Yaa mi ní ɔ nɔ

Yaa e mi ní ɔ mi

NÍ KASEMI 34

Moo ‘Sa O Nya’ Yehowa Kpakpa Peemi ɔ Nɛ O Hyɛ—Ngɛ Mɛni Blɔ Nɔ?

Moo ‘Sa O Nya’ Yehowa Kpakpa Peemi ɔ Nɛ O Hyɛ—Ngɛ Mɛni Blɔ Nɔ?

“Nyɛɛ sa nyɛ nya nɛ nyɛɛ hyɛ, nɛ nyɛ maa na kaa Yehowa hi; nɔ nɛ saa we ngɛ e ngɔ ɔ ngɛ bua jɔmi.”—LA 34:8, NW.

LA 117 Kpakpa Peemi

NƆ́ NƐ WA MAA KASE *

1-2. Ngɛ La 34:8 ɔ nya a, mɛni blɔ nɔ wa ma nyɛ maa gu kɛ kase Yehowa kpakpa peemi ɔ he ní?

MOO ngɔ lɛ kaa nɔ ko ha mo niye ní ko nɛ o yi hyɛ. Ke o suɔ nɛ o le bɔ nɛ niye ní ɔ ngɛ ha a, eko ɔ, o maa hyɛ niye ní ɔ, o maa nu he via, o maa suɔ nɛ o le níhi nɛ a kɛ hoo kɛ bɔ nɛ a hoo lɛ ha, loo o ma bi ni kpahi bɔ nɛ a naa niye ní ɔ ha. Se ke o bua maa jɔ niye ní ɔ he jio, o bua be he jɔe jio, jã o sa o nya nɛ o hyɛ.

2 Wa ma nyɛ maa kase Yehowa kpakpa peemi ɔ he ní kɛ gu Baiblo ɔ kɛ wa womi ɔmɛ nɛ wa maa kase ɔ nɔ. Jehanɛ hu ɔ, kɛ gu ni kpahi a níhi a si kpami nɛ kɔɔ bɔ nɛ Yehowa jɔɔ mɛ ha a he nɛ wa maa bu tue ɔ nɔ. Se ke wa suɔ nɛ waa na Yehowa kpakpa peemi ɔ, jã wɔ nitsɛmɛ wa ‘sa wa nya.’ Baiblo ɔ de ke: “Nyɛɛ sa nyɛ nya nɛ nyɛɛ hyɛ, nɛ nyɛ maa na kaa Yehowa hi; nɔ nɛ saa we ngɛ e ngɔ ɔ ngɛ bua jɔmi.” (La 34:8, NW.) Nyɛ ha nɛ waa hyɛ nɔ́ he tomi nɔ́ ko nɛ tsɔɔ blɔ kake nɔ nɛ wa ma nyɛ maa gu kɛ pee jã. Ngɔɔ lɛ kaa wa ngɛ hlae nɛ waa ngɔ wa he kɛ wo be tsuo sɔmɔmi ní tsumi ɔ mi, se loko wa ma nyɛ maa su jamɛ a oti ɔ he ɔ, jã wa pee wa si himi kpokploo. Eko ɔ, wa pɔɔ Yesu si womi nɛ tsɔɔ kaa ke wa ngɔ Matsɛ Yemi ɔ kɛ ye kekle blɔ he ngɛ wa si himi mi ɔ, Yehowa ma ha wɔ wa hiami níhi ɔ he susumi. Se wa nɛ kaa si womi nɛ ɔ ba mi ngɛ wa blɔ fa mi. (Mat. 6:33) Se ke wa ngɛ hemi kɛ yemi ngɛ si nɛ Yesu wo ɔ mi ɔ, wa ma gbɔ sika nɛ wa puɛɔ nɔ, wa maa pee tsakemi ngɛ wa ní tsumi mi, nɛ wa maa pee babauu ngɛ fiɛɛmi ní tsumi ɔ mi. Ke wa pee jã a, wa maa na kaa Yehowa ma ha wɔ wa hiami níhi, nɛ wɔ nitsɛmɛ wa maa ‘sa wa nya’ Yehowa kpakpa peemi ɔ.

3. Ngɛ La 16:1, 2 ɔ nya a, mɛnɔmɛ nɛ Yehowa peeɔ mɛ kpakpa?

3 Yehowa peeɔ “nɔ tsuaa nɔ kpakpa,” nɛ́ nihi nɛ a li lɛ ɔ po piɛɛ he. (La 145:9; Mat. 5:45) Se nihi titli nɛ Yehowa peeɔ mɛ kpakpa wawɛɛ ji nihi nɛ a suɔ lɛ nɛ a ngɔɔ a tsui tsuo kɛ sɔmɔɔ lɛ ɔ. (Kane La 16:1, 2.) Ha nɛ wa susu ní kpakpa komɛ nɛ Yehowa pee kɛ ha wɔ ɔ he nɛ waa hyɛ.

