1-2. Nk’oku olwandiko lwa Zaburi 34:8 luderhere, bichi rhukwanene kujira yi rhuchibonera obwinja bwa Yehova?

WAZA amango muntu mulebe amakuha akalyo orhasaga kulyako chiro n’eliguma. Wakayiga bintu bilebe oku bilolere akola kalyo, omu kulola, omu kuhuniriza empumulo yako, omu kukavuya nawe, changwa omu kubaza akaba abandi nabo bakasimire. Aliko, njira nguma yonyine wakakolesa y’omenya akaba okasimire kuli kukahonjako wenyine.

² Rhwakayiga bintu bilebe oku bilolere obwinja bwa Yehova, omu kusoma Ebiblia n’ebitabu byerhu, n’okuyunviriza abandi amango bali baderha oku bilolere emigisho Yehova abahere. Aliko rhwachibonera okuntu Yehova ali mwinja bwenene amango ‘rhwamachihonjera’ rhwenyine obwinja bwage. (Osome Zaburi 34:8.) Hala omufano gurhuyigirize okuntu rhwakajira ntyo. Rhuderhe oku olonzeze kukolera Yehova omu kasi k’amango moshi, aliko, y’ohikira ogola muhigo, bikuhemere oyorohye akalamo kawe. Nkabaga onazigana kusoma echilagane cha Yesu chiderhere oku, amango rhwamahira Obwami oku nafasi y’oburhanzi omu kalamo kerhu, Yehova arhuhereza ebintu rhukenere. Aliko rhurhasaga kuchibonera oku Yehova ayeneza echola chilagane. (Mt. 6:33) S’ahubwe, omu kuyerekana oku rhugwerhe obwemere omu chilagane cha Yesu, rhwanayorohya akalamo kerhu, rhwanahindamula eprograme y’akasi kerhu k’omubiri, n’okukola nk’oku rhwakanagala omu kasi k’okuhubiri. Amango rhwamajira ntyo, rhwanachibonera oku kweri Yehova ali arhulagako n’okurhuhereza ebi rhukenere. ‘Rhwachihonjera’ rhwenyine obwinja bwa Yehova.

3. Nk’oku olwandiko lwa Zaburi 16:1, 2 luderhere, bande banabona obwinja bwa Yehova?

³ Yehova “ali mwinja ku boshi,” chiro kunabalala barhamuyinji. (Zb. 145:9; Mt. 5:45) Aliko, ahanene Yehova anahereza migisho  minene balala bamuzigira n’okumukolera n’omurhima gwabo goshi. (Osome Zaburi 16:1, 2.) Rhujage rhwaganira oku bintu biguma Yehova arhujirire.

4. Gurhe Yehova anayerekana obwinja bwage ku balala bamahwanza kumuyegera?

⁴ Amango moshi rhwamakolesa omu kalamo kerhu byoshi Yehova anarhuyigiriza, rhuchibonera okuntu anarhurhabala. Omufano amango rhwamayiga binene eju yage, n’ okuhwanza kumuzigira, anarhurhabala rhuleke okuwaza changwa okujira ebintu binamugayisa. (Kol. 1:21) N’amango rhwamachihaana emwa Yehova n’okubatizwa, rhunachibonera bwinja-bwinja obwinja bwage omu kurhuhereza ezamiri echere n’okurhurhabala rhugwarhe obwira bukomere haguma naye.​—1 Pe. 3:21.

5. Gurhe rhunachibonera obwinja bwa Yehova omu kasi kerhu k’okuhubiri?

⁵ Rhunagenderera kuchibonera obwinja bwa Yehova amango rhuli rhwakola akasi k’okuhubiri. K’oba muntu w’eshonyi? Bakozi ba Yehova banene baba ntyo. Nkabaga amango orhaliziba mukozi wa Yehova, orhaliwazize chiro n’akatyu oku wakakongorhere oku mulyango gwa muntu mulebe orhenji, n’okuhwanza kuganira naye oku bilolere Ebiblia. Aliko zene, okala oli wajira ntyo oku kahunda. N’ech’akamaro bwenene, kugerera oburhabale bwa Yehova, okala osimire akasi k’okuhubiri! Wachibwenere oburhabale bwa Yehova omu njira zinene. Akurhabere ogenderere kurhulera amango muntu mulebe amakubulira obukenge omu mahubiri. Kandi, akurhabere oyibuke olwandiko lukwanene washambalako n’omunviriza osimisizwe. Anali akuhereza emisi ogenderere kuhubiri chiro akaba abantu b’omu eneo barhalonzeze kukuyunviriza.​—Yer. 20:7-9.

