1-2. Ka kɛɲɛ ni Zaburuw 34:9 ye, an be se ka dɔ lɔn Jehova ka ɲumanya koo la cogo di?

MIIRI k’a filɛ ko dɔ ye dumunifɛn dɔ d’i ma i ma deli ka min dumu ka ye. I be se k’a ɲini ka dɔ lɔn o dumunifɛn koo la, i kɛtɔ k’a filɛ, k’a kasa sunsun, k’a ɲini k’a lɔn a tobira ni fɛɛn minw ye wala ka mɔgɔ wɛrɛw ɲininga a koo la. Nka, walisa k’a lɔn n’o dumuni ka di i ye wala n’a man di i ye, fɔɔ i k’a nɛnɛ le.

² An be se ka dɔ lɔn Jehova ka ɲumanya koo la, an kɛtɔ ka Bibulu n’an ka gafew kalan. An be se fana ka dɔw ka lakalitaw lamɛn minw b’a yira Jehova y’u duga cogo min na. Nka, walisa k’a faamu bɛrɛbɛrɛ Jehova ka ɲi cogo min na, fɔɔ an k’a ka ɲumanya “filɛ k’a lɔn [wala k’a nɛnɛ, NW ]” le an yɛrɛ ma (Zaburuw 34:9 kalan). An ka misali dɔ ta k’a filɛ an be se k’o kɛ cogo min na. Miiri k’a filɛ ko an b’a fɛ k’an seen don kudayi cidenya baara dɔ la. Nka walisa k’o laɲinita dafa, an ka ɲi k’an ka ɲɛnamaya kɛ cogo nɔgɔman na. Yezu ye layidu ta ko n’an be Ala ka Masaya ɲini fɔlɔ, an mako be fɛɛn minw na sɔbɛ la, Jehova bena o di an ma. N’a sɔrɔ an be deli k’o layidu kalan, nka an ma deli k’a ye Jehova y’o dafa an koo la (Mat. 6:33). Komi an lanin lo Yezu ka kumaw na, an be dɔ bɔ an ka musakaw n’an ka baarakɛ lɛriw la ani an b’an seko bɛɛ kɛ an ka cidenya baara la. An y’o kɛ minkɛ, an y’a ye an yɛrɛ ma ko Jehova b’an makoɲɛfɛnw di an ma sɔbɛ la. O cogo la, an ye Jehova ka ɲumanya nɛnɛ an yɛrɛ ma.

3. Ka kɛɲɛ ni Zaburuw 16:1, 2 ye, Jehova be ɲumanya kɛ jɔnw lo ye?

³ Jehova ka ɲumanya be “se bɛɛ ma,” hali minw t’a lɔn (Zab. 145:9; Mat. 5:45). Nka minw b’a kanu ani u b’a  sago kɛ n’u dusu bɛɛ ye, a be duga caaman lase olu ma (Zaburuw 16:1, 2 kalan). Jehova be koo ɲuman minw kɛ an ye, an k’u dɔw lajɛ.

4. Minw y’a daminɛ k’u magwɛrɛ Jehova la, a b’a ka ɲumanya yira olu la cogo di?

⁴ An ye min kalan Jehova koo la, tuma o tuma n’an b’o sira tagama, an b’a ye ko o b’an nafa. Misali la, tuma min na an ye lɔnniya sɔrɔ a koo la ani an y’a daminɛ k’a kanu, a y’an dɛmɛ ka see sɔrɔ miiriyaw ni delinankow kan minw ka gwo a ye (Kɔlɔs. 1:21). Tuma min na an y’an yɛrɛ kuun di Jehova ma ani ka batize, a y’a ka ɲumanya yira an na kosɔbɛ. Misali la, a y’an dɛmɛ ka kɛ ni dusukun ɲuman ye ani ka teriya sɔbɛ kɛ n’ale ye.—1 Piyɛri 3:21.

