1-2. Dapré Sòm 34:8, ka pou nou fè pou nou vwè jan Jéova bon ?

IMAJINÉ yo ka ba-w manjé on biten ou pò’ò jen gouté. Avan ou koumansé manjé-y, ou ké pran tan a-w pou gadé-y byen, ou ké pran lòdè a-y, ou ké chèché a sav ka i ni adan, oben ou ké mandé dòt moun kijan yo yo touvé-y. Men sé enki lèwvwè ou ké gouté-y ou ké sav si ou enmé-y.

² Sé konsa osi nou ké pé vwè jan Jéova bon. Lè nou ka li Labib é sé piblikasyon-la é lè nou ka kouté lézòt rakonté-nou kijan Jéova béni-yo, sa ka aprann-nou onlo biten. Men méyè mannyè pou nou vwè jan Jéova bon, sé lè nou ka vwè sa noumenm an nou. Pousa, fò nou gouté bonté a-y (li Sòm 34:8). Imajiné kè ou anvi vin pyonyé pèwmanan pa ègzanp. Pétèt kè fò ou ké fè ansòt pou vi a-w vin pi senp. Pétèt ou ja li plizyè fwa adan Labib kè Jézi pwomèt kè Jéova ké ba moun ki ka mèt Wayòm-la prèmyé douvan an vi a yo tousa yo bizwen. Men pétèt kè voumenm a-w ou po’o jen viv sa (Mat. 6:33). Men konm ou ka fè Jézi konfyans, ou ka òwganizé-w pou dépansé mwens lajan, pou pasé mwens tan adan travay a-w, é pou pasé plis tan an prédikasyon. Lè ou ka vwè jan Jéova ka béni-w, a moman-lasa ou ka gouté pou vwè jan Jéova bon.

3. Dapré Sòm 16:1, 2, èvè kimoun Jéova ka aji épi bonté ?

³ Jéova ka aji épi bonté èvè toutmoun, menm èvè moun ki pa konnèt-li (Sòm 145:9 ; Mat. 5:45). Men i ka fè sèwten biten èspésyalman pou moun ki enmé-y é ki ka sèvi-y èvè tout tchè a yo (li Sòm 16:1, 2). Aprézan, an-nou vwè déotwa bon biten Jéova ka ban-nou.

4. Kijan Jéova ka aji épi bonté èvè moun ki vlé vin zanmi a-y ?

⁴ Chakfwa nou ka mèt sa Jéova ka anségné-nou an pratik, nou ka vwè jan sa ka fè-nou dibyen. Lè nou aprann konnèt Jéova é kè nou vin enmé-y, i édé-nou woté mové  lidé nou té ni an tèt an nou é i édé-nou arété fè sèwten biten ki pa té ka fè-y plézi (Kol. 1:21). É lèwvwè nou ba-y vi an nou é kè nou pran lèbatèm, sé a moman-lasa nou rèsanti jan i aji èvè bonté èvè nou pas i ban-nou on bon konsyans é i pèwmèt-nou vin bon zanmi èvè-y (1 Pyè 3:21).

5. Lè nou ka préché kijan nou pé vwè jan Jéova ka aji èvè bonté épi nou ?

⁵ Nou ka vwè osi jan Jéova ka aji épi bonté èvè nou lè nou ka préché. Pa ègzanp, èskè ou sé on moun ki timid ? Ni onlo adan nou ki konsa. Sèten avan ou té vin Témwen a Jéova ou pa té’é jen imajiné ou té’é ay douvan pòt a on moun ou pa konnèt pou palé-y dè Pawòl a Bondyé. É poutan jòdijou sé sa ou ka fè, ou jous ka fè-y chak simenn. É pli bèl la, grasa Jéova, alèla ou enmé préché. Anplisdisa, ou vwè jan i édé-w osi an prédikasyon plizyè fason diféran. Pa ègzanp, lèwvwè ou tonbé asi on moun ki fè kòlè èvè-w, Jéova édé-w rété kalm. I pèwmèt-vou touvé bon vèwsé-la pou édé on moun mésaj a Wayòm-la té ka entérésé. É i ba-w fòs pou ou kontinyé préché menm lèwvwè mésaj-la pa té ka entérésé sé moun-la (Jér. 20:7-9).

