1-2. Imnis Mazmur 34:8, rariso na kofawi kaku Yahwe frur pyum Ḇyena rai?

WAWASEN pan sbuk roḇean ḇe Au ḇoi wakan na ro ras oso ḇaime. Wawasen moḇsa roḇean ani nḇair rai fyor mam, wanas sananarem ya, wasya roi sbukifrur na, ḇaido wafuken faro snonggaku ḇesesya. Ḇape, na insape wafawi wamarisen roḇean ani ke roḇa fyor warepen na ro manggundaw.

² Kofarkor roi oso ro Yahwe frur pyum Ḇyena kuker kowasya Refo ma syap koḇedi ḇaido korower fawar ro snonggaku ḇeḇaḇir roi ḇepyum Yahwe ifrur kwar ḇe si na. Ḇape, insape kofawi kaku snar Yahwe ima ipyum fyor koḇaḇir ro manggun ko kwar. (Wasya Mazmur 34:8.) Rupa radine: Komarisen kofarmyan ro fararur ro oras nakam. Ḇoi infa kofrur roi ani, fandun fa kokenem syadadi ḇa. Imbude kowasya ker Yesus asas ḇyena ro Matius 6:33, isoine Yahwe nari fyasos roi nakam kofandun na fyor kosewar ḇepon Karajan Ḇyedi. Imbape, komam ḇaim Yahwe ifrur roi ani ḇe ko, kokyar pdef faro asas ani. Inja, kosasyar pipi fa nabro ḇa, kofrur mnis jadwal fararur koḇena, ma komam monda faro fararmyam koḇena. Komam kaku snar Yahwe fyasos fandun koḇena, insape koḇaḇir ro manggun ko Yahwe frur pyum Ḇyena.

3. Imnis Mazmur 16:1, 2, mansei ḇesmai Yahwe frur pyum Ḇyena?

³ Yahwe ”ipyum kaku faro snonggaku syakam”, ma faro  snonggaku ḇemambir I ḇa sya kako. (Mz. 145:9; Mat. 5:45) Ḇape, ḇepon kaku, Ipyum faro snonggaku ḇeswar ma ḇefarmyan I kuker sne ḇesiper. (Wasya Mazmur 16:1, 2.) Mgorama kawos rosai monda frur pyum Yahwe Ḇyena faro ko na.

4. Rariso Yahwe fyasnai frur pyum Ḇyena faro snonggaku ḇefanam faro I sya?

⁴ Fafisu kofrur rosai Yahwe dor na, nari komam bon ḇepyum ya. Rofyor kofarkor nabor syadi ro Yahwe ma insape koswar I, ifnoḇek ko fa kosawen kakara ma rari ḇeḇyeḇa ḇefrur kobinggwanbur ro I. (Kol. 1:21) Mura, rofyor kobuk kankenem koḇena faro Yahwe ma koḇebaptis ido, koḇaḇir frur pyum Ḇyena, snar byuk sneuser ḇesren ma iyer ko fa koḇebati kuker I.​—1 Ptr. 3:21.

5. Rariso koḇaḇir Yahwe frur pyum Ḇyena ro ḇaḇebaryas koḇena?

⁵ Ro ḇaḇebaryas, koḇaḇir Yahwe frur pyum Ḇyena ḇesya kwar. Imnis ra, Auma snonggaku ḇe mamyai risau ke? Yahwe manfamyan ḇebor Ḇyesi simnis rarirya. Rofyor ḇe Saksi ḇaim, imbude kwara ḇaḇeri nari wanuk kedwa ro rum snonggaku sena fa wawos Refo ya. Ḇoi, kirine wafrur roi ani ḇesya kwar. Kuker fafnoḇek ro Yahwe I, wasmai marisen ro ḇaḇebaryas ya. Yahwe ifnoḇek Au kako fa waknon fyor bena rum ya imsore. Ma, fyor ono sisya ḇemarisen ido, Yahwe ifrur Au fa waswarepen mnuk ḇesrow fa wawasya na. Ikako syambraḇser Au fa baryas pdef fyor snonggaku ro moḇ Bedi imbude simewer srower aundi.​—Yer. 20:7-9.

