1-2. Salm 34:8 ningin Jehovah ṭhatnak kong kha zeitindah kan cawn khawh?

MI PAKHAT nih na ei bal lomi rawl ei dingin aan sawm tiah na mitthlam ah cuanter hmanh. Mah rawl kong kha na zohnak, a haw na hnimhnak, an cawhmi hngalh awkah naa zuamnak thawngin asiloah mah kong he aa tlaiin midang ruahnak na hal hnanak thawngin na hlathlai khawh. Asinain na duh le duh lo hngalh khawhnak lam pakhat cu nangmah theng nih na tehnak thawngin a si.

² Jehovah ṭhatnak kong kha Baibal le kan cauk pawl kan relnak thawngin le midang nih Jehovah sinin an hmuhmi thluachuah kong an chimmi kan ngaihnak thawngin kan cawn khawh. Asinain Jehovah ṭhatnak kha kanmah theng nih kan ‘teh’ ahcun zeitlukin dah a ṭhat ti kha kan hngalhthiam lai. (Salm 34:8 rel.) Cutin tuah khawh ning lam kong kha zohhmanh hna u sih. Jehovah rian kha caantling in ṭuan kan duh men lai. Asinain mah hmuitinh phanh awkah nunning sawhsawh tein kan nun a hau lai. Pathian Pennak kha hmasa bik ah nan chiah ahcun Jehovah nih nan herhmi thil vialte kha aan pek hna lai timi Jesuh biakam kha kan rel tawn ko men lai nain Jehovah nih kan caah cutin a tuahmi kha cu kan hmu bal men lai lo. (Matt. 6:33) Asinain Jesuh biakam kha kan zumh caah tangka tlawm deuh in hman awk, kan rian thlennawn awk le kan si khawh chungin phungchim rianṭuan awkah kan i zuam. Cutin kan tuah ahcun Jehovah nih kan herhmi a kan pek taktakmi kha kan hmuh lai. Cucaah Jehovah ṭhatnak kha kanmah theng nih kan ‘teh’ khawh.

3. Salm 16:1, 2 ningin ahodah Jehovah ṭhatnak a hmu?

³ Jehovah cu amah a hngal lomi an si hmanhah “aho cung paohah a ṭha.” (Salm 145:9; Matt. 5:45) Asinain Jehovah nih  amah a dawmi le a rian ṭuan awkah an si khawh chungin aa zuammi hna cungah a hleiin thil ṭha tampi a tuah. (Salm 16:1, 2 rel.) Jehovah nih kan caah a kan tuahpiakmi thil ṭha cheukhat kong kha i ruah hna u sih.

4. Jehovah nih amah a naihmi hna cungah a ṭhatnak kha zeitindah a langhter?

⁴ Jehovah sinin kan cawnmi ningin kan zulh tik paohah kan nunnak ah ṭhatnak a chuahmi kha kan hmuh. A kong kha kan cawn i kan hun dawt deuh tikah a ṭhalomi ruahnak le amah he a kan hlatter khomi ziaza hna kha tei awkah a kan bawmh. (Kol. 1:21) Cun Jehovah sinah kan pum kan i pek i tipil kan in tikah a ṭhami chiaṭha thleidannak le amah he a ṭhami pehtlaihnak ti bantuk thil ṭha hna kha a kan pek chinchin.—1 Pet. 3:21.

5. Phungchim rian kan ṭuannak ah Jehovah ṭhatnak kha zeitindah kan hmuh?

⁵ Phungchim rianṭuannak i kan i tel tikah Jehovah ṭhatnak kha kan hmuh peng. Nang cu a ningzah a pangmi na si maw? Jehovah miphun tampi zong a ningzah a pangmi an si. Jehovah sal pakhat na si hlanah Baibal kong chim awkah mising inn ah kal in kutka ka kinghte lai tiah na ruat bal men lai lo. Asinain atu ahcun cutin hmaan tein na tuah cang. Cun Jehovah nih phungchim rianṭuannak ah i nuamh deuh ding hmanh in aan bawmh. Jehovah nih a dang lam zongin aan bawmh. Ralchanhnak na ton tikah lungdaihnak na ngeih peng nakhnga ca zongah aan bawmh. Mah lengah biatak ngaih a duhmi hna sinah hman dingmi Baibal caang zong kha hngalh awkah aan bawmh. Mi nih na chimmi an ngaih duh lo hmanhah phungchim peng ding zongin thazaang aan pek.—Jer. 20:7-9.