6. Kijan fòwmasyon-la Jéova ka ban-nou la ka montré kè i ka aji èvè bonté épi nou ?

⁶ Jéova ka aji èvè bonté èvè nou ankò lè i ka fòwmé-nou pou kò an nou vin pibon an prédikasyon (Jan 6:45). Pannan réinyon an nou ki ka fèt chak simenn, nou ka gadé dé ti vidéo ki fèt pou ban-nou on lidé asi sa nou pé di an prédikasyon é yo ka ankourajé-nou sèvi èvè sé lidé-lasa lè nou ka préché. Odépa, pétèt kè nou pa té two cho pou fè sa yo montré-nou adan sé vidéo-la, men anfinaldikont, nou rann-nou kont kè sa ka maché byen adan téritwa-la. Lè nou k’ay réinyon é lè nou k’ay lasanblé, yo ka ankourajé-nou éséyé nouvo métòd pou nou préché é pétèt nou pò’ò té jen éséyé sé métòd-lasa. Pou fè sa osi, pétèt fò nou ké chanjé labitid an nou. Men si nou fè sa, Jéova ké béni-nou. Alèla an-nou ègzaminé déotwa bon biten Jéova ka ban-nou lè nou ka sèvi èvè dé nouvo métòd an prédikasyon pou fè plis ba-y kèlkèswa sitiyasyon an nou. Aprésa nou ké vwè ka pou nou fè pou rivé atenn òbjèktif an nou.

7. Ki byenfé nou ka jwenn lè nou ka chèché a fè plis an prédikasyon ?

⁷ Nou ka vin pibon zanmi èvè Jéova ankò. An-nou vwè ègzanp a Samuel *, on ansyen ki ka viv an Kolonbi. Li é madanm a-y té pyonyé é yo té anvi ay adan on lasanblé té ka manké pwoklamatè. Pou yo té rivé atenn òbjèktif a yo, fò yo té fè sakrifis. Mi sa Samuel ka di : « Nou mèt Matyé 6:33 an pratik é nou arété achté biten nou pa té vréman bizwen. Men sa ki té pi rèd la menm, sé kè fò nou té lésé kaz an nou. Yo té fè plan a kaz-lasa ègzaktèman kon nou té vlé é anplis nou té ja fin péyé kaz-la. » Lè yo rivé adan nouvo lasanblé a yo, Samuel é madanm a-y rann-yo kont kè yo pa té bizwen tout lajan-la yo té ka gangné avan la pou viv alèla. Mi sa Samuel ka di ankò : « Nou vwè jan Jéova édé-nou adan chak désizyon nou pran, é nou vwè osi jan i réponn a priyè an nou. Nou té ka santi kè nou té ka fè Jéova plézi é sé prèmyé fwa adan tout vi an nou kè nou santi lanmou a-y fò konsa. » Pétèt kè vou osi ou pé fè plis an prédikasyon. Ès ou ka  vwè kijan ou té’é pé fè sa ? Si ou ka fè sa, ou pé sèten kè ou ké vin pibon zanmi èvè Jéova é ou pé sèten kè i ké pran swen a-w (Sòm 18:25).

8. Ka ègzanp a Ivan é Viktoria ka aprann-nou ?

⁸ Sa nou ka fè pou Jéova ka ban-nou onlo jwa. An-nou gadé ègzanp a Ivan é madanm a-y Viktoria. Yo toulédé pyonyé o Kiwjistan. Yo toujou fè ansòt pou vi a yo rété senp pas yo té vé rété disponib pou yo té pé sa bay on pal siwvwè yo té bizwen moun pou on chantyé a konstriksyon. Mi sa Ivan ka rakonté : « A chakfwa yo té ka mandé-nou pou fè on biten, nou té ka travay rèd toubònman pou rivé fè-y. Menmsi an bout a chak jouné nou té krazé bon krazé la, nou té kontan pas nou té sav nou ba Jéova tout fòs an nou. Anplisdisa, nou vin ni onlo onlo bon zanmi, é nou viv onlo bèl biten toubònman » (Mawk 10:29, 30).