6. Farkarkor ḇemnis rariso ḇefasnai kaku snar Yahwe ima ifrur pyum?

⁶ Yahwe ikako fyasnai frur pyum Ḇyena kuker fyarkor ko ro ḇaḇebaryas. (Yoh. 6:45) Ro fananjur minggu fadu, kosmai awawos kobukibaryas ḇepyum kaku, ma nbuk anun ḇe ko fa koso akurfasnai Ḇyena ro ḇaḇebaryas ya. Randak ya, imbude komgak fa koḇesewar nyan ḇebabo ine. Ḇape rofyor koḇesewar kaku ido, nyan ani isrow kaku ro moḇ koḇedi. Osower ido, ro fananjur ma munara sarawrow, kosmai anun fa koḇesewar nyan ḇaḇebaryas sairirya imbude ḇebabo ḇe ko na. Ine kako na nafrur kokmom ro randak ya. Imbape koḇesewar pdef ido, imnis ra kobuk swaf ḇe Yahwe fa ḇyebarakas ko. Kirine, mgorama kawos rosai monda barakas ḇyena fyor kosewar nyan fa kofarmyan Yahwe kuker pyum kaku, ro fafisu sairirya. Nari kawos kako rosai monda nari kofrur insa kofrur nabor syadi ro fararmyan koḇena.

7. Rosai monda barakas kosmai na fyor komarisen kofrur nabor syadi ro fararmyan ya?

⁷ Nari kofanam syadi kuker Yahwe. Mampan fawar penatua oso ḇenir Samuel, ḇefarmyan ro Kolombia kuker swari. * Sumarisen kaku suḇe merintis ro sidang ḇerandak suḇedi. Ḇape, sumarisen sufrur nabor syadi ro fararmyan kuker sufnoḇek sidang ḇefandun syadi fafnoḇek. Inja, na sumnai sufrur roi riḇeso sumarisen na. Samuel ikofen, ”Nusouser Matius 6:33 ma nukoḇes wer ḇa roi ḇebor nufandun ḇa na. Ḇape, roi ḇemarḇak ḇe nu iso nubur apartemen nuḇedi. Apartemen ani nukofen fa sifrur imnis marisen nuḇedi, ma ima nunai kwar.” Rofyor sura ḇe sidang ḇebabo, suḇaḇir kaku roi sufandun na neḇefamfon kuker pipi kermgun monda fa sukenem ḇardibur randak ya.  Doḇe, ”Numam snar Yahwe fyarkin nyan nuḇena ma kyarem nadi nuḇena”. Ikofen wer, ”Nuḇaḇir snar Imarisen ma iswar nu. Nuḇaḇir nufanam radine ḇaim kuker I.” Au ido rariso? Au kako wakfrur nabor syadi ro fararmyan ke? Wafrur rarirya ido, na wakyar kaku nari fanam syadi kuker Yahwe, ma nari fyamfon fandandun Bena.​—Mz. 18:25.

8. Rosai wafarkor ro Ivan ma Viktoria fawar suḇena?

⁸ Nari kosmai marisen ro fararmyan koḇena. Mampan fawar ro Ivan ma Viktoria ḇerama ro Kirgistan. Sukenem syadadi ḇa insama suḇuk kenem suḇena faro fararur risai monda ḇero organisasi, isoine fararur ḇaḇawes. Ivan doḇe, ”Nuyuf pyum kaku fararur ro moḇ ḇaḇawes ya kam. Numor snar nufrur fararur ro ras ya ḇesiper rariryano, numarisen kaku snar nufararur marḇak kwar faro Yahwe. Nu kako nusmai bati sibore ma nuna fawar ḇepyum kaku.”​—Mrk. 10:29, 30.

