1-2. Sɔgbe xá Ðɛhan 34:9 ɔ, etɛ mǐ ka ɖó na wà bo na tuùn ɖɔ Jehovah nyɔ́?

MǏ NI ɖɔ ɖɔ mɛɖé xwlé we nǔ e a ma ɖu kpɔ́n gbeɖé ǎ é ɖɔ hwi ni ɖu. Enyi a kpɔ́n nǔɖuɖu ɔ ganji, hwɛ́n kpɔ́n, tuùn nǔ e è ɖa na lɛ é, bo lɛ́ kan nǔ e mɛ ɖevo lɛ lin d’ewu é byɔ ɔ, a sixu tuùn nǔɖe lɛ d’ewu. É ɖò mɔ̌ có, ɖɔ̌ jɛn hwiɖesunɔ ɖó na ɖɔ́ kpɔ́n hwɛ̌, cobo na tuùn nú a na yí wǎn na, alǒ gbɔ.

² Biblu kpo wema mǐtɔn lɛ kpo xixa, gɔ́ nú nǔ ɖaaɖagbe e Jehovah ko wà nú mɛ ɖevo lɛ é sísé sixu zɔ́n bɔ mǐ na tuùn ɖɔ Jehovah nɔ nyɔ́ xomɛ. Amɔ̌, enyi mǐ “ɖɔ́” xomɛnyínyɔ́ Jehovah tɔn “kpɔ́n” mǐɖesunɔ ɔ, wɛ lee Jehovah yí wǎn nú mǐ gbɔn é na zawě nú mǐ nǔgbo nǔgbo. (Xà Dɛhan 34:9.) Lee mǐ sixu wà mɔ̌ gbɔn é sín kpɔ́ndéwú ɖokpo ɖíe: Mǐ ni ɖɔ ɖɔ mǐ ba na ɖ’alɔ ɖò sinsɛnzɔ́ hwebǐnu tɔn sín akpáxwé ɖé mɛ, amɔ̌, cobonu mǐ na kpéwú ɔ, é byɔ ɖɔ mǐ ni zán gbɛ̀ e bɔkun é. Hwɛhwɛ wɛ mǐ sixu ko nɔ xà akpá e Jezu dó ɖɔ, enyi mǐ sɔ́ Axɔ́suɖuto ɔ ɖó tɛn nukɔntɔn mɛ ɔ, Jehovah na na nǔ e hudo mǐ nǔgbo nǔgbo lɛ é mǐ é. Amɔ̌, mǐɖesunɔ ko ɖu vivǐ akpá enɛ sín jijɛnu tɔn kpɔ́n ǎ. (Mat. 6:33) É ɖò mɔ̌ có, mǐ ɖi nǔ nú akpá enɛ, ɖè akwɛzinzan mǐtɔn kpò, jó agbazazɔ́ mǐtɔn dó, bo sɔ́ ayi ɖó sinsɛnzɔ́ mǐtɔn jí. Ee mǐ wà mɔ̌ é ɔ, mǐɖesunɔ wá mɔ ɖɔ Jehovah nɔ sú hudo mǐtɔn lɛ sín dò nǔgbo nǔgbo. Mǐ “ɖɔ́” xomɛnyínyɔ́ Jehovah tɔn “kpɔ́n” mǐɖesunɔ.

3. Sɔgbe xá Ðɛhan 16:1, 2 ɔ, mɛ̌ mɛ̌ e wu Jehovah ka nɔ nyɔ́ xomɛ dó?

³ Jehovah “nyɔ́ nú mɛ bǐ,” kaka jɛ mɛ ɖěɖee ma tuùn i ǎ lɛ é jí. (Ðɛh. 145:9; Mat. 5:45) Amɔ̌, mɛ ɖěɖee yí wǎn nú Jehovah bo nɔ lɛ́ sɛn ɛ kpo ayi yetɔn bǐ kpo lɛ é jí wɛ é nɔ kɔn  nyɔna dó tawun. (Xà Ðɛhan 16:1, 2.) Kpɔ́n ali e nu mǐ sixu ɖu vivǐ xomɛnyínyɔ́ Jehovah tɔn tɔn ɖè é ɖé lɛ.

