1-2. Mowiwanana na Masalmo 34:8, ninawodhe dhavi osunza mwaha wa opama wa Yehova?

KAVUBUWELE buvahiwe elobo ehinattigi weyo oja. Weyo onowodha oziwa eloboya sabwa yowona, onukwa, ottidda, obe onvuza muttu onziwa deretu. Ekalaga dhawene, elobo modha enahukamihedhe oziwa deretu eloboya, jaweyo wamwinya weha.

² Iyo ninowodha osunza elobo sabwa ya opama wa Yehova nigamwengesaga Bibilia, manivuru ehu vina wavuruwana attu ena alogaga mwaha wa mareliho a Yehova anttambirhani. Iyo ninowodha ononelamo deretu opama wa Yehova mudhidhi ‘oneha’ iyo opamaya. (Kengesa Masalmo 34:8.) Ndowe noone yotagiha enanikamihedhe okosa ejuwene. Txino iyo ninofuna olaba ninga anamalaleya a mudhidhi wotene, mbwenye wi niwodhe ofwanya yogana ejo, ninofwanyelela ovevutxa egumi yehu. Ninoziwa yolibela ya Yezu ya wi, oneka vamburoni voroma Omwene wa Mulugu, Yehova onele onvaha dhilobo dhinimujombela, mbwenye iyo kaninattigi woona yolibela eji ya Yehova esoriheyaga mwigumini mwehu. (Mt. 6:33) Wi noone wakwanihedheya wa mazu aba a Yezu mwigumini mwehu, ninofwanyela ovilibihedha ohigula dhilobo dhinji, ovugula mabasa ehu ovisapelana wi nejendhedhe mabasa olaleya. Venevo vankosa iyo ejene, Yehova onele wakwaniha dhojombeliwa dhehu. Dhahene ‘paneha iyo’ opama wa Yehova.

3. Ninga munlogela Masalmo 16:1, 2, bani onakela opama wa Yehova?

³ Yehova “onowafewela murima attu otene” masiki na abale ahinimuziwa. (Masal. 145:9; Mt. 5:45) Mbwenye iyene onarelihetxa makamaka abale animukwela vina animulabela na guru dhawa dhotene. (Kengesa Masalmo 16:1, 2.) Ninele osekeserha dhilobodha eso dhapama dhinnikosela Yehova.

4. Yehova onatonyihedha dhavi opama abale anroma onfiyedha?

 ⁴ Mudhidhi onttiddihedha iyo mabasa esile dhinnisunziha Yehova, dhilobo mwigumini mwehu dhinoneddela deretu. Motagiha, sabwa yosunza mwaha wa Yehova vina omukwela, iyene ononikamihedha wi nihubuwelege dhilobo dhabure dhigadhile onimwalaniha na iyene. (Kol. 1:21) Mudhidhi oviperhekilihu vina banibatiziwa, Mulugu ohinivaha dhilobo dhaderetu ninga motagiha, mubuwelo wotxena vina mandano ofiyedheya na iyene.—1 Ped. 3:21.

5. Weyo onawodhe dhavi weha opama wa Yehova mmabasani olaleya?

⁵ Iyo ninodhowavi nehaga opama wa Yehova nigadhowanavi mabasa ehu olaleya. Weyo wa muttu wa manyazo? Ena ali munikuruni na Yehova attu amanyazo. Ohinatti okala munamoona wa Yehova, kuwajedhela wi ogahidhowa numba na numba wi wasunzihe attu aanaziwiwe miselu dha mBibiliani. Mbwenye ddabuno weyo onokosa mabasa aba mudhidhi wotene. Na nikamihedho na Yehova weyo onofwanya wagalala mmabasani aba! Weyo onononelamo wi Yehova onowukamihedha na mikalalo dhottiyana-ttiyana. Iyene onele wulibiha wi okale omaalene ogalogeliwa mazu ovadda mmabasani olaleya. Onowukamihedha ofwanya malebo analabihedhiwe ogaafwanya attu anrumela ovuruwana miseludha. Iyene vina onowuvaha guru yodhowavi bugalaleya masiki ogahafwanya attu ahinfuna ovuruwana.—Jer. 20:7-9.

