1-2. Menurut Masmur 34:8, uga carata meteh maka Jahwe e mehuli?

 CUBA bayangken, lit si nawarken pangan man bandu janah lenga pernah panndu pangan e. Banci saja perdiatekenndu pangan e, anggehndu, sungkunndu kai bumbuna, ntah pe sungkunndu kalak uga nanamna. Tapi gelah tehndu pet ntah lang kam pangan e, sada ngenca carana eme arus panndu pangan e.

² Banci siteh maka Jahwe e mehuli adi sibaca Pustaka ras buku-bukuta bage pe megiken cerita arah kalak si enggo nggejapken kiniulin Jahwe. Tapi gelah tuhu-tuhu siteh uga ulina Jahwe e arus ‘sigejapken’ kiniulinNa. (Baca Masmur 34:8.) Contohna, katakenlah merhat kita ngelayani sepenuh waktu. Tapi guna ngelakoken si e, arus sisederhanaken geluhta. Banci saja enggo rusur sibaca kerna janji Jesus maka adi sipelebe kepentingen Kerajan pasti bereken Jahwe keperlunta. Tapi lenga pernah siidah lakoken Jahwe si e man banta. (Mat. 6:33) Perban tek kita man janji Jesus ndai, sicubaken ngurangi uang keluarta, sisesuaiken dahinta, janah silakoken asa ngasupta bas erberita. Adi silakoken bage, siidah me maka tuhu-tuhu bere Jahwe keperlunta. Banci ‘sigejapken’ maka mehuli kap Jahwe.

3. Bagi si ikataken bas Masmur 16:1, 2, ise saja nge si ngaloken kiniulin Jahwe?

³ “Mehuli kap Jahwe man kerina si nggeluh,” termasuk man kalak si la nandai Ia. (Ms. 145:9; Mat. 5:45) Tapi berekenNa melala si mehuli terlebih ka man kalak si engkelengi Ia ras si ngelayani Ia asa ngasupna. (Baca Masmur 16:1, 2.) Mari sibahas piga-piga kiniulin Jahwe man banta.

4. Uga cara Jahwe ncidahken kiniulinNa man kalak si nggit rembak ras Ia?

⁴ Adi sidalanken kai si suruh Jahwe, sigejapken me maka  si e erguna man banta. Contohna, sanga sipelajari terbuen kerna Jahwe janah turah kekelengenta man baNa, sampatiNa kita mpedauh perukuren ras perbahanen si la ngena ateNa. (Kol. 1:21) Sanga sibaktiken dirita man Jahwe jenari iperidiken, sigejapken me kiniulinNa janah bereNa ka terbuen si mehuli man banta bagi pusuh peraten si bersih. Selain si e, banci ka kita rembak ras Ia.​—1 Pet. 3:21.

5. Uga carata nggejapken kiniulin Jahwe bas pelayanenta?

⁵ Banci terus sigejapken kiniulin Jahwe adi ikut kita bas pelayanen. Contohna, kalak si permela nge kam? Enterem Saksi Jahwe si bage. Banci saja ope lenga kam jadi Saksi Jahwe, la pernah bayangkenndu tuktukndu rumah kalak si la tandaindu janah ceritakenndu kerna Pustaka man bana. Tapi gundari enggo biasa kam ngelakoken si e, janah sampati Jahwe kam gelah reh belinna keriahen ukurndu bas erberita! Enggo gejapkenndu penampat Jahwe bas erbage-bage cara. Enggo sampatiNa kam gelah tetap tenang sanga lit kalak si merawa bandu sanga erberita. SampatiNa kam nginget ayat si atendu pesehndu man kalak si nggit megiken. Janah berekenNa ka kam gegeh gelah banci kam terus erberita amin pe la begiken kalak kam.​—Jer. 20:7-9.

6. Engkai maka pelatihen si bereken Jahwe mbuktiken kiniulinNa?

⁶ Cidahken Jahwe ka kiniulinNa man banta alu ngelatih kita bas pelayanen. (Joh. 6:45) Bas perpulungen tengah pekanta, sibegiken contoh percakapen si mehuli, enda ngiahken kita nggunaken cara erberita e. Tangtangna banci saja gugup kita nggunaken cara si mbaru. Tapi adi silakoken, banci siidah maka saran-saran e erguna bas pelayanen. Bas perpulungen, pertemuan regional ras wilayah, iiahken ka kita ncubaken cara-cara si mbaru bas erberita si lenga pernah sicubaken. Banci saja ngelakoken si e pe gugup kita, tapi adi siusahaken ngelakokenca pasti pasu-pasu Jahwe kita. Gundari mari sipelajari piga-piga kiniulin Jahwe si berekenNa man banta, adi tek kita man Ia janah sicubaken cara-cara si mbaru guna mere si mehulina man baNa la soal uga situasita. Sibahas ka kari uga carata banci mereken terbuen bas pelayanen.