4. Nɛ̌ Jehovah ka nɔ nyɔ́ xomɛ dó mɛ ɖěɖee jɛ tintɛnkpɔn jí bo na vɛ́ kpo é kpo lɛ é wu gbɔn?

⁴ Enyi mǐ xwedó alixlɛ́mɛ Jehovah tɔn hweɖebǔnu ɔ, mǐ nɔ mɔ ɖɔ é nɔ hɛn lè wá nú mǐ ɖò gbɛzán mǐtɔn mɛ. Enyi mǐ kplɔ́n nǔ dó wǔ tɔn bo yí wǎn n’i ɔ, é nɔ d’alɔ mǐ bɔ mǐ nɔ ɖu ɖò linlin kpo nǔwalɔ kpo e sixu ɖè mǐ ɖó vo n’i lɛ é jí. (Kolo. 1:21) Gɔ́ na ɔ, enyi mǐ zé mǐɖée jó n’i, bo bló baptɛm ɔ, é nɔ na mǐ ayixa ɖagbe ɖé, bo nɔ bló bɔ mǐ nɔ zun xɔ́ntɔn vívɛ́ xá ɛ, enɛ ɔ, mǐ nɔ ɖu vivǐ xomɛnyínyɔ́ tɔn tɔn hugǎn.—1 Pi. 3:21, nwt.

5. Nɛ̌ mǐ ka sixu ɖu vivǐ xomɛnyínyɔ́ Jehovah tɔn tɔn gbɔn ɖò sinsɛnzɔ́ mǐtɔn mɛ?

⁵ Enyi mǐ kpò ɖò alɔ ɖó ɖò sinsɛnzɔ́ ɔ mɛ wɛ ɔ, mǐ na kpò ɖò vivǐ xomɛnyínyɔ́ Jehovah tɔn tɔn ɖu wɛ. A nɔ kú winnya wɛ à? Mɛ e ɖò Jehovah sɛn wɛ lɛ é gegě nɔ kú winnya. Vlafo cobonu a na huzu Kúnnuɖetɔ́ Jehovah tɔn ɔ, a sixu ko nɔ ma lin kpɔ́n gbeɖé ɖɔ emi na yì xúxú hɔn nú mɛ e emi ma tuùn kpɔ́n ǎ é, bo ɖɔ xó dó Biblu jí xá ɛ. É ɖò mɔ̌ có, égbé ɔ, hwɛhwɛ wɛ a nɔ wà mɔ̌. Gɔ́ na ɔ, Jehovah d’alɔ we bɔ a kplɔ́n bo nɔ ɖu vivǐ Mawuxóɖiɖɔzɔ́ ɔ tɔn. Ali gegě nu wɛ a mɔ ɖɔ Jehovah ko nɔ gudo nú emi ɖè. É d’alɔ we bɔ a cí xwíi hwenu e gbeklánxámɛtɔ́ ɖé ba nǔɖɔ we é. É lɛ́ d’alɔ we bɔ a flín wemafɔ e ba wɛ a ɖè é pɛ́ɛ bo má xá xwétɔ́ ɖé. Gɔ́ na ɔ, fí e a nɔ ɖɔ Mawuxó ɖè é ɔ, mɛ lɛ nɔ ba na ɖótó we ǎ, có Jehovah ka d’alɔ we bo na we hlɔnhlɔn bɔ a kpò ɖò jijla wɛ.—Jel. 20:7-9.

6. Nɛ̌ azɔ̌ e Jehovah ka nɔ kplɔ́n mǐ é ka ɖexlɛ́ ɖɔ é nyɔ́ xomɛ gbɔn?

⁶ Jehovah lɛ́ nyɔ́ xomɛ dó mǐ wu, gbɔn azɔ̌ kplɔnkplɔn mǐ ɖò sinsɛnzɔ́ ɔ sín ali nu gblamɛ. (Jaan 6:45) Ðò kplé aklunɔzán gblamɛ tɛntin tɔn lɛ hwenu ɔ, mǐ nɔ mɔ xóɖɔɖókpɔ́ sín kpɔ́ndéwú ɖaaɖagbe gegě, bo sixu lɛ́ zán wlɛnwín enɛ lɛ ɖò sinsɛnzɔ́ ɔ mɛ. Xɛsi kpɛɖé sixu ɖi mǐ dó wlɛnwín yɔyɔ̌ ɖé zinzán wu ɖò bǐbɛ̌mɛ, amɔ̌, enyi mǐ ɖò zinzan wɛ ɔ, mǐ sixu wá mɔ ɖɔ é dɔn mɛ ɖěɖee ɖò fí e mǐ nɔ ɖɔ Mawuxó ɖè lɛ é tawun. Gɔ́ na ɔ, è nɔ lɛ́ dó wusyɛn lanmɛ nú mǐ ɖò kplé lɛ kpo kpléɖókpɔ́ lɛ kpo jí ɖɔ mǐ ni nɔ ɖ’alɔ ɖò sinsɛnzɔ́ ɔ sín akpáxwé e mǐ ma ko ɖ’alɔ ɖè kpɔ́n ǎ lɛ é mɛ. Ado sixu lɛ́ hu mǐ dó nǔ enɛ lɛ wiwa wu, amɔ̌, enyi mǐ tɛ́n ye kpɔ́n ɔ, Jehovah sixu lɛ́ kɔn nyɔna dó mǐ jí. Nǔgbo ɔ, enyi mǐ na bo tlɛ ɖò ninɔmɛ ɖebǔ mɛ, bo zán ali yɔyɔ̌ e hun nú mǐ lɛ é dó na nǔ e wu mǐ kpé lɛ é bǐ Jehovah ɔ, é nɔ kɔn nyɔna dó mǐ jí. Mi nú mǐ ni gbéjé nyɔna enɛ lɛ ɖé lɛ kpɔ́n. Enɛ gudo ɔ, mǐ na ɖɔ xó dó ali e nu mǐ sixu vlɔ́nkan nú sinsɛnzɔ́ mǐtɔn ɖè é ɖé lɛ jí.

