1-2. Sumala sa Salmo 34:8, unsay angay natong buhaton aron masayran kon unsa ka maayo si Jehova?

IMADYINA nga dunay naghatag nimog pagkaon nga wala pa nimo matilawi sukad. Mahibaloan nimo kon unsay lami niini pinaagi sa pagtan-aw, pagsimhot, pagpangayo sa resipe, o pagpangutana sa uban kon giganahan ba sila niini. Pero aron maseguro nimo kon ganahan ka niini, kinahanglan nimo ning tilawan.

² Masayran nato kon unsa ka maayo si Jehova pinaagi sa pagbasa sa Bibliya ug sa atong mga publikasyon, maingon man sa pagpaminaw sa uban nga maghisgot bahin sa mga panalangin nga ilang nadawat gikan kang Jehova. Pero masabtan lang gyod nato kon unsa ka maayo si Jehova sa dihang ‘matilawan’ nato mismo ang iyang pagkamaayo. (Basaha ang Salmo 34:8.) Niay usa ka pananglitan nga mahimo nato kana. Ibutang ta nga gusto natong makigbahin sa usa ka matang sa bug-os panahong pag-alagad. Pero aron makab-ot ang maong tumong, kinahanglan natong pasimplehon ang atong kinabuhi. Tingali, pirme natong mabasa ang saad ni Jesus nga kon unahon nato ang Gingharian, si Jehova magtagana sa mga butang nga ato gyong gikinahanglan. Pero wala pa gyod nato maeksperyensiyahi ang katumanan niana nga saad. (Mat. 6:33) Apan kay mituo ta sa saad ni Jesus, gimenosan nato ang atong galastohan ug sekular nga trabaho ug giuna nato ang atong ministeryo. Samtang gihimo nato kana, naeksperyensiyahan nato mismo nga si Jehova magtagana gyod sa atong mga panginahanglan. ‘Natilawan’ nato mismo ang pagkamaayo ni Jehova.

3. Base sa Salmo 16:1, 2, kinsay nakabenepisyo sa pagkamaayo ni Jehova?

³ Si Jehova “maayo sa tanan,” bisan niadtong wala makaila kaniya. (Sal. 145:9; Mat. 5:45) Pero kadtong nahigugma kang Jehova ug nag-alagad kaniya nga tibuok kalag ilabinang makadawat ug  daghang panalangin gikan kaniya. (Basaha ang Salmo 16:1, 2.) Matikdi ang pipila ka paagi nga nakabenepisyo ta sa pagkamaayo ni Jehova.

4. Sa unsang paagi gipakita ni Jehova ang iyang pagkamaayo niadtong nagsugod sa pagpakigsuod kaniya?

⁴ Matag higayon nga ipadapat nato ang atong nakat-onan kang Jehova, makita nato ang maayong mga epekto niini sa atong kinabuhi. Samtang padayon tang nagkat-on bahin kaniya ug nahigugma kaniya, gitabangan ta niya nga mahunong ang mga panghunahuna ug binuhatan nga kaniadto nakapahilayo nato kaniya. (Col. 1:21) Ug sa dihang nagpahinungod ta kang Jehova ug nagpabawtismo, naeksperyensiyahan pa gyod nato ang iyang pagkamaayo kay gihatagan ta niyag hinlong konsensiya ug nasuod ta kaniya.—1 Ped. 3:21.

5. Sa unsang paagi maeksperyensiyahan nato ang pagkamaayo ni Jehova diha sa atong ministeryo?

⁵ Padayon natong maeksperyensiyahan ang pagkamaayo ni Jehova samtang makigbahin ta sa ministeryo. Maulawon ka ba? Daghan sa katawhan ni Jehova ang ingon niana. Tingali sa wala pa ka mahimong alagad ni Jehova, dili nimo maimadyin ang imong kaugalingon nga manuktok sa pultahan niadtong dili nimo kaila ug magpaambit kaniyag dili kaayo ginadawat nga mensahe. Pero karon, regular na nimo kanang gihimo. Ug sa tabang ni Jehova, giganahan ka na sa buluhatong pagsangyaw! Gibati nimo nga gitabangan ka ni Jehova sa daghan pang paagi. Gitabangan ka niya nga magpabiling kalmado dihang makaestorya kag oposer. Gitabangan sab ka niya nga mahinumdom sa haom nga teksto nga basahon ngadto sa interesado nga tagbalay. Ug gihatagan ka niyag kusog nga makapadayon sa pagsangyaw bisan dihang ang mga tawo dili maminaw.—Jer. 20:7-9.