5. Jehova b’a ka ɲumanya yira an na cogo di waajuli la?

⁵ N’an be waajuli la, Jehova bele be to k’a ka ɲumanya yira an na. Yala kuma man di i ye wa? Kuma man di Jehova sagokɛla caaman ye. N’a sɔrɔ sanni i ka kɛ Jehova sagokɛla dɔ ye, i tun tɛ se k’a miiri abada ko loon dɔ, i tun bena taga mɔgɔ dɔ ka daa kɔkɔ i tɛ min lɔn walisa ka Bibulu kofɔ a ye. Nka sisan, i b’o lo kɛ tuma o tuma. Jehova yɛrɛ y’i dɛmɛ waajuli baara diyara i ye! Jehova y’i dɛmɛ cogo caaman wɛrɛw la fana. A y’i dɛmɛ i hakili siginin tora tuma min na dɔ tun b’i kɛlɛla waajuli la. A y’i dɛmɛ fana i hakili jigira bibulusen bɛnnin dɔ la k’a kalan makodonmɔgɔ dɔ ye. Ka fara o kan, a ye fanga di i ma, i tora ka waajuli kɛ, hali ni mɔgɔw tun t’a fɛ k’i lamɛn.—Zer. 20:7-9.

6. Jehova be fɔrɔmasɔn min di an ma, o b’a ka ɲumanya yira cogo di?

⁶ Jehova b’a ka ɲumanya yira an na fana, a kɛtɔ ka fɔrɔmasɔn di an ma waajuli baara kama (Zan 6:45). An be barokɛcogo modɛli ɲumanw lamɛn lajɛn na min be kɛ lɔgɔkun kɔnɔ. U b’an jija fana an ka baara kɛ n’o barokɛcogo modɛliw ye waajuli la. A daminɛ na, n’a sɔrɔ an be siran ka barokɛcogo modɛli kuraw kɛ k’a filɛ. Nka n’an y’o kɛ, n’a sɔrɔ an bena a ye ko o ka di an ka kiinmɔgɔw ye. Lajɛnw ni lajɛnbaw la, u b’an jija an ka waajuli kɛcogo wɛrɛw kɛ k’a filɛ, an ma minw kɛ ka ye. O fana be se ka siranya bila an na. Nka n’an y’o kɛ, Jehova bena an duga. An ka koow cogoya mana kɛ min o min ye, n’an be cogo kuraw ɲini walisa k’an seko fisaman kɛ Jehova ye, a b’an duga. An k’o duga dɔw lajɛ. O kɔ, an bena a ye an be se ka dɔ fara an ka cidenya baara kan cogo minw na.

7. N’an b’an jija ka dɔ fara an ka cidenya baara kan, an bena duga jumanw lo sɔrɔ?

⁷ An b’an magwɛrɛ Jehova la kosɔbɛ. An ka diinan mɔgɔkɔrɔ dɔ ka koo lajɛ. A tɔgɔ ko Samuel * ani ale n’a muso b’u ka cidenya baara kɛra Kolɔnbi jamana na. O balimacɛ n’a muso tun ye piyɔniyew ye kafo dɔ la u ka jamana na ani u tun be ninsɔndiya sɔrɔla o la. Nka, u tun b’a fɛ ka dɔ fara u ka cidenya baara kan, u kɛtɔ ka taga dɛmɛ don kafo dɔ la, yɔrɔ min na weleweledalaw man ca. Walisa k’o laɲinita dafa, u tun ka ɲi ka fɛɛn dɔw saraka. Samuel ko: “An ye Matiyo 6:33 sira tagama ani an ye fɛɛn dɔw sannin dabila an mako gwɛlɛ tun tɛ minw na. Nka min tun ka gwɛlɛ kosɔbɛ, o ye ko an tun bena taga k’an ka boon to yen. A tun lɔra an lo kama jaatika ani an tun y’a wari bɛɛ sara ka ban.” Tuma min na u yɛlɛmana kafo wɛrɛ la, u y’a ye ko u mako tun tɛ wari caaman na i ko fɔlɔ la. Samuel ko: “An y’a ye cogo min na Jehova b’an  ɲɛminɛna ani k’an ka deliliw jaabi. Jehova y’a yira cogo minw na ko a dusu ka di an kɔrɔ ani ko a b’an kanu, an tun ma deli k’o ɲɔgɔn ye.” Yala i be se ka dɔ fara i ka cidenya baara kan cogo dɔw la wa? N’i y’o kɛ, i be se ka la a la ko i bena i magwɛrɛ kosɔbɛ Jehova la ani ko a bena a janto i la.—Zab. 18:26.

