1-2. Thenge la Salamo 34:8, nemene la nyine tro sa kuca matre troa ‘drem’ me tupath la thiina ka loi Iehova?

 PANE mekune jë laka, kola upi epun troa tupath la ketre xen hnei epuni hna thatre. Maine jë, tro epuni a pane goeën, me pun, maine hnyingë pengöne lai xen koi itre xan. Ngo maine epuni a ajane troa sipu atre la elolone la xeni cili, loi e tro epuni a pane tupath.

² Ame la easa ini Tusi Hmitrötr me porotrik memine la itre trejin ka kepe manathith qaathei Iehova, tro hë sa trotrohnine laka, ka thiina ka loi Nyidrë. Ngo loi e tro sa ketre sipu ‘drem’ me tupath la thiina ka loi Iehova. (E jë la Salamo 34:8.) Maine jë hne së hna mekun troa ahmaloeëne la mel së matre troa huliwa i Iehova ngöne la drai ka pexej. Tha thëthëhmine kö së la hna thingehnaean hnei Iesu ka hape, maine tro sa amë panëne la Baselaia i Iehova, tro hë Nyidrëti a hamë së la ka nyipiewekë thatraqane la mele së. Ame pe, tha hne së palakö hna melëne lai. (Mat. 6:33) Ngo pine laka, easa lapaune koi Iesu, matre easa thele troa ahmaloeëne la mele së, me saze huliwa, me catre cainöj. E cili, tro hë sa öhne laka, Iehova a thupë së.

3. Thenge la Salamo 16:1, 2, drei la ka kepe manathith qa ngöne la thiina ka loi Iehova?

³ Iehova a thiina ka loi “kowe la nöjei [atr] asë,” tune la itre ka thatre Nyidrë. (Sal. 145:9; Mat. 5:45) Ngo ame la itre ka catre nyihlue i Iehova ke, tro hmaca kö angatr a kepe manathithi ka tru. (E jë la Salamo 16:1, 2.) Tro sa ce wang la itre ewekë ka lolo hna hamë së hnei Iehova.

4. Nemene la aqane amamane Iehova la thiina ka loi Nyidrë kowe la itre ka thele Nyidrë?

 ⁴ Maine tro sa trongëne la hna ini së hnei Iehova, tro ha hetre thangane ka lolo kowe la mele së. Ketre, maine tro sa thele troa atrepengöi Iehova hnyawa me hnimi Nyidrë, tro hë Nyidrëti a xatua së troa saze aqane mekun me aqane ujë ka ngazo, nge ka ananyi së qaathei Nyidrë. (Kol. 1:21) Nge thupene la easa nue la mele së me xomi bapataiso, hnei Iehova hna amamane la thiina ka loi Nyidrë. Hnei Nyidrëti hna hamë së la mekuthetheu ka loi, me aijijë së troa nyisinee i Nyidrë.—1 Pet. 3:21.

5. Nemene la aqane amamane Iehova la thiina ka loi Nyidrë ngöne la hna cainöj?

⁵ Easë fe a öhne la thiina ka loi Iehova ngöne la hna cainöj. Maine jë, epuni a xou troa ithanata kowe la itre trenyiwa, tune la itre xaa hlue i Iehova. Qëmekene tro epuni a atre Iehova ekö, tha hnei epuni kö hna mekun troa hane fenafena la qëhnelö ne la ketre atr matre troa qaja la maca qa hnine la Tusi Hmitrötr. Ngo ame enehila, epuni palahi a cainöj. Jëne la ixatua i Iehova, epuni hë a wangatrune la huliwa cili. Hnei Iehova hna xatua epun troa xomihni ngöne la kola icilekeu. Hnei Nyidrëti fe hna xatua epun troa hnehene la itre xötr nyine troa ce thawa memine la itre atr. Ketre, hnei Iehova hna xatua epun troa catre cainöj ngacama pëkö ka drei epun.—Iere. 20:7-9.

6. Pine nemene matre hatrene la thiina ka loi Iehova la Nyidrëti a ini së?

⁶ Easa öhne la thiina ka loi Iehova ngöne la Nyidrëti a ini së troa cainöj. (Ioane 6:45) Ame ngöne la icasikeu e nyipine la wiik, hetre iamacanyi hna hnëkën matre xatua së troa cainöj. Maine jë, ame ngöne la xötrei, easa xou troa nyitipune la itre iamacanyi cili ka hnyipixe. Ngo maine tro sa huliwane itre ej, tro hë sa öhne laka, ka hetre thangan. Ame ngöne la itre icasikeu me itre asabele, kola ithuecatre koi së troa huliwane la itre xaa aqane cainöj ka hnyipixe. Ngacama tha ka hmaloi kö troa saze la aqane mele së, ngo tro kö Iehova a amanathithi së. Tro sa ce wang la itre manathith hne së hna kapa ngöne la easa hamëne la ka sisitria koi Iehova. Thupene lai, tro sa ce ithanatan la aqane tro sa akökötrene la huliwa ne cainöj.