6. A cawnpiaknak nih Jehovah ṭhatnak kha zeitindah a langhter?

⁶ Jehovah nih phungchim rianṭuannak caah a kan cawnpiaknak thawng zongin kan cungah a ṭhatnak kha a langhter. (Johan 6:45) Zarhlai pumhnak ah phung kan chim tikah zeidah kan chim lai timi kong le mah kha phungchim rianṭuannak ah zeitindah kan hman lai timi kong hna kha kan theih. A hmasa ahcun thil thar cheukhat kong he aa tlaiin kan thin a phang men lai. Asinain cutin kan tuah tikah mah fuhphanh ning thar nih kan lohmun i mi pawl kha an lung a suk men hna lai. Pumhnak le civui hna zongah hlanah kan hman bal lomi phungchim rianṭuan ning lam a phunphun kha hman awkah tha a kan pek. Mah nih kan thin a kan phanter ko nain cutin tuah awkah kan i zuam ahcun Jehovah nih thluachuah a kan pek lai. Kan sining cu zeitin a si hmanhah amah kan i bochan i a kan pekmi lam thar zulh awkah kan si khawh chungin kan i zuam ahcun Jehovah nih a kan pek dingmi thil ṭha cheukhat kong kha atu kan i ruah hna lai. Cun zeitindah kan hmuitinh kan phanh khawh timi kong zong kan i ruah hna lai.

7. Phungchim rianṭuannak ah fakpi in kan i zuam tikah zei thluachuah dah kan hmuh?

⁷ Jehovah kha a naih hmanh kan naih khawh. A nupi he Colombia ah Pathian rian a ṭuanmi Samuel * timi Khrihfa upa kong hi ruathmanh. Mah nuva hna cu an Khrihfabu ah hmaikal a ṭuanmi an si ko nain a herh deuhnak hmun Khrihfabu ah phungchim rian kha kauhter an duh. Mah hmuitinh phanh awkah mahca ṭhatnak cheukhat an rak hlawt. Samuel nih hitin a ti: “Matthai 6:33 kha kan zulh i kan herh lomi thil kha kan caw ti lo. Asinain a har bikmi thil pakhat cu kan inn kan i ṭhialmi kha a si. Kan inn cu leiba zeihmanh ngeih loin kan duhmi  phun in kan rak sakmi a si.” Khrihfabu thar i an i ṭhial tikah a hlan nakin tangka kha tlawm deuh in an hman a hau cang. Samuel nih hitin a ti: “Jehovah nih zeitlukin dah lam a kan hruai i kan thlacamnak a kan leh ti kha kan hmuh. Cun Jehovah cu kan sinah nuam tein a um i hlanah kan ton bal lomi a dawtnak zong kha kan hmuh tiah kan ruah.” Nangtah lam cheukhat in na phungchim rianṭuannak kha na kauhter kho lai maw? Cutin na tuah ahcun Jehovah nih aan naih lai i aan zohkhenh lai ti kha na zumh khawh.—Salm 18:25.

8. Ivan le Viktoria chimmi in zeidah na cawn khawh?

⁸ Kan rianṭuannak in nuamhnak kan hmu. Kyrgyzstan ah hmaikal a ṭuanmi nuva, Ivan le Viktoria nih an chimmi kong hi ruathmanh. Nunning sawhsawh tein an nun caah biakinn saknak rian i telin pek an simi zei rian poah kha mah lungtho tein an rak ṭuan khawh. Ivan nih hitin a ti: “Pek kan simi zei rian paoh ṭha tein kan ṭuan khawh nakhnga fakpi in kan i zuam. Zanlei ahcun kan tha a ba tuk ko nain Jehovah caah kan thazaang kan hmanmi a si ti kha kan hngalh caah kan i nuam. Cun hawikom thar tampi kan ngei i a ṭha tukmi hmuhtonnak hna zong kan ngeih caah kan i nuam tuk.”—Mar. 10:29, 30.

9. A harmi thil sining a tongmi unaunu pakhat nih a phungchim rian kauhter awkah zeidah a tuah, a phichuak cu zeidah a si?