8. Ivan ni Viktoria ye min fɔ, o b’i dɛmɛ ka mun lo faamu?

⁸ An be ninsɔndiya sɔrɔ an ka cidenya baara la. An k’a filɛ Ivan n’a muso Viktoria ye min fɔ. Piyɔniyew lo Kirgistan jamana na. U tora k’u ka ɲɛnamaya kɛ cogo nɔgɔman na walisa u labilanin ka to. O la, baara o baara tun mana ɲini u fɛ i n’a fɔ lɔli baara, u ka se k’o kɛ. Ivan ko: “Baara o baara tun mana kalifa an, an tun b’an seko bɛɛ kɛ o la. Tiɲɛn lo ko an tun sɛgɛnnin lo tile bannin kɔ. Nka, an tun wasanin lo ani an ninsɔn tun ka di k’a lɔn ko an y’an fanga don Jehova ka baara lo la. An ninsɔn tun ka di kosɔbɛ fana sabu an ye teri kuraw sɔrɔ ani koo caaman kɛra minw y’an ninsɔn diya.”—Mariki 10:29, 30.

9. Balimamuso dɔ ka gwɛlɛyaw bɛɛ n’a ta, a ye mun lo kɛ walisa ka dɔ fara a ka cidenya baara kan? Nafa juman lo sɔrɔla o la?

⁹ An be ninsɔndiya sɔrɔ Jehova ka baara la, gwɛlɛyaw bɛɛ n’a ta. Misali la, balima musokɔrɔba dɔ tɔgɔ ko Mirreh, firiyamuso lo ani a be Afiriki tileben fan fɛ. Dɔgɔtɔrɔ tun lo ani tuma min na a tagara antɛrɛti la, a ye piyɔniye baara daminɛ. Kunbiri dimi b’a la ani o bana juguyara. O kama, a be se ka lɛri kelen dama lo kɛ soo ni soo waajuli la. Nka, waajuli min be kɛ jamayɔrɔw la, a be se ka wagati caaman kɛ o la. Viziti kuraw ni bibulukalan caaman b’a fɛ ani a be u dɔw kɛ telefɔni na. Mun lo ye Mirreh lasun k’a ɲini ka caaman kɛ Jehova ye? A ko: “N’ be Jehova ni Yezu Krista kanu kosɔbɛ. Ka fara o kan, n’ be to ka Jehova deli a ka n’ dɛmɛ n’ ka se ka caaman kɛ a ka baara la.”—Mat. 22:36, 37.

10. Ka kɛɲɛ ni 1 Piyɛri 5:10 ye, minw be caaman kɛ Jehova ka baara la, a be mun lo di olu ma?

¹⁰ Jehova be fɔrɔmasɔn wɛrɛw di an ma. Kenny y’a ye k’o ye tiɲɛn ye. Piyɔniye lo ani a be Moris jamana na. Tuma min na a ye tiɲɛn lɔn, a ye kalan dabila inivɛrisite la, a batizera ani a ye kudayi cidenya baara daminɛ. A ko: “N’ ye n’ jija ka kira Ezayi ladegi, ale min ko: ‘Ne filɛ nin ye. Ne ci.’ ” (Ezayi 6:8). Kenny ye dɛmɛ don lɔli baara caaman na ani a ye dɛmɛ don fana k’an ka sɛbɛw bayɛlɛma a ka kaan na. A ko: “N’ mako tun be lɔnniya min na walisa ka n’ ka baara kɛ, n’ ye fɔrɔmasɔn sɔrɔ o kama.” Nka o dɔrɔn tɛ. A y’a fɔ tugun ko: “N’ y’a faamu n’ tɛ se koo minw na ani n’ y’a lɔn fana n’ ka ɲi ka kɛ ni jogo minw ye walisa ka kɛ Jehova sagokɛla ɲuman ye.” (1 Piyɛri 5:10 kalan). Yala ele fana be se k’i ka koow cogoya sɛgɛsɛgɛ ani k’a filɛ n’i be se k’i yɛrɛ labila walisa Jehova ka fɔrɔmasɔn wɛrɛw d’i ma wa?