6. Maswagiho annivaha Yehova anoniha dhavi opama waye?

⁶ Yehova ononitonyihedha opama waye modhela oniswagiha mmabasani olaleya. (Jo. 6:45) Mmatugumanoni ehu a vari va sumana, iyo ninowona dhotagiha dhohirutxa vina ninokokomeziwa olabihedha mmabasani olaleya. Voroma vene, ofwara malago aba enokala elobo yorutxa mbwenye nigeha ninodha okaana dhopurelamo dhapama mmabasani olaleya. Ottiya ejo, matugumano a vari va sumana vina a ttattamwa anonilibiha oroma olaleya na mikalelo dhottiyana-ttiyana ahinattigi iyo oroma okosa. Masaka meena, eji entapulela ottiya mburo wehu wottugareya, nigakosa dhahene ninele orurihiwa na Yehova. Ovano ninele osekeserha dhilobo dhing’onovi dhapama dhinanivahe Yehova nigamukuluvela vina nigasunza marhe maswa ovilibihedha mmabasani olaleya, nihitanalaga makattamiho anfwanyihu. Ninele woona vina enakosihu wi nenjedhedhe mabasa ehu olaleya.

7. Maruriho gani anakele weyo ogagana wenjedhedha mabasa awo olaleya?

⁷ Nimufiyedhe Yehova. Koona yotagiha ya munddimuwa wa mulogo onkuweliwa Samuel, * onlaba vamodha na mwadhiye elabo ya Kolombia. Atelani aba alaba ninga a pionero a mudhidhi wotene mmulogoni mwawa, mbwenye ahigana wejendhedha mabasa awa modhela omwalela mulogo wana ojonbeliwa wa anamalaleya. Wila akwanihe yogana eji, ahittiya okosa dhilobo dhaazivela. Samuel ohiloga: “Iyo nihivirihamo mazu anfwanyeya va Mateu 6:33 vina nahittiya ogula dhilobo bure-bure.” Iyene owejendhedha: “Mbwenye enipiletxe ottiya numba yehu. Vowi yasasanyiwe ninga mwafunelihu vina kanana mangawu.” Atelani aba vamwalelani mulogo muswa, kanonga kobiri yinjene ninga mwawale. Samuel ohiloga: “Iyo ninomoona Yehova akulaga malobelo ehu vina eddihaga ttarho dhehu.” Owenjedhedha: “Ninowona okwela wa  Yehova vina nikamihedho naye na mukalelo ohinonaga iyo.” Enowodheya wenjedhedha mabasa awo olaleya na mikalelo dhina? Akala enowodheya, weyo onele onfiyedha Yehova nanda iyene onele wakwaniha dhojombeliwa dhawo.—Masal. 18:25.

8. Onsunzavo nni na dhologa dha Ivan na Viktoria?

⁸ Ninele wagalala na mabasa ankosihu. Koona yotagiha ya Ivan na mwadhiye Viktoria, atelani aba anlaba ninga apionero elabo ya Quirguistão. Awene ahivevutxa egumi yawa, dhawene anowodha ovivelela mmabasani ottiyana-ttiyana otaganyiya na mabasa a omaga. Ivan ohiloga: “Iyo ninosunza venjene mmabasani anttiddehu. Masiki nigakala olemene omamalelo wa siku, ninokaana murenddele vina wagalala sabwa yoziwa wi ninnongela guru dhehu mmabasani a Omwene. Ninofwanya vina wagalala sabwa yokaana amaro aderetu vina nigobuwelaga dhilobo dhapama dhikosilihu vamodha.”—Mk. 10:29, 30.

9. Txini enkosa murogora Mirreh wi adhowenavi mabasa aye a olaleya masiki agumanagana makattamiho, nanda onkaana dhopurelamo gani?