7. Enyi mǐ tɛ́n kpɔ́n bo vlɔ́nkan nú sinsɛnzɔ́ mǐtɔn ɔ, nyɔna tɛ mǐ ka nɔ mɔ?

⁷ Mǐ nɔ sɛkpɔ́ Jehovah hugǎn. Kpɔ́n kpɔ́ndéwú mɛxo agun tɔn e nɔ nyí Samuel, * b’ɛ kpo asì tɔn kpo ɖò sinsɛnzɔ́ wà wɛ ɖò Colombie é tɔn. Asú kpo asì kpo enɛ ɖò sinsɛnzɔ́ gbexosin-alijitɔ́ tɔn sín vivǐ ɖu wɛ ɖò agun yeɖesunɔ tɔn mɛ. Amɔ̌, é wá jló ye ɖɔ ye ni d’alɔ agun e ɖò hudo mɛ tawun é ɖé dó vlɔ́nkan nú sinsɛnzɔ́ yetɔn. Cobonu ye ka na kpé enɛ wu ɔ, ye ɖó na sɔ́ nǔɖe lɛ dó savɔ̌ hwɛ̌. Samuel ɖɔ: “Mǐ zán wěɖexámɛ e ɖò Matie 6:33 mɛ é, bo ɖó nǔ e ma ɖò dandan ǎ lɛ é xixɔ te. Xwé mǐtɔn gbè gigosin wɛ nyí nǔ e vɛwǔ nú mǐ hugǎn é. Lee mǐ ba gbɔn é wɛ ye gbá gbɔn, bɔ axɔ́ tɔn ɖě ka lɛ́ ɖò kɔ nú mǐ ǎ.” Ee asú kpo asì kpo ɔ, sɛ̀ tɛn yì agun yɔyɔ̌ ɔ mɛ é ɔ, ye mɔ ɖɔ akwɛ e sín hudo emi nɔ ɖó dìn é hwe tawun hú  ɖ’ayǐ tɔn. Samuel ɖɔ: “Mǐ mɔ lee Jehovah xlɛ́ ali mǐ, bo lɛ́ na sinkɔn nú ɖɛ mǐtɔn lɛ gbɔn é. Mǐ mɔ ɖɔ nǔ mǐtɔn nyɔ́ Jehovah nukúnmɛ, b’ɛ lɛ́ yí wǎn nú mǐ dìn tawun hú ɖ’ayǐ tɔn.” A ka sixu vlɔ́nkan nú sinsɛnzɔ́ towe ɖò ali ɖé nu à? Enyi a wà mɔ̌ ɔ, a sixu kúdeji ɖɔ a na vɛ́ kpo Jehovah kpo, b’ɛ na kpé nukún dó wǔ we.—Ðɛh. 18:26.

8. Etɛ xó e Ivan kpo Viktoria kpo ɖɔ é ka kplɔ́n we?

⁸ Mǐ nɔ mɔ awǎjijɛ ɖò sinsɛnzɔ́ mǐtɔn mɛ. Ðǒ ayi nǔ e Ivan kpo Viktoria kpo ee ɖò sinsɛnzɔ́ gbexosin-alijitɔ́ tɔn wà wɛ ɖò Kirghizistan é ɖɔ é wu. Ye hɛn gbɛzán yetɔn bɔkun bo na dó sixu sɔ́ yeɖée jó nú sinsɛnzɔ́ ɖebǔ, kaka jɛ tuto xɔ gbigbá tɔn lɛ jí. Ivan ɖɔ: “Mǐ w’azɔ̌ syɛnsyɛn ɖò azɔ̌ e è ɖè nú mǐ lɛ é ɖokpo ɖokpo kɔn. Nǔ nɔ cikɔ nú mǐ ɖò gbadanu lɛ có, xomɛ nɔ hun mǐ, ɖó mǐ tuùn ɖɔ mǐ zán hlɔnhlɔn mǐtɔn dó w’azɔ̌ syɛnsyɛn nú Jehovah. Xɔ́ntɔn yɔyɔ̌ e mǐ zun lɛ é kpo nǔ ɖaaɖagbe e mǐ mɔ kpɔ́n lɛ é kpo lɔ nɔ dó xomɛhunhun nú mǐ.—Mak. 10:29, 30.

