten dị yira rokelhọm enhighẹ phọ aZihova.

4. AZihova raḍeenhaan ghan ika enhighẹ phọ odị mem dị oye amhiigh oḍuraan otuman odị?

⁴ Reḍighi ghan ni imạ sighuḍum mọ ayira mem dị yira oḍighinhom ipẹ aZihova ratughemhị bọ. Otuughạ ilọ odị kụ inyu bọ iyira ophomhoghiạn odị, bịn odị ulhoghonhaạn bọ iyira ḍighaạgh owilhẹ ikarạph araraạr r’eten iitughiạn phọ elhọgh ghan bọ okụ igbo ayira r’odị. (Kọl. 1:21) Oḅarạm isiphẹ, mem mọ yira oḅọgh bọ loor ongọ nyodị oḅilhẹ oḍiiny muụm, odị abughẹ ni ḍisẹph phọ ayira esi ongọ ayira ogey ooruẹn olhoghi ḅilhẹ r’oḍur ayira olhoghomạ.—1 Pit. 3:21.

5. Yira romiịn ghan ika enhighẹ phọ aZihova siphẹ arukumuan epẹ erugh phọ?

⁵ Yira rokiọm ghan ghisigh koghelhọm enhighẹ phọ aZihova mem dị yira rogbeelhom ilọ Omhạr phọ. Ibadị awe aZihova rokiil ghan ni umugholoor. Nạ oọ? Mem mọ yira ko/ḍighi bọ buọ aZihova, abuniin ayira koo/tughiạn ghan r’aḍio mọ bunọ kotue ni okị okar eghuugh ooruen oye bịn omiigh raghaạph aBaibul. Kuolọ rodon, yira roḍighi ghan ni iduọn phọ egbagbạ amem. Oḅarạm isiẹn, aZihova ralhoghonhaạn ni nyinhạ ḍighaạgh oghelhọm oḍighi phọ! Odị mabakị ni nyinhạ ibadị areten. Odị malhoghonhaạn ni nyinhạ ḍighaạgh ophoomhị aloor mem dị oye azoọm nyinhạ idị i/nighẹ epẹ erugh phọ. Odị ralhoghonhaạn ghan kẹn nyinhạ ḍighaạgh ootughiạn esi aBaibul dị ekpẹ oḍighinhom amem dị ekasiạn. Odị mangọ kẹn nyinhạ inyaạm pidị nạ akiọm ghisigh oghaạph ghan ghalhamọ r’ekool dị ro/naghạn ghan.—Jer. 20:7-9.

6. Ika kụ idị ipẹ aZihova rutughemhị ghan bọ iyira meḍeenhaan enhighẹ phọ odị?

⁶ Ipẹ aZihova rutughemhị ghan bọ iyira ophạm arukumuan epẹ erugh phọ eeghironhaan enhighẹ phọ odị. (Jọn 6:45) Siphẹ ituughạ ogboku awiki phọ, yira romiịn ghan sividio areḍeenhaan ilọ oghaạph dị omhaạr ookolhobian olhoghonhaạn ayira ḍighaạgh epẹ erugh phọ. Mem dị omiteom emhoom eten oghaaphọm eeni amem retọl ghan mudị ke/ḅọph, kuolọ yira oḍighinhom remoọgh ghan ni ekol. Siphẹ ituughạ phọ yira rokị ghan bọ r’arookpomhoghan eephugh phọ, ruḅenhị ghan ni iyira oḍighinhom imhoom areten oghaạph iiḅi iinhaghạn phọ dị yira ko/ḍighinhom ghan. Iphẹn phọ kẹn eḅilhẹ ghan remạ mọ yira koḍighi iyaạr dị yira ko/ḍighi ghan, kuolọ yira oḍighi aZihova kasẹph ni. Oghaạph ilọ aḍisẹph kirokirọ dị meḍuạ emite esi osighẹ oḍighinhom ibadị imhoom areten oghaạph iiḅi iinhaghạn phọ etigheri sidọl phọ ayira. Kụ oḅilhẹ ooḅeghiọn reten dị yira kotue obughẹ aani rukumuan phọ ayira.