⁹ Ninofwanya wagalala mmabasani a Yehova masiki nigumanagana makattamiho orutxa. Motagiha, Mirreh murogora wamamukwela wowunuwelavo onkala Omaddowelo wa nzuwa wa elabo ya Afrika, aalaba ninga dotora, mwakwanihedhiye vyaka dhottiya mabasaya bagattanbira ogilatene wahigana oroma mabasa opionera. Mirreh okana makattamiho a egumi animurutxiha olaleya numba na numba. Mbwenye enwodhiye olaleya mudhidhi mwinjene vattaddo. Iyene okaana marevizita vina masunzo menjene enaya mwa abuwene onalaleya na muttitto. Txini enimuttukulela Mirreh omulabela venjene Yehova? Mirreh ohiloga: “Miyo ddinomukwela Yehova na Yezu. Ddinomulobelelaga Yehova wi addikamihedhe omulabela venjene mpaka apale vanwodhelimi.”—Mt. 22:36, 37.

10. Ninga munoniha nlebo na 1 Pedro 5:10, txini enkosa abale antamela oswagihiwa na Yehova?

¹⁰ Ninowakela maswagiho meena anda mwa Yehova. Kenny, mbali wa pionero onlaba elabo ya Maurícias, ohona wi eji ebaribari. Vasunziliye ebaribari wahittiya masunzo manddimuwa akosiye babatiziwa vina baroma mabasa a mudhidhi wotene. Iyene ohiloga dhahi: “Ddihitagiha okalawo mowiwana na mazu a namavuhulela Izaiya, anloga: ‘Ddili veneva! Ddirumení!’” (Iza. 6:8) Kenny wahilaba venjene mmabasani a omaga vina otapulela mapublikasao na elogelo yaye. Kenny ohiloga: “Ddihakela maswagiho maswa afunemi, abuwene agaddikamihedhile wakwaniha mabasa attomeliwemi.” Mbwenye ottiya osunza okosa mabasa abele ohisunzavo elobo yina. Iyene owenjedhedha: “Ddihisunza vangomela guru dhaga vina mikalelo dhapama dhafwanyelimi okaana wila ddikale mwimeleli wapama vamentoni va Yehova.” (Kengesa 1 Pedro 5:10.) Sabwaya jani kunpepesa dha mwigumini mwawo wi woone akala enowodheya wakela maswagiho meena anda wa Yehova?

11. Guru gani dhikosile arogora aba o Coreia do Sul wi avilibihedhe mmabasani olaleya, vina na yopurelamo gani? (Koona foto ya kapa.)

¹¹ Masiki abale ali Anamoona mwa mudhidhi mwinjene, anofwanyelela weha mikalelo dhiswa dholaba. Mwari mwa ezini eji ya COVID-19, munddimuwa wa mulogo onkala o Coreia do Sul ohileba: “Abale ahawodha odhowa omabasani a olaleya sabwa ya makattamiho a eredda, ovanene anowodha olaleya alabihedhaga muttitto. Arogora araru ana vyaka 80 ahisunza olabihedha vidiyu konferensiya vina anolaba mmabasani olaleya malabo menji.” (Masal. 92:14, 15) Ogahiziveliwa winjiviha mabasa awo olaleya wi wehe opama wa  Yehova? Ndowe none ttarho dhing’onovi dhinahukamihedhe wakwanihedha yogana yawo.

