1-2. Kulita ni Samu 34:8, yika watamba kulinga mba umone ngwo Yehova mupema?

 ACHINYONGA ngwe umwe mutu makwaha kulia chize kanda uchilia kama. Muhasa kunyingika yimwe hakutwala ku kulia chacho, ha kuchitala, kuchihumbika, kuhula chize akuchiteleka hanji kuhula nyonga lia atu akwo hakutwala ku kulia chacho. Alioze jila yipema yize muyikukwasa kupwa ni shindakenyo nyi kulia chacho chayema nyi ka, yili kucheseka.

² Ni yetu mutuhasa kumona ngwetu Yehova mupema, ha kutanga Mbimbiliya ni mikanda yetu, hanji ha kwivwa yize atu akwo akwamba hakutwala ku yuma yipema yize Yehova akwalingila. Alioze, mba tupwe ni shindakenyo ngwetu Yehova mupema, yetwene e twatamba kweseka upeme wenyi. (Tanga Samu 34:8.) Tutalenu chilweza chinasolola chize chino muchihasa kulingiwa. Achinyonga ngwe, unazange kunjila mu mulimo wa shimbu lieswe. Mba unjile mu mulimo wacho, unafupiwa kwashiwisa yuma ku mwono we. Kota hiunatange chilakenyo cha Yesu chinambe ngwo, nyi wasa Wanangana wa Zambi ha chihela chitangu, Yehova makwaha yeswayo unafupu. Alioze kota kanda uchimona umanunuko wa maliji wano ku mwono we. (Mateu 6:33) Chipwe chocho, mujikijila ha chilakenyo chino cha Yesu, mutepulula yuma yize wa kulanda ni maola a mulimo, mba mulihulikila mu mulimo wa kwambujola. Muze mulinga yuma yino, yena mwene mulimwena chize Yehova anakwehe yuma yeswe yize unafupiwa. Acho ‘weseka’ Yehova ni kumona ngwo mupema.

3. Kulita ni Samu 16:1, 2, aya waze Yehova akuhana yuma yinji yipema?

³ Yehova “mupema kuli eswe,” chipwe kuli waze kamunyingikine. (Samu 145:9; Mateu 5:45) Alioze waze akumulingila  ni mbunge yeswe kakwaha yuma yinji yipema. (Tanga Samu 16:1, 2.) Tutalenu yimwe yuma yipema yize Yehova akutulingila.

4. Yuma yika yipema yize Yehova akuhana kuli waze akuputuka kukundama kuli iye?

⁴ Muze twakukaula yize Yehova akutulongesa, twakumona chize yino yakululieka mwono wetu. Chakutalilaho, muze twaputukile kulilongesa hakutwala kuli Yehova ni kumuzanga, chocho yatukwasa kwehuka manyonga ni yitanga yize te muyihasa kutuhandununa kuli iye. (Kolo. 1:21) Nawa muze twalihanyine kuli Yehova ni kutupapachisa, iye yatwaha yuma yipema chinji: shimbi yipema ya mbunge ni usepa upema ni iye.—1 Petu. 3:21.

5. Kuchi mulimo wa kwambujola wakutukwasa kumona upeme wa Yehova?

⁵ Muze twakwambujola, twakuhasa kumona chize Yehova ali mupema. Shina uli mutu yoze walihola chinji? Anji a kuli yetu che twapwa. Kota muze te kanda uchipwa Chela cha Yehova, wambile ngwo: “Yami kwami chishi kuhasa kungongwela ku zuwo lia mutu yoze chanyingikine hanga nguhanjike nenyi hakutwala ku Mbimbiliya.” Alioze musono, unahase kuchilinga matangwa eswe. Ni ukwaso wa Yehova, unazange chinji mulimo wa kwambujola! Chikwo nawa, ha mashimbu waze unayi ni kwambujola, wakumona chize Yehova akukukwasa mu majila anji alisa. Chakutalilaho, muze wakuwana mutu yoze keshi kuzanga sango jetu, Yehova kakukukwasa hanga ulihumikize. Nyi wawana mutu yoze unazange kulilongesa Mbimbiliya, Yehova kakukukwasa kuwana chisoneko chipema chize mumutangila. Chipwe ngwe atu anji mu njiza yenu keshi kutayiza sango lipema, nihindu Yehova makwaha tachi hanga ununge ni kwambujola.—Jere. 20:7-9.

