1-2. Folem Ol Sam 34:8, ?yumi mas mekem wanem blong faenemaot se Jehova i gud?

TRAEM tingbaot se wan man i givim wan kakae long yu we yu neva testem bifo. Yu save talem se kakae ya i olsem wanem, taem yu lukluk, yu smelem, yu karem resepi blong hem, o yu askem tingting blong narafala long saed blong kakae ya. Be blong save sipos yu laekem o nogat, yu wan yu mas testem.

² Yumi save lanem se Jehova i gud, taem yumi ridim Baebol mo ol buk blong yumi, mo tu taem yumi lesin taem ol narafala oli tokbaot ol gudfala samting we Jehova i mekem long olgeta. Be blong yumi kasemsave olsem wanem Jehova i gud, yumi wan yumi mas “testem.” (Ridim Ol Sam 34:8.) Blong kasem save long samting ya, traem tingbaot se maet yumi wantem mekem wok blong Jehova fultaem, be blong kasem mak ya, yumi mas mekem laef blong yumi i kam simpol. Maet plante taem finis yumi ridim promes blong Jisas se sipos yumi putum Kingdom fasples, Jehova bambae i givim ol samting we yumi rili nidim, be yumi neva ekspiriensem samting ya. (Mat. 6:33) From we yumi bilif long promes ya, yumi traehad blong no spenem tumas mane, jenisim program blong wok blong yumi, mo mekem samting we yumi naf blong mekem long wok blong prij. Taem yumi mekem olsem, bambae yumi luksave klia se Jehova i givim ol samting we yumi nidim. Long taem ya nao, yumi wan yumi “testem” se Jehova i gud.

3. Folem Ol Sam 16:1, 2, ?Jehova i mekem i gud long hu?

³ Jehova i “mekem i gud long olgeta” man, iven long  olgeta we oli no save hem. (Sam 145:9; Mat. 5:45) Be hem i mekem plante gudfala samting speseli long olgeta we oli lavem hem, mo long olgeta we oli mekem bes blong olgeta long wok blong hem. (Ridim Ol Sam 16:1, 2.) Naoia bambae yumi tokbaot sam gudfala samting we Jehova i bin mekem long yumi.

4. ?Olsem wanem Jehova i mekem i gud long olgeta we oli stat blong kam klosap long hem?

⁴ Evri taem we yumi folem ol samting we Jehova i tijim yumi long hem, laef blong yumi i kam gud moa. Eksampol, taem yumi save hem mo yumi stat blong lavem hem, hem i halpem yumi blong yumi stop blong tingbaot mo mekem ol samting we hem i no glad long hem. (Kol. 1:21) Mo tu, taem yumi givim laef blong yumi long Jehova mo yumi baptaes, hem i givim sam moa gudfala samting long yumi, olsem wan tingting we i klin, mo wan gudfala frensip wetem hem.—1 Pita 3:21.

5. ?Olsem wanem Jehova i mekem i gud long yumi taem yumi prij?

⁵ Taem yumi joen long wok blong prij, yumi luksave we Jehova i gohed blong mekem i gud long yumi. ?Yu yu wan man blong sem? Plante man blong Jehova oli olsem. Maet bifo we yu kam wan Witnes blong Jehova, yu neva ting se bambae yu go noknok long doa blong wan strenja mo tokbaot Baebol wetem hem. Be yet tede, yu mekem samting ya oltaem. !Mo Jehova i halpem yu blong glad long wok blong prij! Mo tu, Jehova i halpem yu long plante defren rod. Hem i halpem yu blong stap kwaet taem wan man i agensem yu. Mo tu hem i halpem yu blong tingbaot wan stret vas blong yusum, taem wan man i intres. Mo hem i givim paoa blong yu save gohed blong prij, nating se ol man oli no wantem lesin.—Jer. 20:7-9.

6. ?Olsem wanem trening we yumi kasem long Jehova, i pruvum se hem i mekem i gud long yumi?

⁶ Jehova i mekem i gud long yumi tu taem hem i trenem yumi blong prij. (Jon 6:45) Long miting blong medel wik, i gat sam eksampol blong ol gudfala fastok we yumi save yusum long wok blong prij. Fastaem, maet yumi fraet blong traem ol niufala rod ya, be sipos yumi mekem olsem, bambae yumi luk se oli wok gud long teritori blong yumi. Long ol miting mo ol asembli blong yumi, yumi kasem advaes blong traem ol defren wei blong prij, we yumi neva traem bifo. Maet hemia tu i mekem yumi fraet, be sipos yumi traem ol defren rod ya, Jehova bambae i blesem yumi. Naoia bambae yumi tokbaot sam gudfala samting we Jehova i givim long yumi, taem yumi traem ol defren rod ya blong prij, nomata se situesen long laef blong yumi i olsem wanem. Biaen bambae yumi tokbaot olsem wanem yumi save mekem moa long wok blong prij.