11. Kore worodugu fan fɛ, balimamuso dɔw ye jijali jumanw lo kɛ walisa k’u seen don waajuli baara la ani nafa juman lo sɔrɔla o la? (Jaa lajɛ ɲɛɛ fɔlɔ kan.)

¹¹ Dɔw be Jehova sago kɛra a saan caaman ye nin ye. Olu fana mako be fɔrɔmasɔn na, n’u be waajuli kɛcogo kura dɔ kɛra k’a filɛ. COVID-19 fɔɲɔbana tuma na, Kore worodugu fan fɛ, kafo dɔ ka diinan mɔgɔkɔrɔw y’a sɛbɛ ko: “Minw tun b’a miiri ko u tɛ se ka waajuli kɛ u ka kɛnɛyakow kosɔn, sisan, u dɔw be sera k’o kɛ vidéoconférence sababu fɛ. Balimamuso saba be ni saan 80 ni kɔ ye ani u y’u yɛrɛ degi baara kɛcogo la ni ɔridinatɛri ye. O kɔ, u y’a daminɛ ka waajuli kɛ o sababu  fɛ loon caaman kɔnɔ lɔgɔkun o lɔgɔkun.” (Zab. 92:15, 16). Yala i b’a fɛ ka dɔ fara i ka waajuli baara kan ani ka Jehova ka ɲumanya nɛnɛ bɛrɛbɛrɛ k’a filɛ wa? I be se ka koo minw kɛ walisa k’o laɲinita dafa, an k’u dɔw lajɛ.

12. Minw b’u jigi la Jehova kan, a ye layidu juman lo ta olu ye?

¹² I jigi la Jehova kan. A ye layidu ta ko a bena an duga kosɔbɛ n’an b’an jigi la a kan ani n’an b’an seko bɛɛ kɛ a ye (Mal. 3:10). Balimamuso Fabiola be Kolɔnbi jamana na ani a y’a ye Jehova y’o layidu dafa ale koo la cogo min na. Dɔɔni a batizenin kɔ, a tun b’a fɛ ka kɛ kudayi piyɔniye ye. Nka, ale ka sara lo tun be a cɛɛ n’a ka denmisɛn saba balo. O kama, tuma min na a tun ka ɲi ka taga antɛrɛti la, a ye Jehova deli kosɔbɛ a k’ale dɛmɛ. A ko: “Tuma caaman, mɔgɔw be kɔnɔnin kɛ wagatijan kɔnɔ ka sɔrɔ k’a daminɛ k’u ka pansɔn sɔrɔ. Nka, ne y’a daminɛ ka n’ ta sɔrɔ kalo kelen dɔrɔn n’ taganin kɔ antɛrɛti la. O tun ye kabako yɛrɛ lo ye!” Kalo fila o kɔ, a kɛra piyɔniye ye. Sisan, a be ni saan 70 ni kɔ ye ani a ye piyɔniye ye kabi saan 20 ni kɔ. O wagatiw la, a sera ka mɔgɔ seegi dɛmɛ u batizera. A ko: “Hali ni tuma dɔw la n’ b’a ye ko barika tɛ n’ na, Jehova be n’ dɛmɛ loon o loon n’ ka to ka n’ ka piyɔniye baara kɛ.”

13-14. Misali jumanw lo be se k’i dɛmɛ i k’i jigi la Jehova kan ani ka dɔ fara i ka cidenya baara kan?

¹³ Minw y’u jigi la Jehova kan, kalan sɔrɔ u ka koo la. Mɔgɔ minw ye baaraba  kɛ Jehova ye, u caaman kofɔra Bibulu kɔnɔ. Tuma caaman na, o mɔgɔw ye dɔ kɛ dɔ ye fɔlɔ ka sɔrɔ ka Jehova ka duga kɛrɛnkɛrɛnninw sɔrɔ. Misali la, Ibrayima sɔnna ka bɔ a wolodugu la fɔlɔ, Jehova sɔrɔla k’a duga. Ibrayima y’o kɛ, hali “k’a sɔrɔ a tun t’a tagayɔrɔ lɔn.” (Eburuw 11:8). Yakuba ye bondori kɛ ni mɛlɛkɛ dɔ ye fɔlɔ, ka sɔrɔ ka duga kɛrɛnkɛrɛnnin sɔrɔ (Zɛnɛzi 32:25-31). Tuma min na Israɛldenw sera layidu jamana donda la, sarakalasebagaw ye u seen don Zurudɛn baji kɔnɔ fɔlɔ. O kɔ le, jama sera ka tɛmɛ.—Zozuwe 3:14-16.