6. Sa unsang paagi ang pagbansay nga gitagana ni Jehova nagpakita sa iyang pagkamaayo?

⁶ Gipakita sab ni Jehova ang iyang pagkamaayo pinaagi sa pagbansay kanato alang sa ministeryo. (Juan 6:45) Panahon sa atong midweek nga tigom, makadungog tag maayong pagkaandam nga sampol nga mga pagpakig-estorya, ug gidasig ta nga gamiton kana diha sa ministeryo. Sa sinugdan, medyo makulbaan tingali ta nga mosulay ug bag-ong pamaagi. Pero sa dihang himoon nato kana, makita tingali nato nga ang bag-ong pamaagi epektibo diay sa atong teritoryo. Gidasig sab ta panahon sa atong mga tigom ug kombensiyon nga sulayan ang lainlaing paagi sa pagsangyaw nga tingali wala pa nato mahimo sa una. Basin makulbaan na sab ta niini, pero kon buhaton nato ni, gihatagan natog rason si Jehova nga panalanginan ta. Hisgotan nato ang pipila sa mga panalangin nga atong madawat sa dihang mosulay tag bag-ong mga pamaagi sa paghatag kang Jehova sa atong kinamaayohan, bisag unsa pay atong kahimtang. Dayon hisgotan nato ang mga pamaagi nga puwede natong mapalapad ang atong ministeryo.

7. Unsang panalangin ang atong madawat sa dihang maningkamot ta nga mapalapad ang atong ministeryo?

⁷ Mas masuod pa ta kang Jehova. Konsideraha ang pananglitan sa ansiyano nga si Samuel, * kinsa nag-alagad uban sa iyang asawa sa Colombia. Sila malipayong nagpayunir sa ilang kanhing kongregasyon, pero gusto nilang magpalapad sa ilang ministeryo pinaagi sa pagboluntaryo sa kongregasyon nga mas dakog panginahanglan. Aron makab-ot ang maong tumong, kinahanglan silang mohimog mga sakripisyo. “Gipadapat namo ang Mateo 6:33 ug mihunong mi sa pagpamalit ug mga butang nga wala kinahanglana,” miingon si Samuel. “Pero ang pinakalisod himoon mao ang pagbiya sa among apartment. Mao gyod toy gusto namong disenyo, ug nabayran na to.” Sa ilang bag-ong asaynment, nadiskobrehan nila nga mabuhi ra  sila bisag gamay ra kaayo ang ilang kuwarta kon itandi sa una. “Nakita namo kon sa unsang paagi si Jehova naggiya namo ug nagtubag sa among mga pag-ampo,” miingon si Samuel. “Gibati namo ang pag-uyon ug gugma ni Jehova sa mga paagi nga wala gyod namo maeksperyensiyahi kaniadto.” Nagpalapad ba ka sa imong ministeryo? Kon mao, makaseguro ka nga mas masuod ka kang Jehova ug atimanon ka niya.—Sal. 18:25.

8. Unsay imong nakat-onan sa giingon ni Ivan ug Viktoria?

⁸ Magmalipayon ta sa pag-alagad. Matikdi ang giingon ni Ivan ug Viktoria, magtiayong payunir sa Kyrgyzstan. Gipasimple nila ang ilang kinabuhi aron makaboluntaryo sila sa bisan unsang asaynment, apil na sa mga proyekto sa pagpanukod. Si Ivan miingon: “Nagkugi mi pag-ayo sa matag asaynment. Bisag kapoy mi human sa tibuok adlaw, mobati mig kalinaw ug katagbawan kay nahibalo mi nga gigamit namo ang among kusog sa buluhaton sa Gingharian. Nalipay pod kaayo mi kay nakabaton mig daghang bag-ong higala ug nindot nga mga eksperyensiya.”—Mar. 10:29, 30.

9. Bisan pa sa iyang lisod nga kahimtang, unsay gihimo sa usa ka sister aron mapalapad ang iyang ministeryo, ug unsay resulta?

