1, 2. Зәбур 34:8 ајәсинә әсасән, Јеһованын кәрамәтини неҹә дада биләрик?

ТӘСӘВВҮР ЕДИН, сизә һеч вахт јемәдијиниз бир јемәји тәклиф едирләр. Сиз бу јемәјә бахсаныз, ијләсәниз, тәркибини өјрәнсәниз вә ја киминсә фикрини сорушсаныз, јемәк барәдә мүәјјән тәсәввүрүнүз јаранаҹаг. Амма бу јемәји бәјәниб-бәјәнмәјәҹәјинизи дәгиг билмәк үчүн ҝәрәк онун дадына бахасыныз.

² Биз Јеһованын кәрамәти һагда Мүгәддәс Китабдан, нәшрләримиздән охујуруг, һәмчинин башгалары алдыглары немәтләр һагда данышанда билирик. Амма јалныз Јеһованын кәрамәтини өзүмүз «дадандан» сонра Онун неҹә ҝөзәл Аллаһ олдуғуну там анлаја биләрик. (Зәбур 34:8 ајәсини охујун.) Мәсәлән, ҝәлин буну етмәјин бир үсулуна нәзәр салаг. Ола билсин, сиз Јеһоваја тамвахтлы хидмәт етмәк истәјирсиниз. Амма бу мәгсәдә чатмаг үчүн һәјатынызы садәләшдирмәлисиниз. Јәгин дәфәләрлә охумусунуз ки, әҝәр Падшаһлығы һәр шејдән үстүн тутсаг, Јеһова бизим зәрури еһтијаҹларымызы өдәјәҹәк. Амма өз үзәримиздә бу вәдин ҝерчәкләшдијинин шаһиди олмамышыг (Мәт. 6:33). Буна бахмајараг, Исанын бу вәдинә етибар едиб, хәрҹләримизи азалдырыг, ишимиздә дәјишиклик едирик вә хидмәтимизә көкләнирик. Бу јолла Јеһованын гејдимизә галдығыны шәхси тәҹрүбәмиздән өјрәнирик. Јеһованын кәрамәтини өзүмүз «дадырыг».

3. Зәбур 31:19 ајәсинә әсасән, Јеһова кимләрә гаршы кәрамәтлидир?

³ Јеһова «һамыја гаршы кәрамәтлидир», һәтта Ону танымајанлара гаршы да (Зәб. 145:9; Мәт. 5:45). Амма Ону севәнләрә, бүтүн варлығы илә Она хидмәт едәнләрә даһа чох  немәт верир. (Зәбур 31:19 ајәсини охујун.) Ҝәлин ҝөрәк бу немәтләрдән бәзиләри һансылардыр.

4. Јеһова Она јахынлашмаға башлајанлара Өз кәрамәтини неҹә ҝөстәрир?

⁴ Һәр дәфә Јеһовадан өјрәндикләримизи тәтбиг едәндә бунун хејрини ҝөрүрүк. Јеһованы таныјанда вә севмәјә башлајанда О бизә көмәк етди ки, Онун бәјәнмәдији фикирләрдән вә әмәлләрдән узаг ола биләк (Кол. 1:21). Өзүмүзү Јеһоваја һәср едиб вәфтиз олунанда Онун кәрамәтини даһа чох дујдуг. Белә ки, тәмиз виҹдана вә Онунла сых достлуг мүнасибәтләринә саһиб олдуг (1 Бут. 3:21).

5. Тәблиғ едәндә Јеһованын кәрамәтини неҹә дујуруг?