7. Kai pasu-pasu si aloken kalak si nggit mereken terbuen bas pelayanen?

⁷ Banci kita reh rembakna ras Jahwe. Perdiateken pengalamen arah sekalak pertua si gelarna Samuel, * si ngelayani ras diberuna i Kolombia. Meriah akap kalak e ngelayani selaku perintis bas runggunna. Tapi merhat kalak e mereken terbuen bas pelayanen alu nampati bas runggun si merluken terbuen perberita. Guna ngelakoken si e, lit piga-piga si korbanken kalak e. Bagenda nina Samuel, “Dalanken kami nasehat bas Matius 6:33 janah lanai tukur kami kai si la iperluken kami. Tapi si mberatna kap kami pindah arah apartemen kami, perban apartemen e ibangun bagi sura-sura kami janah lanai bias sen kami guna erban si bage.” Sanga kalak e pindah ku runggun si mbaru, ndauh kel sitiken uang keluar kalak e. Nina Samuel, “Banci gejapken kami uga Jahwe ngarak-ngarak kami ras njawap toto kami. Gejapken kami maka meriah ukur Jahwe ngidah kami janah  lenga pernah bagenda rembakna kami ras Ia.” Banci nge lakokenndu terbuen bas pelayanen alu erbage-bage cara? Adi banci, teklah kam maka alu ngelakoken si e pasti reh rembakna kam ras Jahwe janah pasti bereNa keperlunndu.​—Ms. 18:25.

8. Kai si banci pelajarindu arah pengalamen Ivan ras Viktoria?

⁸ Banci sigejapken keriahen ukur bas pelayanenta. Perdiateken komentar Ivan ras Viktoria, pasangen si ngelayani jadi perintis i Kirgistan. Tetap jaga kalak e sederhana geluhna emaka banci kalak e nampati bas erbage-bage penugasen, termasuk proyek pembangunen organisasi. Bagenda nina Ivan, “Kerja keras kami bas kerina tugas kami. Amin pe latih kap kami kenca erdahin sada warin, tapi meriah ukur kami. Perban teh kami enggo gunaken kami gegeh kami bas ngelayani Jahwe. Meriah ka ukur kami perban enterem tambah teman kami bage pe mbue pengalamen si erban meriah ukur kami.”​—Mrk. 10:29, 30.

9. Tentangen kai saja si berhasil adapi Mirreh guna mereken terbuen bas pelayanen, janah kai hasilna?

⁹ Banci sigejapken keriahen ukur bas ngelayani Jahwe amin pe siadapi tentangen. Contohna eme Mirreh si tading i Afrika Barat. Ia enggo janda ras enggo metua janah dahinna dokter. Ngadi ia erdahin janah mulai ia merintis. Mekelek penakitna janah e erban mesera kapna erdalan. Emaka sada jam ngenca ia ngasup erberita arah rumah ku rumah. Tapi ngasup ia terdekahen erberita alu njaga gerai janah melala kalak si banci dahina mulihi bage pe si erlajar Pustaka ras ia. Piga-piga arah kalak e hubungina arah telepon nari. Engkai maka nggit Mirreh mereken terbuen man Jahwe? Nina, “Kekelengenku man Jahwe ras Jesus Kristus bali bagi lau si maler si la erngadi-ngadi. Rusur aku ertoto mindo penampat Jahwe gelah banci kulakoken asa ngasupku bas ngelayani Ia.”​—Mat. 22:36, 37.

10. Bagi si ikataken bas 1 Petrus 5:10, kai si aloken kalak si mereken terbuen man Jahwe?

¹⁰ Banci sidat pelatihen tambahen arah Jahwe. Si e igejapken Kenny, sekalak perintis si ngelayani i Mauritius. Sanga erlajar kebenaren ia, ngadi ia kuliah. Iperidiken ia janah ngelayani sepenuh waktu. Nina, “Kuusahken gelah banci kulakoken kai si kataken Nabi Jesaya, nina, ‘Aku, suruhlah aku.’” (Jes. 6:8) Enggo erdahin Kenny bas piga-piga proyek pembangunen organisasi. Ikut ka ia nampati bas nerjemahken baca-bacanta ku bahasana. Nina Kenny ka, “Kualoken ka pelatihen guna ndungi tugasku.” Tapi labo e saja ngenca si alokenna. Nina, “Dungna banci kuteh kai kekurangenku ras sipat-sipat kai si perlu kupehuli gelah reh ulina ngelayani Jahwe.” (Baca 1 Petrus 5:10.) Cuba ukuri keadanndu gundari, banci nge banndu penyesuaien guna ndatken pelatihen tambahen arah Jahwe?

