1-2. Enke fa Psalm 34:8 e soi, da fa u sa tesi fu si efu Yehofa bun?

MEKE u taki wan sama gi i wan nyanyan di yu á be nyan noiti ete. Fosi i nyan mi en, kande yu o keli en luku, yu o sumee en, yu o akisi san anga san de aini, kande yu akisi taa sama fa ai tesi. Ma efi i wani sabi efu a switi tuutuu, iseefi o abi fu tesi en luku.

² Te wi e leisi Beibel, den buku fu a olikanisâsi, anga ondoofenitoli fu taa baala anga sisa, wi e si fa Yehofa e du bun gi den. Ma efu u wani sabi fa Yehofa e du bun gi den sama di e dini en, useefi mu tesi fu si fa ai du a sani ya. (Leisi Psalm 34:8.) Meke u taki i wani bigin anga a fuuten diniwooko. Fu man du a sani ya, yu á mu e libi bigi, neen meke yu abi fu kengi wantu sani aini i libi. Kande a omen leisi i leisi a pisi pe Yesesi taki te u poti a Kownukondee fu Gadu a fesi, da Yehofa o gi wi ala den taa sani di wi abi fanowdu. Kande noiti iseefi si fa Yehofa du a sani ya gi i (Mat. 6:33). Ma fu di yu e biibi taki Yehofa o du san a paamisi, meke i bigin wooko wantu dei aini a wiki namo, fu man du moo aini a peleikiwooko. Di i du a sani ya i kon si taki Yehofa e gi yu ala san yu abi fanowdu tuu. A so iseefi tesi, neen i si taki Yehofa bun.

3. Enke fa Psalm 16:1, 2 e soi, da sama Yehofa e du bun gi?

³ Yehofa e du bun gi ala sama. Den sama di nai dini en seefi ai du bun gi (Ps. 145:9; Mat. 5:45). Ma Yehofa moo lobi du bun gi den sama di e dini en anga den hii  ati. (Leisi Psalm 16:1, 2.) Wi o poti pakisei a wantu fu den bun sani di Yehofa e du gi u.

4. San Yehofa e du gi den sama di bigin dini en?

⁴ Ala yuu te wi e du sani enke fa Yehofa wani, wi e si den wini di wi e fende. Di u bigin sutudeli Beibel, u kon lobi Yehofa. Na a sani ya e yeepi u fu u nai du sani di a á lobi (Kol. 1:21). Baka di u dopu, Yehofa yeepi u fu abi wan kiin kosensi. A yeepi u tu fu toon en mati.​—1 Peit. 3:21.

5. Fa Yehofa e du bun gi wi aini a peleikiwooko?

⁵ Wi e si fa Yehofa e yeepi u te wi e du a peleikiwooko. Yu a wan sama di e sen? Gaanse fu den sama di e dini Yehofa a sen sama. Fosi i bigin dini Yehofa, kande i be e si enke noiti i be o poi go a wan sama osu fu taigi en sani fu Beibel, ma nownow na ala wiki yu e du a sani ya. Yehofa e yeepi i tu fu piisii te yu e peleiki. A omen taa fasi Yehofa e yeepi u. Ai yeepi i fi yu á buuya te sama e ligei anga yu aini a peleikiwooko. Ai yeepi i fu sabi sowtu tekisi i mu leisi gi wan sama di wani sabi moo fu wan toli. Ai gi yu a kaakiti tu fu tan peleiki winsi sama nai wani aliki.​—Yel. 20:7-9.

6. Saide a leli di Yehofa e leli u fa fu du a peleikiwooko a wan fasi fa ai du bun gi u?

⁶ A leli di Yehofa e leli u fa fu du a peleikiwooko moo bun, a wan taa fasi fa ai du bun gi u (Yoh. 6:45). Te u de a den mindiiwiki komakandaa, wi e leli fa u sa taki anga sama aini a peleikiwooko. Biginbigin kande a o taanga gi u fu wooko anga den nyun sani di wi e leli, ma te u meke moiti wooko anga den, a omen wini wi e fende. Te wi e go a den komakandaa anga den konkelesi, wi e leli nyun fasi fa u sa du a peleikiwooko. A ná ala yuu ai makiliki fu peleiki a den sowtu fasi ya, ma efu u meke moiti du san u leli, Yehofa o belesi a moiti di wi e meke. Meke u poti pakisei a wantu fasi fa Yehofa e du bun gi den sama di e meke moiti fu du moo gi en. Baka dati wi o luku wantu fasi fa u sa du moo gi Yehofa.