9. Magré sitiyasyon a on sè té difisil, ka i fè pou fè plis ba Jéova é ki byenfé sa pwokiré-y ?

⁹ Lè nou ka sèvi Jéova, sa ka mèt onlo jwa an tchè an nou menmsi sitiyasyon-la pa toujou fasil. An-nou vwè ègzanp a Mirreh, on vèv ki ja ni on ti laj é ki ka viv an Afrik dè Lwès. Avan, i té mèdsen é lè i pran rètrèt a-y, i vin pyonyé pèwmanan. Konm i ni awtwòz, i ni dimal a maché. Kifè, i pé pa fè plis ki inèdtan lè i ka préché dè kaz-an-kaz men, i pé préché pi lontan lèwvwè i ka fè prézantwa pa ègzanp. I ka viré vwè onlo moun bon nouvèl-la ka entérésé é i ni plizyè étid. É dépawfwa, i ka fè sé étid-la pa téléfòn osi. Ka ki ka ba Mirreh anvi fè tousa éfò ? Mi sa i ka di : « A pa ti enmé an enmé Jéova é Jézi. Souvantfwa, an ka mandé Jéova édé-mwen fè tousa an pé mwen fè plis ba-y » (Mat. 22:36, 37).

10. Dapré 1 Pyè 5:10, lè on moun ka chèché a fè plis pou Jéova, ka Jéova ka ba-y ?

¹⁰ Jéova ka fòwmé-nou. Sé sa on pyonyé ki ka rété lil Moris konstaté. Non a-y sé Kenny. Lè i vin konnèt lavérité, i arété ay linivèwsité, i pran lèbatèm é i vin pyonyé pèwmanan. Mi sa i ka di : « An ka fè tousa an pé mwen imité pwofèt Izayi ki di konsa : “Mi mwen ! Voyé-mwen”! » (Iz. 6:8). Kenny travay asi plizyè chantyé a konstriksyon é anplisdisa, i ni lokazyon travay èvè sèwten frè é sè pou tradui piblikasyon an nou adan lang a-y. Mi sa i ka rakonté : « Yo fòwmé-mwen é an aprann fè onlo biten é sa édé-mwen fè travay-la yo té ka ban-mwen fè la byen. » Men fòwmasyon-la i risivwè la, a pa té yenki pou aprann fè travay-la i té ni a fè la, pas mi sa i ka di ankò : « An aprann rèkonnèt limit an mwen é an vwè osi ki kalité pou an té travay pou an té pé sa fè plis ba Jéova é pou an té pé sa fè frè é sè an mwen dibyen » (li 1 Pyè 5:10). Men vou osi Jéova pé fòwmé-w konsa. Ès ou té’é pé òwganizé-w pou ba Jéova lokazyon fòwmé-w adan plis domenn ?

11. An Koré di Sid, sèwten sè fè onlo éfò pou yo té pé sa fè plis an prédikasyon. Ki éfò yo fè é ka sa pòté dè bon ba yo ? (gadé imaj-la ki anlè po a jounal-la).

¹¹ Menm frè é sè ki ka sèvi Jéova dépi lontan bizwen yo fòwmé-yo lè yo anvi éséyé dòt métòd pou yo préché. Pannan pandémi a Covid-19 la, mi sa sèwten ansyen a on lasanblé an Koré di Sid maké : « Ni sèwten frè é sè ki pa té pé préché onlo pas santé a yo pa té two flanbo. Men aprézan yo ka préché pa vidéokonférans. Ni 3 sè ki ja ni plis ki 80 lanné ki aprann mannyé òwdinatè, é aprézan, yo ka préché près touléjou pa vidéokonférans » (Sòm 92:14, 15). É vou, ès ou té’é  enmé fè plis adan prédikasyon-la é gouté jan Jéova bon pou pran gou a bonté a-y pibyen ankò ? An-nou vwè 6 biten ou pé fè pou rivé atenn òbjèktif-lasa.

