1-2. Domu bani Psalmen 34:9, aha do na porlu ibahen hita ase iahapkon hita habujuron ni Jahowa?

BAYANGKON ma dong na mambere sipanganon bamu. Tapi, lape ongga ipangan ham ai. Ra, boi do ibotoh ham sonaha daini sipanganon ai sanggah ididah ham ai, ianggo ham bauni, atap isungkun ham halak na legan. Tapi ase pasti ibotoh ham sodap sipanganon ai, maningon idai ham do lobei.

² Sonai homa, boi do ibotoh hita bujur Jahowa ai sanggah ibasa hita Bibel, publikasi, atap sanggah hita manangar pangalaman ni sanina botou na dob mangahapkon pasu-pasu ni Jahowa. Tapi ase ibotoh hita tongon do bujur Jahowa ai, maningon ‘idai’ hita do lobei habujuron-Ni. (Basa Psalmen 34:9.) Pardiateihon hita ma contoh on. Umpamani sihol do uhurta mangidangi sepenuh waktu. Tapi ase boi ihorjahon hita ai, porlu do hita mangatur pengeluaran. Tongon, domma gati ibasa hita janji ni Jesus na mangkatahon anggo ipalobei hita Harajaon ni Naibata, ibere do haporluanta. Hape sadokah on lape ongga iahapkon hita janji ai. (Mat. 6:33) Tapi marusaha do hita mangorui pengeluaranta, mandarami horja na sosok ase boi bahat panorangta mangidangi. Halani ibahen hita sonai, iahapkon hita ma tongon do igoki Jahowa do haporluanta. Jadi boi ma ihatahon domma ‘idai’ hita habujuron ni Jahowa.

3. Domu bani Psalmen 31:20, ise do na mandapot habujuron ni Jahowa?

³ “Pardear layak do Jahowa bani haganup”, tarmasuk hubani halak na lape mananda Ia. (Ps. 145:9; Mat. 5:45) Tapi ipardiateihon Jahowa do ise pe na mangidangi-Si humbani gok ni uhurni, janah bahat do pasu-pasu-Ni ibere hubani sidea.  (Basa Psalmen 31:20.) Pardiateihon ma piga-piga contoh habujuron ni Jahowa na domma iahapkon hita.

4. Sonaha Jahowa patuduhkon habujuron hubani halak na sihol dohor hu Bani?

⁴ Sanggah idalankon hita aha na iparlajari hita humbani Bibel, gabe iahapkon hita ma dear pengaruhni ai ibagas goluhta. Lambin bahat iparlajari hita pasal Jahowa, lambin bagas ma holongta hu Bani. Gabe iurupi Jahowa ma hita laho padaohkon diri humbani pingkiran ampa pambahenan na lang iharosuhkon-Si. (Kol. 1:21) Anjaha, sanggah hita mangondoskon diri hu Bani janah ididi, lambin bahat ma pasu-pasu na iahapkon hita. Ibere do hubanta panggora ni uhur na borsih janah lambin orot ma parhasomananta pakon-Si.​—1 Ptr. 3:21.

5. Aha do habujuron ni Jahowa na iahapkon hita sanggah mangidangi?

⁵ Anggo ringgas hita marbarita, lambin bahat ma habujuron ni Jahowa na iahapkon hita. Sonaha anggo ham sahalak na parmaila? Bahat do homa Saksi Jahowa na parmaila. Sanggah lape gabe Saksi Jahowa, ra do lang ongga ibayangkon ham, ham manuktuki rumah ni halak na lape itanda laho patugahkon isi ni Bibel. Tapi halani pangurupion ni Jahowa, gabe marosuh ma ham mangidangi janah taratur homa ham mangkorjahon ai. Leganni ai, sanggah dong halak na manggila, iurupi Jahowa do ham ase totap lamlam. Sanggah dong na marosuh manangar baritamu, iurupi do ham ase boi mardingat ayat-ayat na laho ibasahon. Janah ipargogohi do homa ham ase totap marbarita age pe halak lang marosuh.​—Jer. 20:7-9.

6. Aha ope cara ni Jahowa laho patuduhkon habujuron?

⁶ Bahat ope habujuron ni Jahowa na iahapkon hita. Umpamani, ilatih do hita ase lambin pandei ibagas pangidangion. (Joh. 6:45) Bani partumpuan tengah pekan, dong contoh parsahapan na boi igunahon hita sanggah marbarita. Janah iojur do homa hita ase manggunahon ai. Ra do mungkahni gobir hita mancoba ai. Tapi sanggah icoba hita, iahapkon hita ma sosok do hape ai i daerahta. Sanggah i kebaktian ipatugah do cara-cara na baru na boi igunahon ibagas pangidangion. Ra do mungkahni mabiar hita mancoba ai. Tapi sanggah icoba hita ai, iahapkon hita ma pasu-pasu ni Jahowa. Ulas hita ma pasu-pasu aha do na ibere Jahowa anggo hita porsaya hu Bani janah marusaha mambere na sidearan lang soal sonaha situasinta. Ulas hita homa carani sonaha mambere lambin bahat ibagas pangidangion.