6. Shindakenyo yikwo yika tuli nayo ngwetu Yehova mupema?

⁶ Jila yikwo yize Yehova akusolwelamo upeme wenyi, yili kutufumba mu mulimo wa kwambujola. (Yoa. 6:45) Chakutalilaho, ha kukunguluka cha hakachi ka poso, twakulilongesa yikuma ya chize mutuhasa kwambujola. Nawa kakutukolweza hanga tuzachise yikuma yacho muze tunambujola kuli atu. Ku uputukilo hanji muhasa kwivwa woma wa kuzachisa yimwe jila yaha ya kwambulwilamo. Alioze nyi twachilinga, mutuhasa kumona ngwetu, jila yacho yili yipema nawa yinakwase atu mu njiza yetu. Chikwo nawa, ha kukunguluka cha mambonge, kakutukolweza hanga twambujole mu majila anji alisa. Chino hanji muchihasa kulumbunuka kwecha kwambujola mu jila yize hitunejilila nayo. Alioze muze twakuchilinga, twakuhana uhashi kuli Yehova hanga atuwahise. Haliapwila, tutalenu yiwape yize mutuhasa kupwa nayo, muze mutuzachisa majila aha hanga tulingile chinji Yehova kulita ni uhashi wetu. Hanyima, mutumona nawa yize mutuhasa kulinga hanga tumanunune yize twatesele.

7. Yiwape yika twakuzuka muze twakulihana chinji mu mulimo wa kwambujola?

⁷ Usepa wetu ni Yehova mukola chinji. Tutalenu chilweza cha Samuel, b umwe mukulwana wa mu chikungulwila. Iye ni mukwo-pwo kakulingila Yehova mu Colômbia. Ayo kapwile mapionelu mu chikungulwila cho, alioze yazanga nawa kulihana chinji mu mulimo wa kwambujola. Chocho, yazanga kuya mu chikungulwila chize te chinafupiwa ukwaso. Mba achilinge, kafupiwile kwecha yimwe. Samuel yamba ngwenyi: “Twahashile kulinga yize yili ha Mateu 6:33 ni kwecha kulanda yuma yize te kutushi kufupiwa. Alioze, chuma chikalu chapwile kuhichika zuwo lietu, mumu  twalitungile kulita ni chize twakuzanga nawa kutwakapwile ni mukuli ha kutunga zuwo liacho.” Muze ayile ku chikungulwila cheka, ayo yanyingika ngwo ku chihela chacho keshi kufupiwa mbongo jinji ngwe kuze apwile. Samuel yamba nawa ngwenyi: “Twamwene chize Yehova anatusongwela ha hita chiyulo ni chize akumbulwile yilemba yetu. Twevwile ngwetu iye kanawahilila ni yetu, nawa twamwene zango lienyi mujila yeka.” Shina muhasa kulinga yimwe hanga ulihane chinji mu mulimo wa Yehova? Nyi wayilinga, muupwa ni shindakenyo ngwe mukolesa usepa we ni Yehova, nawa iye makukwasa ha yeswe yize unafupu.—Samu 18:25.

8. Yika walilongesa ha yize amba Ivan ni Viktoria?

⁸ Twakuwahilila mu mulimo wetu. Ivan ni Viktoria, kanalingi upionelu ku Quirguistão. Ayo kazangile kupwa ni mwono washi hanga ahase kuya kweswako maatuma, chipwe mu mulimo wa kutunga. Ivan yamba ngwenyi: “Twapwile ni kulihana chinji mu mulimo weswawo te akutwaha. Ha kuhwa cha tangwa te twakuhonga, chipwe chocho, twapwile ni sambukila ni uwahililo, mumu te tunazachisa tachi jetu mu mulimo wa Zambi. Chikwo nawa, yitupwa ni masepa anji hamwe ni yuma yinji yipema yize twakwiwuluka. Yino yeswe yatuhele uwahililo unji.”—Marku 10:29, 30.

