1, 2. Salmo 34:8 tä niere erere, ¿Jehová töi kwin ye ni raba mike gare ño jai?

ANI töbike kukwe nebätä ni ñaka mrö kwetabare jire ye ni iti käkwe driedre nie. Aune bänä ño ye ni raba bämike ja töite rä, bä ño, dre dre kitani te aune ni mada töta nemen mrö ye kwetai ye nikwe ngwentari ye ngwane. Akwa mrö ye rabai bänänte ni kräke o ñakare ye rabadre gare nie yekäre nikwe bänä nuadre.

² Ye erere arato, Jehová töi kwin ye ni raba bämike ja töite nita ñäke Bibliabätä, täräkwatabätä aune Jehovata kukwe kwin mike nemen bare ño ja mräkätrebätä tä niere ye ngwane. Akwa Jehová töi kwin ye nikwe mikai gare akwle jai ye aibe ngwane rabai gare metre nie (ñäkädre Salmo 34:8 yebätä). * Ani bämike kukwe keteitibiti. Ni tö sribidi köbö täte te Jehová kräke, akwa yekäre ni rabadre nüne jondron braibebiti aune nikwe Gobran Ngöbökwe mikadre käne ngwane nita dre dre ribere jai ye Jehovakwe biandi nie ye ni tärä kukwe nuin bä kabre, akwa kukwe ye ñaka nemen bare jire chi nibätä (Mat. 6:33). Akwa yebiti ta, kukwe käbämikata Jesukwe ye ie nita tö ngwen yebätä nita nuainne, nita nemen nüne jondron braibebiti, ñaka sribire krubäte aune ja töi mike kwatibe kukwe driebätä. Nita ye erere nuainne ngwane metrere Jehovata ni ngübare ye tä nemen gare metre ta nie aune Jehová töi kwin ye tä nemen gare nie arato.

3. Salmo 16:1, 2 tä niere erere, ¿Jehovata kukwe kwin mike nemen bare nire nire kräke?

³ Jehová ye “töi kwin ni jökrä kräke” aune nire ie Jehová ñaka gare ye kräke arato (Sal. 145:9; Mat. 5:45). Akwa metrere nire tä Jehová tarere aune sribire ja nire tätebiti kräke, ye kräke metrere  niara tä kukwe kwin nuainne (ñäkädre Salmo 16:1, 2 yebätä). * Jehovakwe kukwe kwin meden meden nuainbarera ni kräke ye ani mike gare jai.

4. ¿Nitre tä kite nökrö Jehová ken ye kräke niara tä kukwe meden kwin nuainne?

⁴ Kukwe tä nemen gare Jehovabätä nie ye nita mike täte ngwane, nita nüne bäri kwin ye tä nemen gare metre nie. Jehová jatani gare nie aune ni jatani tarere ngwane, ni töi nämäne ño, ni nämäne ja ngwen ño ye köböite ni nämäne mente Jehovabätä yebätä nikwe ja töi ükaninte (Col. 1:21). Aune nikwe ja dianinkä mento bätä nikwe ja ngökani ñöte ngwane Jehovakwe ni töi mikani jäme aune ni mikani ja kete kwin kwe jabe, yebiti tä kukwe kwin mike nemen bare ni kräke ye nemen gare metre nie (1 Ped. 3:21).

5. ¿Jehovakwe kukwe kwin meden nuainbarera ni kräke kukwe driebätä?

⁵ Nita kukwe driere ngwane, Jehovata kukwe kwin mike nemen ni kräke ye tä nemen gare metre nie. ¿Kä jürä tä nemen mäbätä kukwe driekäre? Nitre Jehová mikaka täte kwati tä ja tuin kukwe yebe. Mä jämi ja mike Testiko Jehovakwe ngwane, ni ñaka gare mäi yekänti mä näin jukwe mete ye mäkwe ñaka bämikabare jire ja töite. Akwa nengwane bäsi käre mätä nuainne. Ne madakäre, Jehovakwe mä dimikani kukwe drie ye käi ngwen juto jabätä aune Jehovata mä dimike kukwe keta kabre mada känti ye namanina gare mäi. Ñodre, mätä kukwe driere ngwane nitre ñaka tä mä kain ngäbiti kwin, ye ngwane niarakwe mä dimikanina ja töi mike jäme. Aune ni iti tö namani kukwe mikai gare bäri jai ye ngwane texto meden bäri kwin ye Jehovakwe ngwani törö mäi. Aune nita kukwe driere ngwane nitre ñaka tä ni kukwe kain ngäbiti, yebätä niarata ja die bien nie ñaka ja di ngwankäre nekä (Jer. 20:7-9).