4. Mɛni blɔ nɔ nɛ Yehowa je e kpakpa peemi ɔ kpo kɛ tsɔɔ nihi nɛ a bɔni e he sumi ɔ?

4 Be fɛɛ be nɛ waa kɛ nɔ́ nɛ wa kase ngɛ Yehowa he ɔ ma tsu ní ɔ, wa náa he se. Benɛ wa ba kase Yehowa he ní nɛ wa ná suɔmi ha lɛ ɔ, e ye bua wɔ nɛ wa je wa he kɛ je susumi yayahi kɛ ní peepeehi nɛ je wɔ kɛ je e he ɔ a he. (Kol. 1:21) Nɛ benɛ wa jɔɔ wa he nɔ nɛ wa ha nɛ a baptisi wɔ ɔ, wa na e kpakpa peemi ɔ wawɛɛ. E ha nɛ wa ná he nile kpakpa, nɛ huɛ bɔmi kpakpa ngɛ waa kɛ lɛ wa kpɛti.—1 Pet. 3:21.

5. Mɛni blɔ nɔ nɛ wa náa Yehowa kpakpa peemi ɔ he se ngɛ ngɛ wa fiɛɛmi ní tsumi ɔ mi?

5 Be mi nɛ wa yaa nɔ nɛ waa kɛ wa he woɔ fiɛɛmi ní tsumi ɔ mi ɔ, wa náa Yehowa kpakpa peemi ɔ he se. Anɛ o gboɔ zo lo? Yehowa we bi fuu gboɔ zo. Benɛ o ba pee we Yehowa sɔmɔlɔ lolo ɔ, eko ɔ, o susuu we gblee kaa o ma ya si nɔ ko nɛ o li lɛ ɔ sinya nɛ o kɛ lɛ nɛ sɛɛ Baiblo ɔ he ní. Se amlɔ nɛ ɔ, o peeɔ jã be fɛɛ be, nɛ ngɛ Yehowa yemi kɛ buami nya a, o bua ba jɔ fiɛɛmi ní tsumi ɔ he wawɛɛ! O nu he kaa Yehowa ye bua mo ngɛ blɔ slɔɔtohi a nɔ. Yehowa ye bua mo nɛ o peeɔ kpoo ke nɔ ko te si kɛ wo mo ngɛ fiɛɛmi ní tsumi ɔ mi. E ye bua mo nɛ o kaiɔ ngmami nɛ o suɔ nɛ o kɛ nɔ ko nɛ e bua jɔ sɛ gbi ɔ he ɔ nɛ susu he ɔ. Nɛ e wo mo he wami konɛ o nyɛ nɛ o tsa fiɛɛmi ní tsumi ɔ nɔ ke nihi bui mo tue po.—Yer. 20:7-9.

6. Mɛni blɔ nɔ nɛ tsɔsemi nɛ Yehowa haa wɔ ɔ jeɔ e kpakpa peemi ɔ kpo?

6 Jehanɛ hu ɔ, wa naa Yehowa kpakpa peemi ɔ kɛ gu tsɔsemi nɛ e kɛ haa wɔ ngɛ fiɛɛmi ní tsumi ɔ he ɔ nɔ. (Yoh. 6:45) Ngɛ wa otsi kpɛti kpe ɔmɛ a sisi ɔ, wa naa níhi nɛ wa ma nyɛ ma de nihi ngɛ fiɛɛmi mi ngɛ ní sɛɛmi he nɔ hyɛmi ní ɔmɛ a mi, nɛ a woɔ wɔ he wami kaa wa kɛ tsu ní ngɛ wa fiɛɛmi ní tsumi ɔ mi. Sisije ɔ, eko ɔ, e he maa wa ha wɔ kaa wa maa gu blɔ nɛ ɔmɛ ekomɛ a nɔ kɛ fiɛɛ, se ke wa pee jã a, eko ɔ, wa maa na kaa lɔ ɔ nɛ nihi nɛ a ngɛ wa zugba kpɔ ɔ mi ɔ a bua jɔ he. Jehanɛ hu ɔ, a woɔ wɔ he wami ngɛ asafo mi kpehi kɛ kpokpa nɔ kpehi a sisi kaa waa gu blɔ slɔɔtohi nɛ wa gui nɔ kɛ fiɛɛ hyɛ ɔ a nɔ kɛ fiɛɛ. Enɛ ɔ hu ma nyɛ ma ha nɛ waa ye gbeye bɔɔ, se ke wa bɔ mɔde nɛ waa kɛ ga womi nɛ ɔ tsu ní ɔ, Yehowa maa jɔɔ wɔ. Nyɛ ha nɛ waa hyɛ jɔɔmihi nɛ wa ma ná ke wa ngɔ wa hɛ kɛ fɔ Yehowa nɔ, nɛ wa gu blɔ ehehi a nɔ kɛ tsu fiɛɛmi ní tsumi ɔ ngɛ si fɔfɔɛhi tsuo nɛ waa kɛ maa kpe ɔ mi. Lɔ ɔ se ɔ, wa ma susu blɔhi a nɔ nɛ wa maa gu kɛ bli wa sɔmɔmi ní tsumi ɔ mi ɔ a he.