7. Pasu-pasu aha ma na ibere Jahowa anggo ra hita mambere bahat ibagas pangidangion?

⁷ Lambin dohor do hita hubani Jahowa. Pardiateihon ma siusihan na ibahen si Samuel, * sahalak sintua na tading i Kolombia. Merintis do ia pakon istrini. Tapi sihol do sidea laho mangurupi i kuria na mamorluhon bahat parbarita. Ase boi sonai maningon ibahen sidea do pengorbanan. Si Samuel mangkatahon, “Idalankon hanami ma Mateus 6:33 anjaha lang iboli hanami be barang-barang na lang iporluhon. Tapi na susahan ibahen hanami ai ma manadingkon apartemennami halani bangunanni ibahen domu bani harosuhnami, janah lang homa marutang hanami sanggah mamboli ai.” Sanggah pindah sidea hu kuria na baru, daoh do otikan pengeluaran ni sidea ijai marimbangkon i iananni hinan. Nini si Samuel ma use, “Ibotoh hanami ma itogu-togu Jahowa do hanami janah ibalosi  do tonggonami. Iahapkon hanami ma lambin banggal do holong ni Jahowa bannami.” Boi do itiru ham sidea? Anggo ibahen ham sonai, pos ma uhurmu lambin dohor ma ham hubani Jahowa anjaha isarihon do ham.​—Ps. 18:26.

8. Aha do na boi iparlajari hita humbani pangalaman ni si Ivan pakon si Viktoria?

⁸ Dapot malas ni uhur ibagas pangidangion. Pardiateihon ma pangalaman ni si Ivan pakon si Viktoria, istrini na merintis i Kirgistan. Ibahen sidea do sederhana goluhni ase boi sidea mangurupi horja i organisasi, tarmasuk ma konstruksi. Si Ivan mangkatahon, “Marusaha do hanami mambahen na sidearan bani tugas aha pe. Hassi pe loja hanami dob marhorja sadari bod, tapi malas uhur anjaha puas do pangahapnami halani manggunahon gogohnami mangurupi horja ibagas organisasi. Lambin tambah do malas uhurnami halani boi dapot hasoman-hasoman na baru, janah dapot homa pangalaman na baru.”​—Mrk. 10:29, 30.

9. Aha do tantangan na iahapkon hasomanta ase boi ia mambere bahat ibagas pangidangion, janah aha homa hasilni?

⁹ Boi do homa hita totap marmalas ni uhur ibagas pangidangion age pe dong tantangan. Umpamani si Mira sahalak dokter na domma mabalu, na tading i Afrika Barat, pensiun do ia hun horjani ase boi merintis. Halani parah rematikni, pitah sajam dassa ia boi marbarita hun rumah rumah. Tapi anggo manjaga gerai, tahan do ia dokah. Mambere hasaksian do homa ia humbani telepon. Jadi bahat do kunjungan ampa parlajar Bibelni. Aha do na mangojur si Mira ase mambere bahat panorangni mangidangi? Si Mira mangkatahon, “Holong tumang do uhurhu hubani Jahowa ampa Jesus. Gati do hutonggohon bani Jahowa ase iurupi ahu mambere na sidearan.”​—Mat. 22:36, 37.

10. Domu bani 1 Petrus 5:10, aha do na ijalo sidea na ringgas mangidangi Jahowa?

¹⁰ Mandapot marmasam pelatihan humbani organisasi. Si Kenny, sahalak perintis na mangidangi i Mauritius mangahapkon sintong do ai. Dob mananda hasintongan, itadingkon ia ma kuliahni, ididi ma ia, janah merintis. Ia mangkatahon, “Hutiru do Nabi Jesaya na mangkatahon, ‘Ijon do ahu, suruh Ham ma ahu!’” (Jes. 6:8) Domma bahat horja pembangunan na iurupi si Kenny. Dihut do homa ia manerjemahkon publikasi hu bahasa daerahni. Si Kenny mangkatahon, “Bahat do pelatihan pakon keterampilan na hudapot ase boi mandalankon tugasku.” Tapi sedo pitah ai na dapot ia. Nini use, “Husadari ma adong do na lang urah huhorjahon anjaha dong na porlu lambin bahat huparlajari ase boi lambin dear ahu marhorja.” (Basa 1 Petrus 5:10.) Jadi, boi do ipingkiri ham, atap na boi do homa ham mambahen penyesuaian ase boi mandapot pelatihan humbani organisasi.