6. ¿Jehovata ni tötike yebiti töi kwin ni kräke ye bämikata ño kwe nie?

⁶ Jehovata ni kite kukwe driekäre yebiti niara töita kwin krubäte ni kräke ye bämikata kwe nie arato (Juan 6:45). Gätä nuainta bämä ngrabare yete nikwe kukwe driedre ño kwin ye mikata gare metre nie aune dre nemen gare nie ye ni töi mikata nuainne nita kukwe driere ngwane. Nita ja töi mike kukwe jene nuainbätä ngwane kä jürä raba nemen chi nibätä. Akwa nita nuainne ngwane, kukwe nieta nie nuainkäre ye tä kukwe kwin mike nemen bare ye tä nüke gare metre nie nita kukwe driere ye ngwane. Aune gätä aune gätä kri yebätä ni töi mikata kukwe jene jene nuainne kukwe driekäre nikwe ñaka nuainbare ye erere. Nita kukwe jene nuainne yebätä kä jürä raba nemen nibätä. Akwa nita nuainne ngwane, nita kukwe bien Jehovai ne kwe kukwe kwin nuaindre kwe ni kräke. Aune kukwe meden ben nita ja tuin akwa yebiti ta nita ja di ngwen kukwe jene jene nuainkäre Jehová mikakäre täte, yebätä niara tä kukwe kwin nuainne ni kräke ye ani mike gare ruäre jai. Biti nita kukwe mike nuaindre jai ye raba nemen bare ño nie ye nikwe mikai gare jai arato.

7. ¿Nita ja di ngwen kukwe driekäre bäri ngwane kukwe kwin meden tä nemen nikwe?

⁷ Nita nökrö bäri Jehová ken. Ni umbre ji ngwanka konkrekasionte kädekata Samuel, * abokän tä sribire Jehová kräke Colombia yebätä ani blite. Niaratre nämäne konkrekasion medente käne yete kä nämä jutobätä, akwa niaratre tö namani kukwe driei bäri aune konkrekasion meden nämäne ja di ribere bäri ye dimikai. Akwa ye rabadre bare ietre yekäre kukwe ruäre ñaka nuäre nuaindre ye nämene diandre jai ietre. Samuel tä niere: “Mateo 6:33 ye nunkwe mikaba täte aune nun ñan jatabara ngwian  gainte ngwarbe, akwa ju sribebare kwin nun kräke te nun nämä nüne, ye nunkwe ütiä bianbara ye ñaka rababa nuäre nun kräke tuametrekäre”. Niaratre nikani sribire Jehová kräke konkrekasion madate ngwane, niaratre ñan nämäne ngwian ribere krubäte jai käne täte ye nükani gare ietre. Samuel tä niere: “Jehovata nun jie ngwen ño aune tä orasion nunkwe kukwe nuin ño ye tuin metre nunye. Jehovata nun kain ngäbiti aune tä nun tarere ye bämikata kwe nunye nun ñaka tuabarera käne erere”. ¿Mä raba kukwe ruäre nuainne kukwe driekäre bäri? Ye erere ngwane, mä rabai nökrö bäri Jehová ken aune Jehovakwe mä dimikai ye tädre gare metre mäi (Sal. 18:25).

8. ¿Iván aune Viktoria tä dre niere yebätä dre nemen gare mäi?

⁸ Nita sribire Jehová kräke ye tä kä mike juto nibätä. Ja mräkätre gure kädekata Iván aune Viktoria, niaratre tä sribire prekursor erere juta kädekata Kirguistán yekänti ye tä dre niere yebätä ani töbike. Niaratre käkwe ja töi mikani nüne jondron braibebiti aune sribi ño erere nuainne Jehová kräke, ñodre ju sribere. Iván tä niere: “Sribi meden mika nämä nun kisete ye nun nämä ja di ngwen nuainkäre kwin. Nun nämä nüketa dere gwi ngwane, nun nämä nainte akwa ja nämä ruin jäme aune kwin nunye ñobätä ñan aune ja die yebiti nun nämä sribire Gobran Ngöbökwe kräke ye nämä gare nunye. Ja ketamuko ño kwanba nunye aune nunkwe dre nuainbare ye törö nunye ye tä kä mike juto nunbätä” (Mar. 10:29, 30, TNM).

9. ¿Meri testiko iti tä ja tuin kukwe tare ben ye käkwe dre nuainbare kukwe driekäre bäri aune dre namanina barebätä?