7. Nemene la manathithi hne së hna troa kapa e tro sa akökötrene la huliwa ne cainöje së?

⁷ Tro sa easenyi catre koi Iehova. Hanawang la hna melën hnei Samuel, * ketre qatre thup me föe i nyidrë, ka cainöj e Colombie. Lue pionie nyidro ngöne la ekalesia i nyidroti ekö, ngo hnei nyidroti hna thele troa akökötrene la huliwa ne cainöje i nyidro ngöne la ketre ekalesia ka aja ixatua. Celë hi matre hnei nyidroti hna saze la mele i nyidro me nue la itre xaa ewekë i nyidro. Öni Samuel: “Hnei nyio hna trongëne la hna qaja ngöne Mataio 6:33, me thupëne la aqane huliwane nyio la manie. Ngo jole catre koi nyio troa nue la hnalapa ke, ase hë nyio nyithupen asë la uma.” Ame e cili ngöne la ekalesia ka hnyipixe ke, tha tru kö la thupene mo, matre munë ju pe kö la manie hnei nyidroti hna amë. Ketre öni Samuel: “Öhne hnyawa hi nyio laka, ce Iehova me nyio nge hnei Nyidrëti hna sa  la itre thithi nyio. Nyio a haine la aqane hnimi nyio hnei Iehova.” Hapeu, ijiji epuni kö troa akökötrene la huliwa ne cainöj? Maine eje hi, tro hë epuni a easenyi catre koi Iehova nge tro Nyidrëti a thupëne la mele i epun.—Sal. 18:25.

8. Nemene la hna melën hnei Ivan me Viktoria?

⁸ Tro sa madrin ngöne la huliwa i Iehova. Hanawang la hna melën hnei Ivan me Viktoria, lue trefën ka pionie e Kirghizstan. Hnei nyidroti hna ahmaloeëne la mele i nyidro matre aijijë nyidro troa saen ngöne la itre xaa huliwa, tune la Huliwa Ne Xupi Uma Ne Baselaia. Öni Ivan: “Hnei nyio hna catre huliwa. Ngacama nyio a kucakuca e hej, ngo tingeting me madrin la mele i nyio. Hnei nyio hna nue trengecatre kowe la huliwa i Iehova. Tru la madrine i nyio troa mekune hmaca lo itre hnei nyio hna kuca, memine la itre trejin ka ce huliwa me nyio.”—Mar. 10:29, 30.

9. Nemene la ka xatuane la ketre trejine föe troa catre huliwa i Iehova ngacama eahlo a cile kowe la itre jol, nge nemene la thangane lai?

⁹ Ijije hi tro sa madrine ngöne la huliwa i Iehova, ngacama easa cile kowe la itre jol. Hanawang la ka traqa koi Mirreh, ketre trejine qatre föe ne Afrique de l’Ouest. Ketre droketre eahlo ngo hnei eahlo hna nue la huliwa cili matre troa pionie. Hna tithi eahlo hnei mec matre caa hawa hi ne cainöje eahlo ngöne la itre hnalapa trootro. Ngo ijiji eahlo troa cainöj ngöne la gaa tru atr. Nyimutre la itre ka ini tusi me eahlo, tune la itre hnei eahlo hna hën jëne telefon. Pine nemene matre Mirreh palahi a thele troa catre huliwa koi Iehova? Öni eahlo: “Tru la ihniming koi Iehova me koi Iesu Keriso. Nge eni palahi a catre thith me sipo ixatua koi Iehova matre hamëne la ka sisitria koi Nyidrë.—Mat. 22:36, 37.

10. Thenge la 1 Peteru 5:10, nemene la hna kapa hnene la itre ka ajane troa huliwa koi Iehova?

¹⁰ Iehova a ini së. Celë hi lai hna anyipicine hnei Kenny, ketre pionie e Île Maurice. Hnei angeic hna atre la nyipici ngöne lo angeic a ini ngöne la uma ne ini ka tru. Hnei angeic hna nue la ini cili, me xomi bapataiso, me xome la huliwa ne pionie. Öni Kenny: “Hnenge hna thele troa trongëne la hna qaja hnei Isaia ka hape: ‘Inieti la, upengë nieti jë.’ ” (Is. 6:8) Hnei Kenny hna saen ngöne Huliwa Ne Xupi Uma Ne Baselaia, me ixatua troa ujëne la itre itus ngöne la sipu qene hlapa i angeic. Öni angeic: “Hna ini ni la aqane troa maca ngöne la itre hnëqa hna ahnithe koi ni. Eni a öhne laka, hetre hnenge hna thatreine kuca, nge hetre itre thiina ka lolo nyine tro ni a eënyin, matre amadrinëne la hni Iehova.” (E jë la 1 Peteru 5:10.) Hapeu, tha epuni kö a ajane troa hane ini epun hnei Iehova, matre xome la itre xaa hnëqa?

