1-2. Me vaka e tukuni ena Same 34:8, eda na vulica vakacava na vinaka i Jiova?

KAYA mada ke soli vei iko e dua na kakana o se bera ni tovolea vakadua. O na kila eso na ka me baleta na kakana qori ke o raica, boica, kila na kena isaluaki se taroga nodra rai eso tale. Ia mo kila na kena ikanakana, e vinakati sara ga mo tovolea.

² Eda na vulica na vinaka i Jiova nida wilika na iVolatabu, noda ivola vakaivolatabu, kei na nodra talanoataka eso na nona vakalougatataki ira o Jiova. Ia ena qai matata vei keda na vinaka i Jiova nida “tovolea” sara ga na nona vinaka. (Wilika Same 34:8.) Meda raica mada qo e dua na kena ivakaraitaki. Kaya mada ni o via veiqaravi vakatabakidua. Mo rawata na isausau qori, ena vinakati mo bula rawarawa. De dua eda sa wilika wasoma na vosa ni yalayala i Jisu, ke da vakaliuca na Matanitu ni Kalou, o Jiova ena vakarautaka na ka eda gadreva dina. Ia eda se bera ni vakadinadinataka me cakava qori vei keda o Jiova. (Maciu 6:33) Nida vakabauta na ka e yalataka o Jisu, eda na vakayagataki ilavo vakavuku, veisautaka na ituvatuva ni noda cakacaka qai gumatua ena cakacaka vakaitalatala. Nida cakava qori, eda na vakadinadinataka ni o Jiova e kauaitaka na veika eda gadreva. Eda vakila sara ga vakataki keda na vinaka i Jiova.

3. Me vaka e tukuni ena Same 16:1, 2, e yaga vei cei na vinaka i Jiova?

³ O Jiova e ‘vinaka vei keda kece,’ vei ira mada ga na sega ni kilai koya. (Same 145:9; Maciu 5:45) Ia e vakalougatataki ira vakalevu na lomani koya, era qaravi koya tale ga mai vu ni lomadra. (Wilika Same 16:1, 2.) Dikeva  mada eso na sala e yaga kina vei keda na vinaka i Jiova.

4. E vakaraitaka vakacava o Jiova na nona vinaka vei ira na tekivu toro volekati koya?

⁴ Nida muria na ka e vakavulici keda kina o Jiova, eda na vakila na kena yaga. Nida vulica na veika me baleti koya da qai lomani koya, e vukei keda meda biuta na rai kei na itovo e vakavuna meda yawaki koya kina ena gauna sa oti. (Kolo. 1:21) Nida yalataki keda vei Jiova qai papitaiso sa qai levu ga na ka vinaka ena solia vei keda, me vaka na lewaeloma vinaka, eda veivolekati tale ga kei koya.—1 Pita 3:21.

5. Na sala cava eda vakila kina na vinaka i Jiova ena cakacaka vakaitalatala?

⁵ Eda na vakila tiko ga na vinaka i Jiova nida vakaitavi ena cakacaka vakaitalatala. Vakacava o dau mamadua? E levu na tamata i Jiova era dau mamadua. De dua ni bera ni o iVakadinadina i Jiova, o sega sara ga ni vakasamataka tu mo lai tukia nona katuba e dua drau sega ni veikilai, mo qai wasea vua na itukutuku mai na iVolatabu. Ia nikua o sa lai vunau vakawasoma. E vukei iko tale ga o Jiova mo taleitaka na vunau! Levu tale na sala o vakila kina na veitokoni i Jiova. Kena ivakaraitaki, e vukei iko mo kua ni cudru ni o tusaqati. E vukei iko mo nanuma na tikinivolatabu donu mo wilika vua na itaukeinivale e tataleitaki. E vakaukauataki iko tale ga mo vosota nodra sega ni kauai ena yalava.—Jere. 20:7-9.

6. E laurai vakacava na vinaka i Jiova ena nona veivakavulici?

⁶ E vakaraitaka tale ga o Jiova na nona vinaka ni vakavulici keda ena cakacaka vakaitalatala. (Joni 6:45) Eda rogoca ena noda soqoni ena lomanimacawa na vakatutu e vakarautaki vinaka da qai uqeti meda vakayagataka. De dua eda na rere meda tovolea na iwalewale vou, ia nida muria ena rawa ni yaga ena yalava. Eda uqeti tale ga ena soqoni kei na soqo ni veiwasewase meda vakayagataka na iwalewale ni vunau eda se bera vakadua ni tovolea. De dua eda na rere tale ga, ia nida muria ena vakalougatataka o Jiova na noda sasaga. Meda dikeva mada eso na veivakalougatataki i Jiova nida muria eso tale na iwalewale vou meda solia kina vua na noda vinaka se mani vakacava na keda ituvaki. Oti eda na qai raica na sala eda rawa ni vakarabailevutaka kina noda cakacaka vakaitalatala.