11. Aha do na ibahen piga-piga botou i Korea Selatan ase boi sidea totap mangidangi, anjaha aha do hasilni? (Tonggor ma gambar sampul.)

¹¹ Hassi pe domma marpangalaman, tong do hita porlu ilatih sanggah adong cara na baru ibagas pangidangion. Sadokah pandemi COVID-19, piga-piga sintua i Korea Selatan mangkatahon, “Bahat do sanina botou na lang boi mangidangi hun rumah hu rumah halani hurang sehat. Tapi sonari boi do sidea mangidangi marhitei video call. Dong tolu botou na marumur 80-an marlajar manggunahon cara on. Jadi, boi ma sidea marbarita tiap ari.” (Ps. 92:15, 16) Sihol do homa ham mambere bahat ibagas pangidangion ase boi iahapkon ham habujuron ni Jahowa? Pardiateihon ma piga-piga cara ase boi hita mandalankon ai.

12. Aha do janji ni Jahowa bani halak na marpangunsandeian hu Bani?

¹² Marpangunsandeian ma bani Jahowa. Marjanji do Ia pasu-pasuon-Ni do halak na porsaya hu Bani janah ra mambere na sidearan. (Mal. 3:10) Si Fabiola botou na tading i Kolombia mangahapkon saud do janji ai bani goluhni. Dobkonsi ididi, sihol do ia mangidangi gabe perintis biasa. Tapi maningon horja do ia mangurupi suamini manggoki haporluan ni tolu niombahni. Jadi dob jumpah panorangni ia boi mangindo pensiun, itonggohon ia ma ai bani Jahowa. Ia mangkatahon, “Somalni dokah tumang do halak salosei mangurus pensiun. Tapi sanggah ahu mangindo ai, pitah sabulan domma salosei. Sada mukjizat do on huahap.” Dua bulan dobkonsi ai mulai ma ia merintis. Sonari ia domma marumur 70-an janah domma 20 tahun lobih merintis. Dong ualuh halak na iurupi ia gabe Saksi Jahowa. Nini use, “Age pe sipata galek ahu, tapi huahapkon iurupi Jahowa do ahu ganup ari ase boi totap merintis.”

13-14. Aha do na boi mangurupi hita ase porsaya bani Jahowa janah ra mambere na sidearan?

¹³ Marlajar ma humbani halak na marpangunsandeian bani Jahowa. Ibagas Bibel bahat do contoh-contoh halak na marusaha mambere na sidearan hubani Jahowa. Anggo ipardiateihon hita, maningon ipatuduh sidea do lobei marhitei pambahenan ase ipasu-pasu Jahowa sidea. Umpamani si Abraham, halani porsaya itadingkon do rumahni janah laho ma  ia “age pe lang ibotoh siparayakonni ai”. Halani ai, ipasu-pasu Jahowa ma ia. (Heb. 11:8) Leganni ai, dobkonsi margulat do si Jakob pakon malekat, baru pe ibere Jahowa pasu-pasu na banggal hu bani. (1 Mus. 32:24-30) Sonai homa halak Israel, dob masuk nahei ni malim hu Bah Jordan, korah ma bah ai. Gabe boi ma sidea mandipar janah masuk hu Tanoh Parpadanan.​—Jos. 3:14-16.

¹⁴ Sonari, boi do homa hita marlajar hun sanina botounta. Umpamani hasomanta na margoran si Payton ampa istrini si Diana. Marosuh do sidea mambasa pangalaman ni sanina botou na mambere bahat ibagas pangidangion, na dong bani seri artikel “Mereka Merelakan Diri”. * Si Payton mangkatahon, “Sanggah hanami mambasa pangalaman ni sidea ai, usih songon mangidah halak na mangankon sipanganon na sodap do iahap hanami. Lambin gati ibasa hanami, lambin sihol ma hanami dihut mandai anjaha mangahapkon habujuron ni Jahowa.” Ujungni, pindah ma sidea hu ianan na mamorluhon bahat parbarita. Ai domma ibasa nasiam artikel ai? Atap domma itonton ham video Menginjil di Daerah Terpencil​—Australia pakon video Menginjil di Daerah Terpencil​—Irlandia na dong bani jw.org? Ganupan bahan ai boi mangojur nasiam ase lambin ringgas mangidangi.