⁹ Magmalipayon ta sa pag-alagad kang Jehova bisag lisod ang atong kahimtang. Pananglitan, si Mirreh, tigulang nga biyuda nga taga-West Africa, miretiro sa iyang trabaho ingong doktor ug nagpayunir. Si Mirreh dunay grabeng artraytis, ug usa lang ka oras ang iyang makaya diha sa pagpamalaybalay. Pero kaya niyang makigbahin sa publikong pagsangyaw sa taastaas nga oras. Daghan siyag balikduaw ug Bible study; ang pipila kanila iyang ginakontak pinaagig telepono. Unsay nagpalihok kang Mirreh nga mohimog dugang pa para kang Jehova? “Ang akong kasingkasing napunog gugma para kang Jehova ug kang Kristo Jesus. Ug kanunay kong mag-ampo nga tabangan ko ni Jehova nga mahimo ang akong maarangan sa pag-alagad kaniya.”—Mat. 22:36, 37.

10. Sumala sa 1 Pedro 5:10, unsay ihatag ni Jehova niadtong naningkamot nga mohimog dugang pa para kaniya?

¹⁰ Makadawat tag dugang pagbansay gikan kang Jehova. Mao ni ang naeksperyensiyahan ni Kenny, payunir nga nag-alagad sa Mauritius. Sa dihang nakat-onan niya ang kamatuoran, miundang siyag eskuwela sa unibersidad, nagpabawtismo, ug misulod sa bug-os panahong pag-alagad. Siya miingon, “Naningkamot kong masundog si propetang Isaias, kinsa miingon: ‘Ania ko! Ipadala ko!’” (Isa. 6:8) Si Kenny nakaboluntaryo sa ubay-ubayng proyekto sa pagpanukod, ug nakatabang sab siya sa paghubad ug binase sa Bibliya nga mga publikasyon ngadto sa iyang pinulongan. “Nakadawat kog pagbansay nga nagtudlo nakog mga kahanas nga akong gikinahanglan sa pagtuman sa akong mga asaynment,” miingon si Kenny. Pero labaw pa niana ang iyang nakat-onan. Siya midugang, “Nahibaloan nako kon unsay akong mga limitasyon ug kon unsang mga hiyas ang kinahanglan nakong ugmaron aron mahimong mas maayong alagad ni Jehova.” (Basaha ang 1 Pedro 5:10.) Puwede ba nimong susihon ang imong kahimtang ug tan-awon kon makahimo ka bag mga kausaban aron makadawat kag dugang pagbansay gikan kang Jehova?

11. Unsang mga paningkamot ang gihimo sa mga sister sa South Korea aron makapakigbahin sa ministeryo, ug unsay resulta? (Tan-awa ang hulagway sa atubangan sa magasin.)

¹¹ Bisan ang dugay nang mga Saksi makabenepisyo sa pagbansay sa dihang sulayan nila ang usa ka bag-ong paagi sa pagsangyaw. Panahon sa COVID-19 pandemic, ang mga ansiyano sa usa ka kongregasyon sa South Korea misulat: “Kadtong naghunahuna kaniadto nga dili sila makasangyaw tungod sa ilang panglawas makahimo na karon pinaagig video call. Tulo ka sister nga kapin nag 80 anyos ang nakakat-on niining bag-o nga pamaagi, ug karon halos kada  adlaw na silang mosangyaw.” (Sal. 92:14, 15) Gusto ba nimong mapalapad ang imong ministeryo ug matilawan pag dugang ang pagkamaayo ni Jehova? Konsideraha ang pipila ka butang nga imong mahimo aron makab-ot ang maong tumong.

