1-2. Inoñnaga ni kaat Tjémbi 34:9, lelaa di nla nôgda toi le Yéhôva a yé loñge?

HÉGDA le mut a nkébél we bijek u mah je bé kekikel. Inyu nigil i je gwo u mbéñge ndugi gwo loñge, u numbe gwo, u bat lelaa ba nlamb gwo, tole u bat bôt bape ba ma je gwo too ba ngwés gwo. Ndi inyu boñ le di yi too bi yé toi bilam, bésbomede di nlama noode gwo.

² Di nla yi toi le Yéhôva a yé loñge ibale di ñañ Bibel ni bikaat bi ntôñ ni ibale di nkwel ni bôt ba bi kôs bisai bi Yéhôva. Ndi di ga nôgda hala tôbôtôbô ibale bésbomede di ‘noode’ loñgeñem i Yéhôva. (Añ Tjémbi 34:9.) Di yoñ hihéga hiada hi hi ñunda i jam li. Di hégda le di nsômbôl yila ngwelnson nu ngéda yosôna, i ga béda le di suhus nkôm wés u niñ inyu yônôs i njômbi i. Tole di mbéna añ unu mbônga u Yésu le ibale di mboñ le Ane i Nyambe yon i ba jam li bisu i niñ yés, Yéhôva a’ ti bés mana mam mape ma yéne toi bés nseñ, bésbomede di yé ngi tehe bipôdôl bi bi yon i ngii yés. (Matéô 6:33) Ndi to hala, kiki di nhémle Yésu, di nyén, di ôt nsoñgi, di suhus libim li moni di pémhak, di suhus yak ngeñ yés i bôlô, inyu bana ngandak ngéda inyu likalô. Mu kii di mboñ biliya bi, bésbomede di ga nôgda toi le Yéhôva a nyoñ ndun ni bés. Di nla kal ha ngéda i le di ‘noode,’ di nôgda le Yéhôva a yé loñge.

3. Inoñnaga ni kaat Tjémbi 16:1, 2, bonjee ba nkôs bisai bi Yéhôva?

³ Yéhôva a yé “loñge inyu bôt bobasôna,” yak inyu i  bet ba nyi bé nye. (Tjémbi 145:9; Matéô 5:45) Ndi tôbôtôbô, Yéhôva a nlôôha sayap i bet ba ngwélél nye, ba gwéhék nye ni ñem wap wonsôna. (Añ Tjémbi 16:1, 2.) Béñge ndék manjel Yéhôva a ngwélél inyu unda bés loñge yé.

4. Lelaa Yéhôva a ñunda i bet ba ntip bôdôl kôôge nye bebee loñge yé?

⁴ Hiki ngéda di mbii i mam di nigil bibôñôl, bésbomede di ntehe kiki niñ yés i nlama. Kiki di nke ni bisu i yi Yéhôva ni i gwés nye, a nhôla bés i tjôô mahoñol ni maboñok a ngwés bé. (Kôlôsé 1:21) Ngéda di nti bésbomede nkikip yak Yéhôva, di sôblana, di nkônde nôgda le Yéhôva a yé loñge, mu kii a nti bés kiññem i mpôp, a nhôla ki bés i yila mawanda mé.​—1 Pétrô 3:21.

5. Lelaa di nôgda le Yéhôva a yé loñge mu nson wés likalô?

⁵ Di nke ni bisu i nôgda le Yéhôva a yé loñge ngéda di ntégbaha ngandak ngéda i nson likalô. Baa u yé nsut? Yi le u ta bé wetama. Bebek ilole u nyila Mbôgi Yéhôva u bé yi bé le u yé le u koode likôga li mut inyu añle nye ñañ nlam. Ndi len, u meya likalô. Ni mahôla ma Yéhôva, u meya ndik bé jo, ndi u ngwés yak jo! Yéhôva a nit we ni ngandak manjel. A nhôla we i gwel wemede ngéda mut a ntjél ñañ nlam, a buñga we i nyeni. A yé a hôla we i bigda nlôñ Bibel u nlama gwélél inyu hôla mut a ngwés maliga i nok ngim jam. A nti yak we ngui i ke ni bisu i téé likalô ngéda bôt ba libôga joñ ba ngwés bé ñañ nlam.​—Yérémia 20:7-9.