9. Etɛ nɔví nyɔnu e ɖò ninɔmɛ syɛnsyɛn ɖé mɛ é ɖé ka wà dó vlɔ́nkan nú sinsɛnzɔ́ tɔn? Etɛ mɛ é ka tɔ́n kɔ dó?

⁹ Mǐ na bo tlɛ ɖò ninɔmɛ vɛwǔ lɛ mɛ ɔ, mǐ nɔ mɔ awǎjijɛ ɖò sinsɛnzɔ́ Jehovah tɔn mɛ. Ði kpɔ́ndéwú ɔ, hwenu e Mirreh ee nyí asúkúsi mɛxomɔ ɖé bo nɔ Gbadahweji Aflika tɔn é yí gbɔjɛ ɖò dotóozɔ́wiwa linu é ɔ, é jɛ gbexosin-alijitɔ́zɔ́ wà jí. Mirreh nɔ jɛ azɔn syɛnsyɛn e nɔ zɔ́n bɔ zɔnlin ɖiɖi nɔ vɛwǔ é ɖé, bɔ ganxixo ɖokpo jɛn é sixu zán dó ɖɔ Mawuxó sín xwé ɖé gbè jɛ xwé ɖé gbè. Amɔ̌, é nɔ kpéwú bo nɔ zán hwenu gegě ɖò kúnnuɖiɖe agbawungba tɔn mɛ hugǎn. É ɖó mɛbakpɔ́n kpo Biblu kplɔnkplɔn kpo gegě, bo nɔ ylɔ́ ye mɛ ɖé lɛ gbɔn alokan jí. Etɛwu Mirreh ka nɔ ba na wà nǔ gegě nú Jehovah? É ɖɔ: “Wǎn yí nú Jehovah kpo Jezu Klisu kpo gɔ́ ayi ce mɛ. Gɔ́ na ɔ, un nɔ xoɖɛ hwɛhwɛ sɛ́dó Jehovah ɖɔ é ni d’alɔ mì bonu ma wà nǔ e wu un kpé é bǐ ɖò sinsɛnzɔ́ tɔn mɛ.”—Mat. 22:36, 37.

10. Lee 1 Piyɛ́ɛ 5:10 xlɛ́ gbɔn é ɔ, etɛ Jehovah ka nɔ na mɛ ɖěɖee vlɔ́nkan nú sinsɛnzɔ́ yetɔn lɛ é?

¹⁰ Jehovah nɔ kplɔ́n azɔ̌ gegě mǐ. Kenny e ɖò sinsɛnzɔ́ gbexosin-alijitɔ́ tɔn wà wɛ ɖò île Maurice é mɔ ɖɔ nǔgbo wɛ nyí xó enɛ. Hwenu e é mɔ nǔgbo ɔ é ɔ, é jó kplɔnyiji-alavɔ yiyi dó bo bló baptɛm, lobo jɛ sinsɛnzɔ́ hwebǐnu tɔn wà jí. É ɖɔ: “Un nɔ tɛ́n kpɔ́n bo nɔ wà nǔ gbeyiɖɔ Ezayíi e ɖɔ xó elɔ é ɖɔhun: ‘Nyɛ na yì, sɛ́ mì dó.’” (Eza. 6:8) Kenny ɖ’alɔ ɖò tuto xɔgbigbá tɔn gegě mɛ, bo lɛ́ d’alɔ bɔ è lilɛ wema jinjɔn Biblu jí gegě dó anɔ̌nugbe tɔn mɛ. Kenny ɖɔ: “È kplɔ́n azɔ̌ mì ɖò lee un na wà sinsɛnzɔ́ ce ganji gbɔn é linu.” Amɔ̌, enɛ kɛɖɛ wɛ é kplɔ́n ǎ. É lɛ́ ɖɔ gɔ́ na ɖɔ: “Un kplɔ́n nǔ dó nǔ e un ma sixu wà ǎ lɛ é wu, bo lɛ́ kplɔ́n nǔ dó jijɔ ɖěɖee un ɖó na sɔnǔ na bo na nyɔ́ zán nú Jehovah kpo nɔví lɛ kpo hugǎn lɛ é wu.” (Xà 1 Piyɛ́ɛ 5:10.) Hwi lɔ sixu gbéjé ninɔmɛ towe lɛ kpɔ́n ɖɔ a ka na sixu sɔ́ hwiɖée jó bonu Jehovah na kplɔ́n azɔ̌ we gɔ́ na à jí.