7. Oḍighi opuemhi ipẹ yira roḍighi ghan bọ epẹ erugh phọ rengọ ghan eeghe aḍisẹph?

⁷ Yira kokpulhạn aZihova idị ke/rọl ghan. Idị emitenhaan oniin okumor oye ookpomhoghan dị oghol mọ Samuel, * r’anhịr odị epẹ Colombia eḍeenhaan iphẹn phọ. Bidị uḍighi bukọy eten epẹ ookpomhoghan phọ abidị, kuolọ bidị uwạ obughẹ arukumuan phọ abidị esi oghị olhoghonhaạn aḍighaạgh ookpomhoghan dị omhoghi olhoghonhaạn aḍighaạgh. Kuolọ imhoghi ophinyọn arikiạ, obọ bidị oteẹny ḍiigbu phọ. ASamuel aḅẹm mọ: “Yoor uḍighinhom ipẹ aMatiu 6:33 eḅẹm bọ esi owilhẹ oghooghi araraạr ilọ ateẹny, Kuolọ iyaạr dị ekạr ikparanhaạn iyoor pọ owilhẹ otu phọ ayoor. Mị kaḅẹm mọ utuạn iyoor bịn kụ olhọgh, kụ yoor u/le omhụgh dị kotuạn osighẹ otu phọ.” Epẹ omhoom oḍighi phọ abidị, olom r’anhịr phọ umhiịn mọ odi ikpoki  phọ bidị orolhọm ghan bọ odiiny abin, bidị rotolhọm ghan muniin abin nyiidiphọ. ASamuel aḅarạm mọ: “Yoor momhiịn dị aZihova raaḅakị kaḅilhẹ aphagharanhaạn iiḅereghị ayoor, yoor ologhoma kẹn ogbaanyạn r’ephomhoghiạn aZihova eten dị ke/rọl ghan loor edạ phọ yoor ogbatạn bọ.” Nạ katue ni abughẹ aani rukumuan phọ anạ ḍughụm? Nạ aḍighi iduọn phọ nạ katuman ni aZihova eten dị ke/rọl ghan, kụ odị kaphogh ni nyinhạ.—Ps. 18:25.

8. Nạ atuughạ eeghe esi ipẹ Ivan r’aViktoria oghaạph bọ?

⁸ Yira kokelhọm rukumuan phọ ayira. Naghạn idị Ivan r’aViktoria, olom r’anhịr dị rokumuan ghan idiphọ abukọy eten epẹ Kyrgyzstan oghaạph. Bidị udughe dọl aghuḍum mọ abidị pidị omiteom loor ongọ ilọ atorobọ arukumuan dị emite, ghalhamọ r’odoghoḍi aruutu ni. Ivan aḅẹm mọ: “Yoor ulhọgh ghan inyaạm agey oḍighi atorobọ iyaạr lọ ungọ iyoor. Ghalhamọ yoor ukumuan ni kụ aloor ayoor edugh, yoor rologhoma ghan ni eephọ r’ogbaanyạn, mem lọ yoor ootughiạn mọ yoor osighẹ inyaạm ayoor rokumuom kongọ aZihova. Abumhoom arighirị phọ yoor oḍiku bọ r’imạ amem mọ yoor omhoọgh ghan bọ r’abidị eḍighi iyaạr ibo.”—Mạk 10:29, 30.

9. Umarani dị asoman sidọl ipaanhaạn maḍighi eeghe obughẹ arukumuan phọ odị, kụ mekọm eeghe kụ emiteom?

⁹ Yira kotue ni omoọgh ibo siẹn arukumuan phọ aZihova ghalhamọ r’amem dị yira osoman ni sidọl ipaanhaạn. Esi omaạm, aMirreh, oniin ekpukelhe okumor anhịr olọ aWest Africa dị aḍighi ghan oyil arookonhom kụ moseere oḍighi phọ, amhiigh ni okọy eten. Kụ asiạ odị meghị ḅilhẹ amoọgh amasinị, esi iduọn phọ oniin awạ bịn kụ edị katue atọl oḍighi oḍuạ otu ogbạ otu phọ. Kuolọ katue ni atọl ibadị awạ oḍighi oghaạph iiḅi iinhaghạn phọ esi ogbo dị eego esi akạt. Kụ amoọgh kẹn buboom awe oḅilhẹ oḅula ophogh r’abuọ otughemhị aBaibul, buniin ramạgh ghan fon. Eeghe kụ inyu bọ Mirreh obughẹ arukumuan phọ odị? Odị aḅẹm mọ, “ephomhoghiạn phọ mị amhoọgh bọ aghị esi aZihova r’aZizọs. Kụ iḍighi kụ mị agbor ghan ni raaḅereghị mọ aZihova ulhoghonhaạn imhị ḍighaạgh mị uḍighi aani ipẹ mị katue bọ ungọ nyodị.”—Mat. 22:36, 37.