12. Unsay gisaad ni Jehova niadtong nagsalig kaniya?

¹² Pagkat-on nga mosalig kang Jehova. Siya nagsaad nga dagaya ta niyang panalanginan kon mosalig ta niya ug ihatag nato kaniya ang atong kinamaayohan. (Mal. 3:10) Naeksperyensiyahan ni Fabiola, sister nga taga-Colombia, nga gituman ni Jehova kini nga saad. Gusto niyang mag-regular payunir human siya mabawtismohi. Pero, kinahanglan siyang magtrabaho aron suportahan ang iyang bana ug tulo ka anak. Busa dihang puwede na siyang moretiro, kinasingkasing siyang nag-ampo kang Jehova alang sa tabang. Siya miingon: “Sagad, dugay maproseso ang pensiyon, pero ang akoa naaprobahan dayon usa ka bulan human ko mag-aplay. Morag milagro gyod to!” Duha ka bulan sa ulahi, nagpayunir siya. Karon, lapas na siyag 70 anyos ug kapig 20 ka tuig na siyang nagpayunir. Sulod nianang panahona, nakatabang siyag walo ka tawo nga mabawtismohan. Siya miingon: “Bisag usahay luya ko, gitabangan ko ni Jehova kada adlaw nga masunod ang akong eskedyul.”

13-14. Unsang mga ehemplo ang makatabang nato nga mosalig kang Jehova ug mohimog dugang pa para kaniya?

¹³ Pagkat-on gikan niadtong misalig kang Jehova. Ang Bibliya dunay daghang pananglitan niadtong naningkamot sa pag-alagad kang Jehova. Sa daghang kahimtang, ang maong mga  alagad kinahanglang mohimo sa unang tikang aron madawat ang espesyal nga mga panalangin gikan kang Jehova. Pananglitan, human lang nga mibiya si Abraham sa iyang balay—“bisag wala mahibalo kon asa paingon”—nga gipanalanginan siya ni Jehova. (Heb. 11:8) Human lang nga nakiglayog si Jacob sa anghel nga nakadawat siyag espesyal nga panalangin. (Gen. 32:24-30) Sa dihang ang nasod sa Israel hapit nang mosulod sa Yutang Saad, human lang nga ang mga saserdote mitunob sa kusog ug sulog nga Suba sa Jordan nga ang katawhan nakatabok.—Jos. 3:14-16.

¹⁴ Makabenepisyo sab ka sa ehemplo sa mga Saksi karon nga misalig kang Jehova ug mihimog dugang pa sa pag-alagad kaniya. Pananglitan, ang brader nga si Payton ug ang iyang asawa nga si Diana ganahang magbasa bahin sa mga igsoon nga nagpalapad sa ilang pag-alagad kang Jehova, sama niadtong gihisgotan sa seryeng “Sila Kinabubut-ong Nagtanyag sa Ilang Kaugalingon.” * Si Payton miingon: “Sa dihang magbasa mi sa ilang mga eksperyensiya, mora mig nagtan-awg tawo nga nagkaon ug lamiang pagkaon. Sa sige namong tan-aw, mas gusto na namong ‘matilawan ug [makita] nga si Jehova maayo.’” Ngadtongadto, si Payton ug Diana miboluntaryo sa lugar nga mas dakog panginahanglan. Nabasa na ba nimo ang maong serye? Ug natan-aw na ba nimo ang mga video nga Pagsangyaw sa Hilit nga Teritoryo—Australia ug Pagsangyaw sa Hilit nga Teritoryo—Ireland, nga makita sa jw.org? Ang maong mga materyal makatabang nimo nga makakitag mga paagi sa pagpalapad sa imong pag-alagad.

15. Sa unsang paagi ang hustong mga kauban makatabang nato?

¹⁵ Pagpilig hustong mga kauban. Mas ganahan tang motilaw ug bag-ong potahe kon makig-uban ta niadtong ganahang mokaon niana. Sa susama, kon makig-uban ta niadtong nag-una kang Jehova sa ilang kinabuhi, mas mapalihok ta sa pagpangitag mga paagi nga mapalapad ang atong pag-alagad sa Diyos. Mao nay naeksperyensiyahan sa magtiayong si Kent ug Veronica. “Ang among mga higala ug pamilya nagdasig namo nga sulayan ang bag-ong mga matang sa pag-alagad,” miingon si Kent. “Naamgohan namo nga pinaagi sa pagpakig-uban niadtong nag-una sa Gingharian, nakabaton mig kompiyansa nga mosulay ug bag-ong paagi.” Karon, si Kent ug Veronica mga espesyal payunir na sa Serbia.