15. Mase hita porlu marhasoman pakon sidea na ringgas mangidangi?

¹⁵ Pilih ma hasoman na ringgas mangidangi. Somalni gabe tartarik do hita laho mancoba sipanganon na baru anggo gati ididah hita hasomanta mangankon ai. Sonai homa, anggo gati hita marhasoman pakon sidea na ringgas mangidangi, gabe tarojur ma hita laho mangusihi sidea. Hasomanta si Kent pakon istrini si Veronica domma mangahapkon tongon do ai. Si Kent mangkatahon, “Hasoman ampa kaluarganami gati mangojur ase hanami ra dihut bani marbagei corak ibagas pangidangion. Iahapkon hanami anggo marhasoman pakon sidea na palobeihon Harajaon ni Naibata, lambin pos ma uhurnami mancoba cara na baru sanggah mangidangi.” Sonari si Kent pakon istrini mangidangi gabe perintis istimewa i Serbia.

16. Domu bani limbaga ni Jesus na dong bani Lukas 12:16-21, mase porlu hita mambahen pengorbanan?

¹⁶ Mambahen pengorbanan hubani Jahowa. Lang maningon itadingkon hita ganup aha na dong banta laho mangidangi Jahowa. (Par. 5:19, 20) Tapi anggo lang ra hita mambahen pengorbanan ase boi mambere na sidearan bani Jahowa, usih ma hita songon dalahi bani limbaga ni Jesus. Dalahi ai patumpu-tumpuhon arta bani dirini tapi lang parduli ia bani Naibata. (Basa Lukas 12:16-21.) Hasomanta si Christian, na tading i Prancis mangkatahon, “Mungkahni lang hubere gogoh ampa panorangku na sidearan hubani Jahowa ampa kaluargangku.” Tapi dobkonsi ai sihol ma ia pakon istrini merintis. Ase boi sonai, maningon itadingkon sidea do horjani sidea na jenges janah sonari gabe mamborsihkon kantor do horja ni sidea. Malas do uhur ni sidea age pe otik duitni. Aha ma hasilni pengorbanan ni sidea ai? Si Christian mangkatahon, “Lambin marmalas ni uhur do hanami mangidangi sonari, tarlobih sanggah mangidah parlajar Bibel pakon kunjungannami marlajar pasal Jahowa.”

17. Aha do na mambahen hita lang ra mancoba cara na baru sanggah marbarita?

¹⁷ Sirsir ma hita mancoba cara na baru ibagas pangidangion. (Lah. 17:16, 17; 20:20, 21)  Si Sherli, sahalak perintis i Amerika Serikat, porlu mangubah carani marbarita sadokah pandemi COVID-19. Mungkahni ragu do ia marbarita marhitei telepon. Tapi dob ilatih sanggah dong kunjungan sintua kaliling hu kuriani, sirsir janah taratur do ia mandalankon cara na baru ibagas pangidangion. Ia mangkatahon, “Mungkahni mabiar do ahu. Tapi sonari marosuh tumang do ahu halani bahatan do halak na boi hujumpahi marhitei telepon marimbangkon marbarita hu rumah rumah.”

18. Aha do na boi mangurupi hita laho pasaudkon cita-citanta hassi pe dong tantangan?

¹⁸ Bahen ma rencana janah horjahon. Sanggah dong tantangan, martonggo do hita ase iurupi Jahowa janah boi mamingkirhon aha na laho sibahenonta. (Pod. 3:21) Si Sonia na mangidangi gabe perintis biasa i kelompok bahasa Romani i Eropa mangkatahon, “Husuratkon do rencanaku na laho huhorjahon janah hubahen ma ai i ianan na urah huidah. Hubahen do homa gambar dalan na marsimpang dua i sada harotas janah hunahkon i atas meja. Sanggah laho mambahen haputusan, huidah ma gambar dalan ai. Gambar ai boi mangurupi ahu mamingkirhon anggo haputusanku mambahen ahu lambin dohor atap lambin daoh hun cita-citangku.” Marusaha do si Sonia marpingkir positif sanggah dong tantangan. Nini use, “Sanggah dong situasi na baru, hupingkirhon ma gabe songon tembok na manlanglangi do ai, atap gabe jembatan laho pasaudkon cita-citangku ai.”

19. Sonaha ma hita patuduhkon tarima kasih bani ganup sibere-bere ni Jahowa?

¹⁹ Ipasu-pasu Jahowa do hita marhitei bahat cara. Tontu sihol do hita martarima kasih ampa mamuji Ia marhitei pambahenanta. (Heb. 13:15) Sada carani, ai ma marusaha ma hita mambere bahat ibagas pangidangion. Anggo ibahen hita sonai, lambin iahapkon hita ma pasu-pasu ni Jahowa. Bani ganup ari marusaha ma hita mangahapkon habujuron ni Jahowa. Jadi boi ma hita maniru Jesus na mangkatahon, “Sipanganon do ai bangku, mangkorjahon rosuh ni na marsuruh ahu ampa mandobkon lahoan-Ni.”​—Joh. 4:34.