10. Odaphạn Jọn 6:45, eeghe kụ idị abuphẹ obughẹ bọ rukumuan phọ abidị romoọgh ghan esi aZihova?

¹⁰ Kemiteom eepoogh dị aZihova kutughemhị iyira abughẹ. Itughemhị phọ iphẹn iteẹny ni okọy eten dị oghol mọ Kenny epẹ Mauritius. Mem mọ odị alhegheri bọ igey phọ bịn awilhẹ auniversity aḍiiny muụm, odị amhiigh ni okọy eten opọ oomo amem mọ. Odị aḅẹm mọ, “Mị ukparaghạ odaphạn ikpo onhụ oyil phọ Aizaya eḅẹm bọ mọ: ‘Poronọ amhị! Urom imhị!’” (Isa. 6:8) AKenny makumuan ni ibadị ariisi dị rolọgh ruutu Omhạr phọ, aḅilhẹ aloghonhaạn ḍighaạgh ogbạ arinyạ ayira otenhe onhụ emhạ abidị. AKenny aḅẹm mọ, “itughemhị phọ utughemhị bọ imhị ilhoghonhaạn imhị ḍighaạgh omhunhenhi arukumuan phọ ungọ bọ imhị.” Kuolọ odị atuughạ ni idị epelhom sighalhanyạ oḍighi bịn. Odị aḅarạm mọ, “Mị utuughạ ni alhegheri sidugh amhị r’inhọn igey araagharạ dị emhoghi dị mị kamoọgh obọ mị aḍighi ogey ebenhẹ aZihova.” (Bạl Jọn 6:45.) Nạ katue kẹn ni aaḅenhion raraạr obughẹ arukumuan phọ anạ pidị aZihova atughemhị aani nyinhạ?

11. Eeghe ikuph kụ edị abumarani epẹ South Korea olhọgh rukumuan epẹ erugh phọ, kụ eeghe kụ iḅuạ emite? (Miịn afoto oḅẹl opoḍi phọ.)

¹¹ Mem dị omiteom emhoom eten oghaaphọm iiḅi iinhaghạn phọ rewạ ghan ni mọ torobọ oye atuughạ oḍighinhom. Ezẹgh akorona phọ emhiigh bọ, ikumor awe oniin ookpomhoghan aSouth Korea ugẹ mọ: “Ibadị  dị ootughiạn ghan mọ bunọ ko/tue opinhom aani bin oghaạph iiḅi iinhaghạn phọ, momhiigh osighẹ asifon r’asikomputa oghaaphọm. Enighẹ oḅẹm mọ torobọ aḍio iraạr abumarani dị mopeli 80 asiạ osighẹ ni eten phọ ephẹn phọ roḍighinhom.” (Ps. 92:14, 15) Keḅeraạn ni nyinhạ oḅughẹ arukumuan phọ anạ oonemạ aani enhighẹ phọ aZihova ḍughụm? Ooḅeghiọn raraạr dị nạ katue aḍighi orue obughẹ arukumuan phọ anạ.

12. AZihova aguan eeghe buphẹ obeḍenhọm bọ nyodị?

¹² Beḍenhọm aZihova. Odị aguanhaan ookuom ayira ḍisẹph kirokirọ mem dị yira oḍuom nyodị olhoghi kụ ongọ ipẹ ekạr bọ enhighẹ. (Mal. 3:10) AFabiola onyọ umarani epẹ Colombia amhiịn ni dị aZihova amhunhenhi oguan phọ ophọn phọ esi odị. Odị awạ ghan okọy eten oomo amem mem mọ purukụ odị aḍiiny bọ muụm mọ. Toroboiperolbọ, oḍighi owạ kụ olhe phọ odị kụ edị olom mọ r’iraạr ibạm anmụny phọ odị odimhom ghan. Esi iduọn phọ mem mọ koseere bọ nyodị oḍighi phọ, odị aaḅereghị ni alhọm aZihova olhoghonhaạn aḍighaạgh. Odị aḅẹm mọ: “Eghiil oteẹny ikpoki apensọn resighẹ ghan ni mem, kuolọ ephẹn amhị isighẹ unwanyụ bịn. Iḍighi iiḍaạny!” Iyạl unwanyụ reten bịn odị amhiigh okọy eten. Nyiidiphọ odị mapel 70 asiạ kụ makọy eten siẹn 20 asiạ. Siẹn amem mọ amuphẹ phọ, odị malhoghonhaạn ḍighaạgh ophaanyạ abumarani oḍiiny amuụm. Odị aḅẹm mọ: “Eeni amem aloor amhị redugh ghan ni, kuolọ aZihova rulhoghonhaạn ghan ni imhị ḍighaạgh ḍio etum ḍio odaphạn edeọm mọ amhị.”

13-14. Ighẹn areḍeenhaan kụ ketue ilhoghonhaạn iyira ḍighaạgh ogbatạn edạ obughẹ arukumuan phọ ayira?

