1-2. Tukuratize ebiri omuri Zaaburi ya 34:8, ni bata oku turi kubasa kumanya oburungi bwa Yehova?

TEKATEKA hagira owakuha ebyokurya otakabiryagaho n’omurundi na gumwe. Nobasa kubimanya wabyetegereza, okabyehumurizaho, okamanya ebirimu, ninga shi okabuza abari kubimanya. Konka oburyo burungi bw’okumanya yaba orabikunde ni okubirozaho.

² Nitubasa kumanya oburungi bwa Yehova twashoma Bibuli n’ebitabo byitu kandi tukahurikiza abandi bari kugamba emigisha eyi yabahire. Konka nitukizaho kumanya oburungi bwa Yehova ‘twaroza’ tukerebera oku ari murungi. (Shoma omuri Zaaburi ya 34:8.) Reba oburyo bumwe obu turi kubasa kukikoramu. Reka tugire ngu nitwenda kukorera Yehova omurimo g’obwire bwona, konka kugira ngu tugukore tushemerire korobya embera zitu. Nitubasa kuba burijo turi kushoma ekiraganiso ca Yesu eki ari kuturaganisa ku twata Obukama omu mwanya g’okubanza Yehova arije kutuha ebi turi kwetenga, konka oshange tutakereberaga ari kukitukorera. (Mat 6:33) Konka ahakuba turi kwesiga ekiraganiso ca Yesu, nitucendeza aha bi turi kugura, tuhindura omurimo, rero tuta omutima aha murimo g’okuburira. Ku turi kukikora tusyoya, nitwerebera ku Yehova ari kutufaho kandi ku ari kutuha ebi turi kwetenga. Nituba ‘twaroza’ aha burungi bwa Yehova.

3. Tukuratize ebiri omuri Zaaburi ya 16:1, 2, ni baha abari kutunga oburungi bwa Yehova?

³ Yehova ni ‘murungi ahari bona’ n’abatari kumumanya. (Zab 145:9; Mat 5:45) Konka abari kukunda Yehova kandi bakamuhereza n’amagara gabo gona ni bo abu ari kuha emigisha myingi. (Shoma omuri Zaaburi ya 16:1, 2.) Reba bimwe omu bintu birungi ebi Yehova ari kutukorera.

4. Ni bata oku Yehova ari kuha ebirungi abari kutandika kugira obunywani burungi na we?

 ⁴ Ku turi kuta omu nkora ebi turi kwega ahari Yehova, nitureba biri kuhindura amagara gitu. Nambwenu ku turi kwega ebiri kumukwataho kandi tukamukunda natukwasa kusingura emitekatecere n’ebikorwa ebi atari kukunda. (Kol 1:21) Kandi ku twayehire Yehova tukabatizibwa tukakizaho kutunga oburungi bweye turi kugira omuntuwomunda murungi kandi tukakizaho kugira obunywani burungi na we.—1 Pet 3:21.

5. Ni bata oku wayerebire oburungi bwa Yehova omu murimo g’okuburira?

⁵ Nitugumizamu kureba oburungi bwa Yehova turi kwekwatanisa omu murimo g’okuburira. Mbehi nokunda kugira enshoni? Abingi omu bahereza ba Yehova ni ko bari. Otakabire Omuhamya wa Yehova, nobasa kuba wabire ori kwebuza oku orije kuza omu ka y’omuntu owu otari kumanya okamugambira obutumwa bw’omuri Bibuli. Konka hati, ebyo ni byo ebi ori kukora burijo. Ekiri kukira ahari eco, Yehova akakukwasa kukora omurimo gweye oshemerirwe! Yehova akakuha obuyambi obutari bumwe. Akakukwasa kuguma oturize waba ori kuburira okabugana abari kukuhiganisa. Akakukwasa kwijuka ecahandikirwe kirungi eki ori kubasa kushomera nyineka. Kandi nagumizamu kukuha amani g’okugumizamu kuburira omuri teritori erimu abantu abatari kuhurikiza.—Yer 20:7-9.