6. Lelaa loñge i Yéhôva i nene mu kii a niiga bés?

⁶ Yéhôva a ñunda ki bés loñge yé mu kii a niiga bés i téé likalô. (Yôhanes 6:45) I likoda li ñem sonde, di nigil majubul ma nkwel malam di nla gwélél likalô. Di nla kon woñi i gwélél majubul ma mondo, ndi i ngéda di noode, di nla nôgda le mon ma nhôla ngandak bôt ba libôga jés i neebe ñañ nlam. Ñ, i makoda més ni i makoda ma ndôn, ba niiga bés makeñge ma likalô ma mondo di nla noode mu nson wés. I yé maliga le i gwélél makeñge ma i ta bé jam li ntomb, ndi ngéda di mboñ biliya bi, di nti Yéhôva pôla i sayap bés. Di tehe ngim bisai di nkôs ngéda di ngwélél manjel ma mondo inyu boñ kii yosôna di nla i nson u Nyambe. Mbus, di ga tehe lelaa di nla kéñbaha nson wés.

7. Bimbe bisai di nkôs ngéda di mboñ biliya bi ngui i kéñbaha nson wés likalô?

⁷ Di nkônde kôôge Yéhôva bebee. Di yoñ hihéga hi mañ wada le Samuel, * nu bo nwaa ba yiine i loñ Kolombia. Babiina bana ba bé basañal likoda jap, ndi ba bé sômbôl ke i nit likoda li li bééna ngôñ ikeñi i batéé likalô. Ndi inyu yônôs njômbi yap, i bé béda le ba boñ bisesema bi ngui. Samuel a nkal le: “Di bi kit le di mbôdôl noñ maéba ma yé i kaat Matéô 6:33, hala wee di nsomb ha bé gwom bi tane bé bés nseñ. Ndi i sesema ikeñi i bi lôôha tééñga bés i bé le di bi nyodi i mbôm yés ndap. I bi ôña tôbôtôbô inyu yés, i bé yaga i yés yés.” Ngéda ba bi bol likoda jap li mondo, ba bi nôgda le ba bé le ba niñ  ni ndék moni ndigi. Mankéé Samuel a nkal le: “Di bi nôgda le Yéhôva a ngwel bés i woo inyu éga bés, ñ, a bé timbhe masoohe més. Di bé yi le Yéhôva a yé maséé ni bés, di nôgdaga gwéha yé iloo ngéda bisu.” Baa yak we u nla kéñbaha nson woñ? Ibale u mboñ biliya bi, w’a kôôge bebee ni Yéhôva, a ga yoñ ki ndun ni we.​—Tjémbi 18:26.

8. Bimbe biniigana di ñôt mu yom Ivan bo Viktoria ba nkal?

⁸ Nson wés u nti bés maséé. Di ôt biniigana mu jam Ivan bo Viktoria, babiina ba ba yé basañal i Kirgizstañ ba nkal. Ba bi tjél bana niñ ikeñi, inyu ba bebee i neebe to umbe nson ba yé le ba ti bo, kiki bo nson maoñ. Ivan a nkal le: “Hiki nson ba bé ti bés, di bé sal wo ni ngui yés yosôna. Tolakii di bé nwaak mamélél ma kel, di bé maséé ngandak, di yik le di nti ngui yés yosôna inyu nson u Yéhôva. Di bi bana ngandak mawanda, di boñ ki ngandak mam ikété ntôñ, ma di ga hôya bé.​—Markô 10:29, 30.