6. Nka gurhe okuntu Yehova anarhukoomeza kurhuyerekere obwinja bwage?

⁶ Kandi, Yehova arhuyerekere obwinja bwage omu kurhukoomeza omu kasi k’okuhubiri. (Yoh. 6:45) Oku mbuganano yerhu y’ahagarhi k’eboso, rhunayunviriza emifano minene minja elolere ebintu rhwakaderha amango rhuli rhwahubiri abantu, nk’okuntu rhwakakolesa amola mawazo omu kasi k’okuhubiri. Mango maguma rhwakayubaha kukolesa njira ndebe nguma mpyahya y’okuhubiri. Aliko amango rhwamajira ntyo rhwakachibonera oku eyola njira mpyahya esimisize abantu b’omu eneo yerhu. Kandi oku mbuganano z’echibaga n’oku mbuganano zikulu, rhunahebwa omurhima rhukolese njira ziguma z’okuhubiri zirhasaga kukoleswa haba n’eliguma. Kandi echola chakarhuma rhwayubaha. S’aliko amango rhwamakolesa ezola njira, Yehova anarhugisha. Rhujage rhwashambala oku migisho miguma rhunagwarha amango rhwamakolesa enjira zihyahya, omu kujira okwerhu koshi rhugalire omu kasi ka Yehova, chiro akaba rhuli omu hali zoshi-zoshi. Kandi rhwashuba kushambala okuntu rhwakahikira emihigo yerhu

7. Migisho mihe rhunapata amango rhwamachihangana kujira binene omu kasi ka Yehova?

⁷ Rhunayegera Yehova kandi kulusha. Waza oku mufano gwa mushamuka muguma oyirikirwe Samuel, * oli wakolera omu Kolombia haguma na mukage. Oyola mwene-werhu na mukage baliri basimira akasi k’obupainiya omu chibaga chabo, aliko balisimire bakole binene oku kasi k’okuhubiri omu kurhabala echibaga chalikenere bwenene oburhabale. Yi bahikira ogola muhigo, balikwanene balekane na biguma omu bintu bakazaga kusima. Samuel aderhere ntya: “Rhwakolesa olwandiko lwa Matayo 6:33 n’okuleka kugula ebintu rhurhalikenere. Aliko echali rhukomerere bwenene, kwaliri kuleka enju yerhu. Yaliyumbakirwe okuntu rhwalisimire, rhurhalichihozeze efuranga mpu yi rhuyiyumbaka.” Amango bahamira omu chibaga chihyahya, bahwanza kukolesa furanga zigeke  kulusha ezibaliri bakolesa mira. Samuel ashubire derha ntya: “Rhwachibwenere oku Yehova ayerekeze entabu zerhu, n’okushubiza amasala merhu. Rhwachiyunva oku Yehova achivugire rhwabo, rhwanabona obuzigire bwage mu njira zinene kulusha oku rhurhasaga kubona.” Ka wakagala kukola binene omu kasi ka Yehova mu njira ziguma? Akaba ntyo, wachizera oku wayegera bwenene Yehova n’oku naye akushishikala.​—Zb. 18:25.

8. Bichi wayigire kugerera ebinwa Ivan na Viktoria baderhere?

⁸ Rhunagwarha omwishingo omu kasi kerhu. Yunva ebinwa mwene-werhu Ivan na mukage, Viktoria, bali bakola akasi k’obupainiya omu Kyrgyzstan baderhere. Bayorohya akalamo kabo, yi bagala kuchihaana kukola omu ngabane yoshi-yoshi kuhebaho n’akasi k’okuyumbaka. Ivan aderhere ntya: “Rhwakola binene mu ngasi ngabane. Chiro akaba rhwaliyunvirhe rhuluhire buli golo, rhwalichiyunvirhe rhugwerhe omurhula rhunatoshekere bulala rhuyinji oku rhwakoleseze emisi yerhu omu kasi k’Obwami. Kandi rhwayunva omwishingo bulala rhwaligwarhire abera bahyahya n’ebindi binene bisimisize.”​—Mk. 10:29, 30.