11. Nemene la hna kuca hnene la köni trejine qa Corée du Sud, nge nemene la thangane lai?

¹¹ Hnene la itre trejin ka macaj nge ka hekö hë ngöne la nyipici, hna xome la ketre hnëqa, matre hna ini angatr. Hnene la itre qatre thup ne Corée du Sud hna cinyihane laka: “Hnene la COVID-19, matre hna aijijëne la itre ka hetre sine mec troa hane cainöj trootro jëne Ëternet. Hnene la köni trejine föe ka 80 lao macatre hna inine troa cainöj e nöjei drai jëne Ëternet. (Sal. 92:14, 15) Hapeu, tha epuni kö a ajane troa xome la itre xaa hnëqa matre troa öhne la thiina ka loi Iehova? Tro sa ce wang la itre xaa nyine troa kuca matre akökötrene la huliwa ne cainöj.

12. Nemene la hna kuca hnei Iehova kowe la itre ka mejiune koi Nyidrë?

¹² Loi e tro sa mejiune koi Iehova. Nyidrëti a amanathithine la itre ka mejiune koi Nyidrë me huliwa catre koi Nyidrë. (Mal. 3:10) Celë hi hna melën hnei Fabiola, ketre trejine föe qa Colombie. Thupene la hnei Fabiola hna xomi bapataiso, eahlo a ajane troa xome la huliwa ne pionie. Ngo eahlo la ka huliwa thatraqane la föi eahlo me köni neköi eahlo. Ame hë la eahlo a mano hna huliwa i maseta, hnei eahlo hna sipo ixatua koi Iehova ngöne la thith. Öni eahlo: “Maine ju, hmitre tro ni a kapa la mada. Ame pe, hnenge hna kapa la manie cili, thupene la caa treu.” Hnei Fabiola hna xome la huliwa ne pionie thupene la lue treu. Traqa koi 70 lao macatre i eahlo, ngo 20 hë lao macatre ne eahlo a pionie. Ketre, hnei eahlo hna xatuane la 8 lao atr troa xomi bapataiso. Öni Fabiola: “Ngacama eni a kucakuca e itre xaa ijin, ngo Iehova palahi a xatua ni troa eatrëne la porogaram hnenge hna eköth.”

13-14. Nemene la itre tulu ka troa xatua epuni troa mejiune koi Iehova?

¹³ Loi e tro sa xomi ini qa ngöne la tulu ne la itre ka mejiune koi Iehova. Ame e hnine la Tusi Hmitrötr, nyimutre la itre hlue i Iehova ka catre huliwa koi Nyidrë nge hna amanathithi angatr. Celë hi lai ka traqa koi Aberahama. Hnei Aberahama hna trotrije la hnalapa i angeic,  “ngacama thatre kö angeic” la hna tro kow, nge hnei Iehova hna amanathithi angeic. (Heb. 11:8) Ketre tui Iakobo, hnei angeice hna pane isi memine la ketre angela, matre hna amanathithi angeice hnei Iehova. (Gen. 32:24-30) Qëmekene tro la nöj Isaraela a lö kowe la Nöj Hna Thingehnaean, hnene la itretre huuj hna pane uti kowe la hneopegejë ne Ioridrano. E cili, hna uti trootro la tim nge hnene la nöj hna tro sasaithe la hneopegejë.—Ios. 3:14-16.

¹⁴ Ijije fe hi tro sa xomi ini qa ngöne la hna melën hnene la itre trejin ka mejiune koi Iehova enehila. Hane hi la hna kuca hnei Payton me Diana. Hnei nyidroti hna e la itre tane mekun qene Wiwi hna hape, “Ils se sont offerts volontairement”  * ka qaja la itre trejin ka catre huliwa koi Iehova. Öni Payton: “Ame la nyio a e la itre tane mekune cili, ke kösë nyio a goeën la ketre atr a tupath la ketre xeni ka hnyapa. Celë hi lai ka thue aja koi nyio troa hane öhne la thiina ka loi Iehova.” E cili, hnei Payton me Diana hna fek kowe la ketre nöj gaa aja ixatua. Hapeu hnei epuni kö hna hane e la itre tane mekune cili? Hnei epuni kö hna goeëne la lue video ngöne jw.org, hna hape, Prédication dans des régions isolées : Australie me Prédication dans des régions isolées : Irlande? Tro la itre jiane huliwa cili a xatua epuni troa akökötrene la huliwa i epun koi Iehova.