9. Yika yatwalile umwe pangi wakupinda ni yipikalo alihane chinji mu mulimo wa Yehova, nawa yika ayukile?

⁹ Mutuhasa kupwa ni uwahililo mu mulimo wa Yehova chipwe muze tuli ni yipikalo. Chakutalilaho, Mirreh umwe pangi tuliwa watwama mu chimwe chifuchi cha África, kapwile ndotolo. Muze echele kukalakala mumu lia ushinakaji, yapwa pionelu. Mirreh kakwete umwe musongo uze wakumupinjisa chinji. Kakuhasa kwambujola ku zuwo ni zuwo ha ola yimuwika wika, alioze kakwambujola maola anji ha mbunga. Iye kali ni atu anji waze akufuna ni kumeneka ni alongi a Mbimbiliya, amwe a kuli ayo kakwambulwila ku telefone. Yika yatwalile Mirreh mba alihane chinji mu mulimo wa Yehova? Mwene yamba ngwenyi: “Nakuzanga chinji Yehova ni Yesu Kristu. Nawa nakulemba kuli Yehova mashimbu eswe hanga angukwase ngulinge yize munguhasa mu mulimo wenyi.”—Mateu 22:36, 37.

10. Kulita ni 1 Petulu 5:10, yika Yehova akuhana kuli waze akulihana chinji mu mulimo wenyi?

¹⁰ Yehova kakutufumba mu majila anji. Kenny, umwe pionelu yoze wakukalakala ku Maurício, kamwene umwenemwene wa maliji wano. Muze alilongesele umwenemwene, yecha shikola yinene, chocho yanjila mu mulimo wa shimbu lieswe. Yamba ngwenyi: “Nakuzanga kupwa ni yitanga ya profeta Izaia yoze wambile ngwenyi: ‘Yami uno; ngutume kama yami!’” (Iza. 6:8) Kenny, hanakalakala ku milimo yeka ni yeka ya kutunga, nawa hanakwase kulumbununa mikanda mu limi lio. Mwene yamba ngwenyi: “Natambwile fumbo lize te ngunafupiwa hanga ngulinge kanawa mulimo wami.” Kenny kalilongesele yuma yinji hi wika ko chize te malinga mulimo wacho. Yawezela ngwenyi: “Nanyingikine ulelu wami ni yitanga yize te natamba kupwa nayo hanga ngulingile kanawa Yehova.” (Tanga 1 Petulu 5:10.) Shina ni yena muhasa kulihana hanga Yehova akufumbe mu majila eka ni eka?

11. Yika alingile amwe mapangi ku Coreia do Sul mba ambujole, nawa yika azukile? (Tala chizulie ha chifukilo.)

¹¹ Chipwe mandumbu waze akulingila Yehova ha miaka yinji, no kanafupiwa kwafumba mu majila aha akwambulwilamo. Ha mashimbu a Covid-19, makulwana a mu chikungulwila ku Coreia do Sul yasoneka ngwo: “Mandumbu amwe kanyongene ngwo, kechi kuhasa kwambujola mumu lia yikola. Alioze, haliapwila kanahase kwambujola kupalikila  mu video-conferência. Mapangi atatu waze ali ni miaka kuhiana 80, kalilongesele kuzachisa computador, haliapwila kanahase kwambujola matangwa eswe.” (Samu 92:14, 15) Shina unazange kulihana chinji mu mulimo wa kwambujola hanga weseke upeme wa Yehova? Tala yuma yimwe yize muyikukwasa kuchilinga.