11. Kai saja si lakoken turang seninata i Korea Selatan gelah banci mereken terbuen bas pelayanen? (Nen gambar sampul.)

¹¹ Amin pe enggo ndekah kita jadi Saksi Jahwe, perlu denga kita ilatih ngelakoken cara-cara si mbaru bas pelayanen. Contohna, sedekah pandemi COVID-19, pertua-pertua si lit bas runggun i Korea Selatan nulis kata-kata enda, “Piga-piga kalak si la banci ikut erberita perban kurang sehatna, gundari enggo banci ikut erberita arah video-conference. Telu turang seninata si umurna 80-en tahun mpelajari cara make komputer janah gundari enggo erberita kalak e hampir tiap  wari.” (Ms. 92:14, 15) Nggit nge kam mereken terbuen bas pelayanen gelah gejapkenndu terbuen kiniulin Jahwe? Mari sibahas piga-piga cara si banci lakokenndu guna ndatkenca.

12. Kai janji Jahwe man kalak si nggit ngandalken Ia?

¹² Andalkenlah Jahwe. Erjanji Jahwe mereken melala pasu-pasu man kalak si tek man baNa ras si mereken si mehulina. (Mal. 3:10) Sekalak turang seninata si gelarna Fabiola arah Kolombia, enggo nggejapken janji e. Merhat ia ngelayani jadi perintis biasa kenca iperidiken. Tapi la banci perban arus ia erdahin guna nampati keuangen keluargana. Emaka sanga pensiun muda atena, ertoto ia mindo penampat Jahwe. Nina, “Biasana ndekah maka banci ndarat sen pensiun. Tapi aku, sada bulan pe enggo cair sen pensiunku ndai. Enda bagi mukjizat kel kuakap.” Dua bulan kenca si e, jadi perintis ia. Gundari umurna 70-en janah enggo lit 20 tahun dekahna ia jadi perintis. Sedekah pelayanenna e, lit waluh kalak isampatina seh ngasa iperidiken. Nina, “Amin pe mon-mon la kuakap aku ngasup, tapi sampati Jahwe aku tiap wari gelah banci aku tetap jadi perintis.”

13-14. Contoh-contoh kai si banci nampati kita gelah tek man Jahwe janah ngelakoken terbuen bas pelayanen?

¹³ Pelajarilah contoh-contoh arah kalak  si ngandalken Jahwe. Melala contoh-contoh bas Pustaka kerna kalak si kerja keras bas ngelayani Jahwe. Arah pengalamen kalak e banci sipelajari maka arus sibuktiken lebe kinitekenta man Jahwe gelah banci sidat pasu-pasu Jahwe. Contohna, aloken Abraham pasu-pasu Jahwe kenca lawes ia nadingken rumahna “amin pe la tehna ku ja ia lawes.” (Heb. 11:8) Aloken Jakup pasu-pasu si istimewa arah Jahwe kenca ergulat ia ras sada malekat. (Kej. 32:24-30) Bangsa Israel pe bage, sanga nandangi masuk kalak e ku Negri Perjanjin, banci sebrangi kalak e Lau Jordan kenca perjakken imam-imam nahena ku lau e.​—Jos. 3:14-16.

¹⁴ Banci ka datndu manpaat alu mpelajari contoh-contoh arah Saksi si gundari si tek man Jahwe janah mereken terbuen bas pelayanen. Contohna, turang seninata Payton ras diberuna Diana. Meriah kap kalak e mbaca pengalamen turang senina si mereken terbuen bas ngelayani Jahwe, bagi si lit bas bagin “Mereka Merelakan Diri.” * Bagenda nina Payton, “Sanga baca kami pengalamen kalak e, tempa-tempa sangana inen kami kalak si man pangan si entabeh. Reh dekahna tonton kami, reh merhatna kami ‘nggejapken ras ngenen maka mehuli kap Jahwe.’” Dungna, Payton ras Diana pindah guna ngelayani bas ingan si merluken terbuen perberita. Enggo nge bacandu pengalamen-pengalamen e? Enggo nge tontonndu video Menginjil di Daerah Terpencil—Australia ras Menginjil di Daerah Terpencil—Irlandia si lit i jw.org? Bahan-bahan e banci nampati kam ndarami cara si banci lakokenndu guna mereken terbuen bas pelayanen.