⁹ Nita ja tuin kukwe tare ben, akwa yebiti ta nita sribire Jehová kräke ye käi raba nemen juto nibätä. Ñodre, meri testiko niena umbre kän muko krütani nünanka África kädekata Mirreh nämäne sribire doctora erere, niara ñaka namanina sribi ye nuainne ngwane ja mikani prekursora kwe. Artritis tare krubäte täbätä aisete tä niken kukwe driere ju ju te ngwane raba nuainne ora kratibe te. Akwa kukwe drieta nitre jökrä ngwärekri yete niara raba kukwe driere bäri. Niara tä nitre kwati tuinbiti bätä tötike aune ruäre ye nuainta teléfono yebiti kwe. ¿Dre käkwe niara töi mikani sribire bäri Jehová kräke? Niara tä niere: “Jehová aune Jesús ye tare krubäte tikwe aune ti raba dre nuainne sribikäre bäri Jehová kräke, yebätä ti dimikadre kwe ye tita ribere käre ie” (Mat. 22:36, 37).

10. 1 Pedro 5:10 tä niere erere, ¿nitre tä ja di ngwen sribikäre bäri Jehovakrä ye kräke niara tä dre nuainne?

¹⁰ Jehovata ni tötike bäri. Kenny, tä sribi prekursor nuainne juta Mauricio yete ye ie kukwe ye metre namani gare. Kukwe metre namani gare ie ngwane universidad tuanimetre kwe, ja ngökani ñöte kwe aune ja töi mikani kwe sribire köbö täte Jehová kräke. Niara tä niere: “Tita ja di ngwen ja töi mikakäre ni Ngöbö kukwei niekä Isaías ye erere, niara käkwe niebare: ‘¡Tita nete! ¡Mäkwe ti juan!’” (Is. 6:8). Ju kabre sribebare yebätä Kenny sribibarera aune täräkwata kwitata kukwe kwe yebiti, yebätä niara sribibarera arato. Tä niere: “Ti tötikani ne kwe sribi meden tä ti kisete ye tikwe nuaindre kwin”. Akwa sribi nuaindre ño kwin kwe ye ñan aibe namani gare ie. Niara tä niere: “Ti ñan raba kukwe jökrä nuainne aune tita töi kwin meden ribere jai sribikäre bäri Jehová kräke ye namanina gare tie” (ñäkädre 1 Pedro 5:10 yebätä). ¿Dre dre tä ni kisete aune ni raba dre nuainne sribikäre bäri Jehová kräke ye ñobätä mä ñan töbikebätä?

11. ¿Meritre testiko nünanka Corea del Sur ye käkwe dre dre nuainbare kukwe driekäre bäri aune ye köböire dre namani bare? (Üai kena täräkwatabätä mikadre ñärärä).

¹¹ Nitre niena Jehová mike täte kä kwati krubäte te, akwa tätre ja töi mike jondron jene nuainne sribikäre bäri Jehová kräke ngwane, Jehovata tötike ye köböire kukwe mrä raba nemen gare ie. COVID-19 ne näire ja mräkätre umbre ji ngwanka nünanka Corea del Sur yete,  käkwe kukwe ne erere tikani: “Ja mräkätre tä bren ye köböite ñaka raba kukwe driere nämäne ruin ietre, akwa nengwane tätre nuainne videoconferencia yebiti. Ja ngwaitre nimä kä niena 80 biti käkwe ja tötikani kukwe driekäre jondron mrä yebiti aune ye köböire tätre kukwe driere bäsi köbö kwatire kwatire” (Sal. 92:14, 15). ¿Mä tö kukwe driei bäri aune Jehová raba kukwe kwinkwin meden nuainne mä kräke ye mä tö gai bäri? Nibike kukwe mike gare jai ja känenkäre ye käkwe mä dimikai nuainne.

12. ¿Nitre tä tö ngwen Jehovai ye ie niara tä dre käbämike?

¹² Nikwe ja di ngwandre tö ngwankäre Jehovai. Nita tö ngwen Jehovai aune nita sribire kwin niara kräke ngwane kukwe keta kabre kwin mikai nemen kwe ni kräke käbämikata kwe (Mal. 3:10). Kukwe käbämikata Jehovakwe ye tä mike nemen bare ye namani gare metre meri Testiko nünanka Colombia kädekata Fabiola ye ie. Niara ja ngökani ñöte ye bitikäre niara tö namani ja mikai prekursora, akwa muko kwe aune ngobo nimä kwe ye niara nämäne dimike sribi nämäne kwe yebiti. Aisete niarakwe kukwe ükaninte jai ja jubilakäre ngwane, ja di käräbare krubäte kwe Jehovai. Niara tä niere: “Täräkwata ükateta ne kwe pensión biandre nie ye käita niken raire ta, akwa tikwe täräkwata ükateba ye käi rikaba sö kratibe ta ngwane ti pensionaba. Kukwe ñan tuabare namani bare tibätä”. Sö nikani krubu ta ye bitikäre, niarakwe ja mikani prekursora. Kä nengwane kä niena 70 biti aune kä 20 näre te niara niena sribi prekursor ye nuainne, niarakwe nitre ni kwä dimikanina ja ngökö ñöte. Niara tä niere: “Ruäre ngwane jata nemen ruin di  nekä tie, akwa Jehovata käre ti dimike sribi ye nuainkäre köbö kwatire kwatire”.