12. Ka Jéova ka pwomèt moun ki ka fè-y konfyans ?

¹² Aprann mèt konfyans a-w adan Jéova. Lèwvwè on moun ka fè Jéova konfyans é kè moun-lasa ka ba Jéova sa i ni dè méyè, Jéova ka pwomèt-li kè i ké vidé onpakèt bénédisyon asi-y (Mal. 3:10). É sé sa ki rivé Fabiola, on sè ki ka viv an Kolonbi. I vwè sa an 2 zyé a-y. Tibwen tan apré i pran lèbatèm, i té vé vin pyonyé pèwmanan, men i té mayé, i té ni 3 timoun é fò i té travay pou fanmi a-y té ni asé lajan pou viv. Lè moman-la rivé pou i té pati an rètrèt, i sipliyé Jéova pou i té édé-y. Mi sa i ka èspliké : « An jénéral, lèwvwè ou ka dépozé on dosyé pou pran rètrèt a-w, sa ka pran onlo tan ! Men pou mwen, sa pran on mwa sèlman ! Sa té èstraòwdinè ! An sèten sé Bondyé ki mèt men a-y ! » 2 mwa apré, i té pyonyé pèwmanan. Jòdijou, i ni plis ki 70 an é sa ka fè plis ki 20 an i pyonyé pèwmanan. Pannan sé 20 lanné-lasa, i ni lokazyon édé 8 moun pwogrésé pou yo pran lèbatèm. Mi sa i ka di : « Délè an ka santi-mwen fèb, men chakjou an ka santi Jéova ka édé-mwen kontinyé sèwvis an mwen. »

13-14. Ki ègzanp ki pé édé-nou fè Jéova konfyans é atenn òbjèktif an nou ?

¹³ Pran ègzanp asi moun ki fè Jéova  konfyans. Adan Labib, ni onlo ègzanp a moun ki fè bon éfò toubònman pou yo té sèvi Jéova. Souvantfwa, sé enki lèwvwè yo montré Jéova kè yo té ni fwa adan-y kè i béni-yo. Abraam kité kaz a-y pou pati san menm « sav ola i té k’ay » é sé enki lèwvwè i fè sa kè Bondyé béni-y (Ébr. 11:8). Menmjan-la, sé enki lèwvwè Jakòb goumé èvè on zanj kè i rèsèvwa on bénédisyon èspésyal (Jén. 32:24-30). É lè nasyon a Izrayèl té k’ay rantré adan péyi-la Bondyé té pwomèt-yo la, sé enki lèwvwè sé prèt-la mèt pyé a yo adan dlo a Jouden-la kè pèp-la rivé travèsé-y (Joz. 3:14-16).

¹⁴ Ni onlo frè é sè ki ka viv a épòk an nou ki té anvi fè plis pou Jéova. Yo mèt konfyans a yo adan-y é yo rivé atenn òbjèktif a yo. Ou pé pran ègzanp asi yo. An-nou palé dè Payton é madanm a-y Diana. Yo té enmé li istwa a sé frè é sè-lasa ki òwganizé-yo pou fè plis pou Jéova. Pa ègzanp, yo té ka touvé sé ègzanp-lasa adan ribrik-la : « Ils se sont offerts volontairement * ». Mi sa Payton ka rakonté : « Lèwvwè nou té ka li sé istwa-lasa, nou té ni lenprésyon kè nou té ka gadé sé moun-la manjé on bon manjé douvan nou. Pi nou té ka gadé-yo é pi nou té anvi gouté pou vwè jan Jéova bon. » Finalman, Payton é Diana ay enstalé-yo adan on téritwa té ka manké pwoklamatè. É vou, ès ou ja li sé awtik-la ki adan ribrik-lasa ? Ès ou ja gadé vidéo kon Prédication dans des régions isolées : Australie é Prédication dans des régions isolées : Irlande, kè nou ka touvé asi sit an nou jw.org ? Pétèt kè ou ké touvé dé bon ti lidé ki ké ba-w anvi fè plis pou sèvi Jéova.

15. Lè nou ni bon zanmi, kijan sa pé édé-nou ?

¹⁵ Frékanté moun ki ka ankourajé-w fè plis pou Jéova. Nou ké rivé gouté on manjé nou pa konnèt pi fasilman siwvwè nou lantouré èvè moun ki enmé manjé-lasa. Menmjan-la, si nou ka frékanté moun ki ka mèt Jéova prèmyé douvan adan vi a yo, sa ké ban-nou anvi fè plis adan prédikasyon-la. Sé sa Kent é Veronica konstaté. Mi sa Kent ka rakonté : « Zanmi an nou é fanmi an nou té ka ankourajé-nou éséyé fè dòt biten pou sèvi Jéova. Lèfètkè nou té ka frékanté frè é sè ki té ka chèché a mèt Wayòm-la prèmyé douvan an vi a yo, sa ban-nou fòs-la nou té bizwen la pou éséyé dé biten nou pò’ò té jen fè avan. » Jòdijou, Kent é Veronica pyonyé èspésyal an Sèwbi.