⁵ Тәблиғ хидмәтиндә иштирак етдикҹә биз Јеһованын кәрамәтини дујмаға давам едирик. Хасијјәтҹә утанҹаг инсансыныз? Јеһованын хидмәтчиләри арасында сизин кими инсанлар чохдур. Јәгин Јеһованын Шаһиди олмамышдан габаг һеч ағлыныза да ҝәлмәзди ки, јад инсанларын гапысыны дөјүб Мүгәддәс Китаб һагда данышарсыныз. Амма бу ҝүн буну мүнтәзәм едирсиниз. Үстәлик, Јеһованын көмәји сајәсиндә тәблиғ ишиндән зөвг алырсыныз. Јеһованын мүхтәлиф јолларла сизә дајаг олдуғуну һисс едирсиниз. О сизә хидмәтдә гаршылашдығыныз етиразлар заманы сакитлијинизи горумаға, марагланан инсанла данышаркән мүвафиг ајәни хатырламаға көмәк едир. Һәмчинин инсанлар чатдырдығыныз мүждәјә лагејд јанашанда тәблиғи давам етдирмәјә сизә ҝүҹ верир (Әрм. 20:7—9).

6. Јеһованын бизи өјрәтмәси Онун кәрамәтли олдуғуну неҹә ҝөстәрир?

⁶ Јеһова бизә гаршы кәрамәтини тәблиғ етмәји өјрәтмәклә дә ҝөстәрир (Јәһ. 6:45). Һәфтәарасы ҝөрүшләрдә сөһбәт планына аид јахшы тәртиб олунмуш видеолара бахырыг вә тәшвиг олунуруг ки, орадан өјрәндикләримизи хидмәт заманы тәтбиг едәк. Әввәл-әввәл һансыса јени үсулла тәблиғ едәндә, ола билсин, тәлаш кечиририк, амма сонра бу үсулун фајдасыны өзүмүз дә ҝөрүрүк. Һәмчинин ибадәт ҝөрүшләриндә вә топлантыларда тәблиғин әввәлләр иштирак етмәдијимиз нөвләриндә иштирак етмәјә тәшвиг олунуруг. Бу заман да өјрәшдијимиздән фәргли бир шеј етмәк лазым ҝәлир. Амма белә едәндә Јеһова ишимизи бәрәкәтли едир. Ҝәлин ҝөрәк вәзијјәтимиздән асылы олмајараг, Јеһоваја даһа чох хидмәт етмәк үчүн јени үсуллары сынагдан кечирсәк, һансы немәтләри алаҹағыг. Даһа сонра өјрәнәҹәјик ки, һансы аддымлар хидмәтимизи ҝенишләндирмәјә көмәк едә биләр.

7. Хидмәти ҝенишләндирмәк үчүн әлимиздән ҝәләни едәндә һансы немәтләри алырыг?

⁷Јеһоваја даһа да јахынлашырыг. Јолдашы илә бирҝә Колумбијада хидмәт едән Самуел * адлы ағсаггалын һадисәсинә бахаг. Онлар өз өлкәләриндә өнҹүл кими хидмәт едирдиләр, амма хидмәтләрини ҝенишләндириб еһтијаҹ олан јығынҹагда хидмәт етмәк истәјирдиләр. Лакин бу мәгсәдләринә чатмаг үчүн мүәјјән гурбанлар вермәли идиләр. Самуел дејир: «Мәтта 6:33 ајәсинә әмәл етдик вә лазымсыз хәрҹләримизә сон гојдуг. Бизим үчүн ән чәтини евимизи гојуб ҝетмәк иди. Бу ев чох үрәјимизҹә иди, үстәлик, ипотека да дејилди». Јени тәјинатларында онлар ҝөрдүләр ки, әввәлки ҝәлирләринин алтыда бири гәдәр мәваҹибә јашамаг мүмкүндүр. Самуел дејир: «Биз Јеһованын аддымларымызы  неҹә јөнәлтдијини, дуаларымыза неҹә ҹаваб вердијини ҝөрүрдүк. Биз Јеһованын разылығыны вә севҝисини тамам фәргли јөнләрдән дујмушуг». Бәс сиз хидмәтинизи һансыса саһәдә ҝенишләндирә биләрсиниз? Әмин олун ки, буну етсәниз, Јеһоваја даһа да јахынлашаҹагсыныз вә О сизин гејдинизә галаҹаг (Зәб. 18:25).