6. Ni bata oku ebi Yehova ari kutwegesa biri kutwereka oburungi bweye?

⁶ Nambwenu Yehova akatwereka oburungi bweye ari kutwegesa kukora omurimo g’okuburira. (Yoh 6:45) Twaba turi omu nterane za rwagati y’esande, nituhurira obuhabuzi obu turi kubasa kukoresa omu murimo g’okuburira. Omu kubanza, nitubasa kuhurira tutinire kukoresa obwo buhabuzi busya, konka ku turi kubukoresa nitushanga bwine omugasho omuri teritori yitu. Nambwenu omu nterane n’omu biterane nituhigwa kukoresa oburyo bw’okuburira obu tutakagezagaho kukoresa. Eco na co nikibasa kutuma twahurira tutinire, konka ku turi kukikora Yehova natuha emigisha. Reka tushwijume ebintu birungi ebi Yehova arije kutuha twagezaho kukoresa oburyo busya oku turi kubasa. Bwanyima, nitushwijuma oku turi kubasa kongera aha murimo gwitu.

7. N’eha migisha eyi orije kutunga ku oriyongera aha murimo gwawe?

⁷ Nitukizaho kugira obunywani burungi na Yehova. Reba ecokureberaho c’omuzehe w’ekibina ori kwetwa Samueli, * ori kukorera omurimo gweye we n’omukazi weye omuri Kolombiya. Ogo mushija n’omukazi weye bakashemerererwa obupayoniya omu kibina c’owabo, konka bakaba bari kwenda kongera aha murimo bari kukwasa ekibina ecabire kiri kwetenga buyambi. Kugira ngu bahike ahari eyo ntego, bakaba bashemerire kugira ebi bayeferereza. Samueli akagamba ati: “Tukata omu bikorwa ebiri kugambwa omuri Matayo 6:23 turi kureka kugura ebi tutari kwetenga. Konka ecakirizeho kutugumira ni okusigaho enju yitu. Ekaba eyombekire omu buryo obu turi kukunda kandi tutagineho ibanja.” Ku bafurukire omu kindi kibina bakaba batari kwetenga esente nk’ezi babire bine mbere yaho. Samueli akagamba ati: “Tukerebera oku Yehova ari kutwebembera kandi ari kugarukamu eshara zitu. Hati nituhurira Yehova ari kutusima kandi ari kutukunda kukira oku twabire nitwehurira kare.” Mbehi ni we noyenda kongera aha murimo gwawe? Yaba ari ko kiri,  oyesige otari kubanganisa ku orije kugira obunywani burungi na Yehova kandi ku arije kukufaho —Zab 18:25.

8. Ni enki eki ori kwegera aha bi Ivan na Viktoria bagambire?

⁸ Nitutungira okushemererwa omu murimo g’okuburira. Reba eki Ivan n’omukazi weye Viktoria abari kukorera obupayoniya omuri Kirigizisitani bagambire. Bakaguma borobize embera zabo kugira ngu babase kuyamba omu murimo gona ogu bahembwa harimu n’okuyamba omu by’obwombeki. Ivan akagamba ati: “Omutima gwitu gona tukaba nituguta aha murimo ogu twahebwa. N’obu obumwe twabire nitutaha turuhire, tukaba twine obusinge kandi tumazirwe ahakuba turi kumanya ku tukoresize amani gitu omu kushagika omurimo g’Obukama. Nambwenu tukatunga okushemererwa ahabw’okugira abanywani abasya n’okugira byingi ebi twahikireho.”—Mak 10:29, 30.