¹⁴ An ka wagati la fana, Jehova Seere dɔw ye u jigi la a kan ani u ye dɔ fara u ka cidenya baara kan. I be se ka kalan sɔrɔ olu fana ka koo la. Misali la, a ka di balimacɛ Payton n’a muso Diana ye ka balima dɔw ka maanaw kalan. O balimaw ye dɔ fara u ka cidenya baara kan ani u ka koow lakalila barokun nunu na: “U sɔnna k’u yɛrɛ di gwansan.” * Payton ko: “Tuma min na an tun be o maana diimanw kalanna, a kɛra komi an tun be mɔgɔ dɔw filɛra u be dumuni diiman dɔ kɛra. An tora k’u filɛ minkɛ, a lɔgɔ y’an minɛ ka Jehova ka ɲumanya nɛnɛ ‘k’a filɛ.’ ” Kɔfɛ, Payton ni Diana tagara waajuli kɛ yɔrɔ min na weleweledalaw man ca. Videwo nunu fana be sɔrɔ jw.org kan: Prédication dans des régions isolées : Australie ani Prédication dans des régions isolées : Irlande. I ye o videwow filɛ wa? O barokunw n’o videwow be se k’i dɛmɛ i ka fɛɛrɛw ɲini walisa ka dɔ fara i ka cidenya baara kan.

15. Jɛnɲɔgɔn ɲumanw be se k’an dɛmɛ cogo di?

¹⁵ Jɛnɲɔgɔn ɲumanw sugandi. N’a sɔrɔ an ma deli ka dumuni dɔ dumu ka ye. Nka, o dumuni ka di mɔgɔ minw ye, n’an be wagati kɛ n’olu ye, a laban, an ka teli k’o dumuni kɛ. O cogo kelen na, mɔgɔ minw be Jehova sago kɛ u ɲɛnako fɔlɔ ye, n’an be wagati kɛ n’olu ye, an ka teli ka fɛɛrɛw ɲini walisa ka dɔ fara an ka cidenya baara kan. Balimacɛ Kent n’a muso Veronica y’a ye k’o ye tiɲɛn ye. Kent ko: “An teriw n’an somɔgɔw y’an jija ko an k’a ɲini ka cidenya baara faan wɛrɛw kɛ k’a filɛ. An y’a faamu ko minw be Ala ka Masaya ɲini fɔlɔ, n’an be jɛn n’olu ye, o b’a to an hakili be sigi ani an b’a ɲini ka cidenya baara faan wɛrɛw kɛ k’a filɛ.” Sisan, Kent ni Veronica ye dan na piyɔniyew ye Sɛrɛbi jamana na.

16. Ka kɛɲɛ ni Yezu ka talen ye Luka 12:16-21 kɔnɔ, mun na an ka ɲi ka sɔn ka fɛɛn dɔw saraka?

¹⁶ Sɔn ka fɛɛn dɔw saraka Jehova ka baara kosɔn. Walisa k’an koo diya Jehova ye, an mako t’a la ka ban an diyanye fɛɛnw bɛɛ la (Waaj. 5:18, 19). Nka, an man ɲi ka ban ka dɔ fara an ka cidenya baara kan sabu an t’a fɛ k’an diyanye fɛɛn dɔw to yen. N’o tɛ, an bena kɛ i ko Yezu ye cɛɛ min kofɔ a ka talen na. O cɛɛ ye baaraba kɛ walisa ka fɛɛn ɲuman caaman sɔrɔ. Nka, a m’a janto Ala la. O ye filiba ye dɛ! (Luka 12:16-21 kalan). Christian be Faransi jamana na ani a ko: “N’ tun tɛ n’ ka wagati fanba ani n’ seko fisaman kɛra Jehova ani n’ ka denbaya ye.” Ale n’a muso y’a latigɛ ka kɛ piyɔniyew ye. Nka walisa k’o laɲinita dafa, u tun ka ɲi k’u ka baloɲini baara to yen. U y’a daminɛ ka yɔrɔw jɔsi walisa k’u mako wasa. U tun be wari dennin min sɔrɔ, u y’a to o ka u wasa. Yala kuun tun b’a la u k’u yɛrɛ saraka o cogo la wa? Christian ko: “An be ninsɔndiyaba sɔrɔla waajuli baara la  sisan ani an ninsɔn ka di k’a ye ko Bibulu kalandenw ani an be to ka taga bɔ mɔgɔ minw ye, olu be lɔnniya sɔrɔla Jehova koo la.”