 ¹³ Tuughạ esi abuphẹ obeḍenhọm bọ aZihova. Areḍeenhaan awe dị okuọm loor rukumuan phọ aZihova emuza ni siphẹ aBaibul phọ. Ibadị abuẹn phọ kụ uphụr ghan oḍighi iyaạr omiteom kụ aZihova asẹph. Esi omaạm, amem mọ Ebraham awilhẹ bọ emhạ phọ odị aḍuạ, kụ ‘odị u/legheri bọ ni epẹ dị rakị bọ’—kụ edị aZihova asẹph nyodị. (Hib. 11:8) Mọ aJekọb m”ugbạ bọ inhụgh r’ookpaạny phọ obọ mu/moọgh ḍisẹph dị egbatanhaạn. (Gen. 32:24-30) Mem mọ eelhe phọ Izrạl rokị bọ oḍigh Ade Oguan phọ, m’abupinyọn rikiạ phọ mu”daarị bọ edạ siphẹ Ophiịny aJordan phọ, obọ awe phọ mu/tue uḅeẹny ophiịny phọ.—Josh. 3:14-16.

¹⁴ Areḍeenhaan Abugbaanhaạn aḍio arodon dị obeḍenhọm aZihova ketue ni ilhoghonhaạn iyira ḍighaạgh. Esi omaạm, onyọ umor dị oghol mọ Payton r’anhịr odị Diana, rokelhọm ghan ni aạl ilọ abumor r’abumarani dị mobughẹ rukumuan phọ abidị, idiphọ ilọ abuphẹ edi bọ siphẹ asikoọl araghaạph phọ “They Offered Themselves Willingly.” * APayton aḅẹm mọ: “Mem lọ yoor aạl, rekịgh ghan mudị yoor ropoghoghom oye dị rakelhọm emạ eḍien. Mem lọ yira oghiọm ghisigh ophogh ghan yira ‘koonemạ ni enhighẹ phọ aZihova.’ ” Esighẹ rekị bịn aPayton r’aDiana oḅuạ oghị ekpisi dị ewaạm mọ ebụgh. Nạ m’aạl ghan ni sikoọl araghaạph phọ iphẹn phọ? Ḅilhẹ kẹn nạ maphogh ghan ni sividiọ phọ, Witnessing in Isolated Territory—Australia r’aWitnessing in Isolated Territory—Ireland, edi bọ siphẹ jw.org? Asividio phọ iphẹn phọ kelhoghonhaạn nyinhạ ḍighaạgh orue obughẹ arukumuan phọ anạ.

15. Ika kụ idị osaḅạr abugey arighirị ketue ilhoghonhaạn iyira ḍighaạgh?

¹⁵ Saḅạr bugey arighirị. Nạ agbor raaḍikuan r’oyaghirị dị rale ghan eḍien dị nạ ko/lhe ghan kephụ ni nyinhạ oonemạ aani. Eniin phọ kẹn, eḍighi maạr dị yira rooḍikuan ghan r’awe dị osighẹ rukumuan aZihova kụ oḍighi eḅẹl, kinyu ni iyira oḍighi aani igina phọ. Iphẹn phọ imitenhaan ni Kent r’anhịr odị Veronica. AKent aḅẹm mọ: “Abuọ eghunotu r’arighirị uromha ni iyoor obughẹ arukumuan phọ ayoor. Ibuọm ayoor ilọ osighẹ Omhạr phọ kụ oḍighi eḅẹl ibụgh esi ooḅughonhaan phọ yoor omhoọgh ghan bọ r’abidị.” AKent r’aVeronica rokumuan ghan idiphọ abukọy eten dị ogbatanhaạn epẹ Serbia.