⁹ A harmi sining kan ton hmanhah Jehovah rianṭuannak ah kan i nuam kho. Tahchunhnak ah, kum upa nuhmei a simi Mirreh cu Nitlaklei Africa ah siibawi pakhat a rak si. Pension a lak hnuah hmaikal a hun ṭuan. Mirreh cu a zual tukmi zawtnak a ngei. Cucaah lam a kal kho lo i innkhat hnu innkhat phungchimnak ah suimilam tlawmpal lawng aa tel kho. Asinain zapi lak phungchimnak ah a caan tampi a hman. Mah tikah lennolh le Baibal cawnpiaknak tampi a ngei i cheukhat cu phone in a chawnh hna. Cutin tuah awkah Mirreh kha zeinihdah a forh? Hitin a ti: “Ka lungthin ah Jehovah le Jesuh Khrih ka dawt hnanak cu a khat. Cun Jehovah sinah a rianṭuannak ah ka si khawh chungin kaa tel khawh nakhnga ka bawm tiah atu le atu thla ka cam.”—Matt. 22:36, 37.

10. Kuatkhat Peter 5:10 ah a langhter bantukin ṭhancho awkah aa zuammi hna nih Jehovah sinin zeidah an hmuh?

¹⁰ Jehovah cawnpiaknak zong kan hmu. Mauritius ah hmaikal a ṭuanmi Kenny nih mah cu a hmaanmi a si ti kha a hmuh. Biatak a hngalh tikah sianghleiruun a kaimi kha a ngol, tipil a ing i caantling rian a hun ṭuan. Hitin a ti: “‘Keimah ka kal lai! Ka thlah tuah’ tiah a timi profet Isaiah bia ningin nun awkah kaa zuam.” (Isa. 6:8) Kenny cu biakinn saknak rian ah voi tampi aa tel. Cun an holh in Baibal hrambunhmi cauk pawl holhlehnak rian zongah a bawmh hna. Kenny nih hitin a ti: “Pek ka simi rian ṭuan khawh awkah a herhmi sining ka ngeih nakhnga cawnpiaknak ka hmu.” Asinain mah rian ṭuan ning kong lawng kha a cawnmi a si lo. Hitin a ti chap: “Ka caah a harmi thil le Jehovah salṭha si awkah ṭhancho ka herhmi sining hna kha ngeih awkah ka rak cawn.” (1 Peter 5:10 rel.) Jehovah nih lam tampi in aan cawnpiak khawh nakhnga thlennak na tuah a hau ve men lai.

11. Thlanglei Korea ah a ummi unaunu hna nih phungchim rianṭuannak ah an i tel khawh nakhnga zeidah an tuah, a phichuak cu zeidah a si? (A phaw hmanthlak zoh.)

¹¹ Hmuhtonnak a ngeimi Jehovah Tehte Hna hmanh phungchim rianṭuan ning lam thar an hman tikah ṭhathnemhnak an hmu. COVID-19 pulrai chungah Thlanglei Korea ah a ummi Khrihfabu pakhat i Khrihfa upa hna nih hitin cakuat an ṭial: “An ngamdamlonak ruangah phungchimnak ah kan i tel kho ti lai lo tiah a ruatmi unau cheukhat cu video call  hmangin phungchimnak ah an i tel kho. Cun kum 80 leng a simi unaunu pathum zong computer hman ning an cawng i atu cu phungchim rianṭuannak ah nifatin ti awk in an i tel cang.” (Salm 92:14, 15) Phungchim rianṭuannak kauhter le Jehovah ṭhatnak kha tam deuh in teh na duh maw? Mah hmuitinh phanh awkah aan bawm khomi kehlan cheukhat kha zohhmanh hna u sih.

12. Amah aa bochanmi hna kha Jehovah nih zei bia dah a kamh hna?

¹² Jehovah i bochan awkah cawng. Pathian nih amah kha kan i bochan i a ṭha bik in kan pek ahcun thluachuah tampi kaan pek hna lai tiah bia a kan kamh. (Mal. 3:10) Jehovah nih a cungah mah biakam a tlintermi kha Colombia ah a ummi unaunu Fabiola nih a rak hmuh. Mah unaunu nih tipil a in dih hnuah hmaanhmaan hmaikal ṭuan a rak duh. Asinain anih cu a chungkhar bawmh awkah fakpi in rian a ṭuanmi a si. Cucaah pension a lak khawh tikah bawmhnak hmuh awkah Jehovah sinah lungtak tein thla a cam. Hitin a ti: “Pension lak awkah mi nih caan saupi an hngah tawn, asinain kei cu thlakhat hnuah pension ka lak khawh colh. Mah cu khuaruahhar ngai a si.” Thlahnih hnuah hmaikal a hun ṭuan. Atu cu kum 70 leng a si cang i hmaikal a ṭuannak cu kum 20 leng a si cang. Mah caan chungah tipil in dingin minung pariat a rak bawmh hna. Hitin a ti: “A caan ah ka tha a der tawn ko nain Jehovah nih nifatin hmaikal rian ka ṭuan peng khawh nakhnga a ka bawmh.”