9. Bichi mwali-werhu muguma ogwerhe ebibazo ajirire y’akola binene omu kasi k’okuhubiri, na nyungu zichi abwene?

⁹ Rhunagwarha omwishingo omu kasi ka Yehova chiro akaba rhuli rhwahurana ebibazo. Omufano, mwali-werhu okala oshajire onali mukana oyirikirwe Mirreh, olamire omu Afrique de l’Ouest, apata epansyo oku kasi kage k’obunganga anahwanza kukola obupainiya. Mirreh alwere amaritizme manarhuma amagulu mamuluma bwenene, kandi akakola saa nguma yonyine omu mahubiri ma nju oku nju, aliko akagala kugeza kasanzi kanene omu mahubiri m’oku mugarogaro. Agwerhe bantu banene ali agalukira na mafunzo manene me Biblia, baguma omubo anabahamagala oku telefone. Bulagurhe Mirreh alonzeze kujira binene omu kasi ka Yehova? Aderhere ntya: “Omurhima gwani guyunjwire obuzigire ku Yehova na Yesu Kristu. Kandi nanzigana kusalira Yehova antabale nkole bwenene okunakagala omu kasi kage.”​—Mt. 22:36, 37.

10. Nk’oku olwandiko lwa 1 Petro 5:10 luderhere, bichi Yehova anahereza balala balonzeze kukola binene omu kasi kage?

¹⁰ Yehova anarhuyongerera bufundi bunene. Kenny oli wakola akasi k’obupainiya oku chizimba che Mauris, achibwenere obukweri bw’echola. Amango ayiga okuli aleka amasomo me iniversite, abatizwa, anahwanza kukolera Yehova omu kasi k’amango moshi. Aderhere ntya: “Nanchihangana kulama nk’oku ebinwa by’omulebi Isaya biderhere. Aderha ntya: ‘Nyono hano! Ontume!’” (Isa. 6:8) Kenny akolere oku makasi manene m’okuyumbaka anarhabere oku kasi k’okutafsiri ebitabu byerhu biyumangire oku Biblia omu lulimi lwage lw’akaburhano. Ashubire derha ntya “Nayigire bintu binene byantabere nyongere obufundi bwani n’okuntabala nkole bwinja engabane zani.” Aliko ayigire binene kulusha okuntu akamenya kukola akasi. Ayongerere ntya: “Namenyere ebintu ntakagala kukola n’engeso nkwanene nkuze yi mba mukozi mwinja wa Yehova.” (Osome 1 Petro 5:10.) Nkabaga nawe wakahindamula ebintu omu kalamo kawe yi Yehova akukoomeza mu njira zinene.

11. Bichi bali-berhu b’omu Korea ye Side bachihanganire kukola yi bahubiri bwenene, na nyungu zichi bagwarhire? (Olole efoto eli oku chiganda.)

¹¹ Chiro n’abantu bamakolera Yehova mu myaka minene, nabo bakenere kukoomezwa enjira zihyahya z’okukola akasi kage. Mu chinola chihe ch’obulwala b’okuyahukira bwe Korona (COVID-19), abashamuka ba chibaga chiguma ch’omu Korea ye Side, baderhere ntya: “Baguma baliri bawaza oku barhakagala kukola oku kasi k’okuhubiri bulala bali balwala, zene bakola bali bahubiri kugerera evideokonferanse. Bali-berhu bagwerhe myaka erhalukire 80,  bayigire okuntu bakakolesa e ordinatere yi bagala kuhubiri, banagenderere kujira ntyo hofi buli lusiku.” (Zb. 92:14, 15) K’osimire kukola binene omu kasi k’okuhubiri y’ochihonjera obwinja bwa Yehova bwenene? Rhuganire ku bintu biguma wakajira y’ohikira ogola muhigo.

