1, 2. Según Sálumu 34:8, ka lunbei wadügüni lun warihini lubuidun Heowá?

SAMINA wamá aba lan lóuchagüdün aban gürigia éigini woun le furumiñe wéiyaasu wouchuni. Gayaraati wasaminarun luagu lisemén láurügü warihini, wirimichuni, wálügüdahan ka lan lubuñabei o wálügüdün somu gürigia anhein hínsiñe lubéi lun. Gama lumoun, lun wasubudiruni anhein hínsiñe lubéi woun mosu, wouchuni.

² Ítarameme, gayaraati giñe wasubudiruni ida liña lan ligaburi Heowá, lau waliihanu Bíbülia tuma wani agumeiraguagüdüni, luma giñe lau waganbuniña amu ayanuha ida liña lan labiniruniña Heowá. Gama lumoun, gunfuranda wabéi lubuidun ligaburi Heowá buidu buidu ánhawa etenira arihei lubuidun wama (aliiha huméi Sálumu 34:8). Ru wama aban hénpulu. Samina wamá busentiwa lan weseriwidun lun Heowá lidan dan dayarüti, ani lun wadügüni mégeitiwa lun walouguagüdüni wámati. Háfuga aliihadiwa lan saragu wéiyaasu luagu le füramase lubéi Hesusu luáguti ánhawa lan íchigei Larúeihan Bungiu lidan furumiñeti lúgaaru, líchugubei lan Heowá le wemegeirubei woun, másiñati marihin wamagili lan lagunfulirun füramase le lidan wakesin (Mat. 6:33). Íbini ítara, kei afiñe wabéi luagu le füramase lubéi Hesusu, aba magastaruhadiwa lan saragu ani míbeeli giñe oura wau awadigimarida, ábati wetenirun lun wapurichihan. Lau wadügüni aba warihini lau wagu woungua Heowá guánarügü lan óunigirubaliwa. Ani ítara liña warihini lubuidun Heowá.

3. Según Sálumu 16:1, 2, kátaña asagarubaña buiti lídangiñe lubuidun Heowá?

³ Buiti Heowá “hama sun gürigia”, íbini hama ha ibidiñehabunbaña lun (Sal. 145:9; Mat. 5:45). Biní lumutiña hátima asandirubaña ínsiñeni luagu ani hínsiñe ligía houn tídangiñe sun hanigi (aliiha huméi Sálumu 16:1, 2). Ariha wamá fiu lídangiñe katei le adüga laalibei Heowá wawagu.

4. Ida liña larufuduni Heowá lubuidun houn ha agumeserubaña ayarafada lun?

 ⁴ Sagü wadügüni le wafurendeirubei lúmagiñe Heowá, ariha wamuti buiti le lanügübei woun. Eibu afurendeireina wamá luagu ani hínsiñe ligía woun, éibutima wasansiruni ligaburi wasaminan luma ligaburi wóuserun le meha adisedagüdübaliwa luéi (Kol. 1:21). Ani dan le wederegerunbalin wabagari lun ani badisei wagía, ábatima larufuduni lubuidun ligaburi lau lígirun lun ñein lan aban lubuidun saminaü wawagu luma lun gamadagua wamá luma (1 Fe. 3:21).

5. Ka buiti ariha humaalibei luagu Heowá lidan hapurichihan?

⁵ Ariha wamuti sun oura lubuidun Heowá lidan wapurichihan. Aban san gürigia haburiti huguya? Saragu lubúeingu Heowá ítara haña. Másiñati lubaragiñe lan hasubudiruni inarüni maweiyasuntün meha adaünha luagu habenari gürigia ha ibidiñetiña hun lun hayanuhan hama tuagu Bíbülia. Ani uguñe weyu gabügürüguaali hadügüni. Lanwoun lira, lau lídehan Heowá, furendeihadün agundaara lidan apurichihani. Sandí humaali giñe líderagunün Heowá lidan saragu igaburi. Kei hénpulu íderagua laadün lun darangilu humá dan le lóuserunün aban gürigia wuriba lidan apurichihani. Íderagua laadün giñe lun haritaguni bérusu le lunbei hayusuruni dan le hayanuhan luma aban gürigia le busenbei lafurendeirun tuagu Bíbülia. Ani ru laali giñe erei le hemegeirubei lun hasigirun hubaruaguóun dan le hagagibudagun hama gürigia ha mabusenrunbaña haganbunün (Her. 20:7-9).