7. Eda na vakalougatataki vakacava nida saga meda vakalevutaka noda cakacaka vakaitalatala?

⁷ Eda toro volekati Jiova. Dikeva mada nona ivakaraitaki e dua na qase ni ivavakoso o Samuel, * e veiqaravi tiko kei watina mai Colombia. Rau marautaka na veiwatini qo na painia ena ivavakoso rau lewena, ia rau vinakata me rau vakalevutaka na nodrau cakacaka vakaitalatala me rau lai veiqaravi ena dua na ivavakoso e vinakati kina vakalevu na veivuke. Me rawati na isausau qori, e vinakati me rau vakuai rau ena so na ka. E kaya o Samuel: “Keirau muria na Maciu 6:33, keirau sega tale ga ni volia na ka e sega ni yaga. Ia e dua na ka dredre me keirau cakava, ya me keirau biuta na neirau vale. A tara sara ga me baleti keirau, e sega tale ga ni dua na neirau sausaumi.” Ena nodrau ilesilesi vou, rau vakadinadinataka ni rawa ni rau bula ga ena dua na ilavo lailai. E kaya o Samuel: “Keirau vakila sara ga na  veidusimaki i Jiova kei na nona rogoca na neirau masu. Keirau kila ni marautaka na ka keirau cakava, e lomani keirau tale ga.” Vakacava o rawa ni vakalevutaka nomu cakacaka vakaitalatala? Kevaka kina, mo nuidei ni o na toro volekati Jiova, ena vakarautaka tale ga na ka o gadreva.—Same 18:25.

8. Na cava o vulica ena ka e tukuna o Ivan kei Viktoria?

⁸ Eda marautaka noda veiqaravi. Rogoca mada na ka e tukuna o Ivan kei Viktoria, e dua na veiwatini rau veiqaravi tiko mai Kyrgyzstan. Rau bula rawarawa ga me rawa ni rau bolecakacaka ena ilesilesi cava ga, okati kina na tarataravaki. E kaya o Ivan: “Keirau dau cakacaka vakaukaua ena neirau ilesilesi. Keirau na oca ni oti e dua na siga, ia keirau lomavakacegu ni keirau vakayagataka tiko na neirau kaukaua ena cakacaka ni Matanitu ni Kalou. Keirau marautaka tale ga vakalevu eso na itokani vou kei na veika vinaka keirau vakila.”—Mari. 10:29, 30.

9. Na cava e cakava e dua na tacida yalewa me vakalevutaka nona veiqaravi ni dredre na ituvaki? Cava na kena yaga?

⁹ Eda marautaka noda qaravi Jiova ni dredre mada ga na ituvaki. Kena ivakaraitaki o Mirreh, e dua na yada itabaqase ena Ra kei Aferika. Sa cegu mai na nona veiqaravi vakavuniwai, sa tekivu painia tiko. E tauvi koya e dua na mate mosimosi, e vakadredretaka nona taubale, mani vakayagataka e dua na aua me dau vunau kina e veivale. Ia e levu na gauna e vunau kina e matanalevu. E levu nona veisikovi lesu kei na vuli iVolatabu, eso qori e dau qiriti ira ga. Na cava e uqeti Mirreh me vakalevutaka nona cakacaka vakaitalatala? E kaya: “Au lomani Jiova vakalevu kei Karisito Jisu. Au dau masuti Jiova wasoma me vukei au meu qaravi koya ena kena levu au rawata.”—Maciu 22:36, 37.

10. Me vaka e tukuni ena 1 Pita 5:10, na cava e cakava o Jiova vei ira na vakalevutaka nodra veiqaravi?

¹⁰ E vakavulici keda o Jiova ena so tale na ka. Qori na ka e vakadinadinataka o Kenny, e painia tiko mai Mauritius. Ni vulica na ka dina, e tinia nona vuli ena univesiti, e papitaiso qai veiqaravi vakatabakidua. E kaya, “Au saga meu muria na ka e tukuna na parofita o Aisea: ‘O yau qo! Moni talai au!’” (Aisea 6:8) E vica na tarataravaki e veivuke kina o Kenny, e veivuke tale ga ena kena vakadewataki na ivola vakaivolatabu ena nona vosanisucu. E kaya: “E yaga na ka au vulica meu qarava vinaka noqu ilesilesi.” Ia e sega ni vulica ga o Kenny na nona cakacaka. E kaya, “Au vulica tale ga na ka e dredre vei au kei na itovo meu bucina meu dua kina na dauveiqaravi vinaka i Jiova.” (Wilika 1 Pita 5:10.) De dua o rawa ni cakava tale ga na veiveisau, me vakavulici iko tale ga o Jiova.