12. Bichi Yehova alaganyize balala boshi bamulangalire?

¹² Oyige kulangalira Yehova. Arhulaganyize oku arhukolera bintu binene, amango rhwamamulangalira n’okumukolera nk’okurhwakanagala. (Mal. 3:10) Mwali-werhu muguma w’omu Kolombia oyirikirwe Fabiola, alichibwenere oku bwage okuntu Yehova ayenezaga echola chilagane. Alilonzeze abe painiya w’oku kahunda enyuma ntya y’okubatizwa. Aliko alikwanene kukola yarhabala kushishikala abantu b’omulala gwage. Bobola, amango aliri hofi kupata epansyo yage, asalira Yehova bwenene amurhabale. Aderhere ntya: “Ahanene binahema bisanzi binene y’omuntu apata epansiyo yage, aliko eyani erhalilegamire hagera mwezi muguma gonyine bayimpereza. Echola chaliri chisomerene!” Hagerere myezi ebiri ahwanza akasi k’obupainiya. Zene akola agwerhe myaka 70 ntya kandi amamala myaka 20 omu kasi k’obupainiya. Mw’akola kasanzi koshi, amarhabala bantu munane bahikire obubatizo. Aderhere ntya: “Chiro akaba oku nanyunva nzambire mango maguma, Yehova anatambala buli lusiku ngenderere kukola akasi kani k’obupainiya.”

13-14. Mifano ehe yakarhurhabala rhulangalire Yehova n’okulonza kukola binene omu kasi kage?

¹³ Oyige kugerera emifano y’abalala balilangalire Yehova. Ebiblia egwerhe emifano y’abantu bakolere bwenene omu kasi ka Yehova. Hali emifano minene eyerekene oku aliri  abagisha amango bamarhangajira echintu chiyekerene oku bamulangalire. Omufano, amango Abrahamu alekaga emwage, “chiro akaba oku arhaliyinji emunda aja,” m’amango Yehova amugishaga. (Ebr. 11:8) Amango Yakobo amalaga kulwa entambala y’okukumbagazana na malayika, m’amango apata omugisho gw’akamaro bwenene. (Mwa. 32:24-30) Amango Abaizraeli baliri hofi kuhika omu Chihugo Chilaganano, amango abadahwa bahira amagulu mabo omu Lwinji lwe Yordani, m’amango olubaga loshi lwagalaga kuyambuka olola lwinji.​—Yos. 3:14-16.

¹⁴ Washuba kugwarha enyungu kugerera eyindi mifano y’Abahamirizi b’omu siku zerhu, balangalire Yehova banalonza kujira binene omu kasi kage. Mwene-werhu oyirikirwe Payton na mukage, Diana, bakazaga kusima kusoma engani za bene-berhu na bali-berhu bakolere binene omu kasi ka Yehova, nk’ela myazi ekulikerene egwerhe erhwe liderhere “Bachihanire Bonyine oku Bulonza.” * Payton aderhere ntya: “Amango rhuyinja rhwasoma eyola myazi, rhwaliri rhwachiyunva nka muntu oli alola muntu mulebe oli alya akalyo kalokere. Oku rhwaliri rhwagenderera kulola, kurhwaliri rhwalonza bwenene ‘rhuhonje n’okubona oku Yehova ali mwinja.’” Buzinda, Payton na Diana bahama n’okuja kolera omu eneo ekenere bwenene abahubiri. Ka wasomere eyola myazi? Kandi, kawalolere evideo Okuhubiri omu Eneo ya Hale​—Australia na Okuhubiri omu Eneo ya Hale​—Irlande zili oku jw.org? Eyola myazi yakakurhabala omenye nka gurhe wakakola binene omu kasi ka Yehova.

15. Nka gurhe okuchishoga abera benja kwakarhurhabala?

¹⁵ Ochishoge abera benja. Amango rhuli n’abandi, binarhuyorohera kulya akalyo rhurhasaga kulyako. Konakuguma, amango nerhu rhwamajira obwira na balala basezeze akalamo kabo oku kasi ka Yehova, nkabaga nerhu rhwakalola okuntu rhwakalonza kukola binene omu kasi ka Yehova. Mwene-werhu muguma oyirikirwe Kent na mukage Veronica, balichibwenere obukweri bw’ebyola binwa. Kent aderhere ntya: “Bera berhu n’abantu b’omulala gwerhu banarhuheba omurhima rhukolere Yehova omu njira zilengene zihyahya. Rhwarhegera oku, okujira obwira haguma na balala bahebere Obwami oku nafasi y’oburhanzi omu kalamo kabo, kwarhurhabere rhumenye rhwayubaha kupima kukola akandi kasi kahyahya.” Zene Kent na Veronica balibakola nka bapainiya baminuzize omu Serbia.

16. Nk’oku omufano gwa Yesu guli omu Luka 12:16-21 guyerekene, bulagurhe rhukwanene kuba tayari kulekana na bintu bilebe?