YEHOWA JƆƆ NIHI NƐ A NGƆƆ A HƐ KƐ FƆƆ E NƆ Ɔ

7. Ke wa bɔ mɔde nɛ wa bli wa sɔmɔmi ní tsumi ɔ mi ɔ, mɛni jɔɔmihi wa ma ná?

7 Wa hɛɔ kɛ suɔ Yehowa he wawɛɛ. Nyɛ ha nɛ wa susu asafo mi nɔkɔtɔma ko nɛ a tsɛɛ lɛ ke Samuel * nɛ e kɛ e yo ɔ sɔmɔɔ ngɛ Colombia a he nɛ waa hyɛ. Nyɛminyumu nɛ ɔ kɛ e yo ɔ ngɛ sɔmɔe kaa blɔ gbali ngɛ a we asafo ɔ mi, se a suɔ nɛ a bli a fiɛɛmi ní tsumi ɔ mi nɛ a ya sɔmɔ ngɛ asafo ko nɛ a hia fiɛɛli fuu ngɛ mi ɔ mi. Se e he hia nɛ a ngɔ ní komɛ kɛ sã afɔle konɛ a su oti nɛ ɔ he. Samuel de ke: “Waa kɛ ga womi nɛ ngɛ Mateo 6:33 ɔ tsu ní, nɛ wa kpa níhi nɛ a he hia we ɔ hemi. Se nɔ́ nɛ he wa wawɛɛ ha wɔ ji wa we ɔ nɛ wa ma si ɔ. A ma lɛ kaa bɔ nɛ wa ngɛ hlae ɔ pɛpɛɛpɛ nɛ wa yi hiɔ ko.” Benɛ a hia kɛ ho asafo ehe ɔ mi ya a, a yɔse kaa a nyɛ nɛ a kɛ sika bɔɔ pɛ ngɛ a he hyɛe. Samuel de ke: “Wa na bɔ nɛ Yehowa tsɔɔ wɔ blɔ nɛ e bu wa sɔlemi tue ha. Wa nu he kaa Yehowa bua jɔ wa he, nɛ e je e suɔmi ɔ kpo kɛ tsɔɔ wɔ ngɛ blɔ slɔɔtohi a nɔ.” Anɛ o ma nyɛ ma bli o sɔmɔmi ní tsumi ɔ mi ngɛ blɔ ko nɔ lo? Ke o pee jã a, o ma nyɛ ma ná nɔ mi mami kaa o maa hɛ kɛ su Yehowa he nɛ e ma ha mo o hiami níhi.—La 18:25.

8. Mɛni o kase ngɛ nɔ́ nɛ Ivan kɛ Viktoria de ɔ mi?

8 Wa náa bua jɔmi ngɛ wa sɔmɔmi ní tsumi ɔ mi. Mo kadi nɔ́ nɛ nyɛminyumu ko nɛ a tsɛɛ lɛ ke Ivan kɛ e yo Viktoria nɛ a ngɛ sɔmɔe kaa daa blɔ gbali ngɛ Kyrgyzstan ɔ de. A pee a si himi kpokploo bɔ nɛ pee nɛ a nyɛ nɛ a kɛ a he nɛ wo asafo ɔ ní tsumihi kaa asafo ɔ tsuhi a mami ní tsumi ɔ mi. Ivan de ke: “Wa tsu ní wawɛɛ ngɛ ní tsumi fɛɛ ní tsumi nɛ wa nine maa su nɔ ɔ mi. E ngɛ mi kaa ke wa kpa ní tsumi ɔ pɔ tɔɔ wɔ mohu lɛɛ, se wa tue mi jɔɔ wɔ, nɛ wa tsui hu nɔɔ wa mi, ejakaa wa le kaa waa kɛ wa he wami ɔ tsu Matsɛ Yemi ɔ he ní tsumi. Jehanɛ hu ɔ, wa bua jɔɔ wawɛɛ ejakaa wa ná huɛmɛ kpakpahi kɛ níhi a si kpami kpakpahi fuu.”—Maak. 10:29, 30.