7. Sowtu wini wi e fende te wi e meke moiti fu du moo gi Yehofa?

⁷ Wi anga Yehofa o toon moo bun mati. Luku a toli fu wan owluman den e kai Samuel. * En anga en uman e tan a Kolombiya. A toowpaa ya be e du a pioniliwooko aini a kemeente pe den be de, ma den be wani go yeepi a wan peesi pe moo peleikiman be de fanowdu. Fu be man du a sani ya, den be abi fu fika son sani. Samuel taki: ‘U meke moiti fu du san sikiifi a Mateyesi 6:33. Wi á be e bai sani di wi á be abi fanowdu moo. Ma a sani di be moo taanga gi u, a fu be foloisi komoto na a osu pe u be e tan. A be wan moin osu, a be meke pilisisi enke fa u be wani en. U be kaba pai fi en tu.’ Di den foloisi go na a nyun kemeente, den kon si taki den á be fanowdu so ipi moni moo enke fosi. Samuel taki: ‘U si fa Yehofa e yeepi u fu du sani anga koni. Wi e fii taki ai piisii anga u, na ala yuu ai holibaka gi u. Wi anga en toon moo bun mati.’ I si enke i poi du moo gi Yehofa? Te yu o du a sani ya, yu anga Yehofa o toon moo bun mati. A o solugu i tu.​—Ps. 18:25.

8. San a toli fu Ivan anga Viktoria e leli u?

 ⁸ Wi e piisii te wi e wooko gi Yehofa. Luku a toli fu wan pionili toowpaa den e kai Ivan anga Viktoria, di e tan a Kirgistan. Fu di a toowpaa ya wani de kabakaba fu du moo gi Yehofa ala yuu, meke den nai libi bigi. Fu di den e libi na a fasi ya meke den poi yeepi anga bow wooko efuso taa wooko fu a olikanisâsi. Ivan taki: ‘Te u fende den gaandi ya, wi e du den anga u hii ati. Na a kaba fu a dei wi e weli, ma wi e fii bun fu di wi e du ala san u poi gi Yehofa. A omen nyun mati u fende fu di wi e wooko gi Yehofa. A sani ya e meke u piisii.’​—Malik. 10:29, 30.

9. Saide wan sisa be wani du moo gi Yehofa winsi fa a á makiliki? Sowtu wini a fende?

⁹ Wi e piisii te wi e du moo gi Yehofa winsi a á makiliki. Luku a toli fu Mirreh, wan gaandi sisa di e tan a West-Afiikan. A sisa ya man dede kaba. Mirreh a be wan dataa, ma di a go anga pensyun neen a bigin pionili. A sisa ya abi wan siki di e meke a á poi waka langa, neen meke a wan yuu langa namo ai poi peleiki osu fu osu. Toku ai suku taa fasi fu peleiki. Ai sidon a peesi pe tyaipi sama e pasa, da ai peleiki gi den. A omen sutudi anga gobaka Mirreh abi. Son wan fu den, anga telefon ai taki anga den. Saide Mirreh be wani du moo gi Yehofa? A taki: ‘Mi lobi Yehofa anga Yesesi Kelestesi anga mi hii ati. Neen meke mi e akisi Yehofa ala yuu fu a gi mi a kaakiti fu mi sa du moo gi en.’​—Mat. 22:36, 37.

10. Enke fa 1 Peitilisi 5:10 e soi, da sowtu wini wi e fende te wi e du moo gi Yehofa?

¹⁰ Yehofa e leli u fu du u wooko moo bun. A dati Kenny, wan pionili di e tan a Maurisiyus kon si. Di a kon sabi a waaleiti, a komoto na a hei sikoo di a be e go, a dopu neen a bigin du a fuuten diniwooko. A taki: ‘Mi e meke moiti fu du sani enke polofeiti Yesaya di be taki: “Luku mi ya! Sende mi!”’ (Yes. 6:8) Kenny yeepi anga omen bow wooko fu a olikanisâsi. A yeepi puu buku poti aini en mamabee tongo tu. A taki: ‘Den baala be e leli mi fa mi mu du den wooko di den be e gi mi moo bun. Mi leli tu taki mi á poi du ala sani. Den sani di mi leli yeepi mi fu kon abi manii di e yeepi mi fu dini Yehofa moo bun.’ (Leisi 1 Peitilisi 5:10.) I si enke iseefi sa meke moiti fu du moo gi Yehofa? Efi i meke a moiti ya, Yehofa o leli i fa fu du sani moo bun, leti enke fa a leli Kenny.