12. Yika Yehova analakenya kuli waze akujikijila muli iye?

¹² Lilongese kujikijila muli Yehova. Nyi twajikijila muli Yehova ni kulihana chinji mu mulimo wenyi, iye kanalakenya kutuzukwila yiwape. (Mala. 3:10) Fabíola, umwe pangi yoze watwama mu Colômbia, kamwene chize Yehova amanunwine chilakenyo chino ku mwono wenyi. Iye kazangile chinji kupwa pionelu hanyima lia upapachiso wenyi. Alioze katambile kukalakala hanga akwase ana jenyi atatu hamwe ni mukwo-lunga. Chipwe chocho, muze te hikwasala hakehe hanga eche kukalakala mumu lia ushinakaji, yalemba kuli Yehova ni kwita ukwaso. Yamba ngwenyi: “Mba mutu amutayize kwecha kukalakala mumu lia ushinakaji, kwakupalika mashimbu, alioze yami kangutayijile ni kawashi. Chino chapwile chikomokeso!” Hanyima lia tukweji aali, Fabíola yapwa pionelu. Musono kali ni miaka kuhiana 70, nawa halinga miaka kuhiana 20 mu upionelu. Ha miaka yeswayi, iye kakwasa atu nake kuheta ku upapachiso. Fabíola yamba ngwenyi: “Chipwe ngwe ha mashimbu amwe nakuhonga, nihindu Yehova kakungwaha tachi hanga ngulinge mulimo wami wa upionelu.”

13-14. Yilweza yika muyikukwasa kujikijila muli Yehova ni kulihana chinji mu mulimo wenyi?

 ¹³ Imbulula waze anakajikijila muli Yehova. Mbimbiliya yinazale too ni atu waze asele tachi mu mulimo wa Yehova. Yilweza yinji yinasolola ngwo, Yehova kapwile ni kuwahisa atu jacho, hanyima lia ayo kulinga yimwe yize muyisolola ngwo, kanajikijila muli iye. Chakutalilaho, Apalahama ‘kakanyingikine kuze te anayi.’ Chipwe chocho, Yehova yamuwahisa hanyima lia kuhichika zuwo lienyi. (Hepre. 11:8) Yakomba kamuwahishile hanyima lia kulitachika ni mungelo. (Uputu. 32:24-30) Muze A-Izalele te anambe kunjila mu Chifuchi cha Chilakenyo, ayo kahashile kuzauka lwiji Yordau, hanyima lia asasendote kunjila mu meya.—Yoshu. 3:14-16.

¹⁴ Kuli nawa yilweza ya Yela ja Yehova a ha mashimbu jetu waze anakajikijila muli iye, ni kusa tachi hanga alihane chinji mu mulimo wenyi. Chakutalilaho, ndumbu Payton ni mukwo-pwo, Diana, te kakuzanga kutanga sango ja mandumbu waze alihanyine chinji mu mulimo wa kwambujola, ngwe waze akusoloka ha chikuma, “Ayo kalihanyine.” c Payton yamba ngwenyi: “Muze twapwile ni kutanga yilweza yo, te chakupwa ngwe tunamono umwe mutu yoze unali chimwe kulia chiyema. Muze te twakununga ni kutala te twakuzanga ‘kweseka hanga tumone ngwetu Yehova mupema.’” Ha kupalika cha mashimbu, Payton ni Diana no yaya kuze te kunafupiwa ukwaso. Kutala hiunatange kama yikuma yacho? Shina hiunatale kama chinema, Kwambujola Kuze Kunafupiwa Ukwaso—Australia chize chili ha jw.org? Yikuma yino muyihasa kukukwasa kuwana majila a kulingilamo chinji Yehova.

15. Mumu liaka twatamba kusakula kanawa masepa?

¹⁵ Sakula kanawa masepa je. Chapwa chashi kulia chimwe kulia nyi tuli hamwe ni atu waze akuzanga kulia chacho. Chizechene nawa, nyi tuli hamwe ni atu waze akulihana chinji mu mulimo wa Yehova, ni yetu mutuzanga kulihana chinji mu mulimo wacho. Yino ye yalingiwile kuli Kent ni mukwo-pwo, Veronica. Kent yamba ngwenyi: “Masepa ni asoko jetu kapwile ni kutukolweza hanga tweseke majila aha a kulingilamo mulimo wa Zambi. Kulikata ni atu waze akusa Wanangana wa Zambi kulutwe, chatukwashile kulinga umwe mulimo waha.” Haliapwila, Kent ni Veronica kali mapionelu alipwila ku Sérvia.