9. Mɛni nɛ nyɛmiyo ko nɛ e kɛ si fɔfɔɛhi nɛ a mi wa ngɛ kpee ɔ pee konɛ e nyɛ nɛ e bli e sɔmɔmi ní tsumi ɔ mi, nɛ mɛni je mi kɛ ba?

9 Ke waa kɛ si fɔfɔɛhi nɛ a mi wa ngɛ kpee po ɔ, wa náa bua jɔmi ngɛ Yehowa sɔmɔmi mi. Kaa nɔ hyɛmi nɔ́ ɔ, nyɛmiyo ko nɛ wa ngɛ jeha mi nɛ a tsɛɛ lɛ ke Mirreh nɛ e ngɛ West Africa a ji yalɔyo, nɛ e ji dɔkita hulɔ. Se benɛ e ba he jɔɔmi ɔ, e je blɔ gbami ní tsumi ɔ sisi. Mirreh nu hiɔ ko nɛ haa nɛ e he waa ha lɛ kaa e maa nyɛɛ, enɛ ɔ he ɔ, ngmlɛfia kake pɛ nɛ e nyɛɔ nɛ e kɛ tsuɔ wehi a mi fiɛɛmi ní tsumi ɔ. Se e nyɛɔ nɛ e kɛ e he woɔ ma nɔ odase yemi mi ngmlɛfiahi fuu. E ngɛ nihi nɛ e kpaleɔ ya slaa mɛ kɛ Baiblo kaseli fuu. E tsɛɛ e Baiblo kaseli ɔmɛ a kpɛti ni komɛ ngɛ tɛlifoo nɔ. Mɛni he je nɛ Mirreh suɔ nɛ e pee babauu ha Yehowa a? E de ke: “I suɔ Yehowa kɛ Yesu Kristo wawɛɛ, nɛ i pɔɔ sɔlemi ha Yehowa nɛ e ye bua mi nɛ ma pee nɔ́ fɛɛ nɔ́ nɛ ma nyɛ ngɛ e sɔmɔmi mi.”—Mat. 22:36, 37.

10. Ngɛ 1 Petro 5:10 nya a, mɛni nɛ nihi nɛ a bliɔ a sɔmɔmi ní tsumi ɔ mi ɔ náa kɛ jeɔ Yehowa ngɔ?

10 Wa náa tsɔsemi kpahi hu kɛ jeɔ Yehowa ngɔ. Kenny nɛ e ji blɔ gbalɔ ngɛ Mauritius ɔ na kaa munyu nɛ ɔ ji anɔkuale. Benɛ e ba kase anɔkuale ɔ, e kpa yunivɛsiti nɛ e ngɛ yae ɔ, nɛ e ha nɛ a baptisi lɛ, nɛ e kɛ e he wo be tsuo sɔmɔmi ní tsumi ɔ mi. E de ke: “I bɔ mɔde kaa i kɛ gbalɔ Yesaya munyu nɛ ji, ‘I ngɛ hiɛ ɔ, Moo tsɔ mi!’ ɔ ma tsu ní.” (Yes. 6:8) Kenny ye bua kɛ ma asafo ɔ tsuhi fuu, nɛ e ye bua kɛ tsɔɔ womihi a sisi kɛ ya e je gbi mi. E de ke: “I ná tsɔsemi nɛ maa ye bua mi konɛ ma nyɛ ma tsu ye sɔmɔmi ní tsumi ɔ kɛ pi si.” Se tsa pi bɔ nɛ e ma tsu ní tsumi ɔ ha a pɛ nɛ e kase. Kenny de ke: “I kase ye gbɔjɔmihi, kɛ su kpakpahi nɛ maa ye bua mi konɛ ma pee Yehowa sɔmɔlɔ kpakpa a he ní.” (Kane 1 Petro 5:10.) Anɛ mo hu o ma nyɛ maa to níhi a he blɔ nya konɛ o nyɛ nɛ o ná Yehowa tsɔsemi he se ngɛ blɔ komɛ a nɔ lo?