6. Ida liña warihini lubuidun Heowá lidan arufudahani le líchugubei woun?

⁶ Arufuda laali giñe Heowá lubuidun woun lau larufudahan woun lun wapurichihan (Huan 6:45). Lidan adamuridaguni le adügübei labadinagua dimaasu, ru wati burí adundehani luáguti ida luba lan wayanuhan hama gürigia ani ínchahouatiwa lun wayusuruni lidan wapurichihan. Lau wasaminarun luma lau wálugun wadügün amu katei iseri, másiñati lebelurun murusun anufudei woun furumiñe. Gama lumoun, dan le wadügüni aba wíchugun fe buidu lan adundehani burí ligía lidan fulasu ñein lubéi wapurichiha. Ínchahouatiwa giñe lidan adamuridaguni luma lidan adamurini lun wapurichihan lidan ámuñegueinarügü igaburi le meha madügün wamuti. Gayaraati giñe ladügün le lun wáfuridun lídangiñe le uágubei wéchuda. Ligíati anhein wadüga wíchuguba aban katei lun Heowá lun labiniruni. Guentó wariha fiu lídangiñe katei iseri le líchugubei Heowá woun dan le wouchun wadügün iseri katei lun wabuiduragüdüni dasi le líchugubei woun lun wadügüni, meberesenga ka lan gádanbaliwa. Lárigiñe warihibei ka lan gayaraabei wadügüni lun wibihini le wabusenrubei wibihin.

7. Ka abiniruni weresibirubei dan le wáfaagun lun waganwoundagüdüni weseriwidun lun Heowá?

⁷ Ábatima wayarafadun lun Heowá. Ariha waméi le asuseredubei lun Samueli, * le eseriwidubei úara tuma lani weiriou Kolonbia. Gúndaati meha lau leseriwidun kei prekursoru lidan damuriguaü le meha ñein lubéi, gama lumoun, busenti meha laganwoundagüdüni leseriwidun lun Bungiu lau lídehan lidan aban damuriguaü le ñein lubéi mégeiwa hamá apurichihatiña. Lun gayara lan hibihini mosu meha hadügün fiu asansiruni. Ariñagati Samueli: “Aba wadügüni le lariñagubei Matéu 6:33 ani aba magañeihandiwa lan katei le memegeirun wamuti. Ani létima hénrengutimabei woun wígirunu waban, to meha aranse wamaaruboun kei le aubei wabusenra ani fayei wamaaru meha”. Lidan iseri fulasu le ñein lubéi heseriwida, aba híchugun fe gayara lan hawinwandun lau murusun lídangiñe seinsu le meha hagañeirubei. Ariñagati  Samueli: “Ariha wamaali ida liña lan ladundehani Heowá sun le wadügübei ani óunaba lumuti wafurieidun. Sandí wamuti línsiñehabu luma lugundan lau le wadügübei lidan aban igaburi le marihinñaha wamagili”. Gayaraati san haganwoundagüdüni hani ministeriu? Anhein ítara liña lubéi, gayaraati hachoururuni hayarafaduba lan saragu lun Heowá ani lóunigirubadün lan (Sal. 18:25).

8. Ka furendei humaalibei lídangiñe le labahüdagubei Iván tuma Viktoria?

⁸ Gúndaagüda lumutiwa weseriwidun lun Heowá. Samina wamá luagu le labahüdahabei Iván tuma Viktoria, aban feru maríeitiña prekursorugu ha eseriwidubaña Kirguistán. Aba hanúadirun lun mibe lan hámati lun gayara lan hídehan lidan furumiñeguarügü dasi, kei burí tábunawagun muna to lánina leseriwidúniwa lun Heowá. Ariñagati Iván: “Adüga wamuti sun wayaraati lidan kada dasi. Íbini buchá lan wawagun dan lagumuchun weyu, sandiguatiwa woungua gúndaañu ani lau darangilaü, ladüga subudi wamuti ru wamaali lan sun were lidan wadagimanu lani Larúeihan Bungiu. Lubuidun umadaguaü le burí wadügübei luma waritagun luagu sun lira adügati giñe lun gunda wamá” (Mar. 10:29, 30).

9. Ka tadügübei aban íbiri to hénrenguti gádantu, lun taganwoundagüdüni teseriwidun lun Heowá, ani ida liña lidin tun?

⁹ Gayaraati giñe ladügün weseriwidun lun Heowá lun wagundaarun anhein hénrengu lubéi le gádanbaliwa. Kéiburi aban würi gíritu Mirreh derebuguharu to awinwanduboun Áfürika ani hilá tani weiriei, surusia meha. Dan le tibihin bali tidaani lídangiñe wadagimanu aba tadügagun tungua prekursora. Anihein meha aban lisandi abun tuagu le awanseeli, sagü táfuridun apurichiha ábanrügüñein oura tapurichihan tidan burí muna. Gayaraati tapurichihan saragu le ñéingiñe lubéi hásügüra saragu gürigia. Añahein giñe saragu gürigia lúntiña tabisidahaniña, añahein giñe lunti tíchugun aturiahani houn, añahein hádangiñe luéigiñe gágamuru tetenira houn. Ka san ínchahabarun lun busén tan taganwoundagüdüni teseriwidun lun Heowá? Ariñagatu: “Buíntiña nanigi lau ínsiñeni luagu Heowá luma luagu Hesukrístu. Súnwandan namuriahan luma Heowá lun líderagunina lun nadügüni sun niyaraati lidan neseriwidun lun” (Mat. 22:36, 37).

10. Ítara kei larufuduni 1 Féduru 5:10, ka líchugubei Heowá houn ha áfaagubaña lun haganwoundagüdüni heseriwidun?

¹⁰ Ruti Heowá amu arufudahani woun. Chóurugüda lumuti Kenny lungua aban prekursoru le awinwandubei lidan ageiraü le gíribei Maurisio, luagu inarüni lan dimurei le. Dan le lafurendeiruni inarüni, aba lígiruni laturiahan tidan luba furendei íñuti, ani aba labadiseirun aba lagumeserun eseriwida lidan dan dayarüti. Ariñagati: “Áfaaguatina lun ítara nan kei profeta Isaíasi, le ariñagubei ‘Anahán óunahabana’” (Isa. 6:8). Seriwi hali Kenny lidan saragu dasi le lánina ábunaguni ani ídehaali giñe ásügüragüda agumeiraguagüdüni lidoun liñeñe guánarügü. Ariñagati: “Arufudahóuati nun, lun gayaraagua nan nungua lun nadügüni nidasin”. Mama furendeirügüti adügei luadigimari. Ariñagayati: “Furendeitina ka lan siñá nubéi adüga luma kaba lan igaburi lunti nawadigimaridun lidan lun nabuiduragüdüni neseriwidun lun Heowá” (aliiha huméi 1 Féduru 5:10). Ka uagu makutihan hubalin le gádanbalün luma lun harihini anhein gayara lubéi aranseñu humá lun heresibirun lanwoun arufudahani lúmagiñeti Heowá?

11. Ka áfaaguni hadügübei fiu íbirigu würiña Koréa le lani Suru lun hapurichihan, ani ida liña lidin houn? (Ariha humoun iyawaü to luáguboun tidáü garüdia).

¹¹ Íbini ha barühañabaña saragu irumu eseriwida lun Heowá gayaraati lahuudun arufudahani le ñǘbuinbei lúmagiñe Heowá dan le gunda lan lau iseri ligaburi leseriwidúniwa. Lidan lidaani COVID-19 abürühatiña wéiyaaña lidan  afiñeni ha lídanbaña damuriguaü Koréa le Surubei, ariñagatiña: “Añahein meha íbirigu ha saminabaña siñabei lan hapurichihan ladüga hasandi, ani guentó hadügüñein luéigiñe teknolohía. Añahein 3 íbirigu würiña kei burí lóugiñe 80 irumu hau furendeihaña layusurun iseri teknolohía le, ani guentó hapurichihaña kei burí sagü weyu” (Sal. 92:14, 15). Hínsiñeti hamuga san hun haganwoundagüdüni hani ministeriu luma lun harihini lubuidun Heowá? Líderagubadiwa le lunbei harihini guentó lun hibihini le habusenrunbei lidan heseriwidun.

12. Ka füramase lubéi Heowá houn ha afiñebaña luagu?

¹² Furendei humá afiñera luagu Heowá. Ánhawa afiñera luagu Heowá ani ru wameime le buídutimabei lun, füramaseti labinirubadiwa lan saragu (Mal. 3:10). Ariha tumuti aban íbiri kolonbiana to gíriboun Fabiola tungua, ida liña lan lagunfuliruni Heowá füramasei le. Busentu meha prekursora tan murusun dan lárigiñe tabadiseirún, gama lumoun megei hamuti meha dandu tani weiriei kei ǘrüwa tisaanigu lídangiñe seinsu le tagañeirubei. Ligíati, dan le lachülürünbei dan lun tibihini tidaani lídangiñe wadagimanu, aba tafurieidun lun Heowá lun líderagunün. Ariñagatu: “Libe-agei dan barüti saragu dan lun taransehóun burí gárada lárigiñe libihini gürigia lidaani lídangiñe wadagimanu lun gayara lan leresibiruni liseinsun, ánheinti nuguya aban hati lárigiñe namuriahani aban híchuguni nun. Ítara liña kamá aban milaguru”. Bián irumu lárigiñe aba tagumeserun eseriwida kei prekursora. Ani guentó 70 irumu tau ani barüharu lóugiñe 20 irumu lidan eseriwiduni le. Lidan dan burí ligía íderaguaaru hóugiñe 8 gürigia lun habadiseirun. Ariñagatu:  “Anihein dan sandiguatina nungua débili nan, gama lumoun, íderagua laadina Heowá sagü weyu lau burí nagunfuliruni nóurate”.

13, 14. Ka hénpulu gayaraabei líderaguniwa lun wafiñerun luagu Heowá luma lun wáluahan waganwoundagüdüni weseriwidun lun?

¹³ Furendei humá lídangiñe hani amu hénpulu ha afiñebaña luagu Heowá. Buíntiña Bíbülia lau hénpulu hani gürigia ha áfaagubaña saragu lidan heseriwidun lun Bungiu. Lidan saragu kesi, mosu meha harufuduni furumiñe áfaaguni le hadügübei lubaragiñe burí líchuguni Heowá abiniruni espechaliti houn. Kei Abüraámü, biní lumuti meha Bungiu lárigiñe “láfuridun lageiragiñe, ibidiñounga lun haliñounbei lan” (Ebü. 11:8). Ánheinti Hakobu resibiti aban abiniruni espechaliti lárigiñebei lageindagun luma aban ánheli (Agu. 32:24-30). Dan le hebelura lan meha ísüraelina lidoun Fulasu Füramasewati, gayaraati meha hánhiñuraguni duna Hordán lárigiñe hádaruni fádirigu hagudi dúnarugun (Hos. 3:14-16).

¹⁴ Gayaraati giñe hafurendeirun lídangiñe hani Gefentiña hénpulu ha lánina wadaani ha afiñebaña luagu Heowá ani áluaha hamaali ida luba lan haganwoundagüdüni heseriwidun lun. Kei hénpulu hínsiñeti lun aban íbiri gíriti Payton tuma Diana to lani weiriou haliihan sügǘ hawaguti íbirigu ha agawoundagüdübalin heseriwidun lun Heowá, le áfuridubei lidan fánreinti le gíribei “Deregeguatiña houngua lau ugundani lun heseriwidun”. * Ariñagati: “Dan le waliihani sügǘ burí le sanditiwa kamá hamuga waríaguña aban gürigia le gúndaabei eiga aban éigini semeeti. Dántima le waríaguni, éibutima busén wamá wouchuni luma lun warihini luagu buidu lan Heowá”. Lau lásügürün dan aban háguyun feru maríeitiña ha lidoun aban fulasu le ñein lubéi hemegeirúa apurichihatiña. Aliiha humaali san fánreinti burí le? Ariha humaali san bidéu Predicación en lugares apartados: Australia luma Predicación en lugares apartados: Irlanda, le lídanbei jw.org?. Sun burí le gayaraati líderaguniwa lun waganwoundagüdüni weseriwidun lun Bungiu.

15. Ida liña híderaguniwa umadagu buítiña?

¹⁵ Anúadira humá umadagu buítiña. Ménrengunti wouchun iseri éigini ánhawa ásügüra dan hama gürigia ha hínsiñeti éigini ligía houn. Ítarameme ánhawa ásügüra dan hama gürigia ha etenirubaña lun heseriwidun lun Heowá, ménrenguntimabei woun wáluahan ida luba lan waganwoundagüdüni weseriwidun lun Bungiu. Ligía asuseredubei lun Kent luma tun Verónica. Ariñagati Kent: “Ínchaha hamutiwa wamadagu hama waduheñu lun wouchun iseri ligaburi eseriwiduni. Aba wíchugun fe dan le lan wásügürün dan hama ha áluahabalin Larúeihan Bungiu furumiñe ru lan ichouruni woun lun wagumeserun aban iseri eseriwiduni”. Uguñe weyu heseriwiduña íbirigu ha kei prekursorugu espechalitiña Sérübia.

16. Según ariñahani le lídanbei Lúkasi 12:16-21, ka uagu lunti lubéi aranseñu wamá lun wadügün sákürifisiu?

¹⁶ Aranseñu humá lun hadügün sákürifisiu luagu Heowá. Lun hagundaaragüdüni Heowá memegeiruntün lun hadisedun luéi lubuidun hidaani (Apur. 5:19, 20). Ligíati ánhein maganwoundagüdün wamá weseriwidun lun Bungiu ladügarügü mabusenrun wamá wadügün sákürifisiu, gayaraabei lasuseredun woun kei lasuseredun lun wügüri le uágubei labahüdahan Hesusu wügüri meha le buídubei dan un gama lumoun aba labulieidagun luéi Bungiu (aliiha huméi Lúkasi 12:16-21). Ariñagati aban íbiri le gíribei Christian, le awinwandubei hageira Faransu: “Mama meha níchuguñein le buídutimabei númagiñe ni nidaani ni nere lun Heowá ni houn niduheñu”. Ligía meha tuma lani weiriou aba hanúadirun heseriwidun kei prekursorugu, lun gayara lan hibihini, mosu meha hígiruni  hawadigimari. Lun gayara lan hanuriagun houngua aba hadararun aban liraüraü bísinisi lánina arumadahani ani furendeitiña agundaara lau murusun le hámati. Sagati san buiti lídangiñe? Ariñagati: “Gúndaatiwa lau wapurichihan luma lau warihiniña aturiahatiña tídangiñe Bíbülia hama gürigia ha wabisidahabaña afurendeira luagu Heowá”.

17. Ka san uagu añahein lubéi íbirigu manigitiña houchun iseri ligaburi apurichihani?

¹⁷ Houcha humá iseri ligaburi leseriwidúniwa lun Bungiu. (Adü. 17:16, 17; 20:20, 21). Mosu meha tadügün aban prekursora to Merigana gíritu Shirley asansiruni lidan tani ministeriu lidan lidaani sandi COVID-19. Furumiñe manigitu meha lun tapurichihan luéigiñe gágamuru. Aban weyu lidan labisidahaniña óunigiruti sirkuitu aba larufudahóuniwa tun ida luba lan tadügüni. Lúmagiñe dan ligía aba gabügürügualá tapurichihan luéigiñe gágamuru. Ariñagatu: “Furumiñe hanufudetina meha napurichihan luéigiñe gágamuru ani guenlé hínsiñe hali nun. Ayanuhatimatiwa hama gürigia guenlé sügǘ luéi dan meha le ñǘdüngidiwa apurichiha tidan burí muna”.

18. Ka gayaraabei líderaguniwa lun wiñuragun lídangiñe turobuli létima adügübei lun hénrengutima lan waganwoundagüdüni wani ministeriu?

¹⁸ Anúadira humá aban dasi le habusenrubei hadügün ani áfaagua humá lun hagunfuliruni. Dan le wásügürün lídangiñe turobuli, furíei wamá lun Heowá ani samina wamá lau lámarun ida luba lan wagagibudagun luma waturobulin (Ari. 3:21). Ariñagatu Sonia, íbiri to eseriwiduboun kei prekursora lidan aban sétanu le romaní Yuropa: “Hínsiñeti nun nabürüdüni le nabuserunbei nadügün luma lun níchugunu gárada tuguya lidan aban fulasu le ñein lubéi gayara lan narihinu. Anihein aban dábula lidan nirumun lau aban dibuhu lau üma geyeti. Dan le mosu lan nanúadirun nadügün somu katei, aba narihini dibuhu aba nasaminarun, halíaba lanügana adundehani burí le”. Dan meha le gaturobulin tan Sonia áfaaguatu lun tarufudun aban lubuidun igaburi. Ariñagatu: “Kada lan aban lídangiñe katei le nabusenrubei nadügün ariha numuti kei aban óunwenbu baríeiru le adügübei lun siñá lan nibihini le nabusenrubei nadügün o kei aban burichi to adügüboun lun gayara lan nibihini. Sun lira según igaburi le narufudubei”.

19. Ida luba warufuduni seremei wamani Heowá luagu sun katei buiti le ru laalibei woun?

¹⁹ Biní lumutiwa Heowá lidan ámuñegueinarügü igaburi. Gayaraati warufuduni lun seremei wamani lau wadügüni sun wayaraati lun walawahani (Ebü. 13:15). Lidan, gayaraati wáluahan iseri igaburi lun waganwoundagüdüni weseriwidun. Ánhawa adügübei, labinirubadiwa Heowá. Ligíati, áluaha wamá chansi sagü weyu lun wouchun luma lun warihini lubuidun Heowá. Ítara waba kei Hesusu le ariñagubei: “Nadügüni lugundan le óunahabalina, luma nagumuchuni luadigimari, ligía néiginbei” (Huan 4:34).