13-14. Jehovah i bochan awk le kan hmuitinh phanh awkah zei tahchunhnak hna nih dah a kan bawmh khawh?

 ¹³ Jehovah aa bochanmi hna kong in cawng. Baibal ah Jehovah rianṭuannak ah fakpi in aa zuammi hna kong tampi aa tel. Amah an i bochan ti an langhter hnu lawngah Jehovah nih thluachuah a pekmi hna kong tampi a um. Tahchunhnak ah, Abraham nih ‘khuazei ah ka kal lai ti a hngal lo nain’ a inn a chuahtak hnu lawngah Jehovah nih thluachuah a rak pek. (Heb. 11:8) Vangcungmi pakhat he an i paih hnu lawngah Jakob nih a ṭha tukmi thluachuah a rak hmuh. (Gen. 32:24-30) Israel mi pawl Biakammi Ram an luh lioah tlangbawi pawl nih Jordan Tiva ah an ke an hnim hnu lawngah mi pawl nih mah tiva kha an rak tan khawh.—Josh. 3:14-16.

¹⁴ Jehovah aa bochan i an hmuitinh a phanmi tuchan Jehovah Tehte Hna sin zongin ṭhathnemhnak na hmu kho. Tahchunhnak ah, unaupa Payton le a nupi Diana cu Jehovah rian kauhter awkah aa zuammi unau pawl kong rel kha an duh. Cu bantuk kong hna kha “Lungtho Tein An I Pe” timi aa tlaimi capar ah langhter an si. * Payton nih hitin a ti: “An hmuhtonnak kong kan rel tikah a thaw tukmi rawl a eimi mi pakhat kan zohmi bantukin kan i ruat. Kan zoh deuhdeuh tikah ‘Jehovah ṭhatnak kha teh’ kan hun duh deuhdeuh ve.” A donghnak ah, Payton le Diana cu thawngthanhtu a herh deuhnak hmun ah an rak i ṭhial. Mah aa tlaimi capar kha na rel bal maw? Cun jw.org/my ah taarmi Amahte Lawng A Ummi Hmun Ah Tehte Khannak—Australia le Amahte Lawng A Ummi Hmun Ah Tehte Khannak—Ireland timi video pawl tah na zoh bal maw? Mah thil hna nih phungchim rian kauhter khawh ning lam kha hngalh awkah aan bawmh khawh.

15. A ṭhami hawikom nih zeitindah an kan bawmh khawh?

¹⁵ A ṭhami hawikom kha i thim hna. Kan ei bal lomi rawl a si ko nain mah rawl a duhmi hna he kan i komh ahcun ei kan hun duh ve men lai. Cu bantukin an nunnak ah Jehovah kha pakhatnak ah a chiami hna he kan i komh ahcun Pathian rian kauhter khawhnak lam hna kha hngalh kan hun duh deuh ve lai. Kent le Veronica nuva hna cungah cutin a rak cang. Kent nih hitin a ti: “Kan hawile le kan chungkharmi hna nih phungchim rianṭuannak ah lam thar kha hman dingin tha an kan pek. Pennak pakhatnak ah a chiami hna he i kan i komhmi nih thil thar tuah awkah mahle mah zumhnak a kan ngeihter ti kha kan hngalh.” Atu ah Kent le Veronica cu Serbia ah special hmaikal an ṭuan cang.