8. Иван вә Викторијанын сөзләриндән нә өјрәнирик?

⁸Хидмәтимиздән севинҹ дујуруг. Ҝәлин Гырғызыстанда өнҹүл кими хидмәт едән Иван вә Викторија адлы ҹүтлүјүн дедикләринә бахаг. Онлар садә һәјат сүрүрдүләр ки, көнүллү кими истәнилән тәјинатда, о ҹүмләдән тикинти лајиһәләриндә хидмәт едә билсинләр. Иван дејир: «Биз һәр лајиһәдә ҹанла-башла иштирак едирдик. Ҝүнүн сонунда јорулсаг да, үрәјимиз мәмнунлуг һисси илә долу иди. Чүнки билирдик ки, ҝүҹүмүзү Падшаһлығын ишинә сәрф етмишик. Һәмчинин газандығымыз јени достлар вә ҝөзәл хатирәләр бизә бөјүк севинҹ бәхш едирди» (Марк 10:29, 30).

9. Чәтинликләри олан бир баҹы хидмәтини ҝенишләндирмәк үчүн нә едиб вә бу һансы бәһрәни ҝәтириб?

⁹ Чәтин вәзијјәтдә олсаг да, Јеһоваја хидмәтдән севинҹ дуја биләрик. Мәсәлән, ҝөтүрәк Гәрби Африкада јашајан Миреј адлы дул баҹымызы. Әввәлләр о, һәким иди, тәгаүдә чыхандан сонра өнҹүллүјә башлады. Миреј баҹы артритин ағыр формасындан әзијјәт чәкир. О, һәр дәфә хидмәтә чыханда ҹәми бир саат ев-ев тәблиғ едә билир. Амма иҹтимаи шаһидликдә даһа чох хидмәт етмәјә ҝүҹү чатыр. О, чохлу инсанла тәкрар сөһбәтләр едир, Мүгәддәс Китаб дәрсләри кечир. Онлардан бәзиләри илә телефонла әлагә сахлајыр. Миреј баҹыны Јеһоваја даһа чох хидмәт етмәјә нә тәшвиг етмишди? О дејир: «Үрәјимдә Јеһоваја вә Иса Мәсиһә мәһәббәтим ашыб-дашыр. Јеһоваја тез-тез дуа едирәм ки, Она әлимдән ҝәлән гәдәр чох хидмәт етмәјимә көмәк етсин» (Мәт. 22:36, 37).

10. 1 Бутрус 5:10 ајәсинә әсасән, хидмәтини ҝенишләндирәнләр Јеһовадан һансы немәтләри алыр?

¹⁰Јеһовадан әлавә тәлим алырыг. Маврикидә өнҹүл кими хидмәт едән Кени гардаш буна өзү шаһид олуб. О, һәгигәти өјрәнәндә университетдән чыхды, вәфтиз олунду вә тамвахтлы хидмәтә башлады. О дејир: «Чалышырам: “Мән ҝедәрәм! Мәни ҝөндәр!” — дејән Әшија пејғәмбәрин сөзләринә ујғун јашајым» (Әшј. 6:8). Кени гардаш бир чох тикинти лајиһәләриндә иштирак едиб, һәмчинин Мүгәддәс Китаба әсасланан нәшрләрин ана дилинә тәрҹүмәсиндә көмәк едиб. О дејир: «Алдығым тәлим сајәсиндә тәјинатларымы иҹра етмәк үчүн лазым олан баҹарыглара јијәләнмишәм». Амма Кени тәкҹә өз иши илә бағлы биликләр алмајыб, даһа чох шеј өјрәниб. О бөлүшүр: «Өз мәһдудијјәтләрими баша дүшмүшәм, Јеһованын даһа јахшы хидмәтчиси олмаг үчүн һансы хүсусијјәтләри өзүмдә инкишаф етдирмәли олдуғуму өјрәнмишәм». (1 Бутрус 5:10 ајәсини охујун.) Сиз дә өз вәзијјәтинизи ҝөтүр-гој един. Ҝөрүн нә едә биләрсиниз ки, Јеһовадан әлавә тәлим ала биләсиниз.