15. Nemene la thangan e tro sa iëne hnyawa la itre sinee së?

¹⁵ Loi e troa iëne hnyawa la itre sinee së. Maine tro sa ce tro memine la itre ka majemine xome la ketre xen hne së hna thatre, tro hë sa ajane troa tupath ej. Ketre tune fe, maine tro sa ce tro lapa memine la itre trejin ka catre huliwa koi Iehova, tro hë lai a thue aja koi së troa hane nyitipu angatr. Celë hi lai hna melën hnei Kent me Veronica. Öni Kent: “Hnene la itre sinee i nyio hna ithuecatre koi nyio troa akökötrene la huliwa i nyio koi Iehova. Nge pine laka, hnei nyio palahi hna ce tro memine la itre ka amë panëne la huliwa i Iehova, matre tha xou i nyio hë troa xome la itre xaa hnëqa.” Ame enehila, lue pionie huti hë Kent me Veronica e Serbie.

16. Thenge la ceitune hna hamën hnei Iesu ngöne Luka 12:16-21, pine nemene matre nyipiewekë tro sa nue la itre xaa ewekë?

¹⁶ Loi e tro sa nue la itre xaa ewekë thatraqane la huliwa i Iehova. Eje hi, tha nyipiewekë kö troa nue asë la itre ewekë së matre troa huliwa i Iehova. (Ate cai. 5:19, 20) Ngo maine tro sa xou troa nue itre ej, tro hë sa tune lo atr hna qaja ngöne la ceitune i Iesu. Hnei angeice hna nuetriji Iehova pine la itre sipu aja i angeic. (E jë la Luka 12:16-21.) Öni Christian, ketre trejin qa France: “Tha hnenge kö hna nue traem me trengecatre troa catre huliwa koi Iehova me itre sineeng.” E cili, hnei Christian me föe i angeic hna xome la huliwa ne pionie. Ngo hnei nyidroti hna nue la pane huliwa i nyidro, matre huliwa pena ngöne la hnë nyidrawa uma. Ketre, hnei nyidroti hna mejihnine la hnei nyidroti hna hetreny. Nemene la thangan e thupen? Öni Christian: “Tru la madrine i nyio troa catre cainöj, ke hetre aja ne la itre ka ini tusi troa atrepengöi Iehova hnyawa.”

17. Nemene la ka troa sewe së troa tupathe la ketre aqane cainöj?

 ¹⁷ Loi e tro sa tupathe la itre xaa aqane cainöj. (Itre hu. 17:16, 17; 20:20, 21) Celë hi lai hna kuca hnei Shirley, ketre trejine föe e Etazini. Hnei eahlo hna saze la aqane cainöj ngöne la kola traqa la meci COVID-19. Ame lo xötrei, eahlo a xou troa cainöj jëne telefon. Ngo ame la kola iwai hnene la atre thupëne la sirkoskripsio, hnei Shirley hna inine troa cainöj jëne telefon. Öni eahlo: “Eni a xou ngöne la xötrei. Ngo ame hë enehila, eni a ajane troa cainöj jëne telefon. Tru catre kö hnei atr hnenge hna ithanata memin, hune la eni a cainöj ngöne la itre hnalapa trootro.”

18. Nemene la ka troa xatua së troa cile kowe la itre jol?

¹⁸ Loi e tro sa cinyihane la itre nyine troa kuca. Ame la easa cile kowe la itre jol, loi e tro sa catre thith. Tro lai a xatua së troa inamacan me eatrëne la itre mekuna së. (Ite edomë 3:21) Celë hi lai hna kuca hnei Sonia, ketre pionie ngöne la gurup ka qene Romain. Öni angeic: “Hnenge palahi hna cinyihane la itre nyine tro ni a kuca, me amë ngöne la ketre götran ka mama. Hnenge hna sija la lue gojeny, nge qëmekene troa axecië mekun, eni a pane goeëne lue ej.” Sonia palahi a kuca la hnei angeic hna atreine troa cile kowe la nöjei pengöne jol. Öni angeic: “Ame itre xaa ijin, kola sewe ni hnene la itre jol, ngo kolo fe a xatua ni troa inamacan me eatrëne la itre mekunang.”

19. Nemene la hne së hna thele troa kuca?

¹⁹ Nyimu aqane amanathithi së hnei Iehova. Maine easa ajane troa amamane la hni ne ole së kowe la itre manathithi cili, loi e tro sa atrunyi Iehova. (Heb. 13:15) Ketre, tro Nyidrëti a amanathithi së, e hne së hna thele troa akökötrene la huliwa së koi Nyidrë. Haawe, catre jë së thele o drai troa ‘drem, matre atre laka, Atre ihnimi Iehova.’ E cili, tro hë sa qaja tui Iesu, ka hape: “Ange la troa kuca la aja ne la atre upi ni, me afenesine la huliwa i nyidrë.”—Ioane 4:34.