9. Rariso snonggaku ḇeḇeso sḇesewar kaku ro fararmyan fafisu sismai samswen, ma bon risai sismai na?

⁹ Kosmai raryaḇ pdef ro fararmyan koḇena ḇe Yahwe fafisu kosmai samswen. Komampan fawar ro Mirreh, imbesrar ḇesinan kwar ḇero Afrika Barat ḇeḇe kabom kwar. Ima dokter rirya, ma rofyor ḇyepensiun kwar ḇyemerintis. Mirreh ismai dafduf radang sendi ḇemarḇak inja samswen fa imbrane. Inja fyor byaryas ro rum ḇe rum, byaryas oras ri oser monda. Ḇape fyor byaryas ro moḇ snonggaku sibor, bisa byaryas kawan syadi. Nya ḇemarisen ḇerower sya sibor fa ryama kaḇer yoḇ si ma ḇefarkor Refo. Ḇeḇeso ro si ḇyetelpon si. Rosai ḇefnai fa Mirreh imarisen ḇyesewar kaku fa ifrur roi ani? Doḇe, ”Yaswar kaku faro Yahwe ma Kristus Yesus su. Saswar ani dek ro sneri. Yaḇenadi ker insama Yahwe ifnoḇek aya fa yafrur nabor faro I.”​—Mat. 22:36, 37.

10. Imnis 1 Petrus 5:10, rosai Yahwe byuk faro snonggaku ḇemarisen ḇefrur nabor syadi ro fararmyan ya?

¹⁰ Nari kosmai farkarkor ḇebor wer ro Yahwe. Ine iso Kenny ḇyaḇir ya, ima perintis oso ḇefarmyan ro Mauritius. Rofyor fyarkor kakaku ya, imnai ro farkarkor ḇekaki, mura ḇyebaptis, ma ifarmyan ro oras nakam. Doḇe, ”Yamarisen yana raryaḇ raris Nabi Yesaya: ’Aya monda. Wawan aya.’” (Yes. 6:8) Kenny ifnoḇek fararur ḇaḇawes nabor kwar, ma ikako dakso fa ḇyeterjemahkan syap koḇena ḇe wos ḇyedi. Kenny ikofen, ”Sifarkor aya fa yaḇekir fa yuf fararur ayena”. Ḇape, ine monda ismai na ḇa. Ikofen wer, ”Aya kako yafawi roi samswen fa yafrur na ma rari-rari risai fandun fa yaḇesewar kaku wer insamaido yafarmyan pyum syadi ḇe Yahwe I.” (Wasya 1 Petrus 5:10)

11. Rosai naek srar ro Korea sifrur kaku fa siso ro ḇaḇebaryas ya, ma bon risai sismai na? (Mam sonin ḇero ḇarpon.)

¹¹ Koisya koḇe Saksi kawan kwar rariryano, fandun fa sifarkor kaker ko rofyor koḇesewar nyan ḇebabo fa kobaryas. Imnis ra, penatua ḇero Korea Selatan sya sfas rosai ḇeḇejadi fafisu dafduf COVID-19: ”Randak ya, naek srar ono sisya soḇe jadi fa siso ḇaḇebaryas ya ḇa snar sidafduf. Ḇape, kirine sifrur na ro vidio-conference ḇaido telepon. Imbesrar rikyor ḇesinan kwar skoḇeumur 80 skofarkor fa skoḇepake komputer ma skoso ḇaḇebaryas kuker nyan ine ro ras ḇe ras.” (Mz. 92:14, 15) Wamarisen wafrur nabor syadi ro fararmyan ma ḇaḇir Yahwe frur pyum Ḇyena ke? Mgorama kawos rariso wafrur na raya.

12. Rosai Yahwe ḇyeasas faro snonggaku ḇekyar I sya?

¹² Kokyar faro Yahwe I. Yahwe ḇyeasas nari ifrur roi ḇepyum nabor ḇe ko rofyor kokyar I ma kofrur roi ḇepyum syadi faro I. (Mal. 3:10) Fabiola, imbesrar ro Kolombia, myam ro manggundi snar Yahwe asas Ḇyena nggaku. Randak ya iḇe ḇyemerintis biasa ḇeri rofyor ḇyebaptis kwar. Ḇape jadi ḇa, kukro swari ma roma rikyor ḇyeskoya skokyar i fa iso ḇefararur ḇo ḇesaramper kina skoḇedi. Inja, fyor dor fa ḇyepesiun, ḇyenadi kaku insama Yahwe ifnoḇek i. Doḇe, ”Snonggaku na siwaf kawan rawo pipi pensiun sesya sisae. Ḇape, ayama yasmai ḇeri pipi pensiun ayesi ro paik oser rofyor yafrur fararyor yena. Ine imnis raris mujisat dirya!” Paik risuru ramnai, Fabiola ḇyeperintis biasa. Kirine ḇyeumur taun ri 70 kwar ma ḇyemerintis syadi ro taun ri 20 kwar. Fafisu ḇyemerintis, ifnoḇek snonggaku riwar kwar isof ro sebaptis. Doḇe, ”Imbape fyorno ido rya yamgak ḇa, snar yaḇaḇir Yahwe fafnoḇek Ḇyedi ro ras ḇe ras iso ḇewar fa yaḇemerintis pdef.”