11. Хидмәтләрини ҝенишләндирмәк үчүн Ҹәнуби Корејадакы баҹылар нә етдиләр вә бу һансы нәтиҹәни верди? (Һәмчинин үз габығындакы шәклә бахын.)

¹¹ Һәтта тәҹрүбәли Јеһованын Шаһидләри дә јени хидмәт нөвләрини сынагдан кечирәндә чох шеј өјрәнирләр. COVID-19 пандемијасы вахты Ҹәнуби Корејадакы бир јығынҹағын ағсаггаллары јазмышды: «Сәһһәтләринә ҝөрә саһә хидмәтиндә иштирак едә билмәдикләрини дүшүнәнләр инди видеоконфранс васитәсилә тәблиғ едирләр. 80 јашларында олан үч баҹымыз јени технолоҝијалардан  истифадә етмәји өјрәниб вә инди демәк олар ки, һәр ҝүн саһә хидмәтиндә иштирак едирләр» (Зәб. 92:14, 15). Сиз дә истәјәрдиниз, хидмәтинизи ҝенишләндириб, Јеһованын кәрамәтини даһа чох дадасыныз? Ҝәлин ҝөрәк бу мәгсәдә чатмаг үчүн һансы аддымлары ата биләрсиниз.

12. Јеһова Она ҝүвәнәнләрә нә вәд едиб?

¹²Јеһоваја ҝүвәнмәји өјрәнин. О вәд едир ки, Она етибар етсәк вә Онун јолунда әлимиздән ҝәләни етсәк, башымыздан бәрәкәт төкәҹәк (Мәл. 3:10). Колумбијада јашајан Фабиола адлы баҹы Јеһованын бу вәдини неҹә јеринә јетирдијинә өзү шаһид олуб. О, вәфтиз олунандан дәрһал сонра өнҹүл кими хидмәт етмәк истәјирди. Амма әринин вә үч ушағынын доланышығы ондан асылы иди. Баҹынын тәгаүдә чыхмасы мүмкүн оланда Јеһоваја һәрарәтлә дуа едиб көмәк истәди. Баҹы дејир: «Адәтән тәгаүдүн тәјин олунмасы узун чәкир. Амма мәним ишим бир ајын ичиндә һәлл олунду. Бу, мөҹүзә иди!» Ики ај сонра о, өнҹүл хидмәтинә башлады. Инди Фабиола баҹынын јашы 70-и һаглајыб вә о, 20 илдән чохдур ки, өнҹүл кими хидмәт едир. Бу мүддәт әрзиндә баҹы сәккиз инсана өзүнү Јеһоваја һәср едиб вәфтиз олунмаға көмәк едиб. Баҹы дејир: «Бәзән өзүмү зәиф һисс етсәм дә, Јеһова өнҹүл кими хидмәт етмәјим үчүн һәр ҝүн мәнә ҝүҹ верир».

13, 14. Јеһоваја ҝүвәнмәјә вә хидмәтимизи ҝенишләндирмәјә һансы нүмунәләр көмәк едә биләр?