11. Gǎn tɛ lɛ nɔví nyɔnu e ɖò Corée du Sud é ɖé lɛ ka dó bo na dó vlɔ́nkan nú sinsɛnzɔ́ yetɔn? Lè tɛ enɛ ka hɛn wá nú ye? (Lɛ̌ kpɔ́n ɖiɖe e ɖò akpa ɔ jí é.)

¹¹ Enyi Kúnnuɖetɔ́ e tlɛ ko mɔ nǔ kpɔ́n lɛ é ba na tɛ́n sinsɛnzɔ́ alɔkpa yɔyɔ̌ ɖé kpɔ́n ɔ, è nɔ kplɔ́n azɔ̌ ye. Ðò jɛmɛji Covid-19 sín táan mɛ ɔ, agun Corée du Sud tɔn ɖé sín mɛxo agun tɔn lɛ wlán ɖɔ: “Mɛ ɖěɖee lanmɛ yetɔn zɔ́n bɔ ye nɔ lin ɖ’ayǐ ɖɔ emi kún sixu ɖɔ Mawuxó ɖò gle ɔ mɛ ó é ɖé lɛ nɔ wà mɔ̌ dìn gbɔn visioconférence jí. Nɔví nyɔnu atɔn ee xwè yetɔn ɖò 81 jɛ 89 vlamɛ é kplɔ́n lee è nɔ zán ɔdinatɛ́ɛ dó wà mɔ̌ gbɔn é, bɔ dìn ɔ, ɖibla nyí hwe lɛ bǐ nu wɛ ye nɔ ɖɔ Mawuxó.” (Ðɛh. 92:15, 16) A ka ba na vlɔ́nkan nú sinsɛnzɔ́ towe dó ɖɔ́  xomɛnyínyɔ́ Jehovah tɔn kpɔ́n hugǎn à? Kpɔ́n nǔ e a sixu wà bo na dó kpé enɛ wu é ɖé lɛ.

12. Akpá tɛ Jehovah ka dó nú mɛ ɖěɖee nɔ ganjɛ wǔtu tɔn lɛ é?

¹² Kplɔ́n bo nɔ ganjɛ Jehovah wu. É d’akpá nú mǐ ɖɔ enyi mǐ ɖeji dó emi wu bo na nǔ e wu mǐ kpé é bǐ emi ɔ, emi na kɔn nyɔna dó mǐ jí. (Mal. 3:10) Nɔví nyɔnu ɖé nɔ nɔ Colombie bo nɔ nyí Fabiola, bo mɔ ɖɔ Jehovah bló bɔ akpá enɛ jɛnu ɖò gbɛzán emitɔn mɛ. É ba na huzu gbexosin-alijitɔ́ hwebǐnu tɔn ɖò baptɛm tɔn gudo tlolo. Amɔ̌, é ɖó na w’azɔ̌ dó sú hudo xwédo tɔn tɔn lɛ sín dò. Enɛ wu ɔ, hwenu e é byɔ ɖɔ é ɖó na yí gbɔjɛ ɖò azɔ̌ mɛ é ɔ, é xoɖɛ vívɛ́ sɛ́dó Jehovah bo byɔ alɔdó. É ɖɔ: “Nǔ ganji ɔ, é nɔ ɖu hwenu gegě cobɔ è nɔ jɛ akwɛ sú mɛ e ɖò gbɔjɛ mɛ lɛ é jí, amɔ̌ sun ɖokpo gudo jɛn è jɛ ce sú jí. É jiwǔ nú mì!” Sun we gudo ɔ, é jɛ gbexosin-alijitɔ́zɔ́ wà jí. Dìn ɔ, xwè 70 jɛji ɖó wɛ é ɖè, bo ko ɖò gbexosin-alijitɔ́zɔ́ wà wɛ sín xwè 20 jɛji ɖíe. Ðò xwè enɛ lɛ vlamɛ ɔ, é d’alɔ gbɛtɔ́ tantɔn bɔ ye bló baptɛm. É ɖɔ: “Gǎn nɔ vɔ ɖò wǔ ye hweɖelɛnu có, gbè bǐ gbè wɛ Jehovah nɔ d’alɔ mì bonu ma sixu kpò ɖò gbexosin-alijitɔ́zɔ́ ce wà wɛ.”