15. Kai gunana adi erteman kita ras kalak si utamakenna ngelayani Jahwe?

¹⁵ Pilihlah teman-teman si banci ndukung kam. Reh merhatna kita man pangan si lenga pernah sipan adi sipan pangan e ras kalak si entabeh kapna manca. Bage ka me, adi erteman kita ras kalak si utamakenna ngelayani Jahwe, kita pe dungna merhat mereken terbuen bas ngelayani Jahwe. Contohna, Kent ras diberuna Veronica, si ngelayani jadi perintis istimewa i Serbia nggejapken maka tuhu kel kata-kata e. Nina Kent, “Teman-teman kami ras keluarga kami ngiahken kami ncubaken cara si mbaru bas ngelayani. Gejapken kami maka erteman ras kalak si mpelebe Kerajan Dibata erban kami reh pangna ncubaken kai si mbaru.”

16. Bagi perumpaman si ceritaken Jesus bas Lukas 12:16-21, engkai maka arusna nggit kita erban pengorbanen?

¹⁶ Banlah pengorbanen man Jahwe. Gelah meriah ukur Jahwe, labo perlu sikorbanken kerina si meriah siakap ngelakokenca. (Peng. 5:19, 20) Tapi, adi la kita nggit mereken terbuen bas ngelayani Jahwe perban la kita nggit ngorbanken si meriah siakap, lit bahayana. Kai e? Banci siban kesalahen bagi dilaki si lit bas perumpaman Jesus si la diatena Dibata perban riahen kapna mpepulung erta. (Baca Lukas 12:16-21.) Sekalak turang senina si gelarna Christian, si tading i Prancis ngataken, “Lenga kuakap kubereken si mehulina man Jahwe bage pe man keluargaku.” Dungna ersada arihna ras diberuna gelah jadi perintis. Tapi gelah banci kalak e merintis, arus tadingken kalak e dahinna si gundari. Guna ndukung kalak e merintis, mulai kalak e erdahin bas  bagin kebersihen. Sitik ngenca gajina tapi meriah ukur kalak e. Lit nge gunana pengorbanen kalak e? Nina Christian, “Reh riahna ukur kami bas ngelayani Jahwe gundari. Banci ka idah kami kalak si erlajar Pustaka ras kalak si dahi kami mulihi erlajar kerna Jahwe.”

17. Engkai maka mesera siakap ncubaken cara si mbaru bas erberita?

¹⁷ Nggitlah kam ncubaken cara si mbaru bas pelayanen. (Perb. 17:16, 17; 20:20, 21) Shirley, sekalak perintis bas Amerika Serikat, sesuaikenna carana erberita sedekah pandemi COVID-19. Tangtangna, la ia nggit ncubaken erberita arah telepon, tapi kenca datna pelatihen sanga reh pertua keliling ku runggunna, mulai ia ratur erberita arah telepon. Nina, “Tangtangna mbiar aku. Tapi dungna meriah kuakap ngelakokenca. Banci teremen kalak sijumpai arah telepon asangken erberita arah rumah ku rumah!”

18. Kai si banci nampati kita adi siadapi tentangen sanga ngelakoken terbuen bas pelayanen?

¹⁸ Banlah rencana janah dalanken. Sanga siadapi tentangen, perlu kita ertoto mindo penampat janah siukuri kai si arus silakoken. (Kua. 3:21) Sonia, si ngelayani jadi perintis biasa bas kelompok bahasa Romani i Eropa ngataken, “Meriah kuakap nulis rencanaku bas sada kertas janah kutempel kertas e bas ingan si nukah ngidahsa. Bas mejaku, kugambar dua dalan si beda tujunna. Sanga kuban ateku keputusen, kunen duana dalan e janah kuukuri keputusen si apai nge si nampati aku ndatken tujunku.” Usahaken Sonia tetap positip sanga adapina tentangen. Nina, “Aku si nentukenca, tentangen e kuanggap jadi tembok si ngambati aku ndatken tujunku, ntah bagi jembaten si nampati aku ndatken tujunku.”

19. Uga carata ngergai kiniulin Jahwe?

¹⁹ Enggo melala kel pasu-pasu Jahwe man banta. Banci sibuktiken maka siergai pasu-pasuNa e adi sipuji Ia asa ngasupta. (Heb. 13:15) Adi terus sidarami cara si mbaru bas ngelayani Jahwe, reh buena pasu-pasu si bereNa man banta. Emaka tiap wari, sidaramilah cara guna ‘nggejapken janah ngenen maka Jahwe e mehuli.’ Alu bage, banci kita seri ras Jesus si ngataken, “Panganku eme ngelakoken peraten Ia si nuruh aku, janah ndungi dahin si berekenNa man bangku.”​—Joh. 4:34.