16. Odaphạn oghaạph omaạm mọ aZizọs ogẹ bọ siphẹ Luk 12:16-21, uḍighi ika kụ yira kopinyọn bọ ni rikiạ?

¹⁶ Pinyọn rikiạ angọ aZihova. I/moghi mọ owilhẹ yogh oomo araraạr dị yira rokelhọm ghan loor esi oḍighi idị keḅeraạn aZihova. (Eccl. 5:19, 20) Toroboiperolbọ, eḍighi maạr dị yira oghol emhụ araraạr oghelhọm bịn owilhẹ obughẹ arukumuan phọ ayira esi aZihova, pọ yira otue ni opiomạn aani oniin phọ opiomạn phọ oye phọ aZizọs aghaạph bọ aghol siphẹ aḍidogh phọ odị apiomạn bọ, opọ arọl bọ okpolhoghi eelạ bịn agunhọm Enhaạn. (Bạl Luk 12:16-21.) Onyọ umor dị oghol mọ Christian, dị odi ghan epẹ France, aḅẹm mọ, “Mị u/ngọ ghan aZihova r’eghunotu phọ amhị okạr ipẹ mị katue bọ.” Kụ anhịr odị r’odị osopha okọy eten. Kuolọ oteẹny aḍiigbu phọ aḍiẹn phọ iwạ mọ bidị owilhẹ iiḍighi abidị. Orue omhoọgh aani ikpoki ophoghaam aloor, bidị roḅeerogh ghan riisi, koḅilhẹ omhoọgh ghan ogbaanyạn. Arikiạ phọ bidị ophinyọn bọ ekpeanhaạn ni ḍughụm? AChristian aḅẹm mọ, “Anyiidiphọ kụ edị yoor rokelhọm oghaạph iiḅi iinhaghạn phọ ḅilhẹ yoor rokelhọm ni ibadị awe phọ yoor roḅilhẹ ghan bọ koḅula otughemhị ilọ aZihova.”

17. Uḍighị ika kụ eeni amem re/dugh ghan bọ omhiighom emhoom eten oghaạph iiḅi iinhaghạn phọ?

 ¹⁷ Meera osighẹ imhoom areten oḍighinhom epẹ erugh phọ. (Iiḍighi 17:16, 17; 20:20, 21) AShirley, onyọ okọy eten epẹ United States, aaḅenhion ni eten phọ epẹ odị rakaạph ghan bọ oghaạph iiḅi iinhaghạn phọ siẹn ezẹgh aCOVID-19 phọ. Eḅẹl amem mọ, ikparanhaạn ni nyodị osighẹ afon ongoọm ogbaanhaạn. Kuolọ opoghom eghir phọ matughemhị nyodị ilọ oḍighi, bịn odị amiigh ogbor osighẹ eten phọ ephẹn phọ oḍighinhom. Odị abẹm mọ: “Emhiighom mọ, oghiilhaan arọl li, kuolọ mị ughelhọm ni. Yoor roteẹny ghan we nyiidiphọ kopu mem mọ yoor oḍuạ ghan bọ otu ogbạ otu!”

18. Eeghe kụ kilhoghonhaạn iyira ḍighaạgh eḍighi maạr dị yira osoman ipaanhaạn iduọn yira rokparaghạ bọ obughẹ arukumuan phọ ayira?

¹⁸ Moọgh igbiighi kụ aḍighi amiteom. Mem dị yira osoman ipaanhaạn, r’iiḅereghị yira rosighẹ ghan ni iitughiạn phọ ayira koḍighinhom ogbiighi araraạr dị yira koḍighi. (Prov. 3:21) Onyọ umarani dị oghol mọ Sonia, dị rakumuan idiphọ okọy eten r’egu dị roḅạ ghan onhụ aRomany epẹ Europe, aḅẹm mọ: “Riḅeraạn ghan imhị ogẹ igbiighi phọ amhị loor aḍinyạ, kụ oseere esi dị mị kamiịn ghan. Mị aḍorọ ni iyạl areten dị enyeenhe kirokirọ agạ loor idaaḅilị amhị. Kụ mem dị mị rawạ osopha osopha, mị akị apogh kụ apuruan loor mọ mị kadạph eghẹn eten siẹn osopha phọ amhị.” ASonia rakparaghạ ghan omhoọgh ephoghom dị eeleeny ilọ ipaanhaạn phọ odị. “Odị aḅẹm mọ, mị kụ kasopha mughumọ mị kasighẹ ni torobọ emhoom ipaanhaạn dị iteẹny imhị idiphọ aḍiighi obobọ idiphọ aḅagạ dị kilhoghonhaạn imhị ḍighaạgh oḅeẹny.”

19. Yira osopha oḍighi eeghe?

¹⁹ AZihova usẹph ni iyira ibadị areten. Yira kotue ni oḍeenhaan mọ yira osereghiạn ni ḍisẹph kirokirọ phọ odị, esi oḍighi oomo ipẹ yira kotue bọ ongọ odị iiseeny. (Hib. 13:15) Iphẹn phọ etue ni eḅaramaạm osighẹ imhoom areten oḍighinhom orue obughẹ arukumuan phọ ayira, bịn aZihova kusẹph ni iyira abughẹ. Torobọ aḍio, owạ ghan reten oonemạ enhighẹ phọ aZihova. Bịn yira kokịgh aani Zizọs, aḅẹm bọ mọ: “Eḍien amị, oḍighi ghan oḍighi opọ urom bọ imị r’omadạn oḍighi phọ odị.”—Jọn 4:34.