13-14. Kpɔ́ndéwú tɛ lɛ ka sixu d’alɔ mǐ bɔ mǐ na ɖeji dó Jehovah wu, bo vlɔ́nkan nú sinsɛnzɔ́ mǐtɔn?

¹³ Kpɔ́ndéwú mɛ ɖěɖee ganjɛ Jehovah wu lɛ é tɔn ni kplɔ́n nǔ we. Kpɔ́ndéwú mɛ ɖěɖee zé yeɖée jó bǐ mlɛ́mlɛ́ nú sinsɛnzɔ́ Jehovah tɔn lɛ é tɔn gegě wɛ ɖò Biblu mɛ. Ðò ninɔmɛ gegě mɛ ɔ, mɛsɛntɔ́  Jehovah tɔn enɛ lɛ tó ɖè afɔ nukɔntɔn ɔ hwɛ̌ cobɔ Jehovah kɔn nyɔna dó ye jí. Ði kpɔ́ndéwú ɔ, ee Ablaxamu gosin tò tɔn mɛ, “ma tuùn fí e é xwé é,” gudo é jɛn Jehovah kɔn nyɔna dó jǐ tɔn. (Ebl. 11:8) Jakɔbu dó alɔ xá wɛnsagun ɖé hwɛ̌ cobɔ Jehovah kɔn nyɔna bǔnɔ ɖé dó jǐ tɔn. (Bǐb. 32:25-31) Hwenu e akɔta Izlayɛli tɔn xwè akpádídó-yikúngban ɔ jí é ɔ, vɔsanúxwlémawutɔ́ lɛ dó afɔ Judɛ́ɛn Tɔ̀ ɔ mɛ hwɛ̌ cobɔ mɛ e kpò lɛ é kpéwú bo d’asá tɔ̀ ɔ.—Joz. 3:14-16.

¹⁴ Kpɔ́ndéwú Kúnnuɖetɔ́ e ganjɛ Jehovah wu bo vlɔ́nkan nú sinsɛnzɔ́ yetɔn ɖò égbé lɛ é tɔn gegě sixu lɛ́ kplɔ́n nǔ we. Ði kpɔ́ndéwú ɔ, nɔví sunnu Payton kpo asì tɔn Diana kpo nɔ ɖu vivǐ tan nɔví sunnu kpo nɔví nyɔnu kpo ɖěɖee vlɔ́nkan nú sinsɛnzɔ́ yetɔn lɛ é tɔn xixa tɔn, ɖi mɛ ɖěɖee xó è ɖɔ ɖò xóta ɖebɔdoɖewu “Ye Zé Yeɖée Jó kpo Jlǒ Kpo” * glɔ́ lɛ é. Payton ɖɔ: “Enyi mǐ ɖò nǔ e ye mɔ kpɔ́n lɛ é xá wɛ ɔ, é nɔ cí nú mǐ ɖɔ mǐ ɖò mɛɖé kpɔ́n wɛ bɔ é ɖò nǔɖuɖu víví ɖé ɖu wɛ ɖɔhun. Bǎ e mɛ mǐ kpɔ́n mɛ ɔ yì ɖó é ɔ, bǎ enɛ mɛ wɛ mǐ nɔ ba na ‘ɖɔ́ Jehovah kpɔ́n bo kpɔ́n lee é nyɔ́ sɔ é’ yì ɖó.” Nukɔnmɛ ɔ, Payton kpo Diana kpo sɛ̀ tɛn bo na yì wà sinsɛnzɔ́ ɖò fí e hudo sukpɔ́ ɖè é. A ka ko xà xóta ɖebɔdoɖewu enɛ lɛ à? A ka ko kpɔ́n video e xóta tɔn nyí Prédication dans des régions isolées: Australie kpo Prédication dans des régions isolées: Irlande kpo ee ɖò jw.org jí lɛ é à? Xóta enɛ lɛ sixu d’alɔ we bɔ a na ba ali e nu a sixu vlɔ́nkan nú sinsɛnzɔ́ towe ɖè lɛ é.