12. Txini yapikireli Yehova abale animukuluvela?

¹² Kasunza omukuluvela Yehova. Iyene ohilibela oniruriha nigamukuluvela vina nigamulabela mpaka apale vanwodhelihu. (Mal. 3:10) Murogora onkuweliwa Fabiola onkala o Colômbia, ohona wakwanihedheya wa yopikirhela ya Yehova mwigumini mwaye. Mubatizeliwiye wahiroma olaba ninga pionera wa mudhidhi wotene. Mbwenye iyene, wanlaba venjene wi akamihedhe attu a vamuralani vaye, mamunaye na anaye araru. Mudhidhi wakwanihiliye vyaka yottiya mabasa wi attambirege ogilatene, wahimuloba Yehova wi amukamihedhe. Iyene ohiloga: “Wi muttu arumeliwe enogonela vaddiddi, mbwenye mwa mpaddi waga ettukulile mweri mmodha bahi. Eji yali ninga matikiniho!” Muvirile myeri minli oroma olaba ninga pionera. Fabiola ovano ona vyaka 70 ohilaba ninga pionera mwari mwa vyaka 20 mwari mwa mudhidhi obu, owodha wakamihedha attu owakwana 8 ofiyedha obatiziwa. Ovano iyene onodhowavi alabaga ninga pionera. Iyene owejendhedha: “Mudhidhi mwina kaddinkaana guru, mbwenye Yehova onoddikamihedha masiku otene wi ddakwanihe matadelo aga.”

13-14. Dhotagiha gani dhinanikamihedhe omuroromela Yehova?

¹³ Kasunza na dhotagiha dha abale animukuluvela Yehova. Mbibiliani muhikala dhotagiha dha attu enjene avileveli omulabela Yehova venjene. Dila dhinjene, alabeli aba a Yehova  anfwanyela vamaromo ottukula ttaro ahinatti wakela maruriho a Yehova. Motagiha, Yehova wahimururiha Abramu—mumaleliye ottiya elabo yaye—‘attukula dila ahiziwaga onfiyani.’ (Aheb. 11:8) Jakobi wakelile mareliho mmaleliye owana na anju. (Wita 32:24-30) Nlogo na Izrayel, nali vakuvi na ovolowa Elabo Yopikireliwa, mbwenye eji ewodhehile mmaleli anamakutta onyigala manje a Mwinje Jordau venevo pawodhile nlogo wabuwa.—Jos. 3:14-16.

¹⁴ Enowodheya opurelamo dhotagiha dha abali a masaka abono, animukuluvela Yehova wi aakamihedhe. Motagiha, mbali onkuweliwa Payton na mwadhiye Diana, ahipurelamo sabwa ya wengesa mwaha wa abali na arogora aninjiviha mabasa awa a omulabela Yehova dhahene ninga abali alogiwe mu seriye “Eles se Ofereceram de Bom Grado.” * Payton ohiloga: “Nigengesaga dhotagiha dhawa, enkala ninga ninimoona muttu onja dhoja dhoziva. Venevo vandowa iyo nonagavi dhotagiha esi, ninokaana efunelo ‘yopima wi noone opama wa Yehova.’” Ovanenevi, Payton na Diana amwalela murudda onjobeliwa anamalaleya. Weyo owengesa seriye esi? Vina ohona mavidiyu ana mutoma Pregação em Teritório Isolado:—Áustralia vina Pregação em Teritório Isolado:—Irlanda dhili mu jw.org? Mavidiyu aba anele wukamihedha woona mikalelo dha wenjedhedha mabasa awo a olaleya.

15. Mandano apama annikamihedha dhavi?

¹⁵ Kasakula mandano apama. Nigakala nakwihu jovevuwa weha yoja ehinattigihu oja. Na mukalelo wakene, iyo nigandana na abale ekile mabasa a Yehova vamburoni voroma, kinanirutxe vina ozuzumela mabasa a Mulugu. Kent na mwadhiye Veronica ahona wi mazu aba bebaribari. Kent ohiloga: “Akwehu na amudhihu anilibiha wi nirome weha mukalelo mwina wolaba mabasa a Yehova.” Owenjedhedha: “Sabwa yowandana na abale aneka vamburoni voroma Omwene, nahikuluvela weha-wene mabasa maswa.” Kent na Veronica ovano, anlaba ninga apionero avawoka elabo ya Sérvia.