13, 14. ¿Nitre kukwe kwin bämikani ye meden meden raba ni dimike tö ngwen bäri Jehovai aune sribire bäri kräke?

¹³ Nitre mada käkwe tö ngwani Jehovai yebätä mäkwe ja kita. Nitre kwati käkwe ja di ngwani Jehová mikakäre täte ye mikata gare Bibliabätä. Akwa bä kabre niaratre käkwe kukwe nuainbare käne, biti Jehovakwe kukwe kwin mikani nemen bare kräketre. Ñodre, Abrahankwe kä mikaninkä juta kwe yebätä, ye bitikäre Jehovakwe kukwe kwin mikani nemen bare kräke (Heb. 11:8). Ne madakäre, Jacob käkwe ja di nuani ángel iti ben ye bitikäre Jehovakwe kukwe kwin mikani nemen bare kräke (Gén. 32:24-30). Aune Juta Israel jatanina niken kä käbämikani ye kokwäre ngwane nitre Sacerdote ye nikani ñö kri Jordán yete ta käne, biti nitre Israelita nikani ta (Jos. 3:14-16).

¹⁴ Ja mräkätre kwati tä tö ngwen Jehovai aune tä ja di ngwen sribikäre bäri Jehová kräke kä ne näire, yebätä ni raba ja kite arato. Ñodre, ja mräkä kädekata Payton aune muko kwe, Diana, tö nämäne ñäkäi krubäte täräbätä, känti blitata nitre tä ja töi mike sribire bäri Jehová kräke yebätä. Ñodre, kukwe kädekata “Se ofrecieron para ayudar”. * Niara tä mike gare: “Nun nämä ñäke tärä ye kwrerebätä ngwane, ni iti tä mrö bänänte kwete ye kwrere bä nämäne nemen nun okwäte. Nun nämä ñäke bäribätä ngwane, bäri nun tö nämä kukwe ye mikai gare jai aune Jehová töi kwin ye gain”. Medente nitre ribeta bäri kukwe driekäre yete ja mräkätre gure ye nikani dimikakäre. ¿Mä tärä ñäke kukwe ne kwrerebätä? ¿Video kädekata Predicación en lugares apartados: Australia aune Predicación en lugares apartados: Irlanda, tä mikani jw.org ye mä tärä tuin? Kukwe jökrä ne raba mä dimike sribikäre bäri Jehová kräke.

15. ¿Nitre tä ni töi mike kwin yebe nita ja kete ye raba ni dimike ño?

¹⁵ Nitre käkwe mä töi mikadre kwin yebe mäkwe ja keta. Ni tö mrö bänä nuäi kena ngwane, nire nire töta nemen mrö ye kwetai yebe nita ja kete ye köböire rabai bäri nuäre ni kräke mrö ye bänä nuakäre. Ye erere arato, nitre tä ja töi mike kwatibe Gobran Ngöbökwe ye mikabätä käne, yebe nikwe ja ketai ngwane rabai bäri nuäre ni kräke sribikäre bäri Jehová kräke. Kukwe ye kwrere namani bare Kent aune Verónica yebätä. Niara tä mike gare: “Ja ketamuko nunkwe aune ja mräkätre nunkwe nämä nun töi mike sribikäre bäri Ngöbö kräke. Ja mräkätre meden töi nämä kwatibe Gobran Ngöbökwe ye mikabätä käne, yebe nun nämä ja kete ye nämä nun töi mike jäme kukwe mrä nuainkäre sribikäre bäri Jehová kräke”. Kä nengwane, niaratre nibu tä sribire prekursor especial erere kä Serbia yekänti.