15. Nɛ̌ gbɛ̌ ɖagbe lɛ didó ka sixu d’alɔ mǐ gbɔn?

¹⁵ Dǒ gbɛ̌ ɖagbe lɛ. Enyi mǐ ma ɖu nǔɖe kpɔ́n ǎ, bo ɖò kpɔ́ xá mɛ e ɖuɖu tɔn nɔ víví na lɛ é ɔ, blewun jɛn mǐ lɔ sixu jɛ ɖuɖu jí. Mɔ̌ ɖokpo ɔ, enyi mǐ nɔ dó gbɛ̌ xá mɛ ɖěɖee Jehovah sinsɛn nɔ mya nukún na ɖò gbɛzán yetɔn mɛ lɛ é ɔ, mǐ nɔ ba ali ɖěɖee nu mǐ na vlɔ́nkan nú sinsɛnzɔ́ mǐtɔn nú Mawu ɖè lɛ é hugǎn. Kent kpo Veronica kpo ee nyí asú kpo asì kpo ɖé é mɔ ɖɔ nǔgbo wɛ nyí xó enɛ. Kent ɖɔ: “Xɔ́ntɔn mǐtɔn lɛ kpo xwédo mǐtɔn kpo dó wusyɛn lanmɛ nú mǐ ɖɔ mǐ ni tɛ́n sinsɛnzɔ́ alɔkpa vovo lɛ kpɔ́n. Mǐ mɔ ɖɔ gbɛ̌didó xá mɛ ɖěɖee nɔ sɔ́ Axɔ́suɖuto ɔ ɖó tɛn nukɔn ɔ mɛ lɛ é nɔ zɔ́n bɔ mǐ ɖó jiɖiɖe, bo nɔ tɛ́n nǔ yɔyɔ̌ lɛ kpɔ́n.” Kent kpo Veronica kpo nyí gbexosin-alijitɔ́ titewungbe dìn ɖò Serbie.

16. Lee nǔjlɛdonǔwu Jezu tɔn e ɖò Luki 12:16-21 mɛ é xlɛ́ gbɔn é ɔ, etɛwu mǐ ka ɖó na ɖò gbesisɔmɛ bo na sɔ́ nǔɖe lɛ dó savɔ̌?

¹⁶ Sɔ́ nǔɖe lɛ dó savɔ̌ dó Jehovah takúnmɛ. É byɔ ɖɔ mǐ ni jó nǔ e sín vivǐ mǐ nɔ ɖu lɛ é bǐ dó cobonu nǔ mǐtɔn na nyɔ́ Jehovah nukúnmɛ ǎ. (Nǔt. 5:19, 20) É ɖò mɔ̌ có, enyi mǐ ma ba na wà nǔ gegě ɖò sinsɛnzɔ́ Jehovah tɔn mɛ ǎ, ɖó mǐ ba na savɔ̌ ɖé lɛ ǎ wutu ɔ, mǐ sixu wà nǔ ɖokpo ɔ nyi dò nya e xó è ɖɔ ɖò nǔjlɛdonǔwu Jezu tɔn mɛ é ɖɔhun. Nya enɛ wɔn ya nú Mawu bo sɔnǔ nú nǔ gegě bo na dó zán vivomɛninɔ gbɛ̀. (Xà Luki 12:16-21.) Nɔví sunnu ɖé nɔ nyí Christian bo nɔ nɔ France, bo ɖɔ: “Un nɔ zán hwenu ce kpo hlɔnhlɔn ce kpo nabi ɖé nú Jehovah kpo xwedó ce kpo ǎ.” É kpo asì tɔn kpo wá gbeta ɔ kɔn bo na nyí gbexosin-alijitɔ́. Amɔ̌, cobonu ye na kpé enɛ wu ɔ, ye ɖó na jó agbazazɔ́ yetɔn dó hwɛ̌. Bo na dó kpé nukún dó yeɖée wu ɔ, ye jɛ azɔ̌ klewun ɖé wà jí b’ɛ kúnkplá ayǐjlajlaɖó, bo lɛ́ kplɔ́n bɔ nǔ kpɛ e ye mɔ é nɔ kpé ye. Vɔsisa enɛ ka hɛn lè wà nú ye à? Christian ɖɔ: “Mǐ ɖò sinsɛnzɔ́ mǐtɔn sín vivǐ ɖu wɛ dìn, bɔ enyi mǐ mɔ Biblu kplɔntɔ́ mǐtɔn lɛ kpo mɛbakpɔ́n mǐtɔn lɛ kpo ɖò nǔ kplɔ́n dó Jehovah wu wɛ ɔ, é nɔ víví nú mǐ.”