9. Ni enki eki omunyanyazi oyine ebizibu yakozire ngu ayongere aha murimo gweye, kandi shi ni enki ecarugiremu?

⁹ Nitutunga okushemererwa omu murimo gwa Yehova n’obu twakuba turi kubugana ebizibu. Ecokureberaho: Mirreh, omufakazi okuzire w’omuri Afurika y’oburengerwizoba akahumura aha murimo g’obudokita, rero yaba omupayoniya. Mirreh ayine ekizibu c’okushasha yaba ari kutambura kandi eco nikituma yaburira aha nju n’enju eshaha emwe kusha. Konka nagezaho kuguma ari kuburira omu misho g’abantu bona. Ayine abu ari kugaruka kutayayira bingi n’abegi ba Bibuli bingi kandi abamwe nabegesa akoresize esimu. Ni enki ecakwasize Mirreh kukorera Yehova byingi? Akagamba ati: “Ninkora byingi aha bwa rukundo eyi ndi kukunda Yehova na Kristo Yesu. Kandi burijo ninshaba Yevova kugira ngu ankwase kukora cona eki ndi kubasa omu murimo gweye.”—Mat 22:36, 37.

10. Tukuratize ebiri omuri Yohaana 6:45, ni bata oku Yehova ari kwegesa abari kutaho amani ngu bamukorere byingi?

¹⁰ Yehova natwegesa ebindi bintu by’omugasho. Kenny, omupayoniya ori kukorera aha kirwa ca Morishiyasi akabyerebera. Ku yayegire amazima, akareka yunivasiti, yabatizibwa, rero yatandika omurimo g’obwire bwona. Akagamba ati: “Ningezaho kubaho ndikubuganisa n’ebigambo by’omuhanuzi Isaaya owagambire ati: ‘Ndi aha; ba ni inye watuma.’” (Isa 6:8) Kenny akakora omu by’obwombeki kandi akekwatanisa omu kuhindura ebitabo ebyegamire ahari Bibuli omu rurimi rweye rwa buzarwa. Akagamba ati: “Nkega ebintu by’omugasho ebyankwasize kuhikiriza omurimo gwange.” Konka hariho ebindi ebi yayegire. Akongeraho ati: “Nkamanya ahu obushoborozi bwange buri kugarukira n’emitwarize eyi ndi kwetenga kugira ngu nkizeho kuba omuhereza murungi wa Yehova.” (Shoma omuri Yohaana 6:45.) Mbehi n’iwe tori kubasa kushwijuma embera zawe, okareba yaba ori kubasa kugira ebi wahindura ngu Yehova akwegese?

11. Ni enki eki abanyanyazi bashatu b’omuri Koreya y’amashuma bakozire kugira ngu bekwatanise omu murimo g’okuburira, kandi shi ni enki ecarugiremu? (Reba ekishushani c’aha kishembeso.)

¹¹ Abahereza ba Yehova abamazire emyaka myingi na bo nibagasirwa n’ebi Yehova ari kutwegesa ku bari kugezaho kukoresa oburyo busya omu murimo g’okuburira. Omu bwire bw’endwara ya Covid-19 abazehe b’omu kibina c’omuri Koreya y’amashuma bakahandika bati: “Abamwe ababire bari kutekateka ku batari kubasa kwekwatanisa omu murimo g’okuburira ahabw’oburwire hati nabagukora bakoresize amasimu. Abanyanyazi bashatu abarengize emyaka 80  bakega oku bari kubasa kuburira bakoresize kompiyuta kandi hati nibekwatanisa omu murimo g’okubuirira buri izoba.” (Zab 92:14, 15) Mbehi nohurira ori kwenda kongera aha murimo gwawe, rero okakizaho kuroza aha burungi bwa Yehova? Reba bimwe omu bi ori kubasa kukora bikakukwasa kuhika ahari eyo ntego.