Nyɛminyumu ko kɛ e yo nɛ a ngɛ fiɛɛe ngɛ he ko nɛ Matsɛ Yemi fiɛɛli fuu a he hia ngɛ; nyɛmiyo wayoo ko nɛ e ngɛ ye buae kɛ ma Matsɛ Yemi Asa; nyɛminyumu ko kɛ e yo nɛ a wa ngɛ jeha mi nɛ a ngɛ fiɛɛe kɛ gu tɛlifoo nɔ. Mɛ tsuo a bua jɔ wawɛɛ ngɛ a sɔmɔmi ní tsumi ɔ mi (Hyɛ kuku 11)

11. Mɛni nyɛmimɛ yi komɛ nɛ a ngɛ South Korea a pee konɛ a nyɛ nɛ a tsu a sɔmɔmi ní tsumi ɔ mi, nɛ mɛni je mi kɛ ba? (Hyɛ foni nɛ ngɛ womi ɔ hɛ mi ɔ.)

11 Nihi nɛ a ngɛ Yehowa sɔmɔe be kɛkɛɛ po hia tsɔsemi ke a kɛ a he wo sɔmɔmi ní tsumi ehe ko mi. Ngɛ COVID-19 be nɛ ɔ mi ɔ, asafo mi nikɔtɔma komɛ nɛ a ngɛ South Korea a de ke: “Nyɛmimɛ komɛ nɛ be ko nɛ be ɔ, a susu kaa a be nyɛe nɛ a kɛ a he nɛ wo fiɛɛmi ní tsumi ɔ mi akɛnɛ a be nɔmlɔ tso mi he wami ɔ ngɛ fiɛɛe amlɔ nɛ ɔ kɛ gu videoconferencing . Nyɛmimɛ yihi etɛ komɛ nɛ a ye jeha 80 kɛ se ɔ kase bɔ nɛ a kɛ kɔmpiuta ma tsu ní ha, nɛ a kɛ fiɛɛɔ daa ligbi.” (La 92:14, 15) Anɛ mo hu o maa suɔ nɛ o bli o sɔmɔmi ní tsumi ɔ mi konɛ o sa o nya Yehowa kpakpa peemi ɔ wawɛɛ nɛ o hyɛ lo? Nyɛ ha nɛ wa susu ní komɛ nɛ o ma nyɛ maa pee konɛ o su oti nɛ ɔ he ɔ he nɛ waa hyɛ.

BLƆ NƆ NƐ O MAA GU KƐ BLI O SƆMƆMI NÍ TSUMI Ɔ MI

12. Mɛni nɛ Yehowa wo si kaa e maa pee ha nihi nɛ a ngɔɔ a hɛ kɛ fɔɔ e nɔ ɔ?

12 Ngɔɔ o hɛ kɛ fɔ Yehowa nɔ. Yehowa wo si kaa ke wa ngɔ wa hɛ kɛ fɔ e nɔ nɛ waa kɛ wa nyɛmi tsuo sɔmɔ lɛ ɔ, e maa jɔɔ wɔ. (Mal. 3:10) Nyɛmiyo ko nɛ e ngɛ Colombia nɛ a tsɛɛ lɛ ke Fabiola a na bɔ nɛ Yehowa si womi nɛ ɔ ba mi ngɛ e blɔ fa mi ha. Benɛ a baptisi lɛ kɛ we ɔ nɔuu nɛ e ná suɔmi ɔ kaa e ma sɔmɔ kaa daa blɔ gbalɔ. Se lɛ nɛ e tsuɔ ní kɛ yeɔ bua e weku ɔ. Enɛ ɔ he ɔ, benɛ e he ba hia nɛ e ya pension ɔ, e sɔle konɛ Yehowa nɛ ye bua lɛ. E de ke: “Behi fuu ɔ, ke nihi ya pension ɔ, e heɔ be loko a nine suɔ pension sika a nɔ. Se imi lɛɛ benɛ i ya pension ɔ nyɔhiɔ kake se pɛ nɛ ye nine bɔni ye sika a nɔ sumi. Enɛ ɔ pee mi nyakpɛ!” Nyɔhiɔ enyɔ se ɔ, e je blɔ gbami ní tsumi ɔ sisi. Amlɔ nɛ ɔ, e ye jeha 70 kɛ se, nɛ e ngɛ blɔ gbami ní tsumi ɔ tsue jeha 20 kɛ se ji nɛ ɔ. E ye bua nihi kpaanyɔ nɛ a baptisi mɛ. E de ke: “E ngɛ mi kaa be komɛ ɔ, i gbɔjɔɔ mohu lɛɛ, se Yehowa yeɔ bua mi daa ligbi nɛ i tsuɔ fiɛɛmi ní tsumi ɔ.”