17. Etɛ ka d’alɔ nɔví nyɔnu ɖé bɔ é tɛ́n nǔ yɔyɔ̌ ɖé kpɔ́n ɖò sinsɛnzɔ́ tɔn mɛ?

 ¹⁷ Nɔ ɖò gbesisɔmɛ bá tɛ́n sinsɛnzɔ́ ɔ sín akpáxwé yɔyɔ̌ lɛ kpɔ́n. (Mɛ. 17:16, 17, nwt; 20:20, 21) Ðò jɛmɛji Covid-19 sín táan mɛ ɔ, é byɔ ɖɔ Shirley e nyí gbexosin-alijitɔ́ ɖé ɖò États-Unis é ni ɖyɔ alɔ ɖò sinsɛnzɔ́ tɔn sín ali nu. Ðò bǐbɛ̌mɛ ɔ, é xò nǔ kpɔ́n dó tintɛnkpɔn bo na ɖekúnnu ɖò alokan jí wu. Amɔ̌, ee è kplɔ́n azɔ̌ ɛ ɖò mɛbakpɔ́n nukúnkpénuwutɔ́ lɛdo tɔn tɔn hwenu gudo é ɔ, é jɛ wɛn ɔ jlá gbɔn alokan jí jí hwɛhwɛ. É ɖɔ: “Ado hu mì ɖò bǐbɛ̌mɛ, amɔ̌ dìn ɔ, un nɔ ɖu vivǐ tɔn tawun. Mǐ nɔ ɖɔ xó nú mɛ gegě dìn tawun hú hwenu e mǐ nɔ ɖɔ Mawuxó gbɔn xwégbe xwégbe é.”

18. Enyi mǐ ɖò tintɛnkpɔn wɛ bo na vlɔ́nkan nú sinsɛnzɔ́ mǐtɔn ɔ, etɛ ka sixu d’alɔ mǐ bɔ mǐ na ɖí xwi xá wuvɛ̌ lɛ?

¹⁸ Blǒ tuto ɖé, bo jɛ azɔ̌ jí. Enyi mǐ mɔ wuvɛ̌ lɛ ɔ, mǐ nɔ xoɖɛ dó byɔ alɔdó bo nɔ lɛ́ lin tamɛ ganji dó nǔ e mǐ sixu wà é jí. (Nǔx. 3:21) Sonia e ɖò sinsɛnzɔ́ gbexosin-alijitɔ́ hwebǐnu tɔn wà wɛ ɖò kánɖó e nɔ dó Roumanie-gbè é ɖé mɛ ɖò Elɔpu é ɖɔ: “Un yí wǎn nú nǔ e gbé nya wɛ un ɖè lɛ é winwlán dó wema jí, bo nɔ sɔ́ wema ɔ dó fí e è sixu yawǔ mɔ ɖè é. Ðiɖe ali we e kpanta fí vovo é tɔn ɖé ɖò tavo ce jí. Nú un ja gbeta ɖé kɔn wá gbé ɔ, un nɔ kpɔ́n ali we enɛ lɛ, bo nɔ lin tamɛ dó ali e gbeta e kɔn un na wá é na mlɛ́ é jí.” Sonia tɛ́n kpɔ́n bo nɔ ɖó linlin e sɔgbe é dó wuvɛ̌ e mɔ wɛ é ɖè lɛ é wu. É ɖɔ: “Ninɔmɛ yɔyɔ̌ ɖé sixu cí dǒ e na gbò kpò nyi ali jí nú mì bɔ un ma na sixu kpé gbeta ce lɛ wu ǎ é ɖé, alǒ anǎ e jí un sixu gbɔn dó kpé ye wu é ɖé ɖɔhun. Linlin e nyiɖesunɔ ɖó dó ninɔmɛ ɔ wu é wu wɛ é na sín.”

19. Nɛ̌ mǐ ka sixu ɖexlɛ́ ɖɔ xomɛnyínyɔ́ Jehovah tɔn sù nukún mǐtɔn mɛ gbɔn?

¹⁹ Jehovah nɔ kɔn nyɔna dó mǐ jí ɖò ali gegě nu. Mǐ sixu wà nǔ e wu mǐ kpé é bǐ dó kpa susu nú Jehovah dó xlɛ́ lě dò nyɔna enɛ lɛ sù nukún mǐtɔn mɛ gbɔn é. (Ebl. 13:15) Enɛ sixu byɔ ɖɔ mǐ ni gbɔn ali yɔyɔ̌ e hun nú mǐ lɛ é sín yɛkan mɛ dó vlɔ́nkan nú sinsɛnzɔ́ mǐtɔn, enɛ ɔ, Jehovah na kɔn nyɔna dó mǐ jí hugǎn. Mi nú mǐ ni nɔ ba ali e nu mǐ na ‘ɖɔ́ Jehovah kpɔ́n bo kpɔ́n lee é nyɔ́ sɔ é’ ɖè é gbè bǐ gbè. Enɛ ɔ, mǐ na wà nǔ sɔgbe xá xó elɔ, Jezu ɖɔhun: “Nǔɖuɖu ce wɛ nyí ɖɔ ma bló jlǒ mɛ e sɛ́ mì dó ɔ tɔn, bo ka wà azɔ̌ e é zɔ́n mì ɔ yì kpé.”—Jaan 4:34.