12. Ni enki eki Yehova ari kuraganisa abari kumwesiga?

¹² Yega kwesiga Yehova. Naturaganisa ku arije kutuha emigisha ku turamwesige kandi tukamuha ebirungi kukira ebindi. (Mal 3:10) Omunyanyazi w’omuri Kolombiya ori kwetwa Fabiola akerebera oku Yehova yamuhire emigisha. Hahwireho obwire buce abatizibwe, akaba ari kwenda kuba omupayoniya w’obwire bwona. Konka akaba nakwasa omushija weye omu kubisaho eka yabo erimu abana bashatu. Ku yabire ari kwenda kuhumura aha mirimo, akashaba munonga Yehova obuyambi. Akagamba ati: “Obushangirwe nihahwa obwire buringwa kugira ngu bakuhe esente z’akasimwe, konka nyowe bakazimpa hahwire okwezi kumwe nzishabire. Kikaba kiri nk’ec’okutangaza!” Bwanyima y’amezi abiri, akaba omupayoniya. Hati ayine emyaka eri kurenga 70 kandi yamara emyaka eri kurenga 20 ari omupayoniya. Omuri obwo bwire akakwasa abantu munana bahika aha kubatizibwa. Akagamba ati: “N’obu ndi kuhurira ntine amani, Yehova nagumizamu kunkwasa buri izoba ngu ngumizemu omurimo g’obupayoniya.”

13-14. Ni biha byokureberaho ebiri kutukwasa kwesiga Yehova n’okongera aha murimo gwitu?

 ¹³ Yegera aha byokureberaho by’abagumizemu kwesiga Yehova. Omuri Bibuli harimu ebyokureberaho byingi eby’abantu abakozire n’amani omurimo gwa Yehova. Ebyingi omuri byo ni eby’abahereza ba Yehova abu yahire emigisha, konka babandize kugira eki bakora. Ecokureberaho: Yehova akaha emigisha Aburahamu ahabw’okusigaho eka yeye ‘atari kumanya eyi ari kuza.’ (Heb 11:8) Yakobo ku yamazire kucirana na marayika ni bwo yatungire omugisha. (Kut 32:24-30) Abisirayeli ku babire bari hihi kutaha omu ihanga eri babire baraganisibwe, bakambuka omugera gwa Yorudani obu abatambi babire bagwemeriremu ngu amizi gemerere.—Yosh 3:14-16.

¹⁴ N’iwe nobasa kugasirwa n’ebyokureberaho by’Abahamya ba Yehova b’omuri obu bwire abamwesigire kandi bakamukorera byingi. Ecokureberaho: Mwenetata Payton n’omukazi weye Diana, bakaba nibakunda kushoma enkuru za benetata na banyanyazi abayongire aha murimo gwabo nk’eziri omu kicweka ekiri kugira ngu: “Bakehayo bekundire.” * Payton akagamba ati: “Ku turi kushoma ebyabireho, nituba turi nk’abari kureba omuntu ori kurya ebyokurya binuzire. Oku twabire nitukizaho kuzishoma ni ko twabire nitukizaho kugira ecetengo c’‘okuroza tukareba oku Yehova ari murungi.’” Bwanyima, Payton na Diana bakahendera bagire kukorera ahari kwetengwa obuyambi. Mbehi n’iwe okashomaho enkuru nk’ezo? Mbehi okareba vidiyo eri kugira ngu: “Okuburira omu kacweka ka hare omuri Ositareliya n’eri kugira ngu: “Okuburira omu kacweka ka hare omuri Irelandi” eziri aha rubuga rwa jw.org? Ezo vidiyo nizibasa kukukwasa kumanya oburyo obu ori kubasa kongeramu omurimo gwawe.

15. Ni bata oku abanywani barungi bari kutukwasa?

¹⁵ Torana abanywani barungi. Nikitworobera kurya ebyokurya ebi tutakaryagaho twaba turi kumara obwire n’abari kubikunda. Ni co kimwe, twaba turi kumara obwire n’abantu abari kukora byingi omu murimo gwa Yehova, n’itwe niturondesa oburyo bw’okongera aha murimo gwitu. Ni byo ebi Kent n’omukazi weye Veronica bayerebire. Kent akagamba ati: “Banywani bitu n’ab’omu ka yitu bakatuhiga kongera aha murimo gwitu. Tukerebera ku kwekwatanisa n’abari kuta Obukama omu mwanya g’okubanza catukwasize kongera aha murimo gwitu.” Hati Kent na Veronica ni abapayoniya b’omutano omuri Serebiya.