¹³Јеһоваја ҝүвәнәнләрдән өрнәк алын.  Мүгәддәс Китабда Јеһоваја фәдакарҹасына ибадәт едән чохлу инсанын нүмунәси вар. Әксәр һалларда Јеһованын мөмин бәндәләри өзләри илк аддымы атандан сонра Јеһовадан немәтләр алыблар. Мәсәлән, Ибраһим пејғәмбәр «һара ҝетдијини билмәсә дә», јурдуну тәрк етди Јалныз бундан сонра Јеһова она немәтләр верди (Ибр. 11:8). Јагуб мәләклә ҝүләшәндән сонра хејир-дуа алды (Јар. 32:24—30). Јахуд да ҝөтүрәк Исраил халгынын Вәд едилмиш дијара дахил олмасыны. Каһинләр ҝур ахан Иордан чајына ајаг басандан сонра сулар дајанды вә халг чајы кечә билди (Јуш. 3:14—16).

¹⁴ Сиз һәмчинин Јеһоваја ҝүвәнән вә хидмәтини ҝенишләндирән мүасир дөврдәки диндашларыныздан өрнәк ала биләрсиниз. Пајтон вә јолдашы Диана «Хидмәтә һазыр көнүллүләр» * рубрикасындан вә диҝәр мәгаләләрдән өзләрини Јеһоваја һәср едән инсанлар һагда охумағы хошлајырдылар. Пајтон дејир: «Бу нүмунәләри охумаг санки дадлы јемәк јејән инсана бахмаға бәнзәјир. Онлара нә гәдәр чох бахырдыгса, Јеһованын неҹә ҝөзәл Аллаһ олдуғуну дадмаг истәјимиз бир о гәдәр артырды». Нәһајәтдә, Пајтон вә Диана тәләбат олан әразијә көчүб, орада хидмәт етдиләр. Бәс сиз бу рубриканы охумусунуз? Бизим jw.org сајтымыздакы «Уҹгар әразидә тәблиғ — Австралија», «Уҹгар әразидә тәблиғ — Ирландија» адлы видеолара бахмысыныз? Бунлар сизә көмәк едәҹәк ки, хидмәтинизи ҝенишләндирмәк үчүн јоллар ахтарасыныз.

15. Јахынларымыз бизә неҹә көмәк едә биләр?

¹⁵Сизи хидмәтинизи ҝенишләндирмәјә тәшвиг едән инсанларла отуруб-дурун. Дадыны билмәдијимиз јемәји илк дәфә јемәк чәтин ола биләр. Амма әтрафдакы инсанлар ону бәһ-бәһлә јејәндә онун дадына бахмаға даһа үрәкли олуруг. Ејнилә биз дә һәјаты Јеһоваја хидмәт әтрафында ҹөвлан едән инсанларла отуруб-дурсаг, Јеһоваја хидмәтимизи ҝенишләндирмәк үчүн даһа чох ҹан атаҹағыг. Кент вә Вероника да буна өзләри шаһид олуб. «Достларымыз вә аиләмиз бизи хидмәтимиздә јени сәһифә ачмаға тәшвиг едирди», — дејә Кент бөлүшүр вә сөзүнә давам едир: «Падшаһлығы һәр шејдән үстүн тутан инсанларла отуруб-дурмаг бизи үрәкләндирди ки, јени шејләри сынагдан кечирәк». Һал-һазырда Кент вә Вероника Сербијада хүсуси өнҹүл кими хидмәт едир.

16. Лука 12:16—21 ајәләринә әсасән, гурбанлар вермәјә нәјә ҝөрә тәрәддүд етмәмәлијик?