11. Na cava eratou cakava na tacida mai Sauca Korea me rawa ni ratou vunau? Cava na kena yaga? (Raica na iyaloyalo ena waqana.)

¹¹ E yaga tale ga na vuli vei ira na qaravi Jiova dede tu mai, mera tovolea e dua na iwalewale vou ni cakacaka vakavunau. Ena gauna ni matedewa na COVID-19, era vola na qase ni ivavakoso mai Sauca Korea: “Eso era nanuma nira sega ni rawa ni vakaitavi ena cakacaka vakaitalatala ena vuku ni tauvimate, era sa vakayagataka tiko na vidio ena gauna qo. Eratou vulica e tolu na tacida yalewa eratou yabaki 80 vakacaca na kena vakayagataki na iyaya vakalivaliva, ratou sa vunau  tiko e veisiga.” (Same 92:14, 15) Vakacava o via vakalevutaka nomu cakacaka vakaitalatala mo raica na vinaka i Jiova? Dikeva mada eso na ka o rawa ni cakava me rawati kina qori.

12. Na cava e yalataka o Jiova vei ira na nuitaki koya?

¹² Vulica mo nuitaki Jiova. E yalataka o Jiova ke da nuitaki koya qai solia vua na noda vinaka, ena vakalougatataki keda vakalevu. (Mala. 3:10) Kena ivakaraitaki o Fabiola, e dua na tacida yalewa mai Colombia. E vakadinadinataka ni dina o Jiova ena nona vosa ni yalayala qori. A vinakata me painia tudei ni papitaiso oti ga. Ia e vinakati me cakacaka me rawa ni qarava nona vuvale, ya o watina kei na tolu na luvena. Gauna sa cegu mai kina na cakacaka e masu vagumatua vei Jiova me vukei koya. E kaya: “Levu era wawa vakabalavu mera qai taura nodra peniseni, ia o yau, au taura na noqu ni oti ga e dua na vula. E vaka ga na cakamana!” Oti e rua na vula sa painia sara. Nikua e sa yabaki 70 vakacaca, sa sivia e 20 na yabaki na nona painia tiko. Ena loma ni gauna qori e sa vukea e walu mera papitaiso. E kaya: “Au dau malumalumu ena so na gauna ia e vukei au o Jiova meu dei ena noqu ituvatuva e veisiga.”

13-14. Na ivakaraitaki cava ena uqeti iko mo nuitaki Jiova qai veiqaravi?

¹³ Vuli ena nodra ivakaraitaki na nuitaki Jiova. E tu ena iVolatabu e  levu na nodra ivakaraitaki o ira na gumatua ni qaravi Jiova. E levu na gauna era vakaraitaka na dauveiqaravi qori nira nuitaki Jiova ni bera nira vakalougatataki. Kena ivakaraitaki, e biuta na nona vanua o Eparama qai vakalougatataki koya o Jiova, ia “e sega ni kila na vanua e lako tiko kina.” (Iper. 11:8) Ia ni oti nona veimulomulo o Jekope kei na agilosi, e qai vakalougatataki. (Vkte. 32:24-30) Era vakarau butuka na vanua yalataki na matanitu o Isireli. Era sa qai takosova rawa ga na Uciwai na Joritani nira butu yani na bete e lomaniwai.—Jos. 3:14-16.

¹⁴ O rawa tale ga ni vuli ena nodra ivakaraitaki na tacida ena gauna qo era nuitaki Jiova mera veiqaravi. Kena ivakaraitaki na tacida tagane o Payton kei na watina o Diana, erau dau taleitaka na wilika na kedra italanoa na tacida era vakarabailevutaka na nodra qaravi Jiova me vaka e vakamacalataki ena ulutaga “Era Yalorawarawa Mera Gole.” * E kaya o Payton: “Ni keirau wilika na kedra italanoa e vaka ga keirau sarava e dua ni kania tiko na kakana kana vinaka. Na levu ga ni neirau saravi koya na levu tale ga ni neirau vinakata me keirau ‘tovolea qai raica na vinaka i Jiova.’” Oti ya erau sa toki sara o Payton kei Diana ina vanua e vinakati kina na veivuke. Vakacava o sa wilika na ulutaga qori. O sa sarava tale ga na vidio Witnessing in Isolated Territory—Australia kei na Witnessing in Isolated Territory—Ireland ena jw.org? Ena vukei iko na vidio qori mo kila na sala mo vakarabailevutaka kina nomu veiqaravi.