Mɛni blɔ nɔ nɛ Abraham kɛ Sara, Yakob, kɛ osɔfo ɔmɛ nɛ a po Yordan Pa a tsɔɔ kaa a ngɔ a hɛ kɛ fɔ Yehowa nɔ? (Hyɛ kuku 13)

13-14. Mɛni nɔ hyɛmi níhi ma nyɛ maa ye bua wɔ nɛ waa ngɔ wa hɛ kɛ fɔ Yehowa nɔ nɛ wa bli wa sɔmɔmi ní tsumi ɔ mi?

13 Moo kase nihi nɛ a ngɔ a hɛ kɛ fɔ Yehowa nɔ ɔ a nɔ hyɛmi ní ɔmɛ. Baiblo ɔ tu ni komɛ nɛ a ngɔ a he kɛ wo Yehowa sɔmɔmi mi vii ɔ a he munyu. Ngɛ a kpɛti nihi fuu a blɔ fa mi ɔ, benɛ a pee níhi nɛ tsɔɔ kaa a ngɔ a hɛ kɛ fɔ Yehowa nɔ ɔ se loko e jɔɔ mɛ. Kaa nɔ hyɛmi nɔ́ ɔ, benɛ Abraham si e we “pohu e li he nɛ e yaa a” se loko Yehowa jɔɔ lɛ. (Heb. 11:8) Benɛ Yakob kɛ bɔfo ko nɔ kunɔ ɔ se loko Yehowa jɔɔ lɛ ngɛ blɔ klɛdɛɛ nɔ. (1 Mose 32:24-30) Benɛ osɔfo ɔmɛ kɛ a nane ma Yordan Pa a mi ɔ se loko Israel bi ɔmɛ nyɛ nɛ a po pa a kɛ ya Si Womi Zugba a nɔ.—Yosh. 3:14-16.

14 Jehanɛ hu ɔ, o ma nyɛ ma ná Yehowa sɔmɔli nɛ a ngɛ mwɔnɛ ɔ nɛ a ngɔ a hɛ kɛ fɔ e nɔ nɛ a bli a sɔmɔmi ní tsumi ɔ mi ɔ a nɔ hyɛmi ní ɔmɛ a he se. Kaa nɔ hyɛmi nɔ́ ɔ, nyɛminyumu Payton kɛ e yo Diana pɔɔ nyɛmimɛ nɛ a bli a sɔmɔmi ní tsumi ɔ mi ɔ a he sane kanemi. Munyu nɛ ɔmɛ ekomɛ jeɔ kpo ngɛ munyu nɛ baa nɛ ji, “A Ngɔ A He Kɛ Ha Ngɛ Mɛ Nitsɛmɛ A Suɔmi Nya” a mi. * Payton de ke: “Ke wa ngɛ sane nɛ ɔmɛ kanee ɔ, e ngɛ kaa nɔ́ nɛ wa ngɛ nɔ ko nɛ e ngɛ niye ní ngɔngɔɛ ko yee ɔ hyɛe. Ke wa ya nɔ nɛ wa ngɛ hyɛe ɔ, e jloɔ wɔ kaa wɔ hu waa ‘sa wa nya nɛ waa hyɛ, konɛ waa na kaa Yehowa hi.’” Nyagbe ɔ, Payton kɛ Diana hia kɛ ya sɔmɔ ngɛ he nɛ fiɛɛli fuu a he hia ngɛ. Anɛ o kane munyu nɛ ɔmɛ lo? Nɛ o hyɛ videohi nɛ ji, Witnessing in Isolated Territory—AustraliaWitnessing in Isolated Territory—Ireland nɛ a pee kɛ fɔ jw.org ɔ nɔ ɔ lo? Ní nɛ ɔmɛ ma nyɛ maa ye bua mo nɛ o na blɔhi a nɔ nɛ o maa gu kɛ bli o sɔmɔmi ní tsumi ɔ mi.

15. Kɛ huɛmɛ kpakpahi nɛ waa kɛ maa bɔ ɔ maa ye bua wɔ ha kɛɛ?

15 O kɛ huɛmɛ kpakpahi nɛ bɔ. Ke waa kɛ nihi nɛ a yeɔ niye ní nɛ wa yi eko hyɛ ɔ bɔɔ ɔ, wa maa bɔ mɔde kaa wa maa ye jamɛ a niye ní ehe ɔ eko. Jã nɔuu kɛ̃ nɛ ke waa kɛ nihi nɛ a kɛ Yehowa sɔmɔmi yeɔ kekle blɔ he ngɛ a si himi mi ɔ bɔɔ ɔ, e be yee ha wɔ kaa wa ma hla blɔhi a nɔ nɛ wa maa gu kɛ bli wa sɔmɔmi ní tsumi ɔ mi. Nyɛminyumu ko nɛ a tsɛɛ lɛ ke Kent kɛ e yo Veronica na kaa munyu nɛ ɔ ji anɔkuale. Kent de ke: “Wa huɛmɛ kɛ wa weku li wo wɔ he wami kaa wa bli wa sɔmɔmi ní tsumi ɔ mi. Wa na kaa akɛnɛ waa kɛ nihi nɛ a kɛ Matsɛ Yemi ɔ yeɔ kekle blɔ he ngɛ a si himi mi bɔɔ he je ɔ, wa ná kã kɛ pee jã.” Amlɔ nɛ ɔ, Kent kɛ Veronica ngɛ sɔmɔe kaa blɔ gbali klɛdɛɛ ngɛ Serbia.