9. Kii sita yada i i bi boma mandutu i bi boñ inyu kéñbaha nson wé, mam ma bi sôk lelaa?

⁹ Di nla ba maséé i nson u Yéhôva to di mboma mandutu. Mirreh, ñunuk yik muda nu a yé i pes hiôñk i Afrika, a bi yoñ bôlô nsañal ngéda a bi téé bôlô i dokta. Sita Mirreh a nkon bihés, jon a nla bé nom likalô li mandap ni mandap iloo ngeñ yada. Ndi a bé le a nom likalô li mbamba. A gwé ngandak mapeple ni gwigil, bipe a ntégbaha gwo ni téléfôn. Kii i bé tinde Mirreh i kéñbaha nson wé inyu Yéhôva? A nkal le: “Me nlôôha gwés Yéhôva ni Kristô Yésu. Me mbéna soohe Yéhôva le a hôla me i boñ kii yosôna me nla i nson wé.”​—Matéô 22:36, 37.

10. Inoñnaga ni kaat 1 Pétrô 5:10, kii Yéhôva a mboñ ni i bet ba nkéñbaha nson wap?

¹⁰ Yéhôva a niiga bés. Kenny nu a yé nsañal i loñ Môritania a bi nôgda i jam li. Ngéda a bi yi maliga, a téé suklu, a sôblana, a yoñ bôlô nsañal. A nkal le: “Me noode niñ inoñnaga ni i yom mpôdôl Yésaya a bi kal, le: ‘Me nunu! Om me!’” (Yésaya 6:8) Kenny a bi sal ngandak maoñ ma ntôñ, a hôla yak i kobol bikaat ni hilémb hié. A nkal le: “Me bi nigil makeñge ma bôlô ma ma bi hôla me i gwel minson ba bé ti me.” A bi nigil ndik bé lelaa ba ngwel minson mi. A nkônde le: “Minson mi mi bi niiga me le me nla bé boñ mam momasôna, ngim mam i nlédél me i boñ, i hôla ki me i yi le me nlama sal ngim bilem inyu yila bañga ngwélél Yéhôva.” (Añ 1 Pétrô 5:10.) Wanba inyu yi too u nla kônde kéñbaha nson woñ inyu boñ le Yéhôva a kônde mma we.

11. Bimbe biliya bisita bi Kôré nwelmbok bi bi boñ inyu yoñ ngaba i nson likalô, mam ma bi sôk laa? (Béñge titii i lipep li bisu.)

¹¹ Yak i bet ba yé Mbôgi Yéhôva ibôdôl behee ba nigil ngandak, i ngéda ba noode nson mondo. Munu mangéda ma COVID-19 mana, mimañ mi Kôré nwelmbok mi bi tila le: “Ngim lôk kéé i i bé bé le i pam likalô, i nla téé likalô nano ni njel téléfôn. Bilôk bikéé bi bôda biaa bi bi nigil likeñge li mondo li, kayéle nano ba ntéé likalô bebee le hiki kel. (Tjémbi 92:15, 16) Baa u yé le u kéñbaha nson woñ inyu noode ni tehe le Yéhôva a yé loñge?  Nano di béñge ngim mam i i nla hôla bés i yônôs i njombi i.

12. Kii Yéhôva a mbôn i bet ba mbôdôl nye ñem?

¹² Nigil i bôdôl Yéhôva ñem. Yéhôva a mbôn le ibale di mbôdôl nye ñem, di boñ ki kii yosôna di nla i nson wé, a ga kôp bés bisai. (Malaki 3:10) Sita yada le Fabiôla nu a yé Kolombia a nkal le a bi nôgda hala. A bé sômbôl yila nsañal nu ngéda yosôna i mbus sôble yé. Ndi i bôlô a bé sal yon i bé jés lihaa jé. Jon i ngéda a pamna nwii le a téé bôlô, a bi yemhe Yéhôva le a hôla nye. A nkal le: “Hala a yé a bat ngandak ngéda inyu boñ le moni mi mut mi pam i mbus le a ntéé bôlô, ndi hélha jam, nwem mi bi boñ ndigi sôñ yada.” Sôñ iba i mbus ngéda, a yila nsañal. Nano a nloo 70 ma nwii, a yé nsañal hala a nloo 20 ma nwii. Mu mangéda ma momasôna, a nhôla bôt juem i hol ikepam i sôble. A nkal le: “Tolakii me yé me ba nwaak ngim mangéda, Yéhôva a nhôla me i yônôs nsoñgi wem ngeñ hiki kel.”