15. Ena yaga vakacava vei keda na itokani vinaka?

¹⁵ Digia na itokani vinaka. Eda dau via tovolea e dua na kakana vou ke da veimaliwai vakalevu kei ira na taleitaka. Ke da veimaliwai tale ga vakalevu kei ira na vakaliuca na qaravi Jiova, eda rawa tale ga ni kila na sala meda vakarabailevutaka kina noda veiqaravi. Erau vakadinadinataka qori e dua na veiwatini o Kent kei Veronica. E kaya o Kent: “Era dau uqeti keirau na neirau vuvale kei na itokani me keirau tovolea na taba ni veiqaravi vou. Keirau kila ni neirau veimaliwai vakalevu kei ira na vakaliuca na Matanitu ni Kalou keirau doudou kina ni tovolea eso na ka vou.” Nikua rau sa painia lavotaki tiko mai Serbia.

16. Me vaka e tukuni ena vosa vakatautauvata i Jisu ena Luke 12:16-21, na cava meda vakuai keda kina?

¹⁶ Meda vakuai keda meda rawa ni qaravi Jiova. E sega ni vinakati meda vakuai keda ena ka kece meda qai vakamarautaki Jiova. (Dauv. 5:19, 20) Ke da sega ni cakava qori eda na vaka na tagane ena vosa vakatautauvata i Jisu, a kauaitaka ga vakabibi na veika me baleti koya, e guilecava na Kalou. (Wilika Luke 12:16-21.) E kaya e dua na tacida tagane o Christian mai Varanise, “Au a sega ni vakayagataka e levu na noqu gauna kei na kaukaua vei Jiova kei na noqu vuvale.” Rau mani vakatulewataka vakaveiwatini me rau painia. Ia me rawati na isausau qori, e vinakati me rau cegu mai na nodrau cakacaka. Rau mani tauyavutaka e dua na bisinisi lailai ni sasamaki me tokoni rau, erau vulica tale ga me rau lomavakacegu ena ilavo lailai rau rawata. Vakacava e yaga nodrau vakuai yau? E kaya o Christian, “Keirau marautaka vakalevu na neirau cakacaka vakaitalatala, keirau marautaka  tale ga nira mai vulici Jiova e levu na vuli iVolatabu kei na veisikovi lesu.”

17. Na cava ena rairai vakadredretaka meda tovolea eso na iwalewale vou?

¹⁷ Tovolea eso tale na iwalewale vou ni vunau. (Caka. 17:16, 17; 20:20, 21) O Shirley e dua na painia mai Merika, e veisautaka na iwalewale ni nona vunau ena gauna ni matedewa na COVID-19. A sega mada ni via tovolea na vunau ena talevoni. Gauna e vakavulici kina ena nona veisiko mai na ivakatawa ni tabacakacaka, sa tekivu vakayagataka sara na iwalewale qori. E kaya: “Au rere ni se qai tekivu, ia qo au sa marautaka. E levu keimami vunau kina ni vakatauvatani kei na vunau e veivale!”

18. Nida via vakarabailevutaka na noda veiqaravi, na cava ena vukei keda nida sotava na ituvaki dredre?

¹⁸ Biuta na nomu isausau qai saga mo rawata. Nida sotava na ituvaki dredre, eda dau masulaka qai vakasamataka na cava meda cakava ena ituvaki qori. (Vkai. 3:21) Kaya o Sonia, e dua na tacida yalewa e painia tudei tiko ena iwasewase vosa vakaRomany e Urope: “Au dau via vola na noqu isausau ena pepa qai biuta ena dua na vanua meu raica kina. Ia au droinitaka e rua na gaunisala, au biuta toka ena noqu teveli. Ena gauna au vakatulewa kina, au dau raica na droini qori qai vakasamataka na itinitini ni ka au na vakatulewataka.” E dau saga o Sonia me donu nona rai ni sotava na ituvaki dredre. E kaya: “Ena ituvaki yadua, e rawa ni vaka na bai e tarovi au se na ikawakawa ena vukei au, ena vakatau sara tiko ga ena noqu rai.”

19. Na cava meda cakava?

¹⁹ O Jiova e vakalougatataki keda ena levu na sala. Eda na vakaraitaka nida vakavinavinakataka na veivakalougatataki qori nida saga ena noda vinaka meda vakacaucautaki koya. (Iper. 13:15) Qori e okati kina na noda dikeva eso na iwalewale vou meda vakarabailevutaka noda cakacaka vakaitalatala, ena qai vakalougatataki keda vakalevu o Jiova. Meda qara e veisiga na sala meda ‘tovolea qai raica ni vinaka o Jiova.’ Eda na vakataki Jisu ni kaya: “Na qau kakana meu cakava na loma i koya e talai au mai, meu vakaotia tale ga nona cakacaka.”—Joni 4:34.