¹⁶ Olekane na bintu bilebe eju ya Yehova. Birharhuhemere mpu rhuleke buli chintu rhusima mpu yi rhusimisa Yehova. (Muh. 5:19, 20) Aliko amango rhwamagangana kujira binene omu kasi ka Yehova mpu bulala rhurhalonzeze kulekana na bintu bilebe, rhwakajira egosa nka lila olala mulume w’omu mufano gwa Yesu ajiraga wayinjaga akola bwenene mpu y’agwarha birugu binene aliko arhalagaga oku bilolere Mungu. (Osome Luka 12:16-21.) Mwene-werhu muguma oyirikirwe Christian, olamire omu France, aderhere ntya: “Ntaliri nahaana akasanzi kani kanene n’emisi yani yoshi omu kukolera Yehova n’omulala gwani.” Yewe na mukage barhola omuhigo g’okuba bapainiya. Aliko, yi bahikira ogola muhigo, balikwanene baleke amakasi mabo. Yi bapata ebibakenere, bahwanza kukola akasi k’obusafi, banagwarha obusime b’okulama na furanga zigeke. Ka bagwerhe obusime bulala balilekere bintu biguma yi bagala kukola akasi k’obupainiya? Christian aderhere ntya: “Zene rhugwerhe obusime bwenene omu kasi kerhu k’okuhubiri, rhunagwerhe obusime b’okubona abantu rhulirhwagalukira  n’amafunzo merhu me Biblia bayiga oku bilolere Yehova.”

17. Bichi byakarhuma rhwagangana kukolesa enjira mpyahya omu kasi k’okuhubiri?

¹⁷ Obe tayari kukolesa enjira zihyahya z’okuhubiri. (Mdo. 17:16, 17; 20:20, 21) Shirley, mwali-werhu oli omu États-Unis, ahindamwire obulyo bwage b’okuhubiri mu chinola chihe ch’obulwala b’okuyahukira bwe Korona (COVID-19). Burhanzi aliri agangana kuhubiri abantu kugerera etelefone. Aliko enyuma y’okukoomezwa amango omwimangazi w’omuzunguluko alambagiriraga echibaga chabo, ahwanza kukolesa oku kahunda eyola njira mpyahya y’okuhubiri. Aderhere ntya: “Oku murhonderho, naliri nayubaha, aliko zene nkala nsimire eyola njira y’okuhubiri. Rhuli rhwagala kuganira na bantu banene kulusha abarhwaliri rhwabuganana nabo amango rhwaliri rhwahubiri nju oku nju!”

18. Bichi byakarhurhabala rhuhime ebibazo byakarhubuza kukola binene omu kasi ka Yehova?

¹⁸ Ochihebere omuhigo onachihangane kuguhikira. Amango rhwamahurana ebibazo, rhunasalira yi rhupata oburhabale n’okuwaza bwenene okuntu rhwakamala ebyola bibazo. (Mez. 3:21) Sonia, oli painiya oli akola omu chigusho ch’olulimi lwe Romania omu Bulaya, aderhere ntya: “Nansima kuyandika emihigo yani oku karatasi nanaja nahira akola karatasi ahantu kakabonekana juba-juba. Nachapire mabarabara mabiri oku karatasi kani. Na buli barabara lilolere olwage lunda. Amango nkalirhola omuhigo, nanalola kw’agola mabarabara mabiri n’okulola akaba esimikiro narholere lyakantabala mpikire omuhigo gwani changwa nanga.” Sonia anachihangana kugwarha amawazo makwirire oku bilolere ebibazo ali ahuruna nabyo. Aderhere ntya: “Buli hali mpyahya chakaba nka chibambazi ch’okumbuza menye nahikira omuhigo gwani changwa chilalo ch’okuntabala nguhikire.”

19. Bichi rhukwanene kuhigirira kujira?

¹⁹ Yehova anarhugisha mu njira zinene. Rhunayerekana oku rhusimire bwenene eyola migisho omu kujira okwerhu koshi rhugalire yi rhumulerhera obukuze. (Ebr. 13:15) Rhwakagala kujira ebintu bilengene omu kasi ka Yehova, naye anajashuba kurhugisha bwenene. Buli lusiku, rhulonzage enjira ‘rhwakahonjamo n’okubona oku Yehova ali mwinja.’ Rhukajira ntyo, rhwanaja rhwaba kuguma na Yesu, aderhaga ntya: “Ebilyo byani kuli kujira obulonza b’olala wantumaga n’okumala akasi kage.”​—Yoh. 4:34.