16. Ngɛ Yesu nɔ́ he tomi nɔ́ nɛ ngɛ Luka 12:16-21 ɔ nya a, mɛni he je nɛ e sa nɛ waa je wa suɔmi mi nɛ waa kɛ ní komɛ nɛ sã afɔle ɔ?

16 O kɛ níhi nɛ sã afɔle ha Yehowa. E he hia we nɛ wa kpa níhi tsuo nɛ wa bua jɔ a he ɔ peemi loko waa sa Yehowa hɛ mi. (Fiɛlɔ 5:19, 20) Se ke wa bli we wa sɔmɔmi ní tsumi ɔ mi akɛnɛ wa sume nɛ waa kɛ níhi nɛ wa bua jɔ a he ɔ nɛ sã afɔle he je ɔ, lɛɛ wa maa pee kaa nyumu ɔ nɛ ngɛ Yesu nɔ́ he tomi nɔ́ ɔ mi, nɛ e kua kaa e maa ngmɛɛ si himi nɛ ngɛ gbɔjɔɔ he nɛ e sɔmɔ Mawu ɔ. (Kane Luka 12:16-21.) Nyɛminyumu ko nɛ a tsɛɛ lɛ ke Christian nɛ e ngɛ France ɔ de ke: “I kɛ ye be kɛ ye he wami tsuo tsu we ní ngɛ Yehowa sɔmɔmi mi, nɛ i kɛ yi bua ye weku ɔ hulɔ.” E kɛ e yo ɔ mwɔ a yi kpɔ kaa a ma tsu blɔ gbami ní tsumi ɔ, se loko a ma nyɛ maa su oti nɛ ɔ he ɔ, jã a kpa ní tsumi nɛ a ngɛ tsue ɔ. A ya dlaa nihi a wehi loo ɔfisi a mi konɛ a ná sika bɔɔ ko nɛ a kɛ hyɛ a he, nɛ a bua jɔ sika bɔɔ nɛ a náa a he. Anɛ a bua jɔ kaa a kɛ ní komɛ sã afɔle nɛ a je blɔ gbami ní tsumi ɔ sisi lo? Christian de ke: “Wa bua jɔ wa fiɛɛmi ní tsumi ɔ he wawɛɛ, nɛ wa bua jɔɔ kaa wa naa nihi nɛ a suɔ nɛ a kase Yehowa he ní.”

17. Mɛni ma nyɛ ma ha nɛ e he nɛ wa ha wɔ kaa wa maa gu blɔ ehehi a nɔ kɛ fiɛɛ?

17 Moo bɔ mɔde kaa o kɛ o he maa wo sɔmɔmi ní tsumi ɔ fã ko nɛ o kɛ o he wui mi hyɛ ɔ mi. (Níts. 17:16, 17; 20:20, 21) E he ba hia nɛ nyɛmiyo ko nɛ a tsɛɛ lɛ ke Shirley nɛ e ji daa blɔ gbalɔ ngɛ United States ɔ nɛ e pee tsakemi ngɛ e fiɛɛmi ní tsumi ɔ mi benɛ COVID-19 hiɔ nɛ ɔ ba a. Sisije ɔ, e ye ha lɛ kaa e maa gu tɛlifoo nɔ kɛ fiɛɛ. Se benɛ kpɔ mi nɔ hyɛlɔ ɔ ba slaa mɛ nɛ e kɛ blɔ tsɔɔmi ha mɛ ɔ, e nyɛɔ nɛ e guɔ tɛlifoo nɔ kɛ fiɛɛɔ be fɛɛ be. E de ke: “Sisije ɔ, i ye gbeye bɔɔ, se amlɔ nɛ ɔ, i kɛ bua jɔmi ngɛ fiɛɛe. Wa nine suɔ nihi fuu a nɔ pe benɛ wa yaa wehi a mi fiɛɛmi ɔ po!”