11. San wantu sisa fu Zuid-Koreya du fu man du moo gi Yehofa? Sowtu wini den fende di den du a sani ya? (Luku a fowtow a fesise fu A Wakititolen.)

¹¹ Winsi on langa wan sama e dini Yehofa kaba, toku a sa fende wini te ai wooko anga den nyun sani di den baala e leli u. Di a COVID-19 siki paati a hii goontapu, wantu owluman fu wan kemeente a Zuid-Koreya be sikiifi taki: ‘Son baala anga sisa di be si enke den á be o poi peleiki fu di den siki, bigin peleiki anga internet. Dii gaandi sisa di pasa 80 yali kaba bigin peleiki na a fasi ya. Nownow na ala yuu den e de aini a peleikiwooko’ (Ps. 92:14, 15). Iseefi wani du moo gi Yehofa? A omen wini yu o fende te yu o du a sani ya. Luku wantu sani di o yeepi i fu man du moo gi Yehofa.

12. San Yehofa paamisi taki a o du gi den sama di e fitoow en?

¹² I mu e fitoow Yehofa. Yehofa paamisi taki efu wi e fitoow en a o belesi u (Male. 3:10). Wan sisa den e kai Fabiola di e tan a Kolombiya si fa Yehofa du a sani di a paamisi ya. Baka di a sisa ya dopu, a be wani bigin pionili wanten. Ma a á be poi fika a wooko fi en bika a be mu yeepi en man solugu den dii pikin fu den. Di a yuu doo fu a go anga pensyun, a begi Yehofa fayafaya fu a yeepi en. A taki: ‘Te yu akisi fu go anga pensyun, a wan hii pisiten ai teke fosi den piki i, ma di mi akisi a wan mun namo mi wakiti. Mi si kiin taki a Yehofa seefi langa wan ana gi mi.’ Baka tu mun, a bigin pionili. Nownow Fabiola pasa 70 yali kaba. A moo enke 20 yali kaba ai du a pioniliwooko. A pisiten di ai pionili, a sutudeli anga 8 sama te enke den dopu. A taki: ‘Winsi fa mi e fii swaki son yuu, toku Yehofa e yeepi mi fu tan du a wooko ya.’

13-14. Sowtu toli sa yeepi u fu wani du moo gi Yehofa?

¹³ Waka a sama baka di be e fitoow Yehofa. A omen toli i sa fende aini Beibel fu sama di be e dini Yehofa anga den hii ati. Te wi e leisi den toli ya, da wi e si taki a baka di den sama ya du sani fu soi taki den e fitoow Yehofa, neen Yehofa belesi den. Te u luku a toli fu  Abalaham, wi e si taki a baka di a gwe fika ala san a be abi sondee fu a be sabi pe a be e go, neen Yehofa belesi en (Heb. 11:8). A baka di Yakopu feti anga wan engel fosi, neen a engel fu Yehofa belesi en (Gen. 32:24-30). Di den Islayelisama be mu go aini a Paamisi kondee, a baka di den pilisite poti den futu aini a Yordaan liba fosi neen a wataa be dee fu den abaa.​—Yow. 3:14-16.

¹⁴ I sa leli wan sani tu fu sama aini a ten ya di soi taki den e fitoow Yehofa. Wan baala den e kai Payton anga en uman Diana, be lobi leisi ondoofenitoli fu sama di be e du moo gi Yehofa. * Payton taki: ‘Te u be e leisi den ondoofenitoli ya, a be de enke u be e sidon luku fa wan sama e nyan wan switi nyanyan. O moo u be e leisi den toli ya, o moo useefi be wani tesi fu si fa Yehofa bun.’ Baka wan pisiten, Payton anga Diana foloisi go a wan peesi pe moo peleikiman be de fanowdu. Yu e leisi den ondoofenitoli di de na a website fu sama di e du moo gi Yehofa? Wantu moin felon de di i sa luku tu. I sa luku a felon di den e kai Preiki na farawe presi​—Australia di de a jw.org. Den sowtu toli ya sa yeepi i fu luku fa iseefi sa du moo gi Yehofa.