16. Dapré ègzanp-la Jézi pran la an Lik 12:16-21, poukwa fò-nou paré a fè sakrifis ?

¹⁶ Fè sakrifis pou Jéova. Pou fè Jéova plézi, nou pa oblijé lagé tousa nou ni ! (Ékl. 5:19, 20). Men dépawfwa, pou fè plis an prédikasyon, fò-nou ké paré a fè sakrifis. Jézi té pran on ègzanp pou palé dè on boug rich ki té ka viv ti viv a-y alèz a-y men ki pa té ka okipé-y dè Bondyé. Nou pé rivé a fè menm érè ki boug-lasa si nou pa paré a fè sakrifis (li Lik 12:16-21). Mi sa Christian, on frè ki ka viv an Frans ka rakonté : « An konstaté kè an pa té ni tèlman tan pou Jéova é pou fanmi an mwen. » Alò, li é madanm a-y désidé vin pyonyé pèwmanan. Men pou yo té fè sa, fò-yo té chanjé travay. Kifè, yo monté on ti antrèpriz pou ay fè mennaj akaz a moun é adan biwo, é yo aprann viv èvè mwens lajan. Ès yo ka règrété tout sé sakrifis-la yo fè la ? Mi sa Christian ka  réponn : « Alèla, a pa ti enmé nou enmé préché ! É nou ka tèlman kontan lè nou ka vwè étidyan an nou é sé moun-la nou ka viré vwè la ka aprann konnèt Jéova ! »

17. Ka ki té’é pé anpéché-nou éséyé dòt métòd pou préché ?

¹⁷ Pa pè éséyé dòt métòd pou préché (Akt 17:16, 17 ; 20:20, 21). Shirley sé on pyonyé ki ka viv o Zétazini. Pannan pandémi a Covid-19 la, fò i té chanjé jan i té ni labitid préché. Odépa, i té on ti jan pè préché pa téléfòn. Men lèwvwè rèsponsab a siwkonskripsyon-la vin vizité lasanblé a-y, i aprann kijan pou i té fè. Mi sa i ka di : « Odépa sa té ka fan’an pè, men alèla, a pa ti enmé an enmé préché pa téléfòn ! An ka rivé jwenn sé moun-la pi fasilman ki lè an té k’ay douvan pòt a yo. »

18. Lèwvwè on biten ka anpéché-nou fè plis ba Jéova, ka ki pé édé-nou ?

¹⁸ Chwazi on òbjèktif é fè tousa ou pé pou atenn-li. Lèwvwè nou ka jwenn on difikilté, an-nou priyé Jéova pou mandé-y édé-nou pou nou pé sa vwè kijan pou nou rivé about a difikilté-lasa (Pwov. 3:21). Sonia, sé on pyonyé pèwmanan ki adan on gwoup ki ka préché ba moun ki ka palé romani an Éwòp. Mi sa i ka èspliké : « Sa an byen enmé fè, sé maké tout òbjèktif an ni asi on papyé, é an ka mèt papyé-lasa on koté pou mwen pé sa vwè-y touttan. Asi tab an mwen, an ni on désen a on katchimen é lèwvwè an ni on désizyon a pran, an ka gadé désen-lasa é an ka mandé-mwen ola désizyon-lasa ké menné-mwen. » Lèwvwè Sonia ka jwenn difikilté, i ka fè éfò pou vwè sé difikilté-lasa on mannyè ki pozitif. Mi sa i ka di ankò : « Chakfwa an ka touvé-mwen douvan on nouvo sitiyasyon, sé swa an ka vwè sa kon on masonn ki ka anpéché-mwen vansé, oben sé swa an ka vwè sa kon on pon ki ka pèwmèt-mwen kontinyé vansé. »

19. Ka fò-nou byen désidé a fè ?

¹⁹ Jéova ka béni-nou plizyè mannyè diféran. Nou pé montré-y rèkonésans an nou lè nou ka fè tousa nou pé pou louwé-y (Ébr. 13:15). Pa ègzanp, nou pé éséyé fè diféran biten pou sèvi Jéova. Jéova ké béni-nou plis ankò siwvwè nou fè sa. Touléjou a vi an nou, an-nou chèché dòt mannyè pou gouté é pou vwè jan Jéova bon. A moman-lasa, nou ké fè menm biten ki Jézi ki di konsa : « Nouriti an mwen, sé fè volonté a sila ki voyé-mwen la é fin travay a-y » (Jan 4:34).