13-14. Fawar ḇepyum mansei monda ḇefnoḇek ko fa kokyar Yahwe ma ḇefrur nabor syadi ro fararmyan ya?

¹³ Kwarauser fawar ḇepyum ro snonggaku ḇekyar faro Yahwe sya. Ro Refo, fawar ḇepyum nabor naisya ro snonggaku ḇefararur marḇak faro Yahwe. Ro fawar sena, kofarkor snar koiso ḇefrur roi oso ḇepon insa Yahwe ḇyebarakas ko. Imnis  ra, ”[Abraham] ima ifawi ḇa nari rya ḇe diso”, imarisen ibur sup marin ḇyedi. Ifrur rarirya, insape Yahwe ḇyebarakas i. (Ibr. 11:8) Yakub ikako fandun fa fyamfabri resari kuker malaikat ya ḇepon ramnai ismai ḇarakas ḇepyum kaku. (Kej. 32:24-30) Ma rofyor er Israel imḇe sisun ro Sup Ḇaḇeasas ya, imam sya fandun fa sisabu epon ḇe warḇeki Yordan ḇekaḇaḇyai ya. Ramnai, insape war ya isyor ma bisa snonggaku sya simbranuki.​—Yos. 3:14-16.

¹⁴ Ro baboine, naek srar koḇesi ono sisya ḇekyar faro Yahwe I kwar ma sifrur fararwei fa sifrur nabor syadi ro fararmyan ya. Au kako na farkor ro fawar sena. Naek oso ḇenir Payton ma swari, Diana, sumarisen suwasya fawar ro naek srar ḇefrur nabor syadi faro Yahwe, raris ḇesya ro bar ”Mereka Merelakan Diri”. * Payton doḇe, ”Rofyor nuwasya fawar sena, raris numam snonggaku ḇeyan roḇean ḇeyanggir. Faḇaḇye mura, nuḇe numarisen fa ’nuḇaḇir ma numam ro manggun nu snar Yahwe ima ipyum’.” Inja, Payton ma Diana sura ḇe moḇ ḇefandun syadi. Ausya wawasya kwar fawar ro bar ḇesasyar ker ro farkarkor ani ke? Ma ausya mam kwar vidio Menginjil di Daerah Terpencil—​Australia dan Menginjil di Daerah Terpencil—​Irlandia, ḇesya ro jw.org ke? Awawos ma vidio ḇeradine na nbuk fawawi ḇe Au fa wafrur nabor syadi ro fararmyan ya.

15. Payamyum risai kosmai ya fyor koḇebati kuker snonggaku ḇemam monda faro fararmyan ḇe Yahwe?

¹⁵ Kwinfir bati na ḇesaramper Au. Komarisen syadi fa korep pan roḇean kan ḇaim na, fyor koisya kayam kuker snonggaku ḇemarisen kaku roḇean ani. Rarirya kako, fyor koḇebati kuker snonggaku ḇemam monda faro fararmyan ḇe Yahwe, ine nadif ko fa kofrur nabor syadi ro fararmyan koḇena ḇe Yahwe. Ine iso fawar ro Kent ma Veronica su, imbeswa ḇefarmyan kirine ḇe perintis istimewa ro Serbia. Kent ikofen, ”Bati ma kina nuḇesya sbuk wos samarawraw ḇe nu fa nuḇesewar nyan eḇese ro ḇaḇebaryas na. Ikofen wer, ”Snar nuḇebati kuker snonggaku ḇesewar ḇepon Karajan Allah, inja numgak ḇa fa nuḇesewar roi ḇebabo oso.”