16. Lucas 12:16-21 tä niere erere, ¿ñobätä ni tädre juto biare kukwe ñaka nuäre nuainkäre Jehová kräke?

¹⁶ Ni tädre juto biare kukwe ñaka nuäre nuainkäre Jehová kräke. Ni rabadre Jehová mike täte, yekäre nikwe kukwe jökrä kwin nikwe ye tuanemetre ye ñan ribeta (Ecl. 5:19, 20). Akwa ni ñaka tö kukwe ñaka nuäre nuaindi sribikäre bäri Jehová kräke ngwane, nita ja ngwen ni iti nämäne nüne kwin, akwa Ngöbö käi kwitaninkä kwe jabiti abokänbätä Jesukwe blitabare ye erere (ñäkädre Lucas 12:16-21 yebätä). Ja mräkä kädekata Christian, nünanka Francia, tä niere: “Ti ñaka nämä kä denkä jai aune sribire ja di tätebiti Jehová kräke bätä rabakäre gwairebe ti mräkätre ben”. Niara aune muko kwe käkwe ja töi mikani sribi prekursor nuainne, akwa ye rabadre bare ietre yekäre sribi kwetre tuanimetre kwetre. Niaratre jatani ju aune Oficina mike merebe yebiti niaratre jatani ja ngübare aune ye käi namani jutobätä. ¿Kukwe nuainbare kwetre ye namani kwin kräketre? Niara tä niere:  “Nitre tötikata aune tuabitita nunkwe ye kite Jehová mike gare bäri jai aune kukwe drie ye käi bäri juto nunbätä”.

17. ¿Ñobätä ja ñaka tä nüke törö nitre ie kukwe jene nuainkäre kukwe driekäre bäri?

¹⁷ Ni ja töi mikadre kukwe jene nuainne kukwe driekäre bäri (Hech. 17:16, 17; 20:20, 21). Meri Testiko kädekata Shirley nünanka Estados Unidos käkwe kukwe jene nuainbare kukwe driekäre bäri COVID-19 ye ngwane. Kenanbe ja ñaka nämäne nüke törö ie kukwe driekäre teléfono yebiti. Akwa ni circuito tuabitikä nükani konkrekasion kwe tuinbiti ngwane, raba kukwe driere ño teléfono yebiti ye driebare ie. Yete ja käne niara tä kukwe driere bäri teléfono yebiti. Niara tä mike gare: “Kenanbe kä jürä rababa krubäte tibätä, akwa nengwane tuin kwin tie. Nun nämä niken ju ju te ngwane nun ñaka nämä blite krubäte nitre ben, akwa nengwane nunta blite bäri nitre ben”.

18. ¿Kukwe tä ni ketebätä ñaka kukwe driekäre bäri yebätä dre raba ni dimike?

¹⁸ Mäkwe kukwe mika nuaindre jai aune mäkwe ja di ngwan mikakäre nemen bare. Nita ja tuin kukwe keteiti ben ngwane, nita orare Jehovai aune nikwe ja tuai ño kukwe yebe yebätä nita töbiketari kwin (Prov. 3:21). Sonia, tä sribi prekursor regular nuainne aune tä grupo blitaka romaní kä Europa ye dimike, niara tä niere: “Ti tö dre nuain ye ti töta nemen tikai täräbätä jai aune medente raba nemen tuin kwin tie yete tita mike. Ji niken kä keta kabre kokwäre ye üai tä mikani tikwe mesabiti, kukwe keteiti tä diandre jai tie ngwane tita üai ye mike ñärärä aune tikwe dre dian nuaindre jai ye rikai ti ngwena meden kokwäre yebätä tita töbike”. Sonia tä ja tuin kukwe tare ben ngwane tä töbike kwin ja käne. Niara tä niere: “Tita ja tuin kukwe mrä ben ngwane ye raba ti ketebätä ki ye kwrere o raba nemen puente ye kwrere ti kräke, ne kwe kukwe meden diani nuaindre tikwe jai ye rabadre bare tie. Tita ja töi mike ño ye ererebätä kukwe ye raba tuin tie”.

19. ¿Jehovata kukwe keta kabre bien nie yebätä nita debe bien ye ni raba bämike ño ie?

¹⁹ Jehovata kukwe kwin mike nemen bare ni kräke kukwe keta kabrebiti. Nita ja di ngwen niara käi kitakakäre ngwane, nita debe bien ye nikwe bämikai (Heb. 13:15). Ñodre nita kukwe jene jene nuainne kukwe driekäre bäri yebiti nikwe nuaindi. Nikwe ye erere nuaindi ngwane, Jehovakwe kukwe kwin mikai nemen bare bäri ni kräke. Aisete, käre nikwe kukwe känändre ne kwe Jehová töi kwin ye nikwe nikadre gare jai aune tuadre. Ye erere ngwane nikwe ja ngwain Jesús erere, niara käkwe niebare: “Ngöbö ti juanka tö dreye tikrä amne sribi ye abko tikwe mikadre bare täte jökrä, ye abko mrö kwrere tikrä” (Juan 4:34).