16. Kulita ni chishima cha Yesu chili ha Luka 12:16-21, mumu liaka twatamba kwecha yuma yimwe?

¹⁶ Echa yuma yimwe hanga ulingile chinji Yehova. Mba tuvwise Yehova kuwaha, kutwafupiwile kwecha yuma yeswe yize twakuzanga. (Chilu. 5:19, 20) Alioze, nyi mutwivwa woma wakwecha yimwe hanga tulingile chinji Yehova, mutuhasa kulinga upi ngwe uze alingile lunga wa ha chishima cha Yesu. Lunga wacho kazangile chinji upite, chocho yehuka Zambi. (Tanga Luka 12:16-21.) Christian, umwe ndumbu yoze watwama ku França, yamba ngwenyi: “Yami te chishi kusa mashimbu ni tachi hanga ngukwase chinji mulimo wa Yehova, chipwe asoko jami.” Iye ni mukwo-pwo yazanga kupwa mapionelu. Alioze mba achilinge, o katambile kwecha milimo yo. Mba apwe ni yakulikwasa nayo, ayo yaputuka kulinga mulimo wa kukomba-komba nawa yalilongesa kuwahilila ni yuma yikehe yize apwile nayo. Shina tachi jize asele jinakalitokela? Christian yamba ngwenyi: “Haliapwila twakuzanga chinji kwambujola, nawa twakuwahilila chinji muze twakumona alongi jetu ni atu waze twakufuna ni kumeneka malilongesa hakutwala kuli Yehova.”

17. Yika muyihasa kutukwika kweseka majila aha a kwambulwilamo?

 ¹⁷ Eseke majila aha akwambulwilamo. (Yili. 17:16, 17; 20:20, 21) Shirley, umwe pionelu yoze watwama ku Estados Unidos, katambile kwijilila ni majila aha akwambulwilamo ha mashimbu a Covid-19. Ku uputukilo, te kakwivwa woma wakwambujola ku telefone. Alioze muze aamenekene kuli kalayi wa mbonge ni kwaha fumbo, mba Shirley yaputuka kwambujola ku telefone. Yamba ngwenyi: “Ku uputukilo te chishi kuhasa lume, alioze haliapwila nakuzanga chinji kwambujola ku telefone. Tunahase kuhanjika ni atu anji kuhiana muze te twakwambujola ku zuwo ni zuwo!”

18. Yika muyihasa kutukwasa nyi mutupwa ni kapinda ha yize twatesele mu mulimo wa Yehova?

¹⁸ Tesa yimwe nawa yilinge. Nyi mupwa ni kapinda ha yize watesele, eta ukwaso kuli Yehova. Nawa nyonga kanawa yize mulinga hanga uhwise kapinda wacho. (Yishi. 3:21) Sonia, umwe pionelu yoze wakukwasa chizavu cha mu limi lia Romani mu Europa, yamba ngwenyi: “Nakuzanga kusoneka yize mungulinga ha papilo, mba mungusa papilo liacho haze munguhasa kulimona. Nafunjekele chizulie cha tapalo yize yili ni makano. Muze nakufupa kukwata chimwe chiyulo, nakutala ha chizulie chacho ni kulihula ngwami: ‘Mu jila yika chiyulo chino muchingutwala?’” Sonia kakusa tachi hanga anunge ni nyonga lialita muze mapwa ni umwe kapinda. Yamba ngwenyi: “Hita yimwe muyalumuka ku mwono wami, nakuyimona ngwe chimwe chuma chize chinangukwika kupalika mu tapalo hanji ngwe chau chize muchingukwasa kupalika.”

19. Yika tunazange kununga ni kulinga?

¹⁹ Yehova kakutuwahisa mu majila eka ni eka. Nawa mutuhasa kusolola kuli iye ngwetu, tunasakwilila ha hita yuma yize akutwaha. Mu mutapu uka? Ha kulinga yeswayo mutuhasa hanga tuhalise jina lienyi. (Hepre. 13:15) Hanji muhasa kuwana majila akulingilamo chinji mulimo wa Yehova. Nyi wachilinga, Yehova makuwahisa chinji. Kashika hita tangwa, ‘eseka ukambe ngwe, Yehova iye mupema.’ Hachino, mupwa ngwe Yesu muze ambile ngwenyi: “Kulinga upale wa yoze wangutumine chenacho kulia chami, hanga ngukamanunune milimo yenyi.”—Yoa. 4:34.