16. Ro Yesus sarḇer ḇyedi ro Lukas 12:16-21, rosai ḇefnai fandun fa komarisen kobur roi kosmai na?

¹⁶ Kobur roi komarisen na snar Yahwe. Ine kyurfasnai ḇa kobur roi nakam komarisen na insama kofrur Yahwe imarisen. (Pkh. 5:19, 20) Ḇape fyor kodwarek manggun ko, komewer kobur roi kosmai kwar na, komniso snon ḇero Yesus sarḇer ḇyedi. Fyararur marḇak fa ikenem kuker pyum ḇape ḇyefnder Allah. (Wasya Lukas 12:16-21.) Naek oso ḇenir Christian, ḇeḇarek ro Prancis, doḇe, ”Ras nane, yabuk oras ma samambraḇ ayena kam ḇaim faro Yahwe ma kina ayesi.” Inja, naek ine ma swari suyun snemuk fa suḇemerintis. Ḇape insama suḇemerintis, fandun fa sumnai ro fararur suḇena. Kirine, insa fyamfon manggun su, sufararur fa sufrur sren rum ma kantor na. Sufarkor fa sumarisen faro roi susmai ro kenem suḇena. Rosai bon susmai ya snar subur roi susmai na? Christian doḇe, ”Kirine, fararmyan nuḇena nun payamyum. Numarisen kako numam ḇefarkor Refo ma snonggaku nurama kaḇer yoḇ sya sfarkor fa sfawi Yahwe.”

17. Rosai imbude ḇefrur fa koḇeḇirḇar fa kobaryas kuker nyan ḇebabo?

¹⁷ Ḇesewar fa baryas kuker nyan ḇebabo. (Kis. 17:16, 17; 20:20, 21) Shirley, perintis  oso ro Amerika Serikat, fandun fa ifrur fararwe kuker nyan ḇyebaryas fafisu dafduf COVID-19. Randak ya, ḇyeḇirḇar fa byuk kesaksian ro telepon. Ḇape rofyor ismai farkarkor ro rarama pengawas wilayah, insape ḇyerandak byuk nyan ḇaḇebaryas ine ro ras ḇe ras. Doḇe, ”Randak ya yamgak kero. Mboi kirine, yamarisen nyan ḇaḇebaryas ine. Bisa nggawos kuker snonggaku nabor syadi bur randak ya, rofyor nggobaryas ro rum ḇe rum!”

18. Rofyor komarisen kofrur nabor syadi ro fararmyan ya, rosai na kofrur kaku fyor samswen naisya?

¹⁸ Kap roi koḇe kofrur wer ma koḇesewar fa kofrur na. Rofyor kosmai roi ḇedwarek, fandun fa koḇenadi ma kokara pyum rosai koḇe kofrur kaku ya. (Ams. 3:21) Sonia, perintis biasa ḇefarmyan ro kelompok wos Romani ḇero Eropa, doḇe, ”Yamarisen yafas roi yaḇe yafrur wer ma yapom naro moḇ ḇepyan fa yamam na. Aya kako yana sonin ram nyan ḇeyuk ro meja yedi. Fyor yaḇe yafrur snemuk, yamam sonin ram ani ma yakara snemuk risai nari ḇefnoḇek aya isof ro yafrur roi yap na.” Rofyor samswen isya, Sonia ḇyesewar ker fa nya mamam ḇepyum. Doḇe, ”Fararwe yasmai ro rasras namnis ayar karui ḇedwarek ḇaido abor na ḇefnoḇek aya fa yafrur roi yap na. Inema ndrama ro nyan yamam roi anna.”

19. Rosai snemuk koḇena?

¹⁹ Yahwe byuk barakas nabor ḇe ko kwar. Inja imbe kofasnai kasumasa koḇena ido, komarisen koḇesewar kaku insama snonsnon Ḇyedi sisandik I. (Ibr. 13:15) Fyor kosewar pdef fa kofrur nabor syadi ro fararmyan ido, Yahwe nari ḇyebarakas kaku ko. Ro ras ḇe ras, mgorama kofrur roi risai monda fa ’koḇaḇir ma komam ro manggun ko snar Yahwe ima ipyum.’ Rarirya, nari komnis raris Yesus, ḇekofen, ”Roḇean ayena isoine yafrur marisen ḇewan ayanya ma yaḇeimnis fararur ḇyuk ḇe ayanya.”​—Yoh. 4:34.