¹⁶Јеһованын јолунда гурбанлар верин. Јеһованы разы салмаг о демәк дејил ки, севдијимиз һәр шејдән ваз кечмәлијик (Ваиз 5:19, 20). Амма һеч нәји гурбан вермәк истәмәдијимиз үчүн Јеһоваја хидмәти ҝенишләндирмәк истәмириксә, Исанын бир мәсәлиндәки адамын сәһвини тәкрарламыш оларыг. О, Аллаһы унудуб, өзүнә раһат шәраит гурмушду. (Лука 12:16—21 ајәләрини охујун.) Франсада јашајан Кристиан адлы гардаш дејир: «Мән вахтымын вә ҝүҹүмүн чохуну Јеһоваја вә аиләмә сәрф етмирдим». Кристиан вә јолдашы өнҹүл олмаг гәрарына ҝәлир. Амма бу мәгсәдә чатмаг үчүн онлар ишләрини дәјишмәли идиләр. Онлар өзләрини доландырмаг үчүн тәмизлик хидмәти тәклиф едән офис ачдылар. Һәмчинин аз шејә гане олмағы өјрәндиләр. Бу ҹүр гурбанлар вермәјә дәјәрди? Кристиан дејир: «Инди хидмәт бизә даһа чох зөвг верир. Тәкрар сөһбәт етдијимиз  вә дәрс кечдијимиз инсанларын Јеһова һагда өјрәндијини ҝөрмәк бизә бөјүк севинҹ ҝәтирир».

17. Бир баҹыја өјрәшмәдији хидмәт үсулуну сынагдан кечирмәјә нә көмәк етди?

¹⁷Јени хидмәт нөвләрини дадын (Һәв. 17:16, 17; 20:20, 21). Бирләшмиш Штатларда өнҹүл кими хидмәт едән Ширли COVID-19 пандемијасы заманы хидмәтинә бәзи дәјишикликләр етмәли олду. О, телефонла тәблиғ етмәјә чәкинирди. Амма рајон нәзарәтчисинин зијарәти заманы тәлим аландан сонра о, мүнтәзәм олараг хидмәтин бу нөвүндә иштирак етмәјә башлады. О дејир: «Әввәл-әввәл горхурдум. Амма инди бу хидмәт мәнә ләззәт едир. Һеч ев-ев тәблиғ едәндә бу гәдәр инсанла данышмырдыг!»

18. Хидмәтимизи ҝенишләндирәркән үзләшдијимиз чәтинликләри ашмаға нә көмәк едә биләр?

¹⁸План гурун вә һәрәкәтә кечин. Чәтинликләрлә үзләшән заман Јеһоваја дуа едирик ки, чыхыш јолу тапмаг үчүн дүшүнҹәмизи ишә салмаға көмәк етсин (Мәс. 3:21). Авропада гарачыдилли групда хидмәт едән Сонја адлы баҹы дејир: «Мән мәгсәдләрими бир кағыза јазырам вә ону ҝөз габағына гојурам. Масамын үстүндә фәргли тәрәфләрә ҝедән ики јол шәкли вар. Гәрар вермәли оланда бу јоллара бахыб фикирләширәм ки, гәрарым мәни һара апараҹаг». Сонја гаршылашдығы чәтинликләрә никбин бахмаға чалышыр. О дејир: «Јаранан вәзијјәт јолуму кәсән дивар да ола биләр, мәгсәдимә апаран көрпү дә. Һәр шеј мәним мүнасибәтимдән асылыдыр».

19. Нә етмәк әзминдә олмалыјыг?

¹⁹ Јеһова мүхтәлиф јолларла бизә немәтләр верир. Ону мәдһ етмәк үчүн әлимиздән ҝәләни етмәклә бу немәтләрә ҝөрә Она миннәтдар олдуғумузу ҝөстәририк (Ибр. 13:15). Јеһованы мәдһ етмәјин бир үсулу хидмәтимизи ҝенишләндирмәк үчүн јени јоллар ахтармагдыр. О, буну әвәзсиз гојмајаҹаг, бизә башга немәтләр дә бәхш едәҹәк. Ҝәлин дадыб, Јеһованын неҹә ҝөзәл Аллаһ олдуғуну ҝөрмәк үчүн һәр ҝүн мүхтәлиф јоллар ахтараг. Онда Иса Мәсиһ кими, биз дә дејәҹәјик: «Мәним јемәјим мәни ҝөндәрәнин ирадәсини јеринә јетирмәк вә Онун бујурдуғу иши тамамламагдыр» (Јәһ. 4:34).