7. ?Wanem blesing yumi save kasem taem yumi traehad blong prij moa?

⁷ Yumi kam klosap moa long Jehova. Traem tingbaot eksampol blong wan elda we nem blong hem Samuel, * we i stap prij wetem waef blong hem long Kolombia. Kapol ya i glad blong paenia long prapa kongregesen blong tufala, be tufala i wantem mekem moa, hemia blong halpem wan kongregesen we i gat bigfala nid. Be blong kasem mak ya, tufala i mas lego sam samting. Samuel i talem se: “Mitufala i folem advaes blong Matiu 6:33 mo mitufala i stop blong pem ol samting we mitufala i no nidim. Be samting we i moa had, hemia blong lego apatmen blong mitufala. Apatmen ya i stret gud long mitufala mo mitufala i  no lon from.” Taem tufala i muv i go long niufala kongregesen ya, tufala i no yusum plante mane olsem bifo. Samuel i talem se: “Mitufala i luk olsem wanem Jehova i lidim mitufala mo i ansa long ol prea blong mitufala. Mitufala i harem save se Jehova i glad long mitufala mo i lavem mitufala. Hemia wan filing we mitufala i neva ekspiriensem bifo.” ?Yu yu save mekem moa long wok blong prij? Sipos yes, yu save sua se bambae yu kam klosap moa long Jehova, mo bambae hem i lukaot gud long yu.—Sam 18:25.

8. ?Yu lanem wanem long toktok blong Ivan mo Viktoria?

⁸ Yumi kasem glad long wok we yumi mekem. Makem tok blong Ivan mo Viktoria, wan kapol we i paenia long Kigistan. Tufala i mekem laef blong tufala i simpol blong tufala i save volontia long eni wok, inkludum konstraksen projek. Ivan i talem se: “Mitufala i wok had long eni wok we mitufala i kasem. Mo nating se mitufala i taed long en blong dei, be mitufala i glad from mitufala i save se mitufala i yusum paoa blong mitufala long wok blong Jehova. Mo tu mitufala i glad from we mitufala i faenem plante niufala fren mo gat plante gudfala memori.”—Mak 10:29, 30.

9. ?Wan sista we i gat problem long laef i mekem wanem, mo wanem i kamaot from?

⁹ Yumi kasem glad long wok blong Jehova, nating se yumi gat ol problem long laef. Traem tingbaot eksampol blong olfala sista ya Mirreh, we i wan wido long Wes Afrika. Afta we hem i ritae long wok blong hem olsem wan dokta, hem i stat blong paenia. Hem i naf blong spenem wan aoa nomo blong prij long ol haos wanwan, from we ol bun blong hem oli stap soa. Be hem i save spenem moa taem blong prij long ol pablik ples. Hem i gat plante visit mo Baebol stadi, we sam long olgeta hem i mekem long telefon. ?Wanem i pulum Mirreh blong prij moa? Hem i talem se: “Hemia lav we mi gat long Jehova mo Jisas Kraes. Mo oltaem mi prea blong Jehova i halpem mi blong mekem moa long wok blong hem.”—Mat. 22:36, 37.

10. Folem 1 Pita 5:10, ?Jehova i mekem wanem long olgeta we oli mekem moa long wok blong hem?

¹⁰ Jehova i trenem yumi moa. Kenny, wan paenia long Morisas, i luk se tok ya i tru. Taem hem i lanem trutok, hem i lego yunivesiti, i baptaes, mo i mekem wok blong Jehova fultaem. Hem i talem se: “Mi traem blong mekem olsem profet Aesea we i talem se: ‘!Mi ya! !Yu sanem mi!’” (Aes. 6:8) Kenny i wok long plante konstraksen projek mo hem i givhan tu blong transletem ol buk i go long lanwis blong hem. Hem i talem se: “Mi kasem ol trening blong mi gat gudhan long ol asaenmen blong mi.” Be hem i no lanem nomo olsem wanem blong mekem wok blong hem. Hem i talem tu se: “Mi luksave ol samting we mi no naf blong mekem, mo ol fasin we mi mas wokem blong kam wan gudfala man blong wok blong Jehova.” (Ridim 1 Pita 5:10.) ?Yu ting se yu save mekem sam jenis long laef blong yu blong Jehova i save trenem yu?