18. Mɛni ma nyɛ maa ye bua wɔ nɛ waa da nyagbahi nɛ waa kɛ kpeɔ ke wa ngɛ hlae nɛ wa bli wa sɔmɔmi ní tsumi ɔ mi ɔ nya?

18 Moo ngɔ oti ko kɛ ma o hɛ mi nɛ o bɔ mɔde kaa o maa su he. Ke waa kɛ nyagbahi ngɛ kpee ɔ, wa sɔleɔ nɛ wa bɔɔ mɔde kaa wa ma susu níhi a he kɛ ya tsitsaa konɛ wa ná nyagba a he tsaba. (Abɛ 3:21) Daa blɔ gbalɔ ko nɛ a tsɛɛ lɛ ke Sonia nɛ e ngɛ kuu ko nɛ a tuɔ Romany gbi ngɛ mi ngɛ Europe ɔ de ke: “I suɔ nɛ ma ngma otihi nɛ i kɛ ma ye hɛ mi ɔ kɛ fɔ womi nɔ, nɛ i suɔ nɛ ma ngɔ womi ɔ kɛ fɔ he ko nɛ e nami be yee. I tɛni blɔhi enyɔ nɛ mɛ tsuo a yaa he slɔɔtohi ɔ ngɛ ye okplɔɔ nɔ. Ke ma mwɔ yi mi kpɔ ngɛ nɔ́ ko he ɔ, i hyɛɛ blɔhi enyɔ nɛ i tɛni ɔ, nɛ i hyɛɛ he nɛ ye yi mi kpɔ mwɔmi ɔ kɛ mi maa ya.” Sonia bɔ mɔde kaa e ma ná juɛmi nɛ da ngɛ nyagbahi nɛ e kɛ kpeɔ ɔ a he. E de ke: “Si fɔfɔɛ fɛɛ si fɔfɔɛ nɛ ma kɛ kpe ɔ ma nyɛ maa pee kaa gbogbo nɛ ngɛ mi blɔ tsie loo bridge nɛ ngɛ mi ye buae konɛ ma su oti nɛ i kɛ ma ye hɛ mi ɔ he. Se tsuo daa si ngɛ bɔ nɛ ma pee ye ní ha a nɔ.”

19. Mɛni nɛ e sa nɛ waa fia wa pɛɛ si kaa wa maa pee?

19 Yehowa jɔɔ wɔ ngɛ blɔhi fuu a nɔ. Ke wa bɔ mɔde nɛ wa pee nɔ́ fɛɛ nɔ́ nɛ wa ma nyɛ kɛ wo e hɛ mi nyami ɔ, lɔ ɔ tsɔɔ kaa wa bua jɔ ní kpakpahi nɛ e peeɔ kɛ haa wɔ ɔ he. (Heb. 13:15) Wa ma nyɛ maa pee ní slɔɔtoslɔɔtohi ngɛ Yehowa sɔmɔmi mi, nɛ lɔ ɔ ma ha nɛ e jɔɔ wɔ wawɛɛ. Daa ligbi ɔ, nyɛ ha nɛ wa hla blɔhi a nɔ nɛ wa maa gu kɛ ‘sa wa nya nɛ waa hyɛ, nɛ wa maa na kaa Yehowa hi.’ Ke wa pee jã a, wa maa pee kaa Yesu nɛ e de ke: “Ye niye ní ji kaa ma pee nɔ nɛ e tsɔ mi ɔ suɔmi nya ní nɛ ma gbe e ní tsumi ɔ nya” a.—Yoh. 4:34.

LA 80 “Moo Sa O Nya Nɛ O Maa Na Kaa Yehowa Hi”

^ kk. 5 Ní kpakpahi tsuo je Yehowa ngɔ. E haa wɔ tsuo ní kpakpahi nɛ yayami peeli po piɛɛ he. Se e sɔmɔli anɔkualetsɛmɛ titli ji nihi nɛ e suɔ nɛ e pee mɛ kpakpa. Ngɛ ní kasemi nɛ ɔ mi ɔ, wa maa na blɔhi a nɔ nɛ Yehowa guɔ kɛ peeɔ e sɔmɔli kpakpa. Jehanɛ hu ɔ, wa maa na bɔ nɛ Yehowa peeɔ e sɔmɔli nɛ a peeɔ babauu kɛ haa lɛ ɔ kpakpa ha.

^ kk. 7 A tsake biɛ ɔmɛ ekomɛ.

^ kk. 14 Be ko nɛ be ɔ, a ngmaa munyu nɛ ɔmɛ ngɛ Hwɔɔmi Mɔ ɔ mi, se amlɔ nɛ ɔ, a pee kɛ fɔ jw.org ɔ nɔ. Yaa ABOUT US > EXPERIENCES > REACHING SPIRITUAL GOALS.