13-14. Dimbe dihéga di nla hôla bés i bôdôl Yéhôva ñem ni i kéñbaha nson wés likalô?

¹³ Di ôt nseñ ni dihéga di bôt ba ba bi bôdôl Yéhôva ñem. Bibel i yé nyonok ni dihéga di bôt ba ba bi sal ngandak inyu Yéhôva. Ngandak bagwélél ba Yéhôva ba bi bôk ndugi ba boñ ngim jam i i bé unda le ba mbôdôl Yéhôva ñem ilole Yéhôva a nsayap bo. Kiki hihéga,  ngéda Abraham a bi nôgôl Yéhôva, nu a bat nye le a nyodi i mbai yé, inyu ke i homa a bé yi bé. (Lôk Héber 11:8) I mbus Yakôb a jôs añgel nyen a bi kôs bisai bi tôbôtôbô. (Bibôdle 32:24-30) Ndik i ngéda biprisi bi bi téé makôô map i Lom Yordan nyen litén li Israel li bi pam i yap lép inyu jôp Hisi hi Likak.​—Yôsua 3:14-16.

¹⁴ U nla yak ôt nseñ ni ndémbél i ngandak Mbôgi Yéhôva i len ini i i bi bôdôl Yéhôva ñem, i kéñbaha nson wap. Kiki hihéga, mankéé Payton bo nwaa Diana, ba bi kon maséé ngandak mu kii ba bi soñgol miñañ mi lôk kéé i bôlôm ni i bôda i i bi kéñbaha nson wap mi mi bé pam i Nkum Ntat isi ño nkwel le, “Ba nti bomede nkikip ni ñem wap wonsôna.” * Payton a nkal le: “Ngéda di ñañ miñañ mi, a yé ndik wee di yé i béñge mut a nje bijek bi nlémél nye ngandak. Kiki di nke ni bisu i béñge, hala a ntinde bés i ‘noode ni i tehe le Yéhôva a yé loñge.’” I mbus ngéda Payton bo Diana, ba bi ke i téé likalô i het ba bééna ngôñ ni batéé likalô. Baa u ma añ ba Nkum Ntat ba? Baa u ma béñge bividéô bini ni hop Pulasi le, Prédication dans des régions isolées: Australie ni Prédication dans des régions isolées: Irlande i jw.org? Miñañ mi yé mu, mi nla hôla we i léba manjel inyu kéñbaha nson woñ.

15. Lelaa bilôñ bilam bi nla hôla bés i kéñbaha nson yés.

¹⁵ Yéñ biloñge bi mawanda. Di yé di ngwés di noode bijek di nyi bé i ngéda di yé lôñni bôt ba ba ngwés gwo. Ibale mawanda més ma yé bôt ba ba ntégbaha ngéda yap yosôna i nson u Yéhôva, hala a ga tinde bés i mboñ nlélém. I jam li jon li bi pémél babiina bana le Kent bo Vérônika. Kent a nkal le: “Mawanda més ni bôt bés ba lihaa ba bé ti bés makénd i noode minson mimpe mi ntôñ. Di bi nôgda le i ngéda di yé ni nya mawanda i i mbii ngwéñe bi mbuu kiki jam li bisu i niñ yap, hala a nti bés makénd i noode minson mi mondo ibabé i kon woñi.” Nano Kent bo Vérônika ba yé basañal ba tôbôtôbô i loñ i Serbia.