11. ?Wanem traehad we ol sista long Saot Koria oli mekem blong joen long wok blong prij? ?Mo wanem i kamaot from? (Yu luk pija long fran pej.)

¹¹ Ol man blong Jehova we oli stap longtaem long trutok, olgeta tu oli kasem gudfala samting taem oli lanem blong yusum ol niufala rod blong prij. Long taem blong COVID-19 pandemik, ol elda blong wan kongregesen long Saot Koria oli talem se: “Samfala we maet oli ting se oli no save joen long wok blong prij, from helt blong olgeta, naoia oli save prij tru long ol video konfrens. I gat tri sista we oli gat 80 yia olsem, oli lanem blong yusum kompiuta mo naoia klosap evri dei oli joen long wok blong prij.” (Sam 92:14, 15) ?Yu yu glad blong mekem moa long wok blong  prij, mo traem testem blong luk se Jehova i gud? Hemia sam samting we yu save mekem blong kasem mak ya.

12. ?Jehova i promes blong mekem wanem long olgeta we oli dipen long hem?

¹² Lanem blong dipen long Jehova. Hem i promes blong mekem plante gudfala samting long yumi, sipos yumi trastem hem mo yumi mekem bes blong yumi long wok blong hem. (Mal. 3:10) Wan sista long Kolombia we nem blong hem Fabiola i luk we Jehova i mekem promes ya i kamtru long hem. Hem i wantem tumas blong paenia afta we hem i baptaes. Be hem i mas wok blong sapotem famle blong hem. Taem hem i kasem yia blong ritae long wok, hem i prea strong long Jehova blong i halpem hem. Hem i talem se: “Nomoli ol man oli mas wet longtaem bifo we oli kasem mane blong olgeta taem oli ritae. Be mi, mi kasem blong mi wan manis nomo afta we mi aplae from. !Hemia i olsem wan merikel!” Tu manis biaen hem i stat blong paenia. Naoia hem i gat bitim 70 yia olsem, mo hem i bin paenia bitim 20 yia finis. Long ol taem ya, hem i bin halpem 8 man blong oli baptaes. Hem i talem se: “Nating se samtaem mi taed, be Jehova i halpem mi evri dei blong mi save gohed blong paenia.”

13-14. ?Wanem sam eksampol we oli save halpem yu blong trastem Jehova mo mekem moa long wok blong hem?

¹³ Lanem samting from eksampol blong olgeta we oli dipen long Jehova. Baebol i fulap wetem ol eksampol blong ol man we oli wok had  long wok blong Jehova. Plante long ol stori ya oli soemaot se ol man blong Jehova oli mas tekem faswan step bifo we Jehova i blesem olgeta. Eksampol, Jehova i blesem Ebraham afta we hem i lego haos blong hem, “nating se hem i no save ples ya we hem i stap go long hem.” (Hib. 11:8) Jekob i kasem blesing afta we hem i resling wetem wan enjel. (Jen. 32:24-30) Nesen blong Isrel i rere blong go insaed long Promes Lan afta we ol pris oli draonem leg blong olgeta long Jodan Reva, nao ol man oli naf blong krosem.—Jos. 3:14-16.

¹⁴ Yu save kasem gudfala samting tu from eksampol blong ol Witnes tede we oli dipen long Jehova mo oli mekem moa long wok blong hem. Eksampol, wan brata nem blong hem Payton mo waef blong hem Diana, tufala i laekem blong ridim stori blong ol brata mo sista we oli glad blong mekem moa long wok blong Jehova. Ol stori ya oli stap long haf ya “Oli Glad Nomo Blong Mekem Wok.” * Payton i talem se: “Taem mitufala i ridim stori blong olgeta, i olsem se mitufala i stap wajem wan man we i enjoem wan naesfala kakae. Moa we mitufala i ridim stori blong olgeta, moa we mitufala i wantem ‘testem mo luk we Jehova i gud.’” From samting ya, Payton mo Diana i go long wan ples we i nidim moa man blong prij. ?Yu yu ridim finis ol stori ya? ?Mo yu wajem finis ol video ya, Prij Long Ol Ples We Oli Stap Longlongwe—Ostrelia mo Prij Long Ol Ples We Oli Stap Longlongwe—Aealan we oli stap long jw.org? Ol stori ya oli save halpem yu blong mekem moa long wok blong Jehova.

15. ?Olsem wanem ol gudfala fren oli save halpem yumi?