16. Luka 12:16-21 i Jesuh chimmi tahchunhnak ningin zeicah lungtho tein mahca ṭhatnak kha kan hlawt awk a si?

¹⁶ Jehovah caah mahca ṭhatnak kha hlaw. Jehovah lunglawmhter awkah kan ngeihmi thil vialte kha hlawt a hau lo. (Pct. 5:19, 20) Asinain Jehovah rian tam deuh in ṭuan awkah mahca ṭhatnak hlawt kha kan duh lo ahcun Jesuh nih a chimmi thil ṭha tampi ngeih awkah fakpi in rian a ṭuan nain Pathian kong zei ah a rel lomi pa bantukin palhnak kan tuah khawh ve. (Luka 12:16-21 rel.) France ah a ummi unaupa Christian nih hitin a ti: “Jehovah le ka chungkhar caah a ṭha bikmi ka caan le ka thazaang kha ka pe hna lo.” A hnuah a nupi he hmaikal ṭuan dingin biakhiahnak an tuah. Asinain mah an hmuitinh an phanh khawh nakhnga an rian kha an kaltak a hau. An paw an i cawm khawh nakhnga thianhhlimhnak rian kha an ṭuan i tangka tlawmte in an nun khawh nakhnga an cawn. Mahca ṭhatnak  hlawt cu a phu maw? Christian nih hitin a ti: “Phungchim rianṭuannak ah kan i nuam deuh i Baibal kan cawnpiakmi hna le lennolh kan tuahmi hna nih Jehovah kong an cawnmi kan hmuh tikah kan i nuam chinchin.”

17. Phungchim rianṭuannak ah lam thar hman awkah i zuam cu kan caah zeicah a har khawh?

¹⁷ Phungchim ning lam thar cawn awkah lungthawhnak ngei. (Lam. 17:16, 17; 20:20, 21) United States ah hmaikal a ṭuanmi Shirley nih COVID-19 pulrai lioah a phungchim ning kha a rak thlen. A hmasa ahcun phone in phungchim awkah aa cungcang. Asinain peng zohkhenhtu nih a tlawn hna lioah phone in phungchim ning kha a rak cawnpiak hna hnuah phone in phung a rak chim peng. Hitin a ti: “Ka chim hmasa lioah cun ka ṭih tuk nain a tu cu kaa nuam tuk cang. Mah nih innkhat hnu innkhat phung kan chimmi nakin mi tam deuh an lung kan suk khawh hna.”

18. Phungchimnak rian kauhter awkah thil cheukhat nih kan caah a harter ahcun zeinihdah a kan bawmh khawh?

¹⁸ Hmuitinh chia law mah ningin liim awkah i zuam. Harnak kan ton tikah bawmhnak hmuh awkah thla kan cam i mah kong he aa tlaiin zeidah kan tuah lai ti kha ṭha tein kan ruah. (Ptb. 3:21) Europe i Romany holh a hmangmi phu pakhat ah hmaanhmaan hmaikal a ṭuanmi Sonia nih hitin a ti: “Ka hmuitinh pawl catlap ah ṭial le fawi tein hmuh khawhnak hmun ah chiah kha ka duh. Ka cabuai ah aa lo lomi lam pahnih kha ka suai. Biakhiahnak ka tuah tikah mah lam pahnih kha ka zoh i ka biakhiahnak nih ka hmuitinh phanh awkah a ka bawm lai maw, bawm lai lo timi kong kha ka ruah.” Cun Sonia nih a tonmi harnak cungah a ṭhami hmuhnak a ngeih nakhnga aa zuam peng. Hitin a ti: “Ka tonmi zuamcawhnak paoh kha ka hmuitinh phanh lo awkah a ka khamtu vanpang in maw ka hmuh lai asiloah ka hmuitinh phanh awkah a ka bawmtu hlei in dah ka hmuh lai timi kong he aa tlaiin biakhiahnak ka tuah.”

19. Jehovah pekmi thil ṭha caah kan i lawmhnak kha zeitindah kan langhter khawh?

¹⁹ Jehovah nih lam tampi in thluachuah a kan pek. Pathian thang a ṭhattermi thil hna kan tuahnak thawngin a kan pekmi thil cungah zeitlukin dah kan i lawmh ti kha kan langhter khawh. (Heb. 13:15) Jehovah rianṭuan awkah aa lo lomi thil tampi kan tuah khawh men lai. Cun Jehovah zong nih hlan nakin thluachuah tam deuh a kan pek men lai. Nifatin ‘Jehovah ṭhatnak teh’ khawhnak lam kha kawl hna u sih. Cutin kan kawl ahcun hitin a chimmi Jesuh bantuk kan si lai: “Ka rawl cu a ka thlahtu duhnak zulh le a ka fialmi rian liim kha a si.”—Johan 4:34.