17. Mun lo be se k’a to an t’a ɲini ka waajuli kɛcogo kuraw kɛ k’a filɛ?

¹⁷ Sɔn ka waajuli kɛcogo kuraw kɛ k’a filɛ (Kɛw. 17:16, 17; 20:20, 21). Shirley ye piyɔniye ye Etazini. A tun ka ɲi ka yɛlɛmani don a ka waajuli kɛcogo la COVID-19 fɔɲɔbana kosɔn. A daminɛ na, a tun be sigasiga ka waajuli kɛ telefɔni sababu fɛ. Nka, a ye fɔrɔmasɔn sɔrɔ tuma min na kafokulu kɔrɔsibaga nana bɔ u ka kafo ye. O kɔ, a y’a daminɛ ka waajuli kɛ telefɔni sababu fɛ ani a tora k’o kɛ tuma o tuma. A ko: “A daminɛ na, n’ tun be siran. Nka sisan, o ka di n’ ye kosɔbɛ. An be sera ka kibaro diiman lase mɔgɔ caamanba ka tɛmɛ soo ni soo waajuli kan!”

18. N’an b’a ɲinina ka dɔ fara an ka cidenya baara kan, an be se ka see sɔrɔ gwɛlɛyaw kan cogo di?

¹⁸ Laɲinitaw latigɛ ani a ɲini k’u dafa. N’an ye gwɛlɛyaw sɔrɔ, an be dɛmɛ ɲini Jehova fɛ delili la ani an be miiri koɲuman k’a filɛ an be se ka min kɛ (Talenw 3:21). Sonia ye kudayi piyɔniye ye ani a be romanikan jɛnkulu dɔ kɔnɔ Erɔpu. A ko: “A ka di n’ ye ka n’ ka laɲinitaw sɛbɛ papiye dɔ kan ani k’o bila yɔrɔ min na n’ ɲɛɛ b’u la. Sirafaran dɔ jaa be n’ ka tabali kan. Ni n’ ka ɲi ka desizɔn dɔ ta, n’ b’o jaa filɛ ani n’ be miiri n’ ka desizɔn nɔfɛkow la.” Sonia b’a jija k’a ka gwɛlɛyaw filɛ ni ɲɛɛ ɲuman ye. A ko: “Gwɛlɛyaw kelen kelen bɛɛ be se ka kɛ i ko kogo min be n’ bali ka koow kɛ wala pɔɔn, n’ be tɛmɛ min fɛ k’o kɛ. O bɛɛ be bɔ n’ ka koow filɛcogo lo la.”

19. An b’a fɛ k’an cɛsiri ka mun lo kɛ?

¹⁹ Jehova b’an duga cogo caaman na. An be se k’a yira ko an b’a waleɲuman lɔn kosɔbɛ o kosɔn, n’an b’an seko bɛɛ kɛ k’a tando (Eburuw 13:15). Misali la, an be se ka cogo kuraw ɲini ka dɔ fara an ka cidenya baara kan. N’an y’o kɛ, Jehova bena an duga kosɔbɛ. Loon o loon, an ka sababuw ɲini k’a nɛnɛ k’a filɛ “ko Masaba [Jehova] ka ɲi.” O la, an bena Yezu ladegi. Ale ko: “Ka n cibaga sago kɛ, o le ye n ka dumuni ye. Ne ka kan k’a ka baara kɛ fɔɔ ka se a daan na.”—Zan 4:34.