16. Ninga munoniha musibo wa Yezu onfwanyeya va Luka 12:16-21, ninfwanyelela nni ovilibihedha omulabela Yehova?

¹⁶ Kavilibihedhe omulabela Yehova. Kaninfwanyela ottiya dhilobo dhotene dhinnagalaliha wi nimuttabihe Yehova. (Koh. 5:19, 20) Iyo nigasakula ohimulabela Yehova sabwa yohifuna ottiya dhilobo dhinizivela ninele okala ninga muzombwe oddule ologiwe vamusiboni wa Yezu wasakulile dhorela akoddaga omulabela Mulugu. (Kengesa Luka 12:16-21.) Mbali onkuweliwa Christian, onkala o França, ohiloga: “Miyo kaddalabihedha mofwanyelela mudhidhi waga kaddamuzuzumelatxa venjene Yehova na amudhaga.” Iyene na mwadhiye ahigana okala apionero. Mbwenye wila akwanihedhe mabasaya awene attiya mabasa alabani. Wi awodhege ovisapela alaba mabasa a okuputta, dhahene awene ahisunza wagalala na dhinani. Guru ekosilani edhilena yopurelamo gani? Christian ohiloga, “Iyo ninowagalala venjene na marevizita ana iyo vina attu anasunziyehu.”

17. Txini enanikamihedhe weha mabasa maswa olaleya?

¹⁷ Kakala womala-nawale wi wehe mukalelo muswa wolaleya. (Mer. 17:16, 17; 20:20, 21) Shirley, pionera onkala o Estados Unidos, sabwa ya ezini eji ya COVID-19 iyene osaddula mukalelo waye wolaleya. Vamaromo, wanrutxiwa olaleya na muttitto. Vasogorova, wahakela maswagiho mudhidhi wadhile nameddelela mulogo, mwa dhawene iyene ohiroma olabihedha maswagiho akeliliye mmalaleyoni.  Iyene ohiloga: “Vamaromo, ddanrutxiwa, mbwenye ovano ddinoziveliwa venjene mabasaya. Iyo ovanene ninowalaleya attu enjene opitta mudhidhi walaleyihu numba na numba!”

18. Txini enanikamihedhe odhowanavi mabasa ehu olaleya masiki nigumanagana makattamiho orutxa?

¹⁸ Okaane matadelo vina ovilibihedhe ofwara. Nigafwanyiwa dhorutxa, ninofwanyelela olobela wi niwodhe okosa mpaka vanwodhelihu wi nilabihedhe ttotto yehu ya wakwaniha matadelo akosilehu. (Gano 3:21) Sonia, onlaba ninga pionera wa mudhidhi wotene nikuru na elogelo ya Cigana o Europa, ohiloga: “Miyo ddinoziveliwa oleba porogarama yaga ya mabasa olaleya vapapelini vina badditomeya mburo onwodhimi wona mohirutxa. Vameza vaga ddihilebavo dila bili, yabure na yaderetu. Ddigakaana yosakula, ddihinatti ogana yokosa ddinoroma woona dila esile bili dhilebilemi wi ddone onaddittukulele yosakula yaga.” Sonia onotamela okaana monelo wapama mwaha wa makattamiho angumaniyena. Iyene ohiloga: “Yorutxa modha-modha enfwanyiwemi, enokala ninga ngome obe muratto onddikamihedha—eji eniwanana na mukalelo onona miyo makattamihoya.”

19. Ninonihe dhavi wi ninomutamalela Yehova sabwa ya dhilobo dhapama dhinnivahiye?

¹⁹ Yehova ononiruriha na mikalelo dhottiyana-ttiyana. Iyo ninotonyihedha wi ninotamalela maruriho otene anivahiye sabwa yokosa dhilobo na mukalelo onfuniye wi nimwagalalihe. (Aheb. 13:15) Okosa eji, enowiwanana na wenjedhedha mabasa ehu olaleya, wila Yehova anirurihe venjene. Labo-labo, ninele otamela mikalelo dha ‘weha wi none opama wa Mulugu.’ Dhahene, ninele okala ninga Yezu ologile: “Oja waga kuvirihamo enddifunana Mulugu oddirumile, kupuliha mabasaye addivahileye.”—Jo. 4:34.