16. Nk’oku biri kugambwa omu cokureberaho ca Yesu ekiri omuri Luka 12:16-21, ahabw’enki tushemerire kugira ebi twayeferereza?

¹⁶ Guma oyeferereze kugira ngu okorere Yehova. Kuhimbisa Yehova tikiri kumanyisa kweferereza ebintu byona ebi turi kukunda. (Mub 5:19, 20) Konka twayanga kukorera Yehova byingi ahakuba tutari kwenda kweferereza, nituba turi nk’omushija w’omu cokureberaho ca Yesu owabire ari omutungi, konka akehuza Ruhanga. (Shoma omuri Luka 12:16-21.) Mwenetata ori kwetwa Christian otwire omuri Bufaransa akagamba ati: “Nkaba ntari kuha Yehova n’abeka yange obwire n’amani.” We n’omukazi weye bakasharamu kuba abapayoniya. Konka kugira ngu bahike ahari eyo ntego, bakaba bashemerire kubanza bayemereza emirimo yabo. Bakatandika omurimo g’okuyonja kandi bayega kumarwa na bice. Mbehi bakatunga ebirungi? Christian akagamba ati: ‘Hati tukakizaho kushemerererwa omurimo g’okuburira kandi nitushemererwa  twareba abegi ba Bibuli n’abu turi kugaruka kutayayira abari kwega amazima agari kukwata ahari Yehova.”

17. Ni enki ecakwasize omunyanyazi omwe kukoresa oburyo busya bw’okuburira?

¹⁷ Ba oyetegwire kukoresa oburyo busya bw’okuburira. (Byak 17:16, 17; 20:20, 21) Shirley, omupayonia w’omuri Amerika akakoresa oburyo busya bw’okuburira omu bwire bw’endwara ya Covid-19. Akabanza yayehuza kuburira akoresize esimu. Konka omu bwire obu omureberezi ori kutayayira ebibina yabire abatayayire bakabimwegesa, kandi hati burijo nayekwatanisa omu murimo g’okuburira akoresize esimu. Akagamba ati: “Nkabanza natina obwo buryo busya bw’okuburiramu, konka hati nimbukunda munonga. Hati nituburira abantu bingi kukira oku twabire nitubaburira aha nju n’enju.”

18. Ni enki ekiri kubasa kutukwasa haba hine ebizibu ebiri kubasa kutuzibira kongera aha murimo g’okuburira?

¹⁸ Yetereho entego kandi otemu amani ngu ozihikeho. Twaba twine ebizibu, nitushaba Yehova kugira ngu atukwase kutekateka eki turi kubasa kukora. (Enf 3:21) Sonia, omupayoniya w’obwire bwona omu mutwe oguri kukoresa orurimi rw’Oruromani omuri Buraya akagira ati: “Ninkira kuhandika aha kapapura ebi ndi kwenda kukora, rero mbita ahu ndi kuguma kureba. Aha meza yange nkashushanyaho emihanda ibiri eri kutora ahatari kushushana. Naza kukora ensharamu, nindeba ahari eyo mihanda, ntekateka ahu eyo nsharamu erije kuntoza.” Sonia nagezaho kugira emitekatecere mirungi aha bizibu byeye. Akagamba ati: Buri kizibu eki nabugana nikibasa kuba kiri nk’ekisika ekiri kubasa kukinga omuhanda ninga shi ekiraro ekiri kunkwasa kwambuka.”

19. Ni enki eki tushemerire kumaririra kukora?

¹⁹ Yehova natuha emigisha myingi. Nitubasa kwereka ku nitusima ahabw’eyo migisha turi kumuhimbisa. (Heb 13:15) Omuri ebyo harimu kukoresa oburyo busya turi kongera aha murimo gwitu kandi eco nikituma yatwongera emigisha. Buri izoba nimureke turonde oburyo bw’‘okuroza turebe oku Yehova ari murungi’! Bwanyima nitwija kuba nka Yesu owagambire ati: ‘Ebyokurya byange ni ko kukora eki Owantumire akunda n’okuhikiriza omurimo gweye.’—Yoh 4:34.