15. Fa den sama di wi e paa anga den sa yeepi u fu du moo gi Yehofa?

¹⁵ Paa anga sama di e gi i taanga-sikin fu du moo gi Yehofa. Ai moo makiliki fu bigin nyan wan sani di yu á be nyan noiti ete efi i gwenti si taa sama di lobi nyan mi en. A letiso a de anga den mati fu u. Efu wi e paa anga sama di e du ala san den poi gi Yehofa, useefi o wani du moo gi Yehofa. Na a sani ya wan toowpaa den e kai Kent anga Veronica be kon si. Kent taki: ‘U famii anga den mati fu u be e gi u taanga-sikin fu luku fa u sa du moo gi Yehofa. Fu di u be e paa anga sama di e si a dini di den e dini Yehofa enke a moo pelensipali sani, meke useefi be wani du moo gi Yehofa.’ Nownow Kent anga Veronica e du a spesuutu pioniliwooko aini Serbiya.

16. Enke fa a ageisitoli fu Yesesi aini Lukasi 12:16-21 e soi, da saide u mu de kabakaba fu fika son sani fu man du moo gi Yehofa?

¹⁶ Yu o abi fu fika son sani efi i wani du moo gi Yehofa. Dati á wani taki i mu fika ala den sani di i lobi fosi yu o man du moo gi Yehofa (Peleik. 5:19, 20). Ma efu den sani di wi abi e tapu u fu du moo gi Yehofa, da wi o de enke a man aini a ageisitoli fu Yesesi di be e wooko taanga sondee fu poti pakisei a Gadu. (Leisi Lukasi 12:16-21.) Wan baala den e kai Christian, di e tan a Faansikondee taki: ‘Mi á be e du ala san mi be poi gi Yehofa. Mi be mu moo poti pakisei a mi osufamii tu.’ A baala ya anga en uman be wani du a pioniliwooko, ma den be abi fu fika a wooko fu den fu man du a sani ya. Di den fika a wooko, den bigin kiin osu gi sama. Den be abi fu fika son sani di be e meke a libi moo makiliki gi den. Ai hati den taki den fika son sani fu du moo gi Yehofa? Christian taki: ‘Nownow wi e moo piisii. Wi e piisii tu te u si fa den sutudi e poolo te den leli wan nyun sani fu Yehofa.’

17. Saide a sa taanga son yuu fu peleiki a wan fasi di wi á be gwenti?

 ¹⁷ Suku nyun fasi fu peleiki (Toli 17:16, 17; 20:20, 21). Shirley, wan pionili sisa di e tan na Ameekankondee be abi fu suku nyun fasi fu peleiki di a COVID-19 siki paati a hii goontapu. Biginbigin a be e taanga gi en fu peleiki gi sama anga telefon, ma di a kelen-owluman kon luku a kemeente a leli den fa den sa du a sani ya. A sisa taki: ‘Biginbigin mi be e senuwe pikinso, ma nownow ai switi gi mi fu peleiki anga telefon. Wi e fende sama moo di u be e go peleiki osu fu osu.’

18. San u sa du te ai taanga gi u fu du moo gi Yehofa?

¹⁸ Luku san i wani du gi Yehofa, da i meke moiti fu du en. Efu u si taki wan sani e tapu u fu du moo gi Yehofa, u mu begi en fu a yeepi u, da u luku fa u sa losi a polobelema (Odo 3:21). Wan pionili sisa den e kai Sonia di e peleiki anga wan pikin kulu aini Europa taki: ‘Te mi wani du wan sani, mi e sikiifi en a pampila, da mi e poti en a wan peesi pe mi e si en ala yuu. Mi abi wan fowtow fu wan pasi di e go a tu se a mi tafaa tapu. Te mi mu du wan sani, mi e luku a fowtow ya, da mi e akisi miseefi sowtu pasi mi mu teke fu man du a sani di mi abi a pakisei.’ Sonia e meke moiti fu piisii winsi sowtu polobelema a abi. A taki: ‘Den sani di e miti u sa de enke wan sikotu di e tapu i fu go a pe i wani, ma den sa de enke wan booki tu di e yeepi i fu doo pe i mu go. Na a fasi fa yu e denki o soi efi yu e si en enke wan sikotu efuso wan booki.’

19. Fa u sa soi taki wi e teke den sani di Yehofa e du gi u fu bigi?

¹⁹ A omen fasi Yehofa e belesi u. Te wi e dini en anga u hii ati, da wi e soi taki wi e teke den sani di ai du gi u fu bigi (Heb. 13:15). Kande i sa suku nyun fasi fu du moo gi Yehofa. Efi i du a sani ya, a o belesi i. Te wi e meke moiti ala dei fu suku fasi fa u sa tesi fu si taki Yehofa bun, da wi o de leti enke Yesesi di be taki: ‘Mi nyanyan na a du di mi e du san a sama di sende mi kon wani.’​—Yoh. 4:34.