¹⁵ Jusum gud ol fren. Yumi glad moa blong traem wan niufala kakae, sipos yumi stap wetem ol man we oli enjoem kakae ya. Long sem fasin, sipos yumi joen oltaem wetem olgeta we oli putum wok blong Jehova fasples, bambae i isi blong yumi mekem moa long wok blong God. Wan kapol we nem blong tufala Kent mo Veronica, i luksave se samting ya i tru. Kent i talem se: “Ol fren mo ol famle blong mifala oli enkarejem mitufala blong traem mekem ol defren wok blong Kingdom. Mitufala i luksave se taem mitufala i joen wetem olgeta we oli putum Kingdom fasples, mitufala i gat strong tingting blong traem ol niufala wok ya.” Naoia Kent mo Veronica i wok olsem spesel paenia long Sebia.

16. Folem pijatok blong Jisas long Luk 12:16-21, ?from wanem yumi mas glad blong lego sam samting?

¹⁶ Lego sam samting blong mekem wok blong Jehova. Yumi no nid blong lego evri samting we yumi laekem, blong mekem Jehova i glad. (Pri. 5:19, 20) Be sipos yumi jusum blong no mekem moa long wok blong Jehova from we yumi wantem mekem ol samting blong harem gud, yumi save foldaon long sem trap olsem man ya long pijatok blong Jisas, we i wok had blong kasem plante gudfala samting be i no tingbaot God. (Ridim Luk 12:16-21.) Wan brata we nem blong hem Christian, we i laef long Franis, i talem se: “Mi mi no mekem bes blong mi long wok blong Jehova mo lukaot long famle blong mi.” Ale, hem mo waef blong hem i disaed blong paenia. Be blong kasem mak ya, tufala i mas lego wok blong tufala. Mo blong sapotem tufala, tufala i statem wan smol bisnes blong klinap, mo tufala i lanem blong glad long smol samting nomo we tufala i gat. ?Olsem wanem? ?Tufala i glad long sakrefaes we tufala i mekem blong save paenia? Christian i talem se: “Mitufala i glad moa long wok blong prij, mo mitufala i glad blong luk we ol Baebol studen mo ol visit oli lanem blong save Jehova.”

17. ?Wanem i save mekem i had blong yumi traem ol niufala rod blong prij?

 ¹⁷ Rere blong traem ol niufala rod blong prij. (Wok 17:16, 17; 20:20, 21) Long taem blong COVID-19 pandemik, Shirley, wan paenia long Yunaeted Stet, i mas jenisim fasin blong hem blong prij. Fastaem hem i fraet blong prij tru long fon. Be afta we hem i kasem trening long taem blong visit blong eria elda, hem i stat blong prij oltaem long fon. Hem i talem se: “Long stat, mi fraet we mi fraet, be naoia mi laekem tumas. !Yumi kasem plante moa man i bitim we yumi go long ol haos wanwan!”

18. ?Wanem i save halpem yumi sipos i had blong yumi mekem moa long wok blong prij?

¹⁸ Putum wan mak mo traehad blong kasem. Taem yumi fesem ol problem, yumi prea from help mo yumi tingting gud long ol mak we yumi wantem kasem. (Prov. 3:21) Sonia, wan fultaem paenia long Yurop, we i joen wetem Romania lanwis grup, i talem se: “Mi laekem blong raetemdaon long wan pepa ol mak blong mi, mo putum long wan ples we mi save luk. Long tebol blong mi, mi gat wan droing we i soemaot tu defren rod. Mo taem mi gat desisen blong mekem, mi lukluk droing ya, mo tingbaot se desisen blong mi bambae i lidim mi i go long weswan rod.” Sonia i traehad blong gat stret tingting oltaem long trabol we hem i fesem. Hem i talem se: “Mi mas mekem desisen se bambae mi luk trabol blong mi olsem wan wol we i stopem mi blong kasem mak blong mi, o olsem wan brij we i lidim mi blong kasem mak ya.”

19. ?Yumi soemaot olsem wanem se yumi glad long ol gudfala samting we Jehova i givim?

¹⁹ Jehova i blesem yumi long plante defren rod. Yumi save soemaot se yumi glad long ol blesing ya, taem yumi mekem bes blong yumi blong presem hem. (Hib. 13:15) Mo tu, yumi save traem ol defren rod blong prij, olsem nao, Jehova bambae i blesem yumi moa. Taswe, i gud we evri dei yumi traem faenem ol defren rod blong traem “testem mo luk se Jehova i gud.” Nao bambae yumi talem olsem Jisas we i se: “Kakae blong mi i blong mekem wil blong hemia we i sanem mi, mo blong mi finisim wok we hem i givim long mi.”—Jon 4:34.