16. Kiki hihéga hi Yésu di nléba i kaat i Lukas 12:16-21, inyuki di nlama ba bebee i boñ bisesema?

¹⁶ Boñ bisesema. Inyu lémél Yéhôva, mut ta bé nyégsaga i tjôô mam malam momasôna. (Ñañal 5:19, 20) Ndi ibale di ntjél kéñbaha nson wés inyu Yéhôva, inyule di gwé bé ngôñ i boñ bisesema, di yé le di pôna i ngwañ mut Yésu a bi pôdôl mu hihéga hié, nu a bi yéñ bé ba ngwañ bisu bi Djob. (Añ Lukas 12:16-21.) Mankéé wada le Christian nu a yé i loñ i Pulasi a nkal le: “Me bé lôôha bé ti ngéda yem ni ngui yem i nson u Yéhôva, to inyu lihaa jem.” Christian bo nwaa ba bi yoñ makidik i yila basañal. Ndi inyu yônôs njômbi yap ba bé lama tjôô bôlô yap. Inyu bana koga i kel, ba bé kon maséé ni ndék moni ba bé kôs mu kiki ba bé sas mandap ma bôt. Baa ba bi kon maséé ni bisesena ba bi boñ? Christian a nkal le: “Di yé di ba maséé i hôla bôt i yi Yéhôva i ngéda di nigil Bibel ni bo, di boñok mapeple.”

17. Kii i nla hôla bés i ke ni bisu i noode minson mi mondo mu nson wés likalô?

 ¹⁷ Noode minson mi mondo. (Minson mi baôma 17:16, 17; 20:20, 21) Sita Shirley nsañal wada Amérika a bi tehe nseñ i héñha makeñge ma likalô i ngéda himala hi COVID-19 hi bi bôdôl. I bibôdle, a bé kon woñi i téé likalo ni téléfôn. I mbus mayuuga ma ngwélél makiiña ni biniigana a bi ti bo, a bi yik meya likalô li téléfôn, a nkal le: “I bibôdle me bé kon woñi, ndi nano me ngwés likalô li ngandak. I nsoñgi bôt likalô li téléfôn li nhôla bés i tihba u nloo nsoñgi u bôt di bé boma likalô li mandap ni mandap!”

18. Kii i nla hôla bés i yémbél mandutu mu kiki di nkéñbaha nson wés?

¹⁸ Bana ngim ntjega, u noñ ki wo. I ngéda di mboma mandutu di mbat Yéhôva mahôla ikété masoohe, di ôt ki pék inyu yi kii di ga boñ. (Bingéngén 3:21) Sônia nu a yé nsañal ni nu a nit likoda ni hop u Romania i Érôpa a nkal le: “Me mbéna tila i yom m’a boñ i péba me péñg yo ngim homa i het me ba me ntehe yo. Me bi ôt titii i minloñ ima, me bii yo i ngii téblé. I ngéda i mpam le me yoñ makidik me mbadba imbe njel me yoñ inyu boñ le me pam i yônôs njômbi yem. Sônia a nkal le: “Hiki ndutu me mboma i nla ba me kiki libap li li nkéñ me tole kiki nyaañga u u nhôla me i ke i bisu inoñnaga ni kiki me nyoñ yo.”

19. Mambe makidik di nlama yoñ?

¹⁹ Yéhôva a ngwélél ngandak manjel inyu sayap bés. Di ñunda le di nti Yéhôva mayéga inyu bisai bi mu kiki di mboñ kii yosôna di nla inyu bégés nye. (Lôk Héber 13:15) Mu mam ma, i noode manjel ma mondo inyu kéñbaha nson wés i nkônde bés bisai. Jon hiki kel di yéñ manjel i ‘noode ni tehe le Yéhôva a yé loñge.’ Ha i ngéda i, di ga ba kiki Yésu nu a kal le: “Bijek gwem bi yé le me boñ sômbôl i nu a bi om me, me mélés ki nson wé.”​—Yôhanes 4:34.