16. Sumala sa ilustrasyon ni Jesus diha sa Lucas 12:16-21, nganong angay nga andam ta sa paghimog mga sakripisyo?

¹⁶ Paghimog mga sakripisyo para kang Jehova. Dili nato kinahanglang biyaan ang tanang butang nga atong gikalipayan aron mapahimut-an si Jehova. (Eccl. 5:19, 20) Apan, kon magduhaduha ta sa paghimog dugang pa sa pag-alagad sa Diyos aron lang makalikay sa mga sakripisyo, basin mahimo nato ang sayop sa tawo diha sa ilustrasyon ni Jesus kinsa naghago aron makabaton ug daghang butang pero wala magpakabana sa Diyos. (Basaha ang Lucas 12:16-21.) Ang brader nga si Christian, kinsa nagpuyo sa France, miingon, “Wala nako mahatag kang Jehova ug sa akong pamilya ang kinamaayohan sa akong panahon ug kusog.” Siya ug ang iyang asawa midesisyon nga magpayunir. Pero aron makab-ot ang maong tumong, kinahanglan silang mobiya sa ilang mga trabaho. Aron masuportahan ang ilang kaugalingon, nagsugod silag gamayng negosyo sa pagpanghinlo, ug nakat-onan nila nga magmakontento sa gamay nilang kita. Unsay resulta sa ilang sakripisyo? Si Christian miingon, “Mas nag-enjoy na mi sa among ministeryo karon ug nalipay ming makita ang among mga Bible study ug balikduaw nga nakakat-on bahin kang Jehova.”

17. Ngano tingaling magduhaduha ta nga mosulay ug bag-ong paagi sa pagsangyaw?

 ¹⁷ Sulayi ang bag-ong mga paagi sa pagsangyaw. (Buh. 17:16, 17; 20:20, 21) Si Shirley, payunir nga taga-United States, kinahanglang mohimog mga kausaban sa iyang ministeryo panahon sa COVID-19 pandemic. Sa sinugdan, nagduhaduha siya nga mosulay sa pagsangyaw pinaagig telepono. Pero human siya makadawat ug pagbansay panahon sa duaw sa tigdumala sa sirkito, regular na siyang nagsangyaw niining paagiha. Siya miingon: “Sa sinugdan, nahadlok ko. Pero karon, ganahan na kaayo ko ani. Mas daghan na mig maestorya karon kay niadtong namalaybalay pa mi!”

18. Unsay makatabang nato sa pag-atubang sa atong mga problema samtang naningkamot ta nga mapalapad ang atong ministeryo?

¹⁸ Paghimog plano ug buhata kana. Dihang makaatubang tag mga problema, mag-ampo ta alang sa tabang ug maghunahuna pag-ayo kon unsay maayong buhaton niana. (Prov. 3:21) Si Sonia, nga nag-alagad ingong regular payunir sa usa ka grupo sa Europe nga Romany ang pinulongan, miingon: “Ganahan kong isulat ang akong mga plano ug ako ning ibutang sa lugar nga pirme nakong makita. Sa akong lamesa, naa koy drowing sa nagkuros nga dalan. Dihang kinahanglan kong mohimog desisyon, akong tan-awon ang drowing ug hunahunaon kon asa nga direksiyon ko dad-on sa akong desisyon.” Naningkamot si Sonia nga magpabiling positibo bisan pa sa iyang mga problema. “Ang matag bag-ong kahimtang,” siya miingon, “puwedeng mahimong paril nga makababag nako o tulay nga makatabang nako—depende sa akong panglantaw niana.”

19. Unsay determinado natong buhaton?

¹⁹ Si Jehova nagpanalangin kanato sa daghang paagi. Ikapakita nato nga mapasalamaton kaayo ta sa maong mga panalangin pinaagi sa paghimo sa tanan natong maarangan sa pagdayeg kaniya. (Heb. 13:15) Mahimong mag-apil kana sa pagpangitag bag-ong mga paagi sa pagpalapad sa atong ministeryo, ug tungod niana, posibleng makadawat tag dugang mga panalangin. Kada adlaw, mangita tag mga paagi nga ‘matilawan ug [makita] nga si Jehova maayo.’ Kon buhaton nato kana, mahisama ta kang Jesus, kinsa miingon: “Ang akong pagkaon mao ang pagbuhat sa kabubut-on sa usa nga nagpadala kanako ug ang paghuman